Monthly Archives: February 2010

Liverpool 2 Blackburn 1

Posted on by

Okkar menn tóku á móti Blackburn Rovers í Úrvalsdeildinni í dag og höfðu eftir mikinn baráttuleik að lokum **2-1 sigur** sem lyftir liðinu aftur upp í 6. sætið, stigi á eftir Tottenham og Man City (sem eiga leik til góða). Þetta var einfaldlega leikur sem varð að vinnast og sem betur fer hafðist það með herkjum að lokum.

Rafa Benítez gerði nokkrar breytingar á liði sínu í dag. Martin Skrtel er meiddur og Sotirios Kyrgiakos er í banni þannig að Jamie Carragher var færður aftur inn í miðja vörnina og Javier Mascherano tók bakvörðinn. Frammi kom Fernando Torres inn í liðið á nýjan leik sem og Maxi Rodriguez.

Liðið var sem hér segir:

Reina

Mascherano – Carragher – Agger – Aurelio

Maxi – Gerrard – Lucas – Benayoun

Kuyt – Torres

**BEKKUR:** Cavalieri, Ayala, Kelly, Insúa (inn f. Aurelio), Aquilani, Babel (inn f. Benayoun), Ngog (inn f. Torres).

Öll mörk leiksins komu í fyrri hálfleik. Okkar menn byrjuðu vel í sókninni og á 20. mínútu fékk **Gerrard** boltann á miðjum vellinum. Hann átti góðan þríhyrningssamleik við Kuyt sem sprengdi miðju Blackburn upp og þaðan gaf hann boltann á Benayoun sem lék inná teiginn og gaf svo aftur á Gerrard á vítapunktinum. Gerrard rak vinstri fótinn í boltann og missti hann frá sér … hárfínt innfyrir Samba í miðri vörn Blackburn þar sem Gerrard náði honum aftur og lagði hann vel yfir Robinson í markinu. Smá heppnisstimpill yfir þessu en engu að síður mjög vel spilað hjá liðinu og flott mark hjá Gerrard.

Eftir þetta virtist liðið ætla að kafsigla gestina en þó náðu þeir ekki að skora og á 40. mínútu fengu gestirnir jöfnunarmark á silfurfati. Boltinn barst inn í teig Liverpool þar sem Carragher var illa staðsettur og virtist varla vita hvað hann var að gera. Miðverðirnir okkar höfðu verið daprir fram að þessu og virtust ekki hafa hlutina á hreinu þarna og þetta kraðak endaði með því að Carragher datt aftur á bak, fékk boltann að hliðinni á sér og blakaði honum frá með hendinni. Óskiljanlega klaufalegt og réttilega dæmt víti sem **Keith Andrews** skoraði úr, þótt Pepe Reina hefði verið mjög nálægt því að verja vítið.

Adam var þó ekki lengi í paradís því fjórum mínútum síðar voru okkar menn aftur komnir yfir. Lucas Leiva átti þá frábæra sendingu af miðjum vellinum innfyrir á **Torres**. Ef Torres hefði verið í fullri leikæfingu hefði hann sennilega haft meiri snerpu til að stinga af með þennan bolta og skora en hann náði því ekki alveg og Blackburn-vörnin náði að pota boltanum frá honum og út til hægri … þar sem Maxi náði fyrstur í boltann, rúllaði honum beint fyrir á nærstöngina þar sem Torres skoraði auðveldlega. Staðan 2-1 í hálfleik og það urðu lokatölur leiksins.

Ég verð að minnast snögglega á eitt áður en ég fer í seinni hálfleikinn. Fabio Aurelio fór út af meiddur eftir rúmlega hálftíma eftir að hafa tekið sprett á eftir boltanum og að mínu mati kristallaðist ferill hans hjá Liverpool í því atviki. Þetta er virkilega góður leikmaður, hágæða bakvörður með fantagóðar spyrnur en Liverpool FC er í dag einfaldlega ekki í aðstöðu til að hafa dýra farþega eða meiðslahrúgur innan sinna raða. Mér skilst að samningur Aurelio sé búinn í sumar og ég myndi segja að það séu 100% líkur á að honum verði ekki boðinn nýr samningur. Við verðum að sjá hversu slæm þessi meiðsli hans eru en það getur vel verið að við höfum verið að horfa á hann í síðasta sinn í rauðu treyjunni í dag. Því miður.

Þá að seinni hálfleiknum. Hann var alls ekki góður. Blackburn-menn komu grimmir til leiks og voru grófir framan af og Alan Wiley, slappur dómari leiksins, verndaði okkar menn ekki nóg að mínu mati. Steven N’Zonzi tók Lucas í upphafi seinni hálfleiks og braut á honum og eftir að dómarinn hafði dæmt brotið greip hann með flötum lófa um andlit Lucasar og skellti honum í jörðina. Fyrir þetta fékk hann aðeins gult spjald og var tekinn út af stuttu seinna. Þá handlék Martin Olsson bakvörður þeirra boltann þegar Maxi var við það að sleppa upp kantinn aleinn og fékk gult spjald og aftur var hann tekinn út af því Sam Allardyce, stjóri Blackburn, sá greinilega að ungu strákarnir hans voru á leiðinni í sturtu ef hann ekki gerði eitthvað í málinu. Í stað Olsson kom svo inn Pascal Chimbonda sem hefði átt að fá strax gult spjald fyrir að toga Maxi niður áður en hann slapp inn í teiginn, og seint í leiknum átti hann að fá beint rautt spjald fyrir að sparka með tökkunum í magann á Maxi eftir að búið var að dæma brot á hann. Annar Blackburn-maðurinn sem átti að fá að fjúka í seinni hálfleik en enn og aftur gerði Wiley ekkert.

Ég veit ekki hvort það var út af þessari baráttu, eða út af stympingunum á milli El-Hadji Diouf og Gerrard (og síðar Diouf og alls Liverpool-liðsins) en okkar menn misstu taktinn allsvakalega í sókninni í síðari hálfleik og fyrir utan Maxi Rodriguez gerðist nánast ekkert af viti upp við teig andstæðinganna. Gerrard og Torres höfðu verið frábærir í fyrri hálfleik en voru áhorfendur að þeim seinni á meðan Benayoun komst aldrei í snertingu við leikinn. Það fór því svo að okkar menn hreinlega héngu á forystunni og máttu þakka Pepe Reina, sem varði allavega þrisvar frábærlega í góðum færum Blackburn-manna, fyrir að fara með þrjú stig af velli í dag.

**MAÐUR LEIKSINS:** Í hálfleik var ég á góðri leið með að sæma Gerrard að titlinum bara strax, svo góður var hann í fyrri hálfleik, en ég get ekki gefið honum nafnbótina þar sem hann var ekki með í síðari hálfleik. Torres byrjaði vel en þreyttist sýnilega þegar leið á leikinn. Ég ætla því að bregða út af vananum og deila nafnbótinni með þremur leikmönnum sem voru heilt yfir bestir okkar manna í dag:

**Javier Mascherano** barðist eins og ljón allan leikinn í stöðu sem hann er ekki vanur að spila og hélt þeirra hættulegasta manni, Morten Gamst-Pedersen, niðri. Hann er því maður leiksins.

**Maxi Rodriguez** byrjaði leikinn rólega en vann sig svo inn í hann og var með hættulegustu mönnum í fyrri hálfleik og yfirburðamaður hjá okkur í þeim seinni. Hann átti stoðsendingu í sigurmarkinu í dag og er því maður leiksins.

**Pepe Reina** varði frábærlega þegar þess þurfti með í dag og það er mjög einfalt í mínum huga að við hefðum ekki unnið leikinn í dag ef hann hefði ekki verið á milli stanganna. Hann er því maður leiksins.

Næsti leikur er á mánudag eftir rúma viku gegn Wigan á útivelli og jeminn, ég vona að Kyrgiakos verði klár í þann leik svo Carra geti farið aftur úr miðri vörninni. Það verður að segjast að það er engin tilviljun að liðið fór að halda hreinu í desember um leið og Carra var færður úr miðverðinum og það var engin tilviljun hvað vörnin var slök í dag. Carra er 32ja ára og það fer að koma að því að við spyrjum okkur hvort hann sé í fullri alvöru byrjunarliðsmaður hjá okkur. Á meðan Johnson er meiddur má hann spila bakvörðinn en ég vona innilega að Kyrgiakos verði við hlið Agger í miðverðinum í næsta leik.

Já, og svo getum við fagnað því að þurfa ekki að spila aftur við Diouf, Allardyce og félaga á þessari leiktíð. Innilega til hamingju með það.

Liðið gegn Blackburn

Posted on by

Gríðarlega spennandi lið í dag miðað við undanfarnar vikur:

Reina

Mascherano – Carragher – Agger – Aurelio

Gerrard – Lucas
Kuyt – Benayoun – Maxi
Torres

Bekkur: Cavalieri, Aquilani, Babel, Insua, Ngog, Kelly, Ayala.

Mascherano og Aurelio koma inn í bakverðina í stað Insúa og Skrtel sem er meiddur. Kyrgiakos er í banni og því fer Carragher á sinn stað í miðverðinum. Hefði alveg talið Kelly nógu góðan í þennan leik en kannski er hann ekki í formi.

Gerrard kemur svo niður á miðjuna geri ég ráð fyrir og verður þar með Lucas. Frábært að sjá Gerrard loksins fá að stjórna spilinu og vonandi að það heppnist. Fjarveru Aquilani okkar skil ég samt ekki alveg.

Babel dettur “óvænt” úr byrjunarliðinu og inn koma úthvíldur Kuyt, Benayoun sem ég tippa á að sé í holunni og að lokum Maxi. Allir þessir geta svo auðvitað skipt með sér hlutverkum.

Aðal fréttin er síðan að Fernando Torres er í byrjunarliðinu og ég þori alveg að veðja að hann verði tekin útaf snemma í seinni og á morgun komi frétt um að hann sé eitthvað “meiddur”.

Lýst vel á þetta

Blackburn á morgun

Posted on by

Ég verð að viðurkenna það að ég varð hálf svekktur á sínum tíma þegar ég frétti af því að big(mouth) Sam Allardyce hafi fengið vinnu á ný í Úrvalsdeildinni. Eftir að hinn Mótormunnurinn fór, þá hefur þessi kjáni komist í toppsætið á listanum yfir stjóra sem fara hvað mest í mínar fínustu taugar. Þetta er þétt skipaður listi og hreinlega talsvert afrek hjá Samma að komast upp fyrir menn eins og fröken Fergie, Gollum, Whininger og fleiri. En hvað um það, hann náði að gera lið Bolton að einu allra leiðinlegasta liði sem spilað hefur í Úrvalsdeildinni, og ekki jókst skemmtanagildið hjá Blackburn við komu hans. Það hafa margir gagnrýnt spilamennsku Liverpool undir stjórn Rafa Benítez, en Rafa telst til frægra skemmtikrafta við hliðina á big(mouth) Sam Allardyce. Babú benti mér á hvað var mest í umræðunni eftir leik liðanna í fyrra, og rifjast þá ennn betur fyrir mér af hverju big(mouth) er svona “hátt” skrifaður hjá mér. Sama gildir um elliæra Whiskeyþambarann við hinn endann á M62.

En hvað um það, leikur á morgun og spurning hvort menn séu ekki búnir að jafna sig almennilega á Rúmeníu ferðalaginu þar sem spilað var í kartöflugarði. Menn þurfa að vera klárir í slaginn, við verðum að nýta ÖLL tækifæri sem bjóðast okkur til að reyna að ná inn í þessa stórlega ofmetnu Meistaradeild Evrópu að ári (Europa League er til að mynda með miklu flottara logo). Við ættum að eiga tiltölulega þægilegt prógram framundan, allt þar til að við þurfum að fara yfir á Old Trafford seinnipartinn í mars. En það er bara engu að síður staðreynd að það er afskaplega lítið um auðvelda leiki þetta tímabilið, það virðast öll lið geta tapað fyrir öllum liðum í þessari deild. En þetta er á heimavelli og þar kemur bara eitt til greina, SIGUR.

Í liði mótherjanna er lítið um stjörnur og þeirra markahæsti leikmaður er David Dunn. Þeir hafa ekki verið að skora mikið af mörkum, en þeir hafa sett 29 kvikindi í þeim 27 leikjum sem þeir hafa spilað. Manni finnst Liverpool vera skora helst til lítið af mörkum í deildinni, sér í lagi þar sem Torres nokkur hefur lítið spilað, en okkar menn eru engu að síður búnir að setja 43 mörk í sínum 27 leikjum. Í liði mótherjanna er uppáhald allra knattspyrnustuðningsmanna, El-Hadji Diouf, sem við Liverpool stuðningsmenn ættum að kannast vel við. Ætli hann sé ekki stærsta ástæðan fyrir því að Gérard Houllier var látinn taka pokann sinn á sínum tíma, hann var allavega stór hluti af ástæðunni. Það eru ekki margir fyrrverandi leikmenn Liverpool sem “púað” er á þegar þeir koma aftur á Anfield, en Diouf er klárlega í þeim hópi. Ætli þessi hópur telji ekki c.a. tvo menn í dag.

En hvað um það, að okkar mönnum. Martin Skrtel meiddist í Rúmenínu og verður fjarverandi næstu vikurnar, einn inn, einn út. Það er víst farið að styttast í að Glen Johnson komi tilbaka og ég bara verð að viðurkenna það að ég get hreinlega ekki beðið eftir því, ég hlakka svona álíka mikið til endurkomu hans eins og með Torres. Ástæðan? Jú, augljós, ég bara hreinlega “meika ekki” að sjá Jamie Carragher í fleiri leikjum í bakvarðarstöðunni, bara hreinlega meika það ekki. Eins mikið og ég virði kappann og er ánægður með baráttu hans og hug, þá á hann bara að vera í miðverðinum og láta þessa hægri bakvarðarstöðu algjörlega í friði, heyrir þú það Rafa? Og jú, ég hef meira vit á akkúrat þessu heldur en þú.

Annars eru allir heilir og ég er í miklum vafa með það hvað Rafa muni gera varðandi Torres í þessum leik. Ég er farinn að hallast að því að hann byrji með hann inná og skipti honum þá bara snemma útaf. En mér skilst að Kyrgiakos sé búinn að taka út bannið sitt, þannig að ég reikna varnarlínu þar sem Insúa verður vinstra megin og Carra áfram hægra megin. Kelly kemur bara inn fyrir Skrtel, Carra í miðvörðinn og Agger við hlið hans. Ég býst við að Dirk komi inn á hægri kantinn, Babel á þeim vinstri og þeir Monster Masch og Aquilani inni á miðjunni. Stevie verður svo fyrir aftan Fernando. Já, djörf spá, en ég ætla engu að síður að spá þessu svona. Einu vafarnir í mínum huga eru þeir Aquilani inn fyrir Lucas og Babel inni í stað Maxi/Yossi/Riera. En sem betur fer þá eru það margir komnir tilbaka úr meiðslum að það er orðið þræl erfitt fyrir Rafa að velja liðið, sér í lagi þar sem Babel virðist vera loksins að grípa tækifæri þau sem hann fær.

Reina

Kelly – Carra – Agger – Insúa

Mascherano – Aquilani
Kuyt – Gerrard – Babel
Torres

Bekkurinn: Cavalieri, Degen, Aurelio, Lucas, Maxi, Benayoun og Ngog

Já, sterkt lið og sterkur bekkur. Ég hreinlega krefst þess það komi sigur í þessum leik, og ekki bara sigur, ég vil sjá góðan leik hjá okkar mönnum, eitthvað til að gleðja okkur stuðningsmenn. Vera svolítið frjóir í sóknarleiknum, sleppa dúllinu og taka þetta eins og við gerðum hér á svipuðum tíma fyrir ári síðan. Ég vil greddu, ég vil mörk, ég vil sjá tyggjóið hrökkva ofan í kokið á big(mouth) Sam vegna þess hve menn hans séu illa leiknir. Koma svo, make my day.

Kuyt og Babel

Posted on by

Til er ein tegund stuðningsmanns sem finnst Ryan Babel hafa allt sem prýða þarf góðan knattspyrnumann. Hann er fljótur, leikinn, með góð skot og getur tekið leikmenn á. Þessi tegund stuðningsmanns er sannfærð um að það sé alfarið Rafa Benítez að kenna að Babel hafi ekki enn blómstrað hjá Liverpool, að það verði að skrifast sem mistök hjá þjálfaranum að ná ekki að hlúa að hæfileikum Babel svo hann geti notið sín til fulls.

Þessi tegund stuðningsmanns vill oftar en ekki líka meina að Dirk Kuyt sé hvergi nærri nógu góður til að spila fyrir Liverpool, af því að hann er hægur, með léleg skot og litla knatttækni.

Svo er til önnur tegund stuðningsmanns sem vill meina að Babel hafi ekki nýtt þá sénsa sem honum hafa verið gefnir, sem vill meina að þrátt fyrir augljósa hæfileika virðist Babel ekki hafa rétta hugarfarið eða andlega styrkinn sem þarf til að ryðja sér rúms í stórliði. Þessi stuðningsmaður bendir jafnan á samanburð við Yossi Benayoun máli sínu til stuðnings, en sá maður byrjaði sem varaskeifa Babel hjá Liverpool en nýtti sénsana sína, á meðan Babel lét sína fara til spillis, svo að nú er hlutverkum þeirra nánast snúið við og Babel í raun varaskeifa fyrir Benayoun.

Þessi tegund stuðningsmanns vill oftar en ekki meina að Dirk Kuyt sé lykilmaður í liði Liverpool, því þrátt fyrir augljósa annmarka á leik hans sé leitun að leikmanni sem berst jafn mikið fyrir liðið, getur spilað jafn líkamlegan sóknarleik og hefur jafn góða taktíska vitund og Kuyt sýnir.

Annar vill að Babel sé alltaf í liðinu og Kuyt aldrei því Liverpool-liðið á að spila hraðan og spennandi fótbolta, og til þess þurfum við fljóta og leikna leikmenn. Hinn vill að Kuyt sé alltaf í liðinu og Babel ekki af því að Liverpool-liðið á að spila hraðan og spennandi fótbolta, og til þess þurfum við leikmenn sem geta pressað hátt uppi á velli og eru fljótir að hugsa.

Þessir tveir stuðningsmenn verða einfaldlega **ALDREI** sammála um Ryan Babel og Dirk Kuyt. Ég legg því til að umræðan um þessa leikmenn verði söltuð fram á vorið. Þeir eru báðir Liverpool-leikmenn og verða í það minnsta þangað til í sumar og það gagnast nákvæmlega engum að snúa allri umræðu á þessari síðu upp í Babel vs Kuyt umræðu.

Þetta gildir líka um Lucas Leiva.

Þetta er allavega mín uppástunga. Geymum þessa umræðu aðeins, hún er orðinn verulega þreytt.

Unirea 1 – Liverpool 3

Posted on by

Rúmenía. Land dýfaranna á knattspyrnuvellinum.

Rigning, liðónýtur völlur. Einhvern veginn sá maður svolítið klárt muninn á að vera ekki að spila í CL þetta vorið, en úr því sem komið er gerði maður þetta sér að góðu, settist við skjáinn og treysti á sigur!

Byrjunarliðið hans Rafa í kvöld var:

Reina

Carragher – Skrtel – Agger – Insua

Lucas – Mascherano
Benayoun – Gerrard – Babel

N´Gog

Á bekknum: Cavalieri – Kelly – Aquilani – Aurelio – Kuyt – Torres og Kyrgiakos.

Sterkt lið án vafa og engin ástæða til annars en að reikna með sigri. En JESÚS MINN, fyrstu 30 mínúturnar! Liðið virtist ekki vera í reimuðum skóm, sendingar rötuðu ekki á milli manna og Rúmenarnir fengu smátt og smátt sjálfstraust og voru þeir sem sóttu! Þeir ætluðu sér greinilega að liggja til baka og sækja hratt. Vörnin okkar virkaði úti á þekju og á 18.mínútu fengu Unirea-menn horn eftir sofandahátt varnarinnar uppúr fljóttekinni aukaspyrnu.

Upp úr henni kom fyrsta markið, langbesti maður heimaliðsins, Fernandes að nafni stökk aleinn upp í markteignum og skallaði boltann í netið óverjandi fyrir Reina. Vatnsgusa í andlit ef einhvern tíma hefur verið!!!

En okkar drengir voru ekki að ná takti og í raun jöfnuðum við upp úr fyrstu almennilegu sókninni okkar, eftir klafs í teig Unirea náðu þeir ekki að hreinsa boltann nema rétt út fyrir teig þar sem Javier Mascherano negldi hann í markið af 20 metra færi og fagnaði með því að kyssa merkið okkar fallega. Svei mér ef það var bara ekki hápunktur leiksins í kvöld, vonandi að Masch fari að skrifa undir langtímasamninginn sinn!

Ennþá höktum við samt, vorum stálheppnir að lenda ekki undir, fyrst var Insua nærri búinn að skora sjálfsmark eftir horn og svo varði Reina virkilega vel skot af löngu færi. Á 40.mínútu fengum við aukaspyrnu sem Gerrard sendi inní, boltinn fór af höfði varnarmanns til Ryan Babel sem lagði boltann glæsilega fyrir sig og dúndraði honum síðan í netið! Staðan orðin 1-2 og þannig var staðan í hálfleik.

Heimamenn fengu dauðafæri á 49.mínútu sem þeir nýttu ekki en þá kom góður kafli þar sem við t.d. fengum okkar fyrsta horn á 53.mínútu, þá hafði Unirea tekið átta slík! Á 56.mínútu kláraðist svo leikurinn. Ryan Babel sótti á fullri ferð á vörnina frá vinstri, sendi góða sendingu á Benayoun sem stakk sér inn í teiginn þar sem hann snerti boltann snyrtilega á Steven Gerrard sem þakkaði pent og dúndraði boltanum í markið úr teignum miðjum. 1-3 og Game Over!

Það sem eftir lifði leiks var ljóst að Liverpool féll aftur og slakaði á. Völlurinn bara þyngdist og smám saman fjaraði leikurinn út. Carragher karlinn var hvíldur á 60.mínútu eftir erfiðan leik hjá honum og við fengum að sjá Martin Kelly, stuttu síðar meiddist svo Skrtel og Kyrgiakos kom í hans stað þannig að gott var fyrir Kelly að fá mínútur ef kalla þarf hann til á sunnudaginn! Benayoun var svo hvíldur á 77.mínútu og Aurelio kláraði leikinn.

Hvort lið fékk eitt færi, Reina varði frábærlega á 86.mínútu af stuttu færi og Gerrard skaut á lokamínútunni en markmaður heimamanna varði vel. Lokatölur 1-3 og við sanngjarnt áfram eftir ferlega dapra byrjun á kvöldinu.

Liðið lék afar illa fyrstu 30, svo vel í 30 og svo bara klárað í “hlutlausum gír” gegn liði sem var upptekið af vörn lengst af þessara viðureigna tveggja. Rúmenskur fótbolti er ofboðslega litaður af leikaraskap og töfum og ég er feginn að þurfa ekki að horfa oft á lið þaðan spila fótbolta! Við vorum í kvöld að skora meira en 2 mörk í leik í fyrsta síðan gegn Hull 26.september og yfir því á að gleðjast vinir mínir!!!

Reina hefur oft leikið betur, átti sérlega erfitt með að sparka en sennilega átti völlurinn sinn þátt í því. Hann varði þó tvisvar virkilega vel. Vörnin virkaði óörugg í byrjun en vann sig á eins og liðið í heild. Vinirnir Lucas og Masch áttu fínan leik þó þeir verði ekki kallaðir “Skapararnir að Sunnan”, sérstaklega var þáttur Mascherano í fyrri hálfleik mikilvægur. Það var gott að sjá Benayoun aftur og hann átti fína spretti, en N’Gog karlinn var alls ekki að virka í kvöld, tapaði of mörgum boltum og var alls ekki að heilla mig í kvöld. Hans þáttur í fyrri leiknum á Anfield skiptir þó máli, við skulum ekki gleyma því.

En maður leiksins í kvöld var að mínu mati Ryan Babel. Skoraði og átti stóran þátt í marki, var duglegur að verjast og áræðinn sóknarlega. Ég hef aldrei keypt það að verið sé að svelta hann eða skemma. Hann lék vel síðast og fékk því að halda áfram í byrjunarliðinu. Hann virkilega er að sýna það þessa dagana að hann vill vera áfram og leggur sig fram af krafti. Auðvitað spilar þungur völlur inní hvort hann verður áfram á kantinum í stað Riera og Maxi, en með þessari frammistöðu er ljóst að hann er að fá meiri mínútur en áður. Á maður ekki bara að skella sér í það að vona enn einu sinni að nú sé hann að koma til……

Fínn sigur, 4-1 samanlagt og við komnir áfram í 16 liða úrslit Europa League, nú er bara að sjá hvort andstæðingurinn verður Fenerbahce eða Lille hjá Rafa og lærisveinum í framhaldi keppninnar.

En næsta verkefni er á sunnudaginn næsta, 28.febrúar gegn Blackburn Rovers og leiðinlegasta þjálfara PL, Sam Allardyce.

Uppfært

Lille jafnaði gegn Fenerbahce í blálok leiks, og komst þar með samanlagt áfram, 3-2. Það er því ljóst að við mætum Lille í næstu umferð, fyrst í Frakklandi 11.mars og svo viku síðar á Anfield.

Öll stóru liðin, og þá meinum við öll stóru liðin úr 32ja liða úrslitunum komust áfram utan Shaktar og Roma, svo að hún verður áhugaverðari fyrir vikið!

Liðið komið – Yossi byrjar

Posted on by

Byrjunarliðið fyrir leikinn gegn Unirea (kl. 18, nota bene) er komið og er það sem hér segir:

Reina

Carra – Skrtel – Agger – Insúa

Mascherano – Lucas
Benayoun – Gerrard – Babel
Ngog

**BEKKUR:** Cavalieri, Kyrgiakos, Kelly, Aurelio, Aquilani, Kuyt, Torres.

Líst vel á þetta. Benayoun og Ngog koma inn í liðið á kostnað Maxi Rodriguez sem er heima og Dirk Kuyt sem fær sjaldgæfa hvíld. Frammi eru því Yossi, Gerrard, Babel og Ngog sem er frekar hröð og öflug lína að mínu mati. Sé fyrir mér að okkar menn liggi aftarlega, láti Unirea koma á sig og káli þeim svo með hraðanum í Babel og Ngog í kvöld. Torres og Kuyt geta svo komið inn ef menn lenda í vandræðum.

Líst vel á þetta. Áfram Liverpool!

Unirea Urziceni úti (í Bucharest)

Posted on by

Á fimmtudaginn kl: 18:00 er komið að seinni leiknum gegn vinum okkar í Unirea Urziceni, leikurinn fer fram í höfuðborg Rúmeníu, Bucharest þar sem völlur Unirea er ekki löglegur skv. UFEA stöðlum fyrir svona stóran leik.

Líkt og áður í Evrópu á þessu tímabili lendum við í því að andstæðingurinn er með öllu algjörlega óþekktur í Evrópufótboltanum og því “nauðsynlegt” að byrja á því að kynna sér hverjir í fjáranum Unirea eru, hvar er Urziceni og á Kritján Atli einhverja ættingja þar brottflutta frá Transilvaníu!?

Urziceni er lítill 17.þúsund manna bær á SA- hluta Rúmeníu staðsettur í sýslu sem kallast Ialomita (já einmitt) og var eitt sinn höfuðstaður þessarar ágætu sýslu. Frumbyggjar bæjarins voru smalar og fyrst er getið hans á prenti á 16.öld. Árið 1831 var talað um Urziceni sem market town og árið 1895 fékk bærinn loks viðurkenningu sem borg. Urziceni telst í öllum tilvikum smábær og er í dag í raun hvað þekktastur fyrir knattspyrnuliðið, en Unirea Urziceni sló á þessu tímabili metið yfir að vera lið frá fámennustu borginni sem spilað hefur í meistaradeildinni.

Raunar er þetta einum of lítill vettvangur og leikvangur til að hýsa Meistaradeildina og UEFA Cup, þ.a.l. hafa þeir verið að spila sýna leiki á heimavelli Steaua frá höfuðborginni Bucharest, 60 km frá Urizeni.

Ég veit ekki hvaða staðalímynd menn hafa á Bucharest en líklega er hún smá brengluð enda borgin ultra Austur-Evrópsk á sínum tíma. Allavega hefur heimasíða Liverpool vaðið fyrir neða sig þegar hún fer yfir það helsta sem bera að varast fyrir þá sem ætla að ferðast til Rúmeníu:

* Taxinn getur verið mjög misdýr

* There will be security checks at the stadium and you may be checked more than once.

* No alcohol is allowed at the match, and fans showing any signs of drunkenness may be refused entry to the stadium.

* Entry to the ground is by bar-coded ticket only.

* Liverpool fans will be held back at the end of the game for at least 15 mins until the home supporters have left.

* Stay safe and avoid scams in Bucharest

* Large crowds are the favoured hunting grounds for petty criminals so be careful with your valuables.

* o.fl. í þessum dúr.

Maður var allavega hálf smeykur bara við það að ætla að horfa á leikinn í sjónvarpinu eftir að hafa kíkt yfir þetta.

En Steaua völlurinn er allavega nýmóðins og var fyrsti völlurinn sem byggður var í Rúmeníu eingöngu fyrir fótbolta (án hlaupabrautar) árið 1974. Áhorfendur sitja því nálægt vellinum sem tekur rúmlega 27.557 manns í sæti. Ekki spyrja mig afhverju en þessi völlur er í eigu varnarmálaráðuneytisins í Rúmeníu.

Það vinnur líklega ekki með Unirea að þurfa að spila á þessum velli og t.a.m. var alls ekki fullt er Rangers kom í heimsókn í lok síðasta árs. En Liverpool trekkir allajafna mjög vel að og því ætti völlurinn að verða ansi þétt setinn á fimmtudaginn og Rúmenarnir sannarlega klárir í slaginn fyrir framan sitt fólk.

Svo ég rifji aðeins upp sögu Unirea sem ég fór yfir í upphitun fyrir fyrri leikinn, þá hefur þessi klúbbur aðeins spilað í þrjú tímabil í Rúmensku deildinni sem gerir sögu þeirra ennþá undraverðari. Þjálfarinn allt þar til í desember 2009 var Dan Petrescu sem eitt sinn gerði garðinn frægan með Rúmenska landsliðinu og í enska boltanum. Hann gerði liðið að meisturum í fyrra og þeir voru einu stigi frá því að komast upp úr sínum riðli í Meistaradeildinni, en sá riðill innihélt, Stuttgart, Sevilla og Rangers.

Unirea hefur ekki verið að sækja neitt ofboðslega mikið í sínum leikjum í evrópukeppninni eins og við var að búast. Þeir lögðu rútunni gjörsamlega gegn okkur á Anifeld, en líklega hefur enginn haft eins litlar áhyggjur af þeim og þessi geðprúði og viðkunnarlegi maður:

Þeir þurfa þó að skora á fimmtudaginn og því óhætt að búast við þeim örlítið framar fyrir framan sína aðdáendur. Líkt og fyrir fyrri leikinn þá eru leikmenn Unirea þekktir fyrir flest allt annað en að vera þekktir og því ákaflega erfitt að stilla upp líklegu byrjunarliði hjá þeim, næstum erfiðara heldur en líklegu byrjunarliði hjá Liverpool!!

Tippa þó á þetta og miða við síðasta leik þeirra sem háður var á Anfield.

Arlaukis

Fernandes – Maftei – Galamaz – Paraschiv

Frunză – Apostol -Paduretu – Brandán

Onofras – Bilasco

Bekkur: Tudor, Mehmedovic, Rusescu, Nicu, Vilana, Marinescu, Bordeanu

Þarna eru sem fyrr Arlaukis í markinu og Apostol aðalmenn Unirea og þá sérstaklega markmaðurinn sem ég yrði ekki hissa á að sjá í stærri klúbb á næsta tímabili.

Ef ég man þetta rétt þá er tímabilið í Rúmeníu ennþá í fríi og því er þessi leikur það eina sem Unirea hefur verið að undirbúa sig fyrir í vikunni. Við hinsvegar áttum einn erfiðasta útileik ársins á sunnudaginn gegn Man City sem reyndist jafnframt vera einn leiðinlegasti leikur ársins. Jákvæða við þann leik var þó að í honum fengum við til baka bæði Yossi Benayoun (sem spilað hefur undir stjórn Levy, stjóra Unirea) og eins Fernando Torres en mörkin hans eru klúbbnum álíka mikilvæg og mjólk er einum lítra af mjólk. Að auki talaði Benitez um það í vikunni að stutt væri í Glen Johnson sem eru frábærar fréttir þó ekki sé búist við honum í þessum leik.

Torres verður þó að öllum líkindum á bekknum og svipaða sögu er líklega að segja af Benayoun. Sú innspýting sem þeir geta veitt í steingeldan sóknarleikinn er ákaflega jákvæð. Að auki hefur Benitez talað um að hann vilji nota ungu strákana eitthvað í þessari keppni og því yrði ég ekki hissa ef Pacheco fengi aftur að koma inná af bekknum ef aðstæður leyfa plús það að ég hef sterka tilfinningu fyrir því að Kelly hreinlega fái að byrja í þessum leik.

En með dash af óskhyggju tippa ég á að liðið verði svona:

Reina

Kelly – Kyrgiakos – Skrtel – Insúa

Lucas – Aquilani
Babel – Gerrard – Riera
Kuyt

Bekkur: Cavallieri, Carragher, Agger, Torres, Benayoun, Pacheco, Mascherano

Auðvitað eru allar líkur á að Carragher verði bakverði og ef ekki þar þá í miðverði. En að mínu mati mætti alveg hvíla hann í þessum leik og að því gefnu einnig nota Kyrgiakos, bæði til að leyfa honum að halda áfram að spila og eins uppá ógn í teig andstæðinganna. Sama logic með Skrtel, hann hefur verið að spila ágætlega upp á síðkastið og Agger mætti vera á bekknum í þessum leik, upp á hvíld þ.e. M.ö.o. ég býst við CarrAgger en hef þetta svona.

Á miðjuna vill ég fá Aquilani inn aftur og mér er slétt sama hvort það er Lucas eða Mascherano sem er við hliðina á honum þar. Raunar mætti Gerrard líka alveg fara niður og taka leikinn yfir en það er líklega of mikil óskhyggja.

Babel byrjaði síðasta leik þannig að lögmálið segir að hann sé búinn að fá yfirdrifið nægan séns á að sanna sig í bili! Engu að síður tippa ég á að hann haldi sínu sæti en stoppa óskhyggjuna þó við að ég set hann á kantinn en ekki upp á topp, þar verður Dirk Kuyt áfram af ill skiljanlegum ástæðum (myndi skilja það betur ef þeir væru báðir upp á topp í 4-4-2).

Riera var ömurlegur gegn Unirea síðast en ég er nokkuð viss um að hann eigi mikið inni gegn þeim og ætti að tæta þá í sundur á kantinum ef allt er eðlilegt, ef ekki þá kemur Aurelio á kantinn.

Í fyrri viðureign liðanna pakkaði Unirea einfaldlega í vörn og okkar menn voru vandræðalega hugmyndasnauðir í að brjóta leik þetta upp og keyra yfir þá. Það var ekki fyrr en óþreyttir og graðir Babel og Pacheco komu inná að eitthvað fór að gerast af viti og einmitt þeir sköpuðu þetta eina mark sem nú skilur liðin að. Í millitíðinni var síðan sýnt jafnvel ennþá hugmyndasnauðari frammistöðu gegn reyndar mjög sterku Man City liði í 0-0 hrútleiðinlegu jafntefli.

Það er algjörlega kominn tími á að sýna eitthvað brota brot af því sem þetta lið getur, bæði sóknar og varnarlega og hvar er betra en út í ras***i gegn í besta falli miðlungsgóðu Austur Evrópsku liði sem er að spila á risastórum velli á sinn mælikvarða, velli sem þeir þekkja ekki sem sinn eigin. Ofan á það þarf Unirea að sækja í leiknum og pota inn marki sem ætti að gefa okkar mönnum nægan séns á að refsa þeim og klára leikinn með stæl.

Spá: Hóflega bjartsýnn segi ég 0-2 fyrir Liverpool með mörkum frá Gerrard (víti) og Kuyt (bara vegna þess að ég dissaði hann hér).

Man City – Liverpool – 0-0

Posted on by

Miðað við hvernig þetta hörmulega tímabil hefur spilast var leikur dagsins með þeim mikilvægari á árinu, City er í 4 sæti og eiga leik til góða og því mjög mikilvægt að tapa ekki og helst vinna leikinn.

Til að leysa það verkefni valdi Benitez þetta byrjunarlið:

Reina

Carragher – Skrtel – Agger – Insúa

Lucas – Mascherano
Babel – Gerrard – Maxi
Kuyt

Bekkur: Cavalieri, Torres, Benayoun, Aquilani, Riera, Aurelio, Kelly.

Um þennan leik er svosem ekki mikið að segja annað en að hann einkendist af mikilli stöðubaráttu og líktist í raun hressilegum leik af skák, ef það er til. Það var varla að liðin næðu skoti á markið og eftir fyrri hálfleik hafði hvorugt liðið náð almennilegu skoti á markið. Liverpool voru þó öllu ferskari fyrstu 25.mínúturnar og pressuðu City ágætlega. Eftir það komust City ágætlega inn í leikinn og var þá Adam Johnson sem er nýkoninn frá Boro nokkuð líflegur. Á 42.mínútu hefum við þó átt að ná forystu í leiknum er Skrtel fékk nokkuð frían skalla eftir horn sem fór framhjá. En allavega ákaflega tíðindalítill fyrri hálfleikur.

Seinni hálfleikur var afar lítil bæting á þeim fyrri þó vissulega hafi færst örlítið meira líf í leikinn. Babel var skotinn niður á 52.mínútu eftir dágóða hornspyrnusyrpu hjá City en jafnaði sig á því. Tíu mínútum síðar var Maxi tekinn útaf og inná kom Yossi Benayoun. Argentínumaðurinn hefur heldur betur ekki heillað síðan hann mætti á Anfield sem er fúlt og því nokkuð gott að sjá Benayoun vera kominn aftur inn í myndina.

Á 74.mínútu var þó komið að skiptingu sem meira hefur verið beðið eftir, Fernando Torres kom loksins loksins inná í leik hjá Liverpool. Hann kom upp á topp fyrir Babel sem hafði reyndar að mestu spilað á kantinum án þess að sýna neitt af viti líkt og félagar sínar í sóknarleik Liverpool.

Þetta dugði þó ekki til í dag og niðurstaðan varð nokkuð sanngjarnt 0-0 jafntefli.

Ekki verstu úrslit í heimi en sigur hefði verið afar kærkominn í dag.

Liðið gegn City

Posted on by

Já sæll sé það núna að ég á skýrslu í dag!

En liðið er allavega komið fyrir leikinn gegn City og það er nokkuð áhugavert:

Reina

Carragher – Skrtel – Agger – Insúa

Lucas – Mascherano
Kuyt – Gerrard – Maxi
Babel


Bekkur: Cavalieri, Torres, Benayoun, Aquilani, Riera, Aurelio, Kelly.

Vörnin er eins og Lucas og Mmascherano byrja saman á miðjunni með Aquilani á bekknum. Maxi kemur inn aftur fyrir Riera og Babel kemur loksins inn fyrir N´Gog.

Það er ekki hægt að kvarta svo mikið yfir fjarveru Aquilani og Riera miðað við síðasta leik þeirra en engu að síður hefði maður viljað hafa þessa leikmenn í liðinu í svona stórum leik. N´Gog er líklega eitthvað tæpur og því kemur Babel inn og ég tippa á að hann fari upp á topp frekar en að Kuyt fari upp og Babel á kantinn, sem er þó alveg kostur í stöðunni.

Svo eru gleðifréttirnar þær að Torres er á bekknum og Benayoun líka sem er ekkert nema frábærar fréttir. Við verðum að fá Torres aftur svo einfalt er það. Hercules er síðan ekki í hóp sökum leikbanns en Kelly heldur sínu sæti á bekknum.

Lið City er svona:

Given

Zabaleta – Lescott – Kompany – Bridge

De Jong – Barry
W-Phillips – Ireland – A.Johnson
Adebayour

Bellamy lenti mjög óvænt upp á kant við þjálfarann, eitthvað sem aldrei hefur hent þennan prúða strák áður og Tevez er í fríi! Robinho er í láni í Braselíu og guð má vita hvar Jo er og allir hinir strikerarnir…djöfull eiga þeir mikið af strikerum!

Það hefur verið að snjóa hressilega á Englandi og t.d. var flugvellinum í Manchester lokað áðan en vonandi hefur það ekki mikil áhirf á leikinn. Þeir sem sáu eitthvað úr Balckburn – Bolton sáu allavega hversu hressilega snjóaði.

Koma svo

Leiðbeiningar varðandi ummæli

Posted on by

Jæja jæja, loksins eftir 5 ára sögu þessa bloggs þá setti ég inn leiðbeiningar um það hvernig maður getur sett inn ýmsa hluti í ummælum – einsog feitletrun, tengla og … liðstuppstillingu.

Þessar leiðbeiningar er núna að finna fyrir ofan gluggann þar sem ummæli eru sett inn. Smellið bara á það sem þið þurfið hjálp við. Þetta á vonandi að skýra sig sjálft, en ef þið hafið einhverjar spurningar endilega setið þær inn.

**Uppfært (EÖE)** Liðsuppstillingardæmið virkar ekki hjá þeim sem eru ekki skráðir inní kerfið. Sjá athugasemd hér. Öll hjálp væri vel þegin.

Man City á morgun

Posted on by

Okkar menn ferðast alla leið til Manchester á morgun og hitta fyrir heimamenn á The City of Manchester Stadium. Svo ég orði það á sem einfaldastan hátt, þá er þetta einn mikilvægasti leikur tímabilsins. Ekkert flóknara en það.

Af okkar mönnum er það helst að frétta að allir eru að tala um Ryan Babel og Dani Pacheco eftir góða innkomu þeirra gegn Unirea á fimmtudag. Þá er eitthvað slúður í gangi um að Fernando Torres verði settur á bekkinn á morgun, sennilega meira þá upp á móralskan stuðning en það að Rafa ætli sér í alvöru að nota hann. Hvað svo sem verður þá á ég ekki von á að neinn þessara þriggja byrji á morgun, jafnvel þótt Albert Riera – sem var mjög slakur gegn Unirea – missi líklega sæti sitt í byrjunarliðinu.

Ég spái að Rafa geri aðeins eina breytingu á liðinu frá því á fimmtudag – Maxi Rodriguez inn fyrir Riera. Liðið mun því líta svona út:

Reina

Carra – Skrtel – Agger – Aurelio

Mascherano – Lucas
Kuyt – Gerrard – Maxi
Ngog

Þetta eru reyndar þrjár breytingar. Ég sá þegar ég fór að teikna liðið upp að allt sem ég veit um Rafa segir mér að Lucas og Insúa komi aftur inn í liðið eftir að hafa verið hvíldir gegn Unirea.

Af City-liðinu er allt að frétta, eiginlega. Carlos Tévez er enn í leyfi í Argentínu eftir barnsburð, Patrick Vieira er meiddur eða í banni og verður ekki með, og Craig Bellamy verður víst í mesta lagi á bekknum eftir að hafa hnakkrifist við þjálfarann sinn í vikunni (hvað annað er nýtt?). Fyrir vikið má búast við að City-liðið mæti með Adebayor einan fremstan og honum til stuðnings menn á borð við Adam Johnson, Martin Petrov, Shaun Wright-Phillips og Gareth Barry af miðjunni. Sem sagt, hörkulið sem við gætum hæglega tapað fyrir.

**MÍN SPÁ:** Það er alveg ljóst að við megum ekki tapa þessum leik. Jafntefli er ekki svo slæmt, þá værum við enn stigi á eftir þeim eftir einum leik meira en það er alveg staða sem við getum jafnað okkur af fram á vorið. Tapið væri öllu verra. Þess vegna spái ég að Rafa spili þétta vörn og miðju á morgun, leggi upp með það að halda hreinu og treysti svo á að Kuyt, Gerrard eða Ngog geti togað einhverjar kanínur upp úr hattinum sínum.

Ég spái því **1-1 jafntefli** í miklum baráttuleik á morgun.

YNWA

Liverpool – Unirea 1-0

Posted on by

Það var gríðarleg spenna fyrir fyrsta leik Liverpool í UEFA Cup síðan 2004, þessi spenna var reyndar öll í hinum 17.þúsund manna heimabæ Uniera frá Rúmeníu en dó síðan jafnt og þétt út þegar leið á fyrri hálfleikinn.

En áður en ég fer út í leikinn er rétt að byrja á byrjuninni, liðinu sem Benitez stillti upp í leiknum:

Reina

Carragher – Skrtel- Agger – Aurelio

Aquilani – Mascherano
Kuyt – Gerrard – Riera
N´Gog

Bekkur : Cavalieri, Kyrgiakos, Babel, Lucas, Insua, Degen, Pacheco

Sem sagt sterkt lið og ljóst að ekki átti að vanmeta gestina neitt. Það verður þó að segja á móti að þetta lið okkar hefur ekki verið að spila neitt í grend við liðið sem jarðaði Real Madríd fyrir ári síðan og er meira í því að detta niður á nákvæmlega sama plan og andstæðingurinn. Það var einmitt það sem gerðist í fyrri hálfleik gegn Unirea. Liverpool er reyndar blessunarlega nokkrum klössum fyrir ofan miðlungsgott lið Unirea í gæðum en þeir reyndu eins og þeir gátu að komast niður á þeirra level, en úr varð hálfleikur þar sem boltinn var nánast að öllu leiti að færast milli leikmanna þeirra rauðu sem náðu ekki að skapa sér neitt af viti úr því.

Raunar punktaði ég bara þrjú atvik hjá mér úr fyrri hálfleiknum. Fyrsta kom á 10.mínútu þegar Kuyt reyndi misheppnaða sendingu innfyrir á N´Gog, hann hitti alls ekki og náði bara boltanum aftur sjálfur og náði ágætu skoti að marki sem leikmenn Unirea vörðu í horn. Næstu 25.mínútur hefði verið alveg jafn gáfulegt að blasta Bíum Bíum Bambaló í græjunum á Anfield og svæfa mannskapinn þannig. En á 35 mín náði Mascherano hörkuskoti fyrir utan teig sem stefndi á markhornið en varnarmenn Unirea náðu að komast fyrir það. Að lokum voru það síðan einu tilþrif N´Gog í fyrri hálfleik, en hann fékk góða sendingu frá Gerrard sem hann tók á kassann inn í teig, náði að koma sér í skotstöðu með þrjá í sér en skotið fór framhjá.Vel gert hjá frakkanum.
Ekkert af þessu var eitthvað mjög spennandi og því 0-0 eftir afar tilþrifalítinn fyrri hálfleik.

Seinni hálfleikur byrjaði því miður á mjög svipuðum nótum og var þannig mest allann tímann, Liverpool með boltann en skapaði allt of litla hættu upp við mark andstæðingana og voru í raun bara alveg steingeldir frammávið. Sóknarleikur frá Unirea var síðan bara ekki til staðar nema rétt aðeins undir lokin og fengu þeir meira að segja horn á þeim kafla.

Uppfrá 60.mín fór þetta þó örlítið að frískast og byrjaði á því að Aurelio náði góðu skoti af marki fyrir utan teig sem var varið í horn af unga Litháanum í markinu. Tveimur mínútum seinna kom Babel loksins inná á kostnað Riera og frískaði hann töluvert upp á leik Liverpool manna. Sókn Liverpool þyngdist síðan jafnt og þétt uppfrá þessu. Á 74.mín kom að skiptingu sem mjög margir vildu sjá og það jafnvel fyrr, Dani Pacheco kom inná og fékk síðasta korterið til að sanna sig.

ngog

Þetta var það sem vantaði, tvo unga, fljóta sóknarþenkjandi menn sem virkilega langaði og þurftu að sanna sig og því var það við hæfi að það hafi verið Babel og Pacheco sem bjuggu til eina mark leiksins, fyrir enn einn ungan og sprækan, David N´Gog. Babel kom með góða fyrirgjöf frá vinstri kanti og beint á Dani Pacheco sem skallaði boltann fyrir N´Gog sem átti ekkert eftir nema að skalla boltann í autt markið. LOKSINS LOKSINS 1-0. Þar við sat og afar döprum leik lauk því 1-0.

Það var oft á tíðum átakanlegt að horfa á þennan leiðinlega leik og ekki gaman að sjá Liverpool alltaf svona djöfulli varkára, sama hverjir mótherjarnir eru. Þegar spilað er gegn Unirea Urziceni frá 17.þúsund manna bæ í Rúmeníu á hinum sögufræga Anfield Road þá á ekki að þurfa steingeldan Jamie Carragher í lykilstöðu í sóknarleiknum, en nútíma bakvörður er crusial til að opna lið eins og þetta ultra defensive Unirea lið er. Eins er Kuyt með öllu óþarfur í svona leik og nýtast afar fáir af hans helstu kostum gegn svona liðum, enda var maðurinn ekki að geta blautan í dag. Riera átti jafnvel ennþá tíðindaminni leik hinumegin á vellinum og maður spyr sig hvort hann sé nokkuð 100% match fit. Allavega fór hann fyrstur útaf.

Gerrard var áberandi bestur í fyrri hálfleik en hvarf svo alveg í þeim seinni og gerði sig aldrei líklegan til að klára þennan leik líkt og menn af hans caliberi gera svo oft gegn mótherjum sem þessum. Aquilani og Mascherano stjórnuðu svosem miðjunni en ekki mikið meira en það. Mascherano er þó aðeins að skána sóknarlega held ég, en það þurfti ekki mjög mikið til.

N´Gog einn upp á toppi var síðan afar lítið að gera fyrir mig, jafnvel þó hann hafi stangað þetta mark inn. Babel lífgaði mjög mikið upp á leikinn og skapaði markið með Pacheco sem þarf að fara fá mikið fleiri mínútur heldur en hann er að fá. Ekki til að gefa honum séns á að sanna sig, heldur vegna þess að hann er líklega betri en meginið af því sem er í boði núna og töluvert hungraðari.

Niðurstaðan 1-0 sigur og svosem fínt veganesti í seinni leikinn, en mikið óskaplega var þetta ósannfærandi og leiðinlegur leikur. Þrátt fyrir að vera með 22 skot á markið og 70% af posession.

Maður leiksins: Ryan Babel og það er bara vegna þess að hinir voru ekki að gera mikið af viti.

Liðið gegn Unirea

Posted on by

Tvær breytingar á vinstri kanti, Aurelio kemur inn fyrir Insúa og Riera fyrir Maxi sem er búinn að spila með A.Madríd í evrópukeppni á þessu tímabili. Aquilani er á miðjunni með Mascherano og N´Gog einn upp á topp.

Byrjunarliðið:

Reina

Carragher – Skrtel- Agger – Aurelio

Aquilani – Mascherano
Kuyt – Gerrard – Riera
N´Gog

Bekkur : Cavalieri, Kyrgiakos, Babel, Lucas, Insua, Degen, Pacheco

Nokkuð sáttur við þetta lið og þá sérstaklega vinstri vænginn og miðjuna. Eins og ég sagði upphtun hefði ég viljað Babel upp á topp og einhvern annan en Carra í bakverði en sjáum hvað setur. Nokkuð sterkur bekkur í kvöld og ég væri mikið til í að sjá Pacheco fá séns í seinni hálfleik.

Unirea Urziceni og Liverpool í UEFA Cup

Posted on by

Mikið vona ég nú heitt og innilega að ég þurfi ekki að gera margar fleiri upphitanir um lið á borð við Unirea Urziceni á þessum tíma árs, ekki frekar en aðra leiki í UEFA Cup. En UEFA Cup er staðreynd í ár eftir hörmulegan endi á síðasta ári og við verðum að gera eins vel úr því og við getum. Þannig að ef við lítum á björtu hliðarnar þá vita allir að þessi “Meistara”deild er orðin frekar þreytt dæmi og hefur verið það síðan 2005 á meðan Europa League er á hraðri uppleið og skákar Meistaradeildinni innan fárra mánaða (meðan Liverpool er þar auðvitað). Eins þarf það ekki að koma nokkrum manni á óvart að þegar við lítum aðeins til baka þá er Liverpool auðvitað langbesta liðið í þessari keppni líka, klárlega ef litið er til sögu enskra liða í keppninni og eins ef litið er á keppnina í heild. Sömu sögu er auðvitað að segja ef litið er á sögu okkar í keppninni fyrir ofan, meistaradeildinni.

Liverpool hefur unnið keppnina þrisvar, líkt og Juventus og Inter. Fyrsti sigur liðsins í keppninni kom árið 1973 eftir sigur í endurteknum leik gegn einum elsta vinaklúbbi félagsins, þjóðverjunum í Borusia Moenchengladbach. Fyrri leikurinn var flautaður af eftir 27.mínútur og því spilaður daginn eftir. Á þessum sólarhring sem leið milli leikja fann Bill Shankly veikleika á liði  Moenchengladbach og setti hinn stóra John Toshack í liðið fyrir Brian Hall. Það skilaði sér í marki og stoðsendingu frá Walesverjanum áður en Larry Loyd kláraði leikinn 3-0 á Anfield. Seinni leikurinn tapaðist síðan 2-0 og Liverpool því meistarar. (4 árum seinna kepptu þessi lið síðan í úrslitum Meistaradeildarinnar með sömu niðurstöðu).

Annar titillinn kom síðan árið 1976 og aftur voru það mótherjar sem Liverpool lék gegn í úrslitum Meistaradeildarinnar stuttu seinna, eða Belgíska liðið Bruges. Fyrri leikurinn byrjaði herfilega og Liverpool lenti 2-0 undir eftir korter, en liðið jafnaði sig fljótt á því og vann leikinn 3-2 á Anfield. Seinni leikurinn fór síðan 1-1 og þar með fyrsti titill Bob Paisley í Evrópu kominn í hús.

Þriðja titlinum muna síðan flestir eftir en það var stórkostlegur 5-4 sigur á Real Alaves í Dortmund í líklega besta úrslitaleik í sögu þessarar keppni (rétt eins og úrslitaleikir í Meistaradeildarinnar 2005 og FA Cup 2006 eru með allra bestu úrslitaleikja í sögu þeirra keppna).

Þannig að saga klúbbsins í þessari keppni er alveg til og er betri en flestra annara. Það breytir því ekkert að UEFA Cup er ekkert CL og í þessari keppni viljum við ekki vera og teljum liðið alls ekki eiga að vera. En þar sem þetta er nú orðið staðreynd er ekkert annað í stöðunni heldur en að stefna á úrslitaleikinn í Hamborg og auðvitað sigur þar. Ef við vinnum Rúmenana þá eru það Lille eða Fenerbache í næstu umferð.

Síðast þegar við kepptum í UEFA Cup (03/04) duttum við út á afar pirrandi hátt gegn afar pirrandi liði sem leitt var af afar pirrandi leikmanni sem var og er óþólandi góður. Sá heitir Didier Drogba og spilaði fyrir Marseille. Leikmenn Liverpool áttu ekki séns í hann í því einvígi.

Sigurvegar undanfarinna ára í þessari keppni  hafa verið eftirfarandi: 2003 – Porto, 2004 – Valencia, 2005 – CSKA Moscow, 2006 – Sevilla, 2007 – Espanyol, 2008 – Zenit St Petersburg, 2009 – Shakthar Donetsk

Liverpool – Unirea Urziceni

En þá að leiknum sjálfum sem spilaður verður á fimmtudaginn. Bæði lið koma beint inn í útsláttarkeppnina (32 liða úrslit) sem liðin sem lentu í þriðja sæti í sínum riðli í Meistaradeildinni.

Af okkar mönnum er ekki mikið að frétta fyrir þennan leik og búist er við að Benitez komi til með að hefja þetta einvígi með flest alla okkar lykilmenn í byrjunarliðinu. Hann hefur þó valið töluvert af ungun leikmönnum í hópinn sem gætu fengið tækifæri. Hér eru þeir leikmenn sem benitez bætti við hópinn: Nabil El Zhar, Philipp Degen, Stephen Darby, Steven Irwin, Alexander Kacaniklic, Robert Threlfall

Eins og undanfarið eru allir klárir nema Torres, Johnson og Benayoun sem eru allir meiddir en Hercules kemur reyndar úr banni fyrir þennan leik og líklega bara beint inn í byrjunarliðið, sem ég tippa á að verði svona:

Reina

Carragher – Kyrgiakos- Agger – Insua

Aquilani – Mascherano
Kuyt – Gerrard – MaxiRiera
Babel

Þetta er bara skot út í loftið. Carragher ætti að vera orðinn góður eftir hnjask gegn Arsenal, væri þó meira til í að sjá Martin Kelly í hægri bakverðinum. Eins held ég að Kyrgiakos verði í liðinu á kostnað Skrtel. Þetta lítur út fyrir að vera kjörinn leikur til að láta Aquilani spila og að sama skapi mjög mikill óþarfi að hefta miðjuna einn leikinn enn með samstarfi Lucas og Mascherano. Kuyt er alltaf í liðinu og Gerrard er heill þannig að þeir verða þarna. Maxi hefur klárað síðustu leiki án þess að sína nokkurn skapaðan hlut og verður því líklega áfram í liðinu í þessum leik (skil ekki hvað varð um Riera). Á toppnum sé ég síðan fyrir mér að hann leyfi Babel að byrja, Benitez hefur alltaf af og til verið að tala um Babel og hvernig hann gæti nýst okkur og komið til, það gerir hann ekki sem varamaður endalaust og þarf að fá að byrja leiki og það oft. Sérstaklega þegar Torres er frá og ekkert annað af viti í boði í staðin.

En nóg um okkar menn, hverjir í andskotanum eru andstæðingarnir núna?

Unirea Urziceni


Saga klúbbsins getur hvorki talist löng né mjög merkileg þannig séð. Þetta litla lið frá suðurhluta Rúmeníu var stofnað árið 1954. Liðið var fastagestur í neðrideildum Rúmeníu allt þar til árið 2006 að þeir fóru loksins í efstu deild. Fjörum árum áður fékk liðið nýjan styrktaraðila er heitir Valahorum og má guð vita hvað þeir sérhæfa sig í.

Þeir hristu allavega vel upp í liðinu og sex mánuðum seinna var ný 7.000 manna stúka tekin í notkun við völlinn og öll aðstaða bætt til muna. Ári seinna, 2003, var liðið komið upp í næst efstu deild í fyrsta skipti í sögu klúbbsins.

Árið 2006 spilaði liðið í fyrsta skipti í efstu deild en þá tók fyrrvernadi landsliðsmaður úr gullaldarliði Rúmena, þjóðhetja og leikmaður úr enska boltanum, Dan Petrescu við liðinu. Hann var rekinn sem þjálfari Wisla Krakow í Póllandi 18.september 2006 og tók við nýliðum Unirea viku seinna. Að auki tók  Mihai Stoica fyrrum forseti Steaua Bucharest (eins af risunum í Rúmeníu) við embætti forseta hjá Unierea.

Þeir umbreyttu liðinu svo gjörsamlega að í dag er aðeins einn leikmaður eftir af liðinu sem kom þeim upp um deild. En árangurinn lét ekki á sér standa og uppgangur liðsins hefur verið ævintýralegur undanfarin ár,

10.sæti hjá þessum nýliðum tímabilið 2006/2007 og 5.sæti og bikarúrslit tímabilið 2007/2008.

Síðasta tímabil var síðan ótrúlegt þegar þetta litla lið með frekar óþekkta leikmenn jafnvel á Rúmenskan mælikvaðara vann deildina með þremur stigum og það á aðeins sínu þriðja ári í efstu deild.

Þetta hlítur að þýða að Dan Petrescu sé einhverskonar guð á þessum slóðum, en því miður fyrir Rúmenana þá hefur hann nú yfirgefið félagið og haldið til Rússlands og í gullið þar. Hann fór núna í desember síðastliðinum eftir að þetta smálið, á sínu fyrsta ári í meistaradeildinni, náði sér í 8 stig í sínum riðli og vann t.a.m. Rangers úti 1-4 og tók Sevilla á heimavelli 1-0. Alls ekki ónýtur árangur það.

Hér er myndbrot úr leik þeirra gegn Rangers á Ibrox þar sem þeir lentu undir og fengu víti á sig:

Eftir að Petrescu hætti tók ísraelinn Ronny Levy við stjórnvölunum en sá kappi hefur mætt Liverpool áður sem þjálfari. Það gerði hann sem þjálfari Maccabi Haifa tímabilið 06/07 í forkeppni meistaradeildarinnar. Liverpool vann fyrri leikinn ósannfærandi 2-1 með sigurmarki frá engum örðum en Mark Gonzalez. Seinni leikurinn fór 1-1 og því skriðum við áfram 3-2 samanlagt (og fórum í úrslit). Ronny þessi þjálfaði annars Yossi Benayoun þegar hann var pjakkur í Maccabi Haifa.

Liðið

Eins og áður hefur verið komið inn á þá er þetta lið ekki skipað þekktustu nöfnunum í knattspyrnheiminum og það er enginn í þessu liði sem hinn venjulegi knattspyrnuáhugamaður hér á landi kannast við. Þó eru nokkrir sem talið er vert að fylgjast sérstaklega með.

Markmaðurinn, hinn 21 árs gamli Lithái Giedrius Arlaukis þykir vera eitt mesta markmannsefni í boltanum í dag. Varnarmaðurinn Vasile Maftei er fyrrum fyrirliði Rapid Bucharest og gekk til liðs við Unirea í sumar. Á miðjunni er síðan hinn líflegi Iulian Apostol en hann hefur unnið sig inn í Rúmenska landsliðið með frammistöðu sinni með Unirea.

En eins og ég segi ekki frægasta liðið. Hvernig líklegt byrjunarlið verður er með öllu ómögulegt að segja en með smá leit á netinu og viðmið við leiki þeirra frá því í desember náði ég að smíða þetta lið saman:

Arlaukis

Nicu – Maftei – Galamaz – Bordeanu

Bălan – Apostol -Vilana – Brandán

Frunză – Bilasco

Hef alveg sérstaklega trú á Frunza!

Þetta lið er svo sannarlega sýnd veiði en alls ekki gefin og það er ekki í boði að fara með eitthvað kæruleysi inn í þennan leik. Rúmenarnir kortlögðu Stuttgart í þaula fyrir loka leik þetta í riðlakeppninni (hefðu farið áfram með sigri) og voru óheppnir að sigra ekki í leik sem þeir stjórnuðu alveg. Leikurinn endaði hinsvegar 1-1.

Spá: Það er vonlaust að átta sig á því hvernig okkar menn koma stemmdir í þennan leik en ég ætla að skjóta á að vélin hrökkvi í gang í þessum leik og við tökum þá 3-0.

Að lokum eru hér síðan mikilvæg skilaboð frá leikmönnum Unirea Urziceni

Babu

Eruð þið spennt fyrir Man City?

Posted on by

Eruð þið spennt fyrir leiknum gegn Man City um helgina? Nei, ég spyr bara af því að Man City eru spenntir fyrir leiknum gegn Liverpool um helgina.

Myndbandið sem ég vísa í hér að ofan sýnir Craig Bellamy í flottri lopapeysu að hugsa virkilega einbeitt um leikinn um helgina. Hann er væntanlega í peysu því hann, ásamt Carlos Tévez, mun væntanlega horfa á leikinn heima í stofu eins og við hin sem göngum líka í peysum.

Allavega, það er skrýtið að sjá muninn á umfjöllun liðanna fyrir þennan leik. Rafa hefur þegar sagt að þetta sé enginn úrslitaleikur um 4. sætið en City-megin virðast menn vera að undirbúa sig fyrir stærsta leik síðari ára.

Hvað svo sem Rafa segir þá er mikilvægi leiksins augljóst ef menn ætla sér af alvöru í Meistaradeildina á næsta tímabili. City eru þegar þetta er skrifað með jafn mörg stig og við, 44 talsins, en okkar menn hafa leikið 26 leiki og City aðeins 24. Þeir eiga tvo leiki inni, og annar þeirra er í kvöld gegn Stoke á útivelli. Þeir gætu því mögulega verið þremur stigum á undan okkur þegar liðin mætast um helgina, með möguleikann á að auka það forskot upp í sex stig og enn einn leik til góða.

Við getum s.s. misst þá níu stigum fram úr okkur með aðeins 11 umferðir eftir. Ég veit ekki með ykkur eða Rafa en fyrir mér þýðir þessi stærðfræði aðeins eitt: við megum alls, ALLS ekki tapa um helgina … og þurfum helst að vinna. Jafnteflið er varla nógu gott.

Það er allavega ljóst að City-menn eru að gíra sig upp fyrir flugeldasýningu á sunnudaginn. Vonandi mæta okkar menn með sínar rakettur líka.

Leikmenn annarra liða

Posted on by

Þvílíkur mánudagur. Bikarhelgi nýafstaðin og Meistaradeildin á næsta leiti … og Liverpool að keppa í hvorugri keppninni. Æðislegt. Auðvitað er svo Evrópudeildin á fimmtudaginn og okkar menn spila þar og svo er stórleikur við Man City um næstu helgi, en á meðan er óþægilega hljóðlátt í kringum okkar lið.

Ég átti skemmtilega umræðu við United-mann um helgina þar sem við rökræddum um leikmenn annarra liða en okkar eigin. Spurningin er einföld: ef þú gætir valið fimm leikmenn úr Úrvalsdeildinni til að styrkja þitt eigið lið, hvaða lið myndirðu velja? United-vinur minn sagðist vilja fá Torres, Gerrard og Reina í sitt lið, sem kom mér á óvart, auk Fabregas og Drogba. Ég íhugaði valið vel fyrir hönd Liverpool og ákvað á endanum að velja eftirfarandi fimm leikmenn:

**Wayne Rooney** Af því að hvern langar ekki til að sjá Rooney og Torres saman í liði? Það yrði sennilega banvænasta framherjapar plánetunnar. Það þarf svo sem ekkert að fjölyrða um það af hverju ég myndi vilja Rooney, hann er stórkostlegur leikmaður og ekki skemmir að United myndu þá missa eina sóknarmanninn sem gerir eitthvað af viti hjá þeim þessa dagana.

**Cesc Fabregas** Við elskum Gerrard og Giggs var valinn bestur í öllu í fyrra en menn vanmeta oft hversu stórt framlag Fabregas er. Hann er kominn í tveggja stafa tölu í bæði markaskorun og stoðsendingum í deildinni í vetur, þrátt fyrir að hafa misst úr einhverja leiki vegna meiðsla. Hann er líka búinn að vera í Arsenal-liðinu í sex ár núna … og hann er bara 22ja ára! Gerrard er að verða þrítugur og ef ég gæti valið einhvern í heiminum sem arftaka hans á næstu árum væri það Cesc.

**Michael Essien** Talandi um góða miðjumenn. Það hefur tekið mig langan tíma að fyrirgefa honum hroðatæklinguna á Didi Hamann á fyrsta eða öðru tímabili hans með Chelsea, en það breytir því ekki að Essien er, líkt og Gerrard okkar, einstakur að því leyti að hann er frábær í flestu ef ekki öllu sem miðjumaður á að gera. Hann getur spilað alls staðar í miðju og vörn, svipað og Gerrard, og verið frábær í öllum stöðum.

**Emmanuel Adebayor** Þetta er eina valið sem ég var ekki 100% viss um. Hæfileikarnir eru klárlega til staðar og hann er á flottum aldri, auk þess er hann stór og líkamlega sterkur en okkur vantar að mínu mati einmitt svoleiðis leikmann við hlið Torres (og Rooney þá væntanlega ;) ). Það eina sem ég set spurningarmerki við er hugarfarið. Hann virkaði ekki neitt sérstaklega gáfulega á mann í deilunum við Arsenal og launakröfunum á þeim bænum en ef hann gæti hagað sér væri þetta leikmaður sem ég myndi alveg vilja stilla upp í mitt lið.

**Thomas Vermaelen** Sá síðasti af fimm sem ég vel í mitt lið. Ég hef horft talsvert á Arsenal í vetur og hrifist mikið af Vermaelen. Hann er ekki hávaxinn en ég sé alveg hvað Wenger sá í honum. Hann er, ásamt Vidic, sennilega besti dekkarinn í deildinni (á þó eftir að reyna á það með Torres almennilega eins og Vidic komst að á endanum) og þar að auki er hann mjög vel spilandi og skorar sinn slatta af mörkum. Þá er einnig mikilvægt að hafa mann sem getur spilað bakverðina líka og er fjölhæfur í vörnina, okkur vantar að mínu mati slíkan mann í dag.

Hvernig væri svo okkar sterkasta lið ef ég gæti sett þessa fimm í liðið okkar? Ég hugsa að ég myndi stilla því svona upp:

Reina

Johnson – Agger – Vermaelen – Insúa

Mascherano – Essien – Fabregas
Gerrard
Torres – Rooney/Adebayor

Ekki slæmt lið, er það? Eða er ég alveg úti á túni?

Hvílum Torres

Posted on by

Vicente del Bosque vonast til að Fernando Torres spili sem fæsta leiki fyrir Liverpool það sem eftir er tímabilsins. Ég skil hvað hann er að fara, enda þjálfari landsliðs Spánar, en til hvers að koma fram með þetta komment? Ekki er hann að koma með jákvætt innlegg inn í “Club vs. Country” rifrildið sem alltaf poppar upp reglulega. Aldeilis ekki og ég er hræddur um að svona gaurar þyrftu aðeins að horfa í eigin barm, sér í lagi ef þeir ætla sér að félagsliðið spili með þegar kemur að bestu leikmönnunum. Torres kemur oftar en ekki meiddur úr þessum “yndislegu” landsliðshléum. Þar er honum spilað aftur og aftur, og það alveg þrátt fyrir að leikirnir séu algjörlega tilgangslausir með öllu. Þessi tími sem hann er svo frá vegna meiðsla eftir þessi landsleikjahlé, þá er hann á fullum launum hjá Liverpool FC. Með öðrum orðum, það skiptir Vicente del Bosque akkúrat engu málið þótt hann verði meiddur næstu vikurnar, bara að hann verði orðinn heill heilsu fyrir næsta landsleik eftir nokkrar vikur eða mánuði.

Ég hef aldrei farið í grafgötur með mitt álit á þessu landsliðsdæmi öllu saman, ég skil alveg afstöðu hinna, sem fýla þetta allt saman. En þegar verið er að ræða um þetta “Club vs. Country” og þegar menn skilja ekki tregðuna við að hleypa mönnum í tilgangslausa leiki, þá er þetta innlegg frá þessum gaur ekki til að hjálpa. Það hreinlega verður að fara að gera eitthvað í þessum málum fljótlega, þ.e. þegar kemur að því að landsliðin spili hálfmeiddum leikmönnum og þurfa svo enga ábyrgð að taka. Landsliðin þurfa að bera einhverja ábyrgð, þau gera það ekki í dag. Fyrr verður ekki friður um þetta. Ég er nokkuð viss um að Rafa mun ekki verða samvinnuþýðari við þetta innlegg Vicente del Bosque í umræðuna. Landsliðsþjálfarinn hefði getað hugsað þetta og haldið þeim hugsunum fyrir sig, en ég skil ekki ástæðuna fyrir því að tjá sig um þetta í blöðunum.

Föstudagsslúðrið

Posted on by

Þó það tengist okkar ástkæra liði ekki neitt þá má ég til með að leiða hugann frá einhverju öðru en síðasta leik og benda á nýjasta slúðrið. Aftur ætlar Real Madríd að stela einni skærustu stjörnu Manchester United og er talið líklegt að transfer record-ið verði slegið annað tímabilið í röð milli sömu klúbba. Sjá frétt hér.

Annars gleðilegan föstudag.

Arsenal 1 – Liverpool 0

Posted on by

Enn eitt árið heldur Liverpool frá útileik gegn Arsenal án þess að sigra, og í raun enn eitt tapið í Norður-London, sem virðist vera svæði sem Rafa Benitez á erfiðast með að herja á frá því hann kom til Englands.

Byrjunarliðið hans í kvöld var:

Reina

Carragher – Skrtel – Agger – Insua

Lucas – Mascherano
Kuyt – Gerrard – Maxi

N´Gog

Á bekknum: Cavalieri – Kelly – Degen – Aurelio – Babel – Riera og Spearing.

Ég verð að viðurkenna það að mér kom töluvert á óvart að sjá þetta lið í dag. Hundfúll að sjá ekki Riera inná og var handviss að Rafa færi eftir sínum eigin orðum og hvíldi N’Gog sem hann sagði nýlega vanta uppá líkamlega og sé að spila “of mikið” þessa leiktíð. En vissulega vann þetta lið síðasta leik og maður leyfði sér alveg að vonast eftir frammistöðu.

Fyrri hálfleikurinn í þessum leik held ég að hafi verið minnsta skemmtun milli þessara tveggja síðan Benitez byrjaði að klást við Wenger. Satt að segja bara eiginlega ekkert markvert, Bendtner klikkaði þó á færi fyrir heimamenn og gott skot Maxi fór í hönd Fabregas af þó nokkuð stuttu færi og þaðan yfir án þess að við gerðum okkur svo hættu úr hornspyrnunni.

Seinni hálfleikur hófst með töluverðum látum á báða bóga, Lucas skaut rétt yfir, N’Gog var kominn einn í gegn en Gallas náði honum og Rosicky missti boltann of langt frá sér einn í gegn. Var þá að refsa ný-innkomnum Degen sem leysti meiddan Carragher af hólmi. Miðað við fyrstu fréttir í kvöld virðist um aftanlæristognun hjá Carra að ræða sem er ekki gott….

Einhvern veginn fannst mér þetta vera að stefna í að verða 0-0 leikur en á 70.mínútu kom markið sem réð úrslitum. Fabregas slapp úr gjörgæslu Mascherano og sendi út á hægri kant þar sem boltinn var sendur inní. Agger náði ekki að skalla almennilega frá og beint á heimamann sem lagði strax aftur út til hægri þar sem kross kom inn í teiginn á óvaldaðan Diaby sem skoraði auðveldlega.

Eftir þetta ýttu okkar menn liðinu ofar á völlinn og smátt og smátt náðum við meiri pressu gegn Arsenal liði sem fór í að halda forystunni. Á 78.mínútu tók Rafa sig til og skipti! Lucas kom útaf og Babel inná, sennilega breytt í 442 (var samt ekki hreint þannig) og hrósa má Babel karlinum að þessu sinni. Hann var virkilega ferskur og komst næst því að skora þegar Almunia varði á ótrúlegan hátt þrumuskot hans á 85.mínútu. Sló þá neglu hans af 20 metrum í slána og yfir.

Smátt og smátt tikkaði leikurinn út en á 5.mínútu uppbótartíma fengum við fínt aukaspyrnufæri. Eftir töluvert japl hjá Fabregas negldi Gerrard boltanum að marki þar sem Fabregas sló hann frá án þess að Webb gerði nokkuð, enda oft leyfilegt hjá Arsenal gegn okkur að nýta svona veikleika markmannsins þeirra og bara hafa fleiri í marki.

En 0-1 tap staðreynd og ljóst að skammlífir draumar okkar um baráttu um annað en 4.sætið er úr sögunni, í bili allavega.

Viðurkenni vonbrigði með okkar leik í kvöld. Var gríðarlega ánægður með leik liðsins um helgina og átti von um betri tíð. Fyrri hálfleikurinn var reyndar jafn dapur hjá báðum liðum en í seinni hálfleik fannst mér koma í ljós að fleiri góðir fótboltamenn eru í Arsenal. N’Gog einfaldlega er, eins og Rafa sagði sjálfur, ekki líkamlega tilbúinn í alla leiki og að mínu mati alls ekki tilbúinn til að spila 90 mínútur gegn þeim stóru. En hann er efni, það skulum við hafa á hreinu. Degen er einfaldlega vonlaus varnarlega og um leið og hann kom inná hætti Kuyt að hlaupa fram á við. Hins vegar mega þeir eiga drengirnir að þeir börðust af krafti sem er nokkuð sem við greinilega eigum að venjast sem mestu kröfum í bili. Það er bara einfaldlega of mikið hjá okkur að hafa ekki Johnson, Benayoun, Aqua og Torres á meðan breiddin er ekki meiri. Ég var svakalega fúll í gær að Aquilani komst ekki með til London og í ofanálag er mér fyrirmunað að skilja framkomuna gagnvart Riera sem mér hefur fundist leika afar vel frá því hann kom aftur en fékk ekki eina mínútu í kvöld!

Svekktastur er ég að sjá að eftir mesta “kikk” liðsins í vetur er búið að skella því í jörðina aftur og ljóst að vel þarf að nota tímann fram að næsta deildarleik til að ná mönnum upp aftur.

Erfitt finnst mér að pikka út slaka og góða leikmenn. Varnarlínan og markmaðurinn var fín þangað til Degen kom inn, þá átti Arsenal sóknarfæri þar. Lucas og Masch léku sín hlutverk vel en vissulega er liðið töluvert varnarsinnað þegar þeim er stillt upp saman. Kuyt og Maxi áttu að geta gert töluvert betur. Maxi er að mínu mati klókur leikmaður sem mun nýtast okkur en er enn að læra, jafn mikið og Kuyt er fæddur til að leika gegn Everton á hann erfitt með að vera kantstriker gegn Arsenal. Gerrard fannst mér vera mesta hættan okkar og lék svo ágætlega þgar hann var kominn niður á miðju. N’Gog var einfaldlega ekki maður í þennan leik eftir lætin um helgina og Rafa gerði honum ekki greiða með að spila honum allan leikinn. Mann leiksins í kvöld vel ég Javier Mascherano.

Rafa fær svo mínus fyrir að skipta Babel of seint inná og annan fyrir að nýta ekki allar skiptingarnar í svona leik.

Næsta verkefni er Europa League, næstkomandi fimmtudag 18.febrúar kl. 20:05 gegn Unirea frá Rúmeníu á Anfield.

Liðið komið / Twitter yfir leik

Posted on by

Byrjunarliðið er komið:

Reina

Carra – Skrtel – Agger – Insúa

Lucas – Mascherano
Kuyt – Gerrard – Maxi
Ngog

BEKKUR: Cavalieri, Kelly, Degen, Spearing, Aurelio, Riera, Babel.

Ég hafði s.s. 100% rétt fyrir mér með liðið í upphitun í gær. ;)

Ég hvet menn til að skrá sig á Twitter og taka þátt í umræðunum yfir leiknum. Til að taka þátt senda menn bara inn skilaboð með merkinu #kopis í lokin og þá birtast þau á flæði Kop.is á Twitter. Þið getið séð umræðurnar í beinni hér fyrir neðan:

Arsenal á morgun!

Posted on by

Það er komið að næsta leik og hann er af dýrari tegundinni: okkar menn mæta á Emirates Stadium annað kvöld og etja kappi við **Arsenal FC**. Liðin mættust í deildinni í desember á Anfield en þá vann Arsenal þrollaheftan 2-1 sigur þar sem okkar menn hreinlega gáfu þeim stigin. Það hlýtur því að vera hungur í mönnum að leiðrétta þann leiða misskilning og það strax annað kvöld.

Af okkar mönnum er það helst að frétta að Aquilani verður ekki með á morgun, en hann virðist hafa smitast af ælupestinni minni í gær og liggur heima með höfuðið ofan í fötu. Að öðrum mönnum er það að frétta að Torres, Johnson og Benayoun eru enn meiddir og þá verður Kyrgiakos að sjálfsögðu í banni eftir rauða spjaldið um helgina.

Ég ætla því að spá því að Rafa geri aðeins eina breytingu frá liðinu sem hóf leik gegn Everton – setji Skrtel inn fyrir Kyrgiakos – og byrji með eftirfarandi lið á morgun:

Reina

Carra – Skrtel – Agger – Insúa

Mascherano – Lucas
Kuyt – Gerrard – Maxi
Ngog

Þó veit ég ekki hvort Ngog er eitthvað tæpur eftir meiðslin um helgina, en við höfum ekkert heyrt og geri ég því ráð fyrir að hann geti byrjað á morgun.

Af Arsenal er hellingur að frétta. Öfugt við það sem var þegar liðin mættust á Anfield eru það núna Wenger og lærisveinar hans sem standa undir mikilli gagnrýni eftir að hafa verið klárlega lakara liðið gegn bæði Manchester United og Chelsea í síðustu tveimur umferðum. Almunia er að spila skelfilega í markinu, í vörninni stendur ekki steinn yfir steini, miðjan heldur bolta sem fyrr frábærlega vel en er með öllu bitlaus og í framlínunni er ekki nokkurn mann að finna. Svo virðist sem Wenger hafi í kjölfar meiðsla Van Persie ákveðið að þeir þyrftu ekki að nota framherja til að vinna deildina og það er að koma þeim í koll núna.

Ofangreind atriði þýða það að okkar menn eiga möguleika á að ná fyrsta sigrinum á útivelli gegn Arsenal í stjóratíð Benítez en að mínu mati skipta þau litlu máli þegar mögulegt byrjunarlið Arsenal á morgun er skoðað:

Arshavin

Arshavin – Arshavin – Arshavin – Arshavin

Arshavin – Arshavin – Arshavin – Arshavin

Arshavin – Arshavin

Þetta er að mínu mati stórhættulegt lið.

**MÍN SPÁ:** Ég vildi óska þess að ég gæti verið bjartsýnn og spáð okkur sigri á morgun. Staðreyndin er hins vegar sú að ég myndi fyrirfram gera mig sáttan við jafntefli á morgun en óttast slæmt tap ef ákveðinn leikmaður, sem ég hef ekkert minnst á í leikskýrslunni hér að ofan, verður í sama stuði og venjulega gegn okkur.

Mín spá er því sem hér segir – 1-1 jafntefli ef Arshavin spilar ekki, 3-0 tap ef hann spilar. Segi það, skrifa og meina.

Vona að ég hafi samt rangt fyrir mér. Það væri ekki leiðinlegt að taka þennan leik á morgun, hirða þriðja sætið af Arshavenal og brosa í gegnum tárin í vor. Það er alltaf von.

YNWA

Kop.is á Twitter

Posted on by

Eru ekki örugglega allir á Twitter?

Twitter er síða sem býður í raun upp á lifandi samtöl á milli fólks í rauntíma. Hægt er að senda inn litlar uppfærslur – aðeins 140 stafbil í einu – og er tilgangurinn sá að hafa þetta stutt, skýrt og beint að efninu. Það er erfitt að útskýra hvers vegna þetta er svona góð samskiptasíða en um leið og maður byrjar verður maður alveg ánetjaður. Ég hvet alla til að prófa.

Við sem skrifum á Liverpool Bloggið erum á Twitter og höfum nú stofnað sérstaka síðu þar sem við getum fylgst með allri Kop.is-tengdri umræðu á Twitter. Þá síðu má sjá hér eða í valmyndinni efst hér á síðunni. Það getur hver sem er tekið þátt í umræðunni, það eina sem fólk gerir er að skrifa eitthvað um Liverpool og enda skilaboðin á að skrifa #kopis.

Þannig að ef ég ætlaði t.d. að skrifa um leikinn í gær og láta það birtast á Kop.is-umræðunni á Twitter myndi ég t.a.m. skrifa eftirfarandi skilaboð: Frábær leikur í gær, virkilega ánægður með að vinna Everton tvisvar í vetur. #kopis

Ég mæli með að sem flestir skrái sig á Twitter og taki þátt í umræðunum. Það er erfitt að útskýra hvers vegna þetta er svona skemmtilegt en trúið mér, þegar þið byrjið verður erfitt að hætta. Það eru til frábær Twitter-forrit fyrir flesta síma þannig að megnið af umræðunum berast beint í símann hjá manni, maður bæði les uppfærslur þar og skrifar á móti á fullu yfir leikjum.

Endilega skráið ykkur, skoðið ykkur um og sendið okkur hinum skilaboð og/eða fylgist með streyminu okkar. Við erum með eftirfarandi notendanöfn:

* @kristjanatli
* @einarorn
* @ssteinn
* @babuEMK
* @maggimark
* @magnusagnar

Ef þið skoðið svo þau streymi sem við erum að fylgja getið þið fundið fullt af sniðugu Liverpool-tengdu fólki sem er gagnlegt að hafa á Twitter. Og ekki gleyma að setja #kopis í endann á Liverpool-tengdum skilaboðum ykkar svo þau birtist á Kop.is-umræðunni á Twitter.

Liverpool 1 – Everton 0

Posted on by

Everton er lið frá Liverpool-borg sem spilar í ensku Úrvalsdeildinni. Þetta lið hefur ekki tapað leik síðan þeir töpuðu fyrir erkifjendunum, stóra bróðurnum í Liverpool FC, í lok nóvember. Í dag komu þeir í heimsókn á Anfield og hvað haldiði að hafi gerst? Jú, þeir **töpuðu aftur** fyrir Liverpool FC, 1-0 í þetta skiptið, í ótrúlegum baráttuleik.

Rafa Benítez stillti upp (líkamlega) sterku byrjunarliði í dag:

Reina

Carragher – Kyrgiakos – Agger – Insúa

Lucas – Mascherano
DIRK FKN KUYT – Gerrard – Maxi
Ngog

**BEKKUR:** Cavalieri, Skrtel (inn f. DIRK FKN KUYT undir lokin), Aurelio (inn f. Maxi undir lokin), Degen, Aquilani, Riera, Babel (inn f. Ngog eftir 65 mín.).

Fyrri hálfleikurinn einkenndist af svakalegri baráttu. Við urðum vitni að algjörri styrjöld inná vellinum þar sem lítið fór fyrir marktækifærum og flæðandi fótbolta og þess í stað voru tæklingarnar fljúgandi til hægri og vinstri. Það er eðlilegt í þessari viðureign en þegar þetta gerist er algjörlega nauðsynlegt að dómarinn haldi haus og hafi stjórn á framvindu mála. Því miður gerðist það hins vegar í dag að dómari leiksins, Martin Atkinson, gjörsamlega skeit upp á bak og hafði enga stjórn á nokkrum sköpuðum hlut.

Rennum yfir þetta í réttri röð. Snemma leiks fær DIRK FKN KUYT fyrsta gula spjaldið fyrir að stöðva upphlaup Landon Donovan, rétt spjald þar. En stuttu seinna straujar Leighton Baines framherjann okkar, David Ngog, úti við hliðarlínu og sleppur alveg (Ngog meiddist þar og þurfti á endanum að fara útaf snemma í síðari hálfleik). Áfram halda tæklingarnar að fljúga og eftir að Phil Neville brýtur á DIRK FKN KUYT á miðjum vallarhelmingi Everton, og eftir að dómarinn er búinn að flauta og dæma aukaspyrnuna, kemur Marouane Fellaini aðvífandi og sparkar í andlitið á DIRK FKN KUYT! Ekkert spjald þar og Kuyt meira en lítið fúll út í Fellaini enda blóðugur um nefið og vel rispaður/bólginn undir vinstra auga. Ótrúlegt að dómarinn hafi ekkert gert við Fellaini þarna.

Svo komu stóru atvik hálfleiksins um miðbikið. Fyrst fer Steven Pienaar með sólann hátt á lofti inn í miðjan sköflunginn á Javier Mascherano svo sá argentínski liggur eftir meiddur og með mölbrotna legghlíf. Jafnvel þótt dómarinn hefði ekki séð það vel (sem var ekki málið, endursýningar sýndu að hann var með 100% útsýni yfir þetta) hefði átt að nægja honum að líta á mölbrotna legghlíf Mascherano til að sjá hversu há tækling Pienaar var. Af einhverjum óskiljanlegum ástæðum gaf Atkinson honum samt bara gult þegar hann átti að fá beint rautt.

Mínútu síðar fékk Carra svo næsta gula spjald fyrir að strauja Pienaar. Hárréttur dómur og hárrétt tækling hjá Carra, það á ekkert að láta aumingja eins og Pienaar komast upp með svona hegðun á Anfield.

Það var svo eftir um 33 eða 35 mínútur sem þeir Sotirios Kyrgiakos og áðurnefndur Marouane Fellaini, sem átti klárlega að vera farinn út af ásamt Pienaar félaga sínum á þessum tímapunkti, fóru saman í tæklingu. Kyrgiakos fór með báða sóla á undan sér og náði að snúa upp á ökklann á Fellaini á sama tíma og Fellaini fór klárlega í tæklinguna með það fyrir augum að traðka á legg Kyrgiakos. Fyrst sýndist manni tæklingin vera 100% brot hjá Fellaini og að hann gæti ekki annað en fengið beint rautt fyrir þessa árás en endursýningin sýndi svo að Kyrgiakos var líka brotlegur og því hefði réttur dómur verið beint rautt á báða aðila. Hvað gerðist? Atkinson sýndi Kyrgiakos beint rautt þar sem hann stóð upp og benti á stóran skurð á legg sínum (þurfti að fara beint inn í klefa og fá nokkur spor saumuð) … en Fellaini slapp algjörlega, fékk ekki einu sinni tiltal!

Reyndar fór það svo að Fellaini var líka meiddur eins og Kyrgiakos og gat ekki haldið áfram leik en það breytir því ekki að á þessum tímapunkti áttu Fellaini, Pienaar og Kyrgiakos að vera farnir út af með rautt spjald. Því miður fyrir okkur var dómarinn ekki beint hlutlaus í dag (segi það og meina það, svona dómgæsla er óverjandi) og því var bara Kyrgiakos farinn útaf og okkar menn orðnir einum færri. Þannig var staðan svo í hálfleik, 0-0 og við einum færri eftir algjöra styrjöld.

Seinni hálfleikurinn var svo aðeins rólegri og menn virtust reyna meira að spila fótbolta. Sennilega hafa báðir stjórarnir beðið leikmenn um að róa sig niður svo Atkinson myndi ekki rúlla fleiri spjöldum á loft. Það sýndi sig líka að um leið og liðin fóru að spila fótbolta var aðeins eitt lið á vellinum … Liverpool. Okkar menn sóttu ákaft eftir hlé og komust yfir á um 59. mínútu þegar Gerrard tók hornspyrnu frá vinstri beint inn á markteig þar sem **DIRK FKN KUYT** lét hrindingar Tim Howard og ljótleika Phil Neville ekki koma sér úr jafnvægi heldur skallaði í fjærhornið. 1-0 fyrir Liverpool!

Eftir þetta seig Liverpool-liðið í rólegheitum aftar á völlinn og barðist fyrir sínu. Ngog fór útaf og Babel kom inná og ógnaði ágætlega einn í framlínunni, slapp meira að segja einu sinni aleinn innfyrir með boltann en línuvörðurinn dæmdi ranglega rangstæðu á hann. Everton-liðið gat hins vegar ekki neitt þrátt fyrir að vera einum fleiri og aðeins langskot Yakubu með vinstri, sem Reina varði vel, ógnaði marki okkar manna. Undir lokin tókst svo Atkinson að spjalda Gerrard og Anichebe fyrir stympingar þar sem Gerrard átti að hafa farið í Pienaar eftir að hann tók boltann en dómarinn dæmdi ekkert á það (gott á Pienaar) en hann spjaldaði Gerrard samt fyrir að hafa tekið þátt í stympingunum sem fylgdu í kjölfarið þegar endursýningin sýndi klárlega að Gerrard gerði ekkert nema yppa öxlum yfir hasarnum. Fáránleg dómgæsla, það virtist vera allan leikinn sem Atkinson þyrði aldrei að dæma bara á Everton-liðið án þess að refsa Liverpool-liðinu eitthvað líka. Meira en lítið pirrandi.

Undir lokin fékk Pienaar svo karmað sitt þegar hann réðist á Gerrard á svona 95. mínútu. Atkinson sýndi honum þó ekki beint rautt sem hefði gefið þriggja leikja bann eins og Kyrgiakos fékk heldur seinna gula spjaldið sitt og missir hann því aðeins úr einn leik eftir morðæðið sitt í dag, á meðan við verðum án Kyrgiakos í þrjá leiki.

Helvítis Pienaar. Helvítis Atkinson. Helvítis Everton.

Lokatölur 1-0 enda við hverju bjuggust menn? Að Everton gæti unnið þennan leik? Hafa þeir ekki bara unnið einu sinni gegn Rafa Benítez, í fyrsta leik hans með Liverpool á Goodison í desember 2004? Og svo ekkert síðan þá? Plís, kunniði annan?

**MAÐUR LEIKSINS:** Mig langar til að segja ALLT LIÐIÐ hérna, þar sem það átti nákvæmlega enginn neitt minna en frábæran leik í dag og liðið var svo ótrúlega vel stemmt að það hálfa væri nóg. Mig langar líka til að segja JAVIER MASCHERANO hérna því eftir brotið á Pienaar og rauða spjaldið á Kyrgiakos fór Carra inn í miðvörðinn og Masch í bakvörðinn og tók að sér að ÉTA Pienaar það sem eftir lifði leiks. Hann gerði það að markmiði sínu í lífinu að Pienaar fengi ekki að hafa nein áhrif á leikinn eftir að hann átti að fjúka útaf og Mascherano stóð við það.

En í dag getur aðeins einn maður verið maður leiksins …

Maður leiksins heitir DIRK fokking KUYT. Hann fékk spark í andlitið frá Fellaini í fyrri hálfleik, barðist eins og ljón í vörn og sókn allan leikinn, skoraði sigurmarkið í dag (er það í þriðja eða fjórða sinn sem hann klárar Everton fyrir okkur?) og hljóp beint að bekk Everton og fagnaði með því að öskra á Fellaini og benda á hann. Já, og þetta var fimmtugasta mark Kuyt fyrir okkur og hann er núna kominn með tíu mörk á tímabilinu sem hægri kantmaður.

Algjörlega ómissandi leikmaður í þessu liði og bæði andlegur og líkamlegur leiðtogi okkar í dag. Held ég hafi aldrei séð hann betri fyrir Liverpool, sveimérþá sveiattan!

Framundan eru tveir hrikalegir útileikir gegn Arsenal og Man City sem munu hafa ansi mikið að segja um stöðu okkar í deildinni í vor. En í dag gleðjumst við: við gleðjumst því liðið er ósigrað í sjö deildarleikjum og hefur unnið fimm þeirra, við gleðjumst því liðið hélt í dag hreinu í sjötta leiknum af þessum sjö, við gleðjumst því við erum (tímabundið) í 4. sætinu á nýjan leik og við gleðjumst af því að LIVERPOOL TAPAR EKKI FYRIR EVERTON UNDIR STJÓRN BENÍTEZ!

Eigið góða helgi. YNWA. ;)

Chamakh til Arsenal + Byrjunarliðið gegn Everton

Posted on by

“My choice is to join Premier League and if I could choose, I will go to Arsenal.”

Þetta segir Marouane Chamakh í frétt Sky Sports í dag. Þannig að við getum tekið hann af borðinu þangað til e-ð annað kemur í ljós.

LEIKURINN. Einblínum frekar á hann. Byrjunarliðið er komið og það er aðeins öðruvísi en menn bjuggust við:

Reina

Carragher – Kyrgiakos – Agger – Insúa

Mascherano – Lucas
Kuyt – Gerrard – Rodriguez
Ngog

**BEKKUR:** Cavalieri, Skrtel, Degen, Aurelio, Aquilani, Riera, Babel.

S.s., Agger kemur óvænt beint inn í byrjunarliðið á kostnað Skrtel en ekki Kyrgiakos, Aquilani er á bekknum en Ngog er inni og Maxi er valinn fram yfir Riera. Þetta verður áhugavert.

Áfram Liverpool! YNWA!

Everton á morgun

Posted on by

Ég hata derby slagina, hata þá. Ég hata þá jafn mikið fyrirfram eins og ég elska þá eftir sigra okkar á þessum bláu nágrönnum okkar. Ég hef oft lent í rökræðum um þessa leiki og ég hef ekki falið þá heitu ósk mína að Everton myndi falla um deild. Ég hef þá fengið tilbaka: “En þá verða engir derby leikir”. Vitið þið hvað? Ég er svo algjörlega tilbúinn í að fórna þeim 2svar á ári fyrir það að þurfa ekki að vera með þennan ferlega hnút í maganum marga daga fyrir þessa leiki. Það er ekkert flókið með það, það að tapa fyrir Everton er það versta sem ég get hugsað mér þegar kemur að fótboltanum, langversta.

Það er eiginlega allt varðandi þessa mótherja sem ég þoli ekki, allt nema hvað að ég á nokkra góða félaga sem styðja þetta lið. Skil reyndar ekki hvernig það að hægt, en sumu verður ekki breytt. Hver hefur sínar ástæður fyrir því af hverju eitthvað fer í taugarnar á þeim og hvaða lið þeir þola gjörsamlega ekki. Ég hef svo sannarlega mínar, og þær eru ekki komnar til vegna þess að “við eigum að hata nágranna okkar út af borgarrígnum”. Því fer fjarri. Mér finnst til að mynda barnalegt þegar mér er sagt að það sé barnalegt að “þykjast” hata nágranna okkar. Eins og áður sagði, þá hefur hver sínar ástæður, ef einhverjum er “alvegsama” um Everton, þá er mér líka alveg sama.

Já, ég væri til í að sleppa við þessa leiki 2svar á tímabili, svo sannarlega. Þessir leikir snúast ekki um það hverjir eru meiddir og hverjir ekki. Þeir snúast heldur ekki um það hversu gott “run” hefur verið hjá liðunum. Everton gekk best gegn okkur þegar þeir gátu ekki boru í deildinni og voru rétt fallnir. Þeir hafa ekki unnið í deildinni á Anfield síðan 1999, Fowler sé lof. En á morgun skiptir það akkúrat engu máli, ENGU. Á morgun snýst allt um vilja, að hafa viljann að vopni, fórna sér í alla bolta, hefja leikinn um leið og dómarinn flautar hann á og hætta að berjast þegar leikurinn er flautaður af. Ég krefst þess að menn sýni hjarta, reyndar með smá dassi af hugsun líka. Everton hafa ekki tapað leik síðan við unnum þá á Goodison í desember. Gott. Kominn tími til að leggja þá aftur.

Ég vil ekki sjá smettið á Tim Cahill brosandi eftir að hafa skorað, hann er holdgerfingur Everton. Svipað og Drunken Ferguson var á sínum tíma. Ég vona líka svo sannarlega að Senderos fái að spreyta sig í vörninni, þá gæti meira að segja Dirk Kuyt litið út fyrir að vera spretthlaupari í hæsta gæðaflokki. Annars þurfum við einnig á Stevie G að halda í leiknum, hann er fyrirliðinn og á að draga vagninn, sér í lagi í svona leikjum. Hann er búinn að alast upp í þessu umhverfi og þarf að smita því út í félaga sína, mikilvægi leiksins etc…

Við unnum í desember, frábær sigur. Hann var meira að segja enn sætari þegar horft var til spilamennskunnar. Ég talaði um það hérna í upphitun fyrir Bolton leikinn að ég vildi umfram allt góða spilamennsku, engan “scrappy” sigur. Nú er því ekki svo farið. Mér gæti hreinlega ekki verið meira sama um hvernig sigur gegn Everton kemur, hann mætti vera eins ljótur og hugsast getur, svo fremi að við vinnum. Það er það eina sem skiptir máli. Til þess að svo megi verða, þá VERÐA leikmenn Liverpool FC að leggja sig alla fram, keyra yfir þá með baráttuna að vopni. Ég vil sjá Gollum gráta. Ég vil sjá Leif Garðarsson gráta…AFTUR (þ.e.a.s. ef Stöð2Sport2 menn verða svo afburða greindarskertir að kalla hann í settið aftur).

Hvað um það, er búinn að rausa allt of mikið, en það er væntanlega vegna þess að maður þarf bara að fá útrás og hvar er betra að gera það en í upphitun á blogginu okkar. Hvernig er svo staðan á leikmönnum okkar? Það virðist vera að rofa til í meiðslamálunum, líklegast bara 3 meiddir og er það met að ég tel (allavega í einhvern tíma). Það er ljóst að Torres, Johnson og Benayoun munu ekki taka þátt í þessum leik. Ég er sjálfur í miklum vafa með það hvernig Rafa muni stilla þessu upp. Ég er ekki frá því að ég yrði sammála honum ef hann myndi stilla þeim Lucas og Javier upp saman á miðjunni, því þetta verður þvílík barátta um miðjuna. Tveir duglegir og varnarsinnaðir miðjumenn sem láta engann í friði allann leikinn. En auðvitað langar mann að sjá Alberto þarna inni á miðjunni með alla sína hæfileika. Hann er búinn að byrja síðustu 4 leiki á Anfield og því ekki lokum fyrir það skotið að hann haldi því áfram.

Vörninni verður ekki hróflað við, held að hann muni ekki henda Agger inn í slaginn strax, þó svo að ég myndi glaður vilja sjá hann inn fyrir Skrtel. En á móti kemur, þá hefur vörnin verið að halda undanfarið og því engin ástæða til að breyta henni. Þess vegna er tvennt í stöðunni. Annars vegar að það sé hefðbundin uppstilling, þ.e.a.s. Gerrard í holunni, Ngog uppi, Kuyt hægra megin, Riera vinstra megin og þeir Lucas og Javier á miðjunni (nema straight swap Lucas vs. Alberto eigi sér stað). Eða þá uppstilling sem ég væri algjörlega til í að sjá. Halda þeim Lucas og Javier saman á miðju, senda Stevie út á hægri kant, Alberto í holuna og Dirk fram. Hvora á ég nú að taka? Hausinn segir fyrri, en hjartað seinni. Hvort á maður að fara eftir hausnum eða hjartanu? Þar sem ég er búinn að vera að predika um að leikmenn verði að sýna hjarta í leiknum, þá ætla ég að fara fram með gott fordæmi og setja það lið inn, þó svo að hitt sé líklegra:

Reina

Carra – Skrtel – Soto – Insúa

Mascherano – Lucas
Gerrard – Aquilani – Riera
Kuyt

Bekkurinn: Cavalieri, Agger, Degen, Aurelio, Maxi, Babel og Ngog

Leikurinn á morgun er fáránlega þýðingarmikill, alveg fáránlega. Ekki nóg með að þessir bláu séu í heimsókn, heldur er þetta líka leikur upp á líf og dauða í deildinni, allavega einn af slíkum. Þessir 3 næstu leikir okkar geta ráðið örlögum okkar varðandi þetta blessaða Meistaradeildarsæti, ekki flókið. Við VERÐUM að ná góðum stigafjölda út úr þessum þremur leikjum, því tapist þeir allir, þá er baráttan nánast töpuð, þetta er ekki flóknara en það. Nú verða menn að sýna úr hverju þeir eru gerðir, allir sem einn. Sigur á Everton á morgun myndi gera svo fáránlega mikið fyrir sjálfstraust liðsins á þessum tímapunkti að það hálfa væri svona c.a. 10 sinnum nóg. Auðvitað mun sigur á morgun ekki þýða að menn geti farið afslappaðir í aðra leiki, síður en svo, en í þessum bransa þá skiptir sjálfstraust öllu máli og hvaða sigurleikir haldið þið að gefi mesta sjálfstraustið? Jú, derby leikir.

Hvernig spái ég? Ég get bara engan veginn fengið af mér að spá öðru en okkur sigri. Ég ætla að segja að við sigrum þennan leik 2-1. Ég held að hann Dirk blessaður haldi uppteknum hætti og haldi áfram að angra stuðningsmenn Everton með marki, svo held ég að fyrirliðinn stígi upp og setji eitt kvikindi. Ætli það verði ekki helvítið hann Tim Cahill sem skorar fyrir þá.

Koma svo, fulla ferð, allt í botn, with hope in your heart.

SOS samtökin

Posted on by

Nú er ég einn af þeim sem þráir það heitt og innilega að Liverpool FC komist í hendur alvöru eigenda, því ekki hafa þeir sem eiga félagið núna sýnt það að þeir eigi það á nokkurn hátt skilið. Ég ætla ekki að fara neitt nánar ofan í þeirra gjörðir, eða öllu heldur “ekki gjörðir” frá því þeir eignuðust félagið. Svikin loforð og innantómt raus um hitt og þetta er eitthvað sem flestir stuðningsmenn ættu að vita. The Liverpool Way er eitthvað sem þeir virðast ekki vita hvað er.

En ég hef fylgst talsvert með samtökum sem kalla sig SOS (Spirit of Shankly) og til að byrja með var ég nokkuð ánægður með þessi samtök. Ég fór þó að efast um þau fyrir tæpu ári síðan, hvað í rauninni þau stæðu fyrir, þ.e.a.s. annað en það sem þeir útlista á síðunni sinni, því ég tel þá ekki vera að fara eftir þeim markmiðum sínum. Það fyrsta sem stakk mig var þegar þeir stóðu fyrir mótmælum og vildu að RBS (Royal Bank of Scotland) myndu ekki endurfjármagna lánin sem þeir bakkabræður fengu (ekkert tengt Bakkavör þó). Það er nokkuð ljóst að ef þau hefðu ekki verið endurfjármögnuð, þá hefði það leitt til alvarlegra hluta, líklega greiðslustöðvun og annað því líkt. Hvað gerist þá? Jú, þá myndi félagið fá -10 stig á töfluna áður en mótið hefði hafist í haust. Er hagsmunum Liverpool FC best borgið með því? Nei, ég get bara ómögulega séð það.

Það nýjasta er að nú fengu þeir viðtal við Christian Purslow þar sem þeir fengu að koma fram með spurningar til hans um félagið, rekstur þess og eigendamál. Þar kom skýrt fram að hans megin markmið væri að koma með nýja fjárfesta inn í félagið, til að lækka skuldir, til að bæta rekstrargrundvöll félagsins, til að geta sem fyrst hafið byggingu á nýjum velli, til að geta orðið öflugri á leikmannamörkuðum og síðast en ekki síst, til að minnka eignarhlut þeirra Gillett og Hicks. Það má vera alveg ljóst af þessum “meeting minutes” að verið er að vinna hörðum höndum við að ná þessu í gegn. Purslow samþykkti ekki fundargerðina sem þeir settu fram, kom með aðra útgáfu af henni, sem í megin atriðum er svipuð, þ.e.a.s. útkoman er svipuð. Það sem var í SOS fundargerðinni virðist vera nánar “off the record” samræður sem snúa beint að eigendunum. Hvort sem Purslow hefur sagt nákvæmlega það sem SOS tiltaka, þá er ég á því að það skipti ekki höfuð máli. Hann er í rauninni starfsmaður eigendanna og ég sé bara ekki hvaða tilgangi það þjónar hjá SOS að reyna að reka rýting á milli hans og eigendanna, sér í lagi þegar horft er til þess hvað hlutverk hans er þessa dagana, þ.e. að koma inn með nýja fjárfesta.

Því er ég enn og aftur ekki að skilja tilganginn hjá SOS. Jú, gott og vel, þeir vilja Kanana út, það vilja flestir. En þeir eru búnir að fá það staðfest að það sé verið að vinna í þeim málum, og það er nokkuð ljóst að þessi framkoma samtakanna er ekki að hjálpa til við það. Skipulögð mótmæli og það að eigendur félagsins (hversu óvinsælir sem þeir eru) þurfi lögreglufylgd út um sérútganga á Anfield, eru eitthvað sem dregur ekkert að aðra fjárfesta. Myndi maður ekki hugsa sig tvisvar um, ef þetta er það sem maður ætti von á ef maður ætti orðið stóran hlut í félaginu og myndi gera eitthvað sem svona samtök væru ekki að sætta sig við?

Þessi samtök voru með mikið fylgi og mikinn velvilja hjá stórum hópi stuðningsmanna þegar þau fóru af stað. Mótmælin í byrjun voru fín, komu á framfæri að óánægja væri með störf þeirra. Nú þegar búið er að greina skýrt frá því að félagið sé til sölu að hluta til eða í heild sinni, þá ætti mál að vera að linni í bili og menn ættu að fá að vinna úr þessum málum og reynt að finna sem bestu lausn fyrir LIVERPOOL FC. Svona framkoma eins og með þessa fundargerð, hún hjálpar ekki til, hún skemmir fyrir. SOS samtökin þurfa heldur betur að endurskoða sín mál til að ég geti sagt að ég fylki mér á bak við þau.

En nýja eigendur takk, sem fyrst.

Búið að ganga frá samning við Milan Jovanovic?

Posted on by

Samkvæmt frétt í Daly Post North Wales sem er blað ekki svo fjarri Liverpool þá er búið að ganga frá samkomulegi við Serbneska landsliðsmanninn Milan Jovanovic.

Ég veit sannarslega ekkert um það hvað þetta blað er áreiðanlegt en þennan link sá ég fyrst á Twitter hjá Paul Tomkins (og News Now) svo kannski er eitthvað að marka þetta.

Um þennan leikmann veit ég voða lítið annað en að hann hefur skorað í öðrum hverjum leik með sterku Standard Liege liði. Hann spilaði gegn Liverpool ekki alls fyrir löngu og hann hafnaði tilboði frá Everton fyrir ári með því að segja að Everton væri ekki stór klúbbur.

Sjáum hvað setur en þetta er að öllum líkindum næsti leikmaður sem gengur til liðs við Liverpool eftir að serbar hafa lokið leik á HM í sumar.

Hvort sem hann er kominn eða ekki þá er þegar búið að snara upp lagi fyrir hann

Continue reading →

Að kaupa eða kaupa ekki

Posted on by

Það er orðið ljóst að ekki bættust við fleiri leikmenn í leikmannahóp Liverpool í janúar, umfram Maxi Rodriguez. Ég held að flestir stuðningsmenn Liverpool hafi vonast eftir að fá framherja til liðsins, sér í lagi þar sem Fernando Torres hefur verið í postulínsleik meira og minna í 2 ár. Mikið lifandis skelfing hefði verið gott að hafa hann heilan allan þennan tíma. Er nokkuð viss um að staða okkar væri talsvert betri, en það þýðir ekki að fást um það, meiðsli eru hluti af þessu öllu og sumir eru bara óheppnari en aðrir þegar kemur að þeim. Við höfum þurft að stóla á unglinginn David Ngog, en þó svo að hann sé efnilegur, þá er ég nokkuð viss um að flestir, ef ekki allir, hefðu kosið að hafa öflugra “back-up” til taks.

Ég er einnig nokkuð viss um að Rafa Benítez er sammála okkur, ef hann hefði kost á að kaupa góðan framherja, þá myndi hann gera það. Það eru fyrst og fremst tvær ástæður fyrir því að það hefur ekki gerst. Peningaleysi er aðal ástæðan, og hin er svo afleidd ástæða, eða sú að þetta er janúar glugginn, erfiðara er að ná um góða leikmenn og þeir kosta enn meira en venjulega. Lið eru hreinlega lítið fyrir það að veikja lið sín, ég tala nú ekki um alvöru lið sem eru að berjast um titla eða Evrópusæti í sínum deildum. Það er jú bara þannig að flestir af þeim framherjum sem eru í þeim klassa sem við viljum fá, eru að spila með góðum liðum.

Þetta er enn einn gluginn sem við komum út úr í plús þegar kemur að leikmannaviðskiptum. En segjum sem svo að við hefðum getað eytt þessum rúmum 8 milljónum punda sem fengust inn í kassann, í framherja. Hvers lags framherjar fást á 8 milljónir punda? Kenwyn Jones hjá Sunderland átti að kosta heilar 12 milljónir punda og í mínum huga er hann örlítið upgrade af Emile Heskey. Svei mér þá, ef ég er ekki bara sáttur við að hann kom ekki til liðsins. Það er nefninlega alveg ljóst að leikmenn eru ekki keyptir til 4 mánaða og ég hef akkúrat enga trú á því að lið eins og Sunderland myndi lána okkur hann (eins og kom svo í ljós). Einhverjir vildu fá Ruud Van Nistelrooy, en honum var boðinn feitur 2ja ára samningur hjá Hamborg og talsverð áhætta hefði verið að fara út í slíkan samning.

Aðal málið er nefninlega peningalegs eðlis. Mönnum hefur verið tíðrætt um lánssamninga, þeir kosta líka peninga og þeir eru eitthvað sem hafa verið vandfundnir á Anfield undanfarið. Eitthvað sem maður er auðvitað drullu fúll með, ég er algjörlega drullufúll yfir því að fá ekki góðan framherja inn í janúar, en ég er þó á því að við erum betur settir með að sleppa því, heldur en að kaupa einhvern innan okkar “budget” eins og staðan er núna. Torres er væntanlegur í lok mánaðarins, en það tekur jú alltaf einhvern tíma líka fyrir nýjan mann að koma inn í liðið, þannig að fyrst ekki var hægt að kaupa inn hreinlega mann sem við ætlum að nota næstu árin, þá er kannski bara betur heima setið en af stað farið.

En það er ljóst, sumarglugginn næsti þarf að vera ansi hreint öflugur, svo mikið er víst. Það verða að vera peningar til taks þá ef við ætlum okkur að keppa á toppnum.

Síðari hluti tímabils – eftir gluggann.

Posted on by

Þá er janúarglugginn lokaður og ljóst að þann fjórða í röð fáum við meiri pening í kassann en við eyddum, núna á bilinu 6.5 – 8.4 milljónir, eftir því hvaða fréttum maður trúir. Því miður segi ég, því að mínu mati þurftum við styrkingu til að gera alvöru atlögu að því að ná okkar sess í topp fjórum.

Ekki það að það sé útilokað, alls ekki, en veturinn hefur gengið þannig að mér fannst þurfa hjálp.

Á netrúntinum í morgun rakst ég á þessa þýðingu IM Scouting á viðtali í spænska fótboltablaðinu AS við Christian Purslow.

Ég hef áður nefnt það hér að ég tek mikið mark á Purslow sem kanarnir treysta fyrir rekstri klúbbsins. Þessi náungi hefur náð miklum árangri á viðskiptasviðinu, ekki pappírsárangri, og er ákaflega “driven” einstaklingur, eldrauður áhangandi í gegn sem er ákveðinn í að ná árangri með félagið í heild. Í viðtalinu kemur fram að hann hefur aldrei hugsað útí að breyta um stefnu í þjálfaramálum félagsins og Torres og Gerrard eru ekki á leið í burt. Setningin sem mér líkaði var “we are not a selling club”…. Nokkuð sem stendur í stúf við það sem á undan er gengið í raun, en vonandi ávísun á að verið sé að horfa til stórs sumars.

Hann kemur svo með forgangsröð félagsins í dag. Þá meina ég ekki endilega liðsins, en félagsins. Hún er:

1.skref – nýir fjárfestar komi til félagsins.

2.skref – framkvæmdir við nýjan völl hefjast.

3.skref – auka við hagnað félagsins svo að hægt sé að styrkja liðið verulega.

Hvursu hratt segir Purslow ekki. Hann hefur þó ekki breytt fyrri ummælum sínum varðandi nýja fjárfesta svo að reikna má áfram með að við fáum af því fréttir nú í febrúarmánuði. Enn er talað um að framkvæmdir við völlinn hefjist í apríl og þá er spurningin hvort við náum þannig að taka 2 skrefin fljótlega og eigum svo sumarið til að styrkja liðið?

Enn tygg ég sömu tugguna með það að ef að menn úti eru sallarólegir yfir þessu plani hef ég alltaf verið sá sem trúi á langtímamarkmið og að góðir hlutir gerist hægt. Auðvitað er ég orðinn brjálaður á að vinna ekki titla, en ég man líka eftir gúrkutíðinni hjá Souness og Evans, sem stóð í 10 ár og vill bara alls ekki lenda í því aftur. Félagið, ekki endilega liðið, er á allt öðrum stað en þá og vonandi ganga þessi skref það hratt fyrir sig að við þurfum ekki að velta fyrir okkur í ágúst hvað verður, heldur horfa á leikmannahóp með miklu meiri breidd og reynslu en sá sem við eigum núna.

Á rúntinum rakst ég líka á grein Ian Rush sem spjallar um vangaveltur um hvort Rafa fer til Juve og þar sem karlinn er sammála mér að við hefðum átt að kaupa senter.

Svo vann varaliðið okkar Bolton í gær í átta liða úrslitum Lancashire cup, 2-0 með mörkum David Amoo og Damien Plessis. Stóru fréttirnar eru þær úr leiknum að þeir Martin Kelly og Nabil El Zhar náðu að leika leikinn og ætti því að styttast í að þeir fái leikmínútur með aðalliðinu.

Deadline day (Uppfært: lokað)

Posted on by

19:16

(Kristján Atli) – Nú er rúmur klukkutími síðan glugginn lokaði og enn heyrast engar fréttir af neinu öðru en sölunni á Buchtmann til Fulham. Ryan Babel uppfærði Twitter síðdegis og sagðist vera að keppa við vin sinn í kappsundi þannig að hann er væntanlega ekki í Tyrklandi að klára læknisskoðun og samning, og ekkert hefur heyrst af áreiðanlegum miðlum af þessum Grikkja sem átti að vera á leiðinni til okkar.

Með öðrum orðum – EKKERT. Málið dautt, allt dautt. Janúar 2010 er liðinn og í þessum glugga seldum við Dossena, Voronin og Buchtmann fyrir samtals 8.2m punda og fengum svo Maxi Rodriguez frítt. Þetta var fjórði félagaskiptaglugginn í röð sem við komum út í plús, nettó, á leikmannamarkaðnum.

Það er eins gott að eigendurnir standi við stóru orðin sumarið 2010. Ef næsta sumar líður án þess að bygging nýja vallarins sé hafin, án þess að 100m punda fjárfestingin sé komin í hús og án þess að Rafa hafi fengið að prófa að vera í kredit eins og eitt sumar á markaðnum, þá verður allt gjörsamleg tjónað á meðal stuðningsmanna Liverpool.

Maxi Rodriguez. Allt og sumt. Vonum að það skili þeim árangri sem eigendurnir krefjast í vor.

15:55

Þar með þarf ég víst að hlaupa á fund, en ég er handviss að meistari KAR uppfærir ef eitthvað gerist. Nú í blálok dagsins birtist heitt slúður um að Arda Turan sé að detta inn á Anfield í lok dags í skiptum fyrir Ryan Babel og pening.

Held að svoleiðis díll gangi ekki með svo stuttum fyrirvara og því sé líklegast að hundleiðinlegum “deadline day” ljúki án nokkurra markverðra félagaskipta…

15:44

Óvænt, Kuyt sagan virðist ekki á rökum reist. Hann var víst með fjölskylduna á McDonalds áðan, hætti við útaf því að konan hans er svo hugguleg og hann treysti ekki Terry greyinu!

En allt dautt á Melwood og enginn merkilegur að þvælast utan við Anfield, margir á báðum stöðum að kíkja eftir hreyfingum. Stefnir í sama leikmannahóp og strax komnar í gang sögur um stórt sumar í leikmannamálum. Sjáum til.

Klukkutími og 16 mínútur eftir…

14:11

Í ljósi síendurtekinnar umræðu um okkar ágæta Dirk Kuyt, er kominn skemmtileg saga um 22 milljón punda tilboð frá Chelsea í þann góða dreng. 22 millur í kassann og Ancelotti að hlaupa allsber um götur London. Margt verra en það!!!!

14:00

Sennilega daufasti lokadagur sögunnar, þrír tímar eftir og satt að segja ekkert að gerast. Ekki bara hjá okkur, heldur líka öllum hinum keppinautunum um toppsætin sjö. Kannski eitthvað feitt detti inn næstu mínúturnar…

13:20

Nú er eitthvað að gerast, rakarastofa í nágrenni Melwood er að byrgja sig upp af litlum hárteygjum, sérsniðnar í smágerðar fléttur!

Er Kenwyne Jones að koma!?!?!?!?

;)

13:00

Loksins dottið inn slúður um LFC! Grískar síður benda á að Liverpool sé að panta læknisskoðun fyrir Vasilis Torosidis. Nokkrar svona kjaftasögur verið í gangi um þennan leikmann í glugganum, hægri bakvörður gríska landsliðsins og vinur hans Soto “Duffield”! Allavega eitthvað til að smjatta á. Fjórir tímar eftir….

11:31

Er ekki ágætt að tala þá um “over-hype” janúarmánuðar. Öll stóru liðin, þ.á.m. LFC, voru víst með njósnara á Selhurst Park, ruglukollur nr.1 sem stjórnar þar (nefni ekki nafnið hans – oj) sagði það. En að lokum fór þetta undrabarn, Victor Moses, til Wigan Athletic í dag. Sennilega er kidney pie-ið hjá Palace bara það gott að njósnarar liðanna vildu fá smakk!

Ekkert markvert, fimm og hálfur tími eftir af glugganum….

10:28

Sýnist svei mér lítið ætla að gerast. Ég hef haft þá bjargföstu trú allan janúarmánuð að við myndum ná okkur í framherja en kannski er Rafa að ákveða að treysta N’Gog og Kuyt fyrir fjarveru “El Nino”. Unglingurinn okkar, hann Ecclestone, skoraði sigurmark Huddersfield um helgina í sínum fyrsta leik. Hann kannski kemur úr láninu tilbúinn í slaginn….. I wish…..

Sex og hálfur tími eftir af glugganum, lítið markvert komið.

09:31

Fréttir hafa borist af því að tveir einstaklingar hafi keypt sér treyju í búðinni á Anfield og merkt númerið 10 og “Owen”. Annar þeirra líktist víst mjög frænda Owen í föðurætt……. Þó ekki?????

09:07

Samkvæmt frétt úr Liverpool Echo hefur verið ákveðið að selja unglinginn Chris Buchtmann til Fulham fyrir 100 þúsund pund. Þetta kemur mér töluvert á óvart þar sem strákur var valinn maður U-17 Evrópumótsins í fyrra en samkvæmt frétt Echo hefur hann átt erfitt með að standa sig á Melwood í vetur.

09:00

Þá er komið að fjörugum degi, lokadegi leikmannaskipta.

Glugginn lokar í Englandi kl. 17:00, en á miðnætti víða í Evrópu. Það þýðir að hægt er að selja út úr Englandi eftir kl. 17.

Við höfum verið duglegir að losa leikmenn í janúar. Dossena (Napoli) og Voronin (D.Moskva) seldir, Nathan Ecclestone (Huddersfield) og Vincent Vejl (Hercules Sport) lánaðir. Einn leikmaður bættist í hópinn, Maxi Rodriguez (Atl. Madrid).

Það eru ekki endilega miklar líkur á nýjum manni / mönnum eða sölum, en ég allavega fletti yfirleitt síðum þennan dag og ætla að reyna að uppfæra hvort eitthvað gerist hjá okkar liði merkilegt, skýt kannski við einhverjum fréttum af öðrum liðum. Stærsta slúðrið hingað til er að Robbie Keane flakki enn í janúar, enda fastur á bekknum hjá Spurs og að Michael Owen sé búinn að gefast upp á sínu vonlausa verkefni og verði lánaður fram á sumar til liðs þar sem hann fær að spila. Kannski hann endi hjá Hull City eftir allt!

En hvað segiði, hvað vilduð þið sjá gerast fyrir kl. 17:00 í dag?