Jújú, það er oft gaman að fara á Laugardalsvöllinn og hvetja íslenska landsliðið til dáða, og það getur verið ágætis tímasóun svo sem að horfa á enska landsliðið spila í sjónvarpinu … en ég get ekki að því gert, mér leiðist fátt jafn mikið og hlé á enska boltanum vegna landsleikja! Fyrir vikið eru rúmar tvær vikur á milli leikja hjá Liverpool og heilar þrjár vikur á milli deildarleikja! Það er, að mínu mati, allt of mikið.

Allavega, í tilefni af þessum taumlausu leiðindum sem landsleikjahelgarnar geta verið hef ég sett saman svona Topp 10 lista, og hér kemur hann. Endilega bætið ykkar eigin listum við ef þið lumið á einum…

Topp 10 Atriði Sem Benda Til Þess
Að Þú Sért OF HARÐUR Liverpool Aðdáandi!

#10 - Þú nærð í mp3-skrár af útvarpslýsingum John Aldridge af Liverpool-leikjum á netinu og setur inná iPod-inn þinn (nefnum engin nöfn hér…

#9 - Þér finnst ekkert meira sexý en að sjá maka þinn í Liverpool-treyju, og engu innanundir, en dettur alveg úr stuði þegar þú sérð að það stendur DIOUF og 9 á bakinu.

#8 - Ef þú ert farinn að leggjast svo lágt að ræða Liverpool-málefni líðandi stundar í jarðaförum, á meðan verið er að láta kistuna síga niður í holuna!

#7 - Ef þú áfrýjar til mannanafnanefndar þeirri ákvörðuna prestsins að neita að skíra son þinn Rafa Davíð Kristmundsson.

#6 - Ef þú vilt að Michael Shields hljóti frelsi - eingöngu vegna þess að þar gæti mögulegur stjörnuframherji verið á ferðinni…

#5 - Ef uppáhalds myndin þín er The 51st State með Samuel L. Jackson, og þú hefur séð hana oftar en 51 sinni, bara af því að í henni er atriði þar sem Robert Carlyle, íklæddur Liverpool-treyju, gengur inná pöbb fulla af manchester united aðdáendum og rústar þeim öllum!

#4 - Ef þú lætur söngvara syngja ‘You’ll Never Walk Alone’ í brúðkaupinu þínu og tárast yfir laginu (játiði, það eru margir sekir um þetta atriði)!

#3 - Ef Bítlarnir eru uppáhalds hljómsveitin þín en þú átt ekki eina einustu plötu með þeim. Ótrúlega margir sem detta í þessa gryfju!

#2 - Ef þú tekur hann/hana með þér á Players til að horfa á nágrannaslaginn við Everton á fyrsta deiti!

Og atriði #1 sem bendir til þess að þú sért allt of harður Liverpool aðdáandi er…

#1 - Ef þú hefur séð fleiri leiki með Liverpool í eigin persónu heldur en leiki í íslenska fótboltanum!

Og þannig var nú það. Skora á ykkur lesendur að bæta við og/eða koma með eigin lista!

p.s. Mæli með tveimur góðum pistlum frá Alex Malone, svona til að stytta biðina eftir næstu helgi: Goodbye Michael - Mediocrity Awaits og Doubt Rafa? This One’s For You!

Góða helgi.