Monthly Archives: November 2009

Stöð 2 Sport + spekingar

Posted on by

Eitt af því sem skiptir alveg ótrúlega miklu máli miðað við hvað það skiptir litlu máli við þá upplifun að horfa á knattspyrnuleik er það sem við heyrum úr viðtækjunum meðan á útsendingu stendur. Þeir sem eru í þeirri stöðu að rýna í leikinn bæði fyrir hann, í hálfleik og eftir leik geta haft mikil áhrif á skoðanir áhorfenda og lita þannig umræðuna í kjölfarið. Þá hef ég ekki einu sinni minnst á kallgreyið sem tekur það að sér að lýsa leiknum sjálfum og segja sína skoðun um leið og hann sér atvikið og það án þess að geta ráðfært sig við nokkurn mann. Nóg getur maður farið gegn meginstraumnum þegar leikskýrsla er gerð strax eftir leik hér á þessari síðu.

Það er eins með þetta og mörg önnur störf að þetta er að öllum líkindum mun erfiðara en það lítur út fyrir í fyrstu enda er verið að lýsa leiknum fyrir þeim mönnum sem eru allajafna partur af þeim sértrúarsöfnuði sem við knattspyrnuáhugamenn erum, afar viðkvæmur, með stuttan kveikiþráð, langt frá því að vera hlutlausir og eins misjafnir og við erum margir. Fótbolti er oft sá vettvangur sem við nýtum tækifærið til að fá útrás með því að tala hátt við sjónvarpstækið þannig að líklega fá lýsendur og spekingar ekki alltaf sanngjarna gagnrýni í hita leiksins :)

Á þessum mönnum höfum við vel flestir nokkuð sterkar og afgerandi skoðanir svo ekki sé talað um stöðina sjálfa, Stöð 2 Sport (síðast þegar ég man eftir umræðu um Stöð 2 Sport á þessari síðu urðu Einar Örn og Daði Rafns heimsfrægir, það er þeir fóru í sjónvarpið að röfla yfir svimandi háu verðinu).

Svona í ljósi umræðu síðasta þráðar langar mig aðeins að bæði koma með létta krítík á stöðina og helstu kanónurnar og enn frekar opna aðeins fyrir umræðu um þetta málefni. Gaman væri að heyra skoðanir frá stuðningsmönnum annara liða líka en það er algjört skilyrði að menn séu málefnalegir og hafi í huga að um er að ræða menn sem villast hingað inn af og til eða eru jafnvel reglulegir gestir.

Stöð 2 Sport: Eflaust muna margir eftir umræðunni hérna inni þegar 365 náði enska boltanum aftur til sín og hækkaði verðið gríðarlega, sama hvernig þeir reyndu að blekkja fyrir fólki að hækkunin væri ekki mikil. Þá umræðu er búið að taka og ekki ætlunin að ræða það hér.

Hvað dagskrána sjálfa varðar finnst mér 365 í heildina hafa staðið sig alveg stórvel. Með Stöð 2 Sport 2 færðu nánast allan fótbolta sem spilaður er á Englandi í beinni útsendingu sem er betra en meira að segja SKY hefur leyfi til að bjóða uppá. Umföllunin um leikina var stórgóð í fyrra með þætti Heimis og Guðna strax eftir leiki dagsins og öll helstu deilumál skoðuð gaumgæfilega. Eins var gaman að hafa Guðna sem fyrir ekki svo löngu var að spila með eða á móti þessum köllum og þekkir mjög vel til.

Í ár hefur þessari þjónustu aðeins hrakað og er erfitt að fetta fingur út í það enda um að ræða langan og eflaust nokkuð dýran þátt sem alveg er hægt að sleppa þegar illa árar og það þarf klárlega að skera niður á 365 eins og annarsstaðar núna. Ennþá fáum við allavega allann þann fótbolta sem skiptir máli og styttri og einfaldari samantekt eftir leik. Fyrir stóra leikdaga er fengið ýmsa “spekinga” í settið sem lita þetta og er það vel, dagskráin er allavega ennþá aðeins meira en bara leikurinn þegar um stóra leiki er að ræða.

Ef menn hafa síðan Stöð 2 Sport (Sýn) líka þá ertu kominn með nánast allar íþróttir sem sýndar eru hér á landi, það er líka mjög flott stöð sem ætti að hafa eitthvað fyrir alla sem hafa áhuga á einhverri main stream íþrótt.

Gallinn við að hafa þetta allt er auðvitað að það kostar alveg svívirðilega mikið en á móti kemur að dagskráin er mjög öflug, efnið dýrt og oftar en ekki um að ræða eitt af aðaláhugamálum þeirra sem eru að kaupa þetta. Verst er að þetta sjónvarpsefni nær ekki til þeirra sem hafa temmilega mikinn áhuga á boltanum (horfa á leik og leik) því þá er þetta fljótt að verða of dýrt. Mættu hafa leik og leik í opinni dagskrá og auglýsa það smá.

Lýsendur

Hvern viltu fá sem næsta stjóra Liverpool?

Skoða niðurstöður.

Loading ... Loading ...

Gæði svona sjónvarpsstöðvar markast fyrst og fremst af mannauðnum, þarna eru vissulega margir allra reyndustu lýsendur landsins sem hlítur að vera gæðastimpill en skoðanir á hverjum og einum eru oft ansi misjafnar. Tek fram að ég þekki engan þeirra persónulega og því auðvitað bara að miða við það sem ég sé í imbanum:

Gummi Ben: Án vafa langsamlega bestur í sínu starfi hér á landi að mínu mati, loksins fannst United maðurinn (ath um er að ræða eintölu hér á landi) sem eitthvað er hægt að hlusta á og það hlítur að segja mest alla söguna að flest öllum Liverpool leikjum er lýst af gallhörðum United manni og samt ríkir nánast alger sátt um hann. Það sem Gummi gerir betur en aðrir er að hann nær nánast alveg að gæta hlutleysis og er að mestu laus við sterkar lýsingar og alhæfingar. Þar að auki er heilmikill lúmskur húmor í hverjum leik sem hittir vel í mark.

Arnar Björnsson: Líklega reyndasti lýsandi 365. Persónulega hefur mér alltaf líkað ágætlega við Arnar, kappið er reyndar stundum svo mikið að varla kemur orð rétt út úr honum en hver hefur ekki lent í því. Eins má hann alveg átta sig á því að Arsenal eru hvorki svona ofboðalega æðislegir né svona voðalega ungir og fleiri svona smáatriði. Arnar vinnur annars heimavinnuna greinilega mjög vel fyrir hvern leik og gleymir sér stundum alveg í tölfræðinni, misjafn er smekkur manna og sumir hafa mjög gaman af því (þó ég hafi það allajafna ekki). Helstu áföll Arnars hvað varðar enska boltan hafa klárlega verið að missa sitt heittelskaða Leeds úr deildinni og eins að Finnan og Finninn Sami Hyypia hafi farið frá Liverpool.

Höddi Magg: Þó ég sé alls ekki alltaf sammála Herði þá virði ég hann sérstaklega fyrir að vera virkur lesandi kop.is og var sá eini sem gaf færi á sér í umræðunni síðast þegar Stöð 2 Sport var á dagskrá. Eins má eiginlega segja að ef maður notar fótboltaleik til að öskra aðeins á sjónvarpið þá er Höddi sá eini sem öskrar á móti! Það sem ég meina er að maður hefur stundum vaknað upp með andfælum við að Wigan hafi fengið horn á hættulegum stað í mikilvægum mánudagsleik við Hull (eða eitthvað álíka). Lifir sig alveg ákaflega inn í leikinn og er gríðarlega einlægur sem gerir það að verkum að Höddi getur aldrei leynt sinni skoðun. Stundum finnst manni það í lagi og stundum pirrandi, er allavega í það minnsta líflegur karakter lumar á gullkornum eins og þegar myndavéilin fór í 1 sek á Tom Cruise á lokaleik Real Madríd tímabilið undir stjórn Capello og með Becks á miðjunni, “Þarna er Tom Cruise, sumir halda að hann sé geimvera” og hélt svo áfram að lýsa eins og ekkert hefði í skorist.

Gaupi: Er það ekki rétt hjá mér að Gaupi er nánast ekkert með enska boltann? Hann er auðvitað annar litríkur karakter sem lifir sig mikið inn í leikinn. Stundum finnst mér handboltinn eiga betur við hann en það er líka oft hægt að hafa gaman af honum.

Hans Steinar: Sama með hann og Gaupa, hann er ekkert með enska boltann er það? Mér hefur alltaf fundist Hansi ágætur læt hann ekki mikið fara í taugarnar á mér þegar hann er að lýsa leik.

Kristinn Kærnested: Ég man ekki hvort hann hafi verið á þessu ári en þar er að mínu mati sá sem kemst næst Gumma Ben í þessum bransa hér á landi.  Ef þeir myndu síðan hella nokkrum köldum í hann fyrir leik þá þyrfi enginn annar að sjá um þetta hér á landi ef miðað er við hvað hann getur bullað í míkrafón á skemmtisamkomum.

Spekingarnir

Allajafna er fengið í settið þá sem hafa verið í framarlega hér á landi í boltanum eins og þjálfara og leikmenn ásamt því að við sérstök tækifæri eru þarna spekingar sem teljast meira til þekktra stuðningsmanna liðanna. Eðlilega eru þessir kappar eins misjafnir og þeir eru margir og hafa ekki eins mikla pressu á sér að reyna eitthvað frekar að gæta hlutleysis, flestir þeirra hafa gefið upp eða ekki getað leynt með hvaða liðið þeir halda og menn hlusta á þeirra speki með það í huga, sumum eins og Heimi, Willum og Óla Kristjáns tekst að fara mjög leynt með þetta á meðan öðrum tekst það afleitlega eins og nýlegasta dæmið sýndi glögglega, Leifur Garðars frá því í gær eða Tómas Ingi sem iðulega er til í smá wind-up (gerir það þó á léttu nótunum).

Ég veit ekki hvernig ætti að byggja á annan hátt upp hóp spekinga en þó finnst mér persónulega nokkuð gaman af því að sjá af og til þekkta eða semi þjóðþekkta einstæklina tekna inn af götunni þegar stórir leikir eru, af því gefnu að þeir hafi eitthvað vit á fótbolta. Það er einn frá hvoru liðið eins og t.d. Sigmar og Sigmundir Ernir í gær. SSteinn væri t.d. flottur kandídat fyrir okkur poolara enda fáir hér á landi með viðlíka sambönd inn í klúbbinn sjálfan, hvorki hér á landi né í flestum öðrum löndum utan Bretlandseyja, auðvitað væri þó betra ef þetta væri útvarpslýsing ef SSteinn ætti að mæta.

En ég nenni ekki að fara út í einhverjar nornaveiðar með þessum pistli, allir eru þessir menn að gera sitt besta og þeir sem vilja meina að þeir séu svo miklu betri og meira pro á Englandi ættu að hlusta á Andy Gray í nokkrar mín eða lesa svipaða gagnrýni sem þessir kappar fá iðulega á sig heimafyrir (oft verðskuldað). Þetta er bara til að opna aðeins á umræðu sem flestir hafa skoðun á án þess að tala um hvort menn séu með eða á móti Benitez.

Endilega komið með ykkar krítík en athugið að við verðum kannski örlítið grimmari í ritstýringunni ef yfirdrullið er mikið ;)

Everton 0 – Liverpool 2

Posted on by

Jæja! Okkar menn fóru á Goodison Park í dag og unnu gríðarlega óverðskuldaðan sigur 0-2 á Everton. Everton menn voru betri nánast allan tímann, en aldrei þessu vant þá var heppnin algjörlega okkar megin.

Rafa stillti upp sama liði og gegn Debrecen.

Reina

Johnson – Carra – Agger – Insúa

Mascheran – Lucas
Kuyt – Gerrard – Aurelio
Ngog

Bekkurinn: Cavalieri, Aquilani, Benayoun, Riera, El Zhar, Skrtel, Kyrgiakos

Leikurinn byrjaði jafnt. Liverpool var talsvert meira með boltann, en fyrstu mínúturnar einkenndist leikurinn af miðjuþófi og mikilli baráttu. Á 9 mínútu komst Liverpool þó yfir nokkuð óvænt.

Insúa var með boltann vinstra megin, hann gaf hann á **Mascherano**, sem skaut boltanum. Í stað þess að slasa einhverja áhorfendur einsog vanalega þá fór boltinn í Yobo og þaðan í markið. Mikið heppnismark, en það taldi og Mascherano tók svakalegan sprett til Liverpool aðdáendanna. Frank Lampard hefði verið stoltur af þessu marki.

Eftir það var leikurinn algjörlega Everton manna. Þeir voru miklu meira með boltann, áttu miðjuna með húð og hár og sköpuðu sér talsverðan slatta af færum. Rússinn á vinstri kantinum klúraði dauðafæri og Jo skoraði heil tvö mörk, sem voru bæði dæmd réttilega af vegna rangstæðu.

Spil Liverpool var dapurt. Ekkert kom útúr köntunum. Aurelio virkaði einsog hann væri ekki inná og ekkert kom upp hægri kantinn, nema þegar að Glen Johnson fór uppað endamörkum og gaf fyrir á Insúa, sem að skallaði að marki og Tim Howard varði glæsilega. Okkar eina færi í fyrri hálfleiknum. Ég var búinn að öskra á Kuyt að drulla sér uppað endamörkum í stað þess að keyra alltaf inná miðjuna, en það gerði lítið gagn.

0-1 fyrir okkar menn í hálfleik.

Ég var vongóður um að Rafa myndi messa yfir mönnum í hálfleik og þeir myndu koma og sýna Everton hvernig á að spila knattspyrnu. En svo fór ekki. Everton var eina liðið á vellinum og þeir áttu leikinn í seinni hálfleik líka. Ég sat nánast í fósturstellingunni á sófanum og beið bara eftir því að þeir myndu jafna. Á stundum voru þeir lygilega nálægt því. Reina grein nokkrum sinnum frábærlega inní leikinn, hvað stórkostlegast frá þeim Cahill og Fellaini. Hvernig belginn með afróið skoraði ekki úr því færi mun ég seint skilja. En Pepe Reina er jú snillingur.

Rafa gerði svo öllur að óvörum breytingar á liðinu þegar um 15 mínútur voru til leiksloka. Hann skipti út báðum kantmönnunum. Nákvæmlega það sem ég hafði verið að öskra á hann að gera allan tímann því að þeir Kuyt og Aurelio voru viðurstyggilega lélegir á köntunum. Í stað þeirra komu Riera og Yossi og Kuyt fór fram í staðinn fyrir Ngog. Við það breyttist spil okkar manna og þegar að tíu mínútur voru eftir þá náðu okkar menn að tryggja sér sigurinn. Gerrard vann boltann inní vítateig, gaf hann á Riera sem skaut mjög góðu skoti á marki sem að Howard varði beint til **Dirk Kuyt** sem að skaut boltanum í autt markið.

Og enn ótrúlegra þá héldu okkar menn leikinn út án þess að fá á sig mark. Í fyrsta skipti sem það gerist í deildinni síðan **TÓLFTA SEPTEMBER!**


**Maður leiksins**: Ég hef varla séð ósanngjarnari sigur hjá Liverpool í marga mánuði. Everton var miklu betra lið í leiknum en við unnum. En hverju er ekki fokking sama? Það hefur ekkert gefið okkur neitt að vera betri í leikjum að undanförnu og ná ekki að vinna. Við áttum þetta alveg inni.

Liðið var slappt. Ngog sýndi lítið og Aurelio, Kuyt og Gerrard voru arfaslakir. Gerrard lítur út einsog algjör miðlungsleikmaður þessa dagana. Hann verður einfaldlega að drulla sér til að byrja að spila einsog maður. Lucas og Mascherano voru sæmilegir, en það hjálpaði þeim ekki að hafa svona gjörsamlega vonlausa framlínu fyrir framan sig sem tapaði boltanum í hvert skipti sem þeir fengu hann. Það var ánægjulegt að sjá Mascherano loksins skora og Lucas átti að fá víti í seinni hálfleik.

Vörnin var í lagi, hún hélt allavegana hreinu.

En það að við héldum hreinu í fyrsta skipti síðan í byrjun september var **Pepe Reina** að þakka (uppfært EÖE: ég gleymdi víst að við héldum hreinu gegn Man U. Það er svo lítið afrek að ég hafði gleymt því). Hann varði nokkrum sinnum ótrúlega og var öruggur í teignum. Hann var bjarti punkturinn í dag ásamt varamönnunum, sem gerðu meira á korteri en hinir gerði hinar 75 mínúturnar.

Núna erum við allt í einu komnir uppí fimmta sætið, fyrir ofan Aston Villa, Manchester City og Sunderland, sem að töpuðu öll stigum um helgina.

Þessari hrinu án sigurleiks hlaut að ljúka einhvern tímann. Við höfðum ekki unnið á útivelli í deildinni síðan gegn West Ham um miðjan september.


Mér var nokk sama hvernig okkur tækist að vinna. Ég sagði það fyrir Birmingham leikinn að ég myndi þiggja eitt núll heppnis-sigur og það sama átti við í dag. Okkar menn þurftu á sigri að halda, hverju ljótur og fullur af heppni sem hann var. Ég átti aldrei von á því að við myndum ná okkur útúr þessari hrinu með 6-0 leik þar sem að allir léku vel. Það var ágætt að fá loksins heppnis-sigur. Núna verða okkar menn að nýta þetta búst sem að derby sigur gefur og setja saman hrinu af sigurleikjum í deildinni. Það hjálpar okkur lítið að horfa á töfluna þessa dagana, en ef menn sigra nokkra leiki í röð þá getum við vonandi farið að bera höfuðið aðeins hærra en undanfarið.

YNWA

Liðið á móti Everton

Posted on by

Jæja, liðið sem mætir á Goodison er komið. Það er óbreytt frá síðasta leik

Liverpool: Reina, Johnson, Carragher, Agger, Insua, Mascherano, Lucas, Kuyt, Aurelio, Gerrard, Ngog. Subs: Cavalieri, Aquilani, Benayoun, Riera, El Zhar, Skrtel, Kyrgiakos.

Reina

Johsnon – Carra – Agger – Insúa

Mascheran – Lucas
Kuyt – Gerrard – Aurelio

Ngog

Bekkurinn: Cavalieri, Aquilani, Benayoun, Riera, El Zhar, Skrtel, Kyrgiakos

Semsagt, enginn Torres í hópnum. Þetta lið á að vera alveg nógu sterkt til þess að klára þetta ömurlega Everton lið. Ég segi að við vinnum 1-3 í dag.

Everton á morgun

Posted on by

Þá er komið að fyrsta derby slagnum á þessari leiktíð. Hnúturinn kominn á sinn stað í maganum, þessir blessuðu leikir skapa alveg einstaka tilfinningu hjá mér. Það er ekkert ömurlegra til í boltanum heldur en að tapa á móti þessum bláu &$#/$/$%#%, EKKERT. Auðvitað er mikill sjarmi yfir þessum leikjum og lang flestir stuðningsmenn líta á þessa slagi sem hina eiginlegu derby slagi. Ég verð þó algjörlega að viðurkenna það að ég myndi halda heljarinnar hátíð ef Everton myndi falla niður um deild einhvern daginn, ó já, ég er sko alveg tilbúinn að fórna þessum nágrannaslögum á hverju ári. Á móti kemur þá gefur fátt mér meiri ánægju en að sjá þá rauðu snýta þeim bláu og ég vona svo sannarlega að sú tilfinning verði ríkjandi hjá mér eftir rúman sólarhring.

Ég viðurkenni það líka fúslega hérna að ég gæti ekki þótt líf mitt lægi við, skrifað hlutlausa upphitun fyrir svona leiki og verið að gefa andstæðingunum eitthvað falskt kredit. Það er ALLT við Everton sem mér mislíkar, ja allt nema eitt. Þekki nefninlega nokkra fína náunga hér á landi sem eru stuðningsmenn þeirra, en þá meina ég nokkra, ekki marga. Halli BK, Makkarinn, Nonni Nikótín, Baddi og Halldór nágranni, þið getið hætt að lesa núna, búinn að hrósa ykkur og þið hafið ekkert gaman af restinni af þessari upphitun. Er einhver sem þolir Gollum stjóra þeirra? Eða Cahill? Eða svo ekki sé minnst á yngri Neville dúkkulísuna? Þetta lið hefur alveg einstakan hæfileika í að laða til sín algjörlega óþolandi knattspyrnumenn, og það í bunkum.

Moyes

En ég er líka algjörlega á því að þessi leikur kemur á frábærum tíma fyrir okkur. Mitt í allri kreppunni, mitt í öllu fokkings volæðinu, í allri umræðunni um Rafa, útslátt úr Meistaradeildinni og almennu andleysi hjá liðinu. Hvað kemur þá? Jú útileikur gegn þessum bláu. Á morgun þarf enga motivation, nei, á morgun EIGA menn að arka inn á völlinn með blóðbragð í munni, og þegar lokaflautan gellur, þá á blóðið að leka út um munnvik leikmanna vegna þess að þeir keyrðu sig algjörlega út við það að slátra nágrönnum sínum. Það er ekkert annað í boði á morgun, menn eiga að berjast um hvern einn og einasta bolta, berjast um öll laus svæði og sanna það (ekki síst fyrir sjálfum sér) að þetta lið sé ennþá með þann karakter sem einkenndi það á síðustu leiktíð. Það láta allir eins og að leiktíðin sé búin, ja svei’attann segi ég nú bara.

Það eru búnir 13 leikir af þessari leiktíð, það eru 25 leikir eftir. Við erum 8 stigum á eftir ManYoo í töflunni og 5 stigum frá 3 sætinu, samt láta allir eins og að það séu bara 2 umferðir eftir og staðan eins og hún er núna. Við eigum þennan leik á morgun, sem er algjörlega “krúsíal” fyrir okkur, við eigum einnig Arsenal á heimavelli í desember, en svo erum við að spila við lið sem við eigum að vinna, 4 leikir. Ég ætla að gerast svo djarfur að spá því að í næstu 6 leikjum, þá tökum við 18 stig. Já, ég er bjartsýnn og nei, ég er ekki að bryðja neinar pillur. Ég hef einfaldlega þá trú að liðið okkar fari að smella saman núna og við sjáum það taka gott “rönn” og klári þetta blessaða vesæla ár með stæl. Ég hef of gaman að þessum blessaða fótbolta til að leggjast í eitthvað þunglyndi yfir honum, um leið og búið er að flauta einn leik af, þá er bara um að gera að láta sig hlakka til næsta leiks og það veit sjálfur Fowler að ég er að drepast úr spenningi fyrir morgundeginum.

Ég ætla ekki að gera lesendum síðunnar það að vera að fara í frekari greiningu á þessu bláa gengi sem við erum að fara að heimsækja á morgun, og já, ætla heldur ekki að gera sjálfum mér það. Vil bara segja það að ef Hull getur unnið þá, þá ættum við að geta sent undir 18 ára liðið á morgun og samt unnið. En svo einfalt er það nú ekki, þeir koma ekkert síður brjálaðir til leiks en okkar menn, því þetta eru þeirra úrslitaleikir á hverju ári. Það lítur þó allt út fyrir að röðun þeirra í deildinni sýni rétta mynd af þessu liði. En að öllu skemmtilegri málum…

…okkar menn. Eitthvað hefur verið að styttast sjúkralistinn hjá okkur og er það vel. Það var búið að breyta skrifstofum á Melwood í sjúkraherbergi vegna plássleysis og félag unglækna á Bretlandseyjum sá fram á að helmingur allra útskrifaðra lækna fengju störf á Melwood. Ég ætla svo að skella mér í sveitina yfir helgina með hanska á lofti og athuga hvort ég geti ekki dregið út einhverjar legkökur og farið með til Liverpool borgar, íslenski hesturinn hlýtur að framleiða extra kraftmiklar kökur. En mér að vitandi eru bara 2 leikmenn meiddir núna, Kelly og Babel, en svo eru 33 leikmenn ný stignir upp úr meiðslum og aðrir 44 ekki í leikæfingu. Svo er það stóra spurningin, Fernando blessaður. Spilar hann eða spilar hann ekki? Hann er búinn að vera að æfa núna undanfarið, undir eftirliti, en ég myndi halda að hann ætti hreinlega aldrei að æfa eftirlitslaus. Við hreinlega höfum ekki efni á því að vera svona mikið án hans, það myndi ekkert lið hafa efni á því að vera án besta framherja heims svona mikið. Ég reikna allavega ekki með honum í byrjunarliði á morgun, en finnst mér David Ngog hafa staðið sig frábærlega í hans fjarveru. Strákurinn sá er að eflast við hverja raun og er búinn að setja 5 mörk í sínum 11 leikjum (einhver ónefndur fyrrum framherji sem gekk djöflunum á vit hefur skorað 4 mörk í sínum 18 leikjum). Mér finnst einnig ákaflega ólíklegt að Aquilani byrji inná gegn Everton, ef það er einhversstaðar hætta á því að fá takkana í ökklann á þér, þá er það í grannaslag gegn þeim bláu.

Ég er að vona að Aurelio komi inn í vinstri bakvörðinn á kostnað Insúa, mér finnst strákurinn einfaldlega búinn að vera of shaky undanfarið, og ég tek reynsluna fram yfir hann núna. Þetta er fyrst og fremst spurning um vinstri vænginn, þó svo að ég persónulega myndi vilja hvíla Dirk Kuyt, setja Yossi þar á kantinn og Berta sperrta vinstra megin. Dirk kallinn er búinn að vera svo arfaslakur undanfarið að það hálfa væri svona c.a. 5 sinnum meira en nóg. En ég veit það jafnframt að það er akkúrat enginn séns á því að Rafa taki hann út úr liðinu, sér í lagi ekki fyrir slag gegn Everton, þar sem vinnslan skiptir miklu máli. Ég ætla því að spá liðinu svona:

Pepe

Glen – Carra – Daniel – Fabio

Javier – Lucas
Dirk – Stevie – Yossi
David

Bekkurinn: Cavalieri, Skrtel, Insúa, Aquilani, Riera, El Zhar og Dossena.

Eins og áður sagði, þá er þetta ekkert flókið. 3 stig í boði og það er ALGJÖR SKYLDA að fara með 3 stig heim og koma brosi á rauða helming borgarinnar og tár og gnístan tanna á ófríðari hlutann. Í þessum leik verða menn að byrja að berjast c.a. 0,0001 sekúndu eftir að dómarinn flautar til leiks og hætta að berjast c.a. 3 mínútum eftir að dómarinn flautar til leiksloka. Við fáum ekki betra tækifæri til þess að snúa tímabilinu okkur í hag, við höfum gert það áður, Gary Macca kveikti eld með marki sínu árið 2001, sá eldur slökknaði ekki fyrr en leiktíðin var búin, og það skilaði sér í 3 bikurum í hús. Nú er lag, lifi byltingin, öll sem eitt, YNWA, 0-2 sigur, Stevie og Dirk með mörkin, málið látið.

Rafa – með eða á móti?

Posted on by

Hvern viltu fá sem næsta stjóra Liverpool?

Skoða niðurstöður.

Loading ... Loading ...

Þetta er einföld spurning, en ég skipti svarinu samt í fjóra liði af því að sumum finnst svarið ekki jafn afdráttarlaust og einfalt já eða nei gætu virkað.

Það hafa skiljanlega verið gífurlega fjörugar umræður á blogginu undanfarnar vikur, þökk sé dæmalaust lélegu gengi liðsins. Eðlilega hafa menn tekist hart á um Rafa Benítez og veifað staðreyndum til hægri og vinstri til sönnunar þess að hann sé annað hvort messías eða maðkur í mysunni. Þeir sem styðja kallinn eru sakaðir um að fylgja honum í blindri trú, þeir sem vilja losna við hann sagðir skorta raunsæi.

Fyrir mér er sannleikurinn einhvers staðar á milli. Þegar ég horfi yfir síðustu vikur finnst mér við hafa lent í “the perfect storm”, svo maður sletti aðeins. Þ.e.a.s., margir hlutir hafa farið úrskeiðis á sama tíma. Liðið var ekki styrkt í sumar, leikmenn hafa meiðst, Rafa hefur gert krítísk mistök á köflum, lykilmenn hafa brugðist traustinu, og svo hafa strandboltar og ýmislegt þess háttar gert okkur enn erfiðara fyrir. Það er því erfitt að ætla að staðhæfa að ástandið sé 100% Rafa Benítez að kenna. Ég held við getum öll verið sammála um það.

Hins vegar, þótt þetta sé ekki allt honum að kenna er ljóst að einhvers staðar verður ábyrgðin á þessu að liggja. Því spyr ég einfaldlega í dag, og menn geta svo kannski skeggrætt það í ummælunum og fengið almennilega útrás fyrir borgarslaginn á sunnudag: vilja menn að Rafa Benítez stýri liðinu áfram eða ekki? Og ef já/nei, hvers vegna þá?

Set sjálfur inn mína skoðun í ummælunum, en að lokum ætla ég að koma með spá: það er pottþétt staðreynd að á einhverjum tímapunkti verða eigendurnir neyddir til aðgerða. Hvort sem þeir styðja Benítez eða ekki munu þeir, fyrr eða síðar, neyðast til að taka af skarið og reyna að gera einhverjar breytingar til að stöðva þetta hrun liðsins. Knattspyrnusagan hefur kennt okkur það að í slíkum tilfellum er það alltaf, undantekningarlaust knattspyrnustjórinn sem er látinn bera ábyrgð á genginu og missir starf sitt. Rafa og Bandaríkjamennirnir eru þar engin undantekning.

Mín spá er því sú: ef við töpum gegn Everton á sunnudag verður Rafa látinn fara. Hvort sem við viljum það eða ekki, hvort sem Kanarnir vilja það eða ekki, kemur að því að nóg er nóg og ég held að sá tímapunktur verði ef við töpum gegn Everton.

Allavega, menn geta kosið um þetta og gert svo grein fyrir atkvæði sínu í ummælunum.

Debreceni 0 – Liverpool 1

Posted on by

Þetta var stórskrýtin kvöldstund. Okkar menn fóru til Búdapest í Ungverjalandi og unnu **0-1 útisigur á Debreceni** í fimmtu umferð Meistaradeildarinnar. Það var þó ekki allt sem þurfti til því Lyon þurftu einnig að gera okkur greiða og ná jafntefli eða sigri gegn Fiorentina á Ítalíu. Svo fór þó ekki, Fiorentina unnu 1-0 sigur og tryggðu sér fyrir vikið áframhald í Meistaradeildinni ásamt Lyon, á kostnað Liverpool.

Fyrst að leik okkar manna. Hann var dreplélegur. **David Ngog** (maður leiksins, sá eini sem ógnaði að einhverju viti) skoraði eina markið strax á fjórðu mínútu úr fyrstu sókn okkar manna en eftir það datt leikurinn niður í algjöran göngubolta. Debreceni-liðið var grútlélegt og gerði lítið annað en að hanga á þessari stöðu allan leikinn. Okkar menn stjórnuðu öllu úti á velli en voru svo steingeldir uppi við vítateig andstæðinganna að það hálfa væri nóg. Það var því nánast grátbroslegt þegar Debreceni voru næstum því búnir að refsa okkar mönnum fyrir sofandaháttinn undir lokin en Pepe Reina varði í tvígang – fyrst bylmingsskot (sem átti örugglega að vera fyrirgjöf) utan af hægri kanti og svo dauðadauðadauðafæri af vítapunktinum. Lokatölur 0-1 fyrir okkar menn.

Ef frammistaðan var skrýtin hjá okkar mönnum voru innáskiptingar Rafa ekki síður undarlegar. Ég hafði orð á því fyrir leikinn að bæði byrjunarliðið og bekkurinn væru frekar varnarsinnuð hjá Rafa og það kom á daginn. Aurelio var á vinstri kanti, og þótt hann sé góður bakvörður sem getur spilað á miðjunni er hann engan veginn sókndjarfur og því kom ekki mikill sóknarþungi þeim megin. Hinum megin hafði Johnson sig lítið í frammi og Kuyt gerði það sama og í undanförnum leikjum (les: ekki neitt) og því voru þetta á köflum bara Ngog og Gerrard að reyna eitthvað einir. Virkaði ekki.

Svo komu innáskiptingarnar. Rafa setti eina sóknarmanninn á bekknum, Benayoun, inná … en öllum að óvörum tók hann eina framherja liðsins, Ngog, útaf í staðinn! Ekki jókst sóknarþunginn við það. Svo undir lokin tók hann Aurelio útaf … fyrir Dossena. Alberto Aquilani var klár á bekknum og fékk svo heilar 40 sekúndur undir lokin, kom inná fyrir Gerrard (enn og aftur varnarsinnuð skipting).

Rafa setti þennan leik einfaldlega upp: stjórna honum, komast yfir snemma og halda svo hreinu. Eftir að við lentum yfir virtist liðinu ekki liggja mikið á að sækja, sóknarþunginn var enginn og allar þrjár skiptingar Rafa voru varnarsinnaðar og miðuðust að því að halda fengnum hlut. Kannski skiljanlegt í ljósi þess að þetta var í fyrsta sinn í ellefu eða tólf leikjum sem liðið heldur hreinu en engu að síður get ég ekki annað en lýst frati á svona hugsunarhátt. Við vorum í þeirri stöðu, ef Fiorentina hefðu bara gert jafntefli í kvöld, að fara fram úr þeim ítölsku í markatölu með 4-0 sigri eða stærra og gegn þessu dreplélega Debreceni-liði átti það klárlega að vera stefnan. En ekki hjá Rafa. Hann vildi stjórna þessu og vera varkár. Við verðum bara að vera sammála um að vera ósammála um það, ég og Rafa.

Höfum það samt á hreinu að þessir tveir drepleiðinlegu 1-0 sigrar gegn Debreceni voru ekki það sem gerði út af við liðið í þessum riðli. Né heldur 1-1 jafnteflið á útivelli gegn Lyon. Það var svekkjandi að missa þann leik niður í jafntefli en það er engin skömm að ná aðeins einu stigi þar. Þessi riðill tapaðist í Flórens og svo þegar við létum Lyon rúlla yfir okkur á Anfield. Ef við hefðum bara náð jafntefli í þeim tveimur leikjum ættum við möguleika á því að vinna þennan riðil í dag. Hrikalega svekkjandi.

Hvað er næst? Úrslit kvöldsins þýða að Debreceni geta ekki náð okkur í þriðja sætinu og við komumst ekki upp í tvö efstu sætin. Það er því ljóst að Evrópudeildin bíður okkar manna eftir áramót, lokaleikur riðilsins gegn Fiorentina á Anfield er lítið annað en æfingaleikur úr þessu. Við erum s.s. úr leik í baráttunni um Englandsmeistaratitilinn og Meistaradeildina, og það í nóvember. Eftir sitja baráttan um 4. sætið í deildinni, Evrópudeildin og enska bikarkeppnin. Fyrir áramót verður deildin hins vegar núna í 100% forgangi, vonum að það skili betri árangri en undanfarið.

Vonandi fær Aquilani að spila í Evrópudeildinni en áhugasamir geta njósnað um væntanlega mótherja okkar þegar leikið er þar á fimmtudagskvöldið.

Ég held ég grípi mér frekar bók að lesa.

Liðið komið – Johnson og Agger byrja!

Posted on by

Þá er byrjunarliðið gegn Debrecen komið og er það sem hér segir:

Reina

Johnson – Carragher – Agger – Insúa

Mascherano – Lucas
Kuyt – Gerrard – Aurelio
Ngog

**Bekkur:** Cavalieri, Kyrgiakos, Skrtel, Dossena, Spearing, Aquilani, Benayoun.

Þetta er einfaldlega mjög sterkt lið. Ég veit að margir voru að vona að Aquilani myndi byrja í kvöld, ég átti líka von á því, en Rafa kýs að byrja með þetta sterka lið og svo sterkan varamannabekk, sem er þó kannski helst til varnarsinnaður. Ef við lendum í þeirri stöðu að þurfa að gera sóknarskiptingu eru Aquilani og Benayoun meira eða minna einu valkostir Rafa þannig að þið getið búist við að sjá þá báða spila talsvert í kvöld.

Það kemur í ljós hvort þessi leikur verður upphafið að enn einni endurkomunni í Evrópu eða hvort ballið er búið eftir kvöldið í kvöld. Ég þori varla að vonast eftir hinu fyrrnefnda en er þó orðinn spenntur.

Áfram Liverpool!

Viðtal: Ryan Babel hatar allt og alla

Posted on by

Í dag birtist í Liverpool Echo viðtal við Ryan Babel og það verður að segjast, ef þetta viðtal er ekki útúrsnúningur eða illa þýtt frá öðru tungumáli, þá var Ryan Babel einfaldlega að innsigla endalok sín sem leikmaður Liverpool.

Um Rafa Benítez segir Babel:

“I have tried to talk to the manager but it isn’t of any use [..] I couldn’t really do anything with the feedback Benitez gave me.”

Strike one.

Um loforð Rafa segir Babel:

“We have to trust he is telling the truth. Saying it is different to showing it. We have agreed to look at my situation during the winter break. If there’s no improvement then, I have to be honest, I want to play somewhere else.”

Strike two.

Um sjálfselsku hinna sóknarmannanna segir Babel:

“Normally I would pass the ball – now I take the shot myself more often. I see how they look at me with a face that says; ‘Hey I am free!’ [..] But I’m not going to explain it any further because they don’t give me any explanation when I ask for the ball.”

Lygi. Babel er einn eigingjarnasti leikmaður sem ég hef séð og hann fær mig aldrei til að trúa að hann sé örlátur leikmaður en Kuyt, Benayoun, Gerrard og hinir séu eigingjarnir. Strike three, you’re out!

En Babel er ekki hættur. Um Kuyt og spænskumælandi klíkuna segir Babel:

“Dirk Kuyt? I don’t really hang out with him. Dirk got accepted in the group of the Spanish-speaking players. He is very friendly with them and it looks as if he understands their jokes.”

Eitthvað pirraður út í Dirk, Ryan?

Allavega. Þetta viðtal er massíft. Ekki bara pirringur yfir því að fá ekki að spila heldur sakar hann Benítez um ýmislegt, sakar samherja sína um að vera eigingjarnir á velli og klikkir svo út með að lýsa því hvernig leikmennirnir skiptast í vinagrúppur og meira eða minna gefa í skyn að spænskumælandi leikmennirnir og Kuyt séu saman í klíku, eins og það útskýri hvers vegna Dirk fær að spila reglulega en hann ekki.

Ég skal þýða þetta viðtal yfir á íslensku mjög snögglega fyrir ykkur. Þýðingin er svona: Ryan Babel spilar ekki fleiri leiki í rauðri treyju og verður seldur eða lánaður í janúar.

Ótrúlegt. Ég held að Babel geti með réttu kallast stærstu vonbrigði Rafa á leikmannamarkaðnum.

Debrecen á morgun!

Posted on by

Það er ekkert flókið við stöðu okkar manna fyrir annað kvöld. Eins og staðan er núna erum við mjög líklega á leið í frí frá Meistaradeildinni; Lyon þarf að ná í úrslit á Ítalíu og helst sigra Fiorentina til að við eigum að eiga einhvern möguleika á að fá að halda áfram í þessari keppni og það er ekki happa fyrir Breta að þurfa að treysta á Frakka!

En til að leikurinn á Ítalíu skipti yfirhöfuð einhverju málið þá verða okkar menn að sigra ungverska liðið Debrecen sem leikur Meistaradeildarleiki sína í Búdapest. Völlurinn í Debrecen tekur bara 9.640 manns og er ekki löglegur skv. UEFA stöðlum.

Debreceni VSC eins og þeir heita víst spila því heimaleiki sína í Meistaradeildinni á Puskás Ferenc vellinum í Búdapest. Það er frjálsíþróttavöllur með heimskulega hlaupabraut í kringum hann og eins er ekki neitt þak á stúkunni ef ég er að lesa mig rétt til. Sá völlur tekur 42.000 manns, en er í 220km fjarlægð frá Debrecen. Nýr 15.000 manna völlur í úthverfi Debrecen verður ekki tekinn í notkun fyrr en 2010.

Að vanda er megnið af okkar hóp ýmist í meiðslum, nýkomið úr meiðslum eða á leið í meiðsli, en þetta er hópurinn sem mætti á John Lennon flugvöll og flaug til Ungverjalands:

Pepe Reina, Diego Cavalieri, Glen Johnson, Daniel Agger, Fabio Aurelio, Emiliano Insua, Sotirios Kyrgiakos, Jamie Carragher, Martin Skrtel, Andrea Dossena, Alberto Aquilani, Steven Gerrard, Yossi Benayoun, Javier Mascherano, Lucas Leiva, Jay Spearing, Dirk Kuyt, David Ngog.

Enginn Ryan Babel eftir þessa tveggja fóta tæklingu sem hann varð fyrir og lítið hefur verið spáð í en Daniel Agger er í hópnum og það á víst að taka stöðuna á honum eins seint og auðið er. Fernando Torres og Albert Riera eru svo ennþá meiddir og fóru ekki með til Búdapest. Eins er ég að spá, vissuði að Andrea Dossena er ennþá hjá Liverpool?

Líklegt byrjunarlið:

Reina

Johnson – Carragher – Skrtel – Aurelio

Mascherano – Lucas
Kuyt – Gerrard – Benayoun
Ngog

Reyndar get ég líka alveg séð fyrir mér að Emiliano Insúa og Fabio Aurelio verði báðir á vinstri vængnum og eins yrði ég ekkert hissa á að sjá Alberto Aquilani alveg frá byrjun í þessum leik.

En þar sem við vitum nú nánast allt sem vita þarf um Liverpool fyrir þennan leik og andstæðingarnir eru lið sem við vitum svo gott sem ekki neitt um og heyrum sjaldan af er held ég ekki úr vegi að einblína aðeins meira á þá í þessari upphitun.

Debrecen er næststærsta borgin í Ungverjalandi á eftir Búdapest. Það sem meira er þá er Debrecen höfuðborgin í Hajdú-Bihar sýslu, en án þess að ég hafi mikið fyrir mér í því þá tel ég nokkuð víst að SSteinn sé verulega ættaður úr sýslu sem heitir Hajdú-Bihar. Þess má svo til gamans geta að Transilvanía, þar sem Kristján Atli er fæddur og uppalinn er þarna rétt hjá. Borgin er eins og áður segir 220km frá Búdapest sem mér finnst nú slatti miðað við að leikurinn á að fara þar fram.

Þetta er nokkuð sögufræg borg með rúmlega 200 þús. íbúa sem hægt er að lesa meira um hérna. Borgin var sprengd í döðlur í WW2 og var um 70% hennar lagt í rúst þá. Eftir það tók kommúnistastjórn við landinu og svipað ástand og er yfirvofandi hér á landi nú, en ég læt ykkur um að fræðast frekar um borgina sjálfa og sögu hennar.

Debrecen liðið er sem stendur eitt af albestu liðum Ungverjalands og hefur verið það síðan um aldamótin. Þeir komust upp í Úrvaldsdeild árið 1993 og unnu bikarkeppnina sex og átta árum seinna. Ári seinna eða 2002 féll Debrecen reyndar um deild en náði að kaupa réttinn á að halda áfram í Úrvalsdeild af liðinu sem með réttu hafði unnið sig upp um deild. Ekkert óeðlilegt við það.

Síðan Rafa Benitez tók við Liverpool hefur ríkt algjört blómaskeið hjá Debrecen, það má vera að þar sé um tilviljun að ræða en þeir hafa orðið meistarar tímabilin 2004/2005, 2005/2006, 2006/2007 og 2008/2009.

/></center</p> <h6>Ungverskir meistarar enn eitt árið</h6> <p>Saga Ungverjanna í Evrópu er eins og gefur að skilja hvorki löng eða mikil. Þeir voru að gera góða hluti í Intertoto Cup árið 1988 þar sem þeir komust í undanúrslit.</p> <p>Fyrsta reynsla þeirra af forkeppni Meistaradeildarinnar var árið 2006 er þeir rétt mörðu hið fornfræga lið Hajduk Split 8-0 samanlagt. Í næstu umferð voru þeir ljónheppnir með andstæðinga, eitthvað enskt lið með rauðvínsleginn Skota sem þjálfara. En því miður gleymdu þeir að gera ráð fyrir áhrifum þessa geðilla Skota á dómarastéttina og því fór að lokum svo að enska liðið rétt marði 0-6 samanlagaðan ósanngjarnan sigur, auðvitað á hreinum dómaraskandal.</p> <p>Síðan þá hafa Debrecen reynt að komast í riðlakeppnina án árangurs þar til nú er þeir ruddu úr vegi sænska liðinu Kalmar FF, Levadia Tallin frá Eistlandi og búlgarska stórliðinu Levski Sofia. Með því voru þeir komnir í Meistaradeildina og lentu í riðili með okkur, Lyon og Fiorentina.</p> <p><center><img class=

Meistarar enn eitt árið

Úr fyrri leiknum á Anfield sem við unnum 1-0 með marki frá Kuyt.

Það er ekki hægt að segja að mikið sé um fræga kappa í ungverska liðinu; í markinu er Svartfellingurinn Poleksić en hann lék í markinu þegar þjóð hans lék sinn fyrsta landsleik, gegn Ungverjum 2006. Vinstri kanturinn Leandro kom 17 ára til Ungverjalands frá Brasilíu og eftir að hafa verið þar í fimm ár var hann gjaldgengur í landsliðið og spilaði þar sinn fyrsta leik árið 2004. Eins hafa þeir miðvörð frá Hondúras, Luis Ramos en hann á það sameiginlegt með samlöndum sínum að vera mjög lítið þekktur. Reyndar er þekktasti leikmaðurinn þeirra líklega László Bodnár en sá varð fyrir því óláni að keyra á hjólreiðamann sem lést við höggið, fyrir það fékk Bodnár eins árs fangelsis dóm og verður að teljst afar svekkjandi fyrir hann að bæði lenda í þessu og hvað þá að lenda í því núna þegar þeir eru í Meistaradeildinni. Fyrirliðinn heitir Zoltán Kiss og verður líklega alltaf helst minnst fyrir það.  Að lokum má síðan geta þess að í þeirra herbúðum er Nígeríumaður sem heitir Dudu en ég er ekki frá því að það hafi verið til fuglategund með sama nafni!

Til að setja þetta í samhengi þá er frægasti fyrrum leikmaður Ungverjanna varnarmaðurinn Péter Halmosi sem er hjá Hull City núna!

Mikilvægar upplýsingar:

Þeirra Never Walk Alone, lagið Piros Fehér útlegst á frummálinu sem:

Mi indulunk, ha kell
Mi nem felejtjük el, hogy
Bennünk a vér piros-fehér
Mi küzdünk haver
Ha kell bárkivel
Mert a győzelem mindennél többet ér

En í epískri þýðngu yfir á ensku útlegst þetta sem:

We start if we have to,
We don’t forget that
Our blood is red ‘n’ white
We fight, dude,
With anybody,
‘Cause victory worth more than anything

En eftir að hafa séð þessa þýðingu er ég þess fullviss að orðið dude vanti sárlega í You´ll Never Walk Alone.

Hérna má síðan sjá flottasta mark í sögu Debrecen.

MÍN SPÁ:Það er fyrir lifandis löngu komið að því að eitthvað falli með okkur og því ekki annað hægt að segja en KOMA SVO LYON! Ef okkar menn vinna svo ekki sinn leik eiga þeir ekkert erindi í Meistaradeildinni í ár hvort sem er.

Liverpool – Man City 2-2

Posted on by

Það þarf lítið að fara yfir það hvað þessi hádegisleikur gegn stóra liðinu í Manchester var mikilvægur fyrir okkar menn, okkur vantaði þrjú stig bæði móralskt og ennfrekar til að laga stigatöfluna. Megnið af þeim sem verið hafa verið meiddir voru sendir til töfralæknis í Serbíu sem er fjarskyldur ættingi Sjóðríks Seiðkarls og komu þeir allir heilir tilbaka. Aðeins Torres og Johnsons voru frá ásamt Kelly og Degen sem er i banni.

Því gat Benitez stillt upp nokkuð sterku liði og ágætum bekk:

Reina

Carragher – Skrtel – Agger – Insúa

Mascherano – Lucas
Kuyt – Gerrard – Babel
Ngog

BEKKUR: Cavalieri, Kyrgiakos, Aurelio, Aquilani, El Zhar, Riera, Benayoun.

Þarna skiptir mestu að Gerrard var kominn á sinn stað og hann lét nokkuð að sér kveða á upphafsmínútunni og var að ógna marki City með Babel sem sitt sidekick. Á 4.mín fengu okkar menn aukaspyrnu sem Gerrard skellti fyrir markið, hún fór á einhvern inn í teignum og þaðan beint á Skrtel sem var í dauðafæri og náði góðum skalla að markinu sem Shay Given varði meistaralega. Auðvitað var það ekki nógu svekkjandi því Daniel Agger náði að vankast eitthvað eftir samstuð við Kolo Toure. Daninn lá óvígur og blóðugur eftir og var að lokum borin af velli. Hann fór því útaf og gríski vinur minn Guðmávitahvaðopolus kom inná.
a

Þannig að eftir 4. mín var liðið svona:

Reina

Carragher – Skrtel – Kyrgiakos – Insúa

Mascherano – Lucas
Kuyt – Gerrard – Babel
Ngog

Smá óöryggi kom á liðið við þetta en lítið markvert gerðist fram að 13.mín en þá virtust Gerrard og Babel lenda saman er sá hollenski var að búa sig undir að skjóta og lágu báðir eftir. Þetta var þó ekki alveg svona þar sem mér sýndist Babel bara fá á sig tveggjafóta tæklingu og sá er hana framkvæmdi fór líka í Gerrard. Það var þó ekkert að fyrirliðanum en Babel þurfti líka að fara af velli stuttu seinna vegna þessara meiðsla…

svo að eftir rúmlega korter var liðið orðið svona.

Reina

Carragher – Skrtel – Kyrgiakos – Insúa

Mascherano – Lucas
Kuyt – Gerrard – Benayoun
Ngog

Svo er röflað yfir að Benitez skipti aldrei inná fyrr en á 70.mín !

Þessi meiðsli eru mann samt lifandi að drepa.

Þessar tvær skiptingar riðluðu leiknum alveg og var það sem eftir lifði leiks frekar ósannfærandi hjá báðum liðum. Gerrard átti fínt færi á 27.mín er hann skaut í varnamann fékk hann aftur í ágætri stöðu en smellti boltanum yfir markið. Kuyt skaut síðan í Wayne Bridge og framhjá í ágætu færi. Undir lok hálfleiksins og raunar allann hálfleikinn tók Mascherano nokkar ansi slappar sendingar ásamt því að hann tók eitt af sínum trademark skotum sem fór beint á Given sem greip auðvitað boltann. Engu að síður klárlega framför hjá honum að hitta markið enda hefur það ekki gerst áður í vetur. Svona u.þ.b. sem ég var að verða búinn að blóta Mascherano nóg slysaðist hann á fína sendingu innfyrir á N´gog sem var frekar óákveðinn í sínum aðgerðum og City bægði hættunni frá.
0-0 í hálfleik sem var 6.mínútum lengri en vanalega vegna meiðsla Babel og Agger. (Baggi?)
Skrtel
Seinni hálfleikur byrjaði alveg ágætlega, City fékk reyndar ágætt færi í byrjun sem þeir klúðruðu klaufalega en hinumegin fengum við aukaspyrnu sem Steven Gerrard smellti innfyrir á markteiginn, þar var Martin Skrtel af ÖLLUM mönnum og afgreiddi blöðruna í netið. Flott fyrir Skrtel að ná loksins að pota inn einu marki og var hann alveg himinlifandi með það. En þessi gleði Skrtel varði ekki lengi, eftir markið fóru okkar menn aftar á völlinn og City aðeins að reyna að sækja. Á 60.mín var Bellamy duglegur við endamörkin og náði að koma hættulausum bolta fyrir sem Skrtel tók enga sénsa með og skallaði í horn. Sem er fáránlegt þar sem horn sem Liverpool fær á sig er hættulegra en víti. Það fór svo auðvitað svo að í horninu sleppti Skrtel bara alveg að dekka Adebayor, stærsta mann City, sem skallaði boltann í jörðina og upp í markhornið, vægast sagt hrikalega pirrandi 1-1.
ade
Carlos Tevez kom inná í liði City sem ólíkt okkur hefur tugmilljón punda framherja á lager, Tevez hleypti miklu lífi í lið City og það var auðvitað hann sem var arkitektinn að öðru marki City, hann vann boltann af Skrtel og kom honum á Saun (Ian) Wright-Phillips, hann fór framhjá Guðmávitahvaðopolus eins og hann væri ekki þarna og kom boltanum á Steven Ireland sem var einn á auðum sjó þó af honum lyktaði sterk rangstöðulykt. Líklega var hann þó samsíða boltanum þegar sendingin kom og staðan því orðin 1-2, hreint út sagt ótrúlegt, enn eina ferðina.

Okkar menn náðu þó örlítið að bjarga andlitinu í næstu sókn strax á eftir þegar N´Gog kom boltanum fyrir markið á Benayon sem jafnaði leikinn í 2-2 á 77.mín. Eftir þetta var leikurinn bara rugl, bæði lið sóttu mikið og pressuðu og hefði þetta hæglega getað dottið báðu megin. Annað markvert í restina var að Kyrgiakos meiddist á fímm mínútna fresti í lokin og hinn varamaðurinn tók þetta skerfinu lengra og fór útaf aftur og inn kom Aurelio.

Í lokin áttum við svo nokkur horn og aukaspyrnur og með réttu hefði Lucas átt að klára þennan leik á lokasekúndunum en hann auðvitað bara getur ekki skorað og klúðraði því færinu.

Hroðalega svekkjandi úrslit 2-2 staðreynd og þetta tímabil er bara ekki hægt.

Það er auðvitað ekki einleikið hvað þetta lið okkar er brothætt og það er ansi erfitt að spila leik eftir leik á tæpu liði og vitandi að það meiðist alltaf einhver nýr í hverjum leik. Það var agalegt að missa Agger útaf, sérstaklega þar sem þetta voru ekki einu sinni bakmeiðsl eins og hafa verið að hrjá hann. Eins var Babel frískur í upphafi leiks. Það er allt of mikið rót alltaf á liðinu, sérstaklega í vörninni og það er alls ekki að hjálpa okkur að ná einhverjum vott af stöðuleika.

Hvað leikmenn varðar þá var Reina fínn í dag, var að koma mikið út í teiginn og hirða lausa bolta enda tellja varnarmenn okkar það ekki vera sitt hlutverk. Carragher er bara alls enginn helvítis bakvörður og alveg vonlaus sóknarlega, hann gerði þó allvega sitt í dag en við þurfum hann í miðverðinum, alls ekki bakverði. Skrtel átti misjafnan leik, var sterkur mestan part leiksins og skoraði meira að segja, en á móti þá er hann ekki góður að koma með boltann út úr vörninni og hann var ekki að gera góða hluti í þessum mörkum City. Guðmávitahvaðopolus var heldur ekki neitt að heilla mig og vona ég að hans leikir verði sem allra fæstir í deild og meistaradeild. Insua var síðan mjög sterkur varnarlega og var með SWP í vasanum mest allann leikinn. Á miðjunni var Lucas sterkur og Mascherano líka þó hann skili boltanum hrikalega frá sér oftast nær. Gerrard var fínn í fyrri en greinilega alveg bensínlaus í seinni. Hann átti tvær frábærar aukaspyrnunr og önnur þeirra skilaði marki og hin skapaði mikinn usla í teignum. Á vinstri kanti var Babel frískur þegar hann var inná og Benayoun ágætur þó hann sé greinilega ekki heill ennþá. Hægra megin var Kuyt að spila svipað og undanfarið, þ.e. gat svo gott sem ekki neitt. Ég er virkilega farinn að vona að fréttir um kaup á nýjum hægri kantmanni í janúar séu réttar, hann þarf í það minnsta samkeppni um stöðuna.
Frammi átti N´Gog síðan ágæta spretti og átti m.a. stoðsendingu. Hann virkaði stundum svolítið einn þarna frammi enda Kuyt ekki mikið að hjálpa og Gerrard og Benayoun ekki á fullum hraða þegar leið á leikinn. N´Gog er samt engin Torres og það var augljóslega það sem okkur vantaði í dag. Eins voru bara of margir að spila aftarlega á vellinum (lesist Carra, Skrtel, Kyrgiakos, Mascherno) sem eru ekki góðir að skila frá sér boltanum og því enn verra að missa Agger útaf.

Maður leiksins: Það á þetta eiginlega engin skilið, mörkin sem Liverpool fékk á sig gera það að verkum að Skrtel fær þetta ekki, eins hvarf Gerrard alveg í lokin og Benayoun hvarf þó hann hafi verið líflegur um tíma, líklega set ég þetta bara á hann Lucas sem var fínn í þessum leik, fínn ekki frábær. Í öðru sæti væri síðan Insúa sem var ágætur í dag.

Liðið komið – Gerrard byrjar, Johnson ekki

Posted on by

Jæja, byrjunarlið dagsins gegn Man City hefur litið dagsins ljós:

Reina

Carragher – Skrtel – Agger – Insúa

Mascherano – Lucas
Kuyt – Gerrard – Babel
Ngog

**BEKKUR:** Cavalieri, Kyrgiakos, Aurelio, Aquilani, El Zhar, Riera, Benayoun.

S.s. fyrir utan meiðsli Johnson hafði ég 100% rétt fyrir mér með byrjunarlið. Nokkrar staðhæfingar í kjölfar þessa liðs:

**01:** Babel verður að nýta þennan séns. Hann fær ekki mikið fleiri.
**02:** Þessi vörn bara verður að halda. Carra, Skittles, Dagger, Insúa, ég er að horfa á ykkur. Minnið okkur á hvað þið eruð góðir, takk.
**03:** Lið með Gerrard innanborðs er alltaf sigurstranglegt. Mér líður betur að sjá hann þarna.
**04:** Gaman að sjá El Zhar á bekknum, ásamt Yossi og Albert. Hestalegkökuvökvinn (vá) virðist bara virka, sveimérþá …

ÁFRAM LIVERPOOL!

Man City á morgun!

Posted on by

Mikið var þetta gott. Mér líður, fótboltabullulega séð, eins og ég sé nývaknaður eftir sérlega góðan nætursvefn. Gærdagurinn var ömurlegur, en eftir þennan langa svefn og morgunsturtu er ég bjartsýnn á að dagurinn í dag geti orðið betri. Þótt ég sé ennþá glataður, atvinnulaus og blankur eins og í gær.

Þannig líður mér í dag, eins og Púllara. Bjartsýnn, þrátt fyrir allt.

Eftir þetta fína landsleikjahlé (húrra fyrir því!) er komið að talsverðum stórleik í hádegi laugardags (hey! það er á morgun!) þegar nýríkir liðsmenn Manchester City mæta í heimsókn á Anfield og freista þess að auka forskot sitt á okkur í baráttunni um Meistaradeildarsæti í þessari blessuðu Úrvalsdeild. Af City-mönnum er það að frétta að þeir mörðu sigur í síðasta leik sínum eftir einhver fimm jafntefli í röð í deildinni, og að fyrir utan Robinho og Martin Petrov má búast við fullskipuðu milljónaliði þeirra á Anfield. GaryBarry er víst tæpur eftir að hafa dregið sig út úr landsliðshópi Englendinga en búist er við að hann geti spilað á morgun.

Það sama má segja um ensku landsliðsmennina okkar, þá Steven Gerrard og Glen Johnson, sem og menn á borð við Fabio Aurelio, Daniel Agger og jafnvel Albert Riera og Yossi Benayoun sem fóru víst til Króatíu til að láta sígauna bera hestalegkökuvökva á sár sín og snarbatnaði fyrir vikið. Þá nefbrotnaði David Ngog á æfingu með U21-árs liði Frakka en ætti samt að vera leikfær. Eftir sitja því aðeins Fernando Torres og Martin Kelly sem þeir leikmenn sem verða pottþétt frá á morgun og þótt það sé alltaf söknuður af Nando eru það góðar fréttir að sjá að Rafa hefur loksins úr nærri því fullum leikmannahópi að velja.

Ef við gefum okkur að Benayoun og Riera séu í mesta lagi heilir á bekkinn og Rafa treysti Alberto Aquilani ekki ennþá til að byrja (hann sagði það, ekki ég) held ég að við gætum séð eftirfarandi byrjunarlið á laugardag:

Reina

Johnson – Carragher – Skrtel/Agger – Insúa

Mascherano – Lucas
Kuyt – Gerrard – Babel
Ngog

Aðrir leikfærir myndu svo raða sér á bekkinn, og Voronin í heiðursstúkuna.

Þrátt fyrir milljónir City-manna á þetta lið okkar að geta unnið þá sannfærandi á Anfield. Sannfærandi. Að því gefnu að menn eins og Johnson, Agger, Gerrard, Ngog og fleiri séu í alvöru leikfærir og ekki bara spilandi á 60% getu af því að okkur vantar menn.

**MÍN SPÁ:** Þetta er must-win leikur. Klárlega. Við eigum nokkra svoleiðis á hverju hausti en hér fær liðið kjörið tækifæri til að hoppa upp fyrir City-liðið í deildinni (þrátt fyrir martraðamánuðina tvo sem á undan eru gengnir) og senda sjálfum sér skilaboð um að nú sé þetta rugl búið og menn geti farið að einbeita sér að því að safna stigum að nýju. Að sama skapi myndi tap í þessum leik, eftir landsleikjahléð og allt tal um að byrja tímabilið upp á nýtt hér og nú, hafa áhrif á við ragnarök í leikmannahópi okkar. Ef við töpum þessu óttast ég að tímabilið fari endanlega til fjandans. Vinnum og þá erum við ekkert svo illa staddir, eftir allt saman.

Mín spá er **1-0** sigur okkar manna í baráttuleik. Þetta verður miðju- og varnarbarátta tveggja liða sem ætla hvorugt að gefa færi á sér en þrátt fyrir allar milljónir City-manna er besti miðjumaður heims að spila í okkar liði, ekki þeirra. Steven Gerrard tekur þetta fyrir okkur. Ég elska Steven Gerrard. ;)

Áfram Liverpool!

Þátttaka Liverpool á HM og “fair play” umræðan

Posted on by

Sat í gær og horfði á nokkra landsleiki, þar sem síðustu sætin á HM voru ráðin. Ástæða til að óska Grikkjum, Frökkum, Slóvenum, Portúgölum og Úrúgvæjum til hamingju með sæti sitt í Suður Afríku á næsta ári.

Á opinberu heimasíðunni í gær var tekinn saman sá hópur leikmanna liðsins sem nú eiga möguleika á að leika í lokakeppni HM sumarið 2010. Það er í rauninni alveg með ólíkindum að raunhæfur möguleiki er á að við eigum sautján fulltrúa á þessu stærsta íþróttasviði alheimsins.

Í raun bara spurning hvort að Dossena verður farinn og hvort að Lucas, Aurelio og Insúa ná sér í hópsæti í vetur. Hinir þrettán eiga að vera öruggir ef þeir sleppa við meiðsli. Það finnst mér ótrúleg tala og hlýtur að vera langstærsti hópur leikmanna frá Liverpool nokkurn tímann!

Enda lýsti Rafa því strax að hann hefði töluverðar áhyggjur af þessu, því alveg gæti orðið um að ræða að úrslitaleikurinn yrði Spánn – England og þá eru nokkrir lykilmenn okkar í lykilhlutverkum þeirra liða. Það er að mínu mati ljóst að við eigum að gleðjast yfir því að eiga landsliðsmenn og þetta mun lita HM skemmtilegri litum næsta sumar.

En það er líka alveg morgunljóst að það að spila fótbolta frá júlí og til loka júní eða upphafs júlí næsta árs tekur töluverðan toll og ástæða til að hafa eilitlar áhyggjur af því. Auðvitað skiptir það t.d. máli hjá Torres að hafa leikið í landsliðamóti í vetur, hans meiðsl eru klár álagsmeiðsl og yfirlýsingarnar hans frá í sumar að hann muni koma enn sterkari eftir sumarmót eru í besta falli kjánalegar í dag. Hann var í meiðslaströggli í fyrra og sumarmót með landsliðinu var það síðasta sem LFC þurfti. Auðvitað skilur maður hann, en það breytir því ekki að þátttaka hans lék liðið illa.

Mest gleðst maður þó yfir því að nú verður hvíld frá alvöru landsleikjum og menn fara að snúa sér að æfingaleikjum þar á bæ, með töluvert minni áherslu á úrslit og þá um leið minni meiðslahættu. Því þó gaman sé að HM þá er manni ekki lengur vel við landsleiki, svoleiðis bara er það.

Hið svokallaða “fair play”…

Ekki er langt síðan mannvitsbrekkan og prúðmennið Lee Carsley braust fram á ritvöllinn og lýsti skoðun sinni á óheiðarleika framherjans okkar N’Gog. Ég verð að viðurkenna að í því samhengi fékk ég velgju, þó mér sé ekki vel við dýfur.

Mér finnst í besta falli kjánalegt af því þegar ráðist er með þvílíku offorsi á leikmenn sem brjóta af sér á þann hátt sem N’Gog gerði en síbrotamenn (oft varnarmenn) og ruddar (stundum miðjumenn) sleppa við umræðu um fair play. Hversu margar tveggjafótatæklingar hefur Lee Carsley stimplað í gegnum tíðina, jafnvel komist upp með að slasa menn án þess að fá viðeigandi refsingu? Er það eitthvað minna brot á “fair play” en það sem N’Gog gerði?

Ástæða þess að ég skrifa þetta er auðvitað markið sem kom Frökkum á HM í gær. Á einni svipstundu hefur knattspyrnusnillingnum og skemmtikraftinum Thierry Henry verið snúið upp í “svindlara” og að framkoma hans hafi verið “óíþróttamannsleg”. Ha? Gefið mér einn mann í heiminum sem hefði brugðist öðruvísi við í úrslitaleik um það að komast í lokakeppni HM.

Auðvitað átti markið ekki að standa! Auðvitað braut Thierry Henry reglurnar þegar hann lagði boltann fyrir sig með hendi í yfirmönnuðum vítateig Íranna. Auðvitað “átti” dómarinn að sjá þetta og dæma markið af. En þar liggur málið. Dómarinn missti af atvikinu og markið stendur. Á meðan að sjónvarpsdómarar verða ekki leyfðir í knattspyrnu munu svona atvik koma upp og mér finnst afar erfitt að dæma knattspyrnumenn fyrir að vera mannlegir.

Ef staðan hefði verið 0-1 og komið í uppbótartíma, Thierry Henry hefði klobbað Dunne á miðjunni og verið kominn einn í gegn þegar Paul McShane hefði tekið markmannsskutlu á eftir honum og fellt hann, dómarinn stoppað leikinn og rekið McShane útaf. Aukaspyrna dæmd á miðlínunni sem rennur út í sandinn, leikurinn búinn og Írarnir unnu vítakeppnina.

Hefði McShane verið úthrópaður um allt?

O-nei, hann ætti þá í dag frían Guinness á öllum börum eyjunnar grænu og enginn hefði vogað sér að kalla hann svindlara.

Auðvitað er fair play ákaflega mikilvægt en í úrslitaleik harðrar keppni, sem varla verður harðari en HM hlýtur að verða að reikna með því að leikmenn leggi sig fram við að ná úrslitum og það verður að vera dómarans að bera ábyrgð á því að eftir reglunum sé farið.

Ég allavega ber ennþá mikla virðingu fyrir Thierry Henry og stend við það sem ég hef alltaf sagt að þann mann væri ég til í að taka þátt í að fá á Anfield, þó enn einn skatturinn myndi dembast í hausinn á mér!

10 litlir varnarmenn…

Posted on by

Flestir þeir sem hafa áhuga á enska boltanum hafa velt því fyrir sér hvað sé eiginlega í gangi hjá Liverpool í upphafi þessa tímabils, afhverju er þetta lið sem spilaði svo frábærlega í lok síðasta tímabils svona ofboðslega brothætt núna með svipaðan mannskap. Ýmsar kenningar hafa svosem verið upp, umræða um Rafa Benitez hefur líklega verið meiri heldur en um Icesave, brottför Alonso, fjarvera G&T, lélegur hópur og allt þar á milli. Allt þetta hefur verið tekið fyrir á þessari síðu sem og öðrum svipuðum sem fjalla um sama málefni.

Mín skoðun er nú sú að lið sem spilaði líkt og Liverpool gerði í lok síðasta tímabils bara gleymir því ekki á nokkrum vikum og að ástæða þessa herfilega gengis er nú ekki svona voðalega svart hvít eins og margir vilja meina (oftar þá litað með svörtu þar sem maður er jafnvel álitinn bjáni meðal Liverpool manna að hafa ennþá trú á Benitez). Við höfum lent í atvikum sem ekki ert hægt að segja neitt við, once in a lifetime mörk frá mönnum eins og Assou-Ekotto hjá Spurs og Jerome hjá Birmingham sem kostuðu okkur stig, ásamt því að strandbolti skoraði í fyrsta skipti í síðan byrjað var að sparka í bolta og það fékk að standa vegna nokkuð skiljanlegrar vankunnáttu dómara á reglunum. En  stærsta ástæðan fyrir þessu gengi held ég að sé pirrandi meiðsli lykilmanna sem séu að leika okkur hrikalega grátt svona í upphafi móts.

Ef þið horfið á hin stóru liðin á Englandi sem öll hafa mjög sterka hópa þá finna þau alveg gríðarlega mikið fyrir því að missa sína lykilmenn í meiðsli og ágæt dæmi um það er t.d. Chelsea með eða án Essien og Arsenal sem undanfarin ár hefur verið mjög óheppnið með meiðsli og ekki náð miklum árangri (þetta Arsenal lið er ekkert bara uppfullt af krökkum og þeir hafa sterkt lið þegar lykilmenn eru heilir). Meira að segja United finnur fyrir því ef Ronney, Vidic og Ferdinand eru ekki með og fundu klárlega fyrir því þegar CRonaldo var frá.

Það er því nokkuð ljóst að Liverpool liðið kemur alltaf til með að finna vel fyrir fjarveru Steven Gerrard, eins besta miðjumanns í heimi og Fernando Torres sem er á sama stalli í flokki sóknarmanna. Fjarvera þeirra ein og sér væri  hrein ágætasta afsökun fyrir okkur til að útskýra slakt gengi á þessum erfiðu tímum. En vandamálið er bara ekki eingöngu fjarvera þeirra, við misstum einnig Alonso og þar sem við höfum ekki fyrr en núna farið að sjá til staðgengils hans þá er eiginlega hægt að bæta honum við þennan lista, okkar lykilmanna frá því á síðasta tímabili. En gott og vel þetta var eitthvað sem var vitað fyrir mót.

Mesta vandamálið okkar og sá staður sem við höfum verið óvenju slakir á það sem af er þessu tímabili er blessuð vörnin. Reina hefur ekki gert neitt af sér og lítið hægt að setja út á hann, en fyrir framan hann hafa spilað 10 varnarmenn, tveir þeirra í fyrsta skipti með Liverpool og tveir til viðbótar í fyrsta skipti í ensku úrvalsdeildinni. Þetta er rosalega mikið, jafnvel fyrir Benitez sem á að vera mikið fyrir rotation. Tíu varnarmenn í byrjun nóv er ekki eitthvað sem hann gerði sjálfviljugur. Fyrir þetta höfum við fengið að borga og það ríflega.

Í byrjun móts var Agger ekki klár og því alveg típískt að Carragher og Skrtel nái að hlaupa á hvorn annan og slasa sig báðir, það gaf svolítið mikið tónin fyrir það sem koma skildi. Fyrir utan þessa þrjá hafa sjö aðrir spilað deildar eða meistaradeildarleik, Kyrgiakos sem var að mig minnir ekki kominn fyrir Spurs leikinn, Ayala sem kom inná fyrir Skrtel, 18 ára. Degen, Kelly, Insua, Aurelio og Johnson (Dossena hefur held ég ekki spilað). Aurelio var svo meiddur í byrjun móts og því ekki með undirbúningstímabilið, Degen hefur nánast ekkert spilað með Liverpool og Kelly er nýliði.

Þessir strákar hafa ekkert verið að standa sig herfilega í öllum þessum leikjum en við vitum það af reynslu að það tekur ALLTAF tíma fyrir nýjan varnarmann, sama hvað hann heitir, að komast inn í Liverpool liðið og leikkerfið þannig að þetta virki eins og vél. Þannig að guð hjálpi okkur ef það er breyting á vörninni fyrir hvern leik eða þá í miðjum leik. Það hefur verið allt of mikið rót á vörninni sem hreinlega þarf að fara ná nokkrum leikjum á nokkurnvegin sömu mönnum þannig að menn nái að spila sig saman.

Agger er og hefur verið í tómu basli með meiðsli og maður er að verða ansi langþreyttur á þeim, við þurfum þennan strák í flesta leiki. Guðmávitahvaðopolus sem er 30 ára reyndur landsliðsmaður er kannski ekki verri en Hyypia sem er 36 ára en í Hyypia höfuðum við mann sem gat alltaf komið beint inn í liðið og kunni þetta allt upp á 10 og í bónus átti teiginn bæði í sókn og vörn. Það er ekki eins og ekki hafi verið reynt að halda honum en hann vildi spila reglulega áfram og við getum ekki borgað svona varamanni almennileg laun, sem er synd því hann yrði líklega leikjahæsti maður Liverpool eftir mótið.

Glen Johnson er svo annað púsl í þessu, hann hefur verið gríðarlega öflugur sóknarlega og hefur einnig sýnt að hann er mjög góður varnarlega. En það er með hann eins og aðra, hann þarf að venjast varnarleiknum okkar, þ.e. það á eftir að fínpússa þetta þannig að hann og þeir í kringum hann viti sitt hlutverk alveg upp á tíu enda nokkuð ljóst að með bakvörð eins og Johnson, týpu sem við höfum óskað eftir í mörg ár, skapast mikið meira pláss fyrir aftan hann og opnar þannig leið inn að marki okkar manna. Hann er sannarlega mest spennandi bakvörður sem ég hef séð hjá Liverpool í háa herrans tíð og ef allt er eðlilegt á hann bara eftir að verða betri. Glen Johnson hefur samt eins og aðrir verið að lenda í meiðslum ofan á allt og því höfum við hent inn bæði Kelly og Degen. Kelly er við fyrstu sýn rosalega spennandi leikmaður líka, fljótur og kröftugur og með nokkuð góða hæð sem okkur vantar sárlega, ég býst við að sjá meira og meira af honum á næstunni, en auðvitað um leið og hann fékk sénsinn og sýndi góðan leik meiddist hann og það við að reyna að bjarga marki… sem mistókst. Það er svo líklega kaldhæðni örlaganna að þegar allir á launaskrá klúbbsins eru meiddir þá er Degen sprækur sem lækur, en hann er þó auðvitað ekki nothæfur frekar en fyrri daginn þar sem honum tókst að næla sér í ósanngjarnt þriggja leikja bann. Eitt dæmið enn um okkar tímabil í hnotskurn það sem af er.

Hinumegin höfum við þrjá ágæta leikmenn að berjast um stöðuna. Aurelio er klárlega first chice, en hann er bara heill í sjötta hverjum leik þannig að Emiliano Insúa hefur alveg eignað sér vinstri bakvarðarstöðuna. Hann hefur verið mikið lofaður það sem af er ári og er það vel enda efnilegur strákur sem kemur upp úr varaliðinu okkar. En ég hef samt ekki verið alveg heillaður af honum alltaf á þessu ári og finnst hann eiga þó nokkuð í land ennþá (sem er alveg eðlilegt fyrir hann á þessu stigi ferilsins). Það er ekki að hjálpa honum að vörnin breytist í nánast hverjum leik og í raun er hann ennþá bara að næla sér í næga leikreynslu og öðlast þann leikskilning sem varnarmenn læra ekkert einn tveir og bingó. Hann er gríðarlegt efni fyrir framtíðina þó ég hafi smá áhyggjur af því að hann sé of lítill. Hann vinnur allavega enga skallabolta og það eru of margir í liðinu se gera það ekki. Hvað varð um Dossena veit ég svo ekki alveg og tel alveg ljóst að við verðum að losa okkur við hann einn tveir og bingó, ég er ekki einu sinni viss um að honum yrði treyst til að elda í mötuneytinu ef kokkurinn myndi næla sér í svínó…og samt er hann frá ítalíu!

Þessar sífelldu breytingar á vörninni hafa verið að leika okkur grátt í upphafi þessa árs auk fjarveru okkar helstu lykilmanna og ég er nokkuð viss um að þegar við fáum sterka samstillta varnarlínu aftur, eitthvað sem Benitez hefur verið einstaklega góður í að viðhalda þá fari þetta að ganga betur framar á vellinum líka. Þetta óöryggi á vörninni hefur síðan ekkert hjálpað þeim Lucas og Mascherano sem hvorugur er týpan sem stjórnar spili síns liðs. Þeir hafa þó báðir verið mjög góðir varnarlega og sérstaklega núna eftir að Mascherno mætti andlega frá Argentínu eða Barcelona eða hvar sem hann var nú annarsstaðar en á Anfield í upphafi móts. Það er búið að covera Lucas allvel á þessari síðu og ég sleppi því að fara út í þá umræðu núna.

Annað sem hefur verið að leika okkur alveg hrikalega grátt sem er auðvitað beintengt óöryggi í varnarleiknum er hvað þetta lið okkar virðist vera smávaxið, vörnin hefur oft verið að því er virðist fráránlega staðsett þegar hún er að verjast föstum leikatriðum og má alls ekki við því þar sem flest lið virðast eiga a.m.k. einn leikmann sem ekkert mál er að finna inni í teig Liverpool og gera þannig hvert einasta fast leikatriði hættulegt. Því þrátt fyrir allt þá eru það föstu leikatriðin sem hafa verið að fara hvað verst með okkur.

Þetta sem ég hef farið yfir hér segir að sjálfsögðu ekki alla söguna þó að klárlega sé um stóran part að ræða, þetta er þó annar vinkill en að segja bara blákalt að Rafa Benitez sé vonlaus stjóri sem vinnur aldrei deildina með Liverpool, eða að þetta lið sem við eigum sé einfaldlega bara ekki nógu gott. Þegar blandan er rétt og ef smá friður fengist nú til að stilla saman liðsheild þá er ég sannfærður um að betri tíð sé í vændum. Við verðum að játa að Liverpool liðið  í dag vinnur ekki deildina með eilífu hringli á vörninni, betri helming miðjunnar meiddan og með einn besta framherja deildarinnar á hálfum hraða sem gerir það að verkum að hann skorar “bara” eitt mark í leik.

Ferguson, Wenger eða Lancelot myndu ekki heldur vinna neitt hjá með sín lið við þannig aðstæður.

Klassískur landsleikjahlés pistill..

Posted on by

Í fyrsta skipti svo ég bara hreinlega muni eftir var ég bara hálf feginn að það var landsleikjahlé og ekki leikur hjá Liverpool þessa helgi! Þetta er hrikaleg tilfinning sem ég vona að ég komi aldrei til með að fá aftur. En staðreyndin er bara að eftir svona hörmungarkafla og Liverpool hefur átt undanfarnar vikur og það magn af neikvæðri dómsdags umræðu alla daga var þessi hvíld bara nokkuð góð. Eins var maður auðvitað með það bakvið eyrað að sjaldan hefur liðið þurft eins mikið á hvíldinni að halda og meiðslin eru þannig núna að frekar fáir fóru í verkefni hjá sínum landsliðum og enn höfum við ekki heyrt af neinum meiðslum 7, 9, 13. Reyndar eru Torres og Gerrard báðir ennþá að jafna sig á síðasta landsleikjahléi og þessi kafli sem liðið hefur milli landsleikja hefur farið langt með að rústa þessu ári hjá okkur.

En það eru allavega ennþá ekki að koma svona hroðalegar fréttir af okkar mönnum og Arsenik fékk af RVP, þegar maður tekur mið af því hvað þetta er pirrandi þegar um er að ræða Torres eða Gerrard þá get ég ekki annað en hreinlega vorkennt Arsenal að missa sinn besta mann í tilgangslausum æfingaleik. Reyndar var ég bara að sjá þetta með N´gog, veit ekki hvað nefbrot þýðir í meiðslum né hvað mikið er að marka þessa síðu.

Hvað um það, næstu leikir hjá okkur eru gegn Abu City og þar á eftir er það Everton þannig að við gætum sokkið enn dýpra… en líka slysast til að ná einhverjum úrslitum og koma smá sjálfstrausti og bjartsýni aftur í mannskapinn.

Fréttir af klúbbnum eru annars ekki svo ýkja miklar eða gáfulegar þessa dagana, næsti leikmannagluggi er að nálgast og því er slúðurpressan farin að fjölga ferðunum á pub-inn til muna og er farinn að orða hina ýmsu menn við okkur. Einhversstaðar sá ég Hernanes frá Braselíu orðaðan við okkur og litist nokkuð vel á þann leikmann. Eins er Elia ungur hægri kantur frá Hollandi sem spilar með Hamborg í Þýskalandi orðaður við okkur. Van Der Vaart er orðaður við flest félög í heiminum. Kajer hinn danski og stóri miðvörður Palermo er linkaður við Liverpool, United og Rússland.

Þessar fréttir fara svo að verða skemmtilegri þegar líða tekur á vikuna, t.a.m. er Carlton Cole hjá West Ham sagður kosta £20.m. Ef það er ekki nóg þá fóru þeir á News Of The World á árshátíð og ákváðu í fyrirpartýinu að orða Eduardo við okkur á £10.m. En lítið hefur verið að gera í alvöru meiðslum hjá Liverpool eftir að Kewell og Cisse fóru. Læknastaffið er orðið þreytt á þessum titlingaskít sem okkar menn næla sér svo reglulega í þessa dagana.

En já talandi um fyllerí þá er rússneska  fyllibyttan Roman Pavlyuchenko orðaður í janúar, jafnvel á láni. Ég veit ekki með hann enda efa ég að hann hafi það hugafar sem Benitez vill hjá leikmannig en bæði hann og Carlton Cole eru týpur af leikmönnum sem okkur vantar í hópinn, en þar með er ekki sagt að maður sé vitund spenntur fyrir að fá þá á Anfield. Carlos Pavlyudinho myndi strax hljóma betur.

Á móti er svo Javier Mascherano reglulega orðaður við Barca og maður gæti bara hreinlega trúað að hann eigi ekki eftir að vera hjá Liverpool í mörg ár í viðbót eins og staðan er i dag.

Talandi um miðjumenn þá var ítalska þjóðhetjan Andrea Dossena að tjá sig um landa sinn Aquilani:

“He is a complete midfielder who can do everything at both ends of the pitch. He can run, defend, make a hard tackle or score with his terrific shot from long distance.
“He and Gerrard together can give us the strongest midfield in the league, and one of the strongest at European level. Over the past two seasons he has played little football because of his injuries, but when he is fully fit he will prove his value.
“Give him just a little time to settle in England, on and off the pitch, and he will be a sensational player.”

Svosem ekkert nýtt þarna enda um svona týpískt LFC.TV viðtal við leikmenn að ræða en þar eru á ferðinni einhver þurrustu, fyrirsjáanlegustu og leiðinlegustu viðtöl sem tekin eru í geiminum. Ekkert diss á hina frábæru LFC.TV síðu samt, svona fyrirsjáanleg færibanda viðtöl fara bara í taugarnar á mér og minna mig á það þegar ég tek “viðtöl” við leikmenn míns liðs hérna á Íslandi fyrir aðra síðu… og segi leikmönnunum svo frá því eftir á (“,)

Ekki snúa þessu upp í að ég sé bara að tala um Doeesena samt, þetta á við um alla leikmenn og t.d. er venjulegt viðtal við Gerrard oft álíka spennandi og samtal við tré í útilegu á 7 bjór (s.s. ekki alveg alslæmt).

Í lok þessa pistils sem er eins og sjá má eingöngu uppfyllingarefni til að losna við umræðu síðasta þráðar langar mig að hrósa formanni Liverpool klúbbsins og óska honum til hamingju, því þrátt fyrir að hafa sýnt af sér það fádæma reynsluleysi að eiga von á sér á miðju tímabili þá náði hann að stilla þetta þannig að hægt var að nýta landsleikjahléð í þetta. Vel gert SSteinn.

ATH: vinsamlega ekki tjá ykkur hérna ef þið eigið við sama vandamál að stríða og Viktor EB talaði um hér ! Í þessu ástandi er fólk á vegum kölska.

Hvíld

Posted on by

cl-bus

Hér er þörf á nýrri færslu. Ég reyndi að lesa ummælin við síðustu færslu, en ég gafst uppá þeim.

Ég verð að játa að ég hef verið ótrúlega ánægður með þetta landsleikjahlé. Það er búið að vera furðu fínt að fá smá frí frá Liverpool. Það er ekki oft sem ég segi þetta, en ég var bara kominn með nóg af veseni tengdu Liverpool – það var fínt að fá smá hvíld og hugsa um eitthvað annað í nokkra daga.

En allavegana, maður getur núna væntanlega byrjað niðurtalninguna í næsta leik. Flestir af okkar bestu mönnum eru ekki að spila með landsliðum sínum þessa vikuna þannig að þetta landsleikjahlé var alveg ótrúlega velkomið.

Ég veit að ég verð allavegana endurnærður og fullur af bjartsýni þegar að Manchester City mæta á Anfield um helgina.

Carlton Cole í janúar?

Posted on by

The Daily Star greinir frá því í dag að Rafa Benítez sé að hugsa um að reyna að fá Carlton Cole frá West Ham í janúarglugganum fyrir 12m punda.

Ég kaupi þessa frétt samt eiginlega ekki. Það er vitað mál að West Ham eiga við lausafjárvanda að stríða og gætu þurft að selja leikmenn, og það er einnig vitað mál að Carlton Cole vill komast til stórliðs og spila í Meistaradeildinni. Svo sjá allir að við þurfum a.m.k. einn háklassaframherja til að vera með Torres og Ngog í hópnum okkar. Hins vegar er ég ekki viss um að Carlton Cole sé sá maður, þótt ég hefði ekkert á móti því að fá hann.

Svo er það líka Daily Star sem segir frá þessu. Legg ekki mikinn trúnað í það blað.

Þetta eru svo sorglegar fréttir: þýski landsliðsmarkvörðurinn Robert Enke framdi sjálfsmorð í gær, stökk fyrir lest og batt enda á líf sitt aðeins 32ja ára gamall.

Ég man eftir að sjá Enke spila fyrir Barcelona, þar var fínn markvörður á ferð. Hann var í fríi frá landsliðinu þetta sinnið vegna þess að hann er nýstiginn upp úr meiðslum en Joachim Low, landsliðsþjálfari, hafði áður sagt að Enke yrði í hópnum á HM næsta sumar og sennilega aðalmarkvörður Þjóðverja. Hann og kona hans misstu víst dóttur árið 2006 vegna veikinda en ættleiddu annað barn í vor.

Þetta er allt saman ótrúlega sorglegt mál. Svona getur þunglyndið farið með bestu menn, jafnvel fræga, ríka knattspyrnumenn sem eru í þokkabót nýbakaðir feður og hafa HM í knattspyrnu til að stefna að. Hvernig skyldi Sebastian Deisler líða í dag?

Allavega, hvíl í friði Robert Enke.

Liverpool 2 – Birmingham 2

Posted on by

Fyrir það fyrsta, bið fólk velvirðingar á því hvað síðan er hæg. Álagið strax eftir leiki er alltaf gríðarlegt og það gerist æ oftar að hún hrynji strax eftir leiki. Við erum búnir að láta hýsingaraðilann vita af þessu.

Liverpool spilaði við Birmingham í kvöld á Anfield.

Birmingham, lið í 15.sæti fyrir leikinn. Þeir mættu í dag á Anfield og náðu á einhvern óskiljanlegan hátt að skora tvö mörk og gera jafntefli við okkar menn.

Liðið var svona:

Reina

Johnson – Skrtel – Agger – Insua

Mascherano – Lucas
Benayoun – Kuyt – Riera

Ngog

Á bekknum eru: Cavalieri, Aquilani, Gerrard, Kyrgiakos, Babel, Spreaing, Darby.

Ég veit ekki nákvæmlega af hverju við unnum ekki þennan leik í kvöld. Við vorum betra liðið í 90 mínútur. Í raun var bara eitt lið á vellinum – ég held að við höfum verið með í kringum 70% posession. En mér er bara nákvæmlega sama. Við unnum ekki Birmingham á Anfield.

Liverpool komst yfir í byrjun leiksins þegar að Ngog skoraði verulega flott mark. Liðið fékk svo endalaust af tækifærum til að bæta við mörkum, en menn gerðu sig seka um ótrúleg klúður fyrir framan mark Birmingham.

Og því var okkur refsað. Auðvitað. Gaur sem heitir fokking Chuchu skoraði eftir aukaspyrnu (surprise!). Stuttu fyrir hálfleik komst svo Birmingham yfir þegar að Cameron Jerome skoraði besta mark sem hann mun skora á ævinni af 30 metra færi þar sem að Pepe Reina var staðsettur of framarlega.

1-2 í hálfleik.

Í seinni hálfleik var þetta það sama. Liverpool átti leikinn. Á 70. mínútu fengum við víti þegar að David Ngog lét sig detta innan vítateigs Birmingham. Bulldómur, en Gerrard skoraði úr vítinu.

Þá hélt ég að þetta væri komið og liðið myndi klára leikinn, en svo fór ekki.

**Maður leiksins**: Reina átti annað markið og Skrtel var afleitur (hann gaf boltann allavegana þrisvar til mótherjanna). Agger og Insúa voru sæmilegir.

Á miðjunni fannst mér Lucas vera sterkur, sérstaklega í seinni hálfleik. Riera var ógnandi í fyrri hálfleik en fór svo útaf meiddur. Dirk Kuyt var afleitur og Benayoun líka. Það er hræðilegt þegar að miklu, miklu meiri ógnun kemur af hægri bakverðinum en af hægri kantinum. Eftir að Riera fór útaf þá var hreinlega einsog vinstri kanturinn væri ekki til – allar okkar sóknir voru hægra megin. Frammi var David Ngog svo mjög fínn.

Maður leiksins var þó **Glen Johnson**. Hann var klárlega okkar mest ógnandi maður í leiknum.

Hér með mun ég, Einar Örn Einarsson, afskrifa möguleika okkar á því að vinna enska titilinn á þessu tímabili. Í dag er 9.nóvember og þetta tímabil er einfaldlega búið að vera ömurlegt frá A-Ö. Megi þetta andskotans helvítis drasl tímabil hoppa uppí rassgatið á sér.

Það eru núna tvær vikur í næsta leik, sem verður gegn Manchester City á Anfield – baráttan um fjórða sætið er hafin.

Það er á svona kvöldum sem ég vildi óska þess að aðaláhugamálið mitt væri ballett.

Liðið gegn Birmingham

Posted on by

Rafa stillir þessu upp svona á þessu mánudagskvöldi:

Reina

Johnson – Skrtel – Agger – Insua

Mascherano – Lucas
Benayoun – Kuyt – Riera

Ngog

Á bekknum eru: Cavalieri, Aquilani, Gerrard, Kyrgiakos, Babel, Spreaing, Darby.

Úff, það er svo mikið í þessu. Fyrir það fyrsta, þá er Fernando Torres meiddur og er því ekki með. Ngog kemur í staðinn fyrir hann, sem ég er ánægður með. Voronin er ekki einu sinni á bekknum.

Í öðru lagi þá er Steven Gerrard á bekknum. Hann er því um það bil besti varamaður, sem hægt er að ímynda sér.

Í þriðja lagi þá er Glen Johnson kominn aftur inní liðið. Það er frábært. Í fjórða lagi þá er Albert Riera í byrjunarliðinu. Það hefur ekki gerst oft á þessu tímabili. Ég er spenntur að sjá hvernig hann mun standa sig. Bekkurinn er góður með þá Aquilandi, Gerrard og Babel.

Svona almennt sé þá líst mér vel á þetta. Það er slæmt að Torres sé ekki með, en við eigum klárlega að vinna þennan leik í kvöld. Sem ég held að við munum gera, 2-0.

Drogba og úlfurinn

Posted on by

Ég ætlaði að setja inn eitthvað smá um þetta atvik sjálfur en Matti á Örvitinn.com varð á undan mér.

Þetta var eiginlega of fyndið til að maður gæti orðið reiður yfir dómgæslunni, sem var skelfileg í þessu tilfelli. Drogba fór upp í baráttu um boltann við Johnny Evans sem gaf honum karatespark, alla takka í brjóstkassann. Drogba lagðist endilangur og með krampa í gólfið, virtist rifbeinsbrotinn eða eitthvað þaðan af verra. Dómarinn gerði hins vegar ráð fyrir leikaraskap Drogba og gaf United aukaspyrnuna. Spjaldaði svo Drogba þegar hann loks stóð á fætur.

Ekki það að Drogba hafi verið mikið meiddur. Hann stóð á endanum upp og náði að jafna sig nóg til að hnakkrífast í dómaranum, og spila svo áfram eins og ekkert hefði í skorist. Þrátt fyrir flogakastið, brotinn brjóstkassann og sært stoltið.

Óborganlega fyndið. Hann hugsar sig kannski tvisvar um næst þegar honum dettur í hug að fleygja sér.

Birmingham City á morgun

Posted on by

Eftir alveg hryllilegan októbermánuð þar sem við eingöngu náðum að vinna lítið lið í deildinni en tapa of mörgum öðrum leikjum treystum við því að með mánaðamótunum sem um garð eru gengin hefjist nú allt annað gengi okkar manna. Þó vissulega sé ýmislegt óljóst í leikmannamálunum ætlumst við samt til að stigasöfnun hefjist af krafti á ný mánudagskvöldið 9.nóvember þegar nýliðarnir úr Birmingham City mæta á Anfield Road.

Liðsskipanin

Ég held að sjaldan áður hafi ég þurft að velta eins mikið fyrir mér hugsanlegu byrjunarliði. Maður lítur á fréttir nokkrum sinnum á dag til að fylgjast með meiðslafréttum, ekki síður þegar ljóst er að við missum tvo leikmenn í leikbann í þessum leik.

Eins og mál líta út núna er Gerrard enn að fara hægt í gang á æfingasvæðinu og Torres í meðferðum milli leikja, Johnson og Kelly á hægri leið til baka, en Aurelio, Riera og Skrtel eru farnir að æfa af nokkrum krafti. Svo hvað skal nú segja? Ég hugsa að Rafa verði alveg til kl. 18:45 að velta því fyrir sér hvernig hlutir líta út og þess vegna hlakka ég til að sjá hvað ég fæ marga rétta!

Ég tippa semsagt á þessa útkomu!

Reina

Johnson – Kyrgiakos – Agger – Insua

Mascherano – Lucas
Benayoun – Kuyt – Babel

Torres

Á bekknum sátu: Cavalieri – Aquilani – Skrtel – Riera – Aurelio – Gerrard – N’Gog.

Ég hef því trú á því að Johnson og Torres verði “fixaðir” upp til að spila og þess vegna verði bekkurinn fullur af mönnum semmögulega geta komið inná í hluta úr leik. Gerrard verður settur á bekkinn og notaður ef við erum í vandræðum.

Þetta gæti auðvitað orðið kolrangt, Skrtel gæti komið inn, en ég hef þó trú á því að Rafa reyni að hræra lítið í varnarlínunni frá Lyon sem, þrátt fyrir mistök í lokin, lék ágætlega lengst af leiknum. Masch og Lucas einu heilu kostirnir á miðjunni og halda stöðunni, ég held að Voronin detti alveg út úr hóp og Babel fái að byrja, en mögulegt er líka að Aurelio verði settur í byrjunarliðið og þá á vinstri kant.

Ég held svo að Aquilani fái allavega hálftíma og kæmi mér ekki á óvart þó við fáum möguleika á að fagna innkomu hans allverulega!

Mótherjinn

Mótherjar morgundagsins eru nýliðarnir í Birmingham City, sitja í 15.sæti með 11 stig. Búnir að spila fimm útileiki, vinna einn og tapa fjórum. Einu stigin á útivelli hingað til komu 19.september í Hull.

Liðið er samansafn gríðarlegra reynslubolta sem margir hverjir eru komnir vel á fertugsaldurinn, Maik Taylor, Stephen Carr, Lee Bowyer, Barry Ferguson, Lee Carsley og Kevin Phillips og yngri manna sem sumir hverjir hafa “match winning ability”, eins og James McFadden, Liam Ridgewell og Cameron Jerome.

Framkvæmdastjórinn, hinn fimmtugi Alex McLeish, leggur upp með öflugum varnarleik liðsins í heild en reynir að hitta á öflugar skyndisóknir. Liðið hefur í raun byrjað ágætlega í vetur, voru t.d. óheppnir að vinna ekki Manchester City um síðustu helgi, klúðruðu þá víti í 0-0 jafntefli.

Pressan

Er auðvitað á okkur! Skelfilegt gengi að undanförnu og heimaleikur gegn nýliðum þýðir samanlagt að það er alger lífsnauðsyn að skila þremur stigum í okkar hús. Eftir ofboðslega neikvæða umræðu um Rafa Benitez fram að Lyon leiknum hefur umræðan eilítið snúist með honum og þeirri staðreynd að við eigum í vandræðum þegar ásarnir okkar tveir, Torres og Gerrard eru ekki á fullri ferð.

En heima gegn liðum eins og Birmingham (með fullri virðingu auðvitað fyrir þeim) er algerlega klárt að við heimtum það að nú verði mögulegt að fara í vinnuna á þriðjudagsmorgun án þess að þurfa að svara ólíklegasta fólki sem spyr mann hvort maður hafi ekki hugsað um að hringja sig inn veikan!!!

Útkoman

Ekki auðveldur leikur sem endar 3-1 þar sem Aquilani setur thunder af 20 metrum í blálokin. Það mun svo þýða góða útkomu í nóvember og byrjunina á betri tíð með blómahaga!!!!

KOMA SVO!!!!!!!

Leikmannakaup Rafa 2004 – 2009

Posted on by

Mig langar aðeins að vinna meira með frábæran póst sem kom á RAWK um daginn. Þar fór einn spjallverjinn yfir leikmannakaup Rafa undanfarin ár á nokkuð einfaldan og skýran hátt. Ekkert sem kom svosem á óvart þar fyrir þá sem hafa fylgst með liðinu undanfarin ár á nánast korters fresti og heldur ekkert sem Tomkins hefur ekki hamrað á nánst síðan Benitez mætti á Lennon flugvöllinn í Liverpool 2004.

Eins og vanalega þegar blæs á móti hjá Liverpool þá eru menn fljótir til að grafa upp ástæður, stuðningsmenn horfa á þetta með mjög misjöfunum hætti, sumir reyna að horfa á heildarmyndina, greina hvað það er sem er að klikka og afhverju á meðan aðrir taka mun afdráttalausari afstöðu, t.d. þegar liðið tapar 6 leikjum af 7 þá er “auðvitað” augljóst að eitthvað mikið sé að og byrja verði á því að reka kallinn í brúnni.

Eins er alltaf hægt að treysta því að pressan, leidd af breskum fjölmiðlum, tekur alltaf án undantekninga neikvæðasta punktinn, horfir á málið á afar svart/hvítan hátt og hefur allskyns spekinga framarlega sem þora að gagnrýna stjórann opinberlega. Þetta er ekkert einsdæmi sem á bara við Liverpool, við höfum bara legið ágætlega við höggi undanfarið, umfjöllun pressunnar, jafnvel þó þeir endurtaki bara sömu vitleysuna aftur og aftur hefur auðvitað líka áhrif og stjórnar oft skoðunum margra stuðningsmanna.

Dæmi um þetta sem oftast, ef ekki alltaf, hafa verið hrakin eru t.d. að einu sinni var rotation kerfið hjá Rafa alveg út úr kortinu og klúbbinn lifandi að drepa, seinna var það zonal vörnin sem var alveg hriplek og núna er komið að því að gagnrýna leikmannakaupin hjá Rafa.

Ljóst er að hópurinn er ekki eins stór og sterkur og hjá okkar helstu keppinautum og því hefur umræðan farið út í það á ýmsum stöðum að kallinn sé vonlaus á leikmannamarkaðnum og hefur varla gert góð kaup síðan hann kom.  Eins og vanalega þegar svona umræða fer í gang þá eru alltaf fjölmargir til að benda á hina hliðina á peningunum, það þykir mér margir hafa gert vel og ætla hér að taka þátt í því. Ætla að fara yfir flest öll leikmannakaup/sölur Rafa síðan hann kom með grein RAWK til stuðnings en þó leggja mitt mat á þetta.

Tímabilið 2004/05

Nýr og afar spennandi kall í brúnni, kemur til Liverpool frá frábæru Valencia liði sem hann yfirgaf vegna deilna við stjórn spænska liðsins sem stóð ekki við sín loforð og bakkaði  hann alls ekki nóg upp á leikmannamarkaðnum. Fyrsta verk var að reyna að sannfæra Gerrard og einhvern titt sem heitir Owen um að vera áfram hjá klúbbnum, annar þeirra lét sannfærast og er það enn þann dag í dag bestu “kaup” Benitez. Hinn fór með ýmsum krókaleiðum rakleitt til helvítis.

Continue reading →

Eljero Elia?

Posted on by

Slúður. Mikið er langt síðan við fjölluðum um smá djúsí leikmannaslúður. En hressandi.

Það stefnir allt í athyglisverðan janúarglugga þennan veturinn. United sitja enn á Ronaldo-peningunum og hljóta að ætla að styrkja sig í janúar, og þá var það staðfest í dag að Chelsea-banninu verður frestað fram yfir janúargluggann á meðan áfrýjun þeirra verður tekin fyrir. Þannig að Chelsea geta keypt í janúar og svo líklega ekki næstu tvo glugga þar á eftir, sem þýðir að Abramovich bara hlýtur að draga fram tékkheftið. Menn eru þegar byrjaðir að tala um nöfn eins og Aguero og Ribéry á þeim bænum.

Hvað með okkar menn? Samkvæmt Daily Mail í dag eru Gillett & Hicks að vinna hörðum höndum að því að beina 100m punda innspýtingu í klúbbinn og á hluti af því að fara í leikmannakaup. Fréttin segir að þeir átti sig á því að þeir beri ákveðna ábyrgð á stöðu liðsins í dag og að þeir sjái að það verði að styrkja hópinn ef liðið ætlar sér að geta gert betur á næstu mánuðum. Bara jákvætt ef þeir eru loksins búnir að átta sig á því.

Nýjasta slúðrið er svo það að við eigum víst að vera að eltast við Eljero Elia, ungan, hollenskan miðjumann hjá Hamburg SV í Þýskalandi. Elia þessi á að vera stórefnilegur og er nýbúinn að brjóta sér leið í hollenska landsliðið.

Ég veit ekkert um þennan leikmann. Snögg leit á YouTube gaf af sér þetta myndband með nokkrum klippum með kauða. Hann er sem sagt ungur og efnilegur Hollendingur sem lítur vel út á YouTube. Eigum við ekki einn slíkan fyrir?

Ef af verður skal ég vera spenntur þegar í ljós kemur að þetta sé nýr hörkuleikmaður Liverpool. Þangað til anda ég rólega, en ég verð þó að viðurkenna að ég nýt þess að geta hugsað um eitthvað annað til tilbreytingar heldur en ástandið.

Já, og Adrian Mutu er meiddur og missir af síðustu tveimur leikjum Fiorentina í Meistaradeildinni. Ég hef skrifað tvo pistla á síðustu árum og varið Mutu í Chelsea-málinu og samúð mín er öll hjá honum en þetta er harður heimur og þessi meiðsli eru klárlega Liverpool í hag. Við þurfum á allri hjálp að halda í þessum riðli. Kannski er lukkan að snúast okkur í vil?

Hvað segja menn annars? Hverja mynduð þið vilja sjá Rafa kaupa fyrir peningana frá Gillett & Hicks í janúar, ef af verður? Á hann að taka sénsinn á ungum strákum eins og þessum Elia, eða reyna við reyndari menn? Er Carlton Cole málið (þráir víst að komast frá West Ham)? Eigum við að fá Momo Sissoko aftur (kemst ekki í liðið hjá Juve vegna Diego)? Vilja menn taka sénsinn á Klas Jaan Huntelaar?

Slúðrum aðeins. Við höfum gott af því.

Auglýsingar og ummæli

Posted on by

Það eru tvö mál tengd síðunni sem ég vil nefna stuttlega á þessum föstudegi.

Í fyrsta lagi vil ég þakka frábær viðbrögð við tilkynningu okkar um auglýsingar á síðunni. Við höfum fengið fjölda fyrirspurna og erum búnir að selja auglýsingar fyrir þó nokkra mánuði af næsta árinu.

Þó vil ég benda áhugasömum á að **desember, janúar og febrúar eru ennþá á lausu** þannig að ef einhver er enn að velta fyrir sér að taka slaginn þá er ekki seinna vænna. Til að fá frekari upplýsingar getið þið haft samband við mig á kristjanatli@gmail.com.

Eins og glöggir hafa séð er fyrsti auglýsandinn kominn á síðuna. Það var klippistofan Rebel sem reið á vaðið og sést auglýsing þeirra hérna hægra megin á síðunni. Þá geta menn vingast við þá á Facebook-síðunni þeirra og að sjálfsögðu skellt sér í klippingu án þess að þurfa að panta sér tíma. Miðað við aðstöðuna þarna held ég að við getum fullyrt að þetta sé eitthvað fyrir lesendur þessarar síðu (hver vill ekki taka í kjuðann á meðan beðið er eftir að stóllinn losni?) og myndi ég eflaust gera það sjálfur, ef ég hefði hár. ;)

Seinna atriðið sem ég vil minnast á eru **þið, lesendur síðunnar**. Eins og hefur (því miður) ekki farið framhjá okkur hefur liðið okkar lent í áður óséðri lægð síðustu vikurnar. Síðasti einn og hálfi mánuðurinn hefur verið skelfilegur og hafa umræðurnar á síðunni verið eftir því, mjög hitaðar og skoðanaskiptar. Ef við tökum síðustu tíu færslur á síðunni hafa alls verið skráð 742 ummæli þegar þetta er skrifað eða 74,2 ummæli að meðaltali á færslu! Þetta er að ég held mesta magn ummæla sem hefur komið inn á síðuna á svo stuttum tíma og sýnir kannski bæði að síðan er enn að auka við sig í vinsældum og það að fólk er farið að taka meiri þátt í umræðunum.

Það sem er hins vegar undarlegt við þennan ummælafjölda er hversu fá ummæli við Einar Örn höfum þurft að ritskoða eða fjarlægja. Yfirleitt þegar liðið tapar leik höfum við farið á svokallaða sjálfsmorðsvakt hér inni, því oft höfum við þurft að henda út frekar mörgum ummælum þegar illa gengur. Í haust hefur hins vegar orðið merkjanleg breyting á þessu og ég hugsa að það séu varla tíu ummæli sem við þurftum að henda út í öllum októbermánuði. Það er stórkostlegt miðað við þann fjölda ummæla sem koma hér inn nú orðið að svo lítill hluti þeirra sé fyrir neðan tilgefna staðla.

Þannig að mig langar til að nota tækifærið og þakka YKKUR, lesendum síðunnar, fyrir að vera frábærir. Við sem skrifum á síðuna erum aðeins hluti þess sem gerir hana góða, það eru þessi fjölmörgu, frábæru ummæli ykkar sem gera hana að því sem hún er í dag. Þakka ykkur öllum fyrir!

Lyon 1 – Liverpool 1

Posted on by

Okkar menn fóru til Lyon í kvöld í fjórðu umferð Meistaradeildarinnar. Fyrir þennan leik vorum við í frekar slæmri stöðu og þurftum helst sigur og/eða hagstæð úrslit hjá Fiorentina gegn Debrecen til að eiga góða möguleika á að komast upp úr þessum riðli. Því miður brugðust báðar vonir okkar því á meðan Fiorentina unnu öruggan sigur á Debrecen gerðum við **1-1 jafntefli** við Lyon.

Rafa stillti upp eftirfarandi liði í kvöld í fjarveru fjölmargra aðalliðsmanna:

Reina

Carragher – Kyrgiakos – Agger – Insúa

Kuyt – Lucas – Mascherano – Benayoun

Voronin – Torres

**Bekkur:** Cavalieri, Ayala, Darby, Spearing, Aquilani, Babel (inn f. Voronin), Ngog (inn f. Torres).

Báðir hálfleikarnir spiluðust svipað fannst mér. Okkar menn léku vel á heildina séð, stjórnuðu megninu af leiknum og sóttu ákaft í leit að sigurmarkinu. Þau dauðafæri sem við fengum stoppuðu þó jafnan á sömu hindruninni, hinum frábæra Hugo Lloris í marki Lyon. Voronin fékk besta færi fyrri hálfleiksins er hann slapp innfyrir en skaut beint á Lloris sem varði stuttu síðar frábærlega frá Kuyt úr dauðafæri. Í síðari hálfleik hélt Lloris áfram að verja frá Lucas, Torres og Kuyt úr dauðafærum.

Þegar kortér var eftir af leiknum var ljóst að Fiorentina væru að vinna sinn leik og þá gerði Rafa loksins skiptinguna sem ég var farinn að grátbiðja um frá því í fyrri hálfleik. Hinn dreplélegi Andriy Voronin, sem ætti með réttu ekki að spila annan leik á ferlinum fyrir Liverpool (í fullri alvöru, hann er bara langt því frá nógu góður) fór útaf og Ryan Babel, annar sem hefur valdið vonbrigðum, kom inná. Nokkrum mínútum síðar fékk Babel boltann um 25 metrum frá marki, lék honum aðeins til hliðar og svo gjörsamlega klíndi honum upp í markhornið, óverjandi fyrir Lloris. Staðan 1-0 fyrir okkar menn, minna en tíu mínútur eftir og skyndilega var maður farinn að reikna í huganum og gæla við að geta sigrað þennan riðil.

Eeeeen nei, auðvitað gat þetta ekki verið svona gott. Ekki hjá þessu liði þessa dagana. Undir blálokin kom hár bolti innfyrir vörn okkar manna, Kyrgiakos misreiknaði hann og datt í stað þess að ná til hans og Agger og Insúa virtust báðir vera farnir í sóknina og voru ekki í línunni. Fyrir vikið datt boltinn fyrir bæði Lisandro Lopez og Cris sem gátu valið hvor ætti að skjóta. Lopes tók á endanum boltann og lagði hann í fjærhornið framhjá Pepe Reina. Lokatölur 1-1 sem nægir Lyon til að vera öruggir upp úr þessum riðli.

Hryllilega svekkjandi, ekki síst eftir frammistöðu sem verðskuldaði sigur í þessum leik.

**Maður leiksins:** Hugo Lloris, markvörður Lyon, var sem fyrr segir besti maður vallarins í kvöld. Okkar menn léku heilt yfir vel fyrir utan Voronin sem var gjörsamlega úti að aka og svo kannski Insúa sem mér fannst ekki nógu stabíll í kvöld. Minn maður leiksins hjá okkur er þó klárlega **Ryan Babel** og þótt markið hans hafi að endingu ekki reynst sigurmark vona ég að það hafi gefið honum sjálfstraust fyrir næstu leikina. Ef meiðslasagan heldur áfram sé ég allavega ekki hvernig hægt er að halda honum og/eða Ngog áfram fyrir utan liðið á meðan Voronin er svona gjörsamlega vonlaus.

Var ég búinn að nefna það að Voronin var slappur í kvöld?

Staðan í riðlinum eftir þennan leik er einföld: Lyon eru með sex stigum meira en við og betri innbyrðis viðureignir og því öruggir áfram. Við getum nú í mesta lagi náð öðru sæti í þessum riðli en til þess að það gerist þarf annað af tvennu að gerast:

a) Við vinnum Debrecen í næstu umferð og Lyon fara til Ítalíu og vinna Fiorentina. Þá erum við tveimur stigum á eftir þeim ítölsku þegar þeir mæta á Anfield í lokaumferðinni og við getum farið áfram með því að sigra þá.

b) Við vinnum Debrecen í næstu umferð og Lyon fara til Ítalíu og gera jafntefli við Fiorentina. Þá erum við þremur stigum á eftir þeim ítölsku þegar þeir mæta á Anfield í lokaumferðinni og við getum farið áfram með því að sigra þá með þriggja marka mun (til að fá betri innbyrðis viðureignir).

Tökum þetta þó einn leik í einu. Næst er það Debrecen úti og allt annað en sigur þar þýðir að við erum úr leik. Auðvitað nægir ekki að sigra þann leik ef Fiorentina vinna Lyon en okkar menn geta ekki haft áhyggjur af því heldur verða að einbeita sér að sigri gegn Debrecen. Verði úrslit okkur í hag í næstu umferð gætum við verið að sigla inn í ótrúlegan lokaleik í þessum riðli á Anfield.

Næsti leikur er á mánudaginn kemur gegn Birmingham í deildinni. Á Anfield. Vonandi verða einhverjir af þeim sem við söknum orðnir leikfærir þá, og vonandi verður Torres búinn að fá sprengikraftinn aftur. Og vonandi verður Voronin hvergi nærri leikmannahóp okkar í þeim leik. Ég hef það fyrir sið að afskrifa Liverpool-leikmenn helst aldrei á miðju tímabili en gvöð menn góðúr hvað þessi leikmaður er langt því frá að vera nógu góður fyrir Liverpool.

Vitiði hver er helsti aðdáandi Voronin? Lucas Leiva, því það er enginn að tala um hann lengur …

Liðið komið – Torres byrjar!

Posted on by

Jæja, þá er byrjunarliðið komið í ljós og er það sem hér segir:

Reina

Carragher – Kyrgiakos – Agger – Insúa

Kuyt – Lucas – Mascherano – Benayoun

Voronin – Torres

**Bekkur:** Cavalieri, Ayala, Darby, Spearing, Aquilani, Babel, Ngog.

Allir aðrir eru veikir eða meiddir. Ótrúlegt.

Liðið er ágætlega sterkt. Við vitum ekkert hvernig Kyrgiakos stendur sig í svona stórum leik, né hvernig Carra höndlar bakvörðinn í þetta skiptið. Þá verður Insúa að standa sig betur gegn Gouvou en hann gerði í fyrri leiknum.

Þegar framar er komið á völlinn eru svo menn eins og Kuyt, Benayoun og sérstaklega Voronin sem einfaldlega verða að stíga upp í þessum leik. Torres er á sínum stað og við vonum að hann geti haldið sér heilum í þessum leik. Ef hann er í alvöru leikfær getum við vel unnið þennan leik, ef hann fer snemma útaf meiddur eins og Gerrard gerði í fyrri leiknum óttast ég að það gæti gert út um þennan leik fyrir okkur.

Að gefnu tilefni minni ég menn á markið sem Gerrard skoraði gegn Olympiakos fyrir fimm árum þegar allt virtist tapað. Hverjir bjuggu það mark til fyrir hann? Jú, Mellor og Pongolle. Voronin getur þetta alveg.

Koma svo! Áfram Liverpool!

Lyon á morgun

Posted on by

Afsakið kæru lesendur hversu seint þessi upphitun kemur inn, en hvað um það, hér er hún. Það er óhætt að segja að undanfarnir dagar hafi verið góðir þegar kemur að úrslitum hjá Liverpool FC, hreint út sagt ferleg úrslit í síðustu tveim leikjum, og í rauninni allir leikir október mánaðar nema flottur sigur á liðinu sem kennt er við djöfulinn. Það er með sanni hægt að tala um svartan október og ekki bætir ástandið á leikmannahópnum okkar ástandið, menn búnir að hrynja niður eins og spilaborg sem verður fyrir fellibylnum henni Helenu. Eeeeen, nú er kominn nóvember, nýr dagur, nýr mánuður og vonandi betri tímar. Eins og maður getur orðið ferlega þunglyndur, þá þarf oft ekki mikið til að létta manni lund á ný. Eins og eitt stykki sigur á morgun myndi gleðja mitt hjarta óstjórnlega, hreinlega fáránlega mikið. Ég hreinlega þrái að vinna sigur í fyrsta leik okkar í nýjum mánuði, þrátt fyrir allan þann mótbyr sem hefur verið í fangið á okkur undanfarið.

Lyon hafa átt í erfiðleikum heimafyrir líka, einhver meiðslavandræði í vörninni hjá þeim og svona, en ég ætla hreinlega ekki að velta mér of mikið upp úr þessu. Það sem skiptir máli á morgun ef fyrst og fremst eitt. HUGARFARIÐ. Verði það í lagi, verði hungrið til staðar, verði hausinn í lagi, verði hjartað í gangi, þá getum við vel unnið þetta Lyon lið á þeirra heimavelli. Ég er ekki í nokkrum einasta vafa með það. Liðið hefur verið að halda bolta vel innan liðsins, mér hefur fundist oft á tíðum að þessir atvinnumenn okkar hafi verið hálf taugaveiklaðir undanfarið, það var ekki fyrr en þeir voru komnir með gjörsamlega bakið upp við vegg gegn liðinu kenndu við djöfulinn sjálfan, að menn rifu sig upp á rásshárunum og fóru að spila eins og þeir sem valdið hafa. Af hverju þeir geta það gegn fyrirfram sterkum andstæðingum, það er ofar mínum skilningi allavega. Þessir drengir eru ekki að spila með 3. flokk Hrafnkels Freysgoða, það þarf ekki að vera með einhverjar motivation ræður fyrir leiki, þeir eiga að kunna þetta, enda með reynslu dauðans og hafa verið í svona sporum óteljandi sinnum.

En já, ég hef trú á því að þar sem við erum enn og aftur komnir með bakið þétt upp við vegg, að menn sýni sitt rétta andlit. Ég hef algjöra tröllatrú á því að við getum sigrað þennan leik á morgun, og í raun að við gerum það. Ég hef oft á tíðum verið ásakaður um að vera of bjartsýnn, sjá hlutina í of björtu ljósi, vera of þolinmóður og þar fram eftir götunum. Það getur vel verið að allt þetta sé rétt. Ég hef alveg ofboðslega gaman að öllu tengdu Liverpool og ég hreinlega hefði það ekki ef ég sæi hlutina alltaf eins svarta og mögulega er hægt að mála þá. Auðvitað hefur hver sína skoðun á félaginu okkar, þó það nú væri. Menn eiga auðvitað hafa skoðun, og ég hef þær svo sannarlega. Ég hef verið óstjórnlega pirraður oft á tíðum undanfarið, út í einstaka leikmenn, Rafa Benítez, eigendurnar, dómara, sundbolta, leikmenn andstæðinganna og aðra stuðningsmenn Liverpool sem annarra liða. Það fylgir þessu bara, og menn taka bara á sínum pirringi á mismunandi hátt. Ég tek á honum á þann hátt að ég kíki ekki inn á komment á síðum sem þessari fyrr en í fyrsta lagi sólarhring eftir vond úrslit. Í millitíðinni reyni ég jafnvel að sjá leikinn aftur, rúlla yfir einstök atvik í huganum, eða á vefsíðum. Það er bara nánast alltaf þannig að ég er orðinn margfalt rólegri svo þegar ég kommenta inn á leikinn eftir þessa “þerapíu” mína. En sumir þurfa sína útrás, og gera það með puttunum. Engu að síður er glæsilegt að sjá málefnalegar umræður eins og gerðust eftir Fulham leikinn sáluga.

Ég veit ekki hvað ég hef svarað oft þeirri spurningu undanfarið hvort ég ætli ekki að láta Rafa fara (eins og ég hafi nú eitthvað með það að segja í raun og veru, en næ nú point-inu)? Mér finnst það algjörlega engan veginn koma til nokkurra greina eins og staðan er núna. Ég vil ekki sjá að við gefumst upp núna á sama hátt og Chelsea gerði þegar aðeins byrjaði að halla undan fæti hjá þeim með Móra við stjórnina. Við tók hörmungar tími fyrir þá þrátt fyrir stútfullt lið af frábærum knattspyrnumönnum, að mínum dómi lang sterkasta hópnum í deildinni á þeim tíma. Svo hefur maður lið eins og Real Madrid, og nágranna þeirra í sömu borg. Við höfum jú Newcastle fíaskóið og það hvernig Tottenham hafa verið síðustu árin. Nei, ég hef ekki trú á quick fix í þessu og ég myndi ekki losa mig við bílinn minn sem ég á í dag (borga með kúluláninu) og fá mér nýjan í staðinn sem kostar sitt en ég get engan veginn verið klár á því að hann sé betri eða skili mér meira virði en sá fyrri. En það er nú bara mín skoðun. Ég hef trú á liðinu, ég hef trú á Rafa og ég hef trú á því að bjartir tímar séu framundan þrátt fyrir allt og allt.

En ég er kominn langt út fyrir eiginlega upphitun. Liðið okkar er komið til Frakklands og eins og áður hefur komið fram þá er það vængbrotið. Þrír hægri bakverðir okkar fóru ekki með (Johnson, Degen og Kelly), Aurelio er á Melwood, sem og Skrtel og Gerrard. Þó nokkrir eru þó afar tæpir á að ná leiknum þar sem þeir Torres, Agger, Ngog og Aquilani hafa verið tæpir. En hvað um það, ég ætla að giska á að Rafa stilli upp sínu sterkasta liði sem völ er á þessum tímapunkti. Stóra spurningin í mínum huga er annars vegar í vörninni og hins vegar í sókninni. Rafa gæti tekið mjög djarfa ákvörðun og sett Darby í hægri bakvörðinn og haldið þeim Carra og Agger í miðverðinum. Hann gæti farið meira save leið með því að setja Carra í bakvörðinn og þá Agger og Kyrgiakos í miðvörðunum. Ég hallast frekar að því að hann geri það, sér í lagi þar sem Carra er svo í banni í næsta leik. En ég ætla í þessari upphitun að fara meira eftir því sem ég vil sjá liðið, heldur en hvernig ég haldi að Rafa kjósi frekar að hafa það. Það er einfaldlega út af því að ég hef meira vit á hlutunum en hann :) Þeir Javier og Lucas taka miðjuna, Dirk hægra megin og svo er það stóra spurningin? Mun sénsinn verða tekinn á Aquilani? Ef svo er þá er þetta komið, með Benayoun vinstra megin og El Nino uppi á toppi. Það væri draumur í dós. Liðið vil ÉG því hafa svona:

Reina

Darby – Carragher – Agger – Insúa

Mascherano – Lucas
Kuyt – Aquilani – Benayoun
Torres

Bekkurinn: Cavalieri, Kyrgiakos, Ayala, Spearing, Voronin, Babel og Ngog

Ég hef svo mikla trölla trú á því að þetta lið geti lagt þetta Lyon lið á morgun. Ég er bara orðinn þræl spenntur fyrir þessum fjandans leik við það að skrifa þetta. En ég held engu að síður að þetta verði liðið sem Rafa muni stilla upp:

Reina

Carra – Kyrgiakos- Agger – Insúa

Mascherano – Lucas
Kuyt – Voronin – Benayoun
Torres

Bekkurinn: Cavalieri, Derby, Ayala, Spearing, Aquilani, Babel og Ngog

Koma svo, nú er að duga eða að drepast. Á morgun getum við hreinlega snúið þessari Meistaradeildarbaráttu okkar alveg við. Að vinna á morgun setur okkur í 6 stig, og eigum eftir að fá Fiorentina heim og Deprecesdsfaseren úti. Það er bara alls ekki óraunhæft að ætla sér 6 stig út úr þeim tveim leikjum og þá myndum við enda með 12 stig, sem væntanlega myndi tryggja okkur áfram. Þannig að það er allt hægt og það þarf bara að byrja á morgun. Hvernig sem liðið verður skipað, þá hef ég trú á verkefninu, ég held að hugarfarið verði í lagi, Pepe kemur með eina Pepe-up ræðuna sína og menn mæti algjörlega á tánum og spili fótbolta og komi heim með stigin 3 sem maður þráir svo mjög. BRING IT ON.

Kaupin hans Benitez (+viðbót)

Posted on by

Einsog gerist alltaf þegar að Liverpool á í krísu þá fyllast blöðin af sögum um það hversu ómögulegur stjóri Benitez sé. Eitt af því sem er margendurtekið er að Benitez hafi keypt ósköpin öll af ómögulegum leikmönnum á háar upphæðir.

Í þessari færslu á RAWK er farið á mjög einfaldan hátt yfir kaup og sölur Benitez og þau gagnrýnd. Þetta er í raun skyldulesning fyrir alla Liverpool aðdáendur og blaðamenn, sem vilja fjalla á réttlátan hátt um Liverpool og Rafael Benitez.

Ég er sammála niðurstöðunum.

**Viðbót (KAR):** Þegar menn eru búnir að lesa yfirgripið um Rafa á leikmannamarkaðnum er vert að menn lesi einnig þessa grein á Tomkins Times þar sem kostnaður og laun leikmannahóps Liverpool er borinn saman við hin toppliðin. Niðurstöðurnar þar sýna hvers vegna við erum ekki í toppbaráttunni í ár.

Höfum við í lið gegn Lyon?

Posted on by

Sjitt. Samkvæmt Tony Barrett hjá The Times, sennilega best tengda blaðamanninum þegar kemur að fréttum úr herbúðum Liverpool, hefur meiðsla- og veikindalistinn hjá okkar mönnum bara versnað ef eitthvað er eftir leikinn í gær.

Eftirfarandi leikmenn eru frá vegna meiðsla og taldir mjög tæpir fyrir leikinn á miðvikudag:

Steven Gerrard, Albert Riera, Martin Kelly, Glen Johnson, Martin Skrtel, Daniel Agger, Fabio Aurelio, David Ngog.

Þá eru Alberto Aquilani og Diego Cavalieri sagðir vera enn að berjast við flensuna sem við héldum að fleiri hefðu fengið fyrir Fulham-leikinn, en það virðast bara vera þeir tveir og hinir höfðu víst allir meiðst.

Þar að auki er Philipp Degen ekki til taks fyrir Lyon-leikinn þar sem hann var ekki skráður í 25-manna hóp okkar í Meistaradeildinni. Við erum s.s. ekki með Johnson, Degen og Kelly fyrir hægri bakvörðinn.

Ef við skoðum hópinn á UEFA.com eru því eftirfarandi leikmenn löglegir og væntanlega til í slaginn fyrir þennan leik:

Markmenn: Pepe Reina, Martin Hansen.
Varnarmenn: Sotirios Kyrgiakos, Jamie Carragher, Emiliano Insúa, Stephen Darby, Andrea Dossena.
Miðjumenn: Yossi Benayoun, Javier Mascherano, Lucas Leiva, Jay Spearing, Damien Plessis, Nathan Eccleston, Dirk Kuyt.
Sóknarmenn: Fernando Torres, Andriy Voronin, Ryan Babel, David Amoo.

Þetta eru akkúrat átján leikmenn, eða einn leikmannahópur, og ég sé ómögulega hvernig við getum sett saman úr þessu lið sem er nógu sterkt til að vinna Lyon á útivelli. Hvað þá að ætla að eiga einhverja jákvæða valkosti á varamannabekk. Svo er Torres varla heill í heilan leik þessa dagana, sem er ekki á bætandi.

Það er því ljóst að við einfaldlega verðum að fá einhverja af þessum fjölmörgu meiðslapésum inn fyrir þennan leik ef ekki á að vera úti um þátttöku okkar í Meistaradeildinni eftir þrjá daga.

Mér líst bara ekkert á þetta. Gæti varla verið svartsýnni fyrir þennan leik. Maður gæti lokað augunum og reynt að sjá fyrir sér Babel og Voronin skora sitthvort markið í óvæntum útisigri, en nei, ég get það samt varla. Fyrir mér er það augljóst að ef við fáum ekki suma af þessum lykilmönnum okkar heila fyrir þennan leik munum við tapa.

Já, og Barrett segir einnig í grein sinni að starf Rafa sé ekki í hættu fyrir Lyon-leikinn því eigendurnir séu rólegir og viti sem er að hann er að berjast við ótrúlega óheppni í meiðsla- og veikindamálum þessa dagana. Vonandi taka stuðningsmenn liðsins það til sín líka og anda rólega ef illa fer. Við erum öll hundsvekkt yfir ástandinu og það er enginn saklaus í því, síst Rafa, en það er einfaldlega ekki hægt að ætlast til kraftaverka þegar hálfur leikmannahópurinn er fjarri góðu gamni. Ekki gegn liði eins og Lyon.

Við fylgjumst grannt með fréttum af þessum meiðslalista næstu daga. Vonandi fáum við einhverja ástæðu til bjartsýni á morgun.