26. febrúar, 2006
Jæja, þetta hafðist. Góður 1-0 sigur á Manchester City sem þýðir að við erum með jafn mörg stig og manchester united
auk þess að vera 8 stigum á undan Tottenham og 13 stigum á undan Arsenal. Ekki slæmt það!
Rafa stillti liðinu svona upp:
Reina
Finnan - Agger - Hyypiä – Riise
Kromkamp - Alonso - Gerrard - Kewell
Morientes - Crouch
Á bekknum sátu svo: Dudek, Cisse, Garcia, Hamann og Traore.
Við réðum gangi mála nánast allan leikinn. Menn komu dýrvitlausir til leiks eftir tap gegn Benfica í vikunni og blásið var til stórsóknar. Til marks um það fékk Liverpool fjórar hornspyrnur á fyrstu tíu mínútunum! Það var stanslaus pressa að marki City og markið virtist liggja í loftinu.
Það kom aftur á móti ekki og David James þurfti lítið að hafa fyrir hlutunum þrátt fyrir að vera eflaust stressaður í markinu. Eftir góða byrjun náði liðið ekki alveg að fylgja hlutunum eftir og fátt var um fína drætti. City ógnuðu nánast ekki neitt, áttu tvö slök langskot sem voru ekki á markið.
Alonso þurfti að yfirgefa völlinn eftir að hafa lent í samstuði við Joey Barton. Það fossblæddi úr Xabi og hann fór útaf fyrir Hamann. Eitthvað er talað um að hann hafi vankast og að sjón hans hafi ekki verið í fullkomnu lagi. Vonandi er þetta ekkert alvarlegt!
En síðan var komið að eina marki leiksins. Eftir sókn City barst boltinn út á miðjuna til Gerrard, sem tók boltann vel niður, sendi góða sendingu á
Harry Kewell sem óð að markinu og skoraði með skoti í fjærhornið. Frábært mark hjá Ástralanum! Crouch átti svo skalla undir lok fyrri hálfleiks þar sem City bjargaði á línu.
Síðari hálfleikur hófst á því að Joey Barton straujaði Sami Hyypia og fékk sitt annað gula spjald, það fyrra fékk hann eftir aðra fáránlega tæklingu, en þá á Agger. Það var ekkert hægt að kvarta yfir þessu og að mínu mati hárréttur dómur.
Þetta virtist þó bara efla gestina. Reina varði vel frá Bradley Wright-Phillips og svo stórkostlega frá Trevor Sinclair. Gott skot hans stefndi í samskeytin, ég tók andköf og var byrjaður að öskra andsk… þegar Reina flýgur upp í hornið og bjargar stórglæsilega. Samaras klúðraði svo dauðafæri eftir frábæra sending frá Musampa og maður var orðinn mjög hræddur!
En sem betur fer tókum við okkur á og hófum að sækja aftur. Crouch var í miklu stuði, áti skemmtileg skot með hælnum sem lak framhjá áður en James varði meistaralega frá honum skot sem hafnaði í þverslánni og út. Crouch sólaði sig svo í gegn en enn varði James var svo sannarlega betri en enginn fyrir City.
Leikurinn fjaraði síðan bara nokkurn veginn út… engin dauðafæri nema kannski gott skot frá Riise sem lenti vitlausu megin í hliðarnetinu.
Maður leiksins: Þetta er frekar erfitt val. Mér fannst Crouch vera virkilega góður og skilaði sínu mjög vel en vantaði bara markið. Kewell var líflegur en týndist aðeins á tímum en skoraði sigurmarkið og því hlýtur hann verðlaunin að þessu sinni. Harry Kewell maður leiksins.
Mér fannst Kromkamp skila sínu hlutverki á hæri kantinum með stakri prýði, hann átti nokkrar fyrirgjafir og hann og Finnan náðu vel saman. Agger var góður framan af en dalaði svo aðeins. Gerrard var samur við sig, átti mjög góðan leik.
Ég varð fyrir virkilegum vonbrigðum með Nando í leiknum. Hann átti að minnsta kosti þrisvar að gera miklu betur en hann gerði og það kom eiginlega ekkert út úr honum. Vil ekki hafa hann í byrjunarliðinu í næsta leik og fannst fáránlegt að taka Crouch útaf en ekki hann. En ég er aftur á móti ekki Rafa Benítez sem hefur haft sínar ástæður.
Ég er heldur ekki sáttur með eitt. Af hverju kláruðum við ekki leikinn? Við erum miklu betra lið en City og áttum að vinna þetta þrjú eða fjögur núll. Þess í stað vorum við ljónheppnir að þeir náðu ekki að jafna! Ég er ósáttur með það og þetta er langt frá því að vera í fyrsta skipti í vetur sem það gerist.
En maður gleðst allta yfir sigri og nú segir maður bara áfram Wigan!
Áttið þið ykkur á því hvað Kewell er orðinn mikilvægur í þessu liði? Hafið þið pælt í því hvað við erum heppin að hann skuli vera kominn inn sl. 2-3 mánuði af sama krafti og raun ber vitni, akkúrrat þegar Zenden meiðist og Gonzalez fær ekki atvinnuleyfi? Ómetanlegt að hafa hann þarna sterkan.
Vinstri bakverðir andstæðinganna eru undantekningarlaust farnir að taka töluverðan þátt í miðjuspilinu vegna þess að við ógnum ekkert þangað upp. Kannski ein af ástæðum þess að Benitez lætur Morientes vinna svo mikið aftur, svo við séum ekki undirmannaðir á miðjunni?! 
