Um höfundana: Babu

Einar Matthías heiti ég og er ´81 módelið af Selfyssingi. Ég er stúdent frá F.Su. á Selfossi og viðskiptafræðingur frá HR.

Hér og bara allajafna á netinu geng ég undir viðurnefninu Babu sem er ólíkt því sem sumir virðast halda ekki neitt dulnefni, þetta festist við mig þegar verið var að velja nöfn á búninga hjá leikmönnum utandeildarliðs sem ég spilaði með á Selfossi í kringum aldarmótin. Gamli er slökkvustjóri og því lá beinast við það yrði Babu aftan á mínum búning, hvort sem mér líkaði það eða ekki.

Stuðningur minn við Liverpool hófst ca. ´86-´87 eða um leið og ég vissi eitthvað um fótbolta. Ég man að ég heyrði félaga minn og (harðan Púllara enn í dag) segja í rifrildi við einhvern „nei hey, Liverpool er langbest” og ég tók það mjög bókstaflega því ég er ekki viss um að ég hafi verið búinn að sjá leik með liðinu á þessum tímapunkti, en þá líkt og nú var bara eitt lið sem eitthvað vit var í að halda með og valið því einstaklega auðvelt. Síðan þá hefur þetta lið frá Englandi verið hreint fáránlega stór partur af mínu lífi og svei mér þá ef þetta hefur ekki mótað mann á einhvern hátt. Í dag er krafan hjá manni orðin þannig að maður er hálf pirraður ef það kemur ekkert nýtt í fréttum á hverjum klukkutíma. Ég hef lesið mig þó nokkuð vel til um Liverpool í gegnum tíðina, ég fylgist mjög vel með því sem er að gerast hverju sinni og er oftast til í að ræða Liverpool fram í rauðan dauðann. Líklega gæti ég drepið kött úr leiðindum á Liverpooltali.

Verandi ´81 módel er ekki hægt að segja að stuðningur minn við liðið hafi spannað einhvern gullardartíma, ég hafði ekki hundsvit á Souness sem leikmanni í den og var því ákaflega illa við hann, enda var maðurinn hrein hörmung fyrir klúbbinn sem stjóri. Evans greyið var svo sem ágætur, spilaði góðan bolta og svona en vantaði herslumuninn. Houllier var kannski nauðsynleg ráðning og ég skildi hvað hann var að reyna í sinni uppbyggingu en sú uppbygging náði ekki lengra en til varnarinnar og maðurinn náði að gelda nokkra góða framherja áður en hann varð bensínlaus með liðið. Því þarf líklega ekki að taka það fram að ég er mjög mikill Rafa Benitez aðdáandi og líst ljómandi vel á það sem hann er að gera, CL sigurinn 2005 er með betri mómentum sem maður man eftir og ég hef trú á fleiri svona mómentum með Rafa í brúnni.

Þetta getur tekið tíma en það mun takast, t.a.m. hef ég alltaf haldið með KR á Íslandi (það er ekki fyrr en nú sem Selfoss getur hugsanlega farið að keppa við þá) og bíð enn eftir því hjá Liverpool sem við KR-ingar upplifðum 1999 (versta ár í sögu enskrar knattspyrnu btw.) eftir áralangt grín og skot andstæðinga.

Ég hef aldrei pælt neitt rosalega í uppáhaldsleikmönnum þannig séð, Barnes og Rush voru báðir rosalega góðir og í miklu uppáhaldi. Fowler er guð og kom eins og stormsveipur inn í liðið. Á einhverju stigi málsins hélt ég þó nokkuð upp á McManaman. Árið 1997 sá fyrsta byrjunarliðsleik Owen live og það barn gat spilað fótbolta, seinna voru það Hamann og Hyypia sem voru í uppáhaldi. Í dag eru það svo auðvitað Carra, Gerrard og elsku kúturinn minn hann Fernando Torres.

Sjálfur hef ég farið 6-7 sinnum á leik hjá Liverpool og aldrei séð þá tapa (Riise reyndi sitt besta síðast en jafnaði of seint fyrir Chel$ki) og það sem meira er þá hef ég þrisvar séð Arsenal spila og auðvitað þrisvar séð Arsenal tapa! En það þarf líklega engan stærðfræðing til að sjá að margar planaðar sólarlandaferðirnar hafa endað í helgarferð til Englands sem líklega skilur helmingi meira eftir sig.

Að lokinni ágætis bjórdrykkju á fyrsta degi sumarfrís í lok júlí ákvað ég að sækja um sem „penni” hér á Kop.is, gleymdi því svo aðeins yfir Verslunarmannahelgina og það var því óvænt ánægja þegar ég sá móttöku umsóknarinnar eftir helgina. En hún var að lokum samþykkt af snillingunum sem stýra hér skútunni og ég hlakka því til að bulla hér inn í framtíðinni. Síðuna tel ég vera besta vettvanginn hér á landi (og víðar) til að skiptast á skoðunum um Liverpool þó tekið hafi þó nokkurntíma að sannfæra mig um að íslenskir gaurar gætu sagt mér einhvað um Liverpool sem ég fann ekki á ensku. En fljótlega eftir fyrstu heimsókn hingað varð síðan fyrirliði blogghringsins hjá mér.

Áður hef ég eyðilagt alla pólitíska framadrauma félaga minna á nokkrum bloggsíðum sem ég hef haldið úti sl. 5-6 ár þar sem ég fer aðallega yfir atburði helgarinnar í máli og fullt af myndum, með aulahúmorinn að leiðarljósi. Í dag eru þessi skrif mín að finna á babu.tk og áður var það babu.bloggar.is en ekkert vera segja neinum frá því ;)

Ef þið viljið hafa samband við mig eða benda á eitthvað sniðugt þá er um að gera að henda línu á nenniekkiaðsvaraþér@þúertleiðinlegur.is … nei ókei einar@babu.tk

You´ll Never Walk Alone

Babu.