24. janúar, 2006
Ég hálfpartinn bjóst við þessum pistli. Paul Tomkins var fljótur að renna á lyktina af blóði, en spjallarar á Liverpool-vefsíðum víða voru fljótir að finna sér blóraböggul fyrir tapleikinn á sunnudaginn. Blóraböggullinn að þessu sinni var Djibril Cissé, maðurinn sem vogaði sér að klúðra fyrir opnu marki. Vitaskuld er það algjörlega ósanngjarnt að ætla að kenna honum einum um tapið gegn United - slíkt er fásinna - en engu að síður verður að viðurkennast að það var eiginlega kominn tími á að við fengjum af stað smá umræðu um Cissé.
Nýjasti pistill Paul Tomkins: Djibril Cissé - Le Grande Enigma:
“Djibril Cissé is turning into one of Liverpool’s greatest. Of course, I mean greatest enigmas.
I’m a big fan of Cissé, but if he’s stretching my patience, it’s easy to conclude how his manager feels. His inconsistency doesn’t stretch match to match, but minute to minute. It’s enough to leave you pulling out your Mohican.
Cissé does some brilliant things: a great backheel, a stunning cross, a thumping shot, a burst of electric pace. But they are nearly always followed with a wayward pass, a simple error, a basic miscontrol.
His instincts seem at odds with his instructions. He’s a frustrating player, but also seems constantly frustrated with himself and with the world (on the pitch at least). At times he looks like he doesn’t even know what he’s doing, confused as to where he should run.”
Þetta er bara byrjunin á pistli sem ég mæli með að allir sem vilja ræða þetta mál eitthvað lesi, í heild sinni. Tomkins vindur sér að kjarna málsins í þessum pistli: Cissé er bæði vanmetinn og ofmetinn, hann er í senn alveg yfirnáttúrulega góður leikmaður og alls ekki nógu góður leikmaður. Með öðrum orðum, hann er einhver mest pirrandi leikmaður Liverpool um þessar mundir. Og með pirrandi, þá meina ég að maður veit aldrei hvernig hann mætir til leiks hverju sinni, hvort hann mun spila vel og skora/leggja upp mörk, eða hvort hann verður eins og á sunnudaginn þegar gjörsamlega ekkert gekk upp.
Ég er, eins og Tomkins, yfirlýstur Cissé-aðdáandi. Ég hef alltaf hrifist af þessum strák, allt frá því að hann var fyrst orðaður við Liverpool og ég fór að fylgjast með honum á EuroSport, þar sem mörkin úr frönsku deildinni eru sýnd reglulega. Það voru fáir jafn spenntir og ég þegar Cissé loksins skrifaði undir á Anfield sumarið 2004, en síðan þá hefur ferill hans þróast á annan veg en ég átti von á. Og þá er ég ekki bara að tala um meiðslin - þess fyrir utan, þá er Cissé frekar skrýtin týpa. Á annan bóginn er hann búinn að skora tólf mörk í vetur, næst flest á eftir Steven Gerrard, og virðist vera eini leikmaður liðsins fyrir utan fyrirliðann sem er eitthvað líklegur til að skora reglulega. Á hinn bóginn, þá hafa flest mörkin hans komið gegn lakari liðum, bæði í Úrvalsdeildinni og í Evrópu, en gegn liðum eins og Chelsea, manchester united
og Arsenal hefur hann yfirleitt ekki staðið undir væntingum. Markið hans (og frammistaðan) gegn Everton fyrir þremur vikum var eiginlega fyrsta skiptið sem ég man eftir að Cissé hafi lagt sín lóð á vogarskálarnar í stórleik Liverpool, en þó gæti mér skjátlast þar.
En allavega, mín skoðun er sú að Cissé er brilljant leikmaður sem virðist bara alls ekki passa í þetta Liverpool-lið í dag. Hann bæði hefur ekki skapgerðina til að þola það álag sem fylgir því að vera framherji hjá Liverpool (alltof fljótur að pirra sig á hlutunum þegar á móti blæs) og allt of misjafn til að hægt sé að stóla á hann í hverjum einasta leik (hann hefur skorað nærri þrefalt meira en Crouch í vetur en Crouch hefur leikið betur í nær hverjum einasta leik).
Eða, eins og Tomkins orðaði það:
“Despite his difficulties at Liverpool, I believe Cissé will go on to be a big success somewhere else. There is a hugely talented player in there, just dying to get out. But he will need another Guy Roux – a manager prepared to make him feel special.
But it does look like Liverpool need a new quick striker, to play off Crouch when Rafa is looking for pace on the break, given Morientes will never offer that.
…
With only a week left to the transfer window, it looks like Cissé will have four more months to prove himself at Liverpool, or for everyone to call it quits. I haven’t given up hope, but I’m also no longer holding my breath.”
Nákvæmlega. Ég ber ennþá þá von í brjósti að Cissé muni sanna gildi sitt og festa sig í sessi hjá Liverpool, en á sama tíma þá á ég minni von á því en áður. Í haust beinlínis bjóst ég við að hann yrði fastamaður í liðinu og myndi keppa um markakóngstignina í Englandi, en þótt hann hafi skorað slatta í vetur (þó ekki nóg í deildinni) þá hefur hann eiginlega frekar dvínað aðeins í áliti hjá mér ef eitthvað er. Þó hef ég ekki gefið upp alla von.
Hvað finnst mönnum? Á Cissé séns á að sanna sig hjá Liverpool eða eru dagar hans taldir, rétt eins og dagar Milan Baros voru taldir fyrir ári síðan? Og ef Cissé er ekki rétti fljóti framherjinn til að spila við hlið Peter Crouch og Fernando Morientes, hver er það þá? Michael Owen virðist augljós kostur, en fleiri?
p.s.
Cissé hefur leikið 59 leiki í öllum keppnum fyrir Liverpool og skorað í þeim 17 mörk. Fimm mörk í fyrra, tólf í vetur. Svona ef menn vilja vitna í tölfræðina (ítarlegri upplýsingar hér á lfchistory.net) …
