Enn ein helgin liðin og eftir leikinn okkar gegn Tottenham átti ég fastlega von á að sjá tvo menn í liðum vikunnar á stóru netmiðlunum ytra; þá Momo Sissoko og Harry Kewell. Miðlarnir voru samt langt því frá á sama máli þessa vikuna …

SoccerNet völdu Steven Gerrard í sitt lið vikunnar, eina Liverpool-manninn. Þar var enginn Tottenham-maður. En ég meina, er einhver sem horfði á leikinn á laugardaginn á þeirri skoðun að Steven Gerrard hafi verið yfirburðamaður á vellinum? Ég veit að fyrirliðinn okkar er súpergóður, en þessi Gerrard-dýrkun getur gengið of langt á tíðum.

BBC velja Riise, Gerrard, Sissoko og Kewell í lið vikunnar. Mér fannst Riise reyndar vera svona bara la la á laugardag, en mér þykir magnað að Garth Crooks sem velur liðið á BBC skuli hafa séð ástæðu til að velja þrjá Púllara í fjórar stöður á miðjunni. Greinilega hrifinn af leik okkar manna. Fimmti Púllarinn í liði vikunnar á BBC er svo Pepe Reina, sem mér finnst skrýtið. Ég meina, hafði ekki Paul Robinson miklu meira að gera? Ætti hann þá ekki frekar að vera þarna inni?

Sky Sports redda því með því að velja Paul Robinson í markið hjá sér. Eini Liverpool-leikmaðurinn í liði Sky Sports þessa vikuna er Harry Kewell. Hann og Gerrard eru því í liðum vikunnar hjá tveimur af þremur miðlum, en þeir Sissoko, Riise og Reina í einum af þremur.

Ágætis árangur. Vonum bara að Garth Crooks verði jafn hrifinn af Pepe Reina og miðjunni okkar eftir næstu helgi og hann var núna.