05. janúar, 2006
Sky Sports segja frá því í dag að Fabio Aurelio hjá Valencia kunni að ganga til liðs við okkar í sumar. Aureliano, fyrir þá sem horfa ekkert á spænska boltann, er súpergóður vinstri bakvörður Valencia-liðsins en getur einnig spilað á miðjunni (s.s. fjölhæfur á svipaðan hátt og Riise). Hann er lykilmaður í liði Valencia en hefur einhverra hluta vegna ekki enn samið við þá um framlengingu á samningi sínum, sem rennur út í júní, og þar sem nú er janúar er honum heimilt að ræða og semja við önnur félög um félagaskipti, á frjálsri sölu, í sumar.
Það er í mínum huga ljóst að ef þessi strákur kæmi til okkar væri það frábært. Rafa fékk hann til Valencia á sínum tíma og myndi því vita nákvæmlega hvað hann er að “kaupa,” (munið: frítt) og ég get ekki lagt nógu sterka áherslu á það hversu mjög ég treysti Rafa varðandi leikmenn sem hann þekkir. Þetta er að sjálfsögðu bara slúður núna, en vonandi gengur þetta eftir. Vonandi.
Einnig: Rafa missir áhugann á Simao Sabrosa. Þessi frétt frá Liverpool Echo segir í stuttu máli frá því að Rafa hafi ekki í hyggju að gera tilboð í Simao Sabrosa í janúar, nema hann fái vilyrði fyrir því frá Benfica að þeir séu reiðubúnir að vera samvinnuþýðir. Sem þýðir: ekki láta eins og asnar, láta okkur sóa 20 dögum í að reyna að semja við ykkur og svo hækka kaupverðið á síðustu stundu.
Forseti Benfica-félagsins, Viera, gerði einmitt það undir lok ágúst. Öll sú vinna sem hafði farið í að gera klár kaupin á Simao (það er mikil vinna að redda átta milljónum punda og semja um öll kaup og kjör) fór fyrir ofan garð og neðan af því að þessi gaur gekk á bak orða sinna. Rafa, sem er ekki þekktur fyrir að beygja sig fram svo fólk geti betur [ritskoðað] hann í [ritskoðað], hefur því gert það eina rétta í stöðunni og gefið þessum gæja til kynna að það komi ekki til greina að reyna að semja við hann aftur nema að hann nánast ábyrgist að Benfica-menn muni ekki hafa Rafa og Rick Parry að fífli í þetta skiptið.
Sem sagt, boltinn er í horni Benfica-manna. Ef þeir vilja selja okkur Simao verða þeir að gefa það til kynna, og lækka matið á honum aðeins (Rafa mun s.s. aldrei borga 12 millur fyrir hann). Ef það gerist ekki verður Gerrard í byrjunarliðinu á hægri vængnum fram á vorið, sem er í fííínu lagi mín vegna. 
Búinn að laga þetta.
