Monthly Archives: May 2010

Stöðumat: Miðverðir

Posted on by

Miðverðir

Miðvarðar staðan hjá Liverpool FC er að mínum dæmi ansi vel mönnuð og ein af þessum stöðum sem við ættum að þurfa að hafa hve minnst áhyggjur af. Jú, það má með sanni segja að Carra hafi byrjað síðasta tímabil illa og alltof margir hreinlega afskrifuðu kappann strax þá. Hann kom þó sterkur tilbaka og ég er algjörlega sannfærður um það að hann á eftir að sýna okkur og sanna að hann er ennþá einn sá besti í sinni stöðu á Englandi. Martin Škrtel olli einnig miklum vonbrigðum eftir frábært tímabil 2008-2009. Hann á mikið inni og ég hef ennþá tröllatrú á þeim dreng, enda er hann ungur að árum ennþá þegar horft er í aldur miðvarða.

Núverandi miðverðir (nafn, aldur, land):
Daniel Agger, 25, Danmörk
Jamie Carragher, 32, England
Martin Škrtel, 25, Slóvakía
Sotirios Kyrgiakos, 30, Grikkland
Daniel Sánchez Ayala, 19, Spánn
Guðlaugur Victor Pálsson, 19, Ísland
Andre Wisdom, 17, England

Í mínum huga er Daniel Agger klárlega okkar besti miðvörður og meiðslapakkinn sem hann hefur reglulega verið í, virðist vera að minnka. Ég er nokkuð viss um að hann og Carra muni verða kjölfestan í vörninni okkar á næsta tímabili og þeir Martin Škrtel og Soto verði þar á eftir í röðinni. Við lentum í miklum meiðslavandræðum með vörnina á síðasta tímabili, sem hjálpaði svo sannarlega ekki upp á stöðugleikann og meira að segja þá spilaði okkar fimmti miðvörður nokkra leiki á tímabilinu. Ég flokka Guðlaug Victor sem miðvörð, enda hefur strákurinn verið að spila alveg feiknarlega vel í þeirri stöðu með varaliðinu undir lok tímabilsins. Ég held að flestir séu sammála um að Ayala (aðeins 19 ára) sé mikið efni og svo má ekki gleyma Andre Wisdom, sem er einungis 17 ára gamall og varð núna í vikunni Evrópumeistari með U-17 ára liði Englands.

Auðvitað er alltaf hægt að styrkja allar stöður, og ég segi það ekki að ef Škrtel yrði seldur, þá væri hægt að kaupa öflugan mann í staðinn, en ég held að á meðan peningastaðan er eins og hún er, þá verði ekki eytt í að styrkja miðvarðastöður liðsins, sér í lagi ekki þegar jafn efnilegir strákar eru í og við aðalliðshópinn. En skoðum samt aðeins hvað er þarna úti á markaðinum.

Hugsanleg kaup (nafn, aldur, lið, land):
Danny Wilson, 18, Rangers, Skotland
James Tomkins, 20, West Ham, England
Jérôme Boateng, 21, Hamburger SV, Þýskaland
Micah Richards, 21, Man.City, England
Simon Kjær 21, Palermo, Danmörk
Neven Subotić, 21, Dortmund, Serbía
Michael Mancienne, 22, Chelsea, England
Ryan Shawcross, 22, Stoke, England
Christian Träsch, 22, Stuttgart, Þýskaland
Nicolás Otamendi, 22, Vélez Sársfield, Argentína
Jan Vertonghen, 23, Ajax, Belgía
Leonardo Bonucci, 23, Bari, Ítalía
Scott Dann, 23, Birmingham, England
Salvatore Bocchetti, 23, Genoa, Ítalía
Dennis Aogo, 23, Hamburger SV, Þýskaland
Nedum Onuoha, 23, Man.City, England
Gary Cahill, 24, Bolton, England
Adil Rami, 24, Lille, Frakkland
Steven Taylor, 24, Newcastle, England
Rolando, 24, Porto, Portúgal
Thiago Silva, 25, AC Milan, Brasilía
Pape Diakhaté, 25, Dynamo Kiev, Senegal
Juan Manuel Insaurralde, 25, Old Boys, Argentína
Per Mertesacker, 25, Werder Bremen, Þýskaland
Ron Vlaar, 25, Feyenoord, Holland
Christopher Samba, 26, Blackburn, Frakkland

Fullt af flottum og góðum miðvörðum, sem eins og með aðra leikmenn, kosta mis mikið og myndu eflaust falla mis vel inn í þann hóp sem fyrir er. 5 leikmenn á þessum lista standa uppúr sem kostir fyrir Liverpool FC í dag.

Simon Kjær – Er bara einfaldlega hrikalega hrifinn af þessum strák og gæti myndað afar sterkt miðvarðarpar með landa sínum Daniel Agger til margra ára.

Micah Richards – Getur bæði leyst miðvarðarstöðuna og hægri bakvörðinn. Hann er ungur og enskur og virðist ekki vera ofarlega í huga Mancini hjá City.

Gary Cahill – Afar sterkur miðvörður og er enskur í þokkabót.

Nedum Onuoha – Er bæði sterkur sem miðvörður og hefur leyst bakvarðarstöðurnar vel af hendi. Er ungur, enskur og eins og með Richards, þá virðist Mancini ekki hafa neina trölla trú á kappanum.

Ryan Shawcross – Ungur, sterkur og enskur

Með öðrum orðum, þá væri ég alveg til í að skipta á Martin Škrtel og einhverjum þessara ofantöldu ef sú breyting myndi ekki kosta of háar fjárhæðir. Við þurfum að hugsa um fjölda Englendinga í hópnum og þessi staða er hugsanlega einhver sú al sterkasta hjá enskum. Svo maður tali nú ekki um þá City bræður, sem geta hlaupið í skarðið í bakvarðarstöðum líka. Hvort þeir verði fáanlegir til liðs við okkur á sanngjörnu verði er svo aftur á móti allt önnur Elín. En þessir pistlar eru jú fyrst og fremst ætlaðir til að velta hlutunum fyrir sér, það er mjög erfitt að gera sér grein fyrir því hvað er raunhæft og hvað ekki í þessum bransa.

Efsta nafnið á listanum hér að ofan hefur þó verið mikið í umræðunni, þar er um að ræða ungan skoskan strák hjá Rangers, og allt virðist benda til þess að hann gangi til liðs við okkur í sumar. Hann er einungis 18 ára gamall og er því varla hugsaður sem aðalliðsmaður strax. Ég held allavega að hann verði ekki til þess að Soto verði látinn fara strax, við þurfum að hafa reynslubolta til taks líka.

Draumurinn væri því þessi:

Miðverðir 2010-2011 (nafn, aldur, land):
Daniel Agger, 25, Danmörk
Jamie Carragher, 32, England
Micah Richards, 21, England
Sotirios Kyrgiakos, 30, Grikkland
Daniel Sánchez Ayala, 19, Spánn
Danny Wilson, 18, Skotland
Guðlaugur Victor Pálsson, 19, Ísland
Andre Wisdom, 17, England

En þar sem draumar rætast ekki nærri því alltaf, í rauninni alltof sjaldan þegar málefni Liverpool FC eru annars vegar, þá spái ég því að miðvarðaruppsetning okkar verði svona á næsta tímabili:

Miðverðir 2010-2011 (nafn, aldur, land):
Daniel Agger, 25, Danmörk
Jamie Carragher, 32, England
Martin Škrtel, 25, Slóvakía
Sotirios Kyrgiakos, 30, Grikkland
Daniel Sánchez Ayala, 19, Spánn
Danny Wilson, 18, Skotland
Guðlaugur Victor Pálsson, 19, Ísland
Andre Wisdom, 17, England

Næst mun ég fara yfir stöðu varnartengiliða hjá Liverpool FC.

25 ár frá Heysel

Posted on by

Í dag eru 25 ár liðin frá atburðunum á Heysel vellinum í Brussel þegar að 39 knattspyrnustuðningsmenn létust.

Ég hef litlu að bæta við þessa grein, sem ég skrifaði fyrir fimm árum um Heysel slysið. Þar sem þessi síða var ekki eins vinsæl þá er kannski í lagi að setja vísun á hana hér aftur:

Liverpool og Juve 20 árum eftir Heysel

Hún er skrifuð stuttu áður en að Liverpool og Juventus mættust í fyrsta skipti í Evrópukeppni eftir Heysel leikinn. Leiki, sem að Liverpool vann á ferðalagi sínu til Istanbúl.

Á opinberu síðunni er að finna greinar í dag tengdar atburðunum í Belgíu.

Varaliðið 2009 – 2010

Posted on by

Svona milli þess sem Steini fer í gegnum aðalliðshópinn og möguleika okkar á nýjum mönnum í stöður ætla ég aðeins að fara í gegnum þau lið sem standa aðalhópnum að baki, vara- og unglingaliðunum. Í dag ætla ég að líta á varaliðið síðastliðinn vetur

Eins og allir vita voru gerðar gagngerar breytingar í starfsliði þeirra og áherslum síðasta sumar undir stjórn Rafael og ekki vert að velta aðeins fyrir sér hvernig gekk.

Varaliðið

Í fyrrasumar var John McMahon, bróðir Steve’s nokkurs, fenginn til að taka við stjórn varaliðsins af Gary Ablett. Vitað var að Rafa myndi láta Ablett fara og töluvert var rætt um gamlar Poolarahetjur eins og Gary McAllister og Mark Wright sem kosti. Það kom því nokkuð á óvart þegar McMahon var ráðinn. Þá var hann starfandi sem aðstoðarframkvæmdastjóri Shrewsbury Town, hafði verið þar í 4 ár og áður þjálfari hjá Tranmere í 8 ár.

Hins vegar var ljóst að Rafa hafði á honum trú, hafði fylgst með honum um tíma og taldi hann rétta manninn í starfið. McMahon sótti sér markmannsþjálfara til Tranmere í John Achterberg en áður hafði verið tilkynnt um að Antonio Gomez Perez hefði verið ráðinn þjálfari hjá varaliðinu. Perez var fyrrum lærisveinn Rafa sem að hafði náð góðum árangri með yngri lið Albacete og þessum var treyst fyrir því verkefni að framleiða fleiri leikmenn fyrir aðalliðið.

Continue reading →

Stöðumat: Vinstri bakverðir

Posted on by

Vinstri bakverðir

Vinstri bakvarðarstaðan hjá Liverpool hefur löngum verið veikur hlekkur í liðinu. Persónulega finnst mér Fabio Aurelio vera sá besti sem við höfum átt síðan ég veit ekki hvenær, en það er einn afar stór galli á þeim leikmanni, hann getur hreinlega ekki haldið sér heilum. En tæknilega séð og þegar horft er til hæfileika með boltann, þá er hann einn sá albesti sem við höfum átt afar lengi. Síðan Alan Kennedy var upp á sitt besta, þá höfum við ekki haft topp klassa leikmann í þessari stöðu. Sá sem hefur kannski komist næst því er Steve Staunton (í fyrra skiptið sem hann var hjá okkur) en svo er listinn ekki burðugur; Dossena, Riise, Vignal, Traore, Warnock, Matteo, Carragher (í þessari stöðu), Staunton (seinna skiptið), Björnebye, Dicks, Burrows etc. Sumir vilja halda því fram að Riise hafi bara átt eitt slakt tímabil (hans síðasta) en ég er því bara engan veginn sammála. Fyrir mér var hann meðalmennskan uppmáluð, í rauninni bara dæmigert fyrir þessa stöðu hjá liðinu í alltof alltof langan tíma.

En eins og áður sagði, þá er þetta erfið staða að manna. Ég sé ekki alveg fyrir mér að við séum að fara að henda miklum peningum í að styrkja hana, sér í lagi þar sem aðrar stöður eru mikilvægari þegar kemur að styrkingu á liðinu.

Núverandi vinstri bakverðir (nafn, aldur, land):
Fábio Aurélio, 30, Brasilía
Emiliano Insúa, 21, Argentína
Chris Mavinga, 19, Frakkland
Jack Robinson, 16, England
Robbie Threlfall, 21, England

Búið er að gefa það út að Fabio Aurelio og Robbie Threlfall muni yfirgefa herbúðir liðsins á free transfer, það kemur væntanlega ekki nokkrum manni á óvart. Þá sitja eftir þrír, sem eiga það allir sameiginlegt að vera ungir að árum, þó mis ungir, og efnilegir mjög. Insúa fékk að mínum dómi of mikla ábyrgð of snemma, vegna heilsubrests hjá Fabio kallinum. Í varaliðinu er svo Mavinga, sem hefur verið að spila fantavel í vetur og býr mikið í þeim strák. Hann er ólíkur Insúa, er afar sterkur og kraftmikill, en ekki jafn öflugur sóknarlega eins og hinn smávaxni Argentínumaður. Síðan er framtíðarguttinn hann Robinson, sem á þó eitthvað af árum eftir þangað til að hann fer að banka á dyrnar. Í mínum huga er það því algjörlega ljóst að við þurfum að versla einn vinstri bakvörð í sumar.

Hugsanleg kaup (nafn, aldur, lið, land):
Kieran Gibbs, 20, Arsenal, England
Ryan Bertrand, 20, Chelsea, England
Vurnon Anita, 21, Ajax, Holland
Ivan Obradović, 21, Zaragoza, Serbía
Fábio Coentrão, 22, Benfica, Portúgal
Aly Cissokho, 22, Lyon, Frakkland
David Luiz, 23, Benfica, Brasilía
Domenico Criscito, 23, Genoa, Ítalía
Marcell Jansen, 24, Hamburger SV, Þýskaland
Reto Ziegler , 24, Sampdoria, Sviss
Aleksandar Kolarov, 24, Lazio, Serbía
Leighton Baines, 25, Everton, England
Taye Taiwo, 25, Marseille, Nígería

Stór er listinn og nokkrir þarna úti sem væru góðir kostir í stöðunni. Auðvitað þá snýst þetta nú allt um peninga, verða þeir fyrir hendi eða ekki? Það er auðvelt að draga upp lista ef ekki þarf að hugsa um fjármunina, en því miður er staðan ekki þannig hjá okkur, ekkert sugardaddy dæmi í gangi, frekar svona Trailer Park daddy. Það er þó ekki þar með sagt að ekki sé hægt að gera ágætis kaup í nýjum vinstri bakverði.

Ef við horfum fyrst til enskra leikmanna, þar sem nýja reglan fer að taka gildi á næsta tímabili, þá eru að mínum dómi ekki margir möguleikar í spilunum. Kieran Gibbs er afar efnilegur bakvörður, en ég held að það sé enginn möguleiki að Arsenal selji okkur hann. Sama má segja um Leighton Baines. Sá þriðji sem uppfyllir þjóðernis skilyrðið er bæði óreyndur og svo hjá Chelsea, þannig að hann er líka út úr myndinni. Það þarf sem sagt væntanlega að horfa út fyrir Bretlandseyjar eftir vinstri bakverði.

Mitt fyrsta val væri án nokkurs vafa David Luiz hjá Benfica. Hann er afar öflugur bakvörður, en einnig sem miðvörður. Sterkur sóknarlega og enn öflugri varnarlega og aðeins 23 ára gamall, gæfi aukna hæð í varnarlínuna þar sem hann er 188 cm. og ekki veitir nú af. Ég geri mér þó enga grein fyrir því hvað það myndi kosta að fá hann til liðsins.

Annað val hjá mér væri Marcell Jansen, fastamaður í þýska landsliðinu og spilar með Hamburger SV. Þetta er stór (1,91) og afar öflugur vinstri bakvörður með mikla reynslu. Hann hefur einnig talsvert spilað vinstra megin á miðjunni, enda sóknarlega öflugur. Gæti kostað nokkrar kúlur, en vel þess virði.

Aðrir sem kæmu mjög sterklega til greina eru Reto Ziegler, Aleksandar Kolarov, Taye Taiwo og Aly Cissokho. Allt mjög öflugir vinstri bakverðir á besta aldri.

Af þessum lista mínum koma þessir aðilar síst til greina: Vurnon Anita (lítil reynsla), Ivan Obradović (ekki mikil reynsla í topp deild), Domenico Criscito (lítt reyndur og ítalskur) og Fábio Coentrão (meiri miðjumaður en bakvörður).

Draumurinn væri sem sagt þessi:

Vinstri bakverðir 2010-2011 (nafn, aldur, land):
David Luiz, 23, Benfica, Brasilía
Emiliano Insúa, 21, Argentína
Chris Mavinga, 19, Frakkland
Jack Robinson, 16, England

Ég tel alveg ljóst að við þurfum að punga út 7-10 milljónum punda til að fá einhvern af þessum sem ég taldi upp sem góða kosti. Sumir þeirra fengjust eflaust ekki einu sinni á þann pening, en einhver af Luiz, Jansen, Ziegler, Kolarov, Taiwo eða Cissokho væru flottir kostir til að styrkja þessa vandræða stöðu. Ég hreinlega treysti okkur ekki til að fara inn í tímabilið með Insúa einan og Carra/Agger sem backup, því ég tel það of fljótt að veðja á Mavinga ef Insúa yrði eitthvað frá keppni. Insúa er einnig á þeim stað að hann ætti að mínum dómi ekki að vera kostur númer eitt enn sem komið er, hef mikla trú á honum sem framtíðarmanni, en við þurfum annan öflugan með honum. Ef engir peningar verða til, þá vil ég frekar fara inn í tímabilið með Mavinga sem backup fyrir Insúa, frekar en að kaupa einhvern slarkfæran vinstri bakvörð.

Næst mun ég fara yfir miðvarðarstöðurna hjá Liverpool FC.

Opið bréf David Moores til The Times

Posted on by

The Times birtir í dag óritskoðað, opið bréf sem þeim barst frá David Moores, fyrrverandi eiganda og stjórnarformanni Liverpool FC, þar sem hann ræðir sölu sína á klúbbnum 2007 og afdrif klúbbsins síðan þá.

Þar sem bréfið er á lokuðum hluta vefsíðu The Times (þarft áskrift til að lesa) birti ég það hér í fullri heild. Þetta er langt en skyldulesning:

Continue reading →

25.05.2005

Posted on by

Það eru fimm ár síðan skemmtilegasti dagur sem ég man eftir sem Liverpool stuðningsmaður átti sér stað, maður er ekki beint í stuði til að fara ítarlega út í þá keppni núna en læt þennan link þó fylgja með, mjög góð ferðasaga af opinberu síðunni.

Leiðindakvikindi eins og Einar Örn og SSteinn eru betur í stakk búnir að lýsa því hvernig þetta var live! Bölvaðir.

Aurelio fer í næstu viku

Posted on by

Það kemur líklega ekki nokkrum manni á á óvart en Fabio Aurelio yfirgefur klúbbinn í næstu viku. Hann hefur hafnað eina samningnum sem hann á skilið að fá frá klúbbum, pay as you play og yfirgefur klúbbinn því formlega þegar samninguinn hans rennur út í næstu viku.

Synd í raun hvað lítið hvar hægt að nota þennan fína leikmann og óskandi að arftaki hans verði ekki úr postulíni.

 

Yossi vill fara til Chelsea

Posted on by

“Ancelotti wants me for next season and now everything depends on Liverpool. Chelsea will have to pay some £6m but I believe that in the end I’ll be moving there”

Þetta segir Yossi Benayoun um fréttir þess eðlis að Chelsea ætli að kaupa hann í sumar. Fréttin segir einnig að Chelsea ætli sér að fá Javier Mascherano frá okkur, en þó er hvergi minnst á Fernando Torres (sem betur fer).

Yossi er frábær leikmaður en ég verð að taka undir með Jamie Carragher í þessum málum. Þegar illa gengur sjáum við úr hverju menn eru gerðir og þeir sem ekki vilja bæta stöðu Liverpool á næstu leiktíð geta bara farið eitthvað annað. Ég hélt að Yossi væri einn af þeim sem væru líklegir til að vilja gera betur næsta vetur en skil svo sem ágætlega ef hann vill fá ein stór leikmannaskipti (peninga) og Meistaradeildarbolta á næstu leiktíð, þar sem hann er að verða 31s árs gamall.

Eins og ég sagði, frábær leikmaður sem vann sér þó aldrei fast sæti í liði okkar. Leyfum honum að fara ef hann vill, og Mascherano líka (að því gefnu að við fáum toppverð fyrir báða) og notum peninginn til að fá til okkar leikmenn sem hafa áhuga á að spila fyrir Liverpool.

Yossi verður líka í góðum félagsskap hjá Chelsea. Verði honum af því:

Reina, Torres, Gerrard og Rafa

Posted on by

Við höfum lítið skrifað um slúður á þessari síðu. SSteinn er að skrifa pistla, þar sem farið er yfir allar stöðurnar í liðinu en þar sem leikmenn Liverpool eru núna að mæta til æfinga hjá landsliðum þá eru blaðamenn auðvitað á fullu að búa til sögur tengdar liðinu.

Torres

Pepe Reina segir að Fernando Torres verði áfram hjá liðinu. Reina segir:

“I spoke to him about his future and he has told me that he intends to continue with us.

“Fernando suffered so many blows last season, but he is a professional and has always wanted to do well for us.

“That is what he remains – committed to this club.”

Þarna hafiði það frá besta vini Torres hjá liðinu.

Þið getið þó bókað það að blöðin á Englandi munu halda áfram að orða Torres við brottför frá liðinu í sumar, enda selur það fleiri blöð.

Gerrard

Steven Gerrard hefur gefið nokkur viðtöl, þar sem að aðalinntakið hefur verið að hann sé að fókusera núna á England en ekki Liverpool, sem er afskaplega skiljanlegt. Sky og fleiri miðlar reyna að búa til einhverjar sögur um að hann muni skoða sína framtíð eftir HM, en með því virðast menn vera að reyna að toga til það sem hann hefur sagt. BBC tóku meðal annars saman á vefsíðunni sinni punkta úr viðtali á BBC þar sem reynt var að gera skoðanir Gerrard á þessu eitthvað skrýtnar.

Í viðtalinu kom þó skýrt fram hjá Gerrard að hann hafi engan hug á því að fara frá Liverpool. Ég held að hann hljóti að gera sér grein fyrir því að þetta væri um það bil versti tíminn til að fara frá Liverpool, því það væri hætt við að hans orðspor hjá Liverpool myndi eitthvað skaðast ef hann færi eftir þetta ömurlega tímabil.

Um þetta er fjallað á Anfield Road.com:

Liverpool fans have enough problems trying to decipher the truth from the never-ending speculation and off-the-record whispering that fills the back pages on a regular basis. Hints are made, but those doing the hinting haven’t the courage to put their names to their suggestions about their enemies. Or perhaps in some cases their contracts prevent them from just coming out with it.

That’s why it’s always good to see some actual quotes. Obviously it doesn’t mean the speaker is being honest but at least we know what the speaker really said.

Except, it seems, when it’s the BBC reporting the quotes. Only they can say why they missed out a vital couple of answers from their exclusive interview with Steven Gerrard, on duty with England but finding himself being asked about his Liverpool future.

Their online report of what Gerrard said in an interview with their senior football correspondent, Ian Dennis, differs in emphasis from what supporters actually heard when it went out on Five Live this afternoon (2:08.26 in).

Of course there’s no saying Gerrard means what he said today, but he certainly seemed very much taken aback when asked if he’d still be at Anfield next season: “What do you mean? Well I’ve got three years left so I will be, yes.”

This wasn’t the sound of someone answering diplomatically; this was the sound of someone who meant it. And perhaps that’s why it was completely dropped from the online report of what he’d said.

Þið getið þó bókað það að blöðin á Englandi munu halda áfram að orða Gerrard við brottför frá liðinu í sumar, enda selur það fleiri blöð.

Benitez

Rafa Benitez hefur líka sagt að hann ætli að vera áfram hjá liðinu. Hann segist vilja vera hjá liðinu í allavegana 4 ár í viðbót. Benitez segir:

“My future is with Liverpool,” Benitez told reporters in Madrid. “I have four more years of contract and I want to succeed. I have no offer [from another club]. I hope to make a competitive team.

“My critics in London say that I am not a good manager and experts with an English accent here [in Madrid] say the same. But Liverpool has had an average of 69 points in the last 12 seasons. The club made a huge mistake, which was to start winning four trophies [under his management]. Then people will ask for more. [Sir Alex] Ferguson took seven years to win the Premier League.

Jose Mourinho, sem að ansi margir hafa nefnt sem kost númer eitt þegar við höfum rætt um hugsanlega arftaka Rafa, mun í vikunni taka við Real Madrid. Marca segja að það muni gerast á miðvikudag eða fimmtudag. Mourihno sá auðvitað til þess með blaðaviðtölum eftir leikinn í gær að allt myndi snúast um hann.

Þið getið þó bókað það að blöðin á Englandi munu halda áfram að orða Benitez við brottför frá liðinu í sumar, enda selur það fleiri blöð.

Jovanovic kemur (staðfest)

Posted on by

Jæja, þá eru stóru leikmannakaup nr. 2 í sumar orðin staðfest, og það beint úr munni leikmannsins sjálfs. Milan Jovanovic, serbneski snákurinn eins og hann er kallaður, mun skrifa undir samning við Liverpool þann 1. júní n.k.

Hann virðist mjög spenntur og segir meðal annars:

“They might have had a poor season, but Liverpool are still Liverpool.

I really see this as the place where I want to be.

The thought of playing at Anfield is an incredible inspiration for me.”

Hann virðist líka vera með hausinn á réttum stað:

“I have signed the contract but that was the easier part of the job. Now comes the hard part, which is winning a place in the team.”

Frábært. Hæfileikaríkur strákur með rétt hugarfar og næga aðdáun á Liverpool til að segja nei við önnur lið þótt Liverpool gætu skyndilega ekki boðið honum Meistaradeildarbolta lengur. Velkominn til Liverpool, snákur!

Smá útúrdúr: samkvæmt öllum miðlum höfum við lítinn sem engan pening á milli handanna í sumar en það er ekki þar með sagt að liðið geti ekki styrkt sig. Við erum þegar búnir að klófesta Jonjo Shelvey og Milan Jovanovic og manni skilst að það sé stutt í að Danny Wilson frá Rangers verði staðfestur. Þá hefur liðið reynt að tala við Marouane Chamakh, sem fór frítt til Arsenal í síðustu viku, og hefur verið orðað við leikmenn eins og Joe Cole og Raúl Gonzalez sem geta farið frítt á milli liða í sumar. Þannig að þótt lítið sé í buddunni er hellingur að gerast samt sem áður.

Vonum þó að menn finni einhverjar milljónir áður en langt um líður. Það er gott að fá Jonjo og Jovanovic en það þarf meira til, talsvert meira, áður en við leyfum okkur einhverja bjartsýni á ný.

Og nú, laugardagsvídjóið … mörk Jovanovic gjöriðisvovel:

Hlakka til að sjá hann spila í haust.

Stöðumat: Hægri bakverðir

Posted on by

Hægri bakverðir

Þá er komið að stöðumati á hægri bakvarðarstöðunni hjá Liverpool FC. Í mínum huga er þetta sú staða sem ég tel að við þurfum minnst að hafa áhyggjur af. Glen Johnson er að fara að spila sitt annað tímabil á Anfield, og ég held að hann eigi bara eftir að eflast og verða betri. Bakvarðarstöður í boltanum í dag eru afar mikilvægar, því bestu liðin treysta mikið á “overlap” frá bakvörðum sínum og þar með eiga þeir að hjálpa mikið til þegar kemur að sóknarleik liðanna. Fáir (ef nokkur) hægri bakverðir á Englandi eru betri í þessu en Glen Johnson. Sumir hafa reyndar verið að setja spurningamerki við varnarleik hans, en að mínu mati þá er hann sterkari varnarlega en menn vilja af láta.

Núverandi hægri bakverðir (nafn, aldur, land):
Glen Johnson, 25, England
Philipp Degen, 27, Sviss
Martin Kelly, 20, England
Stephen Darby, 21, England
Steven Irwin, 19, England
Emmanuel Mendy, 20, Spánn

Degen fer frá liðinu, tel það vera algjörlega ljóst. Í rauninni þá hefði ég viljað sleppa því algjörlega að kaupa leikmann í þessa stöðu. Styðja Kelly í því að vera varaskeifa fyrir Johnson, hann er ungur, enskur og hörku efni. Ég hef akkúrat enga trú á því að Darby verði neitt annað en neðri deildar leikmaður í framtíðinni, en ég hefði viljað halda honum hjá okkur á næstu leiktíð sem þriðja valkosti. Þá væru það 3 enskir leikmenn sem myndu sjá um að “covera” þessa stöðu og svo er sá fjórði til taks ef allt þrýtur, eða Carra. Tveir aðrir ungir hægri bakverðir komast inn á listann minn, Irwin og Mendy. Ég hef trú á hvorugum og yrði ekki hissa ef Mendy færi í sumar, hann er einfaldlega ekki nógu góður. Irwin er það að mínu mati ekki heldur og aðeins tímaspursmál hvenær hann hverfur á braut.

Hugsanleg kaup (nafn, aldur, lið, land):
César Azpilicueta, 20, Osasuna, Spánn
Mauricio Isla, 21, Udinese, Chile
Arturo Vidal, 22, Bayer Leverkusen, Chile
Gregory van der Wiel, 22, Ajax, Holland
Andreas Beck, 23, Hoffenheim, Þýskaland
Serdar Tasci, 23, Stuttgart, Þýskaland
Peter Pekarík, 23, Wolfsburg, Slóvakía
Rafinha, 24, Schalke, Brasilía
Maximiliano Pereira, 25, Benfica, Uruguay
Jorge Fucile, 25, Porto, Uruguay

Allir þessir leikmenn eiga það sameiginlegt að vera ekki enskir, og það er bara stór ókostur þegar við erum að skoða stöðu í liðinu sem er vel mönnuð ef Englendingi. Þarna eru nokkur spennandi nöfn, sér í lagi þeir Azpilicueta (sem datt á síðustu sentimetrunum út úr hópi Spánverja fyrir HM) og van der Wiel. Báðir ungir og sprækir og þó ég hafi ekki séð mikið af þeim sjálfur, þá hef ég lesið mér talsvert til um þá og þeir virðast vera hörku góðir leikmenn. Eins eru Þjóðverjarnir 2 spennandi kostir í stöðunni, ungir og þýskir, en restin þarf væntanlega atvinnuleyfi og því nánast útilokaðir strax.

All in all, þá held ég að þessi staða haldist alveg óbreytt á milli ára, fyrir utan auðvitað brottför Degen, sem veikir liðið talsvert…ekki neitt. Hugsanleg kaup eru svo ólíkleg, þar sem allir hlutaðeigandi myndu kosta slatta af milljónum punda, og þeim verður varið í aðrar stöður.

Hægri bakverðir 2010-2011 (nafn, aldur, land):
Glen Johnson, 25, England
Martin Kelly, 20, England
Stephen Darby, 21, England
Steven Irwin, 19, England

Næst tek ég fyrir vinstri bakvarðarstöðuna. Þá fyrst þarf að fara að spá og “spökulera”.

Stöðumat: Markverðir

Posted on by

Þar sem að “silly season” er nú formlega hafið, þá ætla ég mér að koma með röð pistla þar sem rakin verður hver staða innan liðs Liverpool FC fyrir sig, spáð í hverjir séu nú þegar til staðar, hverjir munu væntanlega hverfa á braut, og svo loks hverjir geti talist líklegir til að bætast í hópinn.

Að sjálfsögðu byggjast pistlarnir fyrst og fremst á huglægu mati þess sem þá skrifar. Ég mun taka fyrir bæði leikmenn aðalliðsins og varaliðsins, sem og nokkra stráka úr unglingaliðinu sem ég tel að geti talist það góðir að þeir gætu farið að taka skref upp í varaliðið og þess vegna á bekk einstaka sinnum í aðalliðinu (t.d. Carling Cup).

Listinn yfir þá leikmenn sem ég tiltek sem hugsanleg kaup, er langt því frá að vera tæmandi. Hann telur þó 150 nöfn, en að sjálfsögðu fer þetta allt saman eftir því hversu miklir fjármunir verði fyrir hendi og eins hvort þeir séu á annað borð falir. Sitt sýnist hverjum í þessu sambandi, sumir eru væntanlega ekki á þeim klassa sem við viljum, og svo kemur að því að meta hvort þeir séu hugsaðir til að auka breiddina, eða hvort þeir eigi að detta beint inn í byrjunarliðið. En hvað um það, hérna kemur mitt mat á þessu öllu saman og við byrjum á markvarðarstöðunni.

Markverðir

Núverandi markverðir (nafn, aldur, land):
Pepe Reina, 27, Spánn
Diego Cavalieri, 27, Brasilía
Charles Itandje, 27, Frakkland
Péter Gulácsi, 20, Ungverjaland
Dean Bouzanis, 19, Ástralía
Martin Hansen, 19, Danmörk
Christopher Oldfield, 19, England
Deale Chamberlain, 18, England

Mér heyrist á öllu að Cavalieri sé á útleið hjá okkur og það þarf hreinlega ekkert að ræða stöðu Itandje, hann fer líka. Ég á einnig von á því að Oldfield hverfi á braut, þ.e. að hann verði losaður undan samningi. Eftir standa nokkrir efnilegir strákar og þar lang fremstur í flokki er Péter Gulácsi. Ég segi fyrir mitt leiti að ég treysti honum algjörlega til að verða varamarkvörður á næsta tímabili. Hann hefur fengið reynslu núna af því að fara að láni til neðri deildar félaga og kemur sterkari tilbaka. Ég held þó að forráðamenn Liverpool FC séu ekkert sérlega sammála mér og ég er nokkuð viss um að það kemur einn markvörður til liðs við okkur í sumar. Listinn yfir hugsanleg kaup í þessa stöðu er ekki langur hjá mér, eiginlega afar stuttur, enda finnst mér ekki margir koma til greina sem hugsanlegir arftakar Cavalieri.

Hugsanleg kaup (nafn, aldur, lið, land):
Wayne Hennessey, 23, Wolves, Wales
Adam Federici, 25, Reading, Ástralía

Ég reikna með því að Hennessey verði keyptur, og skiptir þar miklu máli útlendingakvótinn sem settur verður á fyrir næsta tímabil. Ég held reyndar að allir ungu markverðirnir okkar teljist vera uppaldir sökum þess hve ungir þeir komu til okkar, en ég ætla að tippa á að við kaupum Hennessey frá Wolves. Hann hefur orðið talsverða reynslu, er samt ungur, og hann telst breskur. Svona yrði þá markvarðarstaðan okkar skipuð næsta tímabil:

Markverðir 2010-2011 (nafn, aldur, land):
Pepe Reina, 27, Spánn
Wayne Hennessey, 23, Wales
Péter Gulácsi, 20, Ungverjaland
Dean Bouzanis, 19, Ástralía
Martin Hansen, 19, Danmörk (gæti líka hugsanlega farið)
Deale Chamberlain, 18, England

Það er ekkert öfundsvert hlutverk að vera varamarkvörður hjá Liverpool FC. Pepe Reina er númer eitt, á helling af árum eftir, meiðist nánast aldrei og er ákaflega stöðugur í sinni stöðu.

Næsti pistill mun svo fjalla um hægri bakvarðarstöðuna hjá okkur.

Spennan í spænska boltanum

Posted on by

Þetta er lokastaðan i spænsku deildinni, sem lauk um síðustu helgi:

1. Barcelona 99 stig
2. Real Madrid 96 stig
3. Valencia 71 stig
4. Sevilla 63 stig.

Semsagt, Barcelona vann deildina. Þeir spiluðu 38 leiki, unnu 31 leik, gerðu 6 jafntefli og töpuðu einum leik. Þeir settu stigamet. Þeir voru 28 stigum á undan liðinu í þriðja sæti, Valencia og 36 stigum á undan liðinu í fjórða sæti.

Í dag keyptu svo Barcelona besta leikmann Valencia, David Villa á 34 milljónir punda. Semsagt, besta liðið á Spáni keypti besta leikmann þriðja besta liðsins. Ef að það var lítil spenna í þessari spænsku deild á þessu tímabili, þá er væntanlega lítil hætta á því að spennan verði meiri á næsta ári.

Af hverju eru menn yfir höfuð að spila allar þessar umferðir í spænsku deildinni? Væri ekki gáfulegra að Barcelona og Real Madrid spiluðu bara 3-4 leiki gegn hvor öðru og sigurvegari þeirra viðureigna yrði meistari? Heldur nokkur maður að eitthvað annað lið eigi möguleika á að vinna titilinn?

Þetta sýnir auðvitað svart á hvítu hversu mikið rugl fótboltinn er kominn útí. Spænska deildin, sem einhverjir hafa viljað kalla þá sterkustu í heimi, er orðin nánast formsatriði fyrir tvö stóru liðin. Nánast engin spenna er í leikjum og allir vita að annaðhvort Barca eða Real Madrid munu vinna titilinn. Þetta er lítið nema skoska deildin með aðeins betri fótbolta og stærri stjörnum.

Mascherano vill flytja frá Liverpool

Posted on by

Javier Mascherano, fyrirliði Argentínu, tjáði sig við fjölmiðla í heimalandi sínu um dvöl sína á Englandi. Það sem hann segir er mjög hreinskilið, afdráttarlaust og hreinlega sláandi fyrir okkur Liverpool-aðdáendur.

Tökum út nokkrar helstu tilvitnanirnar.

Um Barcelona-slúðrið og erfiðu byrjunina í fyrra:

“The situation with Barcelona really affected me. It was a shame it didn’t happen as it was the city I wanted to live in.

There were many discussions and problems during that month and a half. They were difficult times for me. One day I was off to Barcelona, the next I wasn’t.

And Liverpool said I was non-transferable. Psychologically, it affected me as I couldn’t think in Liverpool and I was focused on other stuff and not on my work, my training and playing.

Also we were having problems with Argentina as our qualification to the World Cup was in danger.

There was a lot of complicated stuff at that time. I don’t do much stuff in my free time, that’s the truth.”

Um lífið í norð-vestur Englandi:

“What kills me about living in Liverpool is that there are only two Argentinians here with me, Emiliano Insua and Maxi Rodriguez.

Insua and I live in a private neighbourhood. He lives in one tower and I live in the other. There are 15 metres between us and we used to look at each other through the window.

Sometimes Zabaleta comes from Manchester but there is no way Carlos Tevez comes here. If I want to see him, I have to go to his place and knock on his door.

He doesn’t like to leave his home. So during the winter, during those four or five months, I have to stay at home all day with my family.”

Hann bætir svo við:

“I have no problem living in Liverpool, but I think my wife and daughters deserve to enjoy every day to the full and live their lives – but they have to be at home all day.

My wife doesn’t speak a word of English, so she depends 100% on me.”

Þetta er nokkuð afdráttarlaust. Fjölskyldu Mascherano líður ekki vel í Liverpool. Það eru of fáir samlandar þeirra á svæðinu, samfélagið er öðruvísi en þau eiga að venjast og konan hans á erfitt með að aðlagast og þau upplifa sig sem mjög einangrað fólk í úthverfi einhvers staðar.

Auðvitað eru einhverjir sem myndu segja leikmanni eins og Mascherano að hætta að væla, hann fái nóg borgað, en það er ekki svo einfalt. Hann er toppleikmaður sem gæti fengið topplaun í mörgum löndum, þannig að því ætti hann að sætta sig við að fá vel borgað í stórliði á Englandi, þar sem fjölskyldunni líður greinilega frekar illa, þegar hann gæti fengið jafn vel borgað á Ítalíu eða Spáni þar sem samfélagið er líkara því sem þau eiga að venjast og konan hans gæti fundið sig betur?

Fyrir mér er þetta nokkuð skýrt. Mascherano væri til í að komast til Spánar í sumar. Fyrir mitt leyti er ég alveg til í að láta það eftir honum, eins lengi og framkvæmdarstjóri Liverpool (hver sem það er/verður) fái þá peninginn til að styrkja hópinn í staðinn.

Það er ekki til neins að ætla að halda leikmanni sem líður illa á svæðinu, jafnvel þótt hann sé af sama heimsklassa og Mascherano er. Er þá ekki alveg eins gott að selja hann hæstbjóðanda og nota féð til að kaupa kannski einn eða tvo háklassamenn í staðinn, menn sem geta hugsað sér að búa á svæðinu?

Það myndi ég halda allavega. Það verður fróðlegt að sjá hvaða áhrif þessi ummæli litla Fógetans hafa hjá félaginu.

Uppgjör ársins: Bestu leikmenn

Posted on by

Þá er komið að síðasta lið ársuppgjörs okkar á kop.is og í þetta sinn gerum við upp frammistöðu leikmanna og teljum til hverjir stóðu sig best að okkar mati.

Það er skemmst frá því að segja að listinn yfir leikmenn sem komu til greina sem leikmenn ársins var stuttur, svo ekki sé meira sagt. Við erum sex sem kusum og gátum hver útnefnt þrjá leikmenn í þrjú sæti. Samt fengu bara sex leikmenn atkvæði og ég myndi segja að tveir þeirra hafi varla átt skilið atkvæði heldur. Þannig að það var greinilega fátt um fína drætti meðal leikmanna í vetur.

Vindum okkur í þetta:

3. sæti – JAFNTEFLI: Daniel Agger og Javier Mascherano (3 stig hvor)

Agger hlaut þriðja sætið á listum þeirra Einars Arnar, Magga og Babú fyrir fína frammistöðu eftir að hann kom (loksins) inn úr meiðslum, og sennilega líka fyrir að vera liðtækur og standa sig vel í bakverðinum undir lok tímabilsins. Mascherano hlaut þriðja sætið á lista SSteins og annað sætið á lista Magga fyrir að vera óþrjótandi baráttuhundur fyrir málstaðinn, svona eftir að hann ákvað að mæta til leiks í október.

2. sæti – Fernando Torres (10 stig)

Torres missti úr svona 30-40% tímabilsins og það sást. Þegar hann spilaði spilaði hann jafnan stórvel og skoraði í heildina 22 mörk í 32 leikjum í öllum keppnum. Við vorum sammála um það að sú staðreynd að hann sé nokkuð örugglega í öðru sæti í þessu vali, þrátt fyrir að hafa misst úr stóran hluta tímabilsins, segi allt um frammistöðu annarra leikmanna í vetur, og eins og SSteinn orðaði það vel þá er engin spurning um að við værum í Meistaradeildinni ef hann hefði verið heill í allan vetur. En svo fór ekki og fjarvera hans á löngum köflum afhjúpaði bæði galla leikmannahópsins og minnti okkur óþægilega á hversu ómissandi hann er.

1. sæti – JOSÉ MANUEL “PEPE” REINA (18 stig)

Pepe hlaut fullt hús stiga og er vel að því kominn. Þegar stórlið eins og Liverpool spilar eins og það á að spila fer minna fyrir markverðinum og hann getur einbeitt sér að því að halda sem oftast hreinu. Hlutverk Pepe á undanförnum árum hefur oft verið meira sem aftasti maður í spilamennsku liðsins heldur en einhver stoppari en það breyttist heldur betur í vetur. Ef við getum sagt að við værum í Meistaradeildinni ef Torres hefði verið heill í allan vetur, þá getum við líka sagt að þetta lið hefði endað talsvert neðar en í 7. sæti án Pepe milli stanganna. Hann bjargaði þessu liði ótrúlega oft í vetur, vann inn mýmörg stig upp á sitt einsdæmi og er eini leikmaður liðsins sem bæði getur talist hafa spilað samkvæmt getu og hreinlega skammast sín fyrir samherja sína.

Pepe Reina, sennilega besti … í heimi.

Tveir aðrir leikmenn fengu eitt stig hvor en komust ekki á lista; Kristján Atli setti Sotirios Kyrgiakos í þriðja sæti á sínum lista þar sem honum fannst Kyrgiakos einn örfárra sem lék framar vonum í vetur, og Aggi setti Dirk Kuyt í þriðja sæti á sínum lista þar sem hann var einn fárra sem lögðu sig alltaf 110% fram í vetur, þótt ekki hafi það alltaf gengið eftir.

Vonum svo að úrval frambjóðenda á þennan lista verði aðeins betra og fjölmennara á næsta ári. En uppgjöri tímabilsins 2009/10 er hér með formlega lokið á kop.is og tímabært að horfa fram á veginn.

Uppgjör ársins 09/10 – Þjálfarinn okkar allra

Posted on by

Það kom í minn hlut að draga saman hugleiðingar okkar um frammistöðu þjálfarans og stöðu hans almennt á þessum tímapunkti. Við settum þetta þannig upp að við gáfum honum einkunn á bilinu 1 – 10 og bættum röksemdum við einkunnagjöfina okkar.

Meðaleinkunn Rafa frá okkur pennunum hér og þar með lokaeinkunn hans fyrir tímabilið 2009 – 2010 er:

5,10

Ef ég gríp niður í röksemdir okkar þá talar Einar Örn um að frammistaða Rafa hafi verið eins og hjá liðinu, stórslys. Ég taldi hrokafullt leikmannaval koma fram á köflum og yfirleitt úrræðaleysi til að bregðast við í leikjum og á milli leikja. Aggi taldi Rafa stundum lesa leikmennina okkar vitlaust og nýta því leikmenn vitlaust, t.d. Yossi Benayoun. KAR vitnaði í frægt lag og gaf einkunnina 4,9, Steini taldi stjórann hafa gert mýmörg mistök og Babu taldi hann á köflum of varkárann.

Við tiltökum þó allir það að vinnuumhverfi kallsins hefur verið afar vont og ótryggt. Við áttum okkur auðvitað ekki alveg á ruglinu sem hefur kraumað bakvið tjöldin en við teljum það vera ljóst að það hafa verið frekar vonlitlar aðstæður að vinna með eigendum félagsins og í þeim fjármagnsramma sem ríkir hjá félaginu núna. Við gleðjumst yfir þeim breytingum sem hafa orðið á meðal unglinga- og varaliðanna og erum ekki á því að hann fái alltaf sanngjarna gagnrýni. Babu bendir t.d. á gagnrýni á brosskorti, sem okkur finnst ekki skipta öllu máli ef að vel gengur að öðru leyti!

Nú hef ég unnið við einkunnagjöf ansi lengi. Í próffræðunum myndi einkunnin 5,1 sjaldnast vekja mikla lukku, það þýðir einfaldlega að menn hafi rétt skriðið. Það er enda sameiginlegur tónn okkar allra. Í ljósi þess að Rafael hefur mátt þola ömurlega yfirmenn, í bland við meiðsli og formmeiðsli lykilmanna (jafnvel tognunar á heila eins og Riera, höfundarréttur SSteinn) teljum við enn réttlætanlegt að hann verði við stjórnvölinn áfram. Við heimtum auðvitað fyrst og fremst að lagað verði til í baklandinu og karlinn fái leyfi til að versla það sem þarf til félagsins. Ef illa gengur miðað við það er ljóst að hann þarf að taka pokann sinn fljótt og örugglega. Við erum allir á því að karlinn sé klárlega á síðasta séns næsta vetur ef hann heldur starfinu yfir sumarið en reyndar teljum við litlar líkur á því að hæfari maður fáist til félagsins meðan á þessari orrahríð og eigendaleit stendur.

Það er líka alveg ljóst af þessari einkunn að pennar Kop.is munu ekki missa svefn eða gráta út vasaklútana sína ef að Rafa kveður á næstu vikum. En á meðan hann stýrir skútunni styðjum við hann til góðra verka!

Umræða í Echo

Posted on by

Ég viðurkenni alveg að ég les innanbæjarblöðin í Liverpool mest af öllum til að fá fréttir af klúbbnum því þar hefur maður yfirleitt fundið mest af því sem réttast er um félagið.

Í dag er í Liverpool Echo satt að segja sláandi frétt um stöðuna í fjármálum eignarhaldsfélags klúbbsins.

Skuldir þess eignarhaldsfélags hrannast upp þó rekstur klúbbsins sjálfur sé jákvæður og það þýðir bara eitt, stöðugt meiri peningar eru teknir út úr klúbbnum til að borga himinháa vexti félags vitleysingjanna tveggja sem er víst staðsett á Cayman-eyjum.

Ég fer bara ekki ofan af því að stóra baráttan í klúbbnum okkar snýst ekki um leikmenn, leikskipulag eða þjálfara. Við erum bara að horfa á baráttu fyrirtækis fyrir lífi sínu og gegn eigendum sem ætla að ræna það innanfrá, eins og við þekkjum víst á skerinu okkar af umræðum þessa dagana. Allt annað í kringum klúbbinn er hjóm eitt!

Uppgjör 09/10: Leikur ársins og mark ársins

Posted on by

Þá er komið að lið númer 5 og 6 í uppgjöri okkar hér á Kop.is. Það er synd að segja frá því en í ár eru þetta langt frá því að vera mest spennandi flokkarnir og raun var alveg sorglega lítið í boði sem við gátum valið úr, í hvorugum flokkknum. Tveir leikir skera sig úr sem besti leikurinn og hjá sumum okkar fékk bara eitt Liverpool mark tilnefningu.

Leikur ársins

Það voru bara fimm leikir sem komust á blað hjá okkur sem getur alls ekki talist gott.

3.sæti. Liverpool – Tottenham 2-0 – 4.stig

Maggi gaf sigri þessum leik 2 stig þar sem það var gaman að sjá vængbrotið Liverpool lið yfirspila Spurs, ég og Aggi vorum því sammála og gáfum þessum leik sitthvort stigið. Aðallega þó vegna þess hversu sætt það var að vinna þetta Spurs lið eftir að Spurs vinum okkar hafði fjölgað óeðlilega mikið vikurnar áður.

2.Sæti. Liverpool Benfica 4-1 – 12.stig

Það er ekki gaman að segja frá því að nánast eina alvöru evrópukvöldið á Anfield hafi komið í Europa League en þessi Benfica leikur var klárlega í þeim flokki. Fyrsta skipti í langan tíma sem við púllarar skemmtum okkur eitthvað yfir leik hjá liðinu og það var gaman að sjá Torres klára þetta sterka lið.

1.Sæti Liverpool – United 2-0 – 16.stig

Allir nema EÖE og KAR gáfu þessum leik fulllt hús stiga (2.sæti hjá þeim). Þetta var ekkert besti leikur sem Liverpool hefur spilað og raun fátt merkilegt við þennan sigur utan þess að þetta var gegn United. En það er bara alltaf extra gaman að vinna United leiki og þegar þessi sigur kom var veturinn þegar orðinn allt of langur og strangur. Þessi sigur gaf kannski einhverjum smá falsvonir varðandi tímabilið en þegar upp er staðið virðist hann a.m.k. hafa átt þátt í að kosta United titilinn.
Sjálfur er ég á því að með þessum sigri hafi ég sannað að sigur á United lækni þynnku! Ég horfði á þennan leik á Grænmetispöbbnum sem Carlberg (Birkir) dubbaði upp fyrir okkur púllara á Akureyri og trúið mér, leiðin milli Akureyrar og Selfoss er helvíti löng í þynnku…og hvað þá ef Liverpool tapar fyrir United rétt fyrir brottför. Það gerðist ekki svo maður var skotfljótur heim!

Aðrir leikir sem komust á blað voru manni færri sigurinn á Everton sem þarf ekki að útskýra frekar og eins gaf KAR sigrinum á Aston Villa stig enda var það í ett af fáu skiptunum í vetur sem liðið sýndi einhvern karakter.

Mark ársins

Það var nákvæmlega engin keppni um mark ársins meðal okkar pennana. Átta mörk komust þó á blað og það er kannski lýsandi fyrir veturinn að tvö þeirra voru skoruð á Liverpool.

3. sæti.- Nokkur mörk
Þessi mörk sem komust á blað en voru ekki með meira en 2.stig voru Babel gegn Lyon sem var reyndar flott mark. Torres gegn United, Aquilani gegn A.Matríd, N´Gog gegn United og ég setti svo markið hjá Assou-Ecotto með! Þegar þessi bakvarðartappi hittir svona skot, langt yfir getu í fyrsta leik var líklega aldrei von á góðu!

2.sæti. – Gerrard gegn Hull / Sundboltinn – 3.stig.
Maggi og SSteinn settu á blað markið hjá Gerrard þegar hann klíndi honum í hornið gegn Hull á meðan ég gaf sundboltamarkinu hjá Darren Bent fulllt hús stiga. Fyrir mér var það tímabilið í hnotskurn.

1.sæti – Torres gegn Sunderland – 16.stig
Um þetta var engin keppni hjá okkur og settum við allir þetta mark í efsta sæti yfir mörk Liverpool manna. Ég setti þetta í þriðja hjá mér en í raun eina Liverpool markið sem fékk tilnefningu og EÖE og Aggi gáu bara þessu marki stig.

Uppgjör 09/10: Mestu framfarir og bjartasta vonin

Posted on by

Þá er komið að lið númer 3 og 4 í uppgjöri okkar pennanna á Kop.is. Nú er reynt að setja upp jákvæðnis gleraugun og finna þá sem mestar framfarir hafa sýnt á þessu “stórbrotna” tímabili sem var að klárast, og eins að reyna að rýna í hver bjartasti vonarneistinn okkar sé þegar kemur að ungum leikmönnum. Sitt sýnist auðvitað hverjum í þessum málum sem öðrum, en útslitin hjá okkur pennunum voru bara nokkuð afgerandi.

Mestu framfarir

Alls voru 7 leikmenn tilnefndir í þennan flokk, enda voru afar fáir leikmenn liðsins sem sýndu einhverjar framfarir á tímabilinu. Þrjú efstu sætin voru svona:

**3. Alberto Aquilani / Ryan Babel / Emiliano Insúa – 3 stig hver**

Aggi gaf Auilani 2 stig og Einar Örn 1, báðir tilgreindu upprisu Ítalans undir lok tímabilsins sem sína ástæðu. Babú gaf Babel 2 stig og Maggi 1 og það sama var uppi á teningnum hjá þeim, þ.e. breytt viðhorf á seinni hluta tímabilsins. Kristján Atli gaf svo Insúa 3 stigin sín. Ég er nú á því að þriðja sætið í þessum flokki segi afskaplega mikið til um það hversu þunnur þrettándinn var í boði hjá liðinu þegar kom að framförum hjá leikmönnum.

**2. David Ngog – 9 stig**

Kappinn þessi fékk stig hjá öllum pennunum nema Einari Erni, og fékk 3 stig hjá Agga. Það eru allir sammála því að hann er nokkrum númerum of lítill til að fylla í skarð Torres og í rauninni fékk hann of mikla ábyrgð of fljótt. Engu að síður þá sjá menn framfarir hjá honum og mér finnst til að mynda boltamóttaka hjá kappanum vera afar góð. Hann er ungur, en þó ekki á neinum fermingaraldri, og haldi hann áfram að bæta sig, þá gæti hann alveg orðið vel frambærileg varaskeifa á næstu árum. Það sást kannski einna best þegar hann spilaði örfáa leiki með varaliðinu hvað hann var góður þar, var í rauninni í klassa fyrir ofan aðra í því liði (allavega flesta).

**1. Lucas Leiva – 15 stig (af 18 mögulegum)**

Það þarf ekkert að fara mörgum orðum um þetta val, Lucas sigraði þennan flokk með algjörum yfirburðum. Allir pennarnir með tölu gáfu honum stig, og fjórir af sex settu hann í efsta sætið. Lucas hefur líklegast verið umdeildasti leikmaður Liverpool á tímabilinu, og flestir eru sammála um það að hann og Javier eiga engan veginn heima saman á miðjunni. Lucas hefur þó klárlega tekið miklum framförum og við erum virkilega vel settir með hann sem varaskeifu fyrir Mascherano í framtíðinni. Hann er ennþá ungur, með viljann og baráttuna í lagi og það má alveg sjá glitta í fína tækni og sendingar hjá honum inn á milli. Persónulega finnst mér hann hafa fengið fáránlega mikla gagnrýni á tímabilinu, auðvitað margt sem hægt var að gagnrýna hjá honum, en þetta fór oft á tíðum algjörlega langt fram úr öllu sem getur talist til hófs.

(Aðrir sem fengu stig, Kyrgiakos 2 og Ayala 1)

Bjartasta vonin

Aðeins voru 5 leikmenn sem fengu stig í þessum flokki, og eins og í flokknum fyrir ofan, þá voru úrslitin mjög afgerandi:

**3. Daniel Ayala / Martin Kelly – 5 stig hvor**

Ayala kom mörgum að óvörum og fékk nokkra leiki með aðalliðinu á tímabilinu, þrátt fyrir að vera mjög ungur að árum, sér í lagi þegar verið er að tala um miðvörð. Flestir bjuggust við að San Jose yrði næstur miðvarðanna úr varaliðinu til að koma sér upp í aðalliðið, en það var strax ljóst að meiri trú var á þessum pilti og því San Jose sendur út á láni. Aggi gaf honum 2 stig, en Maggi, SSteinn og Kristján Atli gáfu honum 1 stig hver.

Kelly var ákaflega óheppinn með meiðsli eftir frábæran leik gegn Lyon í Meistaradeildinni. Þetta er líklega sá enski leikmaður sem hefur verið hvað næst því að brjótast almennilega inn í aðalliðið í mörg herrans ár. Stór og sterkur, getur bæði spilað vel sem miðvörður og hægri bakvörður. SSteinn og Kristján Atli gáfu honum 2 stig hvor og Babú henti einu í hann (meiddist reyndar við það).

**2. Emiliano Insúa – 8 stig**

Það er öllum ljóst að hlutverk Insúa varð mun stærra en búst var við fyrir tímabilið. Dossena fór tilbaka með skottið á milli lappanna og Aurelio kom öllum algjörlega í opna skjöldu með því að meiðast síðasta sumar við að gróðursetja fræ í garðinum hjá sér og hélt svo uppteknum hætti í allan vetur. Ábyrgðin var því mikil á Insúa og oft á tíðum fékk hann mikla gagnrýni á sinn leik. Það dylst þó fæstum að stráksi kann að bera boltann upp og á ágætis fyrirgjafir oft á tíðum. Hann þarf að vinna betur í varnarleiknum sínum, en klárlega er þetta efnilegur strákur, hann er ennþá ungur að árum af varnarmanni að vera. Maggi og Aggi settu hann í fyrsta sætið hjá sér og gáfu honum þar með 3 stig, og Einar Örn gaf honum 2 stig.

**1. Daniel Pacheco – 14 stig**

Þessi strákur er ákaflega skemmtilegur og spennandi leikmaður og það kemur því lítið á óvart að hann hafi sigrað þessa kosningu okkar með yfirburðum. Ef stuðningsmenn Liverpool FC á Íslandi geta verið sammála um eitthvað, þá er það líklega að þessi strákur eigi að fá mun fleiri tækifæri með aðalliðinu. En hann er ennþá korn ungur og á framtíðina fyrir sér. Hann minnir mig oft á Luis Garcia, en það er reyndar meira en 10 ára aldursmunur á þeim (þ.e.a.s. þegar þeir spila sinn fyrsta leik fyrir Liverpool). Einar Örn, SSteinn og Kristján Atli gáfu honum allir 3 stig, Maggi og Babú gáfu honum 2 stig og Aggi gaf honum 1 stig. Hann fékk sem sagt stig frá öllum pennum Kop.is.

(Ngog var sá eini þess utan sem fékk stig, en Babú grýtti 3 stigum í hann)

Þá er röðin komin að ykkur lesendur góðir að leggja ykkar mat á þessa flokka og hægt er að ræða hversu gáfulegt/vitlaust þetta val okkar var.

Uppgjör 09/10: Mestu vonbrigðin

Posted on by

Við á Kop.is ætlum á næstu dögum að gera upp þetta tímabil til að reyna að átta okkur betur á því hvað gerðist. Við ætlum að veita verðlaun tímabilsins einsog við höfum gert undanfarin ár, en skiptum því hins vegar uppí nokkrar færslur til að fara aðeins dýpra oní hvern flokk. Úrslitin munu birtast á næstu dögum.

Ég tók að mér fyrsta hlutanum, sem fjallar um mestu vonbrigðin. Á næstu dögum munu svo birtast pistlar um leik ársins, mark ársins, kaup ársins, leikmann ársins, mestu framfarirnar, björtustu vonina og svo munum við gera upp hlut framkvæmdastjórans.

Ég bið fólk um að halda umræðunni við viðkomandi flokk, en byrja ekki að ræða um flokka sem eru ekki enn komnir inná síðuna.

Hvar á maður að byrja pistil um mestu vonbrigði tímabilsins 2009-2010. Tímabilið allt var vonbrigði. Undirbúningstímabilið var meira að segja ömurlegt, svo byrjaði tímabilið og við töpuðum fyrsta leik, töpuðum okkar fyrsta leik á Anfield í þriðja leik, duttum svo útúr riðlakeppni Meistaradeildarinnar, duttum útúr bikarnum fyrir Reading og svo duttum við út í framlengingu í undanúrslitum Evrópudeildarinnar. Við töpuðum tvisvar fyrir Chelsea, þrisvar fyrir Arsenal og einu sinni fyrir Man U. Við komumst ekki í Meistaradeildina fyrir næsta tímabil. Strandbolti skoraði mark gegn okkur. Aðdáendur annara liða hættu nánast að gera grín að okkur.

Þetta tímabil var vonbrigði frá A-Ö. Það eina magnaða er að við fengum aldrei stóra skítaleikinn þar sem eitthvað lið tók sig til og pakkaði okkur saman. Ég held að þrátt fyrir allt þá hafi stærsta tapið verið með tveim mörkum.

Mestu vonbrigðin (leikmaður)

En allavegana, byrjum á mestu vonbrigðunum meðal leikmanna. Það var gríðarlega hörð keppni í þessum flokki (öfugt við flokkinn leikmaður ársins til dæmis) og margir tilnefndir. Við ákváðum að “allt liðið” væri ekki valmöguleiki, heldur þyrftum við að velja einstaka leikmenn. Þrjú efstu sætin voru svona:

**3. Dirk Kuyt – 5 stig**
Það hefur verið rifist um Dirk Kuyt og hans framlag til liðsins í sirka hverri einustu leikskýrslu tímabilsins. Ég get ekki ímyndað mér leiðinlega umræðuefni (nema kannski Icesave (muniði eftir því!)) og ætla því ekki að eyða fleiri orðum í þetta. Maggi setti hann í efsta sæti hjá sér og vill fá hann í burtu. Kuyt var okkar reyndasti framherji þegar að Torres var meiddur og hann olli svo miklum vonbrigðum í því hlutverki að orð fá því varla lýst.

**2. Albert Riera – 10 stig**
Riera spilaði oft á tíðum virkilega vel á síðasta tímabili og var í spænska landsliðinu í Álfukeppninni síðasta sumar. Svo meiddist hann og (einsog SSteinn orðaði það) tognaði svo illa á heila – dissaði liðið og þjálfarann, vildi fara til Rússlands en hafnaði svo að fara þangað því að launin voru svo lág.

Hvað þessi annars ágæti leikmaður var að spá get ég hreinlega ekki skilið. Hann átti að ég held sirka 60 góðar mínútur í vetur og verður seldur í sumar.

**1. Steven Gerrard – 14 stig (af 18 mögulegum)**
Leikmaðurinn sem var valinn leikmaður ársins af okkur í fyrra er aftur valinn í efsta sætið, en núna bara í vitlausum flokk. Fjórir af okkur (ég meðtalin) völdum hann í efsta sætið (Riera og Kuyt fengu fyrstu sætin hjá SSteini og Magga).

Hvað kom eiginlega fyrir Steven Gerrard á þessu tímabili? Ég veit það ekki almennilega. En hann var lélegur nánast allt tímabilið. Það kom nánast ekkert útúr honum, hann skoraði örfá mörk og lítið annað kom útúr honum af viti. Það nennir ekki nokkur maður að deila um það hvor sé betri þessa dagana, Gerrard eða Lampard – slíkur var munurinn á þeim.

Ekki nóg með það að Gerrard hafi leikið illa, heldur hefur hann verið afleitur fyrirliði. Hann er nánast undantekningalaust sá sem fyrst gefst upp og hengir haus í leikjum. Þegar hann hefur ekki haft Torres sér við hlið þá er nánast einsog hann gefist upp fyrir leiki og hann virðist hafa gleymt því að hann var frábær leikmaður áður en sá spænski kom til liðsins.

Ömurlegt tímabil hjá Steven Gerrard og í fyrsta skipti á hans ferli eru ansi margir Liverpool aðdáendur, sem vilja sjá hann seldan. Slíkt hefði verið fullkomlega óhugsandi fyrir 12 mánuðum.

(aðrir sem fengu stig: Carra 2, Babel 1, Aurelio 4, Aquilani 1)

Mestu vonbrigðin (annað)

Hérna kom ansi margt til greina, en röðin endaði svona:

**3. Gengið í Meistaradeildinni – 4 stig**
Við duttum út í riðlakeppninni fyrir Fiorentina og Lyon. Við áttum ekki einn góðan leik í keppninni. Loksins þegar við fengum að sleppa við forkeppnina þá léku okkar menn hryllilega. Lélegasta tímabil Rafa í Evrópu.

**2. Gengið í deildinni – 13 stig**
Við spáðum Liverpool 1. sæti í deildinni – við enduðum í því sjöunda. Vonbrigðin eru gríðarleg og þau hafa verið að síast inní hausinn á manni í smáum skömmtum í allan vetur.

**1. Eigendur og þjálfari – 16 stig**
Öll umgjörð liðsins hefur verið í rugli og þjálfarinn hefur staðið sig afleitlega. Allt frá því að enginn sóknarmaður var fenginn til liðsins síðasta sumar til upplýsinga um gríðarlega slæma skuldastöðu, sem upp hefur komið núna á síðustu mánuðunum.

Það eru kannski þessi mál öðru fremur sem valda því að Liverpool aðdáendur eru ekki beint uppfullir af bjartsýni þessa dagana. Óbreytt staða í þessum eigendamálum í sumar mun væntanlega þýða að lítið muni gerast í leikmannamálum. Vissulega á þessi hópur, sem Liverpool á í dag, að geta gert meira en hann gerði á nýliðnu tímabili – en fyrir þetta sumar er maður ekki einu sinni viss um að hópurinn haldist jafn sterkur, hvað þá að hann styrkist.

Allt batteríið í kringum liðið hefur valdið okkur sífelldum vonbrigðum á þessu tímabili. Það er sennilega heistasta ósk flestra Liverpool stuðningsmanna að félagið verði selt í sumar. Við skulum vona að slíkt gerist fyrr en síðar.

Opinn þráður

Posted on by

Jæja, tímabilið er búið og við hérna á Kop.is erum að vinna í að gera það upp.

Við munum setja inn eitthvað af pistlum um þetta hræðilega tímabil og reyna að gera okkar besta til að skilja hvað fór úrskeiðis.

En þangað til er ekki úr vegi að henda inn opnum þráð hérna, þar sem að menn geta rætt um hvað sem er. Það er ekki mikið hægt að ræða um þennan Hull leik, þannig að sviðið er ykkar.

…

Hull City 0 – Liverpool 0 (Post Mortem)

Posted on by

MEISTARAR: Liverpool 118 stig.

Þá hafiði það. Í fyrsta sinn hjá Kop.is spáum við okkar liði titlinum, eftir harða baráttu við Chelsea sem ræðst á síðasta degi tímabilsins. Meistarar spila því annað árið í röð síðasta leik sinn í Hull. Lykilmenn verða að sleppa við meiðsl og Aquilani og Johnson verða að falla fljótt að leikstíl liðsins. Meira ekki í bili, við munum ræða þetta töluvert í vetur held ég.

Þetta skrifaði Maggi í samantekt fyrir spá okkar á þessari síðu yfir efstu sætin á þessu tímabili. Eftir að hafa allir spáð og tekið saman var það samróma álit okkar allra að Liverpool myndu verða meistari á tímabilinu 2009/10. Einn okkar setti Liverpool í þriðja sætið en hinir allir í annað eða fyrsta sætið. Við vorum einfaldlega handvissir um að Liverpool yrðu í titilbaráttunni fram á síðustu umferðirnar.

Það er skemmst frá því að segja að þetta mat okkar var kolrangt. Í stað þess að kveðja titilbaráttuna í maímánuði 2010 sitjum við hér, Liverpool-aðdáendur, níu mánuðum eftir þessa spá og spyrjum okkur einfaldri spurningu sem enginn virðist geta svarað:

Hvernig gátum við verið svona blind?

Staðreyndirnar í lok þessarar leiktíðar tala sínu máli og þær eru frekar nöturlegar:

Aston Villa töpuðu óvænt heima fyrir Blackburn í dag en það hjálpaði okkur ekkert því okkar menn gerðu steingelt 0-0 jafntefli gegn Hull City. Hull, sem voru löngu fallnir fyrir leikinn, voru talsvert nær því að vinna hann og aðeins vert að minnast á dauðafæri Agger í fyrri hálfleik og stangarskot Gerrard undir lok leiks. Kuyt, Aquilani og El Zhar áttu líka hálffæri, fleira var það ekki.

Lokastaðan í deildinni er því þessi: sjöunda sæti, 63 stig (23 stigum minna en í fyrra), ellefu deildarleikir sem liðið náði ekki að skora mark í, nítján tapleikir í öllum keppnum, rétt skríðum inn í Evrópudeildina.

Með öðrum orðum, algjört hrun. Ekki bara hrun miðað við þær stjörnuháu væntingar sem við höfðum til liðsins á þessari leiktíð heldur einnig algjört hrun frá árangri liðsins á síðustu leiktíð.

Við stuðningsmennirnir vorum reyndar frekar fljót að átta okkur á að ekki væri allt eins og sýndist í haust. Strax í september voru menn byrjaðir að kryfja tímabilið, þá þegar var orðið ljóst að liðið myndi ekki berjast um titilinn og menn hafa síðan þá rökrætt og rifist um það hverju sætir. Þannig að það er ekki eins og árangurinn komi okkur á óvart núna í maí 2010, en þetta er engu að síður óþægilega nöturleg niðurstaða á þessu tímabili.

Aldrei áður hefur maður borið jafn miklar vonir til liðsins og síðasta sumar. Aldrei aftur, er rétt að bæta við þá staðreynd. Þetta lið fær aldrei að plata okkur svona aftur.

Hvað er þá framundan? Eftir stendur félag, klúbbur, knattspyrnulið sem þarfnast algjörrar yfirhalningar. Frá toppi til táar. Ekki dugir að skipta um skó ef fötin eru enn götótt, allt verður að breytast. Það mun taka tíma, það mun vera sársaukafullt og sviptingarnar munu eflaust verða miklar. Við höfum allt sumarið, og mögulega enn lengri tíma en það, til að fylgjast með sótthreinsuninni.

Við verðskuldum betri eigendur en mennina sem lofuðu öllu fögru fyrir þremur árum og hafa nú afhjúpað sig sem peningamenn sem gæti vart verið meira sama um stuðningsmenn eða árangur liðsins inná knattspyrnuvellinum.

Við verðskuldum betri framkvæmdarstjóra en þann sem hefur eytt síðustu níu mánuðunum í að berja höfðinu við sama steininn, neita að breyta sínum aðferðum og spila pólitík með framtíð sína og liðsins.

Við verðskuldum betri leiðtoga en þá mýmörgu landsliðsfyrirliða og lykilmenn sem hafa meira og minna allir horfið af ýmsum ástæðum og á allt of löngum köflum í vetur. Jafnvel þótt allt annað sé í ólagi hefur pirringur, áhugaleysi og hugleysi sumra þessara gungna verið með öllu óþolandi. Pepe Reina, ég er ekki að tala um þig.

Við verðskuldum breiðari leikmannahóp hjá liði sem hefur verið fastagestur í hópi efstu liða og Meistaradeildarliða síðustu árin. Við erum með nokkra unga og efnilega leikmenn sem verðskulda betra umhverfi til að slíta af sér barnskóna en það sem þeim hefur verið boðið upp á í vetur.

Við verðskuldum jákvæðara umhverfi og bjartari framtíð fyrir þetta félag. Við verðskuldum að geta horft fram á veginn og lofað sjálfum okkur að við munum aldrei þurfa að horfa upp á jafn ömurlegt tímabil og það sem nú er lokið, lofað sjálfum okkur að eigendur klúbbsins á næstu árum muni bera hag liðsins fyrir brjósti, lofað sjálfum okkur að við getum með sönnu treyst knattspyrnustjóranum, lofað sjálfum okkur að það sé í lagi að hlakka til þess að horfa á hetjurnar spila fótbolta, lofað sjálfum okkur að framtíðin sé björt.

Ekkert af þessu er raunhæft loforð í dag. Og við verðskuldum einfaldlega betur.

Tímabilið 2009-10 er dautt. Það lengi lifi.

1. Chelsea – 38 leiknir – 86 stig
2. ManU – 38 – 85 stig
3. Arsenal – 38 – 75 stig
4. Tottenham – 38 – 70 stig
5. Man City – 38 – 67 stig
6. Aston Villa – 38 – 64 stig
7. Liverpool – 38 – 63 stig.

Liðið gegn Hull

Posted on by
Reina

Mascherano – Carra – Kyrgiakos – Agger

Lucas – Gerrard
El Zhar – Aquilani – Babel
Kuyt

**BEKKUR:** Cavalieri, Ayala, Skrtel, Degen, Robinson, Pacheco, Ngog.

El Zhar byrjar, Masch og Agger í bakvörðum. Ungstirnið Jack Robinson á bekknum.

Ég get ekki beðið … eftir að þessi leikur klárist.

Hull á sunnudaginn

Posted on by

Á sunnudaginn er síðasti leikur tímabilsins, m.ö.o. þessari ótrúlegu hörmung er að ljúka eftir hreint fáránlega langa og stranga 9 mánuði þar sem góðu stundirnar voru í sögulegu lágmarki. Ef ég ætti að lýsa tímabilinu í myndum, sem segja oftast meira en mörg orð myndi ég í fljótu bragði gera það svona:

Af þessum hafa komið allt of margar fréttir

Ég held að allir okkar leikmenn hafi meiðst einu sinni eða oftar

Örlítið hefur verið fjallað um Benitez þó allir hafi auðvitað verið hjartanlega sammála um hann (Klukkkar er 15:38 þarna)

Svona var stemmingin í klúbbnum mest allt þetta tímabil

Og síðan auðvitað það atvik sem fullkomlega súmmar upp tímabilið sem er loksins loksins að ljúka.

Þannig að ef þið leggið þetta saman við það að við höfum að akkurat ekki nokkrum sköpuðum hlut að keppa, erum dottnir fyrir löngu úr flestum keppnum og það er gríðarlega gott veður á Sellfossi núna þá fáið þið út hvað ég er spenntur fyrir Hull leiknum á sunnudaginn!

En svona til að klára formlegheitin þá er auðvitað ekkert annað í stöðunni en að klára þetta mót með sæmd, þó ekki væri nema bara fyrir okkur áhorfendur. Liðið verður líklega svipað og í undanförnum leikjum:

Reina

Mascherano – Kyrgiakos – Carragher – Agger

Lucas – Gerrard
Maxi – Aquilani – Babel
Kuyt

Andstæðingarnir eru því miður fallnir og verður smá eftirsjá að Hull City úr deildinni. Bæði þar sem ég hélt smá með þessu liði þegar það var í næst efstu deild síðast en þó aðallega vegna þess að í þeirra herbúðum er uppáhaldsleikmaðurinn minn á Englandi, auðvitað þessi hér:

Ég hef séð þessa klippu eflaust hátt í 100 sinnum og hlæ ennþá að þessu.

Spá: Ég held að við tökum þetta solid 0-3 og fögnum líklega öll með tölu að þessari eyðimerkugöngu sé lokið.

Aðal spenningurinn er fyrir því hvað gerist eftir mót, enda held ég að blaðurskjóðan Gróa á Leiti sé þegar farin að leita að leiguíbúð í Liverpool.

Sjálfur ætla ég allavega að reyna að vera bjartsýnn eftir þetta tímabil og miða við að næsta bara getur eiginlega ekki verið verra.

6 dagar í Liverpoolborg

Posted on by

Ég skellti mér til Liverpool fyrir rúmri viku síðan og varði þar 6 dögum. Ekki þarf að fara nánar út í gengi liðsins í þeim tveim leikjum sem fóru fram á þeim tíma, það vita allir hvernig þeir voru og fóru. Að vanda þegar maður skellir sér á svæðið þá hittir maður mikið af stuðningsmönnum liðsins, margir af þeim eru og hafa verið, season tickets holders í hinni frægu Kop stúku. Þrátt fyrir vonbrigði á vellinum, þá var ferðin sem slík frábær og alveg ótrúlega gaman að rabba við fólkið og heyra skoðanir þeirra.

Það er alveg óhætt að segja að skoðanir voru skiptar á málefnum félagsins, en skoðanir voru þó ekki skiptar um einn hlut. Eigendamálin voru efst á baugi nánast allra sem maður ræddi við og menn sammála um að breytingar á eignarhaldi liðsins væru mikilvægastar öllu. Menn eru vægast sagt reiðir og ekki einungis reiðir út í sjálfa eigendurna heldur líka stjórn félagsins og nafn Purslow kom ansi hreint oft upp í umræðuna og það á alls ekki jákvæðan hátt. Það var líklegast það sem kom mér mest á óvart, því sá gaur hafði komið mér bara nokkuð vel fyrir sjónir. Þrátt fyrir þá miklu undirliggjandi reiði sem ríkti í garð eigendanna og stjórnenda félagsins, þá breytti það engu þegar kom að upphitun og stemmningunni fyrir og á leiknum gegn Atlético Madrid, hún kom beint frá hjartanu.

Einhugurinn var samt ekki hinn sami þegar kom að upphituninni á Park fyrir leikinn gegn Chelsea. Flestir á svæðinu voru reyndar á leiðinni inn á völlinn til að styðja sitt rauða lið, en það voru þó nokkrir sem sögðu að tímabilið væri hvort eð er “fucked” þannig að þeir vildu hreinlega tapa leiknum til að koma í veg fyrir að þessir (ritskoðað) í næstu borg myndu vinna titilinn. Maður skildi alveg sjónarmið þeirra fyrir leikinn, en þegar inn á leikvanginn var komið, þá gat ég ekki fyrir mitt litla líf hugsað um neitt annað en að styðja þá rauðu og var hundsvekktur með tapið gegn þeim bláu.

Eftir leik fóru leikmenn hringinn til að þakka stuðningsmönnum fyrir tímabilið. Það er ávallt skemmtileg stund, þó svo að hún sé nú skemmtilegri eftir sigurleiki. Það sem var þó stórkostlegt (og ég veit ekki hvort það sást í sjónvarpinu) var þegar strákurinn hans Carragher labbaði inn á völlinn með pabba sínum og kom fljótlega að Chelsea stuðningsmönnunum. Það heyrðist hátt í þeim, enda komnir í prime stöðu gagnvart titlinum. Guttinn var nú ekki á því að láta þetta ganga yfir sig og setti höndina á loft, greinilega hrópaði vel valin orð í áttina að þeim og gaf þeim ýmsar bendingar beint frá hjartanu. Kallinn pabbi hans þurfti að rífa hann tilbaka og biðja hann að hafa sig hægan. Þetta kveikti heldur betur í stuðningsmönnum beggja liða í Anfield Road End stúkunni. Guttinn greinilega með gen hans pabba síns, um það verður ekki rifist. Það vakti einnig athygli heimamanna að Stevie G var einn að labba þennan hring, ekki með dætur sínar með og voru menn fljótt komnir á flug með ástæður þess.

En þá að “vinsælasta” umræðuefninu á Kop.is þetta tímabilið, Rafael Benítez. Nafn hans var sungið mikið bæði fyrir og á leiknum gegn Atlético. Stemmningin á Chelsea leiknum var mun minni, en engu að síður var nafn hans sungið. Ég hreinlega hélt að það væri minni stuðningur við kallinn þarna úti, allavega á meðal þessara hörðustu stuðningsmanna liðsins sem ég ræddi við. Það voru jú að sjálfsögðu skiptar skoðanir og sumir vildu bara að kallinn hyrfi á braut hið fyrsta. Það var þó mikill minnihluti. Flestir voru á því að vandamál félagsins lægju annars staðar og það myndi ekki bæta ástandið að losa sig við hann eftir þetta skíta tímabil sem er að klárast. Þeir sem vildu að hann færi núna voru þó engan veginn með einhverja heift í hans garð, en hreinlega töldu að hann gæti ekki tekið liðið lengra. Þeir sem vildu ekki heyra á það minnst að hann færi vildu meina að eitt mjög slakt tímabil ætti ekki að vera nóg til að hann væri látinn fara og við fengjum aldrei betri mann í hans stað eins og staðan er í dag.

Ég ræddi aðeins þessi stjóramál líka við Guðlaug Victor, sem æfir á Melwood með varaliðinu. Hann sagði að það hefði orðið breyting hjá Rafa í vetur, hann væri orðið minna á æfingasvæðinu sjálfu á meðan æfingar færu fram, væri meira inni á skrifstofu og léti þjálfarateymið um sjálfar æfingarnar. Sammy Lee stjórnar æfingunum að vanda, skemmtilegur kall, en grjótharður líka. Menn geta eflaust lesið hvað sem er út úr þessu, hver eftir sínu höfði, jákvætt eða neikvætt.

Persónulega hef ég undanfarið verið c.a. 40/60 í þessu. Þ.e. 40% af mér vilja að Rafa fari og 60% vilja halda honum. Ég er hreinlega svo langt því frá viss um að þó kallinn færi, þá værum við í eitthvað betri málum. En eins og aðrir, þá er ekkert hægt að vera viss um hvað gerist sama á hvorn veginn sem þetta fer. Ég vil til að mynda ekki sjá Jose Mourinho nálægt þessu félagi (ekki það að ég telji það nokkurn séns að hann kæmi til liðsins eins og ástandið er í dag). Ég ætti í svaðalegum erfiðleikum með að höndla hrokann, virðingarskortinn og ego-ismann sem fylgir þeim manni. En eitt er víst, ég mun styðja Liverpool fram í rauðan dauðann, hvort sem Rafa fer eður ei, hvort sem Jose kemur eður ei, hvort aðal stjarna liðsins í utandeildinni eftir 8 ár heiti Blood Wanker, ég mun styðja liðið.

Því miður þá er klúbburinn í vondu standi í dag og því miður sér ekki fyrir endan á því. Ég held að það skipti litlu máli hver framkvæmdastjórinn er, við verðum áfram í vondum málum nema lagað sé til í eigendamálunum. Ég hræðist líka brotthvarf okkar bestu manna, hræðist það meira ef Rafa fer heldur en ef hann yrði áfram. Allar okkar stærstu stjörnur skrifuðu undir nýja langtíma samninga um leið og Rafa fyrir ári síðan, og flestir þeirra voru ekki að kynnast honum fyrst þá, þeir vissu nákvæmlega fyrir hvað hann stóð og hvernig hann var.

Niðurstaðan í þessari langloku? Ég held að eftir helgina verðum við stjóralausir. Ég held að Rafa gefist endanlega upp á ástandinu og það verði tilkynnt eftir helgina. Ég mun ekki fagna því, ég veit að það eru margir hér á Íslandi sem munu fagna sem enginn sé morgundagurinn, en ég vona þó heitt og innilega að við getum fagnað saman því sem skiptir máli mjög fljótlega, öll sem eitt, þ.e. sigrum okkar liðs á fótboltavellinum.

Fimmtudagsfréttir

Posted on by

Það er svei mér eins og við séum búnir að spila alla okkar leiki, enginn talar um viðureignina við Hull heldur snýst umræðan enn og aftur bara um sölu á klúbbnum og stöðu Rafa.

Rafa virðist vera að heimta að staðið verði við loforð um að öll innkoma fyrir leikmenn renni beint til leikmannakaupa, ofan á þá upphæð sem félagið hafði tekið frá til þeirra (talað um að það hafi verið 15 milljónir punda í sumar). Ef að hann fái skriflegt loforð þar um muni hann vera áfram.

Hin fréttin er svo enn ein gleðisprengjan frá eigendunum þar sem Tom Hicks segist reikna með að það taki 18 mánuði að selja klúbbinn, um leið og hann viðurkennir alveg að liðið sé alls ekki “hans líf” eins og hjá mörgum öðrum eigendum.

Ég fékk velgju í munninn. Eigendum sem er nokk sama um klúbbinn og Chelseamaður formaður. Þetta bull í eigendamálum félagsins er að verða einn ljótasti bletturinn á sögu þess, auðvitað utan harmleikjanna.

En væntanlega vitum við meira eftir daginn…….

Eru Chelsea að bjóða 70m í Torres?

Posted on by

So it begins. Daily Mail segir frá því í dag að Chelsea ætli sér að reyna að „stelast fram fyrir“ Manchester City í kapphlaupinu um Fernando Torres og hafi þegar sett sig í samband við rétta aðila með það fyrir augum að bjóða 70m punda í kappann.

“Amid the chaos at Anfield, fears have already been expressed that Torres, who joined from Atletico Madrid for around £20m in 2007, will leave Liverpool this summer.

It was only last year that he made a commitment to the Merseysiders by signing a new four-year contract worth £110,000-a-week.

But the Liverpool landscape has since changed significantly, with under-fire manager Rafa Benitez now on the verge of leaving for Juventus, yet more uncertainty over the future ownership of the club, and the team’s failure to qualify for next season’s Champions League hanging over Anfield.”

Sko, við flokkum þessa grein undir slúður að svo stöddu og þegar ég les í gegnum hana finnst mér nokkuð ljóst að verið er að fylla upp í ansi margar eyður til að komast að niðurstöðu sem er efni í safaríka frétt. Í fyrsta lagi þykist blaðamaðurinn hafa séð á líkamstjáningu Torres er hann rölti heiðurshringinn um Anfield sl. sunnudag að hann sé reiðubúinn að yfirgefa liðið. Ekki beint rannsóknarblaðamennska þar á ferðinni.

Í öðru lagi gerir greinin nánast ráð fyrir því að Rafa fari, og í þriðja lagi gerir greinin nánast ráð fyrir því að framtíð Torres hjá Liverpool ljúki sjálfkrafa um leið og framtíð Rafa lýkur, þrátt fyrir að fregnir þess eðlis hafi í besta falli verið mjög tvíbendis.

Engu að síður, þótt þetta sé pjúra slúður og algjörar getgátur, er vert að benda mönnum á að brynja sig upp fyrir komandi sumar því þessar slúðursögur eiga bara eftir að ágerast á meðan eigenda- og þjálfaramálin eru í upplausn. Það eru margir gómsætir bitar í þessu Liverpool-liði og þeirra verður allra freistað í kringum og/eða eftir HM ef óvissuskýin verða þá enn yfir félaginu.

Það versta sem við gætum gert í dag er að taka Fernando Torres sem gefnum hlut. Hann er drengur góður og hefur sýnt að hann hefur frábært hugarfar og að hann er Liverpool-maður, en hann var ekki uppalinn, á engin sýnileg tengsl við liðið eða svæðið fyrir utan samninginn sinn og því er eðlilegt að spyrja sig hvort hann vilji ekki bara fara frekar en að hanga mikið lengur með liði sem er í frjálsu falli.

Ég myndi ráðleggja mönnum að taka svona fréttir ekki alvarlega að svo stöddu en ef langt líður á sumarið og HM klárast áður en búið er að greiða úr stærstu flækjunum hjá félaginu skulu menn alveg fara að gera sig klára fyrir fjöldaflótta margra bestu leikmanna liðsins í júlí og ágúst. Það eru takmörk fyrir því hvað heimsklassaleikmenn láta bjóða sér.

Uppgjör 2010: Leikmenn

Posted on by

Þótt það sé einn leikur eftir af tímabilinu eru stuðningsmenn Liverpool þegar farnir að klóra sig til blóðs í kollinum við það að reyna að komast til botns í þessu liði. Við hér á kop.is erum þar engin undantekning og munum á næstu dögum og vikum reyna að finna einhvern miðjupunkt í allri hringavitleysunni.

Við ætlum að byrja strax og taka fyrir leikmenn liðsins veturinn 2009-10, enda ljóst að frammistaða manna gegn Hull City um næstu helgi mun ekki hafa nein áhrif á mat okkar á frammistöðu þeirra heilt yfir í rauðu treyjunni.

Ég lagði einfalda spurningu fyrir sjálfan mig og aðra penna kop.is um helgina: burtséð frá fjármálum, þjálfara- og eigendamálum eða öðrum getgátum um framtíð einstakra leikmanna, mynduð þið vilja sjá þessa leikmenn í treyju Liverpool FC næstu leiktíð? Við þessu fengu menn eingöngu að svara já eða nei og svo gerði ég svörin upp þegar þau lágu fyrir.

Áður en ég birti listann er rétt að taka fram að við tókum ekki alla leikmenn liðsins fyrir í þetta skipti. Ungir leikmenn á borð við Ayala, Kelly og Pacheco voru ekki hafðir með því þeir eru enn að stíga sín fyrstu skref með aðalliðinu og verða vafalítið áfram á næstu leiktíð, auk þess sem það er allt of snemmt að dæma þá.

Að þeim frátöldum var því eftir 24 manna hópur sem talist getur aðalliðshópur Liverpool í dag. Aðeins einn þessara manna er á láni að svo stöddu (Jay Spearing) en þar sem hann er kominn vel yfir tvítugt fannst okkur rétt að hafa hann með.

Hér er svo listinn og sú einkunn sem hver leikmaður fékk hjá hópnum. Fái leikmaður einkunnina 6/6 þýðir það að við kusum allir að hafa hann áfram, fái leikmaður einkunnina 0/6 þýðir það að við viljum allir losna við hann.

PEPE REINA – 6/6
Þarf ekkert að orðalengja þetta, Pepe er einn besti markvörður heims og við erum heppin að hafa hann í okkar liði.

DIEGO CAVALIERI – 5/6
Við erum almennt sammála um að hann sé af þeim gæðum sem varaskeifa fyrir Pepe þarf að vera, enda fást ekki mikið betri markverðir en Diego til að sitja á tréverkinu nær allan veturinn.

JAMIE CARRAGHER – 6/6
Maðurinn er goðsögn og þótt hann sé orðinn 32ja ára teljum við að hann hafi klárlega áfram hlutverk í liðinu.

DANIEL AGGER – 6/6
Besti miðvörður liðsins í dag. Ómissandi.

MARTIN SKRTEL – 4/6
Hefur dalað aðeins í áliti eftir veturinn og því erum við ekki alveg sannfærðir um framtíð hans í liðinu, þótt meirihlutinn styðji hann enn.

SOTIRIOS KYRGIAKOS – 5/6
Að missa Sami Hyypiä var mikil og vanmetin blóðtaka fyrir liðið í vetur, en úr því að svo fór gátum við ekki verið mikið heppnari með baráttuhund sem fjórða kost í miðvörðinn.

EMILIANO INSÚA – 6/6
Það hafa einhverjir spjallarar haldið því fram á síðunni að við þurfum betri bakvörð en Insúa en við á kop.is erum einróma sammála um að hann sé framtíð vinstri bakvarðastöðunnar hjá okkur.

FABIO AURELIO – 1/6
Góður leikmaður en hans tími hjá félaginu er búinn. Getum ekki treyst á að hann haldi heilsu og þurfum heilbrigðari valkost af sömu eða meiri gæðum til að skiptast á með Insúa um stöðuna.

GLEN JOHNSON – 6/6
Fyrsta tímabil hans lofar góðu, þótt hann geti enn bætt sig. Lykilmaður í uppbyggingunni sem er framundan.

PHILIPP DEGEN – 0/6
Fyrsta núllið lítur hér dagsins ljós. Ég trúi ekki að við höfum borgað þessum gæja laun í tvö ár. Engan veginn nógu góður fyrir Liverpool.

JAVIER MASCHERANO – 6/6
Einn þeirra sem þarf að gera betur en hann sýndi í vetur. Engu að síður máttarstólpi í liði okkar og einn sá besti í heiminum í sinni stöðu.

LUCAS LEIVA – 5/6
Ég veit að þetta verður umdeild niðurstaða hjá okkur en klár meirihluti liðsins vill sjá Lucas áfram hjá liðinu. Hann hefur axlað mikla ábyrgð í vetur og verið sívaxandi þrátt fyrir einhverja ósanngjörnustu gagnrýni síðari ára. Við viljum hafa hann áfram en þó ekki í jafn áhrifamikilli stöðu og í vetur, enda hefur hann varla misst úr leik og borið allt of þunga byrði vegna lélegrar frammistöðu reyndari manna í kringum sig.

DAMIEN PLESSIS – 0/6
Annað núllið lítur hér dagsins ljós. Rafa virðist ekki treysta honum, menn vilja ekki fá hann að láni og hann kemst ekki á bekkinn. Greinilega ekki nógu góður.

JAY SPEARING – 2/6
Meirihlutinn er reiðubúinn að láta Spearing fara en hluti af okkur vill ennþá gefa honum séns og vonar að hann fari loksins að flytja góðar frammistöður fyrir vara- og unglingaliðin með sér upp í aðalliðið. Fær séns hjá okkur en það er sá síðasti.

STEVEN GERRARD – 6/6
Gerrard, eins og Mascherano, er einn besti miðjumaður heims og auðvitað viljum við hafa hann áfram. Hann þarf þó, eins og Mascherano, að girða sig í brók enda tímabilið 2009-10 búið að vera langt undir þeim staðli sem hann hafði sett sjálfum sér áður.

ALBERTO AQUILANI – 6/6
Hann þurfti greinilega fyrsta tímabilið til að komast til fullrar heilsu og venjast enskri knattspyrnu, en frammistaða hans í síðustu leikjum tímabilsins benda til þess að hann sé núna kominn á sama hraða og keppinautarnir. Það var eftir á að hyggja algjört klúður fyrir tímabilið 2009-10 að kaupa Aquilani og ætla honum að fylla skarð Xabi Alonso strax en hvað tímabilið 2010-11 varðar erum við hæstánægðir með að hann sé Liverpool-leikmaður.

MAXI RODRIGUEZ – 6/6
Styrkti liðið mikið á vormánuðunum og mun verða lykilmaður á næstu leiktíð þar sem við búumst við að hann eigni sér hægri vængstöðuna.

RYAN BABEL – 3/6
Helmingur okkar telur að Ryan Babel hafi hlutverk að spila í framtíðinni fyrir Liverpool, en þá í veigaminni rullu en undanfarin tímabil enda hefur hann sýnt að það er erfitt að ætlast til að hann framleiði toppleiki í hverri viku. Hinum helmingnum finnst Babel hafa fengið mýmörg tækifæri til að sanna sig og það sé kominn tími á að hann víki fyrir nýju blóði. Fari svo að hann verði kyrr í sumar er ljóst að hann er á síðasta séns á næstu leiktíð.

YOSSI BENAYOUN – 5/6
Rétt eins og með Babel er meirihluti okkar ánægður með veru Benayoun í liðinu. Hann er þrítugur í ár og reynsla hans og leiðtogahæfni gætu reynst okkur drjúg af bekknum á næsta vetri.

ALBERT RIERA – 0/6
Ágætis leikmaður sem afhjúpaði sjálfan sig sem bölvaðan vitleysing á þessu ári. Engan veginn með það hugarfar sem liðið þarf. Burt með hann.

DIRK KUYT – 5/6
Ef Maxi eignar sér hægri vængstöðuna á næstu leiktíð er spurning hvað verður um Kuyt en stór meirihluti okkar er sammála um að hann hefur samt hlutverk hjá liðinu, hvort sem það sé sem byrjunarliðsmaður eða hreinlega varaskeifa fyrir Maxi, Torres og (vonandi) annan framherja.

NABIL EL ZHAR – 0/6
Fjórða núllið. Strákurinn hefur verið óheppinn með meiðsli en er að verða 24ra ára og fyrir utan eitt þrumuskot gegn Cardiff í deildarbikarnum fyrir þremur árum hefur hann ekki sýnt neitt sem bendir til að hann sé nógu góður fyrir topplið í Englandi.

FERNANDO TORRES – 6/6
Við erum einróma sammála um að með Torres í liðinu er það til alls líklegt á næstu leiktíð. Við erum líka einróma sammála um að án Torres mun þetta lið hrynja. Það er algjört möst að halda honum ánægðum í sumar, og halda honum svo heilum á næstu leiktíð.

DAVID NGOG – 5/6
Ngog hefur, eins og Insúa og Lucas, axlað allt of mikla byrði á löngum köflum í vetur vegna meiðsla og/eða getuleysis reyndari manna í kringum sig. Hann hefur staðið sig vel í þessu mótlæti og á sér klárlega framtíð með liðinu. Við erum þó einróma sammála um að það er ekki nógu gott að hann sé eina varaskeifa liðsins í fremstu víglínu.

Þannig er listinn. Samkvæmt okkur á kop.is eru þeir Reina, Carra, Agger, Insúa, Johnson, Mascherano, Gerrard, Aquilani, Maxi og Torres ómissandi og munu mynda grunninn að mögulegri velgengni liðsins á næstu leiktíð. Eins erum við sammála um að þeir Aurelio, Degen, Plessis, Riera og El Zhar þurfa að víkja fyrstir manna fyrir nýjum leikmönnum í sumar.

Þetta er okkar mat. Hvað finnst ykkur?

Yossi óviss um framtíðina

Posted on by

Yossi Benayoun tjáði sig aðeins við fjölmiðla eftir leikinn í gær og ummæli hans eru að mínu mati nokkuð lýsandi fyrir ástandið innan félagsins í dag.

Aðspurður um framtíð sína hjá Liverpool sagði Yossi:

“It’s very difficult to speak now about next season. We don’t know what changes there will be in the players, the staff so I think it’s too early to speak.

I don’t know personally even if I will be here or I will not be here. A lot of things can happen, so we have to wait and see.”

En hann sagði líka einnig:

“If it depended on me, I would stay here and retire in Liverpool. The fans are the best in the world but it depends on a lot of things. It will be very clear soon.”

Sem sagt, Yossi vill ekki yfirgefa félagið. Hann elskar Liverpool, dýrkar aðdáendurna og myndi eyða öllum ferli sínum hér ef hann fengi að ráða. Hann hins vegar veit ekkert hvort það skipti yfir höfuð máli að hann vilji vera áfram.

Þetta er Liverpool FC í dag. Það veit enginn neitt. Það er erfitt að ræða framtíð liðsins, félagsins, framkvæmdarstjórans eða einstakra leikmanna því við einfaldlega vitum ekkert hvað verður.

Það er sannarlega ömurlegt ástand. Hluti af mér myndi frekar vilja fá slæmar fréttir heldur en að hanga svona í óvissu, en eins og stendur getur maður lítið annað en beðið og vonað. Það er einn leikur eftir, algjörlega þýðingarlaus æfingaleikur við Hull City um næstu helgi, og svo ættu hjólin að fara að snúast (vonandi) nokkuð hratt. Þangað til bíðum við enn um sinn.

Liverpool 0 – Chelsea 2

Posted on by

Hæ öll.

Var búinn að skrifa mikinn lestur og pústa út, en ákvað að bíða aðeins með hann. Ætla að setja hann inn hér á morgun þegar maður veit hvað er í gangi í baklandi klúbbsins okkar. Ég held að þar brenni eldar stafnanna á milli.

Lið dagsins:

Reina

Mascherano – Carragher – Kyrgiakos – Agger

Gerrard – Lucas
Maxi – Aquilani – Benayoun
Kuyt

Bekkur: Cavalieri, Ayala, Degen, El Zhar, Babel, Pacheco, Ngog

Sennilega það sterkasta sem við gátum stillt upp sem segir mikið um veturinn.

Og leikurinn var í samræmi við veturinn. Byrjuðum fínt og Aquilani allt í öllu. Svo fór loftið úr mannskapnum og á 33.mínútu gaf Steven Gerrard vini allra vinna, Didier Drogba fyrsta markið. Ekki snefill af mér ímyndar sér að hann hafi gert þetta viljandi, en einfaldleikinn er sá að mínu mati er Steven Gerrard ekki nægilega vakandi varnarlega til að leysa stöðu miðjumanns. Hef sagt það lengi og held því áfram. Miðjan er ekki hans staður gegn liðum sem þarf að verjast gegn.

Lampard fékk færi og jafnvel mátti gefa Lucas rautt og Chelsea víti en staðan í hálfleik 0-1.

Liverpool kom andvana til leiks eftir hlé og Lampard kláraði leikinn fljótlega. Það sem eftir lifði hélt Reina markatölunni í skefjum en örlítið lífsmark kom í leik liðsins undir lokin. Reina var skástur.

Þreyttur og þungur Rafa, steindauður Anfield í síðasta heimaleik og gremjan svo augljós að maður fann lyktina af henni út úr skjánum. Það er margt og mikið að, en það ætla ég að fá að skrifa hér síðar.

Munum eitt, það er okkar eina hlutverk að styðja liðið okkar. Enginn í kringum þetta lið er að gera annað en að reyna að vinna úr þeirri stöðu sem við erum í, menn einfaldlega ráða ekki við vandann.

You’ll never walk alone!!!

Liðið gegn Chelsea:

Posted on by

Liðið gegn Chelsea er komið og það lítur svona út:

Reina

Mascherano – Carragher – Kyrgiakos – Agger

Gerrard – Lucas
Maxi – Aquilani – Benayoun
Kuyt

Bekkur: Cavalieri, Ayala, Degen, El Zhar, Babel, Pacheco, Ngog.

Er þetta nógu sterkt lið til að vinna Chelsea í dag? Leyfi mér að efast um það, en held þó alltaf í vonina. Maður veit ekki hverjir af þessu sæmilega sterka byrjunarliði okkar eru 100% heilir í dag (Kuyt, Yossi og Masch fengu víst allir verkjatöflur eftir fimmtudaginn, Johnson er meiddur) og hverjir af þeim hafa orku í að spila þennan leik á fullu (Aquilani, Gerrard, ég er aðallega að horfa á ykkur). Eins er ekki beint dýrindis úrvalið á varamannabekknum.

Hvað um það – Það getur allt gerst á Anfield og mig grunar að það sé dramatískur dagur í Úrvalsdeildinni framundan.

Áfram Liverpool! YNWA!

Chelsea mætir á Anfield á morgun.

Posted on by

Á morgun mætir Chelsea á Anfield og má segja að þetta geti orðið úrslitaleikurinn í deildinni en eins og staðan er þá eru það ekki við sem eigum möguleika á titlinum heldur Chelsea eða Manchester United. Sigrum við Chelsea þá þarf Man U eingöngu að klára sína leiki á meðan ef við töpum þá hefur Chelsea pálmann í höndunum. Mikil umræða er um þetta í netheimunum og m.a. hefur stjórinn hjá Man U sagt að þetta sé spurning um heiður Liverpool og hann treysti á stoltið okkar … sjáum til. En ég ætla ekki að fara meira út á þessari brautir né ræða ítarlega um gengi okkar í vetur (nóg er búið að gera það undanfarið á þessari síðu, í heitu pottunum og á Serrano).

Kíkjum fyrst á þá leikmenn sem við höfum klára í þennan leik og hvernig Rafa mun hugsanlega stilla liðinu upp:

Reina

Johnson – Carra – Kyrgiakos – Agger

Masherano – Aquilani
Maxi – Gerrard – Benayoun
Kuyt

Bekkur: Cavalieri, Babel, Pacheco, Degen, Lucas, Ayala, Ngog.
(hverjir verða nákvæmlega á bekknum, þ.e. Pacheco eða Degen eða einhver annar ungur skiptir í raun ekki máli.

Ég tel næsta víst að Johnson muni verða færður í hægri bakvarðarstöðuna og hugsanlega Agger notaður í vinstri bakvörðinn líkt og gegn Burnley um daginn. Þessi æfing með Johnson í vinstri bakverðinum gekk ekki eftir gegn Atletico. Maxi kemur klárlega inní liðið og spurning hvort Benayoun verði inni á kostnað Babel á kantinum eða hvort Kuyt fari jafnvel á kantinn og Babel uppá topp … who knows? Bottom line-ið er að öllu máli skiptir að liðið sé tilbúið í stríð því hvort Man U eigi möguleika á að vinna titilinn eða Chelsea kemur okkur ekki við! Við viljum ávallt vinna öll lið sama hver staðan er og ef það er álíka líklega að við náum 4 sætinu í deildinni og að peningarnir skili sér allir frá Tortola þá er ennþá möguleiki!

Chelsea vann Stoke í sínum síðasta leik aðeins 7-0 á meðan Liverpool spilaði gegn Atletico á fimmtudaginn og vann 2-1. Í deildinni unnum við Burnley 4-0 í solid leik. Ég minni á að Liverpool hefur ekki tapað gegn Chelsea á Anfield á heimavelli síðan 2005 og í deildinni höfum við ekki tapað í 5 leikjum í röð.

Heilt yfir hefur tímabilið verið vont og lítið sem breytir því úr þessu en sigur á morgun gerir mikið fyrir særða Liverpool-stuðningsmenn og þess vegna trúi ég ekki öðru að hver sá sem spilar þennan leik í rauða búningnum verði 110% klár í stríð. Chelsea mun mæta með sitt sterkasta lið og ekki gefa pund eftir. Þeir geta í rauninni tryggt sér titillinn með sigri og munu klárlega ekki hata það að ná að setja vinstri höndina á bikarinn á Anfield: ÞAÐ MÁ EKKI GERAST! Þótt úrslit leiksins geti hjálpað öðru liði.

Ég skal svo sem viðurkenna að það er ekki margt sem gefur mér ástæðu til bjartsýni en á móti þá hef ég alltaf í hverjum einasta leik trú á því að Liverpool geti unnið. Svo einfalt er það.

ÁFRAM LIVERPOOL.