Ég rúllaði áðan yfir lið vikunnar á nokkrum netmiðlum og við eigum fulltrúa í öllum liðum vikunnar og merkilegt nok þá eru liðin ekki svo mjög frábrugðin hvert öðru.

Hjá BBC eru þeir Finnan og Gerrard í liði vikunnar.
Hjá SkySports eru þeir Finnan, Gerrard, Hyypia og Kewell í liði vikunnar.
Hjá PremierLeague.com eru þeir Finnan og Hyypia í liði vikunnar.
Allir þessir netmiðlar eru með nokkuð svipað lið og eru t.d. Finnan í öllum þessum liðum. Hins vegar er síðan einn netmiðill, ESPNsoccernet.com, mjög ósammála hinum þremur og með allt öðruvísi lið og er Daniel Agger m.a. þar í liði vikunnar!, hvernig sem þeir finna það út.

Í öðrum fréttum þá er landsliðsþjálfari Hollands, Marco Van Basten, að gagnrýna Jan Kromkamp fyrir að hafa tekið vondar ákvarðanir á sínum atvinnumannaferli (er líklega að tala um þegar hann fór til Villareal frá AZ Alkmaar síðasta sumar). Van Basten segir þetta í framhaldi af því að Kromkamp var ekki valinn hollenska landsliðið sem mætir Ekvador í æfingaleik á miðvikudaginn. Kromkamp átti erfitt uppdráttar á Spáni en vonandi að hann nái sér á strik með Liverpool en það gæti reynst honum erfitt að slá Finnan út úr liðinu eins og hann spilar um þessar mundir.

Gerrard segist vera leikfær fyrir vináttulandsleikinn gegn Úrúgvæ á miðvikudaginn en hann hlaut smávægileg meiðsli í leiknum gegn Man City í tæklingu við naglann Richard Dunne. Rafa hefur hins vegar biðlað til Eriksson um að hann hvíli Gerrard í þessum leik, sérstaklega í ljósi þess að Sissoko sé frá út tímabilið.