Við verðum á fréttavaktinni fram á miðnætti í kvöld. Þessi færsla verður uppfærð með vísunum á fréttir um leið og eitthvað solid gerist. Þið hjálpið okkur svo með fréttavaktina í ummælunum.

17:00 Tíminn er liðinn og ekkert enn að frétta. Héðan í frá uppfæri ég bara ef eitthvað fréttist en þar sem það virðist ekki neitt vera í gangi segi ég vaktinni hér með lokið. Kaup og sölur sumarsins verða svo gerð upp fljótlega á þessari síðu.

16:19: Fréttamaður Guardian segir nú á Twitter-síðu sinni að þar sem Babel sé ekki að fara til West Ham sé nánast enginn séns á að Cole komi til okkar. Þessu virðist því vera að ljúka án þess að við náum að tryggja okkur framherja fyrir veturinn.

15:40: Ryan Babel á Twitter-síðunni sinni: LFC all the way! YNWA. Við getum hætt að hlusta á ruglið í fjölmiðlum. Ætli það sé yfirhöfuð nokkuð í gangi annað en uppspuni? Babel er allavega ekki að fara. Og alveg örugglega ekki í þyrlu.

15:39: ESPN heldur því fram núna að Babel sé á leið til London til að klára 10m punda félagsskipti yfir til Tottenham. Þetta gæti því alveg verið möguleiki. Hvað við gerum við þessar 10m verður hins vegar alveg að koma í ljós … 80 mínútur eftir.

15:28: Greyið Ryan Babel. Hann er sennilega enn í þyrluflugi yfir London því nýjustu slúðurfréttirnar segja að við höfum boðið West Ham 12m punda plús Babel fyrir Carlton Cole. Slúðrið segir líka að Tottenham hafi boðið okkur 10m punda fyrir Babel. Ég trúi hvorugri af þessum tveimur fréttum. Ég trúi því hins vegar fullkomlega að Babel sé búinn að hringsóla í þyrlu yfir London síðustu þrjá tímana…

14:03: STAÐFEST! Liverpool hafa keypt Paul Konchesky frá Fulham. Lauri Dalla Valle og Alexander Kakaniclic fara til Fulham í staðinn. Hlutirnir gerast hratt núna.

14:00: Sky Sports halda því núna fram að West Ham séu að íhuga tilboð í Carlton Cole. Þrír tímar eftir af glugganum og Cole var ljósmyndaður á æfingu með enska landsliðinu fyrir hádegið. Ætli þyrlan skutli Babel þangað og pikki Cole upp í staðinn? Þetta skýrist allt á næstu 180 mínútum. Svo getum við farið að hugsa um fótbolta aftur. Þvílíkt sumar…

13:57: Opinbera síðan staðfestir að við höfum keypt tvo leikmenn – Suso hinn unga sem hefur verið hjá okkur í ár en skrifar nú loks undir fullorðinssamning og svo enn einn ungverska unglinginn. Á meðan segja slúðurhundarnir á Sky að Ryan Babel sé í þyrlu yfir London en vita ekki hvort hann stefnir til Tottenham eða West Ham. Erfitt að lesa í ferðir þyrlunnar. Silly season er yndislegt.

12:00 Daily Mail segja að Stoke City hafi reynt að kaupa Lucas Leiva en hann hafi neitað að fara. Fimm tímar eftir af glugganum.
11:02: Miðlar í Hollandi segja að Ajax séu að reyna að kaupa Ryan Babel til baka. Þá er Damien Plessis víst farinn til Panathinaikos í Grikklandi.

10:15: Sky Sports segja að Insúa fari á láni til Galatasaray. Er það slæmt að fá ekki fé fyrir hann til að eyða í leikmenn, eða gott að láta hann ekki alveg frá okkur ef hann skyldi geta komið að notum í framtíðinni? Ég er ekki viss. En hann er allavega farinn. Við bíðum eftir staðfestingu af Paul Konchesky sem er víst í læknisskoðun á Melwood akkúrat núna.

10:08: Roy Hodgson segir á opinberu síðunni að það sé „ólíklegt“ að Mario Gomez, Carlton Cole, David Trezeguet eða Arda Turan komi til Liverpool.

08:37: Litlar fréttir enn, en fregnir frá Melwood segja að leikmenn hafi fengið frí frá æfingum í dag svo að Hodgson geti unnið óáreittur að leikmannamarkaðnum. Þannig að eitthvað hlýtur að gerast í dag.

07:10: Telegraph segir að Liverpool hafi spurst fyrir um Bobby Zamora en Fulham hafi neitað, vilji ekki selja.

06:49: LFC Globe segir að Insúa sé á leið til Galatasaray fyrir 4.5m punda. Insúa staðfesti þetta sjálfur á Twitter í gær.

06:33: Ekkert að frétta enn.