23. september, 2005
Jæja, smá fréttir fyrir leikinn á morgun. Því miður mun Momo Sissoko, besti maður okkar það sem af er tímabils að mínu mati, missa af leiknum á morgun þar sem hann er með meiðsli í vöðva. Rafa talar um að hann sé ekki alvarlega meiddur en að þeir vilji ekki taka neina sénsa með hann, þannig að mér sýnist á öllu að það sé verið að leggja ofurkapp á að hafa hann heilann fyrir leikina tvo gegn Chelsea í næstu viku.
Líst ágætlega á það, verður gaman að sjá Sissoko berja á Lampard og félögum … en að sama skapi er þetta blóðtaka fyrir morgundaginn. Þessi strákur er búinn að vera stórgóður það sem af er tímabili.
Á hinn bóginn er nú talið líklegt að Fernando Morientes geti hugsanlega verið með á morgun. Hann hefur æft með liðinu undanfarna tvo daga og mun fara í læknisskoðun í kvöld, þar sem ákveðið verður hvort hann fer með til Birmingham eður ei. Ef hann verður í hópnum er ljóst að róður Djibril Cissé þyngist eilítið meir, ég efast um að það sé pláss fyrir bæði hann og Morientes á fimm manna varabekk Liverpool - þannig að ef Cissé fær ekki að byrja inná á morgun við hliðina á Crouch gæti ég vel ímyndað mér að hann verði ekki einu sinni í hópnum. Skrýtið, en satt.
Hvað Morientes varðar hlakka ég til að sjá hann koma aftur. Hann hefur væntanlega (vonandi) tekið smá stöðutékk á hlutunum þessar þrjár vikur sem hann var frá, og skoðað leik sinn aðeins, hvað má betur fara og slíkt. Ég vona allavega að hann snúi aftur hungraður í að sýna sig og sanna, því við þurfum á sterkum Morientes að halda í þessari baráttu sem er framundan í vetur.
Sem sagt, einar neikvæðar fréttir og aðrar sem eru vonandi jákvæðar (ef hann er heill, þ.e.a.s.) … leikurinn á morgun verður forvitnilegur.
Uppfært: (Aggi) Vonandi að þetta sé ekkert alvarlegt hjá Sissoko og að hann verði klár gegn Chelsea. Hvað varðar Morientes þá eru þetta góðar fréttir og hlýtur að ýta við Rafa að hætta að spila 4-5-1 og fara í 4-4-2. Byrja með Crouch og Cisse inná og síðan smella Moro inná fyrir Crouch í þeim síðari. Núna bíður maður bara spenntur hvernig Kewell kemur tilbaka eftir meiðslin… spurning hvort Rafa gefi honum ekki góðan tíma áður en honum er skellt í aðalliðið?
