Jæja, hið óumflýjanlega virðist vera að gerast: Milan Baros hefur samþykkt að ganga til liðs við Schalke í Þýskalandi! Nú eiga liðin tvö aðeins eftir að komast að samkomulagi um verð, en þar sem Schalke-menn vita nákvæmlega hversu mikið Liverpool vilja fá fyrir kappann (7m punda) þá ætti það ekki að taka langan tíma. Schalke-menn eru ekki vitlausir, þeir væru ekki komnir svona langt í samningaviðræðunum ef þeir ætluðu sér svo ekki að borga uppsett verð. Þannig að ég býst fastlega við að sjá Baros í Schalke-treyju í síðasta lagi á föstudag, með tilliti til þess að þýska deildin hefst um næstu helgi.

Ég hef sagt það áður og ég segi það aftur, ég mun sjá stórlega á eftir Baros. Hvort að hann skilur eftir sig skarð í liðinu eða ekki verður bara að koma í ljós, en við skulum aðeins kíkja á hvað framherjahópurinn okkar hefur upp á að bjóða, nú í fjarveru Baros:

1. Fernando Morientes er allur að koma til. Við vitum að hann skorar mörk, við vitum að hann er góður spilari og mjög alhliða, og leikir hans í júlí hafa gefið mér mikið sjálfstraust. Til að mynda var frammistaða hans eftir að hann kom inná gegn Kaunas mjög, mjög góð og þá var hann frábær gegn Wrexham. Hann á pottþétt eftir að standa sig í vetur, efast ekki um hann í sekúndu.

2. Djibril Cissé er nú orðinn næst markahæsti leikmaður okkar á undirbúningstímabilinu, á eftir Gerrard, og virðist vera orðinn okkar aðalframherji. Mig grunar sterklega að Cissé verði markahæsti leikmaður LFC á komandi leiktíð og að eftir rúmlega hálft ár verði menn farnir að tala um þessar 14m punda sem við eyddum í hann sem “kjarakaup” … ég hef tröllatrú á þessum strák.

3. Peter Crouch. Tveir leikir, tvær stoðsendingar og góð spilamennska almennt fyrir Liverpool. Hvort það er byrjunarheppni eða hvort að hann er virkilega svona góður, á eftir að koma í ljós, en eins og alltaf þegar nýr framherji kemur til liðsins verður hann dæmdur af (a) getu sinni til að skora mörk og (b) getu sinni til að skapa fyrir aðra. Crouch hefur greinilega eiginleikana til að gera bæði, en það á algjörlega eftir að koma í ljós hvort hann stendur undir álaginu. Er enn á báðum áttum.

4. Neil Mellor, Florent Sinama-Pongolle og Anthony Le Tallec. Í alvöru, er eitthvað lið í Úrvalsdeildinni með þrjá jafn hæfileikaríka, unga framherja sem varaskeifur fyrir sína fyrstu þrjá kosti eins og við? Einfalt svar: nei! Mellor er ekki sá flinkasti en hann skorar mörk, svo einfalt er það. Pongolle er ótrúlega flinkur, fimur og á sennilega mestan séns á að verða fullgildur aðal-framherji hjá okkur af þessum þremur, á meðan Le Tallec er einnig einstaklega hæfileikaríkur og vantar bara örlítið sjálfstraust og/eða grimmd til að verða mjög góður. Þrír framherjar sem er gott að hafa fyrir utan hópinn.

Sem sagt, sex framherjar hjá Liverpool í dag. Tveir þeirra eru að mínu mati pottþéttir, einn er nýkominn og verður spurningamerki þangað til annað kemur í ljós, og þrír stórefnilegir til vara. Spurningin er bara: er það nóg?

Ég veit það ekki. Ef við lendum ekki í sömu meiðslahremmingum og í fyrra, og ef framherjarnir okkar spila skv. því sem ætlast er til af þeim, þá munum við öll vera búin að gleyma því hver Milan Baros er/var um jólin (rétt eins og Milan fékk okkur til að gleyma Owen fyrir ári síðan) en ef við lendum í markaþurrð og/eða vandræðum með getu framherjanna, þá er alveg ljóst að Rafa verður dæmdur harkalega af þessari sölu, enn harkalegar en af Owen-sölunni sem var á sinn hátt óumflýjanleg.

Milan Baros hefur verið einn uppáhalds leikmaður okkar Einars síðan hann kom til Liverpool. Hann átti stóran þátt í Evróputitli okkar á síðustu leiktíð, ekki bara með því að skora mikilvæg mörk heldur einnig með því að hlaupa maraþon í hverjum einasta leik og vinna ótrúlega vanþakklátt starf. Hann var jafnan sakaður um að spila bara fyrir sjálfan sig - og vissulega var hans helsti galli eigingirni í teignum - en það er fáránlegt að maður sem vinnur jafn vel og Milan og hleypur jafn mikið fyrir liðið geti verið kallaður sjálfselskur bara af því að hann gefur boltann ekki í færi.

En á endanum þá er það Rafa Benítez sem ræður þessu og við treystum honum. Ef Houllier hefði selt Baros og keypt Crouch hefði ég orðið snarbrjálaður, en með fullri virðingu fyrir honum þá vann hann ekki Meistaradeildina á sínu fyrsta tímabili með okkur. Rafa gerði það, og verðskuldar því traust okkar. Milan Baros er farinn og Peter Crouch er kominn, ef það er það sem Rafael Benítez telur að sé Liverpool fyrir bestu þá er það líka það sem ég tel Liverpool fyrir bestu.

Bless Milan, takk fyrir minningarnar og mörkin! Ef það er einhver leikmaður sem ég mun halda með fyrir utan Liverpool þá er það Baros - ég ætla að vona að hann verði markakóngur í Þýskalandi í vetur og svo vona ég að hann rústi HM á næsta ári. Enda ætti hann að vera orðinn vanur þýskum völlum fyrir næsta sumar.