Reglulega gerir Gallup fjölmiðlakannanir, sem eru birtar á heimasíðu fyrirtækisins. Þar er mælt áhorf á einstaka dagskrárliði hjá stöðunum.

Það er athyglisvert í kjölfar umræðunnar um Skjá Einn og hversu háværir við Liverpool menn væru í kvörtunum að skoða hvaða leikir fá best áhorf á sjónvarpsstöðunum. Ég er reyndar bara með tölur fyrir október og nóvember.

Byrjum á Sýn. Hvaða fótboltaleikur skyldi vera í efsta sæti? Er það ekki örugglega Chelsea, sem allir dýrka og dá? Nei, LIVERPOOL-Monaco er í efsta sæti af fótboltaleikjum á Sýn í nóvember mánuði með 8,3% áhorf!

Ok, þetta hlýtur að vera tilviljun. Allir vita að Chelsea, Arsenal og manchester united eru vinsælustu liðin, ekki satt?

Október á Skjá Einum? Vinsælasti leikurinn? Chelsea - LIVERPOOL. Nóvember á Skjá Einum. Vinsælustu leikirnir: Man U-Charlton og jú, LIVERPOOL-Middlesboro.

Af þeim leikjum, sem komast á topp 10 hjá þessum tveim stöðvum í október og nóvember og innihalda ensk félagslið, þá er staðan svona:

Liverpool 4
manchester united 3
Chelsea 2 (móti ManU og Liverpool)
Arsenal 1

Þetta sýnir einfaldlega hvaða lið eiga stærstu stuðningsmannahópana. Aðeins einn Arsenal leikur kemst þarna inn og Chelsea leikirnir eru þarna (að mínu mati) frekar vegna þess að þeir eru við manchester united og Liverpool.

Ástæðan fyrir því að S1 heldur áfram að sýna svona mikið af Liverpool leikjum er ekki einhver góðgerðarstarfsemi við Liverpool, sem hefur gengið illa á tímabilinu. Nei, þeir sjá einfaldlega að það er okkar ástsæla lið, sem fær besta áhorfið af öllum liðum í enska boltanum. Svo einfalt er það.