Jæja, rétt í þessu var að ljúka leik Sydney FC frá Ástralíu og Deportivo Saprissa frá Kosta Ríka. Leiknum lauk með 1-0 sigri Saprissa-liðsins og það verða því meistarar Norður-Ameríku sem mæta Evrópumeisturum Liverpool í undanúrslitum á fimmtudaginn. Í hinum undanúrslitaleiknum mætast Asíumeistarar Al Jittihad og Suður-Ameríkumeistarar Sao Paulo.

En allavega, Saprissa-liðið var að enda við að vinna verðskuldaðan sigur á Dwight Yorke og félögum í Sydney FC, og hér kemur smá skýrsla um þá:

Sem sagt, þetta lið stillir upp mjög sterku og vel skipulögðu liði, með fimm leikmenn á miðjunni og einn frammi. Framherjinn, Alvaro Saborio, heldur boltanum mjög vel og er sterkur og duglegur að koma félögum sínum af miðjunni inn í leikinn, á meðan þeir eru með mjög marga fljóta og leikna menn á miðjunni.

Ég var sæmilega hrifinn af þessu Saprissa-liði í dag. Þótt Sydney-liðið væri meira með boltann og sótti meira í leiknum hafði ég allan tímann á tilfinningunni að Saprissa myndi fara með sigur af hólmi. Þeir voru einfaldlega skipulagðari, agaðri í sínum aðgerðum, komu með sitt plan í þennan leik sem gekk upp. Þá virtist Sydney-liðið dvelja of mikið á boltanum, njóta þess of mikið framan af að stjórna leiknum - sem þeir hefðu aldrei getað gert á móti Liverpool - á meðan Saprissa-liðið spilaði sterka vörn og beitti sterkum skyndisóknum, sem er leikaðferð sem er miklu vænlegri gegn liði eins og Liverpool.

Sigurmarkið kom strax í upphafi síðari hálfleiksins, og minnti um margt á jöfnunarmark Djibril Cissé gegn Spartak Moskvu í Súperbikar Evrópu hér í haust. Miðvörður Saprissa-liðsins, Drummond, átti þá langa sendingu innfyrir grunlausa vörn Sydney-manna og beint í fæturnar á vinstri kantmanninum Christian Bolanos. Þessi rétt rúmlega tvítugi vængmaður tók boltann niður með vinstri og setti hann svo öruggt framhjá markverði Sydney. 1-0, og þetta fornfræga lið frá Kosta Ríka þar með komið í undanúrslit Heimsmeistarakeppni Félagsliða.

Fornfrægt segi ég, því þeir hafa víst unnið deildina í heimalandi sínu 23 sinnum og 15 sinnum orðið í öðru sæti. Það kalla ég ágætan árangur. Þá státa þeir af þeirri frábæru tölfræði að hver einasti leikmaður í liði Saprissa er heimamaður, fæddur og uppalinn í Kosta Ríka. Það er að vissu leyti öfundsvert, gaman að sjá slíkt lið ná árangri.

Hins vegar … þá tel ég að þrátt fyrir gott skipulag og léttleikandi lið þá munu strákarnir okkar í Liverpool ekki eiga í teljandi vandræðum með þetta lið. Þeir spiluðu vel í dag og áttu sigurinn gegn Sydney-liðinu skilið, en gæðamunurinn er einfaldlega of mikill miðað við það sem ég sá í dag. Ákveðin svæði sem þeir skildu sífellt eftir í vörninni sem Steven Gerrard og Luis García munu nýta sér til að jarða þá, og svo eru þeir ekki það sterkir í loftinu að þeir ráði við Morientes og Crouch í heilar 90 mínútur. Þeir litu vel út í dag og voru betri aðilinn, sem segir kannski meira en mörg orð um Sydney FC sem menn hafa spáð góðu gengi í þessari keppni, en allt annað en öruggur sigur án þess að fá mark á sig á fimmtudaginn væri skandall.

Samt, það verður gaman að sjá þennan leik á fimmtudag. Það er altlaf gaman að sjá svona Davíð-gegn-Golíat leiki, jafnvel þótt maður haldi með Golíat.