Monthly Archives: October 2009

Fulham 3 – Liverpool 1

Posted on by

OK sá sem átti að taka skýrsluna í dag gleymdi því og horfði ekki á leikinn beint þannig að ég redda þessu í bili. Ég er hins vegar staddur í boði þannig að þetta verður í örstyttra lagi. Biðst velvirðingar á því en auðvitað geta menn rætt allt í ummælunum.

Í dag voru eftirfarandi leikmenn meiddir: Steven Gerrard, Glen Johnson, Albert Riera, Martin Kelly.

Í dag voru eftirfarandi leikmenn með flensu: Alberto Aquilani, Daniel Agger, Fabio Aurelio, Martin Skrtel, David Ngog, Diego Cavalieri. Aquilani fékk flensu eftir Arsenal-leikinn en hinir veiktust víst bara seint í gærkvöldi og settu því plön Rafa fyrir þennan leik í uppnám.

Þetta eru tíu leikmenn sem gætu talist aðalliðsmenn, utan kannski Kelly sem væri þó klárlega í hóp fram yfir flesta ungu strákana okkar í dag. Við þetta bætist að Andrea Dossena er nýkominn inn úr meiðslum, Lucas Leiva var með flensu í miðri viku og missti af Arsenal-leiknum og Fernando Torres var ekki heill, en varð þó að byrja inná í dag vegna forfalla, og þá er eðlilegt að það hafi farið eins og fór í dag.

Liðið í dag: Reina – Degen, Carra, Kyrgiakos, Insúa – Kuyt, Lucas, Mascherano, Yossi – Voronin, Torres. Bekkurinn í dag: Gulacsi, Dossena, Babel, Eccleston, Ayala, Plessis, Spearing.

Liðið í dag var veikt. Varamannabekkurinn var ekki húsum hæfur, enda vantaði næstum heilt byrjunarlið. Samt voru okkar menn meira og minna betri allan leikinn. Zamora skoraði úr einu sókn Fulham í fyrri hálfleik, gjörsamlega gegn gangi leiksins, en Torres jafnaði fyrir okkur fyrir hlé. Stórsóknin hélt áfram í seinni hálfleik en aulamistök Kuyt þegar um 20 mínútur voru eftir, þegar hann reyndi að halda boltanum inná og gaf hann í raun beint á Fulham-mann sem var einn fyrir utan vítateig okkar og keyrði inn og gaf fyrir, gaf þeim auðvelt mark sem Nevland skoraði.

Svo kom að dómaranum, með um 5 mínútna millibili rak hann bæði Degen og Carra útaf með beint rautt. Spjaldið á Degen var fáránlegt, hann var með sólann niðri og fór ekki í manninn (reyndi við boltann) en Carra-dómurinn var réttur þar sem hann togaði Zamora niður þegar hann var á leið í gegn. Þeir bættu í kjölfarið við þriðja markinu og unnu 3-1.

Rafa tók Torres útaf og svo Benayoun og Kuyt þegar við vorum lentir undir og manni færri. Það varð allt vitlaust yfir því að hann tæki Torres útaf í stöðunni 1-1 en eins og hann útskýrði sjálfur eftir leik var Torres vart leikfær í dag og hann þurfti að vernda hann. Það var öllum augljóst sem horfðu á seinni hálfleikinn að Torres var ekki að beita sér á fullu og því varð Rafa að gera það sem hann gerði. Hann gæti verið að missa Gerrard í uppskurð og þá frá í e-n tíma þannig að það að taka sénsa með Torres og missa hann líka frá í lengri tíma var einfaldlega ekki valkostur.

Liðið hefur núna leikið sjö leiki í októbermánuði og tapað sex þeirra. Rafa hefur gert margt vafasamt, nánast hver einasti leikmaður liðsins hefur brugðist sínum skyldum illa, fádæma óheppni hefur elt okkur, vafasamir dómar hafa fallið okkur í óhag, við töpuðum fyrir fokking sundbolta og það virðist gjörsamlega EKKERT ganga okkar mönnum í hag.

Á næstu dögum munu menn örugglega gera þetta allt betur upp. Allir verða dregnir til ábyrgðar og með útileik í Lyon á næstu dögum gæti staðan versnað talsvert áður en hún fer að batna aftur. Þá veit maður ekkert hverjir verða leikfærir í næsta leik fyrst flensan er farin að fella hálft byrjunarlið hjá okkur yfir nótt.

Svona er Ísland í dag. Fjandinn hirði þennan októbermánuð.

Liðið gegn Fulham

Posted on by

Góðan og blessaðan daginn! Vörnin í dag inniheldur Degen, Guðmávitahvaðopolus Kyrgiakos ásamt Carra og Insúa. Ekki neinn Skrtel, Agger eða Johnson sem þó var vitað að yrði frá.
Í sóknina kemur síðan Voronin og verður hann þar ásamt Torres! Þeir Kuyt og Benayoun eru svo þar fyrir aftan og blanda sér líklega í sóknarleikinn með Torres og Voronin.

Byrjunarliðið

Reina

Degen – Kyrgiakos – Carragher – Insua

Kuyt – Masherano- Lucas- Benayoun

Voronin – Torres

Bekkur: Gulacsi, Babel, Spearing, Plessis, Dossena, Eccleston, Ayala.

Ég veit ekki með ykkur en ég held að ég renni yfir faðirvorið….og ég er ekki einu sinni trúaður!

Engu að síður er þetta auðvitað solid 1-3 sigur með mörkum frá Voronin 2 og Torres.

Fulham á morgun – Uppfært

Posted on by

Áfram veginn, nú er það Fulham í London á morgun. Klárlega erfiður leikur, en engu að síður leikur þar sem við ÞURFUM hreinlega að ná í 3 stig úr. Við mættum mun erfiðari andstæðing um síðustu helgi og spiluðum þá sundur og saman. Nú er það eitt þrjóskasta liðið í deildinni og það á útivelli, en persónulega finnst mér þeir ekki vera jafn sterkir og t.d. á síðasta tímabili. Næstu tveir leikir okkar manna eru algjörlega must win leikir (ekki það að allir leikir séu ekki must win ef út í það er farið). Við eigum Fulham úti núna og svo Birmingham heima næst. Okkar helstu keppinautar, Chelsea og Man.Utd eiga tiltölulega létta leiki núna um helgina, en svo mætast þeir aðra helgi. Þar tapast pottþétt stig og við hreinlega VERÐUM að nýta okkur það. Arsenal og Tottenham mætast svo um helgina og sömu sögu er að segja af Everton og Aston Villa.

Fulham náðu jafntefli á útivelli um síðustu helgi gegn Man.City, en eftir því sem ég sá úr þeim leik, þá var það fyrst og fremst að þeir síðar nefndu hentu frá sér öruggum sigri með kæruleysi. Heimamenn á morgun byggja sitt upp á traustum varnarleik, þar sem tröllið Brede Hangeland fer fremstur í flokki, en svo er Schwarzer í markinu hjá þeim, og hann hefur haft þann leiðinlega ávana í gegnum tíðina að eiga stórleiki gegn Liverpool. Fulham hafa unnið einn af síðustu 5 leikjum sínum, heimasigur gegn Hull. Þeir hafa einungis skorað 10 mörk í þessum 9 leikjum sínum, á móti þeim 24 (í 10 leikjum) sem okkar menn hafa skorað í Úrvalsdeildinni. En það sýnir styrk þeirra er að þeir hafa aðeins fengið á sig 12 mörk, en við 13. Þrír leikmenn hjá þeim eru lang markahæstir (hafa skorað helmingi fleiri mörk en næstu menn þar á eftir), eða þeir Murphy, Duff og Zamora, sem hafa skorað 2 mörk hver. Afar ólíklegt er talið að Murphy verði búinn að ná sér af meiðslum fyrir leikinn og eins eru Andy Johnson og Simon Davis enn frá hjá þeim vegna meiðsla.

Það er algjörlega ljóst að okkar menn þurfa að vera hugmyndaríkir í sóknaraðgerðum sínum. Ég vil sjá sömu varnaruppbyggingu og í síðasta leik okkar í deildinni, halda hreinu og ekkert kjaftæði. Svo vil ég sjá víddina notaða með okkar sókndjörfu bakvörðum, Glen Johnson og Insúa verða að fá aðeins meira leyfi til að sækja fram kantana, heldur en þeir fengu gegn Man.Utd. Ég hreinlega vil sjá nákvæmlega sama byrjunarliðið eins og það var á sunnudaginn. Stevie G er að öllum líkindum ekki klár í slaginn ennþá, en vonir standa til þess að Torres geti byrjað leikinn. Samt er þetta alltaf spurning, ef kappinn er tæpur, hvort honum verði hætt frekar í leikinn gegn Lyon og þar af leiðandi hvíldur um helgina. Þá kæmi Ngog að sjálfsögðu inn fyrir hann. Það er alveg sama hvað menn tauta og raula yfir forgangsröðun keppna, það eru gríðarlega miklir peningar í húfi í Meistaradeildinni og það verður mikill þrýstingur á Rafa af hans yfirboðurum að leggja allt í sölurnar gegn Lyon þó svo að þurfi að fórna einhverju gegn Fulham á morgun. Ég vona þó að við sjáum Torres inná á morgun, en það er samt sem áður líklegt að hann hefji ekki leik. Einhverjar fréttir voru einnig af því að Lucas væri kominn með svínaflensuna, en ég hef ekkert heyrt meira af því og þar af leiðandi reikna ég með honum í liðinu. Aurelio á svo að hefja leik á kantinum, ekki var Babel mikið að setja pressu á hann í síðasta leik, og Riera ennþá frá vegna meiðsla.

Þó svo að ég vonist eftir alveg sama byrjunarliði og á móti Man.Utd, þá ætla ég að spá því að Rafa stilli þessu upp svona:

Reina

Degen – Carragher – Agger – Insúa

Mascherano – Lucas
Kuyt – Benayoun – Aurelio
Ngog

Bekkurinn: Cavalieri, Skrtel, Kyrgiakos, Spearing, Babel, Voronin og Torres

Liðið okkar gat unnið Man.Utd án Gerrard um síðustu helgi, unnu þá án Gerrard og Torres fyrir ári síðan, þannig að við eigum að vinna Fulham á morgun án þeirra. Enginnn (kannski Hangeland) myndi komast í sterkasta lið Liverpool úr þessu Fulham liði og því verða menn að sýna sinn rétta standard og vinna þennan leik. En við vitum vel að leikir vinnast aldrei á pappírunum fyrir leiki og því verða okkar menn að vera klárir í slaginn. Nú ætti skortur á sjálfstrausti ekki að vera að plaga leikmenn okkar, sigurinn á sunnudaginn ætti algjörlega að sjá til þess. Ég er líka ánægður með kommentin frá Javier í vikunni um að menn verði að koma ákveðnir til leiks, því hinn sigurinn er að baki og við verðum að hala inn stig til að halda okkur í baráttu um þennan blessaða titil. Sú barátta er svo langt frá því að vera búin, en til þess að viðhalda henni þá mega menn ekki tapa stigum á móti liðum eins og Fulham. 3 stig á morgun takk, 0-2 sigur, Benayoun og Aurelio með mörkin og málið dautt. Bring it on.

Uppfært: Glen Johnson og Stevie G verða ekki með á morgun. Aquilani náði sér jafnframt í einhverja flensu. Kelly og Riera líka frá vegna meiðsla áfram.

Fjölmiðlar – fjórða valdið

Posted on by

Hef nú um sinn verið að velta fyrir mér að skrifa pistil um það vald sem fylgir fjölmiðlum í nútímanum. Um það vald er kennt í Félagsfræði og Stjórnmálafræði en að undanförnu finnst mér stöðugt meira benda til þess að það vald ætti að kynna fyrir knattspyrnumönnum og stjórum.

Áður en lengra er haldið frábið ég mér umræðum um að ég sé að “væla” eða að þetta sé allt “partur af sálfræðistríði”. Þetta er það alls ekki heldur eingöngu tilraun til að skoða stöðu félagsins okkar á meðal fjölmiðlanna.

Írskur dálkahöfundur

Ástæðan fyrir því að ég skrifa þetta núna er að ég var staddur á Írlandi í síðustu viku og sat þá á bar og las eitthvað írskt “Times” blað sem ég hef síðan verið að leita að á netinu. Þar var dálkahöfundur þess blaðs að ræða FÁRÁNLEIKA þeirrar umræðu að Liverpool Football Club myndi reka framkvæmdastjórann Rafael Benitez á þeim tímapunkti.

Saga brottrekstra stjóra hjá LFC

Í fyrsta lagi rifjaði hann upp sögu liðsins og þess hvernig þeir skipta um framkvæmdastjóra.

Frá því að Bill Shankly tók við Liverpool þann 1.desember 1959 hefur stjórn félagsins rekið framkvæmdastjóra EINU SINNI á miðju tímabili og það var í janúar 1994 þegar Souness karlinn var rekinn eftir hrikalegt gengi liðsins í tvö ár. Vissulega hættu Evans og Dalglish inni á tímabilinu en Liverpool er einfaldlega ekki klúbbur sem rekinn er á þennan hátt, þrátt fyrir að nýir eigendur séu nú komnir að klúbbnum átti þeir sig á vinnulaginu á Anfield. Enda voru þeir að ræða við Klinsmann á sínum tíma að taka við liðinu eftir tímabilið. Því skyldu menn átta sig á að hefð félagsins fyrir brottrekstri á þessum tímapunkti væri engin.

Staðan í eigendamálum og völd færð til Rafa

Svo voru það eigendurnir. Tom Hicks og George Gillett eru óvinsælir á Anfield. Síðustu 18 mánuði hafa þeir hins vegar skýrt og greinilega fært öll völd knattspyrnumála félagsins á hendur Benitez. Fyrst var það greinilegt þegar Rafa seldi Robbie Keane, síðan þegar ljóst varð að Rick Parry var að fara og síðan þegar búlkinn úr þjálfaraliði vara- og unglingaliðsins var rekinn og nýir menn fengnir í staðinn. Um leið og síðan fór Rafa í að gera langtímasamninga við alla lykilmennina sína, Gerrard, Carragher, Torres, Kuyt og Agger. Nú er verið að verðlauna Reina og reyna (hehe) að fá Mascherano til að skrifa undir langan samning.

Svo fékk Rafa að kaupa tvo stóra spilara fyrir um 20 milljónir punda hvorn, og þrátt fyrir allt er það töluvert traust sem verið er að rétta stjóranum.

Lið Houllier og gengið að undanförnu

Töluvert ræddi þessi dálkahöfundur það sem ég hef áður rætt. Þá staðreynd að af 52 leikmönnum sem voru á aðalliðs-, varaliðs- og unglingasamningum á Anfield í júní 2004 voru í mesta lagi 6 þar á ferð sem telja mátti toppklassaleikmenn, þá Finnan, Riise, Hyypia, Carragher, Hamann og Gerrard. Ég reyndar myndi vilja skoða að bæta Dudek við, en þó ekki. Það sem Rafa tók við voru óefnilegir unglingar (Raven, O’Donnell, Smyth og Foyle – hvar skyldu þeir vera), oflaunaðir slakir leikmenn (Biscan, Cheyrou, Diao og Smicer) og leikmenn sem aldrei náðu sér í gang þrátt fyrir efni áður (Baros, Cissé, Mellor, Le Tallec og Pongolle).

Í dag, einungis FIMM árum síðar eru af þessum 52 leikmönnum sem þá voru á samningi einungis fimm eftir! Gerrard og Carragher voru á aðalliðssamningum og Darby, Spearing og Irwin voru nýkomnir á unglingasamning. í dag eru hjá Liverpool 79 leikmenn á slíkum samningum. Semsagt í raun 74 nýir þó meiriparturinn sé auðvitað unglingar. Sláum þriðjung af og þá erum við með 50 leikmenn í liðinu sem Rafael Benitez hefur fengið þangað og við skulum ekki ætla annað en nýr maður myndi nú ekki nota þá alla.

Og hvernig hefur gengið verið? Liverpool urðu síðast meistarar 1990. Frá þeim tíma og þangað til Rafa Benitez tók við hefur liðið náð 2.sæti tvisvar!!! 1991 og 2002. Hæsta stigatala liðsins frá 1991 – 2004 var 80 stig árið 2002.

Fyrsta árið munum við sem CL-árið og annað sem FA-cup árið. En það ár náðum við hæstu stigatölu liðsins frá því að PL var stofnuð, 82 stig og í fyrra náðum við 86 stigum. Öðru sæti.

Muna menn eftir stóryrtum lýsingarorðum um að “risinn væri vaknaður” frá 2006 eða frá því í vor. Held ekki.

Semsagt

Lið sem ekki er vant að reka stjóra á miðri leiktíð, eigendur sem hafa veitt stjóranum mikil völd og ábyrgð og besti árangur í ensku deildinni í um 20 ár.

Að stýra umræðu

Fyrirsagnirnar í blöðunum frá Sunderland-tapi og fram á United-sigur voru margar.

Sky, BBC og Times voru róleg, þó flest teldu pressuna hafa aukist. En snilldarblöðin eins og Sun, NOTW, Daily Star og Daily Express fóru hamförum af gleði yfir slöku gengi LFC!

Drógu upp fréttir um yfirvofandi gjaldþrot og hrun. Það skal þó bent á að árið 2008 náði LFC mesta gróða í sögu félagsins og nýlega gerði félagið stærsta auglýsingasamning í sögu liðsins og a.m.k. næststærsta auglýsingasamning í fótboltanum.

Þessum fréttum sorpmiðlanna bresku var samviskusamlega dreift á 365 miðlum, á Vísi og í íþróttafréttum.

Farið var að ræða um slök kaup Benitez. Drógu þar upp Pennant, Bellamy, Morientez, Gonzalez, Dossena og Babel helst og mest. Gott og gaman hefði nú verið ef þeir hefðu minnst á Poborsky, Nevland, Veron, Taibi, Djemba-Djemba, Kleberson, Hargreaves eða jafnvel Berbatov. En það var ekki gert.

Enda fær maður aldrei umræðu um þau kaup sem hafa mistekist á þeim bæ. Alls ekki á United deild 365 lýsenda og analýsera. Þó kannski aðeins örlar á það hjá Hemma Gunn pirruðum. Heldur er ekki rætt um Stepanovs, Luzhny, Cygan, Jeffers, Wright eða Diawara hjá Wenger.

Þið megið leiðrétta mig ef þið lesið oft fréttir um mistök þessara manna á markaðinum sem mér finnast þó nokkur. Nýjasta dæmið um þetta er auðvitað Owen sem enn er verið að mála sem landsliðsmann framtíðarinnar hjá enskum, komandi inná 13 – 18 mínútum fyrir leikslok í deildarleikjum en fær þó að byrja gegn Barnsley.

Með sömu meðferð hans á Anfield hefði verið farið að spyrja spurninga í blöðunum en ekki á OT.

Svo eru það umræðurnar um karakter stjórnendanna. Þar er Rafa yfirleitt nefndur sem sá þurri sem lítið gefur af sér og enginn fær að ráða nema hann. Bíddu aðeins. Eigum við að líkja honum við þann gamla? Ferguson hárþurrku sem hefur hent leikmönnum frá liðinu fyrir að draga vald hans í efa. Maður sem hefur skipt sér svo sterkt af einkalífi leikmanna að hann hefur kynnt þá fyrir “verðugum eiginkonuefnum”. Telja menn líklegt að hann smiti af sér gleðinni. Löngu hættur að stjórna æfingum og hleypir engum að sér nema Mike Phelan. Lesa bara ævisögur Beckham og Stam ef menn ekki trúa því.

Hvenær lásuð þið síðast frétt um skapgerð Fergie? Ég þarf allavega að leita töluvert að því…

Að fara með vald

Það er ekki nokkur spurning að þeir sem fá penna í hendur eða að slá á lyklaborð tölvu til að skrifa það sem fólk les eða að sjá um lýsingar leikja eða analýseringu eftir þá hafa ákveðið vald. Þeir geta valið sér að standa með mönnum eða liðum og látið dæluna ganga hratt og örugglega gegn öðrum.

Ég hef oft pirrað mig á þeim góðu drengjum sem stundum detta inn til að greina leiki og lýsa. Því miður detta margir í þá gryfju að lýsa sinni andúð á einstaklingum eða liðum óháð raunveruleikanum. Ekki síst hjá þeim sem sinna þessum störfum hér. Það er alveg ferlega ferlegt að hlusta á menn sem eru að tala um LFC og brosa í kampinn eftir tapleik og nota tækifærið til að berja á liðinu og stjóranum. Slá þá um sig með frösunum sem sóttir eru í Sun og öll hin og eru algerlega tilbúnir að höggva menn án dóms og laga, af einskærri gleði.

En það er líka það sama sem maður sér í íslenska boltanum.

Hér skiptir töluverðu máli að vera vel tengdur íþróttadeildunum og þær hafa átt stóran þátt í að skipta út og inn þjálfurum og færa til leikmenn.

Jafnvel gengið svo langt að segja um suma að “eftirsjá verður af þessum manni úr boltanum” þó að rjúkandi rústir standi eftir hjá liðunum sem þeir voru að kveðja…

Kjarninn

Fjölmiðlar geta með stöðugum fréttum og tilvitnunum hverjir í aðra haft verulega að segja um hvað gerist hjá þeim sem þeir fjalla um.

Undanfarin þrjú ár hefur mér fundist halla verulega á fréttaflutning af liðinu okkar. Gjaldþrotaspjall, endalausar umræður um kulda og það hvernig leikmenn hafa verið “sveltir” eða illa farið með þá. Kuldi þjálfarans.

Hlutirnir eru að sjálfsögðu ekki rósrauðir. En alls ekki kolsvartir.

Ég fer ekki frá þeirri skoðun að fyrir hverja rósrauða frétt sem birt er um LFC koma 7 – 10 kolsvartar til baka.

Þess vegna skiptir máli fyrir okkur öll að reyna að rýna í gegnum sorpið og skoða hvað við getum hlustað á. Ég les langmest blöðin sem eru í Liverpool og reyni að hlusta á eins mörg viðtöl sjálfur og ég get. Ég treysti ekki Lundúnapressunni, hvað þá Vísi.is og íslenskum fréttaflutningi.

Og það er sorglegt ef einhverjir gerðu eins og ég í gær og gáfust upp á íslenskri lýsingu leiks, fyrst og fremst vegna þess að eftir 45 mínútur af leiknum fékk ég nóg af lýsingum á “gríðarlegum efnum” annars liðsins og stöðugu hrósi á Wenger og “hans unglinga”.

Fór á NewsNow í dag og fann þá tvær greinar sem tengjast því sem ég spjalla um, þær eru því miður ekki á stórum og traustum miðlum en ég læt þær fylgja hér og aðra sem kemur hér!!!

Arsenal 2 – Liverpool 1

Posted on by

16 liða úrslit Carling Cup, sjötta árið í röð sem við þurfum að fara til London og leika þar á þessu stigi keppninnar. Fjórða árið í röð endum við keppni þar og ljóst að Wembley verður ekki áfangastaður Carlinghópsins okkar.

Rafa breytti liðinu mikið, eins og við vissum öll, skipti um leikmenn í NÍU leikstöðum frá sunnudegi, einungis Insua og Kuyt byrjuðu aftur og Hollendingurinn sívinnandi var fyrirliði liðsins í kvöld, til hamingju með það hr. Dirk.

Byrjunarlið Benitez í kvöld var:

Cavalieri

Degen – Kyrgiakos – Skrtel – Insua

Plessis – Spearing
Kuyt – Voronin – Babel

N’Gog

Á bekknum sátu: Reina – Aquilani – Benayoun – Darby – Dossena – Eccleston – Ayala.

Klárlega sterkasta 16 liða úrslita Carling-lið okkar á ferli Spánverjans, allir leikmennirnir leikið fyrir aðalliðið og sjö byrjunarmenn landsliðsmenn sinna landa. Arsenalliðið var líka sterkt, þar stillti Wenger upp öflugri sóknarlínu, efnilegri miðjulínu og blöndu reyndra og ungra í varnarlínunni.

Enda varð þessi leikur hin ágætasta skemmtun á nokkuð fullum Emiratesvellinum.

Okkar menn byrjuðu leikinn betur. Fín sókn á 3.mínútu endaði á Kuyt sem ekki náði almennilega til boltans í góðu skotfæri á vítateigslínunni og á 9.mínútu fékk Degen dauðafæri sem hann setti utanfótar framhjá fjærhorni eftir flotta samvinnu við N’Gog. Smám saman komust þó heimamenn inní leikinn, þeir lágu frekar aftarlega en reyndu svo að sækja hratt.

Pressan þeirra skilaði sér á 19.mínútu, Andriy Voronin átti skelfilega sendingu til baka sem Fran Merida át upp og klíndi í stöngina inn rétt utan teigs. 1-0 uppúr fyrsta skoti Arsenal á markið. Ekki sanngjarnt, en staðreynd.

Sú forysta varði þó ekki lengi. Skrtel dúndraði boltanum fram á völlinn eftir 26 mínútur, Ryan Babel lagði hann með kassanum út á Emiliano Insua sem klíndi boltann utanfótar af 25 metrum í markið, óverjandi fyrir Fabianski markmann heimaliðsins. Verulega fallegt fyrsta mark Emiliano fyrir félagið, er sannfærður um að þau munu verða töluvert fleiri í framtíðinni og staðan orðin 1-1.

Þarna datt leikurinn töluvert niður, við drógum aðeins úr sóknarákafanum sem svo þýddi að Arsenal átti erfitt með að beita skyndisóknunum sínum. Þó lenti Cavalieri í töluverðum hremmingum uppúr horni í lok hálfleiksins en ekkert gerðist þar og jafnt var eftir ágætan fyrri hálfleik beggja liða.

Við hófum þann seinni vel, vorum hátt á vellinum í byrjun en eins og í fyrri var það skyndisókn Arsenal sem skilaði marki. Boltinn tapaðist á miðsvæðinu, Merida sneri á Degen og sendi á Ramsay, hann böndlaði boltanum framhjá Kyrgiakos, sem átti að gera betur, og til Bendtner sem labbaði framhjá Skrtel fáránlega létt og klíndi honum á nærhornið hjá Cavalieri. Fyrsta sókn Arsenal í seinni hálfleik og 2-1.

Næstu tíu mínútur voru taflmennska en uppúr því tóku okkar menn völdin. Menn sem engu skiluðu í fyrri hálfleik, Voronin og Babel vöknuðu og smám saman færðist meiri þungi í okkar leik. Babel átti gott skot á 65.mínútu uppúr aukaspyrnu en lagðist þá reyndar aftur til hvílu!

Tvær skiptingar er svo það næsta fréttnæma. Fyrst fór N’Gog útaf fyrir Benayoun (74.mín) og síðan Plessis út fyrir Aquilani. Mér þótti skipt fullseint og vildi fá annan útaf en N’Gog, eina sem mér dettur í hug er að Rafa sé enn að búa til sjálfstraust fyrir Babel og Voronin. Nokkuð sem ég skil en er ekki sammála. Þó má Voronin eiga það að hann var beittur í lok leiksins.

Á 79.mínútu kom svo besta færi leiksins. Voronin og Kuyt unnu vel saman og Dirk átti frábæra sendingu á Babel sem hitti boltann ekki FYRIR OPNU MARKI og reyndi ENN EINU SINNI að teygja sig í boltann með hægri í stað þess að stýra honum með vinstri. Ömurleg afgreiðsla og Ryan karlinn hlýtur að sofa lítið í nótt!

Aquilani stimplaði sig vel inní þennan leik og átt MAGNAÐA 50 metra sendingu á hlaupagikkinn Degen sem sendi hann á Voronin sem skaut af vítateig en Fabianski varði vel. Rafa ákvað svo að leyfa unglinum Nathan Ecclestone að spila síðustu sjö mínútur leiksins, tók Degen útaf. Þessi drengur hefur leikið feykivel með varaliðinu og er einn fyrir framtíðina.

Í lokin voru það svo dómararnir sem fengu fókusinn. Fyrst átti Voronin vel tímasett hlaup og var kominn í gegn þegar aðstoðardómarinn tók kolranga ákvörðun og flaggaði. Á 92.mínútu datt boltinn í teignum og Alberto Aquilani sýndi frábær tilþrif þegar hann klippti boltann í átt að marki þar sem Senderos nærri því greip boltann fyrir augum dómarans. Ekkert víti og þar með lauk leiknum. 2-1 tap og enn á ný kveðjum við þessa keppni í 16 liða úrslitum.

Heilt yfir var ég ekki neitt mjög ósáttur við leikinn. Á löngum köflum stjórnuðum við leiknum, vorum óhræddir að láta boltann ganga og pressan okkar var að virka fínt. Sóknartilburðirnir ágætir en slök nýting dauðafæra og einbeitingarleysi í fínum hálfsóknarsénsum okkur að falli þar.

Varnarleikurinn hjá liðinu átti hins vegar að vera betri og við vorum of ragir að stoppa skyndisóknir Arsenal.

Markmaðurinn Diego Cavalieri var óöruggur í þessum leik, reyndar alltaf erfitt að byrja leik á að fá á sig mark og hann var í vanda í úthlaupunum lengst af.

Hafsentaparið átti erfitt, kannski of líkir leikmenn, stórir og sterkir en ekki alltof grimmir í fótunum. Sérstaklega leist manni illa á Skrtel sem virðist heillum horfinn. Svei mér ef slakt form Carra á ekki bara rótina í slökum Skrtel! Bakverðirnir voru virkilega flottir sóknarlega en Degen átti erfitt varnarlega og flestar sóknir Arsenal fóru í gegnum hann.

Spearing átti uppreisn æru, duglegur og grimmur leikmaður sem ég er alls ekki tilbúinn að afskrifa. Plessis og hann eru hins vegar báðir varnarsinnaðir og Plessis náði ekki sömu tökum á leiknum og Jay litli.

Sóknarlínan þar fyrir framan olli manni mestum vonbrigðum. Kuyt var þó duglegur eins og alltaf og skilaði sínu. Voronin var skelfingin ein í fyrri hálfleik, með fýlusvip og skilaði engu. Hann vann sig þó inn í leikinn í seinni hálfleik og skilaði mestri hættunni okkar í lokin. Ryan Babel. Vonarstjarnan á sínum tíma er hreinlega að deyja. Ég hef reynt og reynt að bíða eftir að hann springi út en ef maður nýtir tækifærið sitt jafn illa og hann gerði í kvöld á ekki að verja mann. Spái því að reynt verði að vinna skiptidíl við Ajax í janúar þar á bæ. Ætla ekki að rífa hann niður, en þetta var einfaldlega óásættanlegt.

N´Gog hins vegar hefur átt betri daga, en er sprækur og ógnandi. Er viss um að hann verður stjarna á Anfield í framtíðinni og endurtek að ég var ósáttur við að sjá hann hverfa af velli. Ég aftur á móti held að hann geti jafnvel tekið því sem hrósi. Það er alls ekki víst að Torres spili um helgina og sennilega var verið að hvíla hann þess vegna. Engin önnur afsökun gildir!

Varamennirnir Benayoun og Ecclestone skiluðu litlu, Yossi náði ekki takti og Ecclestone var svakalega stressaður.

Alberto Aquilani. Vertu velkominn! Ætla ekki að stökkva af stað strax í lýsingarorðaflaum en þetta voru gríðarlega góðar 20 mínútur. Ekki bara sendingin ótrúlega og hjólhestaspyrnan. Hann fór strax í djöflaganginn, braut af sér, vann boltann og hljóp fram og til baka. Gott skref í endurkomuferlinu í kvöld og ég hlakka til þegar hann verður farinn að vinna með Masch/Lucas og Gerrard!

Maður leiksins. Fannst bakverðirnir okkar bestir, Degen fær mínus fyrir markið hans Bendtner og því vinnur Emiliano Insua kampavínsflöskuna frá Kop.is og mér í kvöld.

2-1 tap en ekki slæmur leikur. Næst er það Fulham á Craven Cottage kl. 15 á laugardaginn.

Myndir sem fylgja koma frá Daily Mail og Zimbio.com

Byrjunarliðið komið…

Posted on by

NÍU breytingar frá sunnudeginum!

Byrjunarliðið

Cavalieri

Degen – Kyrgiakos – Skrtel – Insua

Plessis – Spearing
Kuyt – Voronin – Babel

N’Gog

Bekkur

Reina – Aquilani – Benayoun – Darby – Dossena – Eccleston – Ayala.

Dirk Kuyt er fyrirliði liðsins, held það sé örugglega í fyrsta skiptið í “competitive” leik.

Ýmislegt áhugavert þarna, held að þetta sé sett svona upp en viðbúið að Kuyt og Voronin skipti um staði. Leyfi mér að spá því að Aquilani, Dossena og Benayoun komi þarna inná, en gaman væri að sjá Ecclestone…

KOMA SVO!!!

Arsenal á morgun!

Posted on by

Eftir skemmtilega helgi þar sem staðan í Úrvalsdeildinni breyttist heldur betur okkar mönnum í hag er komið að þriðju umferð enska Deildarbikarsins. Eins og venjulega eru okkar menn óheppnir í þessari keppni, því á meðan önnur stórlið úr Úrvalsdeildinni fengu flest hver auðveldari viðureignir drógust okkar menn gegn Arsenal og mæta þeim á útivelli annað kvöld. Ég held að þetta sé þriðja eða fjórða árið í röð sem okkar menn fá svona drátt snemma í þessari keppni – hingað til hafa þessir útistórleikir endað okkur í óhag en hver veit, kannski breytist það í ár?

Af okkar mönnum er eitthvað lítið um fráföll. Steven Gerrard, Albert Riera, Martin Kelly og Andrea Dossena eru allir frá og talið líklegra að þeir geti leikið um helgina en á morgun, á meðan Sotirios Kyrgiakos er eini leikmaðurinn hjá okkur frá til langs tíma. Þá staðfestir Rafa í dag að Alberto Aquilani muni vera í hópnum á morgun en ég sé hann varla fyrir mér spila meira en örfáar mínútur.

Aðrir eru heilir og geta spilað á morgun. Ef ég ætti að giska á hverjir fengju frí yrðu Fernando Torres og Glen Johnson fyrstu menn á blað, þar sem þeir komu tæpir inn fyrir United-leikinn um síðustu helgi og því finnst mér líklegt að þeir fái tækifæri til að koma sér í betra stand og verði því í mesta lagi á bekknum á morgun. Fyrst Gerrard er frá finnst mér næsta öruggt að Carragher spili (Rafa spilar aldrei án beggja fyrirliðanna ef hann kemst mögulega hjá því) og finn ég ekkert sem mælir gegn því að Agger haldi áfram við hlið hans.

Ég spái því að Rafa stilli upp eftirfarandi liði á morgun:

Cavalieri

Degen – Carragher – Agger – Aurelio

Spearing – Lucas – Plessis
Voronin – Babel
Ngog

Bekkur: Martin, Skrtel, Insúa, Darby, Aquilani, Benayoun, Torres.

Sem sagt, sterkt lið þar sem nokkrir ungir fá sénsinn. Voronin og Babel fá tækifæri til að minna á sig, Ngog leiðir línuna enda hefur hann unnið sér það inn með markinu sem kom okkur í þessa umferð og góða frammistöðu í síðustu tveimur leikjum. Plessis hefur leikið á Emirates Stadium áður og stóð sig vel, auk þess sem Spearing þarf að fá leik aftur sem fyrst eftir að hafa misstigið sig gegn Sunderland um daginn.

Af Arsenal-mönnum er það helst að frétta að tímabilið hefur byrjað vel hjá þeim. Eftir tvo tapleiki í röð gegn Manchester-liðunum í september hafa þeir náð sér á flug aftur í Úrvalsdeildinni og eru nú í þriðja sæti, stigi á undan okkar mönnum með leik til góða. Hins vegar hafa þeir á síðustu vikunni misst tvo leiki (gegn AZ Alkmaar og West Ham) niður í jafntefli á lokamínútunum og verða því örugglega ákveðnir í að ná í sigur á morgun. Eins og venjulega í Deildarbikarnum mun Wenger hvíla megnið af aðalliði sínu og nota „krakkana“ svokölluðu en það lið hefur verið duglegt að stríða hinum ýmsu liðum síðustu 2-3 árin og því skal ekki nokkur maður halda að við séum sigurstranglegri þótt Wenger hvíli.

Ég hef sagt það áður og segi það aftur, mig langar að sjá þetta lið okkar ná á Wembley í ár. Mér er nokk sama í hvorum bikarnum það er, það er bara staðreynd að fjögur ár eru of langur tími á milli bikarúrslitaleikja hjá Liverpool FC. Við unnum síðasta bikarúrslitaleik okkar vorið 2006 og því væri ekki slæmt að komast á Wembley í annað hvort mars eða maí 2010. Til að svo geti orðið í Deildarbikarnum þarf þetta lið okkar á morgun þó að fara í gegnum ansi stóra hindrun.

**Mín Spá:** Ég held að þetta verði opinn og skemmtilegur leikur með nóg af mörkum. Hvorugt liðið hefur verið í einhverju fantaformi varnarlega en hafa skorað mest allra liða á Englandi. Ég sé fyrir mér **3-2** sigur okkar manna (að sjálfsögðu) í leik þar sem Arsenal-liðið tekur tvisvar forystuna en okkar menn standa fyrir sínu. Ngog skorar a.m.k. tvö á morgun og svei mér þá ef Aquilani kemur ekki inná á lokamínútunum og setur eitt úr aukaspyrnu. Það væri ekki leiðinlegt. ;)

Áfram Liverpool!

Liverpool 2 – manchester united 0

Posted on by

torres-manu-2-0

Jæja jæja jæja. Eftir ömurlegar vikur þar sem að okkar menn höfðu tapað fjórum leikjum í röð þá mættu Englandsmeistarar Manchester United á Anfield. Með tapi þá væri það versta leikjaröð Liverpool í tugi ára, en með sigri þá sáu menn möguleika á að snúa þessu tímabili við.

Það er skemmst frá því að segja að okkar menn unnu sanngjarnan sigur á sterkasta liði United og það án fyrirliðans Steven Gerrard, sem var meiddur. Benitez stillti þessu svona upp í byrjun:

Reina

Johnson – Carra – Agger – Insúa

Benayoun – Mascherano – Lucas – Aurelio

Torres – Kuyt

Bekkurinn: Cavalieri, Voronin, Babel, Ngog, Spearing, Degen, Skrtel.

Ég var nokkuð ánægður með þessa uppstillingu. Ég hélt að Kuyt yrði meira á kantinum, en mér fannst hann í raun spila frammi með Torres í nánast hefðbundinni 4-4-2 uppstillingu. Gerrard var meiddur, en Torres og Glen Johnson komu inn í liðið eftir að hafa misst af síðustu leikjum. Aurelio var kannski það óvæntasta í þessu, en hann hafði leikið afleitlega í síðustu leikjum, en bætti heldur betur upp fyrir það í dag.

Ég var alveg ferlega stressaður fyrir þennan leik. Okkar menn hafa ekki bara verið slappir að undanförnu, heldur hafa líka öll vafaatriði fallið gegn okkur. Því var ég dauðhræddur um að þrátt fyrir að við myndum spila betur, þá myndi Man U pota inn einhverju heppnismarki.

En allavegana, okkar menn voru betri í svona 60 mínútur af leiknum. Man U náðu nokkrum sinnum 5-10 mínútna kafla þar sem þeir héldu boltanum vel, en okkar menn náðu alltaf smám saman yfirhöndinni aftur.

Fyrri hálfleikurinn var markalaus þó að okkar menn hafi fengið tækifæri til að skora. Aurelio átti meðal annars frábæra aukaspyrnu, sem að VDS varði mjög vel og úr frákastinu var Kuyt klaufi að skora ekki. Rétt fyrir hálfleik átti Liverpool svo að fá vítaspyrnu þegar að Berbatov (sem er ólýsanlega slappur framherji) reyndi að rífa búninginn hans Kuyt í tvennt þegar að boltinn kom inná teig. En þrátt fyrir það var ekkert dæmt.

Kuyt átti líka 1-2 góð færi, sem hann átti að skora úr – ég man ekki hvoru megin við hálfleikinn þau komu.

Í hálfleik var staðan 0-0.

Í seinni hálfleik þá var það sama uppi á teningnum. Okkar menn voru sterkara liðið.

Á 64. mínútu kom fyrsta markið okkar. Í hraðri sókn þá gaf Yossi Benayoun góða stungusendingu inn fyrir á **Fernando Torres**. Ég hefði ekki getað valið mér betri mann til að fá slíkt færi. Hann hristi Rio Ferdinand af sér og dúndraði boltanum í þaknetið. Frábært mark hjá þessum stórkostlega framherja.

Torres hafði svo sem ekki mikið sýnt fram til þessa í leiknum. En enn einu sinni sýnir hann hversu mikil áhrif hann getur haft á leiki.

Eftir þetta kom smá tímabil í leiknum þar sem að Man U voru sterkari og okkar menn virtist smá taugastrekktir. Á 73. mínútu kom svo skiptingin sem að allir bjuggust við þegar að Michael Owen kom inná fyrir Berbatov. Ég hef sennilega hugsað það nákvæmlega sama og milljónir aðdáenda Liverpool um allan heim – nefnilega þann möguleika að Owen myndi skora jöfnunarmarkið fyrir Man U. Þegar að leiktíminn var að renna út gaf aðstoðardómarinn svo til kynna að heilum **fimm** mínútum væri bætt við leikinn. Fullkomlega óskiljanleg ákvörðun hjá dómaranum, enda ekkert sem réttlætti slíkan uppbótartíma. Dómarinn var yfir höfuð slappur. Okkar menn fengu á sig einhverjar 20 aukaspyrnur (á móti 12 hjá Man U) og á tíma í seinni hálfleik fengu United menn aukaspyrnu við hvert tækifæri.

En þrátt fyrir að Man U hefðu pressað okkar menn og ég hefði verið nánast að pissa á mig af spennu þá ógnuðu þeir samt aldrei markinu verulega fyrir utan dauðafæri sem að Valencia fékk eftir sendingu frá Michael Owen en Valencia skaut í slá. Mig minnir að eina annað markskotið hafi verið slöpp aukaspyrna frá portúgalska 18 milljón punda undrabarninu Nani.

Á síðustu mínútunum voru svo gefin tvö rauð spjöld, bæði rétt. Fyrst var Dirk Kuyt við það að komast einn inn fyrir þegar að Nemanja hinn rauði reif hann niður og fékk verðskuldað sitt annað gula spjald. Á 94. mínútu þá fékk Mascherano svo sitt annað gula spjald þegar að hann braut á Van der Sar.

Á 95.mínútu kom svo rúsínan í pylsuendanum þegar að Kuyt fékk boltann við miðju, gaf hann á Lucas Leiva, sem að keyrðu upp með boltann og gaf svo hárnákvæma sendingu á **David Ngog**, sem var kominn einn inn fyrir og skoraði gott mark. 2-0 fyrir Liverpool og ég fagnaði svo mikið að ég þurfti að fara í sturtu þegar ég kom hingað heim aftur.

Frábær og verðskuldaður sigur. Okkar menn voru betra liðið í þessum leik og enginn mun taka það frá okkur. Menn einsog Owen, Rooney, Berbatov, Valencia (hann var inná, ég fékk það staðfest) sáust lítið í leiknum.

**Maður leiksins**: Liðið lék vel í þessum leik. Menn vinna ekki sterkasta lið Man U nema með því að leika vel. Reina var öruggur í markinu. Það var þó tvennt, sem var sérstaklega ánægjulegt. Fyrir það fyrsta þá var vörnin okkar að spila fantavel. Jamie Carragher og Agger voru gríðarlega öruggir í allri sinni vinnu. Mér fannst þetta lofa góðu gegn Lyon, en Agger er greinilega að koma gríðarlega sterkur inní þetta lið. Bakverðirnir voru líka fínir – Insúa var smá stressaður í upphafi, en óx þegar að á leið leikinn og Valencia sást varla.

Hitt sem var ánægjulegt var frammistaða miðjumannanna okkar. Mascherano og Lucas voru verulega góðir í dag – og unnu klárlega baráttuna á miðjunni. Á köntunum var Aurelio fínn, hann lék sinn besta leik á tímabilinu og Benayoun var einfaldlega frábær. Hann hefði þó mátt nýta færin sín. Frammi var Kuyt að spila vel (sem hann hefur nú ekki gert mikið af að undanförnu) og Torres skoraði markið okkar. Ngog átti svo ánægjulega innkomu með því að skora mark – og sýna kannski sumum af hverju Rafa hafði trú á honum í sumar.

Sem menn leiksins koma tveir menn til greina. Báðir hafa verið gagnrýndir gríðarlega á þessu tímabili, en léku fantavel í dag. Fyrst Jamie Carragher. Það var alveg ljóst að hann yrði bandbrjálaður í dag og það var hann. Fyrirliðinn okkar í dag stóð sig einsog hetja.

En ég hreinlega verð að gefa **Lucas Leiva** titilinn. Hann hefur fengið á sig mikla gagnrýni að undanöfrnu, en í dag var hann frábært. Hann stjórnaði miðjunni og átti stóran þátt í því að þessi leikur vannst í dag. Frábær dagur hjá Brassanum.

Við verðum auðvitað að setja hlutina í samhengi. Við erum eftir þennan leik í fimmta sæti deildarinnar (Man City voru að gera jafntefli – og eru því fyrir neðan okkur) Það var ekki allt í rúst fyrir leikinn og það er ekki allt fullkomið eftir hann.

En þessi sigur í dag er einfaldlega **gríðarlega mikilvægur**. Ef við hefðum tapað þá hefði ég ekki persónulega verið viðræðuhæfur næstu vikurnar. Við hefðum verið 10 stigum á eftir Man U og klárlega úr leik í titilbaráttunni. Það hefði einfaldlega verið gríðarlegt áfall að tapa.

En sigurinn í dag þýðir að við erum 4 stigum á eftir Man U og 6 á eftir Chelsea. Man U eru búnir að tapa tveimur leikjum og Chelsea líka. Þannig að þessi deild er algjörlega opin.

Þessar síðustu vikur eru búnar að vera hundleiðinlegar, en svo koma svona dagar og svona leikir og þá rifjast aftur upp fyrir manni hversu ótrúlega gaman það er að vera stuðningsmaður Liverpool.

**YNWA**

Liðið gegn Man U

Posted on by

Liðið gegn Manchester United er komið. Torres og Glen Johnson eru með, en Gerrard er ekki í hópnum. Miðað við þá sem eru heilir kemur fátt á óvart, nema að Aurelio er í liðinu á kantinum.

Reina

Johnson – Carra – Agger – Insúa

Mascherano – Lucas
Kuyt – Benayoun – Aurelio
Torres

Bekkurinn: Cavalieri, Voronin, Babel, Ngog, Spearing, Degen, Skrtel.

United liðið er svona. Kemur gríðarlega ekki á óvart að Rooney er allt í einu orðinn heill og í liðinu.

Van der Sar

O’Shea – Ferdinand – Vidic – Evra

Valencia – Carrick – Scholes – Giggs

Berbatov – Rooney

Á bekknum: Foster, Neville, Owen, Anderson, Nani, Fabio Da Silva, Jonathan Evans.

Man.Utd á morgun

Posted on by

Það er óhætt að segja að það sé mikil tilfinningareið að fylga sínu liði í boltanum. Það er alveg með ólíkindum hversu mikil áhrif spilamennska örfárra manna af erlendu þjóðerni, í mörg þúsund kílómetra í burtu, hefur áhrif á skapið hjá manni. Svei mér þá, allt Icesave kjaftæði og mis gáfaðir stjórnmálamenn sem tjá sig í fjölmiðlum, blikna í samanburði við ástand manns andlega eftir erfiðan tapleik hjá Liverpool. Ég meira að segja hugsa að ég myndi láta mig hafa það að vera lokaður inni í herbergi í 5 tíma og þurfa að hlusta á ræðu hjá Guðfríði Lilju allan tímann, svo framarlega sem Liverpool myndi vinna. Ég gengi meira að segja talsvert lengra ef mótherjinn væri Man.Utd, eins og á morgun.

Já, það hafa ekki verið neitt sérstaklega ánægjulegir tímar undanfarið. Reyndar hefur mér fundist skrattinn oft á tíðum málaður full mikið á vegginn, mér fannst við ekki eiga slakan leik gegn Chelsea, og eins fannst mér liðið sannfærandi stóran hluta leiksins gegn Lyon. Ég er einnig á því, alveg sama hvað hver segir, að það hefði breytt ansi miklu ef réttilega hefði verið haldið á málum gegn Sunderland og við ekki fengið þessa ísköldu vatnsgusu framan í okkur strax á 4 mínútu. En það er liðin tíð og þýðir ekkert að röfla neitt yfir því. Við erum ennþá með gott lið og ég er algjörlega sannfærður um það að þessi leikur á morgun kemur á hárréttum tíma fyrir okkar menn. Auðvitað getur það komið í ljós eftir leik að hann hafi verið á kölröngum tíma, en maður reynir jú alltaf að spá í hlutina fyrirfram og veit hreinlega ekki hvað gerist. Það er nefninlega alveg hreint fáránlega heimskulega auðvelt að vera vitur eftirá, og það er sko enginn smá fjöldi af fótboltastuðningsmönnum sem eru algjörir heimsklassa snillingar í vitrun eftirá. En af hverju tel ég þetta hárréttan tíma fyrir leik sem þennan?

Er það út af því að það sé gott að mæta Man.Utd þegar þeir eru búnir að vera á góðu “rönni” og við á einu okkar versta hin síðari ár? Nei. Er það vegna þess að allir lykilmenn hjá okkur séu heilir og búnir að vera það undanfarið? Nei. Er það út af því að það ríkir svo góð eining hjá félaginu, allt frá eigendunum og niður í skúringardömurnar? Nei. Er það út af því að hlutirnir eru hreinlega að falla með okkur, hvort sem um ræðir dóma eða önnur atvik? Nei. HVAÐ ÞÁ? Jú, ef menn koma ekki band, snar, kolvitlausir og mótiveraðir til leiks á heimavelli gegn nágrönnum okkar, liðinu sem stal af okkur titlinum á síðasta tímabili, liðinu sem kemur á Anfield með Gary Neville (sonur Neville Neville, btw. hverjum er svona illa við einhvern að skíra hann þessu nafni?) og viðrininu frá Chester. Þrátt fyrir að hafa byrjað þetta tímabil illa, þá getur mönnum tekist að minnka forskotið niður í aðeins 4 stig, og það er ennþá október. Ef þetta mótiverar ekki leikmenn, þjálfarateymið og stuðningsmenn, þá veit ég ekki hvað.

Það hefur mikið verið rætt um fjarveru lykilmanna Liverpool á morgun, en sem betur fer lítur allt út fyrir að bæði Glen Johnson og Torres verði klárir í slaginn. Við unnum þetta Man.Utd lið fyrir rúmu ári síðan, án Gerrard og Torres, og við getum alveg gert það aftur núna. Í rauninni finnst mér þetta Man.Utd lið ekki vera jafn sterkt og oftast áður, þeir búa fyrst og fremst að því að hafa spilað lengi saman og vita ekki hvað skortur á sjálfstrausti er. Fótboltalega séð eru fáir leikmenn hjá þeim sem myndu draga að sér áhuga stærstu klúbba Evrópu. En út á þetta gengur einmitt fótbolti, liðsheild, ekki einstaklinga. Þannig unnum við Man.Utd í fyrra og þannig ætlum við að vinna þá núna. Ákveðni, agi og sigurvilji, það þarf allt að vera á fullu blússi á morgun.

Að vanda munu þeir sem hafa verið “tæpir” hjá Man.Utd, spila á morgun. Það er búið að vera að ræða það við mig alla vikuna af félögunum, að blóðtaka United verði líka mikil þar sem Evra, Fletcher, Giggs og Rooney séu meiddir. Ég hef svarað því til að það sé líklegt að þeir verði allir með í leiknum, í mesta lagi einn þeirra muni missa af honum, og það yrði ekki Rooney. Hann mun sem sagt hefja leik og O%#n mun sitja sem fastast á bekknum og fá yfir sig helling af full verðskulduðum svívirðingum þar. Hann var kominn á listann hjá mér yfir fyrrverandi leikmenn sem ég hefði lítið álit á, en hann gjörsamlega útilokaði aðra frá því að komast í efsta sæti á honum með því að ganga til liðs við þennan klúbb. Þessi listi inniheldur ekki marga einstaklinga, en þeir munu ekki eiga fræðilegan möguleika á að slá júdas af toppnum. Hann hefur marg sýnt það að hann er ekki með neitt hjarta þegar kemur að fótboltanum, og það er hreinlega móðgun við allt og alla að segja að hann hafi einhvern tíman haft Liverpool hjarta, honum er algjörlega nákvæmlega sama hvaða lið ól hann upp, peningar tala og siðferði ekki til í hans huga.

Rafa hefur verið gagnrýndur fyrir að taka ekki O%#n síðasta sumar, ég hefði allavega gagnrýnt kallinn mikið fyrir það. En Rafa hefur líka mikið verið gagnrýndur fyrir úrslitin undanfarið, og er hún svo sannarlega verðskulduð. Við sættum okkur að sjálfsögðu ekki við að tapa mörgum leikjum, hvað þá að tapa mörgum leikjum í röð. Það er algjörlega ljóst að hlutirnir þurfa að breytast og það fljótt, annars getur farið mjög illa. Ég er þó algjörlega á því að við eigum ekki einu sinni að hugsa um það á þessum tímapunkti að skipta um stjóra í brúnni, ekki einu sinni að spá í því. Það getur vel verið að það sé gamaldags hugsunarháttur, en ég hef ekki getað séð lið njóta góðs af því undanfarin ár að vera að breyta um mann í brúnni. Það lenda allir stjórar í lægð, það höfum við séð hjá þeim rauðvínslegna, hjá Wenger og svo hjá Mourinho. Sá síðast nefndi var einmitt rekinn þegar slíkt kom upp, og hvað gerðist hjá Chelsea þá með sinn gríðarlega sterka hóp? Jú, þeir voru í tómu tjóni í talsverðan tíma og mikið umrót í kringum liðið. Hvernig hafa hlutirnir verið hjá Real Madrid? Hvar eru Newcastle í dag? Nei, ég er á því að lausnin sé ekki að reka stjórann og byrja upp á nýtt. Liðið á síðasta tímabili sýndi það og sannaði að það getur unnið alla, og það að ná 86 stigum í deildinni þá sýnir svo ekki verður um villst að þessi vitlausa mýta að Rafa kunni ekki á ensku deildina, á ekki við rök að styðjast.

En að liðinu á morgun. Það er ekki létt verk að ráða í það hvað Rafa gerir á morgun. Ég reikna ekki með Stevie með liðinu, og Aquilani er ennþá ekki orðinn leikfær fyrir aðalliðið. Þar fyrir utan eru þeir Riera, Kyrgiakos og Dossena frá vegna meiðsla. Ég reikna sem sagt með því að Torres og Glen verði með frá byrjun. Ég var hrifinn af Carra og Agger síðast, og vona svo sannarlega að þeir haldi áfram saman í miðvörðunum, enda er Skrtel búinn að vera í tómu tjóni undanfarið, spurning um hvort hægt sé að fá vátryggingamatsmann á svæðið, því þetta tjón hlýtur að vera skaðabótaskylt. Svo er það spurningin með vinstri bakvörðinn. Fyrir leikinn gegn Lyon hefði ég sagt strax að Insúa ætti að hefja leik, en þar var hann svo fíflaður upp úr skónum að ég myndi veðja á Aurelio á morgun. Reynslan sem hann býr yfir ætti að koma honum til góða, sem og gott að hafa hann í föstum leikatriðum (munum eftir einu slíku á Old Trafford fyrr á árinu).

Kuyt verður að vanda á hægri kanti og ég ætla að tippa á að Babel byrji vinstra megin, Benayoun í holunni og Torres á toppnum. Ég væri sjálfur alveg til í að prófa að setja Kuyt í holuna fyrir aftan Torres, Kelly í hægri bakvörðinn og Glen Johnson á kantinn. En það er bara ég. Ég ætla því að spá liðinu svona á morgun, liðinu sem er að fara að leggja Man.Utd í þriðja leiknum í röð:

Reina

Johnson – Carra – Agger – Aurelio

Mascherano – Lucas
Kuyt – Benayoun – Babel
Torres

Bekkurinn: Cavalieri, Kelly, Skrtel, Insúa, Voronin, Spearing og Ngog

Sigur, sigur og sigur, það er ekkert annað sem ég sætti mig við á morgun en sigur. Ég ÞOLI EKKI að tapa fyrir Man.Utd, bara þoli það ekki. Ég er svo ótrúlega bjartsýnn á þennan leik að ég hef nánast áhyggjur af því. Mér finnst ég sjálfur vera að undirbúa leikinn, og ég er búinn að mótivera mig svo fáránlega upp að mér finnst ég ekki geta tapað, samt er ég ekki að fara að spila? Ég er bara að fara á Players og horfa? Vonandi þó er það sama uppi á teningnum hjá leikmönnum liðsins (ekki þó að þeir séu á leið á Players) og þeir mæti svona vel stemmdir til leiks. Ég gleymi ekki fyrstu sekúndunum í leik Liverpool og Real Madrid á Anfield í fyrra, þá fengu gestirnir höggbylgju á sig eftir að dómarinn flautaði til leiks, slíkt vil ég sjá á morgun. Keep things simple og eitt svona lykilatriði, skorum MÖRK og sýnum einnig að við getum varist. Varnarleikurinn hefur verið okkar stærsta vandamál, leysum það á morgun. Málið dautt og 2-0 sigur okkar manna. Segjum bara að Yossi og Babel setji fyrir okkur. KOMA SVO, YNWA

O%#n

Posted on by

Það hefur mikið verið rætt og ritað um Liverpool-liðið og gengi þess síðustu þrjár vikurnar. Fjögur töp í röð, sjö stigum á eftir Manchester United og þeir mæta á Anfield í næsta leik. Ég hef séð þennan leik fyrir mér í hillingum síðustu mánuði, að vissu leyti alveg síðan við unnum þá 4-1 á Old Trafford fyrir sjö mánuðum (vá hvað tíminn flýgur) en aðallega síðan í sumar.

Hins vegar hefur staðan breyst aðeins í síðustu viku frá því sem ég gerði ráð fyrir. Þökk sé fjórum tapleikjum Liverpool í röð og ýmsum atvikum þeim tengdum (s.s. strandboltanum, meiðslum Gerrard, Torres, Rooney og fleiri) hefur umræðan ekki fókuserað á það sem ég hélt að hún myndi fókusera á í aðdraganda þessa leiks.

Í raun mætti segja að vegna krísunnar á Anfield þessa dagana hafi lykilatriði leiksins á sunnudaginn gleymst.

Michael Owen. Michael fokking Owen. Eða O%#n, ritskoðað eins og önnur fjögurra stafa blótsyrði í ensku málfari. Þið þekkið kauða, hann er sá í United-treyju sem er að fagna með Ryan Giggs á myndinni hér að ofan. Þið vitið, gaurinn sem skoraði 118 mörk í 216 leikjum fyrir Liverpool.

Allavega. Daginn sem hann skrifaði undir samning við United í sumar sá ég ekkert annað fyrir mér en þennan leik. Daginn sem O%#n þyrfti að snúa aftur á Anfield og horfa framan í 45 þúsund Púllara sem biðu í ofvæni eftir að fá tækifæri til að láta hann vita hvað þeim fyndist um þessi meintu svik hans.

Oft höfum við leikið við United, oft höfum við viljað sigra þá en það var alveg ljóst að í þetta sinn bara mætti leikurinn ekki tapast. Og því enn fremur mætti O%#n ekki skora gegn okkur.

Ég er svo sem ekki einn af þeim sem finnst O%#n hafa svikið Liverpool FC. Hann margreyndi að koma aftur, eftir mistökin sem hann gerði upphaflega í að velja Newcastle sumarið 2005 frekar en að bíða þolinmóður fram til janúar 2006 og fara þá til Liverpool. Rafa vildi hann ekki, marggerði öllum sem vildu heyra það ljóst og því voru O%#n allar dyr lokaðar hvað okkar menn varðaði. Hins vegar er klárt að hann sveik stuðningsmenn Liverpool. Það er ekki hægt að orða það öðruvísi. Ef Robbie Fowler hefði verið í þessari stöðu, án klúbbs í sumar og þurft að velja á milli Manchester United og minna liðs hefði hann valið minna liðið. Alltaf. Það er það sem gerir menn að Púllurum.

Ekki O%#n samt. Hann bjó um sitt rúm og fær nú að liggja í því líka. Ég sé ekki eftir honum, jafnvel þótt allir United-menn sem ég þekki keppist við að reyna að segja mér hvað hann sé frábær og hvað við værum betur settir með hann í liðinu. O%#n hefur skorað tvö mörk fyrir United í vetur, annað þeirra sigurmark. David Ngog er með sömu tölfræði eftir talsvert færri mínútur það sem af er tímabili. Hann mun líka ekki meiðast neitt í vetur, sem er eitthvað sem ég get lofað ykkur að mun koma fyrir O%#n fyrr en síðar.

Þannig að þetta snýst ekki um tölfræði. Þetta snýst ekki um krísu hjá Liverpool eða titilbaráttu liðanna. Þetta snýst um tilfinningar, ríg, hatur og örlög. Það verður mikið af þremur fyrstu atriðunum á dagskrá á Anfield á sunnudag, spurningin er bara hver örlög O%#n eru. Mun hann horfa á hjálparlaus af bekknum á meðan liðið hans spilar þennan leik? Mun hann, í líklegri fjarveru Rooney, fá óvænt stærri rullu en ella í þessum leik? Mun hið ómögulega gerast, að O%#n skori sigurmarkið gegn Liverpool fyrir framan The Kop?

Ég veit ekki hvað verður. En ég get ekki beðið. Okkar menn verða að snúa taphrinunni við, verða að þröngva sér inn í toppbaráttuna aftur, verða að stöðva þetta United-lið sem stefnir á að fara fram úr okkur í titlafjölda á Englandi, en fyrst og fremst bara má það ekki gerast að Michael fokking O%#n skori fyrir Manchester United gegn Liverpool á Anfield. Slíkt yrði nær örugglega upphafið að Ragnarökum.

Niðurtalningin er hafin …

My Day With “Crisis”-Hit Benítez (Tomkins)

Posted on by

Eins og hinn Liverpoolsögulegi Mummi benti í ummælum þá er hægt að lesa hreint ansi áhugaverða lesningu frá Paul Tomkins í opinni dagskrá á hans frábæru síðu The Tomkins Times (tomkinstimes.com).

Tomkins var boðið í heimsókn á Melwood þar sem sjálfur  Rafa Benitez tók á móti honum og spjallaði við hann í yfir fjóra tíma. Benitez kann greinilega vel að meta Tomkins eins og margir hérna á kop.is og talaði líklega mun meira og opinskár um klúbbinn við hann heldur en hann gerir vanalega.
Hvort sem ykkur líkar vel við Tomkins eða ekki þá mæli ég sterklega með þessari lesningu.

Stjórnin styður Rafa

Posted on by

Gillett: Stjórnin styður Rafa.

“We have just entered into a long-term agreement with Rafa. Our family is extraordinarily pleased with him, we believe he is absolutely as good as there is in the business.

The run of results disappoints everybody. Certainly, it disappoints the fans and it disappoints Rafa.

I have seen his television interview and I know he is disappointed. We are all disappointed, but we are in this together.”

Þetta verður ekki mikið skýrara. Enska pressan verður þá að finna sér eitthvað annað til að skrifa um.

Gestapistill: Nú er útlitið dökkt!

Posted on by

Við birtum hérna gestapistil, sem að Birkir Ólafsson (Carl Berg) sendi okkur. – Einar Örn

Við sem styðum Liverpool í gegnum súrt og sætt, höfum upplifað ýmislegt í gegnum klúbbinn okkar. Sæta sigra, súr töp, stóra titla,og jafnvel enga titla.

Tilfinningarússíbaninn sem fer af stað þegar Liverpool spilar, er slíkur, að það er eðlilegt að menn öskri stundum uppyfir sig, gráti stundum eins og smábörn, eða verði hreinlega brjálæðislega pirraðir. Í flestum tilfellum er það einfaldlega vegna þess að við setjum tilfinningar okkar í þetta, og okkur þykir vænt um klúbbinn okkar.

Nú er útlitið heldur betur svart hjá okkar mönnum, og hverju sem er um að kenna er ljóst, að Liverpool er að eiga þá verstu byrjun sem menn muna eftir í langan tíma. Við eigum reyndar ennþá langt í land með að slá Englandsmetið yfir verstu byrjunina, en það met eiga stoltir nágrannar okkar frá Manchester. Ég bið til guðs, um að þeir eigi það met skuldlaust, á meðan ég lifi.

En já, útlitið er sem sagt ekki gott og menn eru að velta því fyrir sér, hvað sé til ráða. Fyrir mér er nauðsynlegt að vinna á rót vandans. Það þýðir ekki að reyna að lækna “bara eitthvað” og halda að manni líði betur eftir á.

Ég get ekki bent á eitthvað eitt ákveðið sem orsökina fyrir slæmu gengi liðsins. Þetta virðist vera samansafn af mörgum hlutum. Til að nefna nokkra af þessum hlutum:

* Við urðum fyrir mikilli blóðtöku þegar við misstum Alonso frá okkur síðasta sumar, og hans skarð hefur ekki verið fyllt inná vellinum, ennþá að minnsta kosti.

* Þá höfum við einnig misst mikilvæga leikmenn í meiðsli. Það er aldrei gott, en minnir okkur óþægilega mikið á þá staðreynd, að hópurinn okkar sé kanski ekkert alltof breiður fyrir þetta verkefni.

* Margir leikmenn liðsins virðast vera að spila undir getu um þessar mundir.Ef svo væri ekki, hlýtur annað af tvennu að hafa gerst. Leikmennirnir spiluðu langt yfir getu á síðasta ári, eða eru orðnir miklu verri í fótbolta núna, heldur en í fyrra. Ég ætla að leyfa mér að halda að margir mikilvægir leikmenn séu að spila langt undir getu. Hvað það er sem veldur, veit ég því miður ekki.

* Eigenda-fokkíng-fíaskóið í kringum klúbbinn, virðist engan endi ætla að taka og fyrst ég, óbreyttur stuðningsmaður norður í rassgati, er löngu kominn með ógeð á þessu, þá get ég bara rétt ýmindað mér, hvernig þessi mál fara í leikmenn liðsins og starfsfólk. Það skal enginn reyna að segja mér, að þetta smiti ekki út frá sér og hafi áhrif á menn á æfingum, heima fyrir og inná vellinum.

* Til að bæta gráu ofan á svart, virðist óheppni okkar vera slík, að ég man ekki eftir öðru eins í langan tíma. Það hreinlega fellur ekkert með okkur, þessa dagana. Sumt er okkur sjálfum að kenna, sumt er óheppni, sumt dómaranum að kenna, sundboltum og svo framvegis. Það skiptir ekki höfuð máli að kryfja hvert atvik fyrir sig til að koma þessum punkti á framfæri, við höfum einfaldlega verið gríðarlega óheppnir og ekkert fallið með okkur.

Margir hafa sagt að nú sé tíminn fyrir stjórann að taka pokann sinn, því einhver verði jú að axla ábyrgð. Ég get vel tekið fram, að ég er ekki sammála því að við eigum að láta stjórann okkar fara á þessum tímapunkti, hvað sem síðar verður. Ég er hinsvegar auðvitað steinhissa á því að hann skuli ekki sjálfur vera löngu búinn að labba í burtu frá þessu starfi sem hann er í , því vinnuumhverfið hans virðist vera ömurlegt, svo ekki sé meira sagt.

Vissulega er Rafa ekki hafinn yfir gagnrýni. Það má benda á, að margar skiptingar hjá honum vekja mikla undrun hjá mörgum. Hann skiptir oft bæði seint og furðulega. Það sem er auðvitað bæði nærtækast og augljósast að gagnrýna, eru auðvitað úrslit síðustu leikja. Það eitt og sér, er ærið tilefni til gagnrýni, hvort sem um er að ræða leikmenn eða þjálfara.

En hvað er þá til bragðs að taka ?

Ég hef bara ekki hugmynd um það, en eitt veit ég þó: Það hjálpar okkur ekki neitt að gefast upp!! Það hjálpar okkur ekki neitt að básúna því út um allt að tímabilið sé búið hjá okkur, að Rafa sé ömurlegur, að þessi eða hinn leikmaðurinn sé “rusl” og fleira í þessum dúr sem maður hefur verið að lesa undanfarið. Á maður í alvörunni að taka alvarlega stuðningsmenn Liverpool sem segjast ætla að hætta að fylgjast með Liverpool ef við töpum einum leik í viðbót ? Sum ummælin sem maður hefur lesið hérna inni á þessari síðu, og víða annarsstaðar eru mörg hver ekki okkur stuðningsmönnunum til framdráttar. Það er ljóst að liðið er í lægð um þessar mundir og þarf á stuðningi að halda. Ég kann mýmörg dæmi um atriði þar sem stuðningsmönnunum var sýnd tryggð, og það síðasta sem klúbburinn þarf á að halda er að við gjöldum það ekki í sömu mynt. Burt séð frá því hvort menn telji að tími Rafa sé liðinn eða ekki, þá er ljóst að eitthvað mikið er að, og liðið þarf á stuðningi að halda.

Ég hef aldrei verið sannfærðari á ævi minni um að Amerískir eigendur Liverpool eru stórt vandamál sem smitar út frá sér, og ég myndi helst af öllu vilja skipta þeim út, áður en nokkru öðru verður skipt út, og sjá svo hvað það leiðir af sér.

Það er erfiður leikur um helgina, gegn sterku liði. Leikurinn verður erfiður fyrir margra hluta sakir. Í fyrsta lagi eru þessir nágrannaslagir alltaf erfiðir af augljósum ástæðum. Í öðru lagi verðum við að öllum líkindum með gríðarlega vængbrotið lið. Í þriðja lagi virðumst við vera í virkilega djúpri lægð. Í fjórða lagi verður pressan á stjórann og liðið alveg gífurleg. Í sjötta lagi þá virðast stuðningsmenn nágrananna ætla að mæta vopnaðir á svæðið, með mörg tonn af sundboltum.!!!

Ég hef fulla trú á því að við getum klárað þetta verkefni á sunnudaginn. Ef það tekst ekki, þá þýðir heldur ekkert að gefast upp þá. Það þýðir heldur ekkert að gefast upp, þó tapleikirnir verði 20 í vetur. það einfaldlega þýðir ekkert að missa trúna. Ef við stuðningsmennirnir höfum ekki trú á því að við getum unnið, þá getum við ekkert farið fram á að leikmennirnir hafi það.

Áfram Liverpool… YNWA !!!

Carl Berg

Liverpool – Lyon 1-2

Posted on by

Jæja líkt og Kristján Atli kom með óvenjulega skýrslu eftir síðasta leik þá ætla ég að koma með nokkuð óskipulagða og örlítið óvanalega skýrslu líka.

Málið er nefninlega að pressan fyrir þennan Lyon leik var ekkert alveg venjuleg. Orðum þetta svona, síðustu daga og raunar vikur hefði verið alveg tilvalið að Ísland hefði verið þurrkað út af netinu líkt og Svíðþjóð um daginn. Fjórða tapið í deildinni og það tap í þriðja leiknum í röð varð staðreynd gegn Sunderland þökk sé bæði afar döprum leik og eins og við mátti búast þessum líka fína…

… Liverpool strandbolta…Í OKTÓBER… Í FOKKINGS SUNDERLAND sem er norðar en Akureyri miðað við höfðatölu!

Þetta ævintýralega skemmtilega gengi okkar manna hefur síðan sett olíu á eld umræðunnar um að klúbburinn sé gjörsamlega á kúpunni og hreinlega verði að vera í topp 4 í ár og komast langt í CL.

Það hefur síðan enn frekar ýtt á það að við stuðningsmenn erum svo langt leiddir núna að í yfir ár höfum við óskað þess að svona öðlingar(sjá link) eignist klúbbinn í staðin fyrir ullarhattana sem eiga hann nú. Svo þegar Dubai hefur alveg dottið uppfyrir hafa skyldmenni þessa öðlings verið orðuð við okkur (sjá mynd fyrir ofan og mann í kjól).

Þó mannréttindi hafi ekki drifið lengra í þessu landi er ekki hægt að taka það af þeim að þeir hljóma samt betur heldur en kanarnir sem eiga klúbbinn núna.

Þetta er mikil einföldun á afar löngu máli, en allavega, gott að það var engin pressa fyrir þennan leik gegn Lyon!!

…

Það var síðan ekki hægt að neita því að maður varð smá stress á því að sjá byrjunarliðið fyrir leik enda Johnson meiddur og Martin Kelly í bakverðinum í hans stað. Insua kom síðan inn fyrir Aurelio og Agger spilaði fjórða leikinn sinn á afar stuttum tíma, núna í stað Skrtel sem mátti alveg við því að vera hvíldur. Frammi var síðan N´Gog enda Torres meiddur (og hann er bara betri hendur en Kuyt, Voronin og Babel).

Liðið sem sagt svona:

Reina

Kelly – Carragher – Agger – Insua

Lucas – Mascherano
Kuyt – Gerrard – Benayoun

N´Gog

Bekkur: Cavalieri, Lucas, Insúa, Spearing, Riera, Voronin, Skrtel.

En þá að leiknum sjálfum, þó mig dauðlangi nú bara að sleppa allri umfjöllun um þennan hreina og klára þjófnað. Þessi íþrótt er ekki á nokkurn hátt sanngjörn og núna þegar við þurftum ALLRA SÍST á því að halda er þessu rothöggi slengt framan í okkur í uppbótartíma eftir annars sæmilegan leik okkar manna.

Svo ég renni létt yfir leikinn þá byrjaði hann nú rólega hjá okkar mönnum, sköpuðum okkur ekki neitt og svipað var uppi á teningnum hinumegin, fyrsta færið kom þó á 7.mín þegar Lisandro fékk góða fyrirgjöf og náði fínum skalla á markið sem Reina varði vel. Eftir um tíu mínútna leik fór þetta smámsaman að koma hjá okkar mönnum og á 15.mín virtumst við ná að skora fullkomlega löglegt mark er Gerrard sendi góðan bolta inn í teig á Dirk Kuyt sem kom á sprettinum og skallaði í netið. Hann var hinsvegar dæmdur rangstæður sem var tómt rugl. Ég veit reyndar ekki hvort það var verið að dæma brot á Kuyt, það gæti verið en mér sýndist allavega í fljótu bragði að hann hefði dæmt rangstöðu.
Annars var Mascherano að vinna vel varnarlega í liði Liverpool þó lítið hafi hann getað sóknarlega, en Insúa var alls ekki í stuði í vinstri bakverðinum í fyrri hálfleik og lét Gouvou stundum fara illa með sig.

Eftir um hálftíma leik fór pressa Liverpool að þyngjast þræl mikið og var N´Gog t.a.m. rétt búinn að skora eftir eina afar þunga sókn en skot hans fór beint á mann leiksins, markvörð Lyon. Á 41.mín komust okkar menn síðan loksins í 1-0. Boltinn var unninn á miðjunni þaðan sem hann barst til vinstri á Aurelio sem kominn var inná fyrir Gerrard (tekinn útaf meiddur á 25.mín). Hann kom með frekar dapran bolta fyrir sem þó féll fyrir fætur Martin kelly sem kiksaði eftirminnilega, tuðran féll þó fyrir fætur Benayoon sem afgreiddi hann í netið. Stuttu eftir markið tók Kelly síðan bakvörð Lyon illa og náði frábærum bolta fyrir á Aurelio sem var einn á móti markmanni en lét auðvitað verja frá sér. Strax í kjölfarið kom Insúa með góðan bolta frá vinstri sem N´Gog skallaði en aftur var markvörður Lyon vel á verði. Sanngjarnt 1-0 í hálfleik.

Seinni hálfleikur byrjaði síðan rekar rólega eins og sá fyrri þó okkar menn hafi smátt og smátt farið að sækja meira og meira á gestina, N´Gog var hættulegur upp við mark gestana og Marin Kelly var að heilla í bakverðinum og að koma með góða krossa fyrir. Ég nenni samt ekki að fara djúpt ofan í gang leiksins í seinni hálfleik þar sem ég vil gleyma þessu bullli sem allra fyrst. Talandi um það þá fengu frakkarnir horn á 72. mín. Reina náði að slá boltann út í teiginn en þar náðu Lyon menn honum og komu með gott skot sem Reina varði vel út við stöng, þaðan fór boltinn út í teiginn á Gonalons sem náði að stanga hann í netið. Enn eina fokkings helvítis ferðina er okkur alveg með öllu fyrirmunað að verjast horni, Lyon fékk bara þrjá sénsa!! Til að toppa þetta þá fórnaði Kelly sér svo á línunni að hann endaði á stönginni og meiddist. Hann var búinn að eiga fínan leik í bakverðinum er hann þurti að fara útaf. Heilladísirnar eru bara ekki í samfloti með Liverpool liðinu þessa dagana!

Þetta mark sló okkur töluvert út af laginu og jafnræði var með liðinum í lokin. Benitez tók þá einstaklega djörfu skrítnu ákvörðun að skerpa á sóknarleiknum í síðustu skiptingunni með því að taka Yossi Benayoon útaf og setja sjálfan Voronin inná í hans stað, en Úkraínumaðurinn hefur einmitt ekki breytt neinu til um gang fótboltaleiks síðan á æfingu í 5.flokki árið sem hann var á eldra ári í þeim ágæta flokk. Þar með var nokkuð ljóst að við værum ekkert að fara skora aftur í dag og AUÐVITAÐ til að toppa þennan ógeðslega mánuð sem á undan er gengin þá náðu frakkarnir að lauma inn sigurmarkinu í uppbótartíma og stela öllum þremur stigunum.

Hreint út sagt sláandi að hrofa upp á þetta og ekki laust við að maður sakni orðið hreint rosalega sigurleiks.

Ég geri mér grein fyrir því að þessi skýrsla fer í taugarnar á mörgum þar sem ég hef ekki úthúðað liðinu, sagt að það verði að reka Rafa og fresta verði jólunum í ár, en svei mér þá fannst mér við ekki verðskulda þetta í kvöld og ég hef sannarlega séð verri leik hjá okkar mönnum.

Ef ég renni létt fyrir leikmenna í kvöld þá var ekki hægt að saka Reina um neitt, hann varði tvisvar vel í fyrra marki frakkana og gat lítið gert við afleitum varnarleik okkar manna í seinna markinu. Insúa var út á túni í mestöllum fyrri hálfleik en skánaði í þeim seinni. Afar dapur varnarlega í kvöld en ágætur sóknarlega. Kelly kom gríðarlega vel inn í leikinn og var mjög góður, lofar ljómandi góðu fyrir framhaldið. Sérstaklega þessir baneitruðu krossar hans sem félagar hans hreinlega áttu að nýta betur.

Eins var mjög gott að sjá Agger aftur og átti hann fínan leik ásamt Carra sem var fínn mest allann leikinn. Man þó ekki alveg hversu mikinn þátt þeir áttu í lokamarkinu. Innkoma Skrtel var að sama skapi ekki góð fannst mér hann koma óöryggi á vörnina.

Á miðjunni man ég varla eftir að hafa séð Lucas og hann full oft undir fyrir minn smekk gegn miðju Lyon manna. Mascherano var mjög öflugur varnarlega í leiknum, sérstaklega í fyrri en steingeldur sóknarlega að vanda. Þetta er mesta vandamál Liverpool í dag og hefur verið allt þetta tímabil, þessir tveir ná ekki saman, sama hvað hver segir og við verðum að fara fá Gerrard eða Aqualini þarna inn.
Gerrard var svo að vanda í öðrum klassa þegar hann var inna en það varði auðvitað bara í fjandans 25.mín.

Kuyt heillaði mig nú ekki mikið en hann var töluvert skárri heldur en gegn Sunderland. Skoraði að ég hélt gott mark og átti annan góðan skalla í seinni sem var vel varinn. Benayoon hinumegin var ágætur og skoraði í það minnsta mark okkar manna. Það var púað hressilega þegar hann var tekinn útaf. Ekki púað á hann heldur þá ákvörðun að taka hann af velli.

N´Gog var síðan líflegur frammi og hefði svo sannarlega átt að skora í þessum leik. Hann er enginn Torres en ég er sannfærður um að hann fari að fá meiri séns á næstunni.

Þetta var hreint út sagt svakalegt tap, algjört högg og ALLS ALLS EKKI það sem klúbburinn og aðdáendur hans máttu við núna. Ég ætla samt ekki að missa mig í neitt volæði fyrr en úrslit næsta leiks liggja fyrir, sigur þar og tímabilið opnast á ný. Því ég er sannfærður um að Fiorentina og Lyon verði bæði tekin sannfærandi þegar Liverpool rankar úr rotinu.

Keep the faith… at the end of the storm there´s a golden sky…

Babú

(afsaka stafs. og málfarsvillur, nenni ekki og langar ekki að lesa meira um þennan leik)

Liðið gegn Lyon

Posted on by

Hann Rafael vinur minn má eiga það að hann heldur þessu áhugaverðu svo mikið er víst!

Núna dettur Johnson út meiddur alveg án þess að biðja um leyfi?? og Martin Kelly kemur inn í hans stað! Insúa kemur inn í vinstri bak í stað Aurelio sem vann sér sæti úr byrjunarliðinu í síðasta leik. Fyrirliði Argentínu leysir svo Spearing af hólmi á miðjunni með Lucas sér við hlið!

Góðu fréttirnar fyrir leik eru þær að Gerrard er kominn aftur í liðið og Dirk Kuyt er kominn af toppnum. N´Gog er ekki draumakostur frammi en er þó í það minnsta striker.

Byrjunarliðið:

Reina

Kelly – Carragher – Agger – Insua

Lucas – Mascherano
Kuyt – Gerrard – Benayoun

N´Gog

Bekkur: Cavalieri, Voronin, Aurelio, Babel, Skrtel, Spearing, Plessis.

Svona tippa á á þetta frekar en með Gerrard/Kuyt frammi með N´Gog í 4-4-2

Svo er bara að biðja til heilags Fowler um góð úrslit

Lyon koma á Anfield á morgun.

Posted on by

Já hvað getur maður sagt eftir úrslit og mark helgarinnar? Einbeitt sér að næsta leik, já klárlega og sérstaklega þar sem ég er kominn með nóg af því að ræða um MARKIÐ og hvernig liðið spilaði gegn Sunderland. Og þá er það komið… næsti leikur er á morgun þegar Lyon kemur í heimsókn og góðu fréttirnar eru þær að Gerrard er leikfær og mun spila á morgun. Torres nær ekki leiknum en það er bót í máli að fyrirliðinn spilar. Við getum ekki verið svona lélegir í 2 leikjum í röð, það er bara ekki hægt. Liðið hlýtur að vera mótiverað, ekki bara í ljósi leiksins um helgina heldur einnig eftir tapið gegn Fiorentina. Við megum einfaldlega ekki tapa neinum heimaleik í Meistaradeildinni. Með góðum sigri á morgun gæti liðið aftur komist á rétta braut og farið að spila almennilega. Hvernig verður liðið? Ekki guðmund en ég sett mitt óska byrjunarlið hérna:

Reina

Johnson – Carragher – Agger – Aurelio
Kuyt – Gerrard – Mascherano – Babel
Benayoun

Ngong

**Bekkur:** Cavalieri, Lucas, Insúa, Spearing, Riera, Voronin, Skrtel.

Þetta verður hörkuleikur og gríðarlega mikilvægt fyrir okkur að ná sigri og aftur stemmingunni í liðinu sem hefur verið svo góð í Meistaradeildinni. Það væri frábært ef við gætum náð góðum sigri á morgun sem væri neistinn sem myndi kveikja í liðinu og ég hef alveg trú á því. Liðið er gott og ef sjálfstraustið er til staðar þá getum við unnið hvaða lið sem er. Meistaradeildin hefur oftar en ekki verið góð fyrir okkur, liðið hefur einnig oftast spilað betur þar en í deildinni. Vonandi nýtum við þennan leik rétt, losum okkur við þetta rugl sem liðið sýndi gegn Sunderland og hefjum tímabilið (loksins).

Ef hins vegar við höldum áfram þessu rugli og undanfarið og jafnvel töpum á morgun þá getur þetta tímabil orðið langt og erfitt því vítahringurinn sem liðið gæti lent í væri of sterkur til að komast út úr. En þar sem ég er bjartsýnismaður af eðlisfari sem og ég trúi því að liðið sé betra en það hefur sýnt undanfarið þá vil ég trúa því að leikmenn liðsins mæti 110% klárir í þennan leik!

Þar sem enginn af okkur hérna á Íslandi sér liðið æfa dagsdaglega né þekkir leikmennina persónulega er erfitt að dæma um hvernig liðið hefur brugðist við þessu mótlæti undanfarið en VONANDI er Rafa með kraftinn til staðar til að mótivera liðið!

Áfram Liverpool.

Sunderland 1 – Liverpool 0

Posted on by

Þetta verður ekki hefðbundin leikskýrsla. Ég hef í nokkrar vikur ætlað mér að skrifa pistil um gengi liðsins á fyrstu mánuðum haustsins en aldrei fundist vera alveg réttur tími fyrir slíkan pistil. Eftir leikinn í dag finnst mér hins vegar réttur tími kominn og því verður þetta svona blanda af mínum uppsöfnuðu pælingum í haust og eilítilli leikskýrslu með.

Byrjum á því að afgreiða þennan leik. Okkar menn töpuðu í dag fyrir Sunderland, **1-0 á Stadium of Light** og sitja því í áttunda sæti eftir leiki dagsins.

Rafa stillti upp eftirfarandi liði í dag, í fjarveru þeirra Torres og Gerrard:

Reina

Johnson – Carra – Skrtel – Agger – Aurelio
Kuyt – Yossi – Lucas – Spearing – Babel

Bekkur: Cavalieri, Kelly, Insúa, Mascherano (inn f. Spearing), Riera, Voronin (inn f. Skrtel), Ngog (inn f. Babel).

Leikurinn var hundleiðinlegur. Einkenndist af miðjubaráttu, þeir komust yfir strax í byrjun og eftir það var þetta bara spurning um hvort Darren Bent myndi skora aftur og þá hversu mörg mörk. Á endanum hélt Reina honum í þessu eina, umdeilda marki og því endaði þetta sem nokkuð fyrirferðalítill sigur heimamanna þar sem okkar menn ógnuðu forystu þeirra nánast aldrei, ekki einu sinni í vanmáttugri pressu í fáránlega miklum uppbótartíma (7 mínútur þegar ég gat ómögulega séð þörf á fleiri en 4). Sanngjarn sigur heimamanna, þeir voru betri, börðust, komust snemma yfir og lönduðu því. Þeir áttu sigurinn skilinn, hvort sem það var 1-0 eða 3-0 sigur. Punktur.

Þá stuttlega að markinu. Darren Bent, næstmarkahæsti maður deildarinnar á eftir Torres, skoraði eitt af skrýtnustu mörkum sem ég hef séð í langan tíma. Hann fékk boltann óvaldaður við fjærstöngina, skaut boltanum niður í hornið þar og Reina var kominn hálfa leið niður til að reyna að verja þann bolta þegar hann fór í einhvers konar sundbolta sem var á rúlli inní markteig, breytti um stefnu og fór í staðinn hinum megin framhjá Reina og í mitt markið, á meðan sundboltinn fór rétt framhjá horninu sem knötturinn stefndi upphaflega í.

Þetta var vægast sagt skrautlegt mark og skelfilega mikið svekkelsi að fá svona á sig. Flestir tala um blöðru en þar er aðskotahlutnum ekki rétt lýst. Þetta var sundbolti, allt að tvöfalt stærri en fótboltinn á vellinum, og því vel fær um að breyta stefnu boltans ef þeir rækust saman. Það gerðist líka því auk þess að vera í sjónlínu markvarðar og trufla hann breytti sundboltinn bókstaflega stefnu knattarins svo við munum aldrei vita hvort Reina hefði varið markskot Bent eða ekki. Það hefði vissulega verið harður dómur gagnvart Bent að dæma þetta af þar sem við vitum ekki hvort hann hefði skorað úr upphaflega skotinu og hann gat ekki vitað af sundboltanum frekar en aðrir (mér skilst að þetta hafi verið sundbolti merktur Liverpool sem sjónvarpsmyndavélar sýndu lítinn Púllara slá inná völlinn við upphaf leiks) en það breytir því ekki að flestir sparkspekingar sem maður hefur lesið umfjöllun um á netinu virðast sammála um að sundboltinn hafi verið aðskotahlutur og því hefði markið ekki átt að standa heldur dómarinn átt að dæma dómaraspark þar sem knöttur og aðskotahlutur rákust saman.

Svo fór þó ekki, dómarinn dæmdi mark (getur verið að hann hafi ekki áttað sig á hvað gerðist, ég hélt fyrst sjálfur að tá Glen Johnson hefði breytt stefnu boltans og þurfti endursýningu, sem dómarinn hefur ekki, til að sjá hið rétta) og okkar menn komu aldrei til baka eftir það. Umdeilt mark, sanngjarn sigur.

Restin af þessari leikskýrslu verður skrifuð í punktaformi:

Eitt: Liverpool verða ekki Englandsmeistarar í ár. Það ætti öllum að vera augljóst eftir fyrstu níu deildarleikina og aðeins þeir sem eiga erfitt með að horfast í augu við þann sannleika reyna að mótmæla því. Níu leikir, fimm sigrar og fjögur töp. Tölfræðilega er auðvitað allt galopið ennþá en til að okkar menn vinni deildina úr þessu þarf liðið skyndilega að byrja að spila eins og óstöðvandi vél sem tapar helst engum leik til viðbótar í vetur og gerir sárafá jafntefli. Það er AUGLJÓST að slíkt mun ekki gerast. Ég myndi segja að eftir þennan fyrsta tæpa fjórðung tímabilsins ættum við að sjá liðið tryggja sér þátttökurétt í Meistaradeildinni en ekki mikið meira en það.

Tvö: Þetta á sér nokkrar ástæður, en þó helst þá ástæðu að fyrir utan Torres og kannski Benayoun er hver einasti leikmaður að spila verr en í fyrra. Torres hefur skorað meira en í fyrra, Benayoun hefur byrjað betur og hirt stöðuna af Riera, og Johnson er kannski framför yfir Arbeloa (betri sóknarlega, ekki viss varnarlega). Insúa og Aurelio hafa verið daprari en í fyrra, Lucas er ekki að spila jafn vel og Alonso fyrir ári, Mascherano er gjörsamlega horfinn, Agger hefur varla leikið, Skrtel og sérstaklega Carra hafa hrunið sem miðvarðapar og ráða ekki við nokkurn skapaðan hlut, Kuyt hefur verið gjörsamlega hræðilegur, Babel er enn hálf týndur og andlaus, Voronin er ekki að gera neitt af því sem Keane gerði fyrir liðið í fyrra, Riera kemst ekki í liðið og svo framvegis. Leikmennirnir verða að axla ábyrgð á genginu því þeir eru bara ekki að standa sig í ár.

Þrjú: Þó verður að sjálfsögðu að líta á þjálfarateymið og stjórann í þessu öllu. Þegar svona margir leikmenn missa móðinn, þegar liðið allt virðist fara tvö skref afturábak í gæðum og frammistöðu milli tímabila (þrátt fyrir frekar litlar leikmannabreytingar þetta sumarið og fá meiðsli) verður maður að spyrja sig hvort stjórn liðsins sé ábótavant. Rafa hefur að mínu mati gert margt miður gott í haust en eitt það alvarlegasta sem þjálfari gerir/lendir í er þegar hann tapar trú leikmanna á það sem hann er að gera. Kannski er það ímyndun í mér en það er mér enn í svo fersku minni þegar Houllier tapaði búningsklefanum og mér líður eins og ég sé að horfa upp á það sama gerast núna. Ef það verður staðreyndin að leikmennirnir missa trú á Rafa er hann búinn að vera. Ég vona að svo sé ekki en ég óttast það eins og staðan er í dag.

Fjögur: Meðal þess sem Rafa hefur pirrað mig með í haust: heldur tryggð við Kuyt þótt hann hafi aðra valkosti og Kuyt sé ekkert að sýna, hvílir Carra ekki þegar hann er í ruglinu, sveltir Ngog þó hann sé á köflum eini sóknarmaðurinn okkar utan Torres og Gerrard sem er líklegur til að skora, breytir ekki leikkerfinu í fjarveru Aquilani þegar það er augljóst að Lucas getur ekki spilað sína rullu nákvæmlega eins og Alonso gerði í fyrra, og svo framvegis. Rafa er að skemma svolítið fyrir sjálfum sér í vetur með þrjósku, að mínu mati. Hlutirnir virkuðu í fyrra og þess vegna eiga þeir að virka jafn vel í ár, nema hvað þeir gera það ekki og þá skortir hann kjark eða raunsæi til að breyta leikkerfinu og reyna eitthvað sem gæti hentað núverandi leikmannahópi betur.

Fimm: Lucas-umræðan. Hún hefur ekki hjálpað liðinu og mér býður við því hversu mjög sumir hafa hópast að þeim brasilíska. Hins vegar, þótt ég endi oft á að verja hann gegn fáránlega harðri gagnrýni, er ég á því að hann bæði hafi ekki spilað jafn vel og við þurfum frá honum í vetur, né verið rétt nýttur af Rafa. Hann er öðruvísi leikmaður en Alonso og getur einfaldlega ekki komið inn og spilað nákvæmlega sama leik og sá spænski gerði. Það er ósanngjarnt að ætlast til þess af honum. Hann getur betur, og Rafa getur notað hann betur.

Sex: AF HVERJU ERU ALLIR AÐ TALA UM LUCAS ÞEGAR JAVIER MASCHERANO ER BÚINN AÐ VERA MARGFALT LÉLEGRI EN LUCAS Í VETUR? HA?

EINHVER?

Sjö: Við erum mjög, mjög, mjög daprir sóknarlega án Torres og Gerrard í ár. Í fyrra, um þetta leytið, voru þeir meiddir en þá vorum við samt í toppbaráttu. Kuyt var að spila feykivel, Riera var fljúgandi á sínum væng og m.a.s. menn eins og El Zhar voru að leggja sókninni lið. Við unnum Utd á Anfield án bæði Gerrard og Torres, unnum Chelsea á Stamford Bridge án Torres. Í ár var Torres með og slappur í tapi á Stamford Bridge og ég hef nákvæmlega enga trú á að við getum unnið Utd á Anfield eftir viku ef þeir eru hvorugur með. Í fyrra stigu aðrir leikmenn upp í fjarveru þeirra tveggja. Það er einfaldlega ekki að gerast í ár.

Átta: Hvar er baráttan í þessu liði? Í dag, rétt eins og gegn Fiorentina og Chelsea fyrir tveimur vikum, töpuðum við án þess að gera andstæðingunum neitt sérstaklega erfitt fyrir. Hér áður fyrr töpuðum við kannski leikjum gegn Chelsea eða Manchester United en okkar menn börðust þó eins og ljón og voru oft óheppnir að tapa. Því get ég tekið, þegar betra liðið vinnur í hörkuleik, en þetta er að mínu mati þriðji tapleikur okkar í röð og þriðji leikurinn í röð þar sem okkar menn einfaldlega virðast ekki vera nógu hungraðir til að valda heimaliðinu neinum áhyggjum. Þetta tengist að mínu mati hræðslu minni við punkt þrjú, kannski eru leikmennirnir að missa trú á Rafa.

Níu: Jay Spearing var átakanlega lélegur í dag. Ég vil helst ekki afskrifa unga stráka eftir einn eða tvo leiki, en það er munur á því að gera stöku byrjendamistök (eins og t.d. Lucas eða Ngog gera) og því að vera gjörsamlega týndur innan um alvöru miðjumenn andstæðinganna. Þetta var heartbreaking.

Að lokum, þá skal það tekið fram að ég reyndi að vera eins rólegur og yfirvegaður og ég gat við ritun þessarar skýrslu/færslu. Ég hef verið pirraður yfir ýmsu undanfarið og var talsvert pirraðri eftir tapið í dag en þessi færsla gefur til kynna. ÞETTA ER EKKI NÓGU GOTT og það er ljóst að það þarf eitthvað mikið að breytast hjá bæði stjórnun liðsins og leikmönnunum sjálfum ef ekki á að fara verulega illa í vetur (þá er ég að tala um að komast ekki upp úr riðlum Meistaradeildarinnar og komast ekki í Meistaradeildina aftur á næstu leiktíð).

Að mínu mati þarf Rafa að hrista upp í bæði mannskapnum og leikaðferðinni hjá sér. Hann getur ekki spilað 4-2-3-1 þegar Kuyt, Babel og Riera eru að spila illa og Gerrard/Torres eru fjarri. Lucas hentar ekki í Alonso-hlutverkið í þessu leikkerfi sem svínvirkaði sl. tvö tímabil, og það er augljóst að liðið verður steingelt fram á við þegar a.m.k. þrír af þessum fjórum svokölluðu sóknarmönnum eru að spila hræðilega.

Á meðan Aquilani er ekki tilbúinn í slaginn fyrir Lucas myndi ég mæla með því að Rafa gerði eftirfarandi breytingar, helst strax gegn Lyon. ÉG myndi fara í sama leikkerfi og Chelsea nota, með tvo framherja og fjóra á demantamiðju. Þá þéttirðu miðjuna, tekur ákveðið álag af Lucas, sleppir kantmönnunum sem eru hvort eð er að spila hræðilega hjá okkur og leggur meiri áherslu á sóknarþungann frá Johnson og Insúa í bakvörðunum.

Einnig myndi ég gefa Aurelio, Skrtel (Carra líka ef ég gæti), Mascherano og Kuyt gott frí frá byrjunarliðinu. Ef Riera gat spilað sig út úr því hljóta þessir menn að geta það líka með lélegri frammistöðu, leik eftir leik.

Að mínu mati, að því gefnu að Gerrard og Torres séu heilir, ætti þetta að vera byrjunarlið okkar í næsta leik:

Reina

Johnson – Carragher – Agger – Insúa
Mascherano
Gerrard – Lucas
Benayoun
Ngog – Torres

Aquilani mætti svo koma inn sem fyrst fyrir Lucas, eða Mascherano ef hann fer ekki að spila betur (og þá myndi Lucas detta niður). Kuyt má fá hvíld og ég vil í alvöru fara að sjá Ngog fá séns sem annar tveggja framherja, enda var hann enn og aftur í dag meira ógnandi en hinir 2-3 sóknarmenn okkar á þeim fáu mínútum sem hann fékk í dag. Væri Kuyt að spila af fullri getu væri hann sjálfvalinn í þessu leikkerfi, við hlið Torres, en svo er einfaldlega ekki í dag og Rafa einfaldlega verður að hafa kjark til að breyta byrjunarliðinu sínu þegar lykilmenn eru að bregðast.

Ég vona að eitthvað breytist á næstu dögum og liðið nái sér á strik í þessum massífu tveimur leikjum sem framundan eru. Lyon og svo Manchester United, báðir leikirnir á Anfield. Annað hvort eiga sér stað breytingar hjá stjóranum og leikmönnunum sem verður eins og hjartastuð í þessari viku, eða þá að ég er hræddur um að við verðum frekar myrk í máli (og hugsun) eftir viku.

Þetta er allavega hvergi nærri nógu gott eins og staðan er í dag. Hvergi nærri.

Liðið komið, Spearing og Agger byrja

Posted on by

Jæja, þá er liðið gegn Sunderland komið og það er nokkuð spes:

Reina

Carragher- Skrtel – Agger
Johnson – Spearing – Lucas – Aurelio
Benayoun

Kuyt – Babel

**Bekkur:** Cavalieri, Kelly, Insúa, Mascherano, Riera, Voronin, Ngog.

Mér sýnist þetta vera eins konar 3-5-2 í fljótu bragði. Agger, Skrtel og Carra í vörn, Glenda og Fabio á vængjunum, Benayoun fyrir framan Lucas og Spearing á miðjunni og Babel og Kuyt frammi.

Þetta verður áhugavert, svo ekki sé meira sagt.

Áfram Liverpool!

Sunderland úti á morgun

Posted on by

Líður ykkur líka í dag eins og það sé þorláksmessa? Raunar eins og það sé extra góð Þorláksmessa þar sem í þetta skiptið þarf maður ekki að umgangast vini og vinnufélaga sína sem eru nýkomnir frá því að éta einstaklega illa lyktandi og óheillandi fisk sem búið er að míga hressilega á!

Já það er komið að því, eftir einungis 3 mánuði, 2 daga, 6 klukkutíma og korter er komið af því að við fáum aftur að sjá alvöru fótbolta og svei mér þá ef maður er ekki svolítið stressaður fyrir leikinn á morgun. Að vanda VERÐUM við að taka 3 stig frá þessum leik og fyrir þesskonar verkefni er Sunderland dagsins í dag ekkert endilega besti staðurinn til að fara á.

Sunderland lítur mikið betur út heldur en oft(ast) áður, eru búnir að kaupa helling af leikmönnum sem vit er í, voru mjög óheppnir að taka ekki United úti um daginn og hafa svo helvítið hann Steve Bruce sem framkvæmdastjóra núna. Það þyrfti einhver snillingurinn að renna yfir það hvað við höfum oft gert jafntefli við lið sem Bruce stýrir, þá erum við líka í flest öllum tilvikum að tala um botnbaráttulið sem er ekki alveg raunin hjá honum í dag.

Reyndar eins asnalega og það nú hljómar gæti það unnið með okkur að Bruce er ekki með mjög takmarkað botnbaráttulið því þetta Sunderland lið er ekki að fara byggja mennskan múr fyrir framan markið sitt eins og öll fyrri lið Bruce hafa gert gegn Liverpool. Þau lið sem sækja á Liverpool hafa oftar en ekki fengið það í bakið og ég býst við og vona að það muni henda norðanmenn á morgun. Þeir eru meira að segja fullir sjálfstrausts eins og sjá má hér með vinnudýrin Lorik Cana vin okkar úr Marseille og Lee Cattermole á miðjunni.

  En ef við vindum okkur aðeins í það sem skiptir máli fyrir þennan leik þá ber þess fyrst að geta að okkar menn komu mjög vel frá landsleikjatörninni, bara Gerrard, Torres og Kuyt meiddust lítillega og Guðmávitahvaðopolus meiddist eitthvað meira, s.s.  eingöngu fjórir tæpir eða meiddir eftir landsleiki sem í öllum tilvikum skiptu akkurat engu máli (Spánn, Holland og England voru  komin áfram og Grikkland skiptir bara ekki máli yfir höfuð).

Mascherano var síðan að keppa í S-Ameríku í afar mikilvægum leik ásamt Insua sem fór þanngað líka. Síðan veit ég ekki með Lucas en hann fór held ég alveg örugglega í landsliðsverkefni með Brössum. Kuyt og Babel toppuðu þetta samt og fóru til fokkings Ástralíu… í vináttuleik! Þessir fimm koma líklega ekki til með að æfa með Liverpool fyrr en í dag og eflaust allskonar þreyttir eftir ferðalög vikunnar (afhverju enda gamlir leikmenn aldrei sem flugþjónareftir ferilinn?).
Riera spilaði með Spán ásamt Torres og Reina var með í för einnig, Johnson kom við sögu hjá Englandi eins og Gerrard, Skrtel spilaði með Slóvökum í mjög mikilvægum leik fyrir þá þjóð á meðan Agger sneri aftur og tók tvo leiki með dönum. Fagnaðarefni að fá danann aftur í aksjón, þó hann sé líklega af þessum sökum ekki klár í leik fyrir Liverpool. Benayoon spilaði síðan fyrir Ísrael ofan á þessa súpu sem ég var búinn að telja upp.

Til samanburðar er hægt að benda á að af liðinu sem gerði jafntefli við United um daginn þá eru Bardsley, Turner, Ferdinand, Malbranque, Richardsson (í banni gegn okkur), Cattermole og Bent búnir að liggja í leti alla vikina á meðan Reid, Cana og Jones fóru í landsliðsverkefnum (Reid var t.a.m. bara varamaður).
Þetta vinnur auðvitað gríðarlega með Sunderland á stundum sem þessari, þeir hafa keypt nokkuð gáfulega með því að versla góða honest úrvalsdeildarleikmenn í stað þess að kaupa allraþjóða landsliðsmenn sem þeir ættu þá eftir að búa til lið úr. Núna í vikunni var síða Bolo Zenden að bætast í þennan hóp og þann mann ættum við að þekkja vel.

En það er vitað að svona landsleikjahlé eru verkfæri djöfulsins og þetta hlé var ekki neitt æði fyrir stóra þriggja leikja viku (8 daga vika sko). Liverpool getur þú klárlega náð góðum úrslitum þrátt fyrir þetta þó þetta flæki töluvert val á líklegu byrjunarliði! Þeir einu sem eru alveg pottþétt í liðinu eru Reina og Carragher. Eins ætti Aurelio að vera nokkuð pottþéttur þar sem hann fór ekki fet í vikunni og er aftur orðinn klár í slaginn.

Byrjunarlið:

Reina

Johnson – Carragher – Skrtel – Aurelio

Lucas – Mascherano
Kuyt – Gerrard - Riera

Torres

Á bekknum eru: Cavalieri – N´Gog – Benayoon- Agger – Babel – Insua – Voronin.

Fullt af öðrum möguleikum, Kuyt gæti byrjað á bekknum ef hann er tæpur eftir Ástalíuleikinn og langt ferðalag…..bara grín (“,). Riera, Babel og Benayoon koma allir til greina vinstramegin ásamt jafnvel Dossena og Aurelio. Eitthvað segir mér að Spearing spili þennan leik þó ég þori ekki að spá því blákalt af ótta við að það verði flissað af mér og eins gæti Aqualini slysast á bekkinn þó ég telji það afar hæpið.

Spá:
Ég er alveg SKÍTHRÆDDUR við jafntefli en segi þó 1-2 fyrir okkar mönnum með mörkum frá Lucas og Babel.

Annað:
Að vanda hafa fjölmiðlar keppst við að neita því að prins á hvítum hesti sé í þann mund að bjarga Liverpool. Ekkert óvænt eða nýtt þarna en maður veltir því fyrir sér hvort þetta himpigimpi hefði ekki getað ropað því úr úr sér fyrr, ekki bjóða félaganum á Anfield og útskýra ekki betur afhverju. Það er alltaf eins og þeir vilji vera í fjölmiðlum og stefnumót út um allann heim hjá eigendum klúbbs í miklum meintum fjárhagsvanda við moldríkan prins eru ekki að fara gera neitt nema ýta undir truflandi orðróm og umtal sem klúbburinn gæti vel verið án. M.ö.o. vinnið þessi mál fyrir luktum dyrum, ekki í stúkunni á troðfullum Anfield… og seljið klúbbinn.

Annað annað:

Svo gæti ég ekki verið mikið meira sammála þessum penna á Echo, hjúkkit

Kv.

Babú

Guðmávitahvaðopolus meiddur!

Posted on by

Kallgreyið hann Sotirios Kyrgiakos sem fengin var til að fylla upp í skarð Sami Hyypia meiddist illa á hné í stórleik Grikklands við Lúxemborg og verður frá í allt að 4 mánuði.

Það er auðvitað alveg hreint fáránlega pirrandi að missa menn í löng meiðsli í þessum fjandans landsleikjum og svo ég tali nú ekki um hvað það er mikið Liverpool að leikmaður sem er ekki einu sinni að spila meiðist í 4 mánuði!

En þar liggur líklega það eina “jákvæða” við þetta, ef það var einhver leikmaður sem Liverpool mátti við að missa í meiðsli núna þá var það 4.miðvörðurinn þó maður verði að krossleggja fingur og jafnvel bara hendurnar núna að Agger taki upp á því að haldast heill.

Agger spilaði með Danmörku gegn Svíum um daginn og virkaði í lagi, Aquialani er að koma úr meiðslum og ég held að meira að segja Degen sé heill. Hvernig staðan er á Gerrard, Torres og Kuyt er veit ég ekki  en enginn ætti að vera lengi frá eftir þessa landsleikjatörn og því held ég að þessi meiðsli Grikkjans séu einu alvarlegu meiðsli klúbbsins eins og er, 7, 9..13.

Spurning um að fá sér linsur?

Posted on by

Eftir kvöldið í kvöld verður hægt að fara tala aftur enska boltann og þetta gífurlega ógeðslega langa fjandans landsleikjahlé verður senn á enda, langt leiddir geta farið að spá í fantasy liðunum sínum og ég get farið að undirbúa upphitun fyrir Sunderland leikinn (sem ég er löngu byrjaður á andlega).

En þar sem það er ekki ennþá komið að þessu og það eru jú fjandans landsleikir í kvöld þá var ég að spá í að setja fyrir ykkur það verkefni að finna út afhverju Rafa Benitez fær formlega aðvörun frá enska knattspyrnusambandinu fyrir hið gífurlega meiðandi og niðurlægjandi athæfi að taka af sér gleraugun og segja ekki orð þegar hann var spurður út í dómgæsluna í tilteknum leik.

Á meðan dómarasambandið þarf að bregðast sjálft við til að vekja athygli á því að elliær stjóri liðs í nágrenni Liverpool segir dómara sem hleypur meira en flest allir í hans liði sé ekki í nógu góðu formi til að dæma í þessari deild.

Mjög reyndur dómari btw. sem þó gaf andstæðingum United nokkuð ódýrt lokamínútna rautt spjald í leik sem þeir skoruðu í löngum uppbótatíma (again).

Ég er nokkuð viss um að Benitez væri nú þegar kominn í bann hefði hann ropað þessu út úr sér. Þessi fer ágætlega í þetta.

Hvorugur nær þó með tærnar þar sem Neil Warnock hefur hælana :)

Hvorugur nær þó með tærnar þar sem Neil Warnock hefur hælana :)

Meiðslamál

Posted on by

Hérna eru nýjustu fréttir af meiðslamálum Fernando Torres og Steven Gerrard. Hvorki England né Spánn útiloka að þeir muni spila á miðvikudaginn, sem þýðir væntanlega að þeir eru þokkalega heilir. En aftur á moti verður að teljast líklegt að hvorugur þeirra muni spila, þar sem að leikir þeirra liða skipta nákvæmlega engu máli.

Ég horfði á Danmörk-Svíþjóð um helgina og sá þar Daniel Agger í fullu fjöri. Hann og Simon Kjaer voru saman í vörninni og voru sterkir. Dómarinn dæmdi reyndar löglegt mark af Svíþjóð, en fyrir utan það tókst þeim að halda þeim Zlatan og Larsson í skefjum. Persónulega fannst mér það hundleiðinlegt að sjá Agger spila gegn því liði sem ég hélt með – það er miklu betra að hafa hann í sínu liði. Hann á vonandi eftir að koma sterkur inn hjá Liverpool í næstu leikjum. Síðasti leikur Dana skiptir engu máli, þannig að það gæti vel verið að hann fengi frí.

Blessað landsleikjahléð…

Posted on by

Kynnið ykkur þetta hérna til hliðar, gjöf en ekki gjald————————————————–>

Eins og allir stuðningsmenn Liverpool hef ég ekkert verið neitt himinlifandi með byrjunina á þessu tímabili okkar, 8 leikir og þrjú töp og öll gegn liðum sem flokkast sem topp 10 lið.  Það er því kannski skiljanlegt að einhverjir byrji með hinn æðisgengna söng um að tímabilið sé búið, punktur basta, það varla tekur því að spila rest.

Það auðvitað  tekur því varla að benda á að þetta er að sjálfsögðu ekki raunin enda 30 leikir eftir ennþá. En það sem mér finnst svolítið merkilegt er að fyrir Chelsea leikinn þá vorum við í raun með stigi meira heldur en á sama tíma í fyrra, höfum unnið þessi smærri lið þó nokkuð sannfærandi og ekki ennþá gert eitt einasta jafntefli. Það er auðvitað ekki mikið að marka það að bera þetta svona saman en eftir slæma byrjun þar sem liðið var enganvegin búið að slípast þá getur það varla talist heimsendir að tapa gegn Chelsea á Stamford Bridge eftir nokkuð jafnan leik sem hefði einfaldlega með smá heppni (og t.d. víti í fyrri hálfleik) getað endað með útisigri. Chelsea tapar varla heimaleik og það var næstum því tilefni til hátíðarhalda er við unnum þá þarna í fyrra, svo sjaldgæft var að þetta lið tapaði heima (fyrir utan að við áttum í basli þarna löngu fyrir tíð Romans).

Þannig að mínu mati er fásinna að tala um að tímabilið sé búið þó við höfum tapað úti á Stamford Bridge og séum nú þegar sex stigum á eftir þeim bláu. Ofan á þetta má líka benda á að það er alls ekki eins og hin toppliðin hafi farið hnökralaust í gegnum byrjun mótsins. United tapaði eftirminnilega gegn vinum mínum í Burnley, fengu heilmikla hjálp frá dómaranum til að vinna nágranna sína í City (voru þó mikið betri) og voru hreint út sagt STÁLheppnir að merja út jafntefli gegn Sunderland. Chelsea hefur verið að vinna sína leiki með mörkum í blálokin og vissulega sýnt mikla meistaraheppni en þeir taka svo líka upp á því að tapa fyrir liði eins og Wigan. Eins má benda á að þetta lið er skipað frekar gömlum leikmönnum sem ættu að þreytast aðeins og jafnvel detta í meiðsli (voða lítið um það hjá Chelsea núna) þegar liður á tímabilið ásamt því að þeir missa slatta af sínum hóp í Afríkukeppnina í janúar. Arsenal er að spila mjög flottann bolta og virka til alls líklegir en ég á eftir að sjá þá halda út yfir heilt tímabil, og það með ekki sterkari miðju varnarlega en þetta, svo ekki sé talað um vörn og mark  (ekki útilokað samt). Man City er síðan alveg óskrifað blað líkt og Tottenham, þeir ljósbláu eru mjög nærri því að vera alvöru topplið og virðast vera að slípast vel saman á meðan ég spái því að Spurs komi til með að eiga sitt besta ár í marga áratugi og brjóti sér jafnvel leið inn í topp 4. Til þess þurfa þeir reyndar að hafa Modric heilan.

Þannig að þó að Liverpool hafi verið að hiksta á við sauðdrukkinn kvennmann á jólaballi í byrjun móts þá má ekki gleyma því að keppinautarnir eru alveg að því líka og eru síður en svo alveg gallalausir. Klisjan um að mótið verði sterkara í ár virðist actually eiga nokkuð vel við í ár þar sem mun fleiri lið virðast eiga möguleika á að taka þessi “stærri” lið á góðum degi. Þar að auki má alveg merkja smá breytingu á leikskipulagi Liverpool og liðið virðist vera að reyna að halda áfram sóknarleiknum sem endað var á síðasta tímabil og t.a.m. er liðið að klára leiki mun meira afgerandi en fyrir bara nokkrum árum.

Þetta lið á alveg fáránlega mikið inni samt og við vitum það vel. Vörnin á eftir að ná betur saman þegar á tímabilið líður, Carra og Skrtel hafa ekki verið upp á sitt besta og má það kannski að einhverju leiti skýra af því í kringum þá eru nýjir menn. Insúa í vinstri bak sem sækir látlaust, Johnson hægramegin og hann hefur sótt meira á þessu tímabili heldur en allir hægri kanntmenn Liverpool síðan Gerrard var á kanntinum. Síðan er hinn óumdeildi Braselíumaður Lucas tiltölulega nýr á miðjunni. Þetta eru allt góðir leikmenn og hafa spilað vel þegar á heildina er litið en svona breytingar koma niður á varnarleiknum og hafa alltaf gert það. Svo má ekki gleyma því að Agger er við það að koma ferskur til baka og hann er rétt rúmlega mjög góður liðsstyrkur, sérstaklega fyrir sóknarleik Liverpool, fáránlega eins og það nú hljómar miðað við að hann er miðvörður. Lucas og Mascherano fara síðan að fá gríðarlega samkeppni eftir þetta HELVÍTIS FOKKINGS landsleikjahlé þegar Aquialani kemur aftur úr meiðslum, ekki að hann fari að styrkja varnarleikinn mikið.

Þannig að ég sé ekki ástæðu til að tapa gleðinni alveg strax þó að á móti blási í augnablikinu.

Continue reading →

Auglýsingar á Kop.is

Posted on by

Það hefur verið frekar langur aðdragandi að þessu en nú er komið að því að við ætlum loksins að byrja að selja auglýsingar á Kop.is.

Eins og ég sagði hefur þetta verið frekar lengi í bígerð hjá okkur eigendum síðunnar. Í upphafi ætluðum við að keyra þetta af stað strax en svo hefur þetta frestast tvisvar. Fyrst vegna annríkis hjá okkur félögunum og svo í seinna skiptið, og þá talsvert löng frestun, vegna bankahrunsins í fyrra. Þeir möguleikar sem voru uppi á borðinu við bankahrunið einfaldlega hurfu og það var ljóst í okkar huga að við yrðum að leyfa þjóðfélaginu aðeins að jafna sig áður en við settum þetta mál aftur á dagskrá.

Nú er hins vegar komið að því. Eins og kemur fram á upplýsingasíðu fyrir auglýsingar á Kop.is (sjá hér til hægri) eru skrifaðar að meðaltali tvær færslur á þessa síðu á dag og fær hún um 2.400 heimsóknir daglega, sem gerir hana að einni vinsælustu og víðlesnustu bloggsíðu landsins. Af þessu erum við gífurlega stoltir og sjáum því ekkert til fyrirstöðu að það ætti að vera gott tækifæri fyrir auglýsendur að nýta sér þessa stöðu okkar á meðal íslenskra bloggara.

Við eigendurnir höfum aldrei rekið þessa síðu til að græða á henni. Síðan er rúmlega fimm ára gömul og höfum við allan tímann lagt út fyrir kostnaði reksturs síðunnar úr eigin vasa. Okkar helsta markmið með því að selja auglýsingar á síðuna er einfaldlega það að ná inn fyrir kostnaði svo að síðan geti „rekið sig sjálf“ eins og sagt er. Þetta teljum við að sé raunhæfur möguleiki með því einu að bjóða upp á mjög ódýran og sanngjarnan birtingarkost fyrir auglýsendur.

Verð á auglýsingu á Kop.is er **krónur 10.000 á mánuði**, en þó bjóðum við upp á afslátt ef teknir eru fleiri en einn mánuður í einu. Þeir sem vilja hafa samband og ræða mögulegt samstarf eða fá frekari upplýsingar geta haft samband við Kristján Atla á netfanginu kristjanatli@gmail.com.

Með kveðju,

Einar Örn Einarsson og Kristján Atli Ragnarsson

stofnendur, eigendur og ritstjórar Kop.is.

Aquilani að verða leikfær

Posted on by

Samkvæmt frábærum fréttum í dag er búist við að Alberto Aquilani geti byrjað að spila fyrir varaliðið okkar innan tveggja vikna. Það þýðir að ef hann lendir ekki í neinum frekari flækjum með meiðsli sín ætti hann að vera orðinn til í slaginn með aðalliðinu fyrir lok október, og þá jafnvel gegn Manchester United þann 25. n.k.

Þetta eru einfaldlega frábærar fréttir. Ekki bara af því að liðið þarf að leika fimm leiki á fjórtán dögum eftir landsleikjahléð heldur af því að það tekur kannski aðeins pressuna af Mascherano og Lucas, sem hafa ekki átt sjö dagana sæla (af misjöfnum ástæðum) og hafa verið undir mikilli pressu undanfarið. Við einfaldlega þurfum Aquilani inn, strax í gær.

Einnig: George Gillett er hálfviti. Þetta er ekki einu sinni spurning um það hvort menn eru sammála honum eða ekki. Það einfaldlega hjálpar liðinu engan veginn að hann skuli opinbera skoðanir sínar á svona viðkvæmum tímapunkti á tímabilinu. Ef hann er ósáttur við Rafa á hann að halda því innandyra og skamma hann sem vinnuveitandi hans, EKKI fara með það í fjölmiðla.

Fífl.

Martin Palermo

Posted on by

(ath. þessi færsla er skammarlaus tilraun til að setja eitthvað annað en leik gærdagsins efst á síðuna – KAR)

Staðreynd: Xabi Alonso er bara auli, hann þurfti nefnilega að nota fæturna til að skora frá miðju*. Martin Palermo þarf engin slík hjálpartæki. Hann þarf bara að brjóta heilann aðeins … ;)

* Ég veit að hann er fyrir innan miðjuna en samt, þetta er andskoti vel af sér vikið.

**Uppfært:** Það er líka ljótt að hlæja að dómaranum.

Mánudagar, maður …

Chelsea – Liverpool 2-0

Posted on by

Vegna erfiðleika með internetið heima hjá mér þá náði ég eingöngu seinni hálfleiknum á þessum leik en á endanum hafðist þetta .

Byrjum á byrjunarliðinu:

Reina

Johnson – Carragher – Skrtel – Insua

Lucas – Mascherano
Kuyt – Gerrard – Riera

Torres

Á bekknum: Cavalieri, Agger, Aurelio (83 mín f. Insúa), Kyrgiakos, Benayoun (67 mín f. Riera), Babel (76 mín. f. Lucas), Ngog.

Mér fannst þetta vera jafnleikur þar sem bæði lið gátu unnið en þrátt fyrir góðar tilraunir tókst okkur ekki að skora markið sem skipti máli. Hins vegar komst Chelsea yfir með góðu marki frá Anelka á 60 mínútu. Það kom eftir góða fyrirgjöf frá Drogba og vel klárað hjá Anelka.

Ég get ekki sagt að þetta tap hafi komið mér mikið á óvart þar sem þeir eru með frábært fótboltalið og það þarf allt að ganga upp til þess hægt sé að vinna þá á útivelli.

Ég var svona að sætta við mig 0-1 tap þegar Drogba fíflaði Carragher og lagði upp mark fyrir Malouda á 91 mínútu. Algjör óþarfi en kannski svolítið lýsandi fyrir stöðu okkar í dag þegar Drobga tekur Carragher á og hefur betur.

Eins og áður sagði þá náði ég ekki fyrri hálfleiknum og get því ekki tjáð mig um hann en geri ráð fyrir því að einhver ykkar geri honum greinargóð skil í kommentunum. Hérna er linkur á umfjöllun BBC Sport um leikinn.

Við fengum fín færi í þessum leik og áttu oft góða kafla en allt kom fyrir ekki þar sem Cech var í fantaformi í markinu og heilt yfir þá var Chelsea betri aðilinn að mínu mati. Með þessu tapi erum við áfram í 5.sæti og væntanlega dettum við eitthvað neðar þegar liðin í kringum okkur eru búin að spila. Chelsea fór hins vegar á toppinn.

Ég nenni einfaldlega ekki að hafa þetta mikið lengra um þennan leik…

Næst þegar við mætum Chelsea þá legg ég til að EÖE skrifi leikskýrsluna!

Chelsea á morgun

Posted on by

Þá er komið að því.

Fyrsti leikurinn gegn einu “big four” liðinu þetta leiktímabilið, Rúbluelskararnir í Chelsea FC á Brúnni sunnudaginn 4.október klukkan 15:00.

Sá leikur kemur í kjölfar dapurrar frammistöðu okkar drengja í Meistaradeildinni, þar sem manni skilst að Rafa karlinn hafi misst sig hressilega á drengina sína í hálfleik, hressar en þeir hafa áður séð. Stór munur var milli hálfleikja þar og vonandi hafa menn áttað sig á því hvað þarf að leggja á sig til að ná ásættanlegum úrslitum!

Fyrst að liðinu. Í dag eru tvö spurningamerki varðandi leikmenn og meiðsli. Mascherano hefur náð að æfa í lok þessarar viku og Agger lék í tæpar 70 mínútur í varaliðsleik á þriðjudagskvöldið. En rennum okkur af stað í þá hugmynd sem ég hef um liðsskipanina:

Reina

Johnson – Carragher – Skrtel – Aurelio

Gerrard – Mascherano
Benayoun – Kuyt – Riera

Torres

Á bekknum: Cavalieri – Agger – Lucas – Babel – Voronin – Spearing – Insua – Kyrgiakos.

Ég semsagt spái því að Rafa nýti reynslu Masch og Aurelio í viðureignina við blámennina og geymi Lucas og Insua í þessum leik, Agger verði á bekknum. Ef að Masch verður ekki tilbúinn í leikinn verður Lucas settur í hans stað á miðjunni.

Þessi lið mættust jú tvisvar í London í fyrra, fyrst unnum við 1-0 í deildinni með marki Xabi Alonso en í meistaradeildinni endaði stórkostlegur leikur með 4-4 jafntefli.

Leikur morgundagsins er auðvitað sá mikilvægasti í deildinni hingað til! Með sigri erum við komnir upp í allra hæstu hæðir og höfum náð að hrista allan pirring af okkur, jafntefli væru ekki alslæm úrslit og héldu okkur við toppinn, en tap er auðvitað ekki endir alls, en myndi vissulega setja okkur leiðinlega langt frá efstu liðunum.

Ég á mjög erfitt með að átta mig á því hvaða tilfinningu ég hef fyrir leiknum. Ég hef trú á okkar mönnum, en frammistaða liðsins í vikunni olli mér miklum vonbrigðum og setti smá efa í minn hug. Þó getur maður huggað sig við að Chelsea var heldur ekki að spila vel þá

Styrkleikar Chelsea liggja í miklum líkamlegum styrk og rútineruðum leik. Þeir eru afar öflugir í föstum leikatriðum og refsa grimmilega fyrir mistök sem varnarlið gera. Einhvernveginn hefur það alltaf hist þannig á að Drogba á sína bestu leiki gegn okkur, en við vonum að breyting verði á þeirri hefð á morgun!

Það sem ætti að verða okkar beittasta vopn liggur í hröðum sóknarleik. Þess vegna held ég að Gerrard verði settur neðar á miðjuna til að sækja boltann neðar á völlinn. Ég var að velta fyrir mér að setja Babel inní liðið af þessum ástæðum en ég held að svo verði ekki í svo stórum leik. Til þess hefur Babel ekki sýnt nóg.

Insua og Lucas hafa líka ekki mikinn líkamsstyrk eða hæð og þess vegna tel ég líkur á því að þeir detti út úr liðinu, enn frekar styrkir það að Riera verði hafður inni, því hann ætti að geta hjálpað vel til í föstu leikatriðunum gegn okkur.

Ég held að þetta liggi algerlega í okkar fótum. Við erum að mínu mati með sterkara lið en Chelsea, algerlega ef við eigum góðan dag, og þurfum því bara að ná okkar leik. Vissulega þurfum við að styrkja varnarleikinn okkar, sérstaklega í föstum leikatriðum og sækja hratt á líkamlega sterkt Chelsea lið. En það verður dagskipunin og ég er í dag bjartsýnnn.

3-2 sigur í svaka leik á brúnni, Torres, Gerrard og fyrsta mark Skrtel. Koma svo!

Agger byrjaður að spila

Posted on by

Jæja, er ekki ágætt að fá einhverjar gleðilegar fréttir hér efst á þessa síðu?

Daniel Agger spilaði í gær í 70 mínútur fyrir varaliðið. Að hans sögn gekk þetta allt vel og hann verður því vonandi í hópnum gegn Chelsea, þótt að það hljóti að teljast ólíklegt að hann verði í byrjunarliðinu þrátt fyrir erfiðleika í varnarleiknum að undanförnu.