Það má segja að stutt sé á milli leikjanna þessa dagana, það er BARA gott. Næstur á dagskránni er algjör lykilleikur fyrir okkar menn. Jú, það er ekki oft sem maður getur flokkað leiki gegn sjálfum W.B.A sem lykilleiki, en svo sannarlega flokkast þessi undir slíkt. Það er ekkert sem heitir, við hreinlega verðum að vinna þennan leik til að stimpla okkur inn í tímabilið í deildinni. Við vorum óheppnir gegn Arsenal í opnunarleik okkar, en áttum svo algjörlega skilið að steinliggja úti gegn Man.City á mánudaginn, þar sem Roy Hodgson framdi taktískt sjálfsmorð.

En nú er kominn nýr dagur, annar leikur og menn hreinlega verða að stíga upp og sýna úr hverju menn eru gerðir. Fjölmargir leikmenn voru hvíldir og losaðir undan erfiðu ferðalagi til Tyrklands, þannig að menn ættu almennt ekki að vera þreyttir. Þeir sem spiluðu þann leik verða almennt ekki þreyttir, og því er engin afsökun á morgun á Anfield. Ég heimta ekki bara sigur, nei, ég heimta sannfærandi sigur. Það getur vel verið að maður líti út fyrir að vera spoiled krakki, en þetta er bara svona. Við verðum að fara að leggja af stað í þessa 38 leikja göngu sem deildarkeppnin er. Við erum búnir að spila einn góðan hálfleik og í honum vorum við einum færri.

Ég nenni ekki að velta mér neitt upp úr þessu W.B.A liði, það er bara ekki þannig lið að það þurfi að spá mikið í það. Ef okkar menn spila eðlilegan leik, þá á að vera algjör og stór klassamunur á liðunum. Mig minnir að ég hafi séð það einhvers staðar að þeir hafi ekki unnið okkur síðan sautján hundruð og súrkál og það eru fimmtán hundruð og ferskjur síðan þeir náðu að skora á Anfield. Ég rétt vona að þeir haldi sig áfram við þá iðju að gera harla lítið og ekki neitt á þessum yndislega velli.

Ég reikna með okkar nánast allra sterkasta liði á morgun. Ég er reyndar hræddur um að Roy Hodgson stilli enn og aftur Agger upp í bakverðinum, en ég hefði kosið að sjá Aurelio þar, enda einn af fáum sem átti góðan leik í Tyrklandi. Ég vil hreinlega sjá bara alvöru vinstri bakvörð í þessari stöðu og ég hreinlega vil sjá okkar besta miðvörð (lesist Agger) í miðvarðarstöðunni. CarrAgger er mitt uppáhald þegar kemur að miðvarðarstöðunum. Glen að sjálfsögðu hægra megin í vörninni og ég ætla að koma aftur á óvart (kannski öruggara að setja það hér inn að þetta sé kaldhæðni) og velja Reina í markið. Miðjan er öllu erfiðari, ég vil sjá Dirk hægra megin, Milan vinstra megin og Lucas með Gerrard á miðjunni. Það kæmi mér reyndar akkúrat ekkert á óvart að sjá Poulsen þarna inni. Minn draumur væri svo að fá að sjá Pacheco fyrir aftan Torres frammi. Ég veit, engar líkur á því, en ég væri samt til í það. Það er jú oft glettilega mikill munur á því sem maður sjálfur kýs, eða hvað maður telur líklegast.

Mitt lið:

Liðið eins og ég spái því:

Bekkurinn: Jones, Kelly, Aurelio, Kyrgiakos, Maxi, Babel og Ngog

En eins og ég sagði hér í byrjun, algjör lykilleikur þar sem við verðum gjörsamlega að stimpla okkur inn. Javier er farinn og ætti því að vera sæmilegt andrúmsloft á Melwood. Væntanlega munu einhver andlit bætast við á æfingasvæðið á næstu dögum, en það er um að gera fyrir hina að stimpla sig inn, vinna fyrir kaupinu sínu og landa 3 stigum á öruggan og fallegan hátt. Roy mætti mín vegna í svona leik stilla upp 4-4-2, allt annað að spila við þetta lið á heimavelli heldur en City á útivelli. Hann má í sjálfu sér stilla upp í hvaða kerfi sem er, bara að leikmenn þeir sem hann velur inná séu klárir í slaginn og keyri yfir mótherja okkar. Ég ætla að vera bjartsýnn á þetta og spá 3-0 sigri. Gerrard og Torres stimpla sig báðir inn og svo opnar Milan markareikning sinn hjá okkur. KOMA SVO.

Æ hvað það er nú ágætt að töluvert stutt er á milli leikja okkar manna í ágúst, er bara að verða búinn að fá ágætt upp í kok á slúðurfréttum og neikvæðum straumum frá ofdekruðum leikmönnum.

Svo það er ágætt að gleyma sér aðeins í að velta fyrir sér leiknum annað kvöld í undankeppni Evrópudeildarinnar, þar sem ræðst hvort liðanna fer í riðlakeppni deildarinnar. Við eigum 1-0 forskot inni – forskot sem átti að vera stærra – og ljóst að töluvert verkefni er framundan.

Ágætt er að rifja upp upphitun Babu frá fyrri leiknum til að kynnast sögu mótherjanna og minna okkur á að þessi völlur er alveg svakalegt vígi sem að okkar menn þurfa að standa af sér ef þeir ætla sér áfram.

Í dag fréttum við fyrst að Gerrard, Agger, Torres og Maxi hefðu ekki farið með og síðan kom í ljós þegar til Tyrklands var komið að Milan Jovanovic hafi verið skilinn eftir til að hvíla hann.

Ég hef því verið að reyna að finna út nákvæmlega hverjir eru eiginlega í Tyrklandi og set því mikinn fyrirvara á mína hugmynd um liðið sem stillt verður upp! En here it goes!!!

Mín hugmynd:

Bekkur: B.Johnson, Wilson, Kyrgiakos, Spearing, G.Johnson, Dalla Valle, Shelvey.

Ekki alltaf sem maður er svo óviss um liðið, aldrei að vita hvernig þetta allt endar!

Ég er líka frekar blankur á að átta mig á hvað mun eiginlega fara þarna fram. Ég er á því að þessi keppni sé í fjórða sæti í “mikilvægisröðinni” hjá liðinu í vetur, á eftir deildinni og því að komast á Wembley. Ég styð það heilshugar því ég held satt að segja að hópurinn okkar sé of lítill til að við getum einbeitt okkur í margar áttir og liðskipan morgundagsins sé því í átt til þess sem við gætum vænst í þessari keppni.

En þetta eru engir aular sem við erum að stilla upp á morgun og alls engin ástæða til þess að afskrifa þennan leik. Við erum töluvert sterkari en þetta lið og ég sé okkur alveg skora mark eða mörk á morgun sem ætti að duga. Þetta verður mikil reynsla fyrir ungu mennina okkar og ég er handviss um að liðið er allt stillt inn á að koma til baka eftir slaka frammistöðu á mánudagskvöldið, það verður vissulega ekki í höndum allra stóru nafnanna að stilla okkur á rétta braut, en þarna er tækifæri þeirra sem staðið hafa á kantinum að sanna það að þeir geti skipt máli í vetur.

Ég held að við lendum undir pressu í byrjun og það skipti miklu máli að standa af sér fyrstu 15 – 20 mínúturnar. Ég spái því að við gerum það og síðan skorum við rétt í kringum hálfleikinn. Tyrkirnir munu aftur koma á fullri ferð eftir hálfleikinn en ná ekki að jafna fyrr en í blálokin.

Leikurinn endar 1-1 og við förum áfram í riðlakeppni Evrópudeildarinnar.

Hvort sem okkur líkar það betur eða verr…..

Minni að lokum fólk á að leikurinn hefst á óvenjulegum tíma, eða klukkan 17:30.

Já það er skammt stórra högga á milli hjá okkar mönnum, tímabilið byrjað svo ekki verður um villst. Leikirnir koma ótt og títt og þannig vill maður hafa þetta. Ekkert hálfkák, bara fulla ferð, allt í botn. Maður sá það strax og leikjalistinn var gefinn út að fyrstu 5 leikir okkar manna í deild, myndu segja mikið til um hvernig tímabilið myndi verða hjá okkur. Við erum búnir með einn af þessum 5 og vorum við þar óheppnir að næla ekki í öll þrjú stigin. Ég var að vonast eftir 11 stigum út úr þessum 5 leikjum, og við erum komnir með eitt í hús. Við erum líklegast að mæta Man.City á næst besta tímapunkti tímabilsins. Best hefði verið að mæta þeim í fyrstu umferðinni, en þó svo að maður hafi ekki hugmynd um það hvernig leikurinn á morgun muni þróast, þá verður að segjast eins og er að þeir eru búnir að vera að hringla mikið með mannskap sinn og því ættu strengir ekki að vera fullkomlega stilltir hjá þeim.

Þetta mikla kaupæði hjá City hefur gert það að verkum að þeir ættu að teljast sem eitt af liðunum sem berst um titilinn. Ég er á því að þeir hefðu hvort eð er verið taldir í þeim hópi, þrátt fyrir að hafa ekki farið út í mannabreytingarnar í sumar. Fannst þeir vera að eflast mikið undir lok síðasta tímabils og held því að þeir taki núna eitt skref tilbaka áður en þeir fara að sýna styrk sinn. Í rauninni finnst mér þeir hafa styrkt liðið sitt ótrúlega lítið í sumar, þrátt fyrir allar þessar breytingar. David Silva finnst mér vera stærsta málið þeirra, en þeir hafa svo fengið Boateng í vörnina sem ég myndi telja mjög sterka viðbót. Balotelli inn og Bellamy út, ég er efins þar, en reyndar mun fleiri ár eftir í þeim fyrrnefnda, og svo Milner vs. Ireland, sem ég álít ekkert svo svaðalega styrkingu, allavega ekkert í námunda við mismuninn á kaupverði þeirra tveggja. Svo bæta þeir við sig Jæja Toure, leikmannakaup sem ég bara gjörsamlega skil engan veginn. Hvernig sá leikmaður hefur getað farið á 28 milljónir punda og orðið launahæstur í ensku deildinni er bara beyond believe. Mér hefur ávallt fundist hann la la leikmaður, en enginn heimsklassa maður. Og fyrir voru City með marga fína varnartengiliði, Barry, De Jong, Kompany og svo Vieira. Bara næ þessu ekki hjá þeim.

En hvað um það, City eiga líklegast stærsta og dýrasta hópinn á Englandi, en það spila bara 11 inná í einu. Yfir heilt tímabil, þá getur verið ferlega gott að vera með stóran og breiðan hóp gæða knattspyrnumanna, en hann hefur minnsta þýðingu í upphafi tímabilsins. Þess vegna er það mín von og trú að við getum nælt okkur í heil þrjú stig á þessum erfiða útivelli akkúrat núna. Hefði minni trú á því, jahh í mars, apríl t.d. En það skal ekki farið í felur með það að þeir hafa einstaklega hæfileikaríka einstaklinga innan síns liðs. Tevez er t.d. að mínum dómi einn allra sterkasti leikmaður ensku deildarinnar. Það verður enginn viðvaningur í neinni stöðu hjá þeim og þetta eru allt virkilega góðir leikmenn, meira að segja Lescott, þó hann eigi tilkall til titilsins “whatthefuckerumennsnargeðveikiraðborgasvonamikiðfyrirþessigæði”. En hvað um það, að alvöru málsins, okkar mönnum.

Mikið var ég glaður að sjá að við munum ekki selja neinn leikmann til Inter þetta árið, gríðarlega ánægður. Það þýðir að Dirk fer ekki fet, og líkurnar á að Javier fari minnka alveg um helming. Joe Cole er kominn í leikbann og tekur út fyrsta leik sinn af þremur. Svo er talið vafamál hvort Daniel Agger verði búinn að jafna sig eftir heilahristinginn sem hann fékk í leiknum gegn Arsenal. Það er víst búið að vera Groundhog Day hjá honum síðan, man varla neitt og spurning um að einhver hvísli því bara að honum að hann sé Messi og spörum okkur stóran pening í kaupum á honum.

Ég reikna með að Reina haldi sæti sínu í markinu, já veit að margir eru undrandi á þessu, en ég hef tröllatrú á þessum markverði. Glen kemur inn í hægri bakvarðarstöðuna og þeir Carra og Skrtel verða svo í miðvarðarparinu. Aurelio heldur þá væntanlega sæti sínu vinstra megin, ef Agger er ennþá frá. Kuyt kemur inn á hægri kantinn og við verðum með Milan á þeim vinstri. Þá kemur stóra spurningin. Hvað mun Roy gera varðandi miðjuna. Búið að lána Alberto til Juventus, þannig að ekki kemur hann í holuna. Cole eins og áður sagði í banni og ég efast um að Pacheco verði treyst í þennan stóra leik. Auðvitað hefði maður helst kosið að sjá bara Maxi hægra megin og Kuyt hreinlega fyrir aftan fremsta mann, en ég held að okkur verði ekki að ósk okkar. Held að Stevie verði settur í holuna og við verðum með 2 varnartengiliði. Ég ætla því að tippa á að Poulsen og Javier verði saman á miðjunni. Er sjálfur ekki hrifinn af því, en held að þetta verði svona. Svo er bara spurning hvort hann treysti Fernando til að byrja leikinn, eða hvort hann byrji með Ngog. Ég ætla að giska á að sá síðarnefndi hefji leik. Svona spái ég því liðinu:

Bekkurinn: Jones, Kelly, Kyrgiakos, Lucas, Babel, Maxi og Torres

Nú þurfum við bara að hefja tímabilið formlega. Sjálfstraust og skilaboð yrðu mikil og afdráttarlaus ef sigur ynnist. Ég vil sjá menn algjörlega spólandi vitlausa í þessum leik, berjast um hvern einasta djöfulsins bolta, frá fyrstu sekúndu til þeirrar síðustu. Við virðumst vera að halda öllum okkar helstu leikmönnum þetta tímabilið og við viljum sýna það að sá leikmannahópur sem við erum með, sé alveg nógu góður til að geta barist á toppi deildarinnar. Hvernig gera menn það? Jú með því að sýna passion, berjast fyrir rauðu treyjuna, alveg sama í hvaða landi þú fæddist, þú berst fyrir þetta félag, PUNKTUR. Þetta er stutt ferðalag yfir til borgarinnar sem enginn vill vera í of lengi, en bara í Fowlers bænum, þegar þið farið þaðan kæru leikmenn, troðið þessum 3 stigum niður í æfingatöskurnar og rennið fyrir (ekki opna fyrr en komið er í Mekka knattspyrnunnar, Liverpool borgar.

Ég ætla að gerast svo djarfur að spá því að við munum sýna klærnar í leiknum, við verðum fullir eldmóðs og vinnum þennan leik. Eigum við ekki að segja að hann endi 1-2, Stevie setur hann úr víti og Jovanovic setur hitt. Tevez mun ýta einum screamer inn fyrir þá.

Allir klárir í bátana?

Það er komið að því.

Ahhhhh. Andvarp. Bros. Og svo…

Okkar menn í Liverpool hefja leik í ensku Úrvalsdeildinni tímabilið 2010/11 síðdegis á morgun þegar liðið tekur á móti erkifjendunum í Arsenal á Anfield. Loksins!

Byrjum á gestunum. Af þeim er ýmislegt að frétta. Það eru víst talsverð meiðsli í herbúðum þeirra og samkvæmt BBC Football gætu þeir verið án Denilson, Diaby og Alex Song á miðjunni á morgun auk þess sem óvíst er hvort Fabregas byrji vegna skorts á leikæfingu. Hann lék þó fyrir Spán í miðri viku þannig að ég ætla að tippa á að hann byrji á morgun. Þá verða þeir einnig án Nicklas Bendtner í framlínunni auk þess sem Robin Van Persie er eitthvað tæpur eins og venjulega.

Þetta held ég að sé ágætis tími til að spila gegn Arsenal. Þeir eru reyndar þekktir fyrir að byrja vel í deildinni, hafa unnið 8 af síðustu 9 opnunarleikjum sínum í Úrvalsdeildinni, og aðeins tapað þrisvar gegn Liverpool í síðustu 18 viðureignum liðanna. Á móti hafa okkar menn aðeins unnið 2 af síðustu 7 opnunarleikjum sínum, en þetta er jú í fyrsta sinn í sjö ár sem við fáum heimaleik í fyrstu umferð (Rafa naut þessa lúxus aldrei, t.a.m.).

Þrátt fyrir þessa tölfræði er ekki allt í himnalagi hjá Arsenal þessa dagana. Fyrir utan meiðslavesen er hópurinn þeirra ekki nógu sterkur ef marka má tímabilsupphitun Arseblog, sem ég mæli með að menn lesi fyrir morgundaginn. Markvarðamálin eru í rugli, Fabianski búinn að hirða stöðuna af Almunia en báðir virðast vera með sjálfstraustið í rugli, og svo létu þeir Gallas og Senderos fara í sumar og fengu í staðinn ungan Pólverja, Laurent Koscielny, sem virðist enn minni en Vermaelen. Það eina sem má segja að þeir hafi styrkt í sumar er framlínan en tilkoma Marouane Chamakh bætir talsverðu við þar.

Ég spái því að Arsenal stilli upp eftirfarandi liði á morgun:

Þetta er stórhættulegt lið, sérstaklega sóknarlega. Við vitum allt um afrek Arshavin á Anfield og í leikmönnum eins og Chamakh, Walcott, Nasri og Fabregas eru þeir með leikmenn sem gætu lamað hvaða vörn sem er án nokkurs fyrirvara. Ég hef hins vegar horft á tvo æfingaleiki með Arsenal í sumar og það er ljóst að vörnin og markvarslan hjá þeim er í rugli, og ef Denilson nær ekki að jafna sig og byrja á morgun verða þeir án nokkurs varnarsinnaðs miðjumanns sem gæti sett jafnvægið í liði þeirra endanlega í rugl.

Arsenal eru alltaf stórhættulegt lið en nú er ég bjartsýnni en venjulega á að okkar menn geti keyrt á þá og sett nokkur mörk.

Af okkar mönnum er það helst að frétta að þeir Reina, Torres, Kuyt og Babel eru allir heilir eftir að hafa komið síðastir inn úr sumarfríi en enginn veit hverjir þeirra eru klárir í byrjunarlið á morgun. Þá er Martin Skrtel sá eini í leikmannahópi okkar sem er frá en hann meiddist á ökkla fyrir viku á æfingu.

Það er alltaf erfitt að tippa á byrjunarlið í fyrsta deildarleik hjá nýjum stjóra og allar líkur á að maður viti ekkert hvað Roy Hodgson er að hugsa en ef við miðum við hvernig hann hefur verið að stilla upp í Evrópuleikjunum og æfingaleikjum held ég að við getum gert ráð fyrir að hann spili með 4-4-1-1 og að liðið verði nokkurn veginn svona:

Sem sagt, Hollendingarnir Babel og Kuyt ekki í neinni leikæfingu og verða á bekknum á morgun enda Maxi og Jovanovic búnir að spila sig í gang á köntunum á undirbúningstímabilinu. Reina hins vegar verður í markinu enda ómissandi. Á miðjunni held ég að Hodgson muni nota Lucas Leiva með Gerrard og Cole fyrir framan þá, en ef honum finnst Lucas eitthvað þreytulegur eftir ferðalag til Bandaríkjanna og að spila þar í 90 mínútur með Brasilíu á þriðjudag gæti hann freistast til að nota Poulsen strax í þessum leik. Mascherano verður í besta falli á bekknum enda þess að vænta að Inter geri tilboð í hann fljótlega, úr því að þeir eru loksins búnir að selja Balotelli og komnir með fullt seðlaveski.

Frammi vona ég innilega að N’gog byrji og Torres verði á bekknum. Það hljómar undarlega en ég er sterklega á þeirri skoðun að við eigum að vernda Torres eilítið í upphafi tímabils og leyfa honum að koma rólega inn í þetta. Jafnvel þótt það kosti okkur einhver mörk eða örfá stig í fyrstu umferðunum græðum við á því að fara að ráðum nýja læknateymisins og gefa honum tíma, frekar en að taka sénsa á honum frá byrjun og missa hann aftur út í einhverja mánuði eins og hefur verið síðastliðin tvö ár.

Auk þess held ég að N’gog geti alveg spjarað sig gegn þessu Arsenal-liði. Liverpool skoraði fjögur mörk í tveimur Evrópuleikjum á undirbúningstímabilinu; N’gog skoraði þrjú þeirra og fiskaði vítið fyrir það fjórða. Þá eru bæði Vermaelen og Koscielny frekar lágvaxnir af miðvörðum að vera þannig að ef það er gott flæði á miðjunni hjá okkar mönnum og við erum að fá svolítið af fyrirgjöfum frá köntunum get ég alveg ímyndað mér hinn hávaxna N’gog smella eins og einu skallamarki á morgun.

Hvílum Torres, hugsum um heildarmyndina, treystum N’gog. Hann er heitur þessa dagana.

MÍN SPÁ: Ég er mjög spenntur fyrir þennan leik. Þegar ég sá leikjaprógrammið í sumar hugsaði ég með mér að þetta yrði örugglega tap í fyrsta leik en eftir því sem nær dregur verð ég bjartsýnni og bjartsýnni. Ég held að Arsenal-liðið sé veikt fyrir í þessum leik og að stemningin sem verður á Anfield á morgun, þökk sé þeim krafti og leikgleði sem fylgir yfirleitt nýjum stjóra, gæti þýtt að við fáum óskabyrjun í þesum leik. Að því sögðu þarf lítið til að þetta Arsenal-lið gangi frá okkur, á móti þessu sóknarliði má helst aldrei eiga slæmt kortér því þá geta þeir gert út um leikinn.

Ég held að Chamakh skori fyrir Arsenal á morgun, og jafnvel Arshavin líka. En það dugar skammt því Liverpool vinnur 4-2 sigur í stórskemmtilegum opnunarleik.

Koma svo! Áfram Liverpool!

Fyrsta upphitun mín á þessu nýja tímabili, og hefur nú ansi margt breyst síðan maður hitaði upp síðast. Ég horfði á fyrri leik þessara liða í Makedóníu og málið er einfalt, þessir mótherjar okkar eru hreinlega með mjög slakt lið. Ég hef eiginlega mestar áhyggjur af því fyrir leikinn á morgun, þ.e. að menn taki þetta ekkert of alvarlega. Ég hefði hreinlega viljað byrja með ýmsa fringe leikmenn í þessum leik, kannski ekki ósvipað lið og í síðasta leik gegn þeim. En það verður líklegast ekki, allavega ekki ef maður tekur mið af þeim leikmönnum sem spiluðu gegn Tranmere í gær. Það er kannski ágætt að nota tækifærið og fjalla aðeins um þann leik.

Ég sem sagt horfði á hann allann í beinni útsendingu á Liverpoolfc.tv. Við unnum þetta neðri deildar lið 2-0 á útivelli og það með alveg hreint korn ungt lið. Bouzanis var í markinu allan leikinn, Flanagan í hægri bakk og Robinson í þeim vinstri. Allir þessir þrír komust mjög vel frá leiknum og sér í lagi Robinson. Í miðvörðunum voru svo þeir Wisdom (fyrirliði) og Ayala. Ayala var frábær og spilaði allann leikinn, Wisdom virkaði líka rosalega vel á mig, sem og Coady sem leysti hann af í þeim seinni. Ayala verður því væntanlega alls ekki með á morgun. Á miðri miðjunni voru svo Guðlaugur Victor og Irwin. Guðlaugur átti flottan leik, almennt rólegur á boltanum og stýrði liðinu, en ég var ekki jafn hrifinn af Irwin. Ince var úti vinstra megin og Amoo hægra megin. Báðir voru hrikalega sprækir. Það toppar þó enginn hann Suso litla sem spilaði í holunni, þvílíkur leikur hjá þeim 16 ára strák. Hann er svo líkur Pacheco á velli að ég myndi halda að þeir gætu hreinlega ruglast á sjálfum sér. Þvílíkt efni sem þessi strákur er og klárlega maður leiksins. Frammi var svo Saric sem ég var langt frá því að heillast af. Cooper, Bruna og Silva komu svo inná og náðu ekki að heilla mig, en inná kom einnig Ngoo og hann náði aftur á móti að heilla mig hreinlega upp úr skónum. Stór og sterkur framherji sem er með fullt af tækni og hraða líka. En hvað um það, sjálfsmark og Amoo sáu um að staðan í lokin var 0-2 og Suso er nafn sem við eigum eftir að sjá oft á næstu árum.

En að morgundeginum aftur, ég reikna því engan veginn með því að Amoo verði heldur með þar sem hann spilaði 77 mínútur í gær, og Ince spilaði 70. Það munu því væntanlega bætast við nokkrar kanónur í hópinn frá fyrri leik liðanna. Leikurinn kemur þó of fljótt fyrir Pepe, Fernando, Babel og Dirk. En það var stór hópur sem æfði á Melwood í morgun, í rauninni allir leikmenn liðsins í dag fyrir utan Torres (og varaliðið sem spilaði í gær). Spearing, Darby, Eccleston, Pacheco og Kelly spiluðu ekki með varaliðinu og verða því nánast pottþétt einhverjir í hóp á morgun. Meira að segja Degen var á æfingu í morgun, þrátt fyrir að hann sé nánast búinn að skrifa undir hjá Stuttgart. Ég reikna nú heldur ekki með að Javier Mascherano spili þennan leik , þrátt fyrir að hafa æft á fullu með liðinu undanfarna daga, og Hodgson hefur hreinlega staðfest að hvorki hann né Maxi spili.

Ég nenni ekki að spá neitt frekar í mótherjum okkar, það þarf að klára þennan leik og nota hann vel til að ná sér í leikæfingu. Það yrði algjört stórslys að vinna þetta lið ekki örugglega á Anfield, sér í lagi þegar horft er til fyrri leiksins. Eins og ég sagði í upphafi upphitunar, þá eru þessir mótherjar einfaldlega mjög slakir og er ég ekkert hræddur við að segja það hér.

Það er ferlega erfitt að spá fyrir um það hvernig liðinu verður stillt upp, en það hjálpar þó að Roy er búinn að staðfesta 5 þeirra. Það eru einungis þrjá skiptingar leyfðar og því var ég að vonast eftir að menn eins og Stevie og fleiri yrðu ekki í byrjunarliðinu, frekar að þeir kæmu inná þegar á leikinn liði. En þessir menn þurfa jú leikæfingu líka og ég veit að Roy Hodgson sé ekki sammála mér og stillir þeim því upp strax frá byrjun. Ég ætla að giska á að liðið verði svona:

Bekkurinn: Gulacsi, Kelly, Kyrgiakos, Spearing, Shelvey, Pacheco og Eccleston.

Ég set Insúa í bakvörðinn, þar sem ég held að Aurelio sé ekki kominn í alvöru form og menn ætli sér ekki að taka stóra sénsa með líkamann á honum fyrir mót. Það gæti svo sem alveg verið að það yrði reynt að setja Kelly inn hægra megin og Glen yfir til vinstri, eða þá Kyrgiakos inn í miðvörðinn og Carra í vinstri bakvörðinn. En ég ætla samt að spá þessu svona.

Ég vonast bara til þess að þetta verði fjörlegur leikur hjá okkur og að menn verði svo algjörlega tilbúnir í slaginn þegar flautað verður til leiks gegn Arsenal þann 15. ágúst. Tímabilið er jú byrjað, en í hausnum á mér byrjar það fyrir fúlustu alvöru þegar baunabyssurnar koma í heimsókn. Ég ætla að spá þessum leik 3-0 og að það verði Ngog, Jovanovic og Joe Cole sem sjái um markaskorunina fyrir okkar menn.

Game on