Jamm, það er ekki mikið að frétta á laugardagsmorgni úr Eyjum. Dregið var í Toyota Cup - eða Heimsmeistarakeppni Félagsliða - í gær, og mætir Liverpool þar annað hvort Sydney FC frá Ástralíu eða Deportivo Sarissa frá Costa Ríka í undanúrslitum keppninnar.

Tveir leikir og einn titill? Hmmm… verður fróðlegt.

Annars er bara mikið pælt í Michael Owen þessa dagana. Real voru að kaupa Robinho og Julio Baptista, þannig að St Mike er allt í einu orðinn 5. kostur hjá Real Madríd. Ekki gott mál, það. Menn virðast almennt telja litlar sem engar líkur á að hann snúi aftur heim til Liverpool en ég er ekki sannfærður … ef Baros er að fara á næstu dögum þá er alveg pláss fyrir Owen, og ekki gleyma því að við erum enn með forkaupsrétt, sem þýðir að Real verða að bjóða okkur hann og við að neita áður en þeir mega selja hann annað. Og finnst ykkur líklegt að Parry, Moores og Benítez neiti honum vitandi að Arsenal, manchester united eða Chelsea bíða í ofvæni eftir að geta verslað kauða?

Sé það ekki fyrir mér. Owen gæti vel endað aftur á Anfield áður en 1. september 2005 rennur upp. Sjáum bara til.

Annars segi ég bara góða helgi, ég mun uppfæra eftir þörfum en þá aðeins ef það er eitthvað stórt að gerast. Annars erum við Einar í fríi og væntanlega flestir lesendur okkar líka, þannig að ég bið ykkur bara vel að lifa!