Þetta er einhver skrýtnasta, og um leið ömurlegasta frétt sem ég hef lesið lengi varðandi Liverpool: Lögregla rannsakar meinta kynþáttafordóma Steve Finnan í garð Patrice Evra, leikmanns manchester united í nýlegum leik þessara tveggja liða.

Beisiklí, þá er fréttin sú að tveir United-aðdáendur sem voru að horfa á leikinn í sjónvarpinu segjast hafa lesið ummæli af vörum Steve Finnan í garð Patrice Evra, ummæli sem eiga að hafa innihaldið kynþáttaníð.

Ian Cotton, talsmaður Liverpool FC, hefur brugðist við fyrir hönd klúbbsins með reiði og harðneitun:

“The only reason we know of it is through the media. The player vehemently denies these allegations. He has not used any such language.”

Liverpool ku hafa ráðið sína eigin varalesara til að fara yfir leikinn og segjast ekki hafa fundið neitt refsivert í sjónvarpsupptökum, og bæta því við að Steve Finnan sé mjög miður sín í kjölfar þessara fáránlegu ásakana.

Við skulum hafa eitt á hreinu, ég er og hef alltaf verið reiðubúinn að rífast harkalega við alla þá sem annað hvort stunda eða verja rasisma, hvar sem er. Kynþáttahatur er eitthvað sem verður að útrýma úr knattspyrnunni, okkur öllum til heilla, og það er bara fátt við íþróttina sem gerir mig reiðari en rasismi (sjá grein á minni eigin síðu um Samuel Eto’o). Þannig að ég tek það fram hér að EF Steve Finnan yrði fundinn sekur um að hafa stundað rasisma á fótboltavelli myndi ég ekki vilja sjá hann í Liverpool-treyju aftur. Alveg afdráttarlaust, aldrei aftur.

Það er hins vegar ansi stórt en … ég meina, á maður að stökkva upp á nef sér bara af því að tveir United-aðdáendur, af þeim fjölmörgu sem eru þarna úti, sáu ástæðu til að kvarta? Og hvers vegna er verið að nafngreina leikmanninn, og setja af stað mjög svo opinbera rannsókn á þessum ásökunum, þegar meira að segja lögreglan sjálf staðfestir að þessar ásakanir séu algjörlega óstaðfestar enn sem komið er?

Nafn Steve Finnan er svert fyrir vikið, hvort sem hann er saklaus eða ekki. Það finnst mér frekar lágkúruleg framkoma, að ef þetta eru bara tveir United-aðdáendur að reyna að ljúga uppá hann eða búa eitthvað til sem er ekki raunverulegt, að þá geti þeir komist svona langt með málið og náð að valda leikmanninum þetta miklum skaða.

Ég vona að þessu verði vísað frá sem rugli og bulli strax á morgun. Og svo vona ég að Steve Finnan lögsæki þessa tvo United-aðdáendur fyrir að sverta vísvitandi mannorð sitt. En ef í ljós kemur að hann gerðist sekur um það sem hann er sakaður um, þá stend ég við mína skoðun. Við sjáum til á næstu dögum.

e.s.
Finnan er víst meiddur á hálsi og spilar því ekki fyrir Írland gegn Svíþjóð annað kvöld. Það er ekki víst hvort þessi meiðsli muni hindra hann í að spila gegn Charlton um helgina, en við vonum það besta. Hann hefur verið frábær í vetur og það væri slæmt að missa hann, þótt það væri bara í einn leik.