Jæja, þá eru 7 dagar í mikilvægasta leik tímabilsins hingað til.

Ég held að við getum nokkurn veginn gleymt því að Chelsea liðið hrynji uppúr þessu og því er vonin um annað sætið sennilega okkar helsta takmark og svo vonandi að ná að komast langt í FA Cup og Meistaradeildinni.

En við hreinilega verðum að ná öðru sætinu. Við erum núna einu stigi á eftir manchester united og eigum 2 leiki til góða. Ef við myndum vinna á Old Trafford, þá værum við komnir tveim stigum á undan manchester united með tvo leiki til góða. Það væri algjörlega frábært. Næsta lið er svo Tottenham, sem við erum 4 stigum á undan og eigum samt tvo leiki á þá líka.

Ég verð að játa að ég skil ekki alveg þetta manchester united lið. Ég hef horft á nokkra leiki með því í vetur og hefur fundist þeir vera langt frá því að vera sannfærandi. Ég veit að það eru mér margir ósammála, en mér finnst framherjaparið hjá manchester united vera það besta í ensku úrvalsdeildinni. Wayne Rooney hefur leikið frábærlega (og í raun sá eini, sem gæti ógnað því að Steven Gerrard verði valinn leikmaður ársins í ensku deildinni að mínu mati) og svo skorar Van Nilsteroy alltaf sín mörk.

Fyrir utan þessa leikmenn, þá er þetta manchester united lið hins vegar miðlungslið. Vörnin er hriplek með ofmetnasta varnarmann heims, Rio Ferdinand í fararbroddi. Kantmennirnir eru hæfileikaríkir, sérstaklega Ronaldo, en það kemur lítið úr þeim. Park hefur lítið fengið að sýna sig og Ryan Giggs er ekki jafn góður og hann var einu sinni.

Miðjan er svo hreinlega í molum hjá liðinu. Fyrir utan Paul Scholes, sem er kominn af sínu besta skeiði, þá eru hinir mennirnir hálfgerir brandarar. Já, Alan Smith, Fletcher og co eiga öðru hvoru góða leiki, en þeir eru samt ekki í sama stjörnukerfi einsog Gerrard, Lampard, Makalele og Alonso.

En þrátt fyrir þetta allt, þá er þetta manchester united lið samt að vinna leiki og þeir fóru í gegnum 11 leikja prógramm án þess að tapa. Þeir eru gríðarlega sterkir á heimavelli og eru eina liðið, sem hefur unnið Chelsea. Þess vegna er ég pínu hræddur.

En samt, þá er ég aðallega spenntur. Við erum í fyrsta skipti í mörg, mörg ár með sterkara lið en manchester united og eigum að geta klárað þá á Old Trafford.

Einsog hefð er fyrir, þá leyfum við hér á Liverpool blogginu okkur að vera eins ómálefnalegir og við viljum vikuna fyrir leiki gegn Man U.