Author Archives: Kristján Atli

Nikica Jelavic – Liðið gegn Bolton

Posted on by

BBC Sport: Liverpool á eftir Nikica Jelavic hjá Glasgow Rangers. Ekki beint framherjinn sem menn höfðu á óskalistum hjá sér, en hann hefur verið iðinn við kolann hjá Rangers. Verður áhugavert að sjá hvort það er eitthvað til í þessu. Sjá YouTube.

Þá að liðinu gegn Bolton í dag:

Reina

Johnson – Skrtel – Agger – Enrique

Henderson – Adam – Gerrard – Maxi

Carroll – Bellamy

Bekkur: Doni, Kelly, Carragher, Coates, Shelvey, Downing, Kuyt.

Sterkt lið hjá okkur, Downing á bekknum en Carroll inni. Gerrard og Agger heilir og byrja. David N’gog er svo fremstur hjá Bolton í kvöld. Ég er skíthræddur um að hann skori gegn okkur. Það er alltaf svoleiðis.

Koma svo! Áfram Liverpool!

Völlur í Stanley Park + Nýir búningar (ekki Adidas)

Posted on by

Við flokkum þetta sem slúður, þar sem það er ekkert af þessu staðfest, en bæði atriðin virðast vera nokkuð líkleg á þessum tímapunkti. Byrjum á leikvanginum:

Chris Bascombe skrifar í Telegraph að klúbburinn hafi ákveðið að byggja nýjan völl í Stanley Park eftir allt saman, þar sem of erfitt hafi reynst að endurnýja Anfield. Ókei, okkur grunaði það svo sem. En það sem er athyglisverðast í þessu er að hann segir að nú sé stefnan tekin á að uppfæra upprunalegu teikningarnar – sem eru núna 10 ára gamlar – og byggja 60 þúsund sæta völl í Stanley Park.

Fyrir þá sem ekki muna litu upphaflegu teikningarnar svona út, skál svipuð Emirates Stadium hjá Arsenal:

Svo eignuðust Hicks & Gillett klúbbinn fyrir fimm árum, sögðu að þessar teikningar væru úreltar og pöntuðu nýjar teikningar. Þá átti völlurinn að líta svona út:

Svo eignast FSG klúbbinn fyrir rúmu ári, hafa eytt öllu árinu 2011 í að kanna hvort hægt væri að endurnýja Anfield í staðinn en það virðist ekki vera hægt og samkvæmt frétt Telegraph á núna að taka aftur upp upprunalegu teikningarnar og uppfæra þær, og henda teikningum Hicks & Gillett sem og áformum um endurnýjun Anfield.

Komin með hausverk? Ég líka. Sjáum hvað verður staðfest en FSG-liðar verða að fara að kynna eitthvað fljótlega. Eftir að hafa verið teymd á asnaeyrunum af kúrekunum tveimur mun fólk ekki bíða endalaust áður en það fer að gagnrýna FSG fyrir aðgerðarleysi.

Og þá að hinu málinu: forsvarsmenn ADIDAS hafa staðfest að samningurinn við Liverpool verður ekki endurnýjaður eftir þetta tímabil.

Slúðrið hefur hingað til bent til þess að Liverpool hafi sjálfir kosið að framlengja ekki við Adidas þar sem Warrior hafi boðið betur en Adidas-menn neita þessu í fréttinni hér að ofan og segja að þeir hafi bakkað út því kröfur Liverpool hafi verið „óraunhæfar“. Það er augljóst að mínu mati að Adidas-menn eru að reyna að forðast álitshnekki með því að skjóta fyrsta skotinu og staðfesta þetta á undan klúbbnum en hvað sem því líður þá er það hér með orðið 99,9% staðfest að okkar menn leika í Warrior-treyjum næstu árin.

Janúar/febrúar er yfirleitt sá tími sem líklegar hannanir af treyjum næsta tímabils byrja að leka og þessi mynd hér hefur verið að breiðast víða síðustu 1-2 daga. Hvort þetta er endanlegt útlit eða plat skal ekki ábyrgst hér en mér líst vel á þessa hönnun ef hún er rétt:

Svei mér þá ef meira að segja græna treyjan er ekki bara flott líka.

Hvað finnst fólki? Erum við sátt við að fara í Warrior-treyjum á „gamla“ Nýja-Anfield – sem verður nota bene nær örugglega ekki kallaður Anfield heldur nefndur eftir styrktaraðila – á næstu árum?

Opinn þráður – Stewart Disappointing

Posted on by

Bleh. Slöpp helgi. Arsenal töpuðu þó í dag, það er eitthvað. Við erum 5 stigum á eftir Chelsea í 4. sætinu núna eftir 21 umferð. Vandamálin sem við þekkjum allt of vel eru enn til staðar og engu nær því að leysast. Liðið heldur áfram að gera jafntefli á heimavelli – sjö núna í ellefu heimaleikjum. Þannig spilamennska skilar engu liði í Meistaradeildina.

Það er athyglisvert að bera saman gengi Liverpool undir stjórn Dalglish á seinni hluta síðasta tímabils og því sem af er af þessu tímabili. Í fyrra tók Dalglish við liði í mikilli lægð og reif það upp í baráttu um Evrópusæti. Í 18 síðustu leikjum deildarinnar í fyrra var hann með 3. besta árangurinn. Í 21 fyrstu leikjum tímabilsins í ár er hann með 7. besta árangurinn:

2010/11: 18 leikir, 33 stig, 1.83 stig að meðaltali í leik = 69.5 stig að meðaltali yfir heilt tímabil. 1.94 mörk skoruð að meðaltali í leik, 0.94 fengin á sig.

2011/12: 21 leikur, 35 stig, 1.67 stig að meðaltali í leik = 63.5 stig að meðaltali yfir heilt tímabil. 1.14 mörk skoruð að meðaltali í leik, 0.85 fengin á sig.

Vandamálið er augljóst. Við vitum það öll og það er bara einhver kurteisi í garð Dalglish hjá sumum sem veldur því að þeir vilja ekki segja það:

* Vörnin var góð hjá Dalglish í fyrra en betri núna. Kaupin á Jose Enrique skipta þar miklu, held ég, sem og heilsa Daniel Agger.
* Flest allir óþarfaleikmenn voru látnir fara síðasta sumar, sem var gríðarlega mikilvægt. Eins konar RESET-sumar, hópurinn núllstilltur fyrir frekari framfarir.
* Síðan voru keyptir, á árinu 2011, þrír rándýrir sóknarmenn, og aðeins einn þeirra hefur staðið undir væntingum: Luis Suarez.
* Hinir heita Andy Carroll og Stewart Downing og í þeim felst 54m punda fjárfesting sem hefur skilað engu, og fyrir vikið hefur markaskorun liðsins hrunið.

Þetta er í alvöru svo einfalt. Grunnurinn er til staðar. Dalglish og þjálfararnir eru með sitt á hreinu, vörnin er ein sú besta í deildinni og breiddin í vörn og á miðju er slík að ef ekki væri fyrir meiðsli Lucas Leiva þættist ég nánast viss um að við keyptum engan á þau tvö svæði á árinu 2012.

Sóknin hins vegar? Bleh. Stórkostlegt bleh. Í fjarveru Gerrard hefur Suarez átt erfiða þrjá mánuði vegna mála utan vallar og þegar þá tvo hefur vantað í liðið hefur nákvæmlega ekkert verið að gerast. Dirk Kuyt er að eiga lélegustu leiktíð sína síðan hann kom til Liverpool, Maxi og Craig Bellamy eru áreiðanlegir en hvorugur í standi til að spila alla leiki, og svo eru það Carroll og Downing. Um þá þarf ekkert að skrifa því þeir hafa ekkert gefið okkur til að skrifa um. Ekkert. Núll og nix.

Það er alveg sama hvað liðið heitir – þegar þú eyðir 54m punda í tvo leikmenn sem skila annars vegar 4 deildarmörkum og 0 stoðsendingum (Carroll) og 0 deildarmörkum og 0 stoðsendingum (Downing) á einu ári þá hefur það mikil áhrif á gengið.

Dalglish hefur verið að segja í fjölmiðlum að hann hafi enn fulla trú á þeim og sé ánægður með þá, en við vitum vel að það er ekkert að marka slíkar yfirlýsingar. Við getum bara giskað á hvenær þeir telja nóg komið og selja þessa leikmenn, en ég er á þeirri skoðun að það myndi gerast strax í dag ef við fengjum rétt verð fyrir þá og ef betri leikmenn væru á lausu.

Það er hins vegar vandamálið. Liverpool er fast með tvo bilaða eldflaugakúta sem hamla liðinu frá flugtaki. En þangað til betri, virkir kútar fást situr liðið uppi með frestað flugtak. Það er eitt að segja að Carroll og Downing hafi valdið vonbrigðum og við þurfum betri leikmenn, það er annað að finna þessa leikmenn sem eiga að vera betri.

Ég er sannfærður um að ef réttu mennirnir væru á lausu væri búið að reiða fram þær 10-20-30 milljónir punda sem þarf til að kaupa þá. Kannski gerist eitthvað í janúar, en það er lítið sem bendir til þess. Kannski þurfum við að sætta okkur við vonbrigðin í vetur og reyna að finna þessa menn í sumar.

Kannski mætir Suarez svo ofboðslega sterkur til leiks eftir leikbannið að hann og Gerrard rífa þetta lið inn í Meistaradeildina í vor. Kannski. Ég veit bara að ef liðið á að ná þessu 4. sæti – sem virkar fjarlægari draumur með hverjum leiknum – þá er það undir þeim tveimur, og kannski Kuyt líka, að hrökkva í gang.

Því ég er orðinn andskoti sannfærður um að það verða ekki Stewart Downing og Andy Carroll sem koma okkur þangað.

Kop.is Podcast #12

Posted on by

Hér er þáttur númer tólf af podcasti Liverpool Bloggsins!

KOP.is podcast – 12.þáttur

Þið getið hlustað á þáttinn beint með því að nota spilarann hér fyrir ofan en þið getið líka smellt á DOWNLOAD-takkann og sótt mp3-skrána ykkur til hæginda. Einnig er hægt að gerast áskrifandi að þættinum á iTunes með því að setja þennan link, í RSS-áskrift undir podcast-lið iTunes.

Ég (Kristján Atli) stýrði þættinum sem fyrr og með mér að þessu sinni voru Einar Örn, SSteinn og Babú auk þess sem Maggi tók létt cameó í blálokin.

Í þessum þætti ræddum við meðal annars Suarez-málið ógurlega, bikarleikinn gegn Oldham og leikina fram undan gegn Man City og Manchester United og gerðum upp desemberleikina. Svo ræddum við rafmagnsleysi á Snæfellsnesinu aðeins.

Man City á miðvikudag (deildarbikar)

Posted on by

Það er komið að undanúrslitum enska Deildarbikarsins tímabilið 2011/12. Þetta er fyrsti góði séns Liverpool á bikarúrslitum síðan liðið lék til úrslita í Meistaradeildinni í Aþenu vorið 2007, og svei mér þá ef mann er ekki farið að lengja eftir því að sjá rauðu treyjurnar á fleygiferð um grasið á Wembley.

Fyrst þarf þó að klára undanúrslitin og það er vægast sagt erfitt verkefni fyrir höndum. Topplið Manchester City, besta lið Englands í vetur, eru mótherjarnir og ef marka má leik liðanna í síðustu viku, í Úrvalsdeildinni, er þetta ekki verkefni sem við getum talist líklegir til að klára, fyrir fram.

Seinni leikur liðanna fer fram eftir viku á Anfield en fyrst heimsækja okkar menn Etihad Stadium á miðvikudag og verkefnið er einfalt: að sleppa heim með úrslit sem gefa okkur séns í seinni leiknum. Annað 3-0 tap dugir engan veginn, hér verður að gera betur.

Af okkar mönnum er það helst að frétta að Lucas Leiva er meiddur og Luis Suarez í leikbanni. Ég veit, ég veit, brakandi ferskar fréttir, en utan þessara tveggja lykilmanna eru allir heilir og (vonandi) æstir í að fá að spila. Steven Gerrard lék í 90 mínútur gegn Oldham á föstudag og ætti því að vera klár í byrjunarliðið á miðvikudag, sem er mikill munur.

Ég spái því að King Kenny Dalglish stilli upp sínu sterkasta liði á miðvikudag en þó sömu, varfærnislegu taktíkinni og í deildarleiknum fyrir viku:

Reina

Johnson – Skrtel – Agger – Enrique

Henderson – Gerrard – Spearing – Adam – Downing

Carroll

Ef leikformið eitt réði för væri Craig Bellamy pottþétt í okkar sterkasta byrjunarliði um þessar mundir en þar sem Dalglish hefur margsagt að Bellamy þoli ekki þétt leikjaprógram, og af því að hann byrjaði báða leiki liðsins í síðustu viku, verður hann á bekknum á miðvikudag ásamt mönnum eins og Jonjo Shelvey, Maxi Rodriguez, Dirk Kuyt og Carra.

Af mótherjunum er það helst að frétta að þeir töpuðu einhverjum bikarleik í gær og þar fékk hinn stórgóði fyrirliði þeirra, Vincent Kompany, rautt spjald og nældi sér í 4ra leikja bann sem ætti að halda honum fjarri báðum leikjunum við okkar menn. City ætla sér að áfrýja þessum brottrekstri og kemur í ljós annað kvöld hvað verður af því en ég sé ekki af hverju enska knattspyrnusambandið ætti að fella það niður. Vonum ekki, allavega, þeir eru nú þegar án Kolo og Yaya Touré sem eru farnir í Afríkukeppnina þannig að ef þeir eru án Kompany líka getum við formlega farið að kalla þá vængbrotna. Eins og okkar menn eru, án Lucas og Suarez. Jöfnum leikinn aðeins.

Mín spá: Okkar menn steinlágu þarna fyrir heilli viku síðan en ég er bjartsýnni á betri úrslit í þessum leik. Okkur munar mikið um að vera búnir að endurheimta Steven Gerrard, og ef þeir verða án Yaya Touré og Kompany – sem voru laaaaangbestu menn vallarins fyrir viku – þá ætti það að jafna leika enn frekar.

Ég spái þessu 1-1 jafntefli sem ætti að setja upp snælduvitlausan seinni leik á Anfield.

Koma svo, Liverpool! YNWA!