EÖE: Hér birtum við gestapistil eftir Jónas Hallgrímsson, Liverpool aðdáanda, sem býr í Tókíó - Japan og er fréttaritari RÚV þar í landi.

Eins og menn hafa eflaust tekið eftir hefur Liverpool verið á blússandi siglingu undanfarnar vikur. Ég hef þá trú að sú spilamennska sem liðið hefur sýnt undanfarið sé ekki eitthvað sem fæddist yfir nótt, heldur sé hér að skila sér sú mikla vinna sem Rafael Benitez og félagar hafa lagt á sig allar götur síðan að Benitez tók við sumarið 2004. Mig langar hér að segja mína skoðun á Liverpool og leikmönnum þess. Mikið hefur verið rætt og ritað undanfarið um ýmis mál tengdu liðinu, m.a Crouch og Cisse. Eftirfarandi er mín skoðun á leikmönnum liðsins og stöðu mála um þessar mundir.

Nýr stjóri:

Ég viðurkenni fúslega að ég vissi ekki hver Rafael Benitez var þegar hann var fyrst nefndur til sögunnar sem næsti stjóri Liverpool. Árangur hans með Valencia talaði/talar hins vegar sínu máli. Mér leist strax vel á kappann. Hann lætur verkin tala, ekkert óþarfa málæði. Það er nokkuð sem mér líkar vel. Rafa leggur mjög hart að sér til þess að liðið nái sem bestum árangri. Hann sér hluti sem forveri hans í starfi sá ekki og hefur næmt auga fyrir því að kaupa góða leikmenn sem ekki eru á “stórstjörnuprísum”. Vill t.d. einhver skipta á Alonso, Sissoko og Morientes (sem samanlagt kostuðu um 20 milljónir punda) og þríeykinu Diouf, Diao og Cheyrou (sem Houllier keypti hér um árið fyrir svipaða upphæð)? Rafa hefur að mína viti eytt peningunum skynsamlega. Með nýjum stjóra koma einnig nýir menn. Þjálfararnir sem Rafa tók með sér frá Valencia hafa að mínu mati gert liðinu gott, þó að sjálfsögðu sé eftirsjá í mönnum eins og Sammy Lee.

Markverðir:

Persónulega hef ég ekkert á móti Dudek, þó má nefna að mér fannst hann stundum svolítið óöruggur. Ég er mjög ánægður með kaupin á Pepe Reina. Hann er að mínu viti peninganna virði og lofar góðu fyrir framtíðina. Hann er traustur, líkamlega sterkur og eldsnöggur að koma boltanum í leik. Skilar boltanum vel frá sér, getur kastað honum langt fram og sparkað yfir að markteig andsæðingana. Ég man t.d. ekki betur en hann hafi átt stoðsendinguna þegar að Cisse skoraði í Super Cup leiknum í haust. Scott Carson lofar einnig góðu.

Vörnin:

Ég tel að Finnan, Carragher, Hyypia og Riise sé okkar sterkasta vörn. Finnan er alltaf traustur (man að hann fékk minnstu athyglina á blaðamannafundi eftir að Houllier keypti hann, Kewell, Le Tallec og Pongolle, en Finnan hefur að mínu viti staðið sig best). Ég verð að segja að ég treysti Josemi aldrei í hægri bakvarðastöðuna og er því feginn að fá Kromkamp.

Carragher hefur eflst gífurlega síðan að Rafa setti hann í miðvörðinn. Hann virðist hafa tilfinningu fyrir því hvar hann á að vera, er alltaf á réttum stað á réttum tíma. Hyppia er einnig traustur þó vissulega sé hann ekki sá fljótasti í bransanum. Hann heldur samt alltaf ró sinni, sem er mikilvægt. Það er ljóst að það vantar mann eða menn í miðvörðinn til að leysa tvímenningana af. Ekki hægt að ætlast til að Carra og Hyypia leiki alla leiki. Mér líst vel á hinn danska Agger, sem er trúlega líkamlega sterkari en spænskir varnarmenn.

Riise er að mínu mati bestur kostur okkar í vinstri bakvarðastöðuna. Traore tæklaði menn oft frábærlega á síðustu leiktíð en hann gerði einnig nokkur slæm mistök. Það held ég að sé ástæða þess að hann er ekki fastamaður í liðinu í dag, ekki nógu “stabíll”. Warnock finnst mér heldur ekki nógu sterkur í stöðuna. Í hinni fullkomnu veröld eru menn með tvo góða menn í hverja stöðu, sem er án efa nokkuð sem Rafa stefnir að. Ég myndi ekki hafa á móti því að fá sterkan vinstri bakvörð. Patrice Evra er víst á förum frá Monaco, ótrúlegt að hann komi til Liverpool, en maður veit aldrei.

Miðjan:

Kaupin á Sissoko voru að mínu mati kaup ársins 2005 í ensku deildinni. Maðurinn er alltaf að og virkar vel sem afturáliggjandi miðjumaður. Góður sem eftirmaður Hamann, sem er nú farin að eldast og þar af leiðandi ekki lengur fyrsti kostur. Alonso er frábær með sínar nákvæmu sendingar og er líkamlega sterkari nú en hann var þegar hann kom til Liverpool. Gerrard er náttúrulega með ótrúlegan sprengikraft og æðir út um allan völl. Hefur komið vel út á kantinum, en á samt betur heima á miðjunni. Hægri kantmann verðum við að fá, er persónulega nokk sama hver það er svo framarlega sem viðkomandi kemur boltanum fyrir markið. Kewell er allur að koma til á vinstri kantinum, sem er mjög jákvætt, sérstaklega þar sem hann hrökk í gang um það leyti sem Zenden meiddist (sem þýðir að Riise getur verið í bakverðinum). Luis Garcia er eitthvað á millli þess að vera kantmaður og framherji. Góður leikmaður og laginn við að skora mikilvæg mörk, t.d. á móti Juventus í fyrra og á móti Bolton í síðasta leik. Var svolítið í því í upphafi síðasta tímabils að leika á sjálfan sig og missa boltann, en hefur lært að gera ekki of mikið af því.

Framherjar:

Crouch var keyptur á 7 milljónir punda sem mörgum þótti mikið (vissulega miklir peningar, en kostaði Heskey ekki 11 og Cisse 14?). Ég varð strax mjög hrifinn af Crouch. Sá strax í fyrsta leik að hann spilaði vel fyrir liðið, tók vel á móti boltanum og skilaði honum vel frá sér. Hann var harðlega gagnrýndur fyrir það hve illa honum gekk að skora, en mér finnst liðið leika betur með hann á vellinum. Svo fór hann að skora, sem fræðingar töldu bara tímaspursmál, og um leið hurfu gagnrýnisraddirnar. Það sem vantar eru fleiri fyrirgjafir frá hægri kanti, kemur vonandi með nýjum kantmanni í Janúar. Kewell hefur í undanförnum leikjum séð um fyrirgjafirnar frá vinstri, en vantar fleiri frá hægri til að hafa jafnvægi í þessu.

Það hefur tekið Morientes talsverðan tíma að aðlagast, en það er að skila sér. Eftir að hann skoraði í einhverjum leiknum um daginn upplýsti Rafa að Morientes hefði verið á sérstökum æfingum hjá Paco Ayesteran að undanförnu til þess að styrkja hann líkamlega. Sýnir hve vel Rafa og félagar vinna með leikmönnum sínum. Tók einhver eftir frammistöðu hans í leiknum gegn Newcastle um daginn? Hann stoppaði ekki allan leikinn, hljóp eins og óður og reyndi að trufla sóknir andstæðingana. Tókst það að mínu mati mjög vel.

Cisse er umdeildur leikmaður. Veit ekki hvort einhver er sammála mér, en ég er ekki viss um að hraði og skotkraftur dugi alltaf til að komast í gegnum varnir andstæðinganna (sérstaklega í nútíma knattspyrnu þar sem mikil áhersla er lögð á góðan varnarleik og erfitt að “labba” í gegn). Hraði og kraftur virkaði örugglega vel í Frakklandi, ég er hins vegar á því að hann þurfi að horfa aðeins meira í kringum sig og spila meira fyrir liðsfélagana. Finnst hann stundum sýna einum of mikla einstefnu, svipað og mér fannst Baros oft gera (með því að setja hausinn undir sig og líta ekki upp fyrr en hann var búinn að hlaupa sig út í horn). Ég óska þess að Cisse fari að spila meira fyrir liðið. Veit að hann getur gefið góðar stoðsendingar, ásamt því að skora. Hann þarf bara að gera meira af því. Og ekki þarf alltaf að sparka fast, nokkuð sem hann sannaði sjálfur þegar hann skoraði sigurmarkið á móti Everton.

Pongolle er mjög efnilegur, samt ekki viss um að hann sé framtíðarmaður í liðinu en gott að hafa hann í hópnum. Held að best sé fyrir hann að halda kyrru fyrir hjá Liverpool og reyna að sanna sig.

Þetta læt ég gott heita, enda búinn að koma frá mér því sem mér lá á hjarta. Væri gaman að heyra hvort einhverjir deili með mér sömu eða svipuðum skoðunum.

Jónas Hallgrímsson - Tokyo