Maður er ekki hættur að fagna sigrinum frá því á laugardaginn og strax er maður dottinn ofan í upphitun fyrir næsta leik. Svona á þetta að vera. En af hverju getum við ekki bara fengið að spila eingöngu við stórlið? Nei, það er ekki hægt og við þurfum að mæta þessum minni spámönnum líka, spámönnum sem svo sannarlega tekst alltof oft að rífa mann hressilega niður á jörðina. Ég bara neita að trúa því að menn leyfi því að gerast enn og aftur annað kvöld, sjálfstraustið á bara að vera komið á svo rosalegt flug að við eigum bara ekki að geta misstigið okkur enn og aftur. En hversu dæmigert væri það nú samt?

Wolves liðið hefur alltaf verið lið sem ég vil hafa í efstu deild, þeir voru það þegar ég byrjaði að rembast við að horfa á enska boltann, og það er bara eitthvað rétt við það að þeir séu þar. Ég hef alltaf verið á þeirri skoðun, allt þar til að Mick McCarthy ákvað að hvíla 10 bestu menn sína þegar hann fór á Old Trafford. Stór lið eru með stóra hópa til að “rótera” leikmönnum sínum og halda þeim ferskum, litlu liðin hafa ekki jafn mikið efni á því sökum stærðar á hópum, en meira að segja liðin með stærstu hópana skipta ALDREI út sínum 10 bestu leikmönnum á milli tveggja deildarleikja. Eftir þetta hef ég ávallt vonast til að Mick McCarthy gangi sem allra allra verst með sín lið og á meðan hann er með Wolves, þá vona ég hreinlega að þeir falli.

Þetta er engu að síður erfitt lið við að eiga og Mick og félagar hans eiga sko ekkert eftir að hvíla menn gegn okkur eins og gegn erkifjendum okkar á sínum tíma. Neibbs, þeir eiga eftir að senda sitt sterkasta lið til leiks og þeir verða þrjóskari en allt og munu reyna að halda okkar mönnum í skefjum. Þeir sitja jú í næst neðsta sæti deildarinnar og vantar nauðsynlega að hala inn nokkur stig. Það sorglega í þessu öllu er að sjá að þeir hafa aðeins 18 stig á móti okkar 35, en engu að síður þá hafa þeir skorað jafn mörg mörk og okkar menn, eða 25 kvikindi. Stóri munurinn á liðunum hefur verið sá að þeir hafa fengið heil 40 mörk á sig í þessum 22 leikjum, en við aðeins 21. Þeir hafa sigrað heila 4 leiki, þar af komu tveir sigrar í fyrstu 2 leikjunum. Þeir hafa ekki náð sigri í 8 síðustu leikjum sínum, mikið lifandis skelfing væri flott ef það héldi eitthvað áfram. Þeir hafa þó náð jafntefli í 4 af þessum 8 leikjum.

Þeirra lang hættulegasti maður hefur verið Steven Fletcher, en hann hefur skorað heil 9 mörk í deildinni. En aðrir hættulegir menn sóknarlega séð eru Jarvis, Hammill og Doyle. Hennessey hefur verið öflugur í markinu hjá þeim, þrátt fyrir þennan aragrúa af mörkum sem hafa lekið inn, en annars þarf bara að keyra vel og hressilega á þessa vörn þeirra. Talað er um að staða Mick sé orðinn ansi tæp hjá Wolves, mikið væri nú fínt ef við myndum tryggja þeim nýjan stjóra með góðum stórsigri á morgun. Maður má nú láta sig dreyma ekki satt?

En að okkar mönnum. Engar nýjar meiðslafregnir frá Melwood, Spearing á að vera orðinn klár í slaginn að nýju og nokkrir leikmenn ættu að vera betur hvíldir núna, enda tóku þeir mis mikinn þátt í leiknum um helgina. Þetta verður síðasti leikur Luis Suárez í leikbanni, mikið hrikalega hef ég saknað hans svaðalega allan þennan tíma. Finnst hreinlega vera heil eilífð síðan ég sá hann síðast spila leik. Ég ætla að skella mér til Englands um næstu helgi og taka sérstaklega á móti honum. Það er því úr nánast fullum hóp að velja fyrir King Kenny. En hvernig mun hann stilla upp? Úff, ekki alveg einfalt mál, allavega náði hann að koma manni hrottalega á óvart á laugardaginn.

Ég reikna fastlega með að Glen Johnson komi aftur inn í hægri bakvörðinn á morgun, Skrtel og Agger í miðvörðunum og Enrique í vinstri bakk. Annað bara meikar alls ekkert sens. Dirk, Bellers og Gerrard spiluðu ekki allan leikinn á laugardaginn og reikna ég alveg eins með því að þeir komi inn í liðið. Ég væri algjörlega til í að sjá þá Henderson og Adam inni á miðsvæðinu, Gerrard fyrir framan þá og Bellers og Kuyt á köntunum. Það væri draumauppstillingin mín, með Carroll á toppnum. En það er eitthvað sem segir mér að Spearing verði í byrjunarliðinu og það er þá bara spurning á kostnað hvers? Helst hallast ég að því að Henderson verði þá settur út á hægri kant og Kuyt áfram á bekknum. En whatever, ég ætla bara að giska á draumauppstillinguna mína í þetta skiptið og vona að Dalglish sé á sama máli. Svo er það spurning um Downing, held að hann verði hvíldur á bekk, enda spilað mikið undanfarið.

Bekkurinn: Doni, Carra, Kelly, Spearing, Shelvey, Maxi og Downing

Þetta lið á svoleiðis að geta leikið sér að liði Wolves, en til þess að það megi verða, þá hreinlega verða menn að fara að reima á sig markaskóna, og síðast enn ekki síst, koma til leiks með réttu hugarfari. Komi menn með sama hangandi hausinn og gegn Stoke og Bolton, þá fáum við að sjá enn eina slíka hörmung. Komi menn til leiks með dass af greddu og ákveðni eins og í síðustu tveim leikjum, þá getum við algjörlega slátrað þessu Wolves liði. Púkarnir á öxlunum á mér eru nú að hnakkrífast um það hvernig ég eigi að spá fyrir um leikinn. Annar heldur því fram að þetta verði enn eitt strögglið, en við náum að merja 0-1 sigur, hinn er harður á því að sjálfstraustið sé svo gott núna að við tökum eitt stykki úlfahjörð til slátrunar. Ég fýla þann púka mun betur og ætla því ekki að hlusta á hinn í þetta skiptið. 0-4 og málið er dautt. Carroll, Bellamy, Gerrard og Adam með mörkin.

Eru menn reiðubúnir í næsta stórleik? Það er skammt stórra högga á milli þessa dagana, svokallað „gott“ vandamál sem fylgir því að ná velgengni á fleiri en einum vettvangi. Auk þess að berjast um Meistaradeildarsæti í Úrvalsdeildinni er liðið nú búið að öðlast réttinn til að leika á Wembley úrslitaleik Deildarbikarsins þetta árið, og á morgun ætlar liðið að reyna að komast enn lengra í hinni, Ensku Bikarkeppninni, og það á kostnað erkifjendanna í Manchester United.

Svo ber við í þetta skiptið að það má nánast segja að knattspyrnan sjálf hafi verið í aukahlutverki í aðdraganda þessa leiks. Í kjölfar Suarez/Evra-málsins hafa menn verið að hugsa um allt aðra hluti en að metast um knattspyrnugetu liðanna síðustu vikur og mánuði og mér finnst þessi vika ekki hafa verið nein undantekning. Það er nánast eins og leikurinn sjálfur skipti minna máli en það sem kemur fyrir utan níutíu mínútna fótboltann sem verður leikinn á laugardag.

- Mun Patrice Evra spila þennan leik á Anfield?
- Hvaða móttökur mun Evra fá meðal stuðningsmanna Liverpool?
- Munu leikmenn Liverpool taka í hönd Evra fyrir leik?
- Verður brotið harkalega á Evra í leiknum, mun þetta leysast upp í vitleysu og rifrildi í stað knattspyrnu?
- Verður einhver fyrir kynþáttaníði á Anfield, og ef svo er, verður Suarez kennt um það?
- Er þeldökkum börnum óhætt innan um Púllara? Vill ekki einhver hugsa um börnin?!?

Möguleikarnir á hneyksli eða suðupunktum eru mýmargir og það veit hver heilvita maður að enska pressan bíður með vel smurða putta á lyklaborðum eftir einhverju, bara EINHVERJU sem hægt er að nota í dálkauppfyllingar næstu vikurnar. Einhverju djúsí dæmi sem selur blöð, maður, eitthvað sem grípur athyglina. Þið getið bókað að hvað svo sem gerist á laugardag, innan vallar eða utan, þá verður dregin upp af því dekksta mögulega mynd og best væri að sjálfsögðu ef áhorfendur á Anfield gera snápunum nú greiða og baula svolítið hressilega á Evra, eða ef einhver kastar í hann krónu, eða einhver í Suarez-bol hróðar ókvæði að honum yfir innkasti.

Þá fyrst yrði nú gaman að vera blaðamaður hjá Mirror, Guardian, eða öllum hinum. Þá fengju þeir nú að hafa skoðun á þessu öllu saman og gætu sagt okkur í svona þúsundasta sinn hvað Liverpool er mikill skítaklúbbur.

Ég vona að menn hugsi áður en þeir framkvæma og geri snápunum enga greiða í hádeginu á laugardag. En nóg af þeim útúrdúr í bili.

Knattspyrnulega séð eru bæði lið í fínum gír. United eru sem fyrr í öðru sæti í Úrvalsdeildinni (og sinni eigin borg). Þeir hafa verið á sigurbraut undanfarið, þrátt fyrir mikil meiðsli en leikmenn eins og Rio Ferdinand, Anderson, Ashley Young og Darren Fletcher munu allir missa af þessum leik, og þá þykja þeir Nani og Phil Jones vera tæpir. Ég ætla hins vegar að tippa á að þeir tveir síðastnefndu verði báðir skyndilega leikfærir á laugardag og að þetta verði liðið sem við er að etja:

Þetta er þokkalega sterkt lið hjá þeim og svo eiga þeir Berbatov, Hernandez og Scholes á bekknum þannig að þótt þeir eigi í meiðslum þessa dagana er engan veginn hægt að líta framhjá þessum leik. Okkar menn verða að vera upp á sitt allra, allra besta til að klára þetta með sóma.

Af okkar mönnum er minna að frétta. Luis Suarez á eftir tvo leiki í banni sínu og Lucas er enn á hækjum, að öðru leyti er það bara Jay Spearing sem mun að öllum líkindum missa af þessum leik áður en hann verður leikfær á ný.

Ég ætla að spá því að Dalglish breyti sem minnstu eftir flottan leik gegn City á miðvikudag. Craig Bellamy hefur byrjað og spilað í 70+ mínútur gegn bæði Bolton og City síðustu daga þannig að ég spái því að Andy Carroll komi inn í liðið í hans stað og að Dalglish eigi hann ferskan á bekknum ef/þegar þörf krefur:

Þetta er, eins og hjá United, feykisterkt lið og lið sem ætti að vera í góðum gír eftir að hafa tryggt sér farseðil á Wembley í vikunni. Ég hef mestar áhyggjur af Carroll og býst ekki við miklu frá honum í þessum leik, en einhver verður að rótera á móti Bellamy í fjarveru Suarez og það er enginn annar sem kemur til greina.

MÍN SPÁ: Ég hef enga sérstaka tilfinningu fyrir leiknum sjálfum, en ég er handviss um að eitthvað á eftir að gerast sem verður meira fréttaefni en leikurinn sjálfur. Spáin mín í dag verður því tvíþætt:

- Leikurinn endar 1-1 sem þýðir endurspil á Old Trafford eftir hálfan mánuð. Það þýðir að Luis Suarez þarf að heimsækja Evra & co. tvisvar á einni viku eftir að hann er kominn inn aftur, sem er nokkurn veginn það leiðinlegasta sem ég get ímyndað mér fyrir hann núna.
- Það verður baulað á Evra allan tímann og hvert einasta blað utan Merseyside-svæðisins mun skrifa pistla, leiðara, greinar og blogg þar sem því er lýst af mikilli kostgæfni hversu mikill skítaklúbbur Liverpool er og hvað það séu miklir rasistar sem halda með Liverpool.

Ég held að þetta sé mesta svartsýnisspá sem ég hef látið frá mér á mínum átta árum á þessari síðu. Vonandi hef ég ekkert vit á þessu.

Áfram Liverpool!

Eftir alltof langa bið er liðið okkar einu skrefi frá því að fara í úrslitaleik í keppni.

Mér telst til að það hafi verið vorið 2007 sem við slógum út Chelsea og fórum í úrslitaleik í Meistaradeildinni – fimm ár semsagt. Árið áður slógum við sama lið út í undanúrslitum og lékum vorið 2006 til úrslita um FA-bikarinn, það eru semsagt sex ár síðan við fórum í úrslitaleik í heimalandi liðsins okkar ástkæra.

Vissulega er hér á ferð “minnst mikilvægasta keppnin” á hverju ári, en eitt af því sem aldrei verður ofmetið er sigurhefð leikmanna og liða. Það er dásamleg tilfinning að ná árangri og standa með verðlaun í höndunum, tilfinning sem þú ert til í að leggja mikið á þig að ná aftur og upplifun sem styrkir tengsl þess leikmannahóps sem nær áfanganum saman. Las viðtal við mótormunninn Mourinho ekki alls fyrir löngu þar sem hann taldi sigur þeirra Chelseamanna á okkar drengjum í úrslitum þessarar keppni árið 2005 hafa verið lykil að öllum sigrum Chelsea síðan þá. Hann hafi þar náð að sanna fyrir leikmannahópnum sínum og stjórninni að hans hugsun væri nógu sterk til að vinna titil og þá staðreynd hafi hann yfirfært á leikmennina. Fyrst þeir unnu þessa keppni gætu þeir unnið allt.

Sú er kannski einmitt staðan okkar manna á þessu mómenti. Það getur enginn sagt að við höfum farið auðvelda leið (Exeter, Brighton, Stoke og Chelsea áður en hingað var komið) og ekki er verkefnið í undanúrslitum minna. Ef það er klárað hlýtur sjálfstraustið í brjóstum manna að vera orðið meira en áður. Þess vegna fullyrði ég það að leikur morgundagsins er sá mikilvægasti í vetur, og sá mikilvægasti á Anfield í ansi mörg ár.

Anfield er ekki alltaf vettvangur undanúrslitaleikja, en þegar sá leikvangur hýsir síðari undanúrslitaleik má búast við töluverðu fjöri. Það sama verður örugglega uppi á teningnum annað kvöld. Það er uppselt á leikinn og hugur aðdáendanna er að fylgja liðinu upp þá brekku sem framundan er, og ná að fara á Wembley í fyrsta sinn síðan árið 1996! Vissulega höfum við unnið titla í Englandi síðan, en úrslitaleikirnir voru þá í Cardiff og það er klárlega mikið hungur hjá öllum í tengslum við félagið að fylla “The Wembley Way” af alrauðum Scouserum og endurvekja þann völl sem “annað heimili rauðliðanna frá Liverpool”.

En það er sko alls ekki sjálfgefið að við förum þangað! Framundan er án vafa sterkasti leikmannahópur Englands í dag, ofurmannlega skipað lið Manchester City sem hefur ekki lagt það í vana sinn að tapa mörgum leikjum á ferðum sínum í vetur. Liðið hefur þó átt erfitt uppdráttar á Anfield í gegnum söguna, í síðustu 10 viðureignunum þar höfum við unnið 7 og gert 3 jafntefli, síðast í deildarleiknum í vetur þar sem leikar fóru 1-1 og Mancini var ansi glaður með þau úrslit á erfiðum útivelli að hans sögn.

Þegar kemur að því að finna út byrjunarlið okkar manna er ég á því að margt sé að brjótast um í kolli Kóngsins Dalglish. Síðasti leikur okkar manna var sá versti undir hans stjórn, en í raun held ég að erfitt sé að finna marga sterkari leikmenn utan byrjunarliðsins en hófu leik á Reebok. Þess vegna held ég að hann sé einmitt að velta fyrir sér hverjir það eru sem hafa reynslu af svona leikjum, og svo horfir hann pottþétt líka til fyrri leiksins á Etihad Stadium þegar hann raðar upp á blaðið. Ég er því eiginlega alveg blankó, en held samt að við sjáum hann stilla upp 4-5-1 með varnartengdu liði sem svo eigi að sækja þegar líður á leikinn. Ekki ólíkt því sem við sáum í fyrri leiknum.

Ég set þess vegna þetta lið upp, þó ég sé alls ekki að velja það sem ég myndi vilja sjá.

Eftir svona ræðu eins og karlinn hélt um helgina ætlar hann eitthvað að færa til, ég held einhvernveginn að hann ætli Carra að sigla þetta á reynslunni og eftir erfiða innkomu Enrique á Etihad verði hann á bekk. Ég var samt búinn að setja hann líka inn, þá í kerfi með þrjá hafsenta og Skrtel líka inni og Kelly úti. En ég viðurkenni að ég átti mjög erfitt með að stilla þessu upp, en er þó handviss um að við sjáum einhverjar breytingar frá Bolton-leiknum, karlinn er ekki bara að gelta. Hann mun bíta!

Manchester City virðast ætla að sætta sig við leikbann sem Mario Balotelli var dæmdur í eftir leik þeirra um helgina, en þeir eiga ágætis leikmenn samt inni. Viðurkenni samt að vera sáttur við að vera laus við Balotelli. Vissulega “nöttaður” í hausnum, en verulega góður fótboltamaður sem við eigum erfitt með að “matcha upp”. Ætla aðeins að reyna að skjóta á þeirra lið í leiknum.

Hörkuleikmannahópur sem erfitt verður að eiga við. Þó vissulega veikari en ef að Kompany og Balotelli væru með!

Ég hlakka gríðarlega til. Við erum með góð úrslit með okkur úr fyrri leiknum og Anfield verður vafalaust tólfti maðurinn. Hins vegar er áðurnefnd hefð og reynsla af svona leikjum meiri að þessu sinni hjá mótherjunum, aðeins Agger, Gerrard, Carra, Johnson og Reina hafa unnið sér sæti á Wembley í okkar leikmannahóp og við verðum að viðurkenna það að síðustu ár hafa fáir leikir af þessari stærðargráðu verið verkefni okkar drengja, ólíkt City-liðinu.

Þetta verður blóðug barátta fram á síðustu sekúndur held ég og það mun standa tæpt, en leikurinn fer 1-1 þar sem Captain Fantastic jafnar á 88.mínútu og Anfield skilar svo leiknum heim í höfn og við getum farið að hlakka til Wembleyferðar.

KOMA SVO!!!!!!!!!!!!!!!!!!!

Sigur gegn Bolton á morgun myndi verða til þess að árangur okkar manna á útivelli yrði betri heldur en allt síðasta tímabil. Þetta segir kannski ekki mjög margt enda liðið ömurlegt á síðasta tímabili en þó klárlega ágætis mælikvarði á bætingu milli tímabila. Verra er þó að heimavöllurinn hefur ekkert verið að gefa af sér á þessu tímabili og þrátt fyrir að hafa ekki tapað leik á Anfield í vetur og á stundum skotið 20-30 á markið í leik höfum við bara unnið 4 leiki á heimavelli. Einn af þessum leikjum var einmitt öruggur sigur gegn arfaslöku Bolton liði og það sem meira er þá náðu okkar menn að skora þrisvar í leiknum, það eitt telst til tíðinda á þessu tímabili.

Heimavöllurinn hefur ekkert verið happa fyrir Bolton heldur og reyndar er árangur þeirra á Reebok Stadium sá versti hjá heimaliði í deildinni á þessu ári, einn sigur og eitt jafntefli í tíu leikjum. Þó voru Owen Coyle og hans menn aðeins farnir að rétta úr kútnum undanfarnar vikur eftir hræðilega byrjun á tímabilinu. Liðið tapaði 3-0 á Old Trafford í síðustu umferð en fyrir þann leik höfðu þeir unnið tvo og gert jafntefli í einum. T.a.m. unnu Bolton menn góðan sigur á Everton um daginn í áhugaverðum leik þar sem mark Tim Howard markmanns Eveton yfir allann völlinn var aðeins næst óvæntasta mark leiksins því David nokkur N´Gog skoraði fyrir Bolton í þessum leik.
Byrjunarlið Bolton í síðasta leik var svohljóðandi:

Bekkur: Lynch, Boyata, Riley, Pratley, Tuncay Sanli, Kevin Davies, Ivan Klasnic.

Sá leikur skíttapaðist og því erfitt að segja til um hvernig Coyle hugsar þennan leik. Meiðslalistinn er nokkuð langur hjá þeim, en Juusi Jaaskelainen, Mikel Alonso, Ricardo Gardner, Tyrone Mears, Chung-Yong Lee, Stuart Holden og Sean Davis verða allir fjarri góður gamni í þessum leik. Eins hjálpar þeim lítið að hafa selt fyrirliða sinn, Gary Cahill til Chel$ea í þessari viku.

Tölfræðin er með okkur fyrir þennan leik og það er eitthvað sem gerir mig ávallt stressaðan fyrir leik. Liverpool hefur unnið Bolton í síðustu tíu viðureignum liðanna, fjórir þessara leikja hafa verið á Reebok. Bolton náði síðast stigi af Liverpool árið 2006 og gott ef anti-kristur var ekki að stýra þeim þá. Liðin hafa spilað 25 leiki síðan úrvalsdeildin var stofnuð og Bolton hefur unnið þrjá þessara leikja.

Við eigum að vinna þennan leik, sérstaklega núna enda þetta eitt allra lélegasta Bolton lið sem þeir hafa boðið uppá. Okkar menn bara verða að hrista þetta 0-0 tap gegn Stoke af sér og koma með látum inn í þennan leik og Dalglish hreinlega verður að bjóða upp á gáfulegri sóknarleik en arfaslakan Dirk Kuyt einan upp á topp og 5 varnarmenn eins og við sáum síðustu helgi.
Þessi viðureign er lognið á undan storminum því að á miðvikudag er seinni leikurinn gegn Man City og á laugardaginn er það Manchester United í FA Cup.

Fjarverandi á morgun eru Luis Suarez og Lucas Leiva ásamt því að Jay Spearing er tæpur fyrir þennan leik. Ekki langur listi en það hroðalegt að vera án Suarez og Lucas. Þetta er fimmti leikurinn sem Suarez tekur út í þessu blessaða banni sínu.

Það er vika síðan við spiluðum síðasta leik og því held ég að Dalglish hefji leik með eins sterku liði og hann hefur uppá að bjóða.

Vonandi koma Agger og Enrique inn í byrjunarliðið aftur og ég tippa á að Carroll hefji leik og hafi þá Bellamy, Downing og Gerrard á hlaupandi í kringum sig.

Spá: Ég er lúmskt smeykur fyrir þennan leik enda liðið alls ekki sannfærandi í þessum leikjum sem við eigum að klára og bit frammávið er vandræðalegt, spái þó 0-2 og það verði Gerrard og Henderson sem skori mörkin.

Ég bara nenni varla að fara að mæta Stoke á morgun, það er eitthvað við það lið sem gerir mig bara þreyttan og uppgefinn. Kannski er það tilhugsunin við að mæta þessum leikstíl sem þeir eru svo sannarlega búnir að mastera síðustu árin. Maður huggar sig allavega við það að það verða engin boltastrákar á hliðarlínunum með hárþurrkara, harpix (eða hvernig sem það er nú skrifað) og handklæði til að undirbúa innköstin hjá Delap. Ég er eiginlega spenntur fyrir því að sjá hversu mörgum miðvörðum þeir stilla upp í leiknum. Það heyrir nefninlega til undantekninga séu þeir færri en 3. Í síðasta leik voru þeir 4.

En Stoke er ekki lengur neitt joke, þetta er drullu erfitt lið við að eiga og maður er yfirleitt langt því frá öruggur fyrir þessa leiki gegn þeim. Þeir eru með afar líkamlega sterkt lið og fara langt á því. Svo eru þeir með létta og lipra menn á sitt hvorum kantinum sem hafa verið duglegir að dæla boltanum inn í teiginn þegar andstæðingarnir ná að halda boltanum inná. Það er mikil áhersla lögð á það að gefa frekar inn á miðjuna gegn Stoke heldur en að sparka boltanum í innkast.

Stoke er búið að vera fast í 8. sætinu síðustu 6 umferðir og hafa nælt sér í 29 stig, eða fimm stigum minna en okkar menn. Ekki er svo ýkja langt á milli liðanna þegar kemur að markaskorun, Liverpool skorað 24 en Stoke 22, stóri munurinn hefur legið í varnarvinnu liðana, en í þessum 20 leikjum hafa Stoke fengið 31 mark á sig en Liverpool 18. Peter Crouch fær eflaust hlýjar móttökur á Anfield á morgun, eins og lang flestir fyrrum leikmenn Liverpool fá þegar þeir koma aftur, en hann er markahæstur Stoke manna með 6 mörk. Walters hefur líka verið sæmilega iðinn við kolann og hefur sett 5 kvikindi. Ekki er vitað um nein meiðsli á lykilmönnum hjá mótherjunum.

En hvað er að frétta af okkar mönnum? Menn væntanlega búnir að þurrka af sér brosið eftir sigurinn á Man.City, enda er hann búinn og kemur þessum Stoke leik ekkert við. Auðvitað vonar maður samt að menn taki slatta af sjálfstrausti með sér úr honum og inn á Anfield á morgun. Maður hættir nú fljótlega að telja upp Lucas þegar maður fer yfir meiðslalistann, en fyrir utan hann þá er það bara Jay Spearing sem ku vera tæpur fyrir morgundaginn. Það má ávallt finna jákvæða punkta í öllum hlutum og einn er klárlega sá að Luis Suárez verður hálfnaður með bannið sitt eftir morgundaginn. Damn hvað ég hlakka til að fá þann dreng tilbaka.

Ég reikna klárlega með því að varnarlínan fari aftur í “deildarnormið” sitt, þ.e. Glen, Martin, Daniel og Jose, sé bara ekki nokkra ástæðu til annars. Sumir hafa verið að kalla eftir því að Kelly leysi Johnson af hólmi, en það sást afar vel í síðasta leik að varnarleikur Johnson hefur batnað gríðarlega mikið og persónulega fannst mér Kelly oft á tíðum svolítið “sjeikí”. Þar fyrir utan þá tel ég að bakverðirnir okkar þurfi að vera öflugir sóknarlega gegn Stoke, því bæði Johnson og Enrique ættu að eiga möguleika gegn frekar hægri vörn Stoke manna.

Þessa dagana er lang erfiðast að segja til um miðjuna hjá okkar mönnum. Ég reikna eins og áður sagði ekki með því að Spearing spili leikinn, en hverjir koma til með að fylla þessar stöður? Mun kóngurinn hætta á að spila Stevie frá byrjun eftir að hann kláraði 90 mínútur í vikunni? Held að þetta verði mjög stór spurning því Kenny vill ekki taka óþarfa áhættu með kappann. Það yrði hrikalegt að missa hann aftur úr leik. En þar sem það verður vika í næsta leik á eftir þessum, þá hef ég trú á að Gerrard byrji. Þeir verða sem sagt þrír saman inni á miðsvæðinu þeir Stevie G, Jordan og Charlie. Ég vona að Jordan verði djúpur því ég held að hann geti vel leyst þá stöðu í fjarveru Lucas, og það út tímabilið.

Svo er það erfiðasta ágiskið, kantarnir. Við höfum úr fjórum gaurum að velja, Bellamy, Downing, Maxi og Kuyt. Ég er klár á því að ég myndi velja þá Bellamy og Maxi ef ég mætti ráða, en eitthvað segir mér sem svo að við eigum eftir að sjá Downing og Kuyt byrja þennan leik á morgun. Við megum ekki detta í þann pakka að hugsa of mikið um það hvað Stoke muni gera í leiknum, eða hvaða leikkerfi þeir muni nota. Þeir eiga að hafa áhyggjur af okkur. Við eigum bara að reyna að nýta okkur það að mænan í liðinu hjá þeim er mjög hæg og því þurfum við að keyra á þá með hraðann að vopni. Ég yrði í rauninni sáttur með að sjá þá Bellamy og Downing á köntunum bara upp á það að gera, því mér er sama hvað menn segja um Downing og hann sem kaup fyrir slatta af kúlum, hann er einn af okkar hröðustu mönnum og ég tel að hann gæti hentað vel gegn Stoke.

Uppi á topp verður svo Carroll og fær hann aldeilis að vinna fyrir peningunum á morgun. Ég tel að hann gæti orðið lykilmaður hjá okkur í vörninni líka, þ.e. ef og þegar Stoke fá sín föstu leikatriði. Þó svo að við munum vonandi ekki verið að laga leik okkar að Stoke kerfinu, þá þurfum við samt klárlega að búa okkur undir þessi föstu atriði. Þar mun Carroll vonandi koma okkur að góðum notum, sem og að djöflast í miðvörðum þeirra og reyna að opna pláss fyrir hlaup að marki. Ég vona svo heitt og innilega að Bellamy verði klár í slaginn, en það er bara Dalglish og hans menn sem geta lagt mat á það, hnén á honum eru tæp og menn taka ekki áhættu með þau. Það er eina ástæðan fyrir því að sá drengur byrjar ekki alla leiki hjá okkur.

Bekkurinn: Doni, Kelly, Carragher, Coates, Shelvey, Maxi og Bellamy

Mér finnst þessi uppstilling að ofan sýna það og sanna að breiddin er ekki mikið hjá okkur. Við erum með 3 pjúra varnarmenn á bekknum og eini meðlimur aðalliðsins sem ég set ekki í hóp er Fabio Aurelio. Og samt erum við bara með 2 menn meidda og einn í banni. Meiri breidd er algjörlega nauðsynleg til að liðið eigi á næstu árum að fara að berjast um titilinn á Englandi.

En hvað um það, það er algjörlega lífsnauðsynlegt að landa sigri á morgun. Fleiri töpuð stig á heimavelli koma bara ekki til nokkurra greina, ekki einu sinni trjágreina. Maður hefur séð lið ná að brjóta þetta Stoke lið niður, en ef menn ná ekki að gera það tiltölulega snemma í leikjum, þá ganga þeir á lagið og verða hættulegri með hverri mínútunni. Ég var nokkuð bjartsýnn fyrir leikinn gegn City, ég ætla bara að vera það áfram og segja að við komum til með að setja mark snemma og klára svo leikinn fljótt og örugglega. Eigum við ekki að segja að þessi leikur fari 2-0 og það verða þeir Carroll og Adam sem sjá um markaskorunina í þetta skiptið.

Það er komið að undanúrslitum enska Deildarbikarsins tímabilið 2011/12. Þetta er fyrsti góði séns Liverpool á bikarúrslitum síðan liðið lék til úrslita í Meistaradeildinni í Aþenu vorið 2007, og svei mér þá ef mann er ekki farið að lengja eftir því að sjá rauðu treyjurnar á fleygiferð um grasið á Wembley.

Fyrst þarf þó að klára undanúrslitin og það er vægast sagt erfitt verkefni fyrir höndum. Topplið Manchester City, besta lið Englands í vetur, eru mótherjarnir og ef marka má leik liðanna í síðustu viku, í Úrvalsdeildinni, er þetta ekki verkefni sem við getum talist líklegir til að klára, fyrir fram.

Seinni leikur liðanna fer fram eftir viku á Anfield en fyrst heimsækja okkar menn Etihad Stadium á miðvikudag og verkefnið er einfalt: að sleppa heim með úrslit sem gefa okkur séns í seinni leiknum. Annað 3-0 tap dugir engan veginn, hér verður að gera betur.

Af okkar mönnum er það helst að frétta að Lucas Leiva er meiddur og Luis Suarez í leikbanni. Ég veit, ég veit, brakandi ferskar fréttir, en utan þessara tveggja lykilmanna eru allir heilir og (vonandi) æstir í að fá að spila. Steven Gerrard lék í 90 mínútur gegn Oldham á föstudag og ætti því að vera klár í byrjunarliðið á miðvikudag, sem er mikill munur.

Ég spái því að King Kenny Dalglish stilli upp sínu sterkasta liði á miðvikudag en þó sömu, varfærnislegu taktíkinni og í deildarleiknum fyrir viku:

Ef leikformið eitt réði för væri Craig Bellamy pottþétt í okkar sterkasta byrjunarliði um þessar mundir en þar sem Dalglish hefur margsagt að Bellamy þoli ekki þétt leikjaprógram, og af því að hann byrjaði báða leiki liðsins í síðustu viku, verður hann á bekknum á miðvikudag ásamt mönnum eins og Jonjo Shelvey, Maxi Rodriguez, Dirk Kuyt og Carra.

Af mótherjunum er það helst að frétta að þeir töpuðu einhverjum bikarleik í gær og þar fékk hinn stórgóði fyrirliði þeirra, Vincent Kompany, rautt spjald og nældi sér í 4ra leikja bann sem ætti að halda honum fjarri báðum leikjunum við okkar menn. City ætla sér að áfrýja þessum brottrekstri og kemur í ljós annað kvöld hvað verður af því en ég sé ekki af hverju enska knattspyrnusambandið ætti að fella það niður. Vonum ekki, allavega, þeir eru nú þegar án Kolo og Yaya Touré sem eru farnir í Afríkukeppnina þannig að ef þeir eru án Kompany líka getum við formlega farið að kalla þá vængbrotna. Eins og okkar menn eru, án Lucas og Suarez. Jöfnum leikinn aðeins.

Mín spá: Okkar menn steinlágu þarna fyrir heilli viku síðan en ég er bjartsýnni á betri úrslit í þessum leik. Okkur munar mikið um að vera búnir að endurheimta Steven Gerrard, og ef þeir verða án Yaya Touré og Kompany – sem voru laaaaangbestu menn vallarins fyrir viku – þá ætti það að jafna leika enn frekar.

Ég spái þessu 1-1 jafntefli sem ætti að setja upp snælduvitlausan seinni leik á Anfield.

Koma svo, Liverpool! YNWA!

Það er skammt stórra högga á milli þessa dagana, svona á þetta að vera. Varla búið að flauta síðasta leik af og þá er komið að því að flauta þann næsta á. Við eigum eftir að sjá talsvert af liði Man.City á næstunni, þetta er fyrsti leikurinn af þremur í þessum janúar mánuði sem er ný hafinn. Þessi leikur er í deildinni, hinir tveir í deildarbikarnum. Ég verð að segja alveg eins og er að það hefur komið mér á óvart hvað þetta City lið hefur slakað á í undanförnum leikjum. Þeir hafa verið að tapa stigum sem maður var viss um að kæmu í hús hjá þeim, en þetta sýnir það bara og sannar að það getur allt gerst í fótboltanum.

Þetta er ekkert svaðalega flókið mál, við þurfum að hala inn öll þau stig sem við getum til að halda okkur í baráttunni um Meistaradeildarsæti. Baráttan um þessi sæti verður afar hörð og nú erum við að halda á líklegast erfiðasta útivöllinn í deildinni á þessu tímabili. City hefur unnið alla 9 leiki sína á heimavelli og hafa verið að skora mörk að vild. Þarna liggur stór munur á þessum tveimur liðum, þar sem okkar menn hafa virkilega verið að ströggla við að setja boltann í netið á sínum heimavelli. City hafa skorað heil 53 mörk á tímabilinu á móti aðeins 24 hjá okkar mönnum. Vörn Liverpool hefur verið afar traust, en ekki hefur hún verið mikið síðri hjá City, fengið einu marki meira á sig en okkar menn.

Risa munurinn á þessum tveimur liðum er ekki bara sóknarleikurinn, heldur einnig breiddin í leikmannahópnum. Menn eins og Nasri og Dzeko teljast ekki vera meðal þeirra sterkustu 11 leikmanna, menn sem myndu vaða í öll önnur byrjunarlið í deildinni. Þetta verður því gríðarlega erfitt á morgun og það verður að segjast eins og er að jafntefli væru góð úrslit fyrir okkur. En það er ekki þar með sagt að menn stefni ekki á sigur, síður en svo, við sýndum það gegn City á Anfield að við getum vel unnið þetta lið. Reyndar vantar einn okkar albesta leikmann, Lucas, sem átti hreint út sagt frábæran leik gegn þeim síðast, en til þess að geta unnið á morgun, þá þurfa menn að halda uppteknum hætti frá síðasta leik og nýta færin sín.

Ég býst ekki við breytingum á vörninni okkar, enda algjör óþarfi að hreyfa neitt við henni. Ég reikna svo með því að þeir Henderson, Spearing og Adam verði áfram á miðsvæðinu, halda svæðum og reyna að koma í veg fyrir spil City manna. Þannig að ég tel að aðal spurningin verði um það hverjir verði í kant hlutverkunum hjá okkur. Bellamy er ekki með skrokkinn í að spila 2 leiki á stuttum tíma, þannig að mér finnst líklegt að hann droppi á bekkinn. Downing er búinn að vera með góða vinnslu undanfarið og ég ætla að tippa á að hann verði engu að síður settur á bekkinn. Mín ágiskun er sú að Kuyt og Maxi komi inn í liðið fyrir Downing og Bellamy. Suárez er kominn úr banni og ég á von á því að hann komi inn í liðið fyrir Carroll. Gerrard verður ekki hent í djúpu laugina strax, menn vilja væntanlega fara varlega í sakirnar með hann.

Bekkur: Doni, Kelly, Carragher, Gerrard, Bellamy, Downing, Carroll.

Þrjú stig í boði, myndi sætta mig við eitt, en þetta lið okkar getur alveg á góðum degi sigrað þetta City lið. Það hefur verið auðkennandi fyrir okkar menn undanfarið að menn hafa náð að gíra sig all svaðalega upp í þessa stóru leiki og vonandi verður það raunin á morgun. Ég get allavega ekki beðið eftir þessari rimmu og býst við hörku skemmtilegum leik tveggja vel spilandi liða. Eigum við ekki að segja að þetta endi 1-1 og það verður Suárez sem setur markið fyrir okkar menn.