Varalið Liverpool steinlá fyrir varaliði Aston Villa í gær, 4-0, en þessi leikur átti engu að síður að boða góðar fréttir fyrir okkur. Þeir Vladimir Smicer og Anthony Le Tallec áttu báðir endurkomu fyrir Liverpool í gær og nú er ekki langt í að Smicer verði tiltækur í leiki fyrir okkur, á meðan Tony LeT ætti að vera á bekknum gegn Charlton á þriðjudag.

Hins vegar þá tókst Neil Mellor að hljóta hnémeiðsli í þessum varaliðsleik og er nú talið mjög líklegt að hann missi af restinni af þessu tímabili vegna meiðsla. Hann slæst í hóp með Xabi Alonso, Djibril Cissé, Josemi, Harry Kewell, Chris Kirkland, Florent Sinama-Pongolle, Sami Hyypiä og Richie Partridge, en þeir eru allir meiddir í dag. Þá eru Antonio Núnez og Dietmar Hamann í leikbanni á þriðjudag gegn Charlton … sem gerir það að verkum að byrjunarlið okkar í þeim leik gæti orðið eitt það skrýtnasta sem við höfum séð lengi.

Svo er það frétt sem ég ætla að kalla skemmtilegustu frétt janúarmánaðar. Það er ekki mikil pressa á fyrirliðanum okkar núna að tjá sig um framtíð sína; við erum komnir í bikarúrslit og hann á séns á að lyfta dollu sem fyrirliði okkar, við erum að nálgast 16-liða úrslitin í Meistaradeildinni og erum að rembast við 4. sætið í deildinni. Engu að síður ákvað Gerrard, af fádæma visku sinni, að opna ormadósina á ný í gær: GERRARD TO DECIDE ON FUTURE IN SUMMER

Og blöðin voru ekki lengi að taka við sér. Í dag, sunnudag, mun Daily Mail slúðurblaðið í Englandi halda því fram að Gerrard hafi þegar gert ‘leynilegan’ samning við Chelsea um að ganga til liðs við þá í sumar fyrir 30-milljónir punda. Auðvitað hafa þeir haldið þessu fram áður. Þann 25. júní 2004 átti Gerrard að hafa verið búinn að skrifa undir hjá Chelsea, en hann gerði hið gagnstæða og hélt blaðamannafund tveim dögum seinna þar sem hann sagðist ætla að vera kyrr.

Engu að síður, þá hefur ormadósin verið opnuð og slúðurblöðin eru komin í feitt. Einfaldlega sagt, þá skuluð þið undirbúa ykkur fyrir mikinn pirring á næstunni … því að það verður fjallað um lítið annað fyrir úrslitaleik okkar við Chelsea eftir mánuð en fyrirhugaða, mögulega sölu okkar á Gerrard til Chelsea. Og ef við töpum fyrir þeim í úrslitum Deildarbikarsins verður það notað sem “sönnun” þess að Gerrard sé pottþétt farinn, og svo framvegis, og svo framvegis, og svo framvegis…..

Bottom line: búið ykkur undir pirring fram á vorið. Ef þið haldið að þetta hafi verið slæmt í fyrra, þá skuluð þið bara bíða eftir næsta sumri. Næsta sumar munu Chelsea líklegast státa af sigri í Úrvalsdeildinni, og verða því “ríkjandi meistarar Englands” og allt sem því fylgir … þannig að þá munu menn telja enn líklegra að Gerrard vilji fara til þeirra.

Fyrir mitt leyti þá er mín skoðun á Steven Gerrard þessi:

Gerrard var einu sinni uppáhaldsleikmaðurinn minn. En hann er það ekki lengur. Ekki af því að hann er bendlaður við Chelsea, heldur af því að mér líkar illa það starf sem hann er að vinna sem fyrirliði Liverpool FC. Sem fyrirliði á hann að vera að rífa liðið áfram á vellinum, hann á að vekja sjálfstraust með liðinu og aðstandendum þess bæði innan vallar sem utan. En hvað hefur hann gert síðan hann varð fyrirliði? Jú, hann hefur spilað alveg fáránlega góða knattspyrnu og sýnt að hann er í algjörum heimsklassa. En hann hefur líka farið illa með Liverpool FC að vissu leyti. Hann hefur notað tækifærin til að minna á að hann fari ef við náum ekki árangri, hann hefur aldrei neitað því að hann sé á förum þótt hann hafi fengið marga sénsa til, og svo mætti lengi telja.

Beisiklí, þá er ég nánast kominn á þá skoðun að við verðum að selja Gerrard í sumar til að liðið geti haldið áfram að þróast, og ég skal útskýra þá skoðun mína:

Stærsti ókosturinn sem fylgir því að hafa Gerrard í okkar röðum er helvítis slúðrið. Það er sama hvað menn segja, þetta hefur áhrif á liðið í kringum hann og þjálfarann, um leið og þetta hefur neikvæð áhrif á áhorfendur og áhangendur liðsins. Liðið gæti höndlað slúðrið eitt og sér, ekki spurning, ef ekki væri fyrir orð fyrirliðans sjálfs. Hann hefur ekki neitað þessum sögusögnum í vetur, þvert á móti hefur hann notað tækifærin sín til að minna okkur hin á það hversu mikilvægt það sé að vinna titla, til að hann verði kyrr.

Hann er beisiklí búinn að hóta klúbbnum í vetur: vinnið titla, annars…

Þetta er náttúrulega óþolandi framkoma fyrirliðans okkar. Hann sagði síðasta sumar að hann ætlaði að vera kyrr og taka þátt í byltingu Rafa Benítez - hann átti að drullast til að standa við það … ekki byrja að hóta brottför næsta sumar strax í haust. En það er einmitt það sem hann hefur gert, og því get ég bara ekki litið hann sömu aðdáunaraugum og suma aðra leikmenn liðsins.

SUMARIÐ: Í sumar sé ég tvo kosti, og aðeins tvo kosti í stöðunni. Í fyrsta lagi, þá náum við 4. sætinu í deildinni og vinnum Deildarbikarinn og Steven Gerrard ákveður að vera. En þá líka verður hann að framlengja samning sinn, annars verður hann seldur hvort sem honum líkar betur eða verr.

Í öðru lagi, þá ákveður hann að hann vilji fara frá Liverpool og við seljum hann - til liðs utan Englands. Ég er með það á hreinu að ef David Moores, Rick Parry & félagar samþykkja söluna á Steven Gerrard til Chelsea, þá verður allt vitlaust fyrir utan Anfield. Ég verð persónulega brjálaður! Við einfaldlega seljum ekki Steven Gerrard til liðs sem við ætlum að vera að berjast við um titilinn á næstu árum - það er ekki peninganna virði að styrkja þá svo mikið og veikja okkur svo mikið - sama hversu miklir peningar eru í boði.

Þannig að ef Gerrard vill fara í vor þá tel ég að Parry & Moores muni einfaldlega taka upp símtólið og hringja í Real Madríd og Barcelona. Þangað má hann fara fyrir 30 millur fyrir mér - við getum notað peninginn til að kaupa menn í hans stað. En ekki til Chelsea, Arsenal, manchester united eða neins annars liðs í Englandi. Ekki séns. Ekki glæta. Kemur ekki til greina!

Þannig að staðan í dag er sú að við munum 100% þurfa að þola Gerrard-slúðrið fram á vorið, og mín spá er sú að hann mun lítið gera til að kála því slúðri. Í vor munum við síðan fá annað af tveimur: hann framlengir samning sinn eða gengur til liðs við Real Madríd/Barcelona.

Allt annað er óásættanlegt. Ef Gerrard segist ætla að gefa þessu annað ár, en framlengir ekki samning sinn, þá mun slúðrið halda áfram af fullum krafti næsta vetur. Og ef Gerrard fer til Chelsea þá verðum við í djúpum, djúpum, djúúúpum skít og getum í raun kysst titilinn bless næstu 5 árin segi ég og skrifa. Mourinho er það góður þjálfari að hann mun gera Makelele, Lampard, Gerrard, Tiago og Parker að ósigrandi miðju á næstu árum.

Á einn eða annan hátt mun slúðrið deyja í sumar - það verður að deyja, svo að Rafa Benítez geti fengið að vinna sína vinnu í friði og þróa liðið án þess að hafa þetta helvítis Gerrard-akkeri um hálsinn. Það getur ekki verið hollt fyrir liðið að Rafa þurfi að vinna undir þessum hótunum “fyrirliðans” okkar.

Já, og ef Steven Gerrard fer þá verður Jamie Carragher nýr fyrirliði. Það er leikmaður sem öskrar á menn á vellinum, peppar menn upp þegar á móti blæs, skammar menn þegar þeir eru slakir, leiðbeinir öllum sem einum á vellinum og talar ávallt eins og sannur Liverpool-maður sem myndi ekki detta í hug að fara. Jamie Carragher er ekki jafn góður knattspyrnumaður og Steven Gerrard, en hann er engu að síður uppáhalds Liverpool-leikmaðurinn minn í dag - og ólíkt Gerrard þá veit ég að hann verður það næstu fimm árin a.m.k. … þar sem hann er ekki á förum. Það væri óskandi að allir væru jafn trúir sínu æskufélagi og hann…