Hvað gerist í dag og á morgun?

Posted on 31.01.2010 by Babu

Áður en ég skanna helstu fréttir af slúðrinu langar mig að hrósa okkar manni hjá Liverpool, hinum 16 ára gamla Kristjáni Gauta Emilssyni fyrir frábæra byrjun hjá klúbbnum, en hann spilaði sinn fyrsta leik fyrir U-18 ára liðið um helgina er hann kom inná gegn Manchester United og kláraði leikinn með með góðu skallamarki. Þetta hefur vakið ágætis athygli innan herbúða Liverpool og var t.a.m. skemmtilegt viðtal við hann á Opinberu síðunni sem sjá má hér.

Stimplaði sig inn með skallamarki

Slúðrið

En þar fyrir utan þá eru bara tveir dagar eftir af leikmannaglugganum, þ.e.a.s. dagurinn í dag og morgundagurinn þar sem síðasti dagur mánaðarins ber upp á helgi.

Benitez til Juventus: Það hefur mikið verið rætt um að Benitez yrði næsti þjálfari Juve og jafnvel bara núna strax í janúar. Svo þegar ráðið var nýjan stjóra þar þá hefur slúðrið snúist í þá átt að hann muni yfirgefa klúbbinn í sumar og taka við Juventus. Það hafa ekki verið neinar alvöru fréttir um þetta mál og persónulega hef ég ekki nokkra einustu trú á þessu, hvorki að hann væri að fara núna né að hann sé búinn að samþykkja að taka við öðru liði í sumar. Hann þarf þó að geta verið samkeppnisfær á leikmannamarkaðnum ef hann á að nenna þessu stappi hjá okkur frekar en að taka við klúbb sem vill endliega fá hann til sín.

Keane til Sunderland og þ.a.l. Jones til Liverpool: Þetta longshot í besta falli en svo er bætt enn í söguna að ef af þessu yrði þá gæti Babel endað á að fara til Birmingham. En þeir bláu eru víst líka heitir fyrir Jones skv. slúðrinu. Það hafa alveg furðulegri hlutir átt sér stað og staða Keane sem yfirgaf Liverpool fyrir akkurat einu ári síðan er ekki góð hjá Spurs og batnaði ekki með komu Eiðs Smára.

Stöðu þessa Kenwyne Jones hjá Sunderland er erfitt að greina, Bruce vill halda honum en líklega vill Jones fara í stærri klúbb. En það örlitla sem ég hef séð af honum sýndi að hann er ágætur leikmaður og ef njósnara her okkar er svona spenntur fyrir honum býst ég við að hann geti nú eitthvað fyrir sér. Hann hefur skorað alveg heilt mark í síðustu 11 leikjum og Steve Bruce er á því að orðrómur varðandi framtíð hans hjá félaginu sé þar helst ástæðan. Hef samt alveg verið spenntari fyrir leikmanni sem er orðaður við Liverpool. En á móti segi ég hell yeah við stórum sóknarmanni sem hefur reynslu af ensku úrvalsdeildinni og heitir ekki Emile Heskey.

Býst þó við að á morgun verði Babel ennþá á sýnum stað og Jones komi ekki til okkar.

James Tomkins frá West Ham: Mirror slær því upp að Benitez hafi áhuga á að fá þennan unga bakvörð frá West Ham. Veit voðalega lítið um þennan leikmann utan að hann er nokkuð efnilegur og auðvitað enskur. Efa að hann myndi leysa neinn vanda á þessu tímabili samt enda ekki svo langt í að Johnson komi aftur. Þar að auki eigum við tvo unga pjakka + Degen sem geta spilað hægri bakvörð ásamt því að Tomkins nafnið er auðvitað upptekið hjá klúbbnum.

Tilboði Birmingham í Babel ekki tekið: Sky segir að Liverpool hafi aftur hafnað tilboði frá Birmingham í Ryan Babel, líklega er ekki stefnt að því að selja neinn nema það komi annað í staðin, enda ekki endalaust hægt að minnka og veikja hópinn.

Hicks á Anfield í gær: Gleðigjafinn Tom Hick mætti á Anfield í gær og hafa í kjölfarið sprottið um hinar ýmsu sögur í tengslum við það. Ég nenni ekki að finna linka á þetta en eftir að stuðningsmenn sáu hann á Anfield í gær var hrópað í tvo tíma Yanks Out fyrir utan Anfield eftir leik. Einhversstaðar las ég að hann hefði verið drukkinn á leiknum í gær :) og annarsstaðar las ég að hann væri kominn til Englands til að ræða við forráðamenn Juventus útaf Benitez.

En ég las ekki á neinum stað orðróm um að hann hefði bara mætt á Anfiled til að horfa á leik hjá liðinu sem er í hans eigu! Segir kannski eitthvað um þá að það er alltaf stórfrétt þegar þeir mæta á leik, ég myndi varla missa af æfingu ætti ég Liverpool!

Owen á förum: Ekki að þetta skipti okkur máli á neinn hátt þá er meira gaman af svona fréttaflutning þeirra megin heldur en okkar megin svona til tilbreytingar.

En vonum það besta og eitthvað hressandi gerist fyrir lokun þessa leikmannaglugga, við höfum núna selt fyrir mun meira heldur en við höfum keypt og það er pirrandi miðað við gengi liðsins á þessu tímabili.

Liverpool – Bolton 2-0

Posted on 30.01.2010 by Babu

Loksins loksins loksins tók Liverpool lið sem þeir eiga alltaf að vinna og gerði einmitt það. Ekkert baráttu sigur eftir jafnan og illa spilaðan leik heldur bara einfalda yfirspilun og flottann sigur sem var síst of stór, enda var þetta í restina orðið eins og skotæfing þar sem takmarkið var að hitta í varnarmenn Bolton. Ekkert glæstasti sigur í sögu klúbbsins en ég meina hey, við hljótum að fagna sigri og góðum leik núorðið. Það sem meira er þá eru þetta 4 sigrar í síðustu sex leikjum og tvö ömurleg jafntefli. Þar að auki fimm clean sheet sem kannski segir okkur að liðið er hægt og rólega á réttri leið og flestir þeirra sem hafa verið meiddir eru væntanlegir.

Rafa lærði líklega eitthvað af síðasta leik gegn Úlfunum og braut upp steingelt miðju combo Mascherano og Lucas og setti Aquilani inn í liðið á kostnað Braselíumannsins. Það sem mikilvægara er þá áttaði hann sig einnig á því að það er mun líklegra til árangurs að vinna leiki með sóknarmann í einu sóknarmannsstöðunni í leikkerfinu sem þýðir að N´Gog kom inn í liðið og Kuyt var settur á kantinn þaðan sem hann var í nokkuð frjálsu hlutverki.

Vörnin hefur skrúfað fyrir lekann og var því að sjálfsögðu óbreytt í þessum leik.

Byrjunarliðið var svona:

Reina

Carragher – Skrtel – Kyrgiakos – Insúa

Mascherano – Aquilani
Kuyt – Gerrard – Riera
Ngog

BEKKUR: Cavalieri, Agger, Darby, Lucas, Pacheco, Rodriguez, Babel.

Eins og ég hata það að sjá Lucas og Mascherano saman inná þá verður Aquilani seint sakaður um að hafa átt góðan dag í dag, þrátt fyrir það og allar hans misheppnuðu sendingar frammávið þá var hann samt að bjóða upp á allt annan möguleika heldur en Lucas og flæðið á miðjunni því allt annað. Sama má segja um N´Gog, hann verður seint sakaður um að hafa verið frábær í dag og átti t.a.m. versta klúður þessa tímabils í leiknum, hann var engu að síður allann daginn gáfulegri þarna einn frammi heldur en Dirk Kuythino og var sífelt til vandræða með hraða og leikni. Það verður að vera svona tappi upp á topp og með eins leik og N´Gog átti í dag þá er ljóst að hann mun fara að skila mörkum inn.

Vörnin hefur skellt í las með Hercules Guðmávitahvaðopolus, uppáhaldsleikmann minn í Liverpool í augnablikinu í lykilhlutverki. Þið hefðuð mátt reyna að selja mér það fyrir tímabilið að Kyrgiakos yrði lykilmaður í liðinu en svei mér þá ég vill sjá Skrtel út þegar Agger kemur aftur og þar að auki er ég á því að Carragher eigi ekki að vera alveg sjálfsagður í byrjunarliðið þegar allir eru klárir gegn liðum sem eru líkamlega sterk og hávaxin. Ekki meðan grikkinn spilar svona.

Kyrgiakos hefur nú þegar við hrósað fram úr hófi í þessari skýrslu

En þá að leiknum sjálfum, þetta byrjaði frekar rólega, Liverpool var mun sterkari en ógnuðu markinu ekki baun í bala. Það var mikið um næstum því færi þar sem skotin drifu ekki að markinu (hávörnin hjá Bolton tók það ef svo má segja). N´Gog var út um allt og svolítið í boltanum en var ekkert að komast áleiðis gegn vörn gestana. Aquilani átti síðan varla sendingu á samherja fyrstu mínúturnar og var stundum of lengi með boltann, ég skrifaði hjá mér að líklega hafi hann verið drukkinn í gær og smá ryðgaður í dag.

Á 22.mínútu kom Insúa (sem átti stórgóðan dag) með flotta fyrirgjöf sem Kuyt rétt missti af, hefði sannarlega getað komið Liverpool yfir þar hefði hann örlítið meiri hraða. En með þessu var Insúa kominn alveg upp á topp og vel úr stöðu og því pláss fyrir aftan hann sem Kóreumaðurinn Lee Ping-Pong nýtti sér vel, en hann tók algjörlega fáránlegan sprett í átt að marki Liverpool, hann fór mjög auðveldlega framhjá Sktrel og lék á Reina og hafði þar með autt mark fyrir framan sig, þetta bjargaðist þó á því að Kyrgiakos náði að blokka skotið á línu. Hefðum sannarlega getað lent undir eftir þessa fyrstu sókn Bolton. Á 32.mínútu gerði Grikkinn sig líklegann í teignum þegar hann vann skallabolta og náði síðan skoti að marki, en eins og svo oft í þessum leik fór skotið í varnarmúr Bolton.

Kuythino að setja hann

Á 36.mínútu átti Riera stórgóða sendingu á Insúa sem var út við endalínu, hann kom með góðan bolta fyrir sem Aquilani gerði mjög vel í að skalla fyrir markið þar sem Kuythino var réttur maður á réttum stað og náði að moka boltanum yfir línuna, 1-0 og mjög sanngjörn staða það.

Það sem etir lifði af hálfleiknum var líklega það besta sem kom frá gestunum í dag en það var ekkert til að svitna yfir utan þess er Lee fékk gult fyrir leikaraskap inn í teig. Ég var frekar mikið smeykur þá um að hann væri að dæma víti þar.

Það fyrsta sem ég skráði hjá mér í seinni hálfleik kemur líklega til með að vera ofarlega þegar klúður ársins verður valið í vor. Það var á 52.mínútu þegar N´Gog skaut í slá og yfir úr ákaflega góðu færi. Riera kom með fyrirgjöf, Gerrard með skot í vörnina, N´Gog fékk boltann fyrir opnu marki en setti boltann í slá og yfir.

Reyndar hafði Gerrard átt ágætis séns rétt áður eftir undraverða sendingu frá Mascherano. Argentínumaðurinn var annars að senda langt yfir getu vel í þessum leik og var þar að auki frábær varnarlega. Með hann í svona stuði þarf alls ekki tvo varnarsinnaða menn á miðjuna gegn liðum eins og Bolton (Stoke, Burnley, Hull, Wolves…).

N´Gog hélt áfram að koma sér í færi en það var orðið nokkuð ljóst á 55.mínútu að hann var ekkert að fara skora í dag. Þá leit út fyrir að hann væri að komast í opið færi en Cahill í vörn gestana náði að pota boltanum frá áður en skotið kom.

Öfugt við síðasta leik þá var Benitez ekki að spara skiptingarnar í þessum leik og kom sú fyrsta á 65.mínútu. Aquilani var tekinn af velli og Lucas kom inná og er óhætt að segja að það hefi afskaplega lítil ánægja verið með þessa skiptingu miðað við “fögnuðinn” á Anfield. Þetta riðlaði þó ekki leik Liverpool sem hélt áfram að sækja á fullu. Insúa gerði lítið úr Grétari Rafni á 67.mínútu þegar hann burstaði hann á sprettinum og náði að koma boltanum fyrir á N´Gog. Frakkinn var enn of lengi að átta sig og skaut í varnarmann og útaf. Úr horninu barst boltinn út í teiginn fyrir fætur Jamie Carragher sem skaut auðvitað í fyrsta varnarmanninn sem var í grend við hann.

Á 69.mínútu fengum við horn, þaðan lak boltinn út á Insúa sem skaut í Davies og þaðan lak boltinn inn! 2-0. Ógeðslegt mark en vel sanngjarnt miðað við gang leiksins. Ótrúlegt að segja þetta miðað við þetta tímabil, en þetta var enn meiri heppni heldur en venjulegt Lampard mark og eitthvað sem við áttum mikið skilið

Á 74.mínútu var töluvert meira fagnað skiptingu hjá Liverpool, Riera fór útaf eftir mjög góðan leik og Maxi Rodriguez kom inn.

Þegar 79.mínútur voru liðnar gerðist sögulegur atburður, Kuythino lék á varnarmann Bolton, Z. Knight og kom með sendingu fyrir. Knight til varnar þá rann hann til en engu að síður stórmerkilegt.

Þegar 83.mínútur voru liðnar var komið að öðrum merkisatburði sem Anfild klappaði líka vel fyrir, en þá kom Ryan Babel inná hjá Liverpool, það hefur verið rólegt yfir honum á Twitter undanfarið (hann er vinur minn þar) og því sá hann sér fært að mæta í dag.

Mínútu síðar gerðist síðan þriðji merkisatburðurinn á þessum fimm mínútna kafla, en þá komst Bolton óvænt yfir miðju og næstum inn á vítateig Liverpool.

Restin af leiknum var bara eins og skotæfing hjá Liverpool þar sem skotmarkið, leikmenn Bolton voru skotnir miskunarlaust niður.

Góður 2-0 sigur og gott veganesti fyrir heimaleikinn gegn grönnum okkar í Everton.

Maður leiksins.

Það voru nokkrir að spila vel í dag og það sem meira er þá var liðið að spila vel sem lið í dag. Steven Gerrard lét t.a.m. sjá sig aftur og virðist vera að nálgast sitt gamla form. Riera var mjög líflegur og það er hrikalega gott að vera búnir að fá hann aftur, hann er lúmskt mikilvægur fyrir þetta lið. Aquilani gerði okkur kleyft að spila ofar með miðjuna en vanalega en verður ekki sakaður um að hafa átt mjög góðan dag. Reina hélt hreinu í fimmta skipti af síðustu sex deildarleikjum en það reyndi ekki nóg á hann til að velja hann mann leiksins. Eins skoraði Kuyt gott baráttumark sem braut ísinn og vann linnulaust allann leikinn, þetta var þó ekki að takast það mikið upp hjá honum fyrir utan markið að ég velji hann.

Þeir þrír sem mér fannst standa uppúr voru Emiliano Insúa sem var að spila sinn besta leik í mjög langan tíma (ekki mesta mótstaðan heldur). Var að koma mikið upp og ná sendingum fyrir markið sem sköpuðu hættu og í eitt skipti mark. Þar að auki átti hann þátt í öðru markinu þegar hræðilegt skot hans breytti skemmtilega um stefnu og endaði í netinu.Sömu sögu er að segja af Mascherano sem átti einn sinn besta leik lengi, og þá er ég ekki bara að tala um varnarlega, þar sem hann var gríðarlega öflugur að vanda, heldur var hann með óvenju góðar sendingar í leiknum og að dreifa spilinu vel.

Maður leiksins fyrir mér er þó Hercules, hann er sannarlega að stíga upp og stimpla sig inn í þetta lið á góðum tíma og miðað við umræðuna núna og m.a. það sem ég sagði í upphafi þessarar færslu þá er hann að spila þannig að Skrtel (og jafnvel Carragher) ættu að fara hugsa sinn gang þegar Johnson og Agger koma aftur (í næstu viku). Grikkinn hefur þá hæð sem okkur vantaði hrikalega, hann étur alla bolta í loftinu og skapar usla í teig andstæðinganna og hefur verið helsti hlekkurinn í því (á eftir Reina) að liðið hefur ekki fengið á sig nema eitt ógeðslegt heppnismark frá Stoke í síðustu sex leikjum.

Lengi megi það halda áfram.

Babú

Liðið gegn Bolton komið

Posted on 30.01.2010 by Kristján Atli

Rafa Benítez stillir upp sterku og sókndjörfu liði gegn Bolton á Anfield í dag. Liðið er sem hér segir:

Reina

Carragher – Skrtel – Kyrgiakos – Insúa

Mascherano – Aquilani
Kuyt – Gerrard – Riera
Ngog

BEKKUR: Cavalieri, Agger, Darby, Lucas, Pacheco, Rodriguez, Babel.

Þetta er sterkt lið, ég er sérstaklega ánægður að sjá Ngog frammi og Riera áfram á vinstri kantinum. Hefði verið til í að sjá Maxi Rodriguez byrja fyrsta heimaleikinn sinn en hann kemur þá bara sterkur inn í seinni hálfleik. Eins er gott að sjá að það er nóg af sóknarkostum á bekknum – Pacheco, Rodriguez, Babel geta allir komið inn og bætt í sóknina.

Áfram Liverpool – YNWA

Bolton á morgun

Posted on 29.01.2010 by SSteinn

Eftir hörmungina síðasta þriðjudag er gott að það sé komið að næsta leik, og það á Anfield. Það er best að ná þeim leik út úr kollinum með því að sýna einhverja frammistöðu fyrir framan fullan leikvang okkar. Ég var froðufellandi af reiði eftir “frammistöðuna” gegn stórliði Úlfanna, gjörsamlega brjálaður. Sagði þá að eftirtaldir aðilar ættu að fara á fund með Purslow og gefa laun sín næstu tvær vikunnar til hjálparstarfs á Haítí: Rafael Benítez, Skrtel, Insúa, Kuyt, Lucas, Riera, Gerrard, Maxi og Ngog. Carra og Masch hefðu átt að leggja til 4 vikna laun, svo hörmulega slakir voru þeir. Þeir einu sem gátu farið frá þeim leik og var hægt að segja að hefðu lagt sig fram og verið á tánum voru þeir Pepe og Soto. En hvað um það, sá helvítis leikur er búinn, ekki orð um það meir (kannski þó slæðist eitthvað inn um hann síðar).

Á morgun er enn eitt stórliðið að fara að etja kappi við okkur, sjálfir Bolton. Bolton mega eiga það að þeir hafa verið eitthvað jafn leiðinlegasta lið deildarinnar undanfarin ár. Ég man varla eftir að hafa séð leik með þeim þar sem þeir spiluðu skemmtilegan bolta. Ég verð þó að viðurkenna það að ég þoli þá mun betur eftir að stórkjafturinn Sam hætti með þá. Við megum því enn og aftur búast við bardaga leik og nú þurfa menn að vera klárir í slíkt, menn þurfa að hafa fyrir hlutunum, menn þurfa að berjast. En það sem enn meira máli skiptir, menn þurfa að geta sent boltann sín á milli. Það gerir það enginn fyrir leikmennina sem inná eru, þetta eru atvinnumenn, landsliðsmenn, í öllum stöðum, og enginn, ENGINN, hvorki Rafa, né Sammy, né neinn annar úr þjálfaraliðinu, getur sent boltann fyrir þessa leikmenn sem inni á vellinum eru. Þetta er bara ekki flókið, þú þarft að geta sent boltann á samherja. Samherjinn þarf svo að HREYFA sig á vellinum, til að gefa sendingarmanninum það auðveldara að senda á hann. Flókið? NEI.

Meiðslalistinn okkar er sterkur þessa dagana, sem fyrr. Engar líkur eru á því að Torres, Johnson, Benayoun eða El Zhar geti verið með. Litlar sem engar líkur eru taldar á því að Agger eða Kelly verði með. Svo veit maður aldrei á hvaða vikudegi Aurelio er heill, líklega er hann meiddur. Gott og vel, ekkert nýtt að frétta á þessum bænum og það þýðir ekki einu sinni að spá í þá hluti. Ég vil meina að við getum stillt upp hörkuliði sem getur hreinlega rúllað yfir þetta Bolton lið, rúllað yfir það. En það er líka margt sem ég ekki skil, enda takmarkast fótboltakunnátta mín fyrst og fremst við það sem maður sér í sjónvarpinu, og les á netinu. Maður hefur ekki þann munað að geta tékkað á æfingasvæðinu á day to day basis. Því er það kannski barnalegt af manni að vera að stilla upp liði svona út í loftið, en þar sem þetta er nú einu sinni bloggsíða og akkúrat enginn heilagur sannleikur í gangi hérna, þá ætla ég að stilla upp “mínu” liði (eins og ég hef reyndar áður gert) en svo einnig liðinu eins og ég held að það verði. Mitt lið lítur svona út:

Reina

Degen – Carra – Soto – Insúa

Lucas – Aquilani
Maxi – Gerrard – Riera
Kuyt

Já, ég set Kuyt upp á topp, því ég tel að það þurfi að hamast í þessum varnarmönnum Bolton, alveg fram og aftur, sem ætti að skila sér í plássi fyrir Stevie sem afturliggjandi framherja. Ég vel Lucas fram yfir Masch þar sem að ég tel hann hafa verið okkar skársta miðjumann undanfarið og öruggari á boltanum. Ég hefði valið Aurelio í vinstri bakk ef hann væri heill. En svona held ég þó að þetta muni líta út:

Reina

Carra – Skrtel – Soto – Aurelio

Mascherano – Lucas
Kuyt – Gerrard – Riera
Ngog

Bekkurinn: Cavalieri, Degen, Darby, Maxi, Aquilani, Pacheco og Babel.

Fínt lið svo sem, ég vil bara ekki sjá Carra í bakverðinum og ég vil sjá Aquilani inni á miðjunni, því við þurfum ekki tvo varnartengiliði gegn Bolton á heimavelli.

Nánast alltaf, þá er það eina sem ég fer fram á hjá Liverpool, er að skila 3 stigum í hús. Svo er ekki fyrir að fara núna. Eftir þessa skitu á þriðjudaginn, þá vil ég sjá SANNFÆRANDI spilamennsku, ég vil sjá blóð á tönnum. “We’ve turned a corner” my arse, menn mega snúa í hvaða átt sem er, framhjá hvaða horni sem er kæri Gerrard, ég vil sjá passion, sendingar á milli samherja, fullt af færum og ekki hvað síst, FULLT AF MÖRKUM. Got it? Let’s sure hope so. Ég er með þá von í brjósti að leikmenn liðsins fá þessa upphitun þýdda fyrir sig í fyrramálið og að þeir fari eftir þessu. Með það að leiðarljósi, þá ætla ég að spá 4-0 sigri okkar manna, Stevie með 2, Ngog 1 og Riera 1. Koma svo…

P.S.
Þú þarna gamla kona, farðu heim og láttu manninn vera.

Er Benayoun á förum til Moskvu?

Posted on 27.01.2010 by Kristján Atli

Samkvæmt nýrri frétt í The Daily Mail hefur Yossi Benayoun komist að samkomulagi við forráðamenn Dynamo Moskvu um félagaskipti til þeirra núna í janúar.

Eins og kemur fram í greininni staðfesti íþróttastjóri Dynamo þetta í viðtali við blaðamann:

“We came to an agreement with the player’s agent. Now everything depends on Liverpool’s position. [..] I don’t think there will be news on Wednesday, but in the next two days the situation should be clarified.”

M.ö.o., Yossi hefur gengið frá samkomulagi við Dynamo og nú á félagið bara eftir að ná samkomulagi við Liverpool um kaupverðið. Takist það er Yossi farinn til Rússlands.

Hvaða pælingar eru í gangi hérna? Bað Yossi um að fá að fara, fyrst hann semur fyrst við klúbbinn? Eða ætlar Rafa að fórna honum til að fá pening fyrir framherja? Getum við ómögulega haft meira en einn flinkann sóknartengilið í hópnum í einu, fyrst Maxi Rodriguez er kominn?

Ég skil þessi viðskipti ekki alveg, ef af verður. Til hvers að selja leikmann sem við vitum að spilar vel og er einn af fáum sem hafa verið nálægt sínu besta í vetur, til að fá inn einhvern annan sem engin leið er að vita hvernig spilar?

Sjáum hvað setur. Kannski er íþróttastjóri Dynamo bara að tala út um óæðri endann, en ef af verður hljóta næstu dagar að verða áhugaverðir. Rafa myndi örugglega ekki selja Yossi nema ætla sér eitthvað í staðinn fyrir mánaðarmótin.

Wolves 0 – Liverpool 0

Posted on 26.01.2010 by Einar Örn

Ég sagði víst í leikskýrslunni eftir Stoke leikinn að ég ætlaði að taka mér frí frá Liverpool áhorfi. Svo þegar ég kíkti á byrjunarliðið í dag þá komst ég að því að ég átti að taka skýrslu – og varð því að klúðra þessari slöppu tilraun minni til þess að forðast Liverpool áhorf. Ég get ekki séð að ég hafi grætt mikið á því.

Þegar ég sat uppí sófa og kíkti á tölvupóstinn minn í tíunda skipti yfir leiknum þá fór ég að velta því fyrir mér hvernig að hlutlausum aðdáendum líði að horfa á Liverpool. Þá er ég ekki að tala um Man U aðdáendur eða aðra sem að gleðjast yfir óförum okkar. Heldur þær óheppnu sálir, sem að settust fyrir framan sjónvarpið í kvöld af því að þetta var eini fótboltinn í gangi. Fyrst að mér fannst þetta svona leiðinlegt, hvernig leið þeim?

Þessi leikur var einsog Stoke leikurinn hreint lygilega leiðinlegur. Sambland af furðulegri uppstillingu (Rafa, meiddur Gerrard er VERRI en enginn Gerrard) og ólýsanlega slöppum leik okkar manna. Allir sem einn þá voru þeir slappir (já, nema kannski Reina).

Rafa stillti þessu svona upp.

Reina

Carragher – Skrtel – Kyrgiakos – Insua

Lucas – Mascherano
Rodriguez – Gerrard – Riera
Kuyt

Bekkur: Cavalieri, Aquilani, Babel, Ngog, Degen, Darby, Pacheco.

Ngog kom inná fyrir Riera. Af einhverjum óskiljanlegum ástæðum þá fengu hinir 10 leikmennirnir að spila þessar rúmlega 90 mínútur. Nú myndi ég frekar vilja ræða Icesave heldur en Ryan Babel og það hvort að Rafa Benitez sé góður þjálfari, en ég mun seint skilja af hverju Rafa skipti bara einum leikmanni inná í kvöld. Ég bara hreinlega skil það ekki. Hvað var það við leik okkar manna sem sannfærði Benitez um að best væri að halda liðinu óbreyttu allan tímann? Ég sá það ekki.

Ég veit ekki hvað á að segja um leikinn. Ég er að skrifa þessa leikskýrslu á meðan hann er enn í gangi (núna er mínúta 91), sem segir margt um skemmtanagildið. Nennir virkilega einhver að lesa skýrslu eftir svona leiki? Var ekki nóg að þjást í 90 mínútur? Liverpool var arfaslakt og Wolves átti sigur skilið því þeir áttu mun hættulegri færi í leiknum (Liverpool átti nánast engin færi).

Maður leiksins: Reina. Hann er sá eini, sem getur borið höfuð hátt. Hinir voru afleitir og fyrir svona frammistöðu munu þeir uppskera spil í Evrópudeildinni næsta vetur á meðan að nýríkir Man City menn munu sennilega taka sæti okkar í Meistaradeildinni. Þannig er nú það.

Liðið gegn Wolves

Posted on 26.01.2010 by Babu

Einar Örn kemur sterkur inn á eftir en byrjunarliðið er svohljóðandi:

Reina

Carragher – Skrtel – Kyrgiakos – Insua

Lucas – Mascherano

Rodriguez – Gerrard – Riera

Kuyt

Bekkur: Cavalieri, Aquilani, Babel, Ngog, Degen, Darby, Pacheco.

Ég var ansi nærri þessu í upphitun en bjóst ekki við Gerrard.

Koma svo

Úlfarnir á morgun…

Posted on 25.01.2010 by Babu

Eftir hrikalega svekkjandi tapleik gegn Reading og ennþá meira svekkjandi jafntefli við Stoke var það lífsnauðsyn að koma með alvöruleik gegn Spurs og það var akkurat það sem gerðist, rosaleg barátta í liðinu og góður sigur á góðu Spurs liði. Þetta var ekki best spilaði leikur Liverpool frá upphafi en klárlega eitthvað sem hægt er að byggja ofan á í framhaldinu miðað við það tímabil sem við höfum þurft að þola það sem af er. Eftir Spurs leikinn hefur verið mun meira létt yfir okkur púllurum og það virðist eiga við um leikmenn liðsins einnig. Því ætti leikur gegn Wolves að koma á fínum tíma núna og verður að teljast kjörið tækifæri til að hamra járnið meðan það er heitt og sýna loksins sannfærandi leik. Ekki detta á sama plan og andstæðingurinn.

Það var orðið of mikið þegar Íslenska landsliðið í handbolta var farið að spila alveg eins og Liverpool, tapa unnum leikjum niður á lokamínútunni enda eru takmörk fyrir því hvað hægt er að leggja mikið svekkelsi á okkur. En Liverpool steig upp í síðasta leik og það sama má segja um Íslenska handboltalandsliðið, núna er bara vonandi að áframhald verði þar á.

Æfing

Albert Riera kom aftur inn í liðið í síðasta leik ásamt því að Degen hefur verið að koma ágætlega inn í hægri kantinn. Þar að auki hefur Maxi Rodriguez bæst við hópinn og ég gæti trúað að það sé smá vanmetið hversu góður leikmaður þar er á ferðinni. Hefur reyndar verið með hausinn upp í rassgatinu það sem af er þessu tímabili og fór þess vegna frítt frá Spáni en hefur verið lykilmðaur og fyrirliði A. Madríd undanfarin ár, þar spilað hann í meistaradeildinni ásamt því að vera í landsliði Argentínu. Þessi innspýting í kantinn er akkurat það sem við þurftum enda afar lítið komið frá þeim á þessu tímabili og það sást strax gegn Spurs hvað okkur hefur vantað Riera í formi.

Varðandi hópinn okkar þá eru lykilmenn okkar ennþá margir frá þó eitthvað sé nú farið að bætast úr því, Torres er frá eins og vitað var, Benayoun sem hefur verið skugginn af sjálfum sér er einnig frá, sömu sögu er að segja af Glen Johnson sem líklega hafði verið meiddur í smá tíma áður en hann lagðist alveg. Veit ekki hvort Agger og Aurelio eru búnir að jafna sig en stóru fréttirnar eru klárlega þær að Steven Gerrard hefur verið að æfa á fullu í vikunni og verður líklega klár í slaginn á morgun, allavega á bekkinn.

Gerrard

Kuyt spilaði síðan vel í síðasta leik þannig að öllum líkindum verður hann aftur einn upp á toppi, alls alls ekki að ég sé fylgjandi því og hef aldrei verið en ef hann er að skora áfram og við að vinna þá er mér mikið sama. N´Gog átti reyndar mjög góða innkomu í síðasta leik og verður að öllum líkindum í sama hlutverki og þá á meðan Babel verður bara ferskur á bekknum, ekki einu sinni á Twitter, enda búið að banna honum að tjá sig um fótbolta þar.

Líklegt byrjunarlið:

Reina

Carragher – Skrtel – Kyrgiakos – Insua

Lucas – Mascherano

Rodriguez – Aquilani – Riera

Kuyt

Á bekknum: Cavalieri, Pacheco, Aurelio, Gerrard, Ngog, Degen, Babel.

Ég gef mér að Agger sé ennþá meiddur og að sama eigi við um Johnson og Kelly. Carragher er eitthvað sem ég vill aldrei sjá í hægri bakverði og hvað þá gegn liði eins og Wolves en líklega verður hann þar nú samt, bæði vegna fíns árangur í síðasta leik og líka þar sem Degen virðist ekki vera treyst í bakvörðinn. Að því gefnu eru Skrtel og Hercules Guðmávitahvaðopolus sjálfgefnir í miðvarðarstöðurnar og til að hrófla ekkert við vörninni verður Insúa á sínum stað líka.

Frændurnir Lucas og Mascherano verða á sínum stað á miðjunni og Aquilani áfram í holunni. Ef Riera er í lagi verður hann áfram á vinstri kantinum en ég set Rodriguez þarna hægra megin meira af óskhyggju enda verðum við að spila manninum fyrst við vorum að fá hann og auðvitað vegna þess að við höfum verið í basli þarna. Hvar er líka betra að fá fyrsta byrjunarliðsleik sinn heldur en á útivelli gegn Wolves?

Kuyt er síðan sjálfgefinn í liðið og verður einn frammi í stöðunni hans Fernando Torres sem bara verður að fara gúffa í sig lýsi. En talandi um Kuyt þá var Official síðan með minnst óvæntu frétt ársins af honum í dag.

Hvað heimamenn varðar þá hef ég ekki mikið fylgst með þeim í vetur og hreinlega nenni ekki að skoða þá of djúpt, við eigum bara að vinna þetta lið, jafnvel þó þeir stilli upp sínu aðalliði gegn okkur, ekki varaliðinu eins og þegar þeir gáfu leikinn gegn United um daginn.

Hópurinn fyrir leikinn hjá þeim er ca. svona:
Hahnemann, Stearman, Craddock, Henry, Ebanks-Blake, Ward, Jarvis, Milijas, Mancienne, Doyle, Foley, Zubar, Hennessey, Elokobi, Surman, Jones, Berra, Vokes, Iwelumo, Mujangi-Bia, Guedioura.
Þessi síðastnefndi er nýkominn til þeirra á láni frá Chaleroi í Frakklandi.

Hérna má sjá stuðningsmenn Wolves svara spurningum varðandi leikinn og sitt lið á RAWK

Spá: vinnum þetta 0-3 á morgun, Aquilani skorar 2 og N´Gog eitt.

Glugginn: ein vika eftir

Posted on 25.01.2010 by Kristján Atli

Í dag er nákvæmlega ein vika þangað til félagaskiptaglugginn lokar í bili. Hingað til hafa okkar menn gert ágætis viðskipti – losað sig við Dossena og Voronin, fengið Maxi Rodriguez inn – en það er vert að skoða hvað slúðrið segir að geti gerst næstu vikuna.

Samkvæmt slúðurpakka Guardian (og fleiri miðlum) er Liverpool búið að bjóða Milan Jovanovic samning fyrir sumarið. Ég veit ekki mikið um þennan leikmann en hann er markahæsti maður Standard Liege, 28 ára Serbi sem kallaður er „Snákurinn“ og hann getur víst líka spilað á vinstri kanti. Það er athyglisvert að við séum að bjóða bæði honum og Marouane Chamakh hjá Bordeaux samning á frjálsri sölu í sumar. Er Rafa að vonast eftir að fá annan af þeim eða báða?

Þá segir sami slúðurpakki að Dynamo Moskva ætli að bjóða stórt í Yossi Benayoun þessa vikuna, að sögn einhverjar 7m punda. Ég veit að Rafa vantar pening til að geta keypt Kenwyne Jones en ég verð að viðurkenna að ég sé ekki vitið í að selja einn af þeim sem er að spila virkilega vel til að kaupa annan sem gæti kannski spilað vel. Mögulega. Hugsanlega. Efast því um að af þessu verði.

Ég væri frekar til í að sjá okkur selja Ryan Babel uppí kaupin á Jones frá Sunderland, en Click Liverpool (sem ég veit ekki hvort við getum talið áreiðanlegan miðil) halda því fram að Arsenal ætli sér að berjast við Birmingham og fleiri lið um Babel. Sumir eru hikandi við tilhugsunina um að missa Babel til keppinauta okkar en ég myndi fagna því. Halda menn að hugarfarið hjá Babel – sem er höfuðástæða þess að hann er ekki að spjara sig hjá Liverpool – yrði eitthvað öðruvísi hjá Arsenal og hann myndi því skyndilega vera stórkostlegur þar? Seljum hann, hirðum peninginn af þeim ef við getum.

Sama frétt segir svo loks að ónefnd ítölsk lið ætli að reyna að fá Damien Plessis fyrir lokun gluggans. Yrði kannski ekki mikil eftirsjá af honum en þó hélt ég að hann væri einn af fáum sem ætti séns í aðalliðið til lengri tíma. Við höfum þó orðið fyrir vonbrigðum með efnilega stráka áður.

Þetta er svona það helsta. Jovanovic og/eða Chamakh í sumar, Jones frá Sunderland í vikunni EF við getum selt Babel fyrst og Moskvu-liðar að reyna við Yossi en fá hann sennilega ekki.

Vika eftir. Sjáum hvað setur, hvað er mikið til í slúðrinu.

Þegar illa gengur!

Posted on 23.01.2010 by Babu

Í fljótu bragði þá bara man ég ekki eftir þjálfara sem hefur verið undir eins mikilli pressu hjá neinu liði síðan hann mætti á svæðið heldur en Rafael Benitez hjá Liverpool. Allt sem hann hefur gert hefur verið orsakað sterk viðbrögð hjá afar misvitrum spekingum og rosalegrar gagnrýni allt frá fyrsta degi.

Squad rotation var bara eins og hann hefði fundið það upp sjálfur og þótti alveg fáránlegt þrátt fyrir að liðið spilaði yfir 60 leiki á ári og var alltaf með sinn skerf af meiðslavandræðum.

Sama á við um Zonal vörnina margumræddu sem enn þann dag í dag er hökkuð í spað um leið og fast leikatriði lekur inn þrátt fyrir að hún hafi þegar betur er að gáð oftast skilað góðum árangri, ekki nema rétt á meðan eitthvað óvænt rót verður á vörninni sem setur kerfið úr skorðum.

Oft er hann sakaður um að kaupa lélega leikmenn og alls ekki þess hæfa að spila fyrir klúbbinn og eyða í það gríðarlegum upphæðum, á meðan staðreyndin er að nettóeyðslan ár hvert er mun minni er hjá flestum kollegum hans og alltaf hefur hann þurft að braska með leikmenn, selja einn til að geta haft efni á öðrum betri og oftast hefur hans fyrsti kostur á leikmannamarkaðnum runnið okkur úr greipum.

Ofan á þetta brosir hann ekki á meðan leik stendur, fagnar ekki nóg þegar við skorum o.s.frv. Orðum það þannig að hann er sannarlega ekki gallalaus að margra mati og sumir virðast hreinlega hata manninn svo mikið að þeir verða næstum svekktir ef liðið vinnur leik.

Á peningnum eru auðvitað tvær hliðar og enn eru fjölmargir sem hafa fulla trú á stjóranum og virða árangur hans miðað við aðstæður og vilja alls ekki missa hann frá klúbbnum, þrátt fyrir hræðilegt tímabil það sem af er.

Þó umræðuefnið er orðið þreyttara en þessi hér þá hef ég oft í vetur velt því fyrir mér hvort kallinn eigi þessa rosalegu gagnrýni alveg skilið, jafnvel þó þetta sé í fyrsta skipti sem liðið lendir í virkilega alvarlegum vandræðum á vellinum og er hreinlega að spila illa. Liðið hefur í fyrsta skipti í vetur litið út fyrir að vera að hraka ekki bæta sig eins og það hefur alltaf virst vera að gera undir stjórn Benitez. Er það nóg til að láta hann fjúka eða ættum við að gefa honum tíma og þolinmæði og treysta á að hann hafi það sem þarf til að snúa þessu gengi við?

Með þetta í huga langar mig að skoða feril hans síðastliðin 12-13 ár og miða hann svolítið við Arsene Wenger og hans feril síðan hann kom til Arsenal. Liverpool og Arsenal hafa verið í svipaðri baráttu síðan Benitez kom og hefur Rafa þar yfirhöndina, en engu að síður er Wenger álitinn snillingur sem prumpar glimmeri á meðan Rafa er fair game og hakkaður í sig fyrir nánast allt sem hann gerir. Er þetta sanngjarnt?

…

1996-1997

Wenger – Tók við Arsenal liði sem hafði á að skipa sterku ekta ensku liði með frábæra og trausta varnarlínu ásamt Ian Wright og Dennis Bergkamp. Hóp sem hafði alveg verið í toppbaráttunni árin áður en Wenger kom. Frakkinn umbylti gjörsamlega þó öllu ævingaprógramminu þeirra sem lengdi feril flestra varnarmanna Arsenal um nokkur ár, eins keypti hann ungan Patrick Vieira frá AC Milan og það kom á daginn að hann var alveg sæmileg kaup. Liðið var að slípast en endaði í þriðja sæti í deildinni á eftir Newcastle og United. Það sem meira var hann var að breyta Boring boring Arsenal í sóknarlið.

Benitez - Tók við Ossasuna og stjórnaði þeim í alveg 9 leiki áður en hann var látinn taka poka sinn. Ekki merkileg dvöl hjá Ossasuna sem þá var í spænsku annari deildinni en þar kynntist hann þó Pako Ayestarán en hann átti eftir að vinna með Benitez í áratug.

…

Hafa ber í huga að töluverður aldursmunur er á þessum köppum, Wenger er ´49 módel á meðan Benitez er ´60 módel. Þannig að þarna var Wenger t.a.m. búinn að gera flest sín byrjendamistök sem þjálfari og koma sér upp starfsmannahópi sem hann treysti og ná árangri sem þjálfari hjá Monaco t.a.m.

Hann var þó ekki mjög þekkt nafn í boltanum og var það t.d. Gerrard Houllier sem mælti með Wenger við stjórn Arsenal, eða svo segir sagan og wikipedia.

Continue reading →

Liverpool 2 – Tottenham 00000000000000

Posted on 20.01.2010 by SSteinn

Mikið fáránlega er ég á útopnu ánægður núna. Var að hugsa um að setja inn afar stutta leikskýrslu a la KAR og setja apann inn aftur, bara í öðrum athöfnum. Eeeen, gerum þetta nú almennilega þar sem ég sé hreinlega ALDREI um leikskýrslur. Tek það fram að ég sá ekki leikinn…En liðið var svona:

Reina

Carragher – Skrtel – Kyrgiakos – Insua

Degen – Lucas – Mascherano – Riera
Aquilani
Kuyt

Á bekknum: Cavalieri, Pacheco, Darby, Spearing, Ngog, Maxi Rodriguez, Babel.

En hvað með það, þetta byrjaði ágætlega, eða öllu heldur frábærlega. Babú fékk óskina uppfyllta, Kuyt einn frammi og skoraði strax á 8. mínútu. Virkilega vel gert og hreinlega ekkert um það meira að segja, týpískt framherjamark og setti hann bara nett í hornið. Hann átti nú heldur betur eftir að koma við sögu í leiknum, klúðraði ansi hreint betri færum en þetta, færum sem við ættum hreinlega ekki að minnast aftur hér á. Hann skoraði þó markið, come on.

Ég verð hreinlega að segja það að ég var ákaflega ánægður með baráttuandann sem liðið sýndi frá fyrstu mínútu þessa leiks. Menn gáfu sig í alla bolta og ekkert gefið eftir. Ég var fáránlega svartsýnn fyrir þennan leik, en þetta var ennþá sætara fyrir vikið. Hvernig menn gáfu sig í þetta sýnir í mínum huga að Rafa (hvaða álit sem menn hafa á hans framtíð) er ekki búinn að tapa “klefanum”. Ef hann væri búinn að tapa klefanum þá væri ekki svona barátta í liðinu. Menn voru ákveðnir frá fyrstu mínútu í að sýna sig og sanna, burtséð frá því hvort Gerrard, Torres, Benayoun og Johnson væru fjarverandi. En ég verð líka að viðurkenna það að ég var afar ánægður að sjá Albert Riera í liðinu, sagði hér þegar liðið var kynnt til leiks að við hefðum saknað hans, og hann var virkilega góður og er með meiri boltatækni heldur en flestir aðrir í liðinu.

Ég hugsa að þetta sé fyrsta leikskýrslan sem er skrifuð í beinni á Players, og allt í kringum mig eru ákaflega ánægðir Poolarar. Ég veð úr einu í annað hérna, en hérna eru nokkrir sem vilja hafa áhrif á skýrsluna og við leyfum þeim það bara. Menn eru bara ánægðir og þá sérstaklega með baráttuna í liðinu og hún hófst í síðasta leik, allt annað að sjá viljann, gredduna og ákveðnina.

En aftur að leiknum sem slíkum. Við vorum ferlega heppnir á köflum. Klárt brot á Crouch inni í teig, peysutog og ekkert annað. Eins skoraði Defou löglegt mark, en línuvörðurinn klikkaði og dæmdi rangstöðu. Það voru reyndar stór mistök hjá Reina, sem annars átti gjörsamlega frábæran leik. Þó ég yrði skotinn í hausinn, þá væri ég ekki jafn fljótur niður eins og Reina.

Við fengum færin svo þegar á leið leikinn, en nýttum þau illa. Ég var nokkuð sáttur við að Ngog færi á bekkinn fyrir leik, þar sem hann var afar slakur gegn Stoke, en þvílík innkoma. Og skiptingarnar hjá Rafa gengu fullkomlega upp í kvöld, fullkomlega. Ég hef oft gagnrýnt hann fyrir skiptingar, en ekki í kvöld. Ngog átt hreint út sagt frábæra innkomu, fékk svo vítið sem Kuyt skoraði úr. Var Kuyt ekki annar sem þrennu? Sá hann skora 3 mörk. (ætla ekki að koma inn á klúðrið hans, enda er það gleymt)

Það er ekki hægt að skrifa þessa skýrslu án þess að minnast á nokkur önnur nöfn. Degen, Kyrgiakos og Skrtel. Loksins, loksins, loksins, loksins, Skrtel var aftur hann sjálfur. Hann var frábær, vægast sagt. Kyrgiakos var frábær líka, og ef ekki væri fyrir færið sem hann klúðraði, þá var þetta nánast fullkominn leikur hjá honum. Degen…já Degen. Hann kann alveg fótbolta, en er fáránlega óheppinn. Menn reyndu hreinlega að myrða hann trekk í trekk, og sama með hann, fáránleg ákvörðunartaka hans þegar hann ákvað að klára ekki leikinn, heldur gefa slaka sendingu á Kuyt, gerði það að verkum að hann var ekki jafn frábær og maður var búinn að mynda sér skoðun um. En hann kann klárlega fótbolta.

Það er í rauninni enginn maður í liðinu sem ég vil gagnrýna í dag, þrátt fyrir að við höfum ekki verið að sýna okkar besta leik, í rauninni langt frá því. Sigur vannst, menn lögðu sig fram og það er það sem maður fer fram á, fyrst og fremst. Ég var svartsýnn fyrir leikinn, ennþá ánægðari fyrir vikið, en þetta blessaða lið okkar er svo afar nálægt hjartanu í manni að ég mun aldrei, ALDREI, hætta að styðja það.

Maður leiksins: Kyrgiakos (samt smá Reina, Skrtel og Riera)

En nú er Helgi farinn að bíða eftir mér og KA kvikindið Árni Þór kominn með annann bjór í hönd, þannig að ég þarf að klára þetta. Þetta er ekkert flókið, YNWA, við unnum, Players…Over and out.

Liðið gegn Tottenham

Posted on 20.01.2010 by SSteinn

Jæja, liðið gegn Tottenham er komið og lítur svona út hjá Rafa Benítez:

Reina

Carragher – Skrtel – Kyrgiakos – Insua

Degen – Lucas – Mascherano – Riera
Aquilani
Kuyt

Á bekknum: Cavalieri, Pacheco, Darby, Spearing, Ngog, Maxi Rodriguez, Babel.

Jæææææja, þabbarrasonna. Við höfum reyndar ekki úr miklu að moða þessa dagana þar sem okkar stærstu kanónur eru fjarverandi vegna meiðsla. Við sjáum Aquilani væntanlega í support role við Dirk, en hann er einn á toppnum og það gleður eflaust marga, sér í lagi hann Babú félaga minn. En hvað um það, hefði viljað sjá Maxi úti í djúpu lauginni á hægri kanti. Ég er samt ákaflega ánægður að fá Riera inn á ný, að mínu mati hefur hans verið gríðarlega mikið saknað. En hvað um það, game on, ég er alveg bjánalega svartsýnn fyrir leikinn og Gvöðmöndur góður hvað við þurfum á sigri að halda í kvöld. Here’s for hoping…

Spurs á morgun

Posted on 19.01.2010 by Babu

Það er með hreinum ólíkindum hvað maður er spenntur fyrir leik morgundagsins eða þannig. Við getum ekki unnið Stoke þrátt fyrir að hafa verið yfir á 92.mín og þetta tímabil er búið að vera þannig að slíkt telst varla vera frétt. Því er leikur gegn þéttu liði Tottenham ekkert draumaverkefni og sérstaklega ekki þar sem við erum án Gerrard, Torres, Johnson, Agger (held ég), Benayoun, Riera og bara þessara sem væru kannski líklegir að búa eitthvað til og skapa eitthverja hættu upp við mark andstæðingana. Ef tekið er mið af síðasta leik þá er restin af liðinu ca. á pari við Stoke í getu og spilastíl… sem reyndar gæti dugað!

Að giska á rétt byrjunarlið er nokkuð erfitt enda erfitt að segja til um ástand sumra leikmanna og eins stöðu annara hjá klúbbnum. Aquilani er t.a.m. heill rétt eins og Lucas og Mascherano, Rodriguez er búinn að ná nokkrum æfingum ásamt því að Babel er kominn aftur í hóp. Ég hef dauðans áhyggjur af því að Benitez kom til með að hafa sóknarleikinn á pásu fyrstu 70.mín á morgun með því að hafa Kuyt einan frammi og stilla þessu svona upp:

Reina

Degen – Carragher – Kyrgiakos – Insúa

Lucas – Mascharano
Rodriguez – Aquilani – Aurelio
Kuyt

Að hafa Carragher á hægri kannti er fullkomin tímasóun, hann var ekki góður hægri bakvörður þegar hann spilaði þá stöðu í den nema varnarlega auðvitað og hann hefur sannarlega ekkert batnað sóknarlega við það að spila miðvörð í hálfan áratug. Skrtel hefur undanfarið bara verið svona helmingi verri heldur en Guðmávitahvaðopolus var í síðasta leik og því vil ég sjá gríska guðinn aftur í miðverðinum frekar en Skrtel! Kyrgiakos er líka óumdeilanlega “maðurinn” hjá klúbbnum eftir að Voronin og Dossena yfirgáfu okkur á einu bretti.

Degen er hægri bakvörður að upplagi og sá eini sem er heill (kaldhæðni sem það nú er) og því set ég hann þarna. Óttast þó auðvitað að Benitez stilli þessu eins upp og hann gerði gegn Spurs með Carra og Degen á hægri vængnum.

Á miðjuna held ég að við fáum aftur þá Lucas og Mascherano og ég tippa á að ítalinn verði framar á vellinum eða skipti sóknartengiliðsstöðunni með Lucas á meðan fyrirliði Argentínu situr aftar á vellinum og hjálpar bakvörðunum með góða kantmenn Spurs.

Á köntunum verður pottþétt einn bakvöðrur og ég tippa á að það verði Aurelio aftur ef hann getur spilað tvo leiki á svona stuttum tíma. Þ.a.l. giska ég á að Rodriguez verði hent beint í djúpu laugina og verði í sinni stöðu á hægri kantinum. Það er auðvitað ansi fljótt enda maðurinn bara nýkoninn en liðið þarf eitthvað nýtt blóð og það strax.

Kuyt má svo skv. breskum lögum (honest) auðvitað ekki vera á bekknum og byrjar því einn upp á topp á kostnað N´Gog og Babel. N´Gog hefur verið arfaslakur undanfarið og er ekki klár í byrjunarliðið gegn liði eins og Spurs, en stöðu Babel hjá klúbbnum skil ég bara alls ekki. Hann er allavega í hóp í þetta skiptið og er víst nýkominn af skrifstofunni hjá Benitez þar sem hann var að biðjast afsökunar á því að væla yfir sinni stöðu á netinu! Ég er á því og hef alltaf verið að ég vil sjá Babel spila meira hjá klúbbnum. Sérstaklega þegar ég horfi á leiki með Kuyt, N´Gog, Voronin o.s.frv. fyrir framan hann í stöðu sóknarmanns. En ef það á ekki að nota manninn og frysta hann úr hóp í leik gegn Stoke sem við fórum í að mestu án sóknarþenkjandi manna þá þarf að fara losa sig við hann og það strax. Þessi vitleysa getur ekki gengið endalaust.

Góða er samt að Benitez á marga möguleika í stöðunni þegar kemur að vali á byrjunarliði og uppstillingu og er í raun ómögulegt að giska á hvernig hann leggur þennan leik upp. Er ekki best miðað við handboltafárið að segja að hann komi til með að stilla upp stífri 6-0 vörn og skipti í 4-4-2 í sókninni.

Spá: Það er allt svo innilega á móti okkur þessa dagana og það hefur svo innilega ekkert fallið með liðinu að við getum ekki annað en verið bjartsýnir fyrir þennan leik, 2-1 sigur með mörkum frá Aurelio og að sjálfsögðu Kuyt.

Þetta er sex stiga leikur og sigur væri afar óvænt ánægja sem við mættum vel flestir alveg ágætlega við.

Kyrgiakos er maðurinn

Ýmsar fréttir

Posted on 17.01.2010 by Kristján Atli

Tony Barrett staðfestir í Times Online í dag að Fernando Torres fór í aðgerð á hné í Barcelona-borg í gær. Aðgerðin heppnaðist að sögn algjörlega og nú er bara eftir fyrir hann að hvíla og koma svo til baka. Við erum að tala um sex vikur og niðurtalningin hefst í dag, sem þýðir að hann ætti að vera klár til æfinga um mánaðarmótin febrúar/mars og vonandi leikfær sem fyrst eftir það. Vonum að hann noti líka tímann til að jafna sig á mjaðmarmeiðslunum sem hafa hrjáð hann í vetur. Fullfrískur Torres gæti reynst ómetanlegur í kapphlaupinu um Evrópusæti í mars-maí.

Þá segir Barrett einnig að Rafa hafi brugðist við meiðslum Torres með að reyna að fá Kenwyne Jones hjá Sunderland að láni. Fyrst á hann að hafa boðið Sunderland Ryan Babel í staðinn í varanlegum skiptum en Steve Bruce var víst ekki hrifinn af því (og ekki Babel heldur segir slúðrið að utan) þannig að nú er hann að reyna að fá hann lánaðan. Ef það gengur ekki get ég ímyndað mér að hann kíki á leikmenn eins og Pavlyuchenko hjá Tottenham eða Heskey hjá Aston Villa. Það er allavega nokkuð ljóst að það verður allt reynt til að fá framherja inn fyrir lok janúar.

Hérna er svo fín grein í Daily Mail þar sem Chris Wheeler fjallar um baráttugleði Liverpool-liðsins í gær. Ég verð að taka undir með honum, eftir að ég komst yfir upphaflega pirringinn sem fylgdi því að missa þetta klaufalega niður í jafntefli verð ég að segja að við getum allavega huggað okkur við hversu baráttuglaðir og grimmir okkar menn voru í gær.

Okkur vantar Gerrard, Torres, Johnson, Riera, Benayoun og nokkra fleiri. Þetta eru flest allt leikmenn sem eru með flinkari mönnum í liðinu hjá okkur og því er kannski eðlilegt að Rafa bregðist við því með því að stilla upp líkamlega sterku liði sem getur barist og tekið á móti. Ef við getum ekki yfirspilað andstæðinginn, þar sem gæðadripplarana vantar, er alveg eins gott að taka smá Stoke á þetta og reyna að valta yfir menn með krafti. Við sáum gott dæmi um það í frammistöðu Sotirios Kyrgiakos í gær. Hann var frábær að mínu mati, át alla skallabolta á teignum, hélt öllum framherjum Stoke í skefjum (Pulis skipti held ég báðum útaf til að reyna eitthvað nýtt) og kórónaði svo frammistöðuna með að troða boltanum í mark andstæðinganna, blóðugur um annað augað. Ég fékk svona nettan 300 fíling við að horfa á hann í gær: THIS! IS! SPARTA! ;)

Báðar greinarnar fjalla svo um frammistöðu dómarans, hins hæstvirta Lee Mason. Times-greinin segir að Rafa hafi lagt inn kvörtun vegna frammistöðu hans, enda ljóst að hann klúðraði illa í tveimur vítaspyrnudómum í gær (í báðum tilfellum brotið á Lucas sem átti betra skilið eftir frammistöðu sína) og hefur ekki beint verið hliðhollur Liverpool í vetur. Hann hefur rekið fjóra leikmenn útaf á tímabilinu, en þrír þeirra hafa verið Liverpool-menn. Eðlilegt að Rafa leiti skýringa.

Já, og af því að menn voru í ummælum leikskýrslunnar í gær að skeggræða neikvæð ummæli Danny Murphy í garð Rafa þá eru hér skemmtileg ummæli eftir meistara Salif Diao:

> “If Benitez is left there to do the job, he will do it. He has already showed his capabilities and with a bit of luck I think it’s a possibility that they will finish in the top four.”

Diao var hörmulegur á sínum tíma með Liverpool og við vorum fegnir að losna við hann en ég man eftir að hafa lesið aðeins um hann á sínum tíma og þar fer víst eðalnáungi. Gaman að sjá að hann hugsar á jákvæðu nótunum til síns gamla félags.

Stoke 1 Liverpool 1

Posted on 16.01.2010 by Einar Örn

Af hverju er maður að þessu?

Af hverju eyði ég laugardeginum í labbi um Stokkhólm í leiðinlegu veðri til að finna fótboltapöbb sem sýnir Stoke-Liverpool? Af hverju situr maður þarna í 90 mínútur og öskrar á liðið sitt? Lætur allt fara í taugarnar á sér, gleðst í fimm mínútur yfir marki og missir sig yfir jöfnunarmarki andstæðinganna?

Af hverju lætur maður þetta lið fara svona í taugarnar á sér? Það er ekkert sem ég segi að ég eigi að halda með Liverpool. Þetta er eitthvað fótboltalið í borg, sem ég hef verið í í svona 10 daga af minni ævi. Samt læt ég þetta lið hafa meiri áhrif á skap mitt en nokkuð annað. Ég er nánast aldrei í vondu skapi…nema þegar að Liverpool gengur illa. Ég reiðist nánast aldrei, nema svona tvisvar í hverjum einasta Liverpool leik.

Þetta tímabil er búið að vera svo ömurlegt að maður spyr sig af hverju maður stendur í þessu. Hverju breytir það fyrir Liverpool þótt ég sleppi því einfaldlega að horfa á næsta leik hér á pöbb í Stokkhólmi? Nákvæmlega engu. Eru þeir líklegri til að spila betur eða verr ef ég mæti ekki? Nei, skiptir engu máli.

En ég veit að ef að ég fer á pöbbinn þá á það eftir að hafa slæm áhrif á mig. Ég mun koma út í brjáluðu skapi með hausverk af pirringi og þarf að eyða næstu klukkutímum bara að ná mér upp svo að einhver leikur við Stoke skemmi ekki fyrir mér allan daginn.

Ég er því hættur, farinn í frí. Ég ætla að taka mér mánaðarlangt frí frá Liverpool. Ég bara get ekki staðið í því að láta þetta lið hafa svona áhrif á mig. Ég get ekki látið þetta ömurlega tímabil skemma fyrir mér daginn og vikuna. Ég er Liverpool aðdáandi af því að það hefur fært mér ómælda gleði í gegnum tíðina. En þetta tímabil er einfaldlega ekki hægt.

Ég skrifaði við færslu í vikunni eftirfarandi komment, sem á vel við og má núna uppfæra eftir þennan leik:

Liverpool hefur leikið 38 leiki á þessu tímabili (með undirbúningstímabili).

Ég held að ég geti í raun sagt að ég hafi bara haft virkilega gaman af því að horfa á þrjá þeirra: Burnley, Man U og Hull (ég missti af fyrri leiknum gegn Stoke).

3 leikir af 38.

Það eru semsagt 7,8% líkur á því þegar ég sest fyrir framan sjónvarpið að horfa á Liverpool leik að ég muni njóta þess. Samt tekst mér alltaf að gleyma þessum líkum fyrir hvern leik og er mættur fullur bjartsýni fyrir framan sjónvarpið.

En núna er þetta komið fínt. Ég ætla að taka mér frí frá Liverpool.

Já, og svona smá leikskýrsla í endann. Ömurlegur leikur. Ömurlegt Liverpool lið. Ömurlega leiðinlegt Stoke lið. Ömurlegur dómari. Heppnismark hjá Liverpool, heppnismark hjá Stoke á síðustu mínútunum (einsog alltaf). Kyrgiakos án efa maður leiksins. Maxi Rodriguez spilaði sinn fyrsta leik fyrir Liverpool.

Liðið gegn Stoke

Posted on 16.01.2010 by Einar Örn

Ég verð að játa það að ég er ekki spenntur fyrir þessum leik. Ég var að spá í því í alvöru áðan hvort ég ætti einfadllega að sleppa því að horfa á leikinn. En svo mundi ég það að ég á leikskýrslu, þannig að ég verð að hætta þessu væli og setjast fyrir framan sjónvarpið og senda okkar mönnum alla þá strauma sem ég get.

Eftir sjokkið í bikarnum þá á maður það til að gleyma því að við getum í dag unnið þriðja leikinn okkar í deildinni í röð og að við unnum þetta Stoke lið 4-0 fyrr í vetur. Þrátt fyrir að ýmsir menn séu meiddir þá væri nú erfitt að halda því fram að maður myndi taka marga leikmenn Stoke fram yfir þá leikmenn sem eru mættir til leiks fyrir Liverpool. Rafa stillir þessu svona upp:

Reina

Carragher – Skrtel – Kyrgiakos – Insua

Degen – Lucas – Mascherano – Aurelio

Kuyt – Ngog

Á bekknum: Cavalieri, Pacheco, Darby, Spearing, Riera, Rodriguez, Aquilani.

Ég segi bara ÚFFFF. Agger er víst meiddur líka. Tveir bakverðir á köntunum. Aquilani og Maxi á bekknum. Þetta lið á að vera nógu sterkt til að vinna Stoke, en ég get ekki sagt að ég sé bjartsýnn. Mjög langt því frá.

*At the end of the storm is the golden sky*

Stoke City á morgun

Posted on 15.01.2010 by Kristján Atli

Yfirleitt þykir manni það jákvætt þegar Liverpool-liðið fær leik skömmu eftir tapleik. Eftir síðustu mánuði, hins vegar, er erfitt að líta á slíkt tækifæri sem eitthvað annað en möguleikann á frekari niðurlægingu.

Það er í rauninni með því hugarfari sem við aðdáendurnir mætum deildarleiknum gegn **Stoke City** á útivelli í hádeginu á morgun. Ég kvíði þessum leik, ég er nánast búinn að útiloka það í huga mér að liðið geti mætt þessu líkamlega sterka, grimma og vel skipulagða Stoke-liði á erfiðum útivelli og náð þremur stigum. Ég hlakka ekki til.

Það eina sem ég get gert að svo stöddu er að vona að Rafa Benítez og leikmennirnir séu ekki sama sinnis. Að þeir iði í skinninu að fá að sanna sig eftir Reading-fíaskóið og umtalið síðustu tvo sólarhringana.

Tel það samt ólíklegt, og ekki síst vegna þess að ofan á allt annað eigum við í talsvert miklum meiðslavandræðum. Þegar hefur verið staðfest að Gerrard, Torres og Benayoun verða ekki með á morgun, og þá þykir mjög ólíklegt að Mascherano og Riera geti verið með. Þá er víst einhver vafi með Pepe Reina en hann æfði í gær og því vonast ég eftir að hann byrji.

Með þetta í huga ætla ég að skjóta á að Rafa stilli upp 4-4-2 leikkerfi á morgun, þar sem það er í raun það eina sem hentar þeim leikmönnum sem við eigum heila, og verði það sem hér segir:

Reina

Degen – Carragher – Agger – Insúa

Rodriguez – Lucas – Aquilani – Aurelio

Kuyt – Ngog

~~Reyndar gæti Aurelio líka byrjað í stað Babel á kantinum en eins og staðan er í dag finnst mér þetta langlíklegast.~~ (Uppfært: Babel segir á Twitter-síðu sinni að Rafa hafi ekki valið hann í hópinn, set Aurelio því inn í hans stað).

Ngog yrði þá fremstur og Kuyt annað hvort í holunni og Maxi Rodriguez á kantinum eða öfugt.

Hvort heldur sem er þá er ljóst að liðið á morgun er vængbrotið, bæði andlega og hvað varðar liðsval. Þetta er langt frá því að vera okkar sterkasta lið og það er langt frá því að vera líklegt til stórræðanna í þessum leik.

**MÍN SPÁ:** Þetta er líklega svartsýnasta upphitun sem ég hef skrifað á þeim tæplega sex árum sem þessi síða hefur verið í gangi en ég geri það ekki að ástæðulausu. Ef ég skil Liverpool-hjartað eftir á hillunni og beiti rökhugsuninni get ég ekki með nokkru móti fengið út þá niðurstöðu að okkar menn lifi af þennan leik.

Ég spái öruggum 2-0 eða 3-0 sigri fyrir Stoke og meina það. Vona samt svo innilega að ég hafi rangt fyrir mér.

YNWA

Okkar maður

Posted on 15.01.2010 by Einar Örn

SSteinn í Fréttablaðinu í dag.

Nákvæmlega!

Torres frá í sex vikur

Posted on 14.01.2010 by Einar Örn

Ég hef litlu að bæta við þetta. Torres og Gerrard eru meiddir. Torres verður frá í 6 vikur, Gerrard í 2 vikur. Já, og svo er Yossi líka meiddur og verður frá í 4 vikur. Og nei, þetta er ekki grín.

Góðu fréttirnar eru þær að í dag eru bara 115 dagar eftir af þessu tímabili.

16 vikur og 3 dagar. Ég er byrjaður að telja niður.

Leikskýrsla (daginn eftir)

Posted on 14.01.2010 by Kristján Atli

Hvað gerðist eiginlega?

Á árunum 2004-2009 hefur Liverpool-liðið verið í stöðugri framför undir Rafa Benítez. Ég hef að undanförnu lesið talsvert af efni sem bendir til þess að Rafa hafi á þessu tímabili verið að vinna vel úr þeim efnivið sem hann hafði, skipta mönnum inn og út og jafnan að bæta gæðin í hópnum smátt og smátt miðað við takmörkuð fjárráð, og svo að skila árangri umfram efni í bæði deildinni og Meistaradeildinni. Allt virtist þetta ná hámarki sl. vor þegar liðið endaði tímabilið á þriggja mánaða völtun yfir alla andstæðinga, þar sem aðeins slakar 60 mínútur á heimavelli gegn Chelsea og þrautseigja Manchester United í deildinni virtust stöðva okkar menn í að staðfesta yfirráð sín í báðum stóru keppnunum.

Það hefur komið greinilega í ljós á fyrri helmingi þessa tímabils að vormánuðirnir í fyrra gáfu fölsk fyrirheit um framhaldið. Í dag skilja allir og sjá greinilega að liðið var að spila vel umfram getu sl. vor, í stað þess sem menn héldu þá að liðið væri loks að sýna sitt rétta andlit. Fyrir vikið hefur tímabilið í ár verið vonbrigðin ein. Við höfum þurft að horfast í augu við að þetta lið er ekki nógu gott til að vinna titilinn, eftir allt saman, og í þokkabót höfum við þurft að kveðja núna þrjá bikara við fyrstu eða aðra hindrun.

Arsenal slógu okkur út úr deildarbikarnum. Það er svo sem eina keppnin sem við getum verið róleg yfir, því það er lítil skömm í að tapa á Emirates. Svo var það Meistaradeildin, þar sem andleysi í lykilviðureignum og kæruleysi á lokamínútum a.m.k. þriggja leikja reyndust okkar mönnum dýrkeypt og urðu til þess að við sátum eftir. Og nú kemur mesta skömmin af þeim öllum, tap fyrir Reading í enska bikarnum þar sem neðrideildarliðið spilaði hreinlega betur en Liverpool í svona 180 af 210 mínútum yfir tvo leiki. Ég hugsa að það sé kortér í gær og kortér í fyrri leiknum sem við getum sagt að Liverpool hafi haft yfirhöndina, ekki mikið meira.

Ég ætla ekkert að fara að telja til allt sem hefur verið margrætt undanfarið á þessari síðu. Eigendurnir, fjármálin, sápuóperan, óheppnin, meiðslin, strandboltarnir, og svo framvegis. Það er ljóst að það er ekki við Rafa Benítez einan að sakast að þetta lið okkar sé ekki í stakk búið að vinna Úrvalsdeildina þetta árið.

Hins vegar hljótum við á einhverjum tímapunkti að spyrja okkur tveggja spurninga:

1: Er það þá líka peningaskorti frá stjórninni að kenna að liðið okkar er að tapa (og spila hörmulega) gegn liðum eins og Reading, Fulham, Portsmouth, Sunderland, Tottenham, Aston Villa (heima), Fiorentina (tvisvar) og Lyon (heima) í vetur? Eða að liðið sé heppið að sleppa með jafntefli gegn liðum eins og Reading, Birmingham (heima), Blackburn og Man City (heima)?

Auðvitað eru þetta ekki allt léleg lið en þetta er óvenju mikið af lélegum frammistöðum. Ég renndi yfir leikjalistann hjá okkur í vetur og átti erfitt með að finna meira en fjóra sannfærandi sigurleiki (Stoke, Burnley, Hull og Manchester United í haust).

Við getum sagt sem svo að ef það er stjórninni að kenna að við erum ekki með meistaralið í höndunum, þá hlýtur það að skrifast á Rafa Benítez að við séum með lið sem kemst ekki upp úr riðlinum í Meistaradeild, á erfitt með að halda sér meðal sjö efstu liða í deildinni og getur ekki klárað Reading yfir tvo leiki í bikarnum.

2: Hvað svo sem hefur gerst sem varð til þess að þetta lið fór úr því að vera ósigrandi sl. vor í að vera vonlaust í vetur, þá hlýtur næsta augljósa spurning að vera hvort Rafa geti snúið genginu við.

Þetta er ekki nýtilkomið – liðið tapaði strax í fyrstu umferð fyrir Tottenham og þriðju umferð gegn Aston Villa á Anfield. Það var í ágúst, fyrir fimm mánuðum síðan, og það hefur lítið breyst síðan þá. Sama andleysið ríkir nú og þá og liðið hefur aðeins tvisvar í vetur náð sigurhrinu sem spannar fleiri en einn sigur í einu í deildinni (í september og svo nú rétt fyrir áramót með ósannfærandi sigrum á Wolves og Aston Villa).

Vörnin byrjaði tímabilið hrikalega illa, virtist svo batna með tilkomu Agger en hefur svo farið aftur á nýjan leik. Í gær var átakanlegt að horfa á alla fjóra varnarmennina og markvörðinn. Miðjan er enn jafn týnd og áður – sumt af því má skrifa á kynslóðaskipti þar sem Alonso hverfur og Rafa reynir að fylla í það skarð, sumt má skrifa á meiðslasirkusinn í kringum Aquilani fyrir áramót, en það er ekki hægt að komast hjá því að nefna að Gerrard, Mascherano, Lucas og Benayoun eru allir langt undir pari í vetur miðað við það sem við vitum að þeir geta. Sama má segja um vængina – Kuyt, Benayoun, Babel, Riera, enginn af þeim hefur staðið sig. Torres hefur skorað þegar hann spilar en aldrei komist á flug sökum meiðsla, á meðan David Ngog er sennilega sá eini í öllum leikmannahóp okkar sem hefur aukið hróður sinn í vetur.

Þetta er einfaldlega langt frá því að vera nógu gott. Lykilmenn eru að spila illa, liðið er samhengislaust og á köflum bæði andlaust og getulaust. Sjálfstraustið er brothætt og liðið hefur lent í óheppni með meiðsli og slíkt í vetur en þau afsaka bara ákveðið mikið. Í gær stilltum við upp mjög sterku liði á pappírnum, liði sem átti hæglega að geta klárað neðrideildarlið á Anfield, en þess í stað tapaði liðið verðskuldað. Það er óverjandi.

Við höfum rökrætt hlutina á þessari síðu og menn ýmist verið með eða á móti. Ég hef hingað til stutt Rafa Benítez, bent á tölfræði sem sýnir allt það góða sem hann hefur gert hingað til og reynt að biðja menn um að sýna stillingu á meðan þessi lægð gengur yfir.

Hins vegar er ekki lengur hægt að tala um lægð þegar spilamennskan hefur staðið í fimm mánuði. Tímabilið á Englandi hefst í ágúst – nú er janúar og við erum enn að bíða eftir að okkar lið mæti til leiks. Það er einfaldlega óviðunandi.

Það þarf að bæta leikmannahópinn, svo mikið er víst. Helst vildum við skipta eigendunum út líka og losna við áhyggjur af fjármálum og rekstri klúbbsins. En að mínu mati er ekki hægt að undanskilja Rafa Benítez ábyrgð þó svo að margt annað hafi farið aflaga undanfarin misseri. Hann stóð sig vel fyrstu fimm árin með Liverpool, stóð af sér ýmis skakkaföll og náði jafnan árangri, en nú er staðan að mínu mati einföld og hægt er að setja hana upp í nokkra punkta:

- Liðið hefur ekki unnið titil í fjögur ár.
- Liðnir eru fimm mánuðir af þessu tímabili og okkar lið er ekki enn mætt til leiks.
- Allt of margir lykilmenn eru að bregðast til að það geti verið tilviljun.
- Rafa stillir að mati langflestra upp allt of fyrirsjáanlegu og/eða neikvæðu liði í mörgum leikjum. Óútreiknanleiki var hans helsti kostur hjá Valencia og á fyrstu árunum með Liverpool en nú breytir hann helst aldrei út af vana, hvorki hvað varðar taktík eða liðsval.
- Líkamstjáning leikmanna segir okkur að það er eitthvað ekki í lagi innan liðsins, og hvað sem það er sem er ekki í lagi er þjálfarinn ekki að ná að laga það.

Rafa hefur staðið sig feykivel í fimm ár, og ég vona enn fyrir hvern leik sem liðið spilar að hann nái loks að rífa það í gang. Með hverjum leiknum sem líður dvínar hins vegar vonin um að það gerist og ég verð að segja, fyrir mitt leyti, eftir leikinn í gær, að ég er kominn í þá stöðu núna að þótt ég sé ekki endilega sannfærður um að það sé rétt að reka hann sé ég einfaldlega ekki marga aðra kosti í stöðunni. Ekki hvað skyndilausnir varðar.

Stjórn Liverpool stendur þessa dagana frammi fyrir ákvörðun. Þau þurfa að taka þessa ákvörðun aftur og aftur, í hvert sinn sem liðið veldur vonbrigðum: treystum við Rafa enn til að snúa genginu við? Hingað til hefur svarið verið já, en það kemur að því að þau breyta um skoðun og taka erfiða en óumflýjanlega ákvörðun.

Eftir daginn í gær, þar sem liðið lék lélegasta leik sinn undir stjórn Rafa gegn einum af svona þremur slökustu mótherjum vetrarins (ásamt Portsmouth (sem unnu okkur) og Leeds (sem við rétt mörðum)) og nákvæmlega ekkert benti til þess að Rafa gæti snúið genginu við, get ég í fyrsta sinn viðurkennt með góðri samvisku að ég gæti ekki mótmælt því ef sá dagur kemur fljótlega að Rafa verði látinn fara.

Rafa Benítez, dagar þínir eru taldir. Ég vona að þú snúir þessu við, ég hef hingað til haft trú á því sem þú ert að gera innan klúbbsins, en það kemur að því að menn geta ekki beðið lengur og verða neyddir til aðgerða. Sá dagur rennur upp fljótlega ef ekkert breytist, og ég mun þá styðja þær aðgerðir. Það verður eitthvað að breytast.

Liverpool 1 – Reading 2 (eftir framlengingu)

Posted on 13.01.2010 by Kristján Atli

Þetta er leikskýrsla fyrir sigur Reading á Liverpool í ensku bikarkeppninni:

**MAÐUR LEIKSINS:** Enginn.

Liðið gegn Reading komið

Posted on 13.01.2010 by Kristján Atli

Þá er LOKSINS komið að því að Liverpool leiki einhverja knattspyrnu á nýjan leik. Rafa hefur valið í lið fyrir leik kvöldsins gegn Reading og er það sem hér segir:

Cavalieri

Degen – Carragher – Agger – Insúa

Lucas – Aquilani
Kuyt – Gerrard – Benayoun
Torres

**BEKKUR:** Gulacsi, Aurelio, Skrtel, Spearing, Pacheco, Ngog, Babel.

Bekkurinn er blanda af aðalliðsmönnum og ungum strákum en fyrir utan Pepe Reina og menn í meiðslum er þetta sennilega okkar sterkasta byrjunarlið í dag.

Þetta lið einfaldlega á að vera nógu gott til að klára Reading á Anfield í kvöld.

Koma svo! YNWA!

Uppfært: Búið að semja við Maxi Rodriguez

Posted on 13.01.2010 by Einar Örn

Hér sést Maxi í Taxi í Liverpool borg í dag.

Kaupin á honum hafa ekki verið staðfest alveg, en það má teljast líklegt að þau mál klárist í kvöld eða á morgun. Frábært mál.

…

19:05

Það er búið að staðfesta “kaupin” á opinberu síðunni. Hann kemur á frálsri sölu frá A.Madríd og samningurinn gildir í þrjú og hálft ár.

Fyrrum fyrirliði A.Madríd, landsliðsmaður Argentínu og mikill vinur Mascherano og Torres.

Flott mál, meira svona

Miðvikudagsumræða

Posted on 13.01.2010 by Maggi

Vona að margir “Poolarar” hafi kíkt á lfc.tv í gær og horft á unglingaliðið okkar rúlla yfir sterkt lið Leicester í FA Youth Cup. Ég gerði það og viðurkenni alveg að ég heillaðist af nokkrum leikmönnum sem voru þar til sýnis!

Continue reading →

Reading á morgun

Posted on 12.01.2010 by SSteinn

Ef ekki væri fyrir það að mér finnst hreinlega að síðasti leikur Liverpool hafi verið á síðasta áratug (munar nú ekki miklu reyndar) þá væri ég frekar lítt spenntur fyrir leiknum annað kvöld. Ég er bara orðinn ferlega hungraður í að sjá mína menn spila á ný. Ég hafði það reyndar alltaf á tilfinningunni í fyrri leiknum gegn Reading að við myndum klára þetta með honum Einari, en svo varð ekki. Við áttum í ferlegu basli með sprækt Reading lið, á meðan við vorum algjörlega áhugalausir, allavega lang flestir þeir leikmenn sem inná vellinum voru. Við eigum sem sagt að vinna þennan leik á morgun, þrátt hvort sem við eigum góðan dag eða ekki. En það þýðir samt engan veginn að þessi leikur sé unninn fyrirfram, síður en svo. En tilfinningin hjá manni segir sem svo að fyrst Reading vann ekki á sínum heimavelli, með einum sínum besta leik (eftir því sem maður hefur lesið) á tímabilinu, þá eiga þeir ekki að geta það á Anfield, sér í lagi þar sem vanmat ætti ekki að vera til staðar lengur eftir þennan fyrri leik.

Ef það er hægt að tala um eitthvað gott í því samhengi að leiknum gegn Tottenham var frestað, þá er það væntanlega það að Javier Mascherano tekur út síðasta leik sinn í 4 leikja banni sínu gegn Reading á morgun. Með fullri virðingu fyrir þeim, þá er þetta leikur sem við þurfum hvað síst á litla skrímslinu okkar að halda. Lucas getur vel leyst hans stöðu af hendi og var líklega okkar besti maður í fyrri leik liðanna. Engar nýjar fregnir eru af meiðslamálum hjá okkar mönnum, Glen Johnson er pottþétt frá vegna meiðsla, sem og Nabil El Zhar. Ég hef hreinlega ekkert frétt af stöðu mála hjá Kelly, en hann hefur verið afar lengi frá núna eftir að hafa átt frábæran leik fyrir gvöðmávitahvað löngum tíma síðan. Albert Riera hefur verið að æfa með liðinu undanfarið og væri gaman að sjá hann aftur í liðinu. Ég tel að við höfum saknað Riera afar mikið á tímabilinu. Hann getur gefið okkur aðra vídd á vinstri kantinum, og sér í lagi á móti liðum sem eiga erfitt með að höndla tekníska leikmenn (sem ég tel einmitt Reading vera). Óvíst er með stöðuna á Ryan Babel, en hann hefur eitthvað verið í sjúkrameðferð undanfarið.

Við sáum þrjá Íslendinga í liði Reading síðast og hefur það eflaust fyllt margan Íslendinginn miklu þjóðarstolti. Sorry, ég fell einfaldlega ekki í þann hóp. Engin meðvituð ákvörðun hjá mér, bara þessi þjóðarstolts tilfinning brýst ekkert fram í mér við að sjá menn sem ég þekki ekkert, en koma frá sama landi og ég, spili með Reading gegn mínum mönnum. Ég vona það sama fyrir þá eins og alla mótherja okkar, sama frá hvaða landi þeir eru, þ.e. að þeir eigi dapran leik. OK, þá er það frá og menn mega básúna hvað þeir vilja um þetta. Ég einfaldlega hef meiri tilfinningu og finn fyrir meiri tengslum við mennina sem klæðast Liverpool treyjunni, heldur en því hvar menn eru fæddir. En hvað um það, að leiknum á morgun.

Það er algjörlega ljóst að okkar menn verða að sýna baráttu, því það verður það sem mótherjar okkar munu byggja á. Ekki leyfa þeim að vinna þennan “seinni bolta” með ákveðninni og baráttunni, við verðum að mæta þeim af hörku og svo láta gæðamuninn í spilamennsku sjást. Fótbolti er skemmtileg og falleg íþrótt, það væri gott ef okkar menn myndu einmitt einbeita sér að því að spila fótbolta á morgun, mæta inn á völlinn fullir sjálfstrausts og sýna muninn á þessum tveim deildum. Það skiptir akkúrat engu máli hvaða menn hefja leikinn hjá okkur, flestir leikmenn úr varaliði okkar myndu eiga fast sæti í liði Reading. Rafa Benítez hefur sagt að hann ætli sér langt í þessum bikar og því held ég að hann stilli upp sterku liði. Ég ætla að spá liðinu svona:

Reina

Degen – Skrtel – Carragher – Insúa

Lucas – Aquilani
Kuyt – Gerrard – Benayoun
Torres

Bekkurinn: Cavalieri, Kyrgiakos, Aurelio, Darby, Babel, Riera og Ngog

Ég hef sem sagt ekki trú á því að hann haldi sig við 4-4-2 kerfið sem hann spilaði síðast. Þessi uppstilling er sókndjörf og hef ég trú á því að við reynum að klára leikinn snemma í leiknum. Við eigum góða möguleika á að komast mun lengra í þessari keppni, aldrei þessu vant þá spilum við á heimavelli ef við náum að klára þennan leik og þá munu leikmenn Burnley heimsækja Anfield. En það er þetta stóra EF, við erum ekki búnir að sigra þennan leik og það má ekki fara í hann með hangandi haus eins og gerðist í fyrri leiknum. Hlutirnir gerast einfaldlega ekki sjálfkrafa og ef leikmenn okkar eru að meina eitthvað með því að styðja sinn stjóra, þá er eins gott að menn fari að drullast til að sýna það í verki og hætta að þvaðra um það. Hlutirnir gerast á vellinum, burt séð frá því hvað er að gerast utan vallar. Leikmenn hafa allir sitt hlutverk, þeir vita sitt hlutverk og þá er ekkert að vanbúnaði fyrir að sinna því almennilega. 3-0 og málið er látið. Torres, Lucas og Gerrard með mörkin.

Yfir og út.

Tottenham EKKI á morgun

Posted on 09.01.2010 by SSteinn

Flókin og erfið upphitun á þessum bænum, enda búinn að liggja yfir henni í dágóðan tíma og leggja mikið “effort” í að úthugsa hana. Upphitun sem sagt frestað.

Úr einu í annað

Posted on 09.01.2010 by Babu

Miðað við hvað Liverpool borg er uppfull af vinstrimönnum þá er hundfúlt til þess að hugsa að knattspyrnulið borgarinnar hefur ekki verið heppið sína “vinstri”menn.

John Arne Riise, Harry Kewell, Vladi Smicer, Mark Gonsalez, Bernard Diomede, Luis Garcia, Andrea Dossena, Fabio Aurelio, Albert Riera, Ryan Babel o.s.frv. Svei mér þá síðast þegar við vorum með mann á vinstri kantinum sem var ekki alltaf meiddur, að spila úr stöðu eða bara plain ekki nógu góður var líklega Patrick Berger á sínum fyrstu árum hjá klúbbnum…. og meira að segja hann var meira og minna meiddur síðustu tvö tímabilin sín hjá klúbbnum!

En þegar allt er tekið til alls á þessum hræðilegu sl. 15-20 árum hvað vinstri kantmenn varðar þá er líklega Berger það skásta sem boðið hefur verið uppá í þessari stöðu síðan John Barnes var og hét.

Ástæðan fyrir því að ég kem inn á þetta er sú að þessi Tékkneska kempa var að enda við að leggja skóna á hilluna frægu, auðvitað sökum meiðsla. Berger var ávallt flottur leikmaður sem maður hefur góðar minningar af frá Liverpool og því ekki úr vegi að kveðja kappann með þessu örstutta youtube myndbandi.

…

Annars hefur leiknum á sunnudaginn verið frestað eins og við höfum áður komið inná, nokkuð magnað fyrir okkur íslendinga að heyra svona, að leik sem fara á fram á sunnudegi sé blásinn af strax á föstudegi. Það gæti komið sumar á þessum tíma hér á landi! En veðrurspáin í Bretlandi er líklega eitthvað marktækari heldur en hér á landi og þar sem það er örlítill snjór yfir öllu þá er bara ALLT stopp í umferðinni. Af myndum af dæma er þetta líklega eitthvað sem meðal íslendingur myndi hlæja af en þeir hafa greinilega ekki frétt af nagladekkjunum ennþá þarna úti.

Svona var reyndar umhorfs á City Of Manchester Stadium þannig að líklega er nú skiljanlegt að þeim leik hafi verið frestað. Reyndar skildist mér að Anfield væri í góðu lagi fyrir sunnudaginn, upphitaður og alles. Aðal áhyggjurnar stafi af áhorfendum sem ætla á leikinn.

Ef við tökum mið af því hvað Englendingar eru slappir að keyra í snjó og að aksturinn versni í jöfnu hlutfalli í Englandi og það gerir hér á landi eftir því sem nær dregur höfuðborginni er óhætt að fullyrða að Lundúnabúar kunni alls ekki að keyra í góðu færi, hvað þá snjó. Líkt og Reykvíkingar eru með öllu vonlausir hér á landi miðað við okkur landsbyggðarfólkið :)

Þ.a.l. er auðvitað alls ekki óhætt að senda Spurs-arana alla leið til Liverpool borgar!

Ryan Babel fékk víst ekki af vita af því að æfingu hefði verið frestað í vikunni og mætti því ferskur á Melwood þar sem hann tók þessa mynd. Það er svosem skiljanlegt að þessir kappar komist ekki á æfingasvæðið á þeim bílum sem þeir keyra á.

Talandi um Babel þá lítur flest allt út fyrir að hann sé á sínum síðasta séns að standa sig á Anfield og verði ekki seldur fyrr en í fyrsta lagi í sumar. Það er líklega mikið til líka vegna þess að ekki er stefnt á að kaupa leikmenn í glugganum núna og skiptir þá litlu þó menn eins og Babel verði seldir.

Hvað sem mönnum kann að finnast um Babel þá hljótum við að vera sammála um að það er mun betra fyrir liðð að eiga hann upp á að hlaupa frekar heldur en að selja hann og fá ekkert í staðin.

…

Hvað leikmannamálin varðar þá er þegar búið að greina frá því áfalli fyrir Liverpool F.C, Liverpool borg og bara alla stuðningsmenn Liverpool að Andrey Voronin er líklega að fara og Andrea Dossena sé þegar farinn.

Sagan um Maxi Rodriguez heldur síðan áfram og er núna orðin gríðarlega líkleg og nýjustu fréttir herma að hann komi jafnvel frítt frá A. Madríd. Persónulega er mér slétt sama hvað hann mun kosta, þeir mættu virkilega fara að klára þetta mál og halda síðan áfram á leikmannamarkaðnum í janúar og bæta við alveg 1-2 leikmönnum í viðbót. Það vantar sárlega eitthvað nýtt og ferskt í þennan hóp okkar.

…

Annars er svosem í lagi að opna fyrir umræðu á aðrar stórar fréttir úr enska boltanum síðustu daga þar sem lítið er í gangi úr þessu.

Þar ber helst að nefna að Vieira er kominn aftur til Englands og gengin til liðs við City á einhverjum fáránlegum launum. Hann kemur frítt til City og gæti reynst þeim ansi drjúgur ef hann er í standi ennþá, stórgóður leikmaður á sínum tíma og með góða reynslu úr enska boltanum. Ég er sérstaklega ánægður með að hann byrjar strax á því að tala um titla sem vonandi eykur pressuna á City, en við hana hafa þeir sloppið furðu vel til þessa.

Hin stóra fréttin er sú að eitt al leiðinlegasta lið í sögu knattspyrunnar, Bolton, var að ráða einn skemmtilegasta og mest spennandi framkvæmdastjórann í boltanum, Owen Coyle. Mér finnst þetta svolítið fúlt því líkt og aðrir hreifst ég með af þessu Burnley liði og hann var algjörlega maðurinn á bak við það ævintýri. En þó ég haldi að hann hefði alveg getað beðið eftir stærra tækifæri þá er þetta nú nokkuð skiljanlegt þar sem Bolton er töluvert stærri klúbbur í dag heldur en Burnley og líklega með aðeins meiri aur úr að spila. Þar að auki verður þetta að teljast lið sem gæti hentað Coyle mjög vel að snúa við genginu hjá.

…

Djöfull langar mig samt extra mikið að það sé enskur bolti um helgina út af því það er ekki!!! Lítum samt á björtu hliðarnar, við förum taplausir í gegnum helgina :)

Dossena farinn til Napoli (staðfest) og Voronin að fara

Posted on 08.01.2010 by Einar Örn

Jæja jæja. Það má gagnrýna margt við Rafa Benitez, en hann má eiga það að hann er oft fljótur að viðurkenna mistök sín í leikmannamálum. Enn eitt dæmið um það kom í dag þegar að Liverpool seldi Andrea Dossena til Napoli fyrir 4,25 milljónir evra (um 3,8 milljónir punda).

Dossena var keyptur sumarið 2008 og menn bjuggust við að hann yrði okkar aðal vinstri bakvörður – kom í raun í staðinn fyrir John-Arne Riise. En honum gekk illa frá upphafi og náði sér aldrei almennilega á strik í enska boltanum.

Hann náði þó að skora eftirminnilegt mark í 4-1 sigrinum á Manchester United. Það var skemmtilegt.

Andriy Voronin er líka á leið frá Liverpool til Dynamo Moskvu fyrir 2 milljónir evra (1,8 milljón punda). Hann kom fyrir núll pund. Voronin verður aðallega minnst fyrir ljóta hárgreiðslu.

Ég efast um að margir muni sakna þessara leikmanna.

Já, og leiknum á sunnudaginn hefur verið frestað.

Frestun á leik og Maxi

Posted on 08.01.2010 by Einar Örn

Liverpool hefur farið fram á að leiknum gegn Tottenham um helgina verði frestað sökum veðurs. Á opinberu síðunni segir:

>Liverpool Football Club have submitted an official request to the Premier League that Sunday’s Barclays Premier League clash against Tottenham be called off for safety reasons.

Já, og Rafa staðfesti það á blaðmannafundi að hann hefði áhuga á að fá Maxi til liðsins. Hann sagði:

>”It’s true we’ve talked to Atletico Madrid and we’re interested in the player but still it’s just conversations.

>”You never know with timescales. It’s a question of everything being more or less agreed, and now it’s for Atletico and the player to talk and see what happens.”

Gott mál með Maxi, slæmt að fá engan Liverpool leik um helgina. Mjög slæmt. Og enn verra fyrir þá sem fóru sérstaklega út til að sjá leikinn.

Stórt “like”

Posted on 07.01.2010 by Einar Örn

Ég setti inn valmöguleika við komment á öllum færslum á síðunni. Núna geta menn gefið “þumal upp” eða “þumal niður” við hvert komment. Við ætlum að sjá hvernig þetta virki – hvort þetta fjölgi gáfulegum komment og dragi úr þeim allra vitlausustu.

Við gefum þessu sjens í sirka mánuð og metum svo hvort þetta sé sniðugt eða ekki. Ég reyndi að hafa þetta eins lítið áberandi, svo að þetta trufli ekki umræðuna alltof mikið. Þið sjáið þumlana fyrir neðan hvert komment.

Nota bene, ekki er hægt að gera “like” á sitt eigið komment.

Brottfarir!

Posted on 07.01.2010 by Maggi

Í dag birtast mest fréttir af brottförum frá liðinu okkar ástkæra.

Einungis snjókoma og vont veður á Bretlandi hefur stoppað af söluna á Andrea Dossena til Napoli, hann er allavega búinn að gera öllum ljóst að hugur hans er kominn til Ítalíu og talað er um að 4.5 milljónir komi í kassann við þessa sölu.

Stóra söluumræða dagsins snýr að Ryan Babel. Eitthvað virðist vera komið á fulla ferð þar, umboðsmaðurinn hans segist hafa sent fimm liðum upplýsingar um hann, auk þess sem þeir félagar eru að skoða metnað Birmingham City, sem bauð 9 milljónir í hann í gær. Ekki eru allir sammála hvort LFC neitaði því og einhverjar fréttir eru í dag að þeir bláu hafi boðið 10 millur í hann í dag.

Svo eru það “hinir gleymdu”! Taglsnillingurinn Andriy Voronin virðist vera búinn með sólbaðið í Miami og stefnir á kaldara slóðir í Rússlandi, flest bendir til 1.5 milljóna sölu þar. Því miður finn ég svo ekki aftur hlekkinn sem ég las í gærkvöldi, en þar var talað um að Christian Gross hinn nýji þjálfari Stuttgart hafi boðið 2 milljónir í Philipp Degen og það þyki líklegra en að hann flytji sig um set í Englandi og yfir til Wigan.

Ef þetta myndi nú ganga eftir erum við því að fá um 18 milljónir punda fyrir leikmannasölur. Ekki virðist þó vera alveg ljóst hversu mikið Rafa fær af þeim peningum til leikmannakaupa, Maxi Rodriguez er sagður kosta 1.5 millur og nýir samningar við Reina og Mascherano verða reiknaðir af upphæðinni sem má eyða. Þar má reikna með um 6 milljónum af upphæðinni. Þá ættu 10 millur að verða eftir sem ekki er alveg ljóst hvað mikið kemur til leikmannakaupa.

Auðvitað er þetta allt leikur að tölum sem verður að koma í ljós, en ég held þó að það sé ljóst að nöfn eins og Luis Suarez og Lavezzi eru ekki að koma fyrir þá upphæð, til þess að fá slík alvörunöfn þarf 15 – 20 milljónir á markaði dagsins.

Vonandi fer nú veðrið að lagast á Englandi svo að hægt sé að skýra myndina eitthvað aðeins og við fáum formlegar staðfestingar á öllum þessum sögum!

Dossena? Voronin? Babel? Maxi? Chamakh?

Posted on 05.01.2010 by Kristján Atli

Auðvitað fór allt á fullt í kvöld. Í kvöld var eina kvöldið sem allir pennarnir á Kop.is voru fjarri skjánum yfir heilt kvöld, þar sem við tókum reglulegan Kop.is-hitting okkar á góðu veitingahúsi og enn betri ölstofu fram eftir kvöldi í kvöld. Kvöldinu var að ljúka núna á öðrum tímanum og ég að renna í hlað heima. Ákveð að kíkja örsnöggt á síðuna áður en ég fer að sofa og hvað sé ég?

Times Online segja frá því að við séum að eltast við Marouane Chamakh hjá Bordeaux. Chamakh hefur verið eftirsóttur síðasta árið og fór næstum til Arsenal síðasta sumar en er enn hjá Bordeaux og verður samningslaus hjá þeim í sumar. Því er bæði hægt að gera samkomulag við hann núna um að fá hann frítt næsta sumar eða kaupa hann ódýrt frá Bordeaux strax núna í janúar.

Sama frétt nefnir einnig að mjög líklegt sé að Andrea Dossena sé að fara til Napoli fyrir um 5m punda og að Ryan Babel sé til sölu. Þar sem heimildarmaður Times er Tony Barrett myndi ég segja að þetta séu ágætlega traustar heimildir.

Independent fylgja þessu eftir með því að segja frá því að Carson Yeung, nýr eigandi Birmingham, vilji sýna metnað með því að bjóða 8m punda í Ryan Babel. Ef það er satt eigum við að bíta af þeim höndina. Það væri frábært að fá svo mikið fyrir hann.

Þá segir á This Is Anfield að ítalskir fjölmiðlar haldi því núna fram að við séum búnir að semja við Napoli um 4.4m punda sölu Andrea Dossena til Napoli. Sama frétt nefnir einnig að Andriy Voronin sé á leið til Dynamo Moskvu fyrir 1.5m punda, en nefna þó engar traustar heimildir fyrir því.

Talað er svo að lokum um að salan á Dossena muni gera Rafa kleift að klára að fá Maxi Rodriguez til liðsins.

Þannig að það virðist allt vera að gerast. Ef við seljum Dossena, Voronin og Babel og fáum Maxi Rodriguez og Chamakh til liðsins í janúar verð ég sáttur og spenntur að sjá nýju leikmennina. En auðvitað er þetta aldrei svona auðvelt. Verður athyglisvert að fylgjast með framvindu mála.

Búið að draga í 4.umferð FA

Posted on 03.01.2010 by Maggi

Eins og ég nefndi hér áður í dag snýst bikarinn um að vera sem lengst í hattinum.

Okkar lið kom snemma upp úr hattinum í dag…

Reading/Liverpool – Burnley er málið. Klára Reading takk, ágætur dráttur bara.

Annars stærsti leikurinn sennilega síðastur, Tottenham og sigurvegari leiks nr. 29, sem er eins og við vitum LEEDS UNITED!

Chelsea fá Preston úti og Arsenal fá Stoke úti.

Reading 1 – Liverpool 1 (uppfært)

Posted on 02.01.2010 by Maggi

Ný keppni og bikar að keppa um, kuldi en ágætur völlur í Berkshire og þrír Íslendingar andstæðingar okkar manna.

Byrjum á klassíkinni, byrjunarliðið

Reina

Darby – Carragher – Skrtel- Insua

Kuyt – Lucas – Gerrard – Aurelio

N´Gog – Torres

Bekkur: Cavalieri, Aquilani, Benayoun, Kyrgiakos, Babel, Spearing, Degen.

Reyndar settu sjónvarpsmennirnir upp að N’Gog væri fyrir aftan Torres í 4231, en um leið og leikurinn hófst var ljóst að þetta var hefðbundið 442.

Reading byrjaði sterkar, hávær völlur og stemmingin með þeim. Við byrjuðum illa og vorum reknir til baka í byrjuninni, náðum engum tökum á miðsvæðinu, alltaf minnst manni færri. Reading bombarderuðu á vörnina okkar og voru einfaldlega miklu duglegri.

Ekki var mikið um færi en á 24.mínútu braut Insua klaufalega af sér. Aukaspyrnunni dúndrað á hið sívinsæla fjarstangarsvæði og þar fékk senterinn að “húkka” boltann inn í markteig þar sem Simon Church potaði honum í netið. 1-0 og að mínu mati sanngjarnt.

Við markið fórum við aðeins í gang og náðum langbesta kafla okkar í leiknum. N’Gog og Aurelio skutu rétt framhjá og Torres átti að gera betur í góðu skallafæri. Jöfnunarmarkið kom svo á 36.mínútu þegar Insua vann boltann af harðfylgi og sendi hann á Captain Fantastic, hann stillti upp og skaut að marki, Kuyt karlinn fylgdi inn í teig og hleypti boltanum í gegnum klofið á sér, þaðan skoppaði hann í jörðina og í fjærhornið.

Eiginlega eina framlag Steven Gerrard í leiknum, 1-1 og við ofaná. Það hélst út hálfleikinn en færin urðu engin og þannig var farið inn í hléið.

Seinni hálfleikurinn var endurtekning þess fyrri, við komum í bullinu úr hléinu og Reading voru með yfirburði á miðsvæðinu, án þess að skapa sér færi. Ég var farinn að öskra á skiptinguna eftir 48 mínútur en Rafa beið með hana þar til á 68.mínútu, N’Gog var frelsaður frá sínu hlutverki sem alls ekki gekk upp, Aquilani fór inn á miðjuna og Gerrard var ýtt framar.

Þar með tókst okkur að vinna okkur varnarstöðuna á miðjunni en satt að segja var nú ekki mikilvægur fótbolti í gangi síðustu 20 mínúturnar, Reading voru á fullri ferð og líklegri til afreka á meðan okkar menn náðu fáum sterkum sóknum. Torres hefði svo einhvern tíma stolið sigrinum í uppbótartímanum en skallaði yfir varamarkmann Reading sem nýkominn var þá inná vegna meiðsla aðalmannsins. Sá fór þó yfir og leiknum lauk með 1-1 jafntefli sem þýðir replay á Anfield þriðjudaginn 12.janúar.

Uppfært

Strax búið að færa leikdaginn, verður miðvikudaginn 13.janúar, vegna þess að við spilum við Tottenham á sunnudegi.

Maður leiksins hjá okkur í dag fannst mér Lucas Leiva sem kannski segir margt um leikinn. Hann braut upp margar sóknir Reading, var alltaf til í að fá boltann og fáar sendingar sem klikkuðu. Aðrir voru undir getu, nema Reina átti góðan leik, Kuyt var duglegur eins og oft og Darby vann sig vel inn í leikinn eftir slaka byrjun.

Maður leiksins í dag fannst mér Íslendingur, vel má vera að ég sé hlutdrægur en Gylfi Sigurðsson var allt í öllu hjá heimamönnum og gaman verður að sjá hann á Anfield. Kannski Gunnar Heiðar verði þar með líka.

Í lokin langar mig að fá smá útrás…

1. Ég SKIL EKKI hvað verið var að gera með 4-4-2 leikkerfi með þennan leikmannahóp. Þetta leikkerfi snýst um það að miðjumenn séu eilítið passívir, minnst annar og kantmenn vaði upp kantana til að komast á bak við varnarlínur. Kuyt og Aurelio ERU EKKI VÆNGMENN og það er fullkomlega út í hött að reikna með því! Eina sem mér dettur í hug er að verið sé að kaupa kantmenn og nýta hafa átt leikinn til að hlaupa í gegnum kerfið. En það var steindautt í 55 mínútur og allt annað flæði kom í leikinn þegar Aquilani kom inn.

2. Tengt leikkerfinu, Steven Gerrard ER EKKI BEST NÝTTUR SEM MIÐJUMAÐUR, hvað þá í þessu kerfi. Sóknarhættan af honum hverfur og hann er einfaldlega ekki nógu duglegur varnarlega í þetta hlutverk, Lucas lent oft í að vera einn gegn þremur!!!

3. Martin Skrtel, er það að verða fullreynt? Var mjög slakur og í raun var ég með lífið í lúkunum allan leikinn gagnvart hans frammistöðu, hvort sem var varnarlega eða þegar hann var með boltann.

4. Upphaf seinni hálfleiks. Gamla vofan komin aftur, steindauðir úr hléinu. Verður að lagast.

5. Kantmenn takk. STRAX!!!

Næsti leikur er sunnudaginn 10.janúar gegn Tottenham í deildinni, það verður fínt að fá þessa daga eftir törnina til að vinna í liðinu og vonandi bæta í hópinn. Ekki veitir af!

Liðið komið

Posted on 02.01.2010 by Maggi

Þá er komið að FA – bikarnum árið 2010.

Okkar lið í dag er svona uppsett:

Reina

Darby – Carragher – Skrtel- Insua

Kuyt – Lucas – Gerrard – Aurelio

N´Gog – Torres

Bekkur: Cavalieri, Aquilani, Benayoun, Kyrgiakos, Babel, Spearing, Degen.

Það er semsagt 4-4-2 í dag! Ekki leiðinlegt og alveg ljóst að verið er að stilla upp afar, afar sterku liði.

Uppfært: Íslendingarnir sem eiga möguleika á að leika eru allir í byrjunarliði Reading.

KOMA SVO!!!

Maxi Rodriguez í janúar?

Posted on 02.01.2010 by Einar Örn

Sky Sports halda því fram að Liverpool eigi í samningaviðræðum við Atletico Madrid útaf hinum argentíska Maxi Rodriguez. Maxi er 29 ára gamall argentískur landsliðsmaður (á afmæli í dag), en hann hefur af einhverjum ástæðum lítið spilað með Atletico á þessu tímabili. Sky halda því líka fram að Benitez sé að leita að bakverði til að fylla skarð Glen Johnson, sem verður frá í mánuð. Þar er nefnt nafn Vasil Torosidis, sem ég hef ekki hugmynd um hver er.

Sky telja að Maxi (sem er samningslaus í sumar) geti komið fyrir lítinn pening. Það verður að teljast spennandi kostur svona í janúar-glugganum að fá svo reyndan og góðan leikmann fyrir lítinn pening.

Reading á morgun, 2.janúar.

Posted on 01.01.2010 by Maggi

Þann 16.mars árið 1872 var í fyrsta sinn leikið til úrslita í opinberri knattspyrnukeppni félagsliða svo vitað sé. Þá unnu Wanderers lið Royal Engineers og urðu þar með fyrstu FA-bikarmeistarar Englands. Upphaflega hófu 15 lið þá keppni, og ekkert þeirra lifir enn í dag.

En keppnin sjálf lifir góðu lífi og laugardaginn 2.janúar koma stóru liðin inní keppnina í 64ra liða úrslitum. Þegar hingað er komið hafa verið leiknar átta umferðir í keppninni, sex umferðir í “qualifying” áður en fyrstu tvær “proper” umferðirnar hefjast.

Þessi keppni hefur löngum haft á sér dulúðugan blæ, þegar barþjónar, sendibílsstjórar og rafvirkjar fá möguleika á að leika við stóru risana, og í einhverjum tilvikum hafa ótrúlegir hlutir orðið þegar þeir litlu slá hina stóru niður, oftar en ekki í drullubaði lítils heimavallar.

Reading

Hlutskipti okkar manna þetta árið er að ferðast suður í þriðju umferðinni og leika gegn Reading. Knattspyrnuliðið Reading kemur frá samnefndri borg, höfuðborg Berkshirehéraðs og útborg London norðvestan við hana, stutt frá Heathrowflugvellinum. Íbúar borgarinnar eru um 145 þúsund talsins og vinna flestir við þjónustustörf.

Heimavöllur þeirra Reading-manna er glæsilegt nýtt mannvirki, Madejski-stadium, sem fyrst var leikið á haustið 1998. Völlurinn heitir eftir eiganda félagsins og formanni, John Madejski. Sá maður er í raun andstaða okkar eigenda, keypti félagið árið 1990 og hefur eytt gríðarlegum upphæðum úr eigin vasa til að búa til öflugan klúbb úr liði sem var við það að falla úr ensku deildarkeppninni. Bestum árangri náði liðið auðvitað þegar það lék í úrvalsdeildinni frá hausti 2006 til vorsins 2008.

Síðasta leiktímabil var Reading ágætt, þeir lentu í 4.sæti í deildinni en töpuðu fyrir Burnley í undanúrslitum Playoffs og því dæmdir til að leika í næstefstu deild í vetur. Við þær fréttir ákvað Steve Coppell sem hafði stýrt liðinu til þeirra stærstu sigra að stíga frá skútunni og eftir stuttar samningaviðræður fjárfesti Reading í manni að nafni Brendan Rodgers, fyrrum samstarfsmanni Mourinho, til að stýra liðinu þetta tímabilið. Skemmst er frá að segja að gengi liðsins í deildinni í vetur hefur valdið stuðningsmönnum þess miklum vonbrigðum, starfsferli Rodgers hjá Reading lauk 16.desember eftir einungis 6 sigra í 23 leikjum. Við starfi hans tímabundið tók Brian McDermott, sem verið hafði yfirnjósnari Reading og þjálfari varaliðsins frá árinu 2000.

Liðið hefur í dag leikið þrjá leiki undir hans stjórn og fengið tvö stig, situr nú í 20.sæti og tveimur stigum ofan við fallsæti, sem er óásættanlegur árangur fyrir þá án nokkurs vafa!

Leikmannahópur Reading

Töluverðar breytingar hafa orðið á leikmannahópi Reading frá því þeir léku í Úrvalsdeildinni. Eins og okkur flestum ætti að vera kunnugt er Reading sannkallað “Íslendingalið” og eigum við þrjá fulltrúa sem reikna má með að taki þátt í leiknum á morgun, auk þess sem Gunnar Heiðar Þorvaldsson gengur til liðs við þá eftir morgundaginn.

Fyrstan er að nefna fyrirliða Reading, eðal-Stöðfirðinginn Ívar Ingimarsson. Ívar er lykilmaður í vörn Reading, fyrirliði félagsins og hefur í dag leikið 225 leiki fyrir það og skorað 11 mörk. Á honum eiga sóknir eftir að bylja annað kvöld og hans frammistaða mun ráða miklu.

Brynjar Björn Gunnarsson, Brilli, var ekki mikið í liðinu hjá Rodgers en frá því að skipt var um stjóra hefur Brynjar leikið stórt hlutverk, sem djúpur miðjumaður eða hafsent. Myndi tippa á að hann yrði djúpt á miðjunni að kljást við Captain Fantastic.

FH-ingurinn Gylfi Sigurðsson hefur svo í vetur fest sig í sessi sem framliggjandi miðjumaður, er í dag markahæsti maður liðsins og alveg klárlega eitt þeirra hættulegasta vopn. Gylfi hefur mikla spyrnu- og skottækni og útsjónarsemi hans bætir upp eilítinn skort á hraða. Benda má á að Gylfi hlaut fótboltalegt uppeldi í Krikanum undir stjórn verulega öflugra þjálfara ;).

Því miður tókst þó ekki þar að leiða hann frá villu sinn vega varðandi uppáhaldslið í enska boltanum, en auðvitað breytist það eftir að hann hefur fengið að sjá alrauða búninginn í slíku návígi!!!

Auk Íslendinganna ættum við að horfa eftir Matejvosky sem skoraði svakalegt mark fyrir Reading í síðustu viðureign við Liverpool og sennilega munum við eftir marki Brian Howard á Anfield, það mark tryggði Barnsley sigur gegn okkar drengjum í þessari keppni.

Á morgun myndi ég tippa á að Reading stilli upp 4-5-1, liggi aftarlega, noti líkamlegan styrk sinn til fullnustu, beiti skyndisóknum og gefi sér góðan tíma í uppstillt atriði. Þau hafa reynst þeim vel í vetur.

Okkar menn

Ég ákvað að eyða töluverðu púðri í Reading, því það er morgunljóst að leikur morgundagsins á auðvitað að verða framhald af tveim síðustu leikjum Liverpool. Rafa hefur rætt um það að óþarfi sé að hvíla menn, en ég spái samt að eilitlar breytingar verði á liðinu sem mætir Reading.

Mín spá um liðið er þessi:

Reina

Darby – Carragher – Agger – Insua

Lucas – Aquilani
Kuyt – Gerrard – Aurelio

N´Gog

Ég held semsagt að Rafa vilji halda áfram að þróa miðjuna, halda stöðugleika í varnarleiknum, en hvíla Torres á bekknum. Í ljósi yfirlýsinga Rafa að undanförnu um mikilvægi þessarar keppni held ég að róteringar fyrir hana verði minni en áður. Enda viljum við hirða þessa dollu.

Hver veit nema að við verðum komin með nýjan leikmann í næstu umferð, þ.e. ef við vinnum viðureignina í 3.umferð.

Samantekt

Leikur morgundagsins er alls ekki léttur! Reading á að geta miklu betur en staða þeirra segir í deildinni, í liði þeirra eru reynslumiklir leikmenn sem hræðast ekki að mæta stórliði, og ungir hungraðir leikmenn sem munu leggja sig 150% fram í svona leik, fyrir framan sjónvarpsmyndavélarnar.

En mér hefur fundist vera jákvæð breyting á liðinu okkar í síðustu leikjum og ég held að hún verði áfram. Menn vilja halda áfram á sigurbraut og það verður lykilatriðið, þó mér kæmi ekki á óvart ef við þyrftum að hafa verulega fyrir því að komast áfram, jafnvel annan leik. En það skref verðum við auðvitað að taka til að fá að sjá Gerrard svona glaðan í vor!

En, ég spái 1-2 sigri í hörkuleik þar sem N’Gog og Gerrard skora. Gaman væri ef að íslenskt mark kæmi frá heimamönnum.

Myndir sem fylgja koma frá Wilkipedia, BBC, SkySports og Daily Mail

KOMA SVO!!!

January 2010
M	T	W	T	F	S	S
« Dec				Feb »
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30	31