LIVERPOOL BESTIR Í EVRÓPU!! Frétt frá Liverpool Echo greinir frá því í dag, að Liverpool mun hefja næsta tímabil sem besta lið Evrópu! Auðvitað … hvað annað??? Þetta er byggt á lista frá UEFA og er árangri síðustu 5 ára að þakka. Chelsea er í þriðja sæti, Arsenal í sjötta sæti og núverandi Evrópumeistarar í sjöunda sæti. Já, gullöld enskra liða sannarlega: fjögur af sjö bestu liðum Evrópu!

Bekkurinn: Itandje, Skrtel, Alonso, Benayoun, Voronin

Leikurinn byrjaði frekar rólega, engin færi litu dagsins ljós fannst mér fyrr en á 20. mínútu þegar Kuyt gaf vel fyrir og Babel skallaði fast en yfir markið. Í endursýningu kom berlega í ljós að Torres var í mun betra færi, en það má ekki kvarta yfir því. Torres átti svo skot úr frekar litlu færi á 23. mínútu en vel framhjá. Nú var þetta aðeins að lifna við fannst manni. Gerrard átti þrumuskot rétt framhjá á 27. mínútu og einnig litlu seinna í hálfleiknum eftir stangarrangstöðuskot City hinumegin.

Í hálfleik var staðan 0:0 og ég verð að segja það að ég hafði alveg sé skemmtilegri knattspyrnuhálfleik á Anfield … 6:0 í skotum fyrir Liverpool og stangarskot City ekki talið með vegna rangstöðunnar. En síðari hálfleikur hófst með góðri sókn og upp úr hornspyrnu átti Kuyt skalla framhjá. Já já, hugsaði ég … núna fáum við almennilega sýningu! Örskömmu síðar átti Gerrard stórkostlega sendingu innfyrir á Torres sem var kominn svolítið utarlega og átti skot rétt framhjá. Já já, hugsaði ég aftur.

City fékk svo aukaspyrnu á 51. mínútu og skotið úr henni sleikti utanverða stöngina. Heyrðu? Hvað erum við að hleypa þessu liði inn í leikinn með svona færum?! Mascherano prjónaði sig svo í gegnum vörn City eftir 10 mínútna leik í síðari hálfleik en slæmt skotið fór framhjá. Á 58. mínútu fær Torres svo boltann fyrir utan teig, sólar fram hjá Richard Dunne og rennir boltanum í markið … frábært!!! 1:0!!

Kuyt átti frábær viðstöðulaust skot stuttu seinna og Lucas Leiva tók skemmtilega hjólhestaspyrnu sem var varin… og sókn Liverpool hélt vel áfram! Kuyt átti svo stórkostlegan skalla í stöng og skömmu síðar skalla beint á markmanninn … hann óð í færum hreinlega á skömmum tíma þarna. 18:1 komin í marktilraunum á þessum tíma. En það er tölfræði sem við höfum séð áður í vetur. Babel fyrir opnu marki (næstum því) skaut svo yfir á 66. mínútu… Á 20 mínútum í seinni hálfleik áttu okkar menn helmingi fleiri marktilraunir en í öllum fyrri hálfleiknum.

Babel fór út af fyrir Benayoun og Lucas Leiva fór af velli fyrir Alonso. Nokkuð góðar sóknir með vippu frá Torres og skoti frá Mascherano komu undir lokin. Voronin inn á fyrir Gerrard var ekki góð skipting, því stakkels Voronin átti ekki góðar mínútur inni á vellinum. Mikið líf síðustu mínúturnar … City átti líka sóknir þá en allt kom fyrir ekki. Við fengum ekki fleiri mörk. 23:4 í marktilraunum, og öruggur 1:0 sigur staðreynd.

Maður leiksins: Persónulega fannst mér fyrirliði vor vera með frábæra baráttu og svo var Carra virkilega traustur ásamt Hyypia. Finnan var ekkert sérstakur en Insúa átti ágæta spretti. Bar ekki mikið á Mascherano en Lucas átti nokkur skot, hvarf þess inn á milli. Babel var sæmilega hress, óheppinn að skora ekki, Reina með hreint í enn einum City leiknum og það er frábær árangur tel ég. Kuyt var Kuyt – óheppinn virkilega að skora ekki og fín barátta í honum allan tímann. Torres jafnaði í dag markametið sem Nistelroy á fyrir mörk skoruð í deildinni á fyrsta tímabilinu. Og mér finnst það ansi sérstakur áfangi. Ég hefði getað valið Gerrard sem mann leiksins en ætla bara enn og aftur að dásama hann Fernando ‘El Nino’ Torres hér og þess vegna hlýtur hann þessa nafnbót. Við erum jú að tala um 32 mörk á þessu tímabili hjá stráknum! Og hann á bara eftir að bæta í!!

Næsti leikur: Verður um leið síðasti leikur liðsins á tímabilinu. Það er útileikur í deildinni gegn Tottenham Hotspur, sunnudaginn 11. maí (nánar tiltekið á hvítasunnu) kl. 14:00. Vonandi tekst strákunum að klára tímabilið með sigri og vonandi nær Torres að hrifsa fyrrnefnt met einn með því að skora. Áfram Liverpool – alltaf!

54 … 56 … 60 … kannast einhver við þessar tölur?

Ég er spenntur, sue me, upphitunin kemur snemma, en það er kominn þriðjudagur!! Á morgun mun það ráðast hvaða lið það verða sem spila úrslitaleikinn í meistaradeildinni árið 2008. Við erum að tala um besta lið í heimi – Liverpool – og heimsókn þess til bláklæddra dýfingameistara og röflara og tæklara – Chelsea – á Stamford Bridge. Já, það er á útivelli sem örlög okkar í meistaradeildinni ráðast þetta árið … náum við í úrslitaleikinn eða ekki?

Fyrri leikur liðanna í undanúrslitunum þetta árið var sorglegur að því leytinu til, að úrslitin voru líkt og í deildarleiknum á Anfield í haust … mjög ósanngjörn. Bendum ekki á neinn núna, heldur áttum okkur á þessari stöðu sem við erum í: Við þurfum að skora á Stamford, eitthvað sem við höfum ekki gert síðan Rafa tók við liðinu. Við unnum síðast á Stamford Bridge 7. janúar 2004, og það er síðasta markið sem við skoruðum þar … þetta var í deildinni, leikurinn fór 1:0 og snillingurinn Bruno Cheyrou að verki!!! Hvað gerist á morgun??

54 … 56 … 60 …

Spádómar um úrslit eru farnir að birtast hér á blogginu í kommentunum og góð grein sem Einar Örn benti okkur á, þar sem Rafa gagnrýnir dýfingameistarann Drogba. Maður neitar því ekki að það örlar á fiðringi í maganum og hann magnast með hverri sekúndunni. En hvernig mun meistari Rafa stilla upp liðinu?? Hann verður að sækja og sækja strax. Það þýðir ekki ætla að fara með einhverja aðra taktík inn í leikinn tel ég. Alan Hansen er ekki alveg á minni línu, en hann segir um leikinn:

“Liverpool boss Rafael Benitez will surely instruct his players to keep it tight for 55-60 minutes and then you might see them play a bit more adventurously after that.”

Annars eru pælingar hans um undanúrslitin í heild sinni hér: Alan Hansen on the Champions League.

Með Aurelio meiddan, þá er aldrei að vita nema Norðmaðurinn byrji inná. Og þó … getur ekki Arbeloa farið á vinstri kantinn? Ég ætla að spá þessari liðsuppstillingu:

Bekkur: Itandje, Finnan, Riise, Lucas, Pennant, Benayoun, Crouch

54 … 56 … 60 …

Svo er spurning hvort Pennant byrji inn á á kostnað Arbeloa og þá yrði spilað 3-3-2-2 eða 3-3-3-1 eða 3-5-1-1 … ??? Vá! Ég hreinlega veit það ekki, ég veit það bara að Rafa er snillingur og hann kann sálfræðina á bak við leikinn. Ég ætla ekki að spá fyrir um byrjunarlið þeirra bláklæddu, ég sé rautt og ætla mínum mönnum stóra hluti í leiknum! Torres verður á fullu, hann er búinn að upplifa ótrúlega flott fyrsta tímabil en hann er hungraður þrátt fyrir ungan aldur. Hann vill spila úrslitaleiki, hann vill sýna sig enn meir og besta hefndin gegn spörkunum sem hann fékk í fyrri leiknum, og fær eflaust núna í seinni leiknum, verður sú að setja hann í netið! Ég er sannfærður um að hann geri það … og þetta verður markið sem ræður úrslitum!!

Phil Tompson spáir:

“Perhaps this won’t be a great surprise coming from a man of my background, but I really think Liverpool will win 2-1 and make it three finals in four years.”

Og fyrirliði vor gefur skýr skilaboð:

“We’re the better side”

Let’s face it … leikir þessara liða í undanúrslitum meistaradeildarinnar hafa ekki verið markamiklir, og ég sé það ekkert endilega breytast í þessum leik.

Spá: Ég ætla að segja það, að staðan í hálfleik verði 0:0 og Torres mun setja boltann í netið á 69. mínútu. Drogba mun falla 15 sinnum í leiknum og fá aukaspyrnur í 13 skipti. Eitt skipti í fyrri hálfleik verður höndum lyft upp og brosað, en í síðari hálfleik mun Drogba detta í 15. sinn og reyna að fiska víti sem hann fær ekki – hlýtur að launum rauða spjaldið og Chelsea tapar yet again! 1:0 fyrir oss – engin spurning. Þetta er spurning um hjarta … og það hefur Liverpool umfram öll lið!!! Mér finnst ágætt að horfa á þetta myndband: You’ll never walk alone (3:3) …. og þá kannski munið þið, að það er ekkert ómögulegt!!! Ef við getum skorað 3 mörk á móti AC Milan á sex mínútum (54., 56. og 60. mínútu), þá getum við auðveldlega gert það sem við höfum ekki gert undir stjórn Rafa: að vinna Chelsea á Stamford Bridge!! Þið vitið að það sem aldrei hefur gerst, getur alltaf gerst aftur.

Áfram Liverpool!

Á bekknum sátu Itandje, Riise, Hyypia, Voronin og Benayoun.

Leikurinn byrjaði afar rólega, einhvern veginn þannig stemming – byrjað var á mínútuþögn til að minnast fórnarlamba Hillsborough slyssins og svo hófst leikurinn. Torres átti ágætis skalla eftir hornspyrnu á 9. mínútu. Svo fylgdu á eftir hálf næstumþví færi (Aurelio, Torres) … Það var blautt og kannski gæðin aðeins verri eftir því.

Á 26. mínútu var Gerrard ýtt niður, Samba var hinn seki, og átti hiklaust að dæma brot á það og manninn út af, en dómarinn var ekki á því. Upp úr því kom álitleg sókn sem endaði með hræðilegu skoti fyrirliðans … Liverpool er með mjög rólega og örugga stjórn á leiknum. Ég veit samt ekki af hverju en mikið rosalega fannst mér skringileg deyfð yfir mönnum. Eðlilegt í kjölfar glæsilegs leiks á móti Arsenal? Nei, ég heimta baráttu í hverjum leik.

Litlu dómarnir voru ekki að falla með okkur og pirringur virtist stundum vera í okkar mönnum. En undir lok hálfleiksins komu upp Actim tölur um að Liverpool hefði átt 6 skot að marki og Blackburn eitt … hins vegar var staðan 1:1 í skotum sem hittu á markið. Frekar dapurt að sjá þessar tölur … og ég vonaði að síðari hálfleikurinn yrði miklu skemmtilegri. 0:0 sem sagt í hálfleik.

Síðari hálfleikur byrjaði á löngu skoti Torres … áhugavert, og var þetta eitthvað sem gæfi til kynna að hálfleikurinn yrði skemmtilegur?? Ég vonaði það. Hressandi sóknir hjá liðunum og maður lyfti augabrúnum örlítið hærra … en það tók tæpar 15 mínútur í hálfleiknum að finna netmöskvana. Eftir ágætis fjör og eftir fína skiptingu á Babel fyrir Benayoun, þá nær Benayoun boltanum af Blackburn, rennir á Steven Gerrard sem nippar á Lucas sem kemur honum áfram svo á Gerrard sem klobbar Samba og rennir framhjá Brad í markinu á 60. mínútu – frábært mark!!! 1:0!

Skrtel fékk réttmætt gult spjald þegar hann hindraði Roberts í sókn, en rautt spjald hefði verið fáránlegt í kjölfar atviksins í fyrri hálfleik. Það var hins vegar gaman að sjá Roberts áður reyna að fiska brot á Skrtel og sífellt tuðandi í dómaranum um atvikin.

Torres átti ekki sinn besta leik og stundum fannst mér hann ekki vera á svæðinu, en það sosum gilti um aðra líka. En eftir að hafa verið klipptur niður skömmu áður þá fékk hann glæsilega sendingu frá Gerrard (var á undan Benayoun í boltann) og setur hann fallega inn á 82. mínútu, 2:0!!! 30. markið komið – til hamingju með það!

Það var augljóst í leiknum öllum að það átti bara ekki að gefa Liverpool vítaspyrnu … menn geta deilt um hversu margar við hefðum átt að fá en þær voru alveg örugglega fleiri en engin. Dómarinn var ekki að heilla mig. Torres fór út af og “súpersöbbinn” Voronin kom inn á (hvað kallaði Gummi Ben hann… 4 marka maður inn á fyrir 30 marka manninn!! – frábært!). Stuttu síðar fer Xabi Alonso út af fyrir Riise og talað um það að Riise eigi eftir að skora fyrir félagið á tímabilinu … norsarinn rauðhærði má eiga það að 2 mínútum eftir innkomuna átti hann óeigingjarna sendingu á Voronin, sem potaði honum inn á 90. mínútu – varamenn dauðans að verki – og öruggur 3:0 sigur í höfn! Ekki aldeilis, því sortubrennararnir náðu því miður að skora fínt mark (óþarfi samt að fá það á okkur!) og var þar Santa Cruz að verki.

Niðurstaðan var sem sagt öruggur 3:1 sigur og bilið minnkar tímabundið í Arsenal og við fjarlægjumst Everton. Gott mál.

Maður leiksins: Sko, þegar klukkutími tæpur var liðinn af leiknum og staðan 0:0 þá hafði ég akkúrat engan í huga. Fannst almenn deyfð yfir þessu og boltinn ekki góður. Reina rólegur, Arbeloa ekkert spes, Carra … var hann ekki örugglega þarna?, Skrtel var traustur, Aurelio ekki góður, Lucas la la, Alonso átti sæmilegan leik, Kuyt ekkert spes en jafn baráttuglaður sem fyrr, Babel ekki spes, Torres alltaf hættulegur … þegar hann sást. Varamennirnir voru allir fínir, en hins vegar fannst mér fyrirliði vor sýna góðan karakter, skoraði glæsilegt mark og átti frábæra fyrirgjöf á Torres í öðru markinu. Það er því án hiks sem ég útnefni Steven Gerrard sem mann leiksins.

Næsti leikur: Næst er það útileikur gegn Fulham, laugardaginn 19. apríl kl. 14:00. Það verður virkilega áhugaverður leikur vegna þess að Fulham er í mjög mikill fallbaráttu og þarf á sem flestum stigum að halda til að halda sér uppi. En við sýnum enga miskunn og tökum þann leik, ekki satt? Áfram Liverpool!

Eruð þið nokkuð orðin þreytt á þessari fyrirsögn? Eða þessu sérnafni í fyrirsögninni? Alla vega, þá lýkur þriggja leikja hrinu við Arsenal á morgun, þriðjudag 8. apríl, kl. 18:45. Ókei, tæknilega séð þá lýkur rimmunni ekki fyrr en um tveimur tímum seinna, en þið vitið hvað ég á við. Það er sem sagt komið að þriðja leik þessara liða á einni viku, og þetta er síðari leikur þeirra í 8 liða úrslitum meistaradeildarinnar. Þetta verður bara MAGNAÐUR leikur!!! Liðin hafa leikið tvo leiki í deildinni og svo þennan fyrri leik í meistaradeildinni og allir leikirnir hafa farið 1:1 – hvernig fer á morgun??

Í deildarleiknum á laugardaginn gat Rafa hvílt stórar kanónur, auk þess sem Mascherano var í banni. Það má því hæglega búast við breytingum á liðinu, en eftir þrælgóðan leik Crouch … fær hann tækifæri núna? Og mun ekki Rafa sækja í reynsluna? Það væri auðvelt að spá byrjunarliðinu alveg nákvæmlega eins og í leiknum á miðvikudaginn, en ég ætla að taka sénsa og spá þessu:

Bekkur: Itandje, Aurelio, Benayoun, Arbeloa, Lucas, Voronin, Skrtel

Eflaust er skrýtið / fáránlegt hjá mér að setja Kuyt þarna og mögulega færi hann út og Babel kæmi inn … en mig langar að prófa þetta kerfi, þ.e. að hafa Kuyt, Crouch og Torres inná með Gerrard, Mascherano og Alonso fyrir aftan – hvernig stilli ég þessu öðruvísi upp? Gæti þetta verið kannski svona?

Og hvernig hitar maður upp mannskapinn hér þegar við höfum lítið gert annað en að tala um þessi tvö lið síðustu viku? Best væri að lesa pistilinn hans KAR upphátt reglulega fyrir leik! Og auðvitað kommentin sem hafa þegar komið á færslurnar síðustu daga.

Alan Hansen rifjar hins vegar upp það hræðilegasta atvik sem ég man eftir í enska boltanum, og ástæðu þess af hverju ég hata Arsenal mest allra liða … auðvitað smá barnaleg afstaða í mér, en þetta er góður punktur hjá Alan:

“This is why the message will be from Benitez that Liverpool must play to win and my belief is that they will win. He will be well aware that while 0-0 puts Liverpool through, it only takes one goal from Arsenal to turn it all around.”

Með þennan fjandans leik í huga, þá hræðist ég dálítið leikinn en er auðvitað sannfærður um að við töpum honum ekki! Þvílíkt sem maginn og hausinn hringsnúast þessa dagana! Tölfræði hefur ekkert að segja fyrir svona leiki, en er aðallega til skemmtunar. Á opinberu heimasíðunni kemur m.a. þetta fram:

• Liverpool hefur aðeins fengið á sig eitt mark gegn ensku liði á heimavelli í Evrópukeppni, það var árið 1971 (flott ár!) gegn Leeds!
• Steven Gerrard hefur skorað í síðustu þremur heimaleikjum liðsins í meistaradeildinni. Engum liðsmanni Liverpool hefur tekist að skora í fjórum leikjum í röð á heimavelli í Evrópukeppni … verður þetta sögulegt?
• Í 32 leikjum sem Peter Crouch hefur skorað, þá hefur Liverpool aldrei tapað (28 sigrar, 4 jafntefli).

Gaman að þessu!

Tvö góð komment frá mótherjunum: Arsene Wenger: “We have the resources to advance” Bendtner: “We have enough goals in us to go through” Auðvitað ber að taka snilling eins og Wenger alvarlega … ‘we have the resources…’ – spakur maður! Við höfum ‘resources’ líka auðvitað, og með mann eins og Bendtner innanborðs, þá hlýtur Wenger að spyrja: skorar hann í dag eða bjargar hann marki? Persónulega ætla ég að veðja stórri fjárhæð að Bendtner skorar ekki neitt!

Mín spá: En eins og fram hefur komið þá hafa þrír leikir þessara liða í vetur farið á sama veg: 1-1! Ekki þykir ólíklegt að svo verði aftur, og framlengt – og mögulega vítaspyrnukeppni. En ég ætla að tippa á að hið ömurlega Liverpool lið muni vinna stórskemmtilega Arsenal-liðið 2:0, og það verða Gerrard og Torres sem skora. Bendtner mun svo aftur bjarga á línu fyrir okkur …

Áfram Liverpool! Fyrir mig persónulega hefur Hansen gert þetta að enn meiri taugaleik, vegna tilvísunar hans í 1989 dæmið. Fyrir mig persónulega yrði sætt – afar sætt – að sjá Arsene Wenger fara í gegnum enn eitt titlalausa tímabilið með liðið sitt æðislega, og þar hefði Liverpool spilað stóra rullu. Hvað segið þið?? Er enginn spenntur hérna???

ÁFRAM LIVERPOOL!

Er maður orðinn spenntur eða spenntur????? Svona verður liðið:

Bekkur: Itandje, Riise, Voronin, Benayoun, Crouch, Arbeloa, Lucas

Ég er persónulega mjög sáttur við þessa uppstillingu. Ég er spenntur! Áfram Liverpool!!

Byrjunarliðið var svona skipað:

Bekkurinn: Itandje, Finnan, Pennant, Benayoun, Crouch (síðastnefndu þrír fengu svo allir að koma inn á, í mislangan tíma)

Blágubb var bláa liðið kallað í reitnum “Næsti leikur” og fyrir mér var það persónulega mjög gott nafn … akkúrat í dag … en förum ekki nánar í það. Baráttan var strax mikil og leikurinn byrjaði kröftuglega með ágætri sókn hjá báðum liðum, stemmningin góð. En fljótlega komu í ljós algjörir yfirburðir Liverpool og það var oft hrein unun að sjá spilamennskuna þeirra. Eftir hornspyrnu á 7. mínútu misheppnaðist hreinsun hjá Everton, Alonso náði boltanum og Kuyt kom honum svo skemmtilega á Torres, sem auðvitað náði að renna honum í hornið framhjá Tim Howard, flott mark – 1:0!

(mynd fengin frá BBC) Mínútu síðar var Torres sparkaður niður (það gerðist nokkrum sinnum… ) og Gerrard átti ágæta aukaspyrnu rétt framhjá. Eftir 10 mínútur var þunna manninum farið að líða mun betur: mark komið hjá Liverpool og gult spjald á Everton. Eins og fyrr segir þá voru yfirburðir Liverpool augljósir, og þegar varnarmenn höfðu eitthvað að gera þá var það eitthvað minniháttar. Miðjan var traust og Babel og Torres tóku Hibbert reglulega í nefið. Babel var nálægt því að skora á 28. mínútu og hver sóknin á eftir annarri fylgdi í kjölfarið. Pressan fín og baráttan frábær. Tilraunir Everton til einhvers voru afar fáar og fátæklegar. Þeir vildu fá vítaspyrnu dæmda á 38. mínútu en í endursýningu sást það augljóslega að boltinn fór aldrei í hönd Hyypia. Skömmu síðar átti meistari Gerrard frábært skot í stöng.

Staðan í hálfleik var 1:0 og hefði vel getað verið 4:0! Slíkir voru yfirburðirnir. Að vísu voru skotin “ekki nema” átta á móti einu hjá Everton, en blágubbsmennirnir höfðu yfirhöndina í gulum spjöldum: 0-2!

Síðari hálfleikur virtist ætla að byrja jafnvel og sá fyrri, en svo reyndist ekki vera. Yfirburðamaður í fyrri hálfleik, Steven Gerrard, fannst mér ekki sjást nógu mikið og liðið hleypti Everton of mikið inn í leikinn. Hann jafnaðist dálítið út og hálffyndið í leikslok að sjá að Everton voru rétt meira með boltann en Liverpool. Í síðari hálfleik fannst mér mest bera á Hyypia og Skrtel, sem stóðu sig virkilega vel. Það sáust þó nokkrar yndislegar rispur hjá okkar mönnum og ef Babel hefði átt betri leik sendingarlega séð, þá hefði t.d. verið frábært að sjá lokin á stórglæsilegri sókn Liverpool á 67. mínútu þar sem snöggar sendingar og falleg spilamennska fékk mig til að rísa úr sæti.

Fleiri urðu nú ekki mörkin í leiknum, en meistari Gerrard átti stórkostlegt skot að marki undir lok leiksins sem Tim Howard varði vel. Skottilraunir Everton manna tvöfölduðust í seinni hálfleik – þeir áttu sem sagt tvö skot að marki og alls þrjú! Okkar menn létu sér nægja 14 skot.

Maður leiksins: Þetta er nokkuð erfitt val fyrir mér, því í fyrri hálfleik fannst mér nær allir spila vel og yfirburðirnir miklir. Gerrard fannst mér stórkostlegur í fyrri hálfleik en ekki eins áberandi í þeim síðari. Torres var með sífellda ógnun og samspil hans við bæði Kuyt og Gerrard gott. Kuyt var svo hörkuduglegur allan leikinn, og ég veit hvaða álit sumir hafa á þeim manni, en mér fannst það bara lýsandi fyrir þennan knattspyrnumann, að þegar fram var komið yfir venjulegan leiktíma, þá var hann pressandi vörn Everton (tvo varnarmann og markmanninn) sem varð til þess að þeir áttu erfitt með að koma boltanum fram!! Frábær barátta hjá manninum. Skrtel og Hyypia voru öruggir í vörninni, og nokkrir frábærir taktar hjá gamla manninum sáust. Riise meira að segja átti nokkrar sendingar sem skiluðu sér á samherja!! Lucas og Alonso réðu miðjunni. Ég er persónulega með þrjá í sigtinu sem mann leiksins: Torres, Kuyt, Gerrard og Hyypia… (ókei, þetta eru fjórir!) en vegna algjörs asnaskapar hjá Torres í lokin, þegar hann fékk gult spjald fyrir að sparka bolta í burtu, og vegna þess að Gerrard “hvarf” smá í seinni hálfleik, þá ætla ég að taka sénsinn og leyfa Kuyt að hljóta nafnbótina í dag. Baráttan hans var algjörlega einstök.

Næsti leikur: Jæja, góðir hálsar. Framundan eru þrír leikir gegn Arsenik á sex dögum. Þetta verður svakaleg vika!!! Næsti leikur er einmitt sá fyrsti af þessum þremur og það er fyrri leikur liðanna í 8 liða úrslitum meistaradeildarinnar. Sá leikur fer fram miðvikudaginn 2. apríl kl. 19:45 18:45 á Emirates Stadium og vona ég að Rafa haldi áfram að sýna sömu snilli og hann hefur gert í CL-deildinni. Áfram Liverpool!!!

Já, því síðustu þrjú keppnistímabil hefur hesturinn ekki verið feitur sem við riðum á þarna. Í fyrra töpuðum við 0:2, árið þar áður jafntefli 2:2 og fyrir þremur sísonum síðan unnu Bolton menn með einu marki gegn engu. Er ekki kominn tími á að breyta þessu?!! Við unnum síðast þarna í september 2002, come on!

Rafa er alltaf með réttu hlutina á hreinu:

“We cannot afford to drop points, every game is important and we must reduce the gap on teams above us. — The players have experience of winning several games in a row. We have the squad to do it so now we need to start doing it.”

Og sjálfur fyrirliðinn hefur sagt að honum verði óglatt í hvert skipti sem hann horfi á stöðuna í deildinni og sjái muninn á efstu liðunum og Liverpool. (“I’m 27 now, I don’t want to be talking about ‘next season’ for Liverpool when I’m 32″) Er þetta þá ekki borðleggjandi?? Ekki viljum við ælandi fyrirliða … og reynslan er til staðar að vinna nokkra leiki í röð Við erum þremur stigum frá fjórða sætinu og Bolton er þremur stigum frá fallsæti. Þetta verður ekkert auðvelt. Við hljótum því að spila ákveðið með trausta miðju, pottþétta vörn og eldheita sókn. Við erum með besta markmanninn. Ergo: Við eigum að hafa þetta. En hvernig ætli liðið verði skipað?

Ég ætla svo að veðja á að á bekknum verði Itandje, Skrtel, Aurelio, Benayoun, Crouch.

En það er alltaf spurning með andlegu hliðina – og hvernig verður hún núna? Síðustu fréttir af Liverpool hafa verið af Mascherano (frábært mál), Carra (ofblásið upp mál), Hicks að tala um blokkeringu á sölu Gilletts á sínum hluta í félaginu, og ógleði fyrirliðans. Við viljum auðvitað fókusa á leikina og formið og hvernig úrslitin hafa verið. Utanaðkomandi þættir hafa áhrif en þetta verður að vera sett til hliðar. Carra kemur inn eftir að hafa verið handtek… nei, grín … eftir að hafa verið í leikbanni, Agger er að braggast og Voronin líka … Ég vil fá að sjá grimm og ákveðni. Við höfum alltaf talað um nauðsyn þess að vinna leiki, og hér er ekkert um annað að ræða: sigur eða hverfandi vonir um meistaradeildarsæti!!!! 12 leikir eftir, 36 stig í pottinum … hversu mörgum náum við í af þeim? Leikurinn á morgun verður testament á karakterinn í liðinu.

Spá: Mascherano er maður vikunnar í mínum huga, enda hef ég mikið dálæti á honum. Ég ætla því að spá 1:0 sigri okkar manna, þar sem Mascherano stoppar sókn Bolton manna, sendir glæsilega sendingu á Torres sem mun setja hann af öryggi í netið á 76. mínútu!

Við verðum að vinna, eða eins og fyrrnefndur ónefndur M.B. krunkaði: “I don’t want to wait until our time has come and gone”

ÁFRAM LIVERPOOL!

• Staðreynd 1: Við eigum í harðri baráttu um fjórða sætið í deildinni við Everton, Aston Villa, Manchester City og mögulega Portsmouth ef við viljum lækka í okkur rostann enn meir
• Staðreynd 2: Við erum ekki í góðum málum varðandi varnarmenn fyrir leikinn á morgun
• Staðreynd 3: Middlesbrough hefur skorað næstfæst mörk í deildinni!
• Staðreynd 4: Það var lið frá Liverpool sem sigraði Middlesbrough í deildinni síðast

Staðreyndir eru staðreyndir, tölur eru tölur, ég er naut og ég veit að Middlesbrough hefur strítt toppliðunum – unnu t.d. Arsenal í byrjun desember. En með meiðsli okkar manna í huga, með marka-ekkilengur-þurrð Dirk Kuyt í huga … með baráttuna framundan um fjórða sætið í huga … þá hlýtur Benitez (og auðvitað allir liðsmenn) að þjappa liðinu saman og sýna hvað í þeim býr. Við eigum 13 leiki eftir – þar af tvo útileiki gegn toppliðunum tveimur. Hvað ætlum við að gera? Klúðra tímabilinu alveg eða “redeem ourselves” og sýna stolt og leikgleði þennan síðasta þriðjung mótsins sem er að hefjast? Vissulega er staða okkar góð í meistaradeildinni, en við skulum ekki afskrifa Inter og fara í þennan Boro leik með einhverju öðru hugarfari en við sýndum á móti Inter.

Gefum Benitez aðeins orðið (tekið af opinberu síðunni):

“We have two targets, clearly. One is the Champions League and the other is to finish in the top four. We have four games before Inter Milan and we must try to win these games. — Our idea is to think about these four games and after that Inter will be a very tough game. The key is to be sure we are in the top four.”

Svo mörg voru þau orð, … ókei, þau voru miklu fleiri en þetta er eitthvað sem ég vill heyra! Ég vill fá brjálað keppnisskap í alla leiki, og þar eru lið eins og Middlesbrough ekkert undanskilin. Þó svo að liðið hafi skorað næstfæstu mörkin í deildinni, þá geta þeir alveg tekið upp á því að skora fleiri mörk en við á morgun. En það mun ekki gerast ef baráttan er til staðar. Já, það eru fjórir leikir þar til einvígið við Inter Milan verður til lykta leitt, og fókusinn er alltaf á næsta leik. Þetta er einfalt, er það ekki?? Spáum aðeins í liðið:

Andlega hlið Kuyt (mynd fengin af uefa.com) er vonandi á uppleið og með það í huga (og markið sem hann skoraði), ásamt trú Rafa á hann, þá spái ég honum í byrjunarliðið ásamt Torres frammi. Ef Aurelio kemur inn, þá er það væntanlega fyrir Riise. Alonso … kemur hann í staðinn fyrir Mascherano? – vandi er um þetta að spá. En Carra spilar ekki vegna leikbanns og spurning hvort Insúa spili eitthvað – Lucas mögulega, en þá fyrir hvern? Ég get sagt það, að ég hlakka mikið til þess tíma þegar Agger byrjar að spila aftur. Mér finnst Hyypia hafa staðið sig mjög vel í sínu hlutverki þennan vetur (búinn að spila mun meira en hann gerði í fyrra!) en eigum við ekki að gefa honum smá break í einn eða fleiri leiki? Ég hef lesið ólíkar fregnir af Skrtel, en ef hann er heill heilsu og í formi, þá hendum við Riise út og setjum Arbeloa eða Aurelio á kantinn og Skrtel við hlið Hyypia.

Spá: Þetta verður mikill baráttuleikur, og ég hef mikla trú á mínum mönnum. Ég trúi því að andlega hliðin sé á uppleið og baráttan verði til staðar. Mig langar þar af leiðandi mjög mikið til að spá 4:0 sigri okkar manna þar sem Torres skorar þrennu … en ég ætla samt að vera raunsærri og spá 2:0 þar sem Kuyt og Torres skora í seinni hálfleik.

Gömlu góðu sannindin eru gild hér: VIÐ VERÐUM AÐ VINNA!

Koma svo – áfram Liverpool!!!

En hversu erfitt verður að ná einhverjum árangri? Eru ekki Inter menn miklu betri en við? Höfum við eitthvað í þá að gera, miðað við hvernig leikgleði, leikform, spilamennska, sjálfstraust og innanbúðarmál hafa verið? Við komumst Krísuvíkurleiðina áfram í þessari keppni, en verður það – ásamt fyrrnefndum atriðum – okkur til gróða eða ekki?

Á þessum tímapunkti vil ég minna á að við unnum Barcelona á Nou Camp, við unnum Juventus á Anfield, við höfum slegið Chelsea út í þessari keppni oftar en einu sinni … við höfum alltaf vitað að ekkert er ómögulegt fyrirfram í þessari keppni. Ef Barnsley getur unnið Liverpool á Anfield (já já, strá salti í sárin, Doddi!), þá hlýtur Liverpool – sem er the underdog hérna – að geta unnið Inter Milan.

“Liverpool’s current form is misleading. It will be hard to beat them. We know they are a great team with quality players and a great coach in Rafael Benitez.”

Þetta segir þjálfari Inter Milan, Roberto Mancini. Auðvitað spilar sálfræði alltaf hlutverk í svona baráttu, en ég hef mikla trú á þessum orðum ítalska þjálfarans.

“”It’s a major, major blow to go out of the FA Cup to a lower league team at Anfield. We realise that’s not good enough. — But we’re going to have to get over this quickly because the Champions League is massive for us now. It’s the only thing we have left that we can win.”

Jamie Carragher mælir hér orð að sönnu. Hann talar einnig um það að andrúmsloftið verði rafmagnað á Anfield á morgun, baráttan verði til staðar – liðið vill gera betur og þó svo að sigur á móti Inter myndi ekki bæta upp tapið gegn Barnsley … þá myndi það virka sem vítamínsprauta á baráttuna sem augljóslega er framundan í deildinni (fjórða sætið sko) og í CL-deildinni.

Rafa hefur mætt Inter tvisvar sem þjálfari (með Valencia) og í bæði skiptin komst Inter áfram. Árangur Inter gegn enskum liðum í 24 leikjum er þessi: 9 sigrar, 5 jafntefli, 10 töp. Liverpool hefur mætt ítölskum liðum sex sinnum á Anfield, sigrað fjórum sinnum og tapað tvisvar. Já … tölfræði er einkar skemmtileg stundum, en eins og ég segi alltaf og geri það nú: hún vinnur ekki leiki!!!!

Ég hef fulla trú á því að Rafa peppi sína menn upp og að öllu verði tjaldað til. Torres hlýtur að koma inn og skv. fréttum úr síðasta leik, þá finnst öllum að Babel eigi rétt á því að byrja inn á. Við höfum sosum sagt að Crouchinn okkar hafi átt það líka nokkrum sinnum, en vont er að lesa í Rafa hvað þetta varðar. Að þessum orðum sögðum hins vegar, þá segi ég strax að ég býst við 3-4 vitleysum hjá mér í spá um liðsuppstillingu – en ætla að veðja á þennan fák:

Bekkurinn: Itandje – Arbeloa – Alonso – Kewell – Kuyt

Pennant inni og Kewell út? — Rafa mun sækja í reynsluna hvað varðar vörnina held ég og miðjan verður gjörsamlega crucial í þessum leik, og þar VERÐUR fyrirliðinn okkar að standa sig. Ég veit að kunningi minn mun ekki samþykkja með bros á vör spá mína með Riise í byrjunarliðinu … en ég ætla samt að skjóta á þetta. Munið eftir veseninu á milli Riise og Bellamy fyrir Barca-leikinn fræga? Hvernig fór það? Og sóknin … Torres verður þar aðalmaðurinn en ég hef trú á að Crouchinn eigi eftir að reynast okkur vel, eins og svo oft áður. Við spilum eflaust varlega, en spilum til sóknar og sigurs. Ég vil líka trúa því að miðjan taki meira þátt í uppbyggingu spilsins núna en í öðrum leikjum. Háar og ónákvæmar sendingar langt fram á völl mega ekki sjást svona mikið!

Spá: Þetta verður ROSALEGUR leikur! Höfum við ekki einmitt séð það hjá Liverpool í þessari keppni, að þegar eymdin virðist vera í næsta nágrenni, þá rífur liðið sig upp og minnir okkur á að taka það alvarlega??? Mikil barátta, mikið taugastríð – og ef þeir ná að halda Zlatan og félögum niðri, pirra Inter menn dálítið og setja inn 1-2 mörk á undan þeim … þá hef ég mikla trú á mínum mönnum. Ég ætla að spá Liverpool sigri (auðvitað!! kemur eitthvað annað til greina??? Ha??) – þetta fer 3:1 þar sem Torres, Gerrard og Crouch skora, en Zlatan minnkar muninn í lokin með umdeildu marki!

ÁFRAM LIVERPOOL!! — Hafið trú á ykkar liði!!!