Agreiðum þennan leik strax, Liverpool FC er svo lélegt eins og staðan er í dag að liðið fór með svo gott sem besta lið sitt til Utrecht í Hollandi og marði jafntefli með smá heppni gegn heimamönnum. Það versta er að þetta var vitað fyrir leikinn og því til staðfestingar bendi ég á upphitun mína fyrir leik. Þar sagði ég reyndar í bjartsýniskasti að við næðum að skora í leiknum, en þar sem heimamenn voru ekki að ná að skora var fullkomlega óþarfi að vera eitthvað að reyna það. Liverpool hefur ekki sótt í eina mínútu það sem af er þessu tímabili nema að vera a.m.k. einu ef ekki tveimur mörkum undir.
Aðal barattan í þessum leik og það er ekki í fyrsta skipti var að halda sér vakandi yfir leiknum, okkar menn vita ekkert hvernig þeir ætla sér upp völlinn og litlu minna vita þeir um það hvernig verjast á sóknaraðgerðum andstæðinganna og úr verður leikur þar sem maður hefur svo gott sem enga trú á sínum mönnum, skiptir þar litlu hvort við séum að tala um leik gegn United, Northamton eða Utrecht.
Ég er samt ekki alveg að segja að ég hafi enga trú á Liverpool í ár, ég held að við getum ekki annað en bætt okkur og það tekur vanalega tíma fyrir Hodgson að koma sínum hugmyndum inn í kollinn á leikmönnum. Liðið hlítur að fara ná að skora af og til bráðum og vinna einhverja leiki. En ég er engu að síður nú þegar alveg við það að gefast upp á að fela fýla mína með þá staðreynd að Roy Hodgson sé stjóri Liverpool FC. Þetta er fínn kall það vantar ekki en ég hef ekki ennþá séð að hann sé nærri því nógu góður til að stýra liðinu og jafnvel þó hann fengi tíma til að koma öllum sínum hugmyndum að og hans upplegi verði fylgt út í hið óendanlega þá held ég að við myndum samt ekki verða sátt við hann enda um að ræða hundleiðinlegan bolta. Hvað þá meðan staða klúbbsins er eins og hún er núna og hópurinn alls ekki sá besti sem boðið hefur verið uppá í sögu Liverpool.
Ein mýtan segir að það taki Hodgson yfirleitt langan tíma að koma sínum hugmyndum að en þegar það er komið séu hans lið afar erfið viðureignar og fáir fara að neita því. En eins og Liverpool núna þá spila þessi lið vörn, ekki svona lélega vörn reyndar en varnarbolta og bíða átekta og láta andstæðingin koma á sig. Ef við gefum okkur að svona típísk Hodgson aðlögun taki um 6-9 mánuði þá er það bara allt of langur tíma enda Hodgson yfirleitt búinn að yfirgefa svæðið eða láta reka sig eftir 2-3 ár á hverjum stað.
Það var talað um að fá Hodgson til að rétta skipið af, það er ALLS EKKI að gerast, skipið var þar fyrir utan ekkert svo skakkt, bara í smá brælu. Síðan í fyrra hefur liðið versnað alveg skelfilega og með hverjum svona leiknum á fætur öðrum missir maður trúna og áhugann á þessu. Það þurfti að bæta liðið frá því í fyrra enda óánægja töluverð, hvernig þetta á að gera með því að ráða varnarstjóra sem ekkert hefur unnið og er með mikið mun minna profile heldur en stjórinn sem hann tók við af veit ég ekki. Hvað þá þegar við seljum eða lánum háklassa miðjumenn og fáum í staðin skapvondan dana sem hefur verið varamaður sl. ár á ítalíu til að spila með Lucas.
Liverpool mun hrökkva í gang bráðum, í þeim skilningi að við förum að hala inn stig og vonandi skora smá. En því fyrr sem við kveðjum þetta Hodgson era því betra er ég hræddur um. Honum er því guðvelkomið að reka þetta ofan í mig.
Liðið í dag var með því sterkara sem við leggjum upp með fyrir tímabilið, aftur var það bara á einum vinstri bakverði sem er jafnvel verri en sá sem við áttum fyrir (Aurelio er auðvitað ekki talinn með). Núna er þessi bakvörður meiddur og þá þurfum við að nota efnilegan miðvörð sem getur spilað hægri bak í vinstri bakverði!!! Það er ekki annað hægt en að spyrja, var svona mikilvægt að lána Insúa?
Eins þá spilum við á þremur nýjum miðjumönnum með Lucas sem var nú ekki að gera sig fyrir! Enginn þeirra hefur getað nokkurn skapaðan hlut það sem af er og í dag hefði alveg verið ágætt að geta hent Aquilani inná fyrir Joe Cole, Meireles eða Poulsen. Raunar hefðum við líklega verið betri með 10 manns inná heldur en Poulsen eins og hann var í dag.
Liverpool var annars að ströggla það illa í þessum leik að Hodgson gerði skiptingu mjög snemma í leiknum, þó ekki sé útilokað að meiðsli hafi spilað þarna inn í! Enda voru heilar 8 mínútur eftir þegar fyrsta skipting kom og eins og liðið spilaði allann leikinn var auðvitað ekki neinn tilgangur í að brjóta leik liðsins upp!!
Ég nenni ekki að röfla yfir þessu meira eins og er, geri mér fullkomlega grein fyrir því að staðan er fín ennþá í UFEA Cup og jafntefli þarna er alls engin heimsendir, en það er frammistaðan, uppleggið og allir leikir okkar það sem af er sem eru að gera mig alveg snar.