Monthly Archives: July 2009

Alonso fer fram á sölu

Posted on by

Samkvæmt Liverpool Echo í dag hefur Xabi Alonso sent inn formlega beiðni um að vera settur á sölulista Liverpool í dag.

Þetta þýðir einfaldlega að það er ekki lengur raunhæfur möguleiki að halda Alonso hjá Liverpool eftir þetta sumar. Slíkt gæti gerst, þótt langsótt sé, en þá yrði Alonso líka frekar óánægður með að vera áfram og slíkt er aldrei gott. Guillem Balague skrifar um málið á vefsíðu sinni og segir að það hafi verið klúbburinn sem lak út fréttinni af beiðni Alonso og staðfesti hana svo í dag, á meðan fulltrúar Alonso neita enn að þessi beiðni hafi verið send inn. Það þýðir einfaldlega, eins og Balague bendir á, að Liverpool FC eru að reyna að flæma Real Madrid út með tilboð sem þeir geta tekið svo hægt sé að klára söluna á Alonso sem allra, allra fyrst. Því fyrr sem við seljum hann því fyrr er hægt að leggja allt kapp á að finna staðgengil.

Við fylgjumst með þessu máli hér á næstu dögum, verðum á fréttavaktinni eins og hver einasti Púllari þessa vikuna. Að mínu mati var salan á Arbeloa (eða yfirvofandi sala Dossena) ekki neitt sem gat ógnað titilbaráttu okkar manna á komandi tímabili þar sem hvorugur þeirra var lykilmaður og við erum þegar með Johnson í stað Arby. Að missa Alonso er hins vegar allt annað mál. Með hann í liðinu vitum við hvað Liverpool getur, án hans er skyndilega komin mikil óvissa um það hver kemur í staðinn. Geta liðsins á næsta tímabili ræðst af miklu leyti af því hver kemur í stað Xabi Alonso, það er nú bara einu sinni þannig.

Sjáum hvað gerist.

Tomkins um Real Madrid

Posted on by

Hér er nýtt blogg frá Paul Tomkins sem allir ættu að lesa: Two words for Real Madrid.

Ég myndi velja úr góða tilvitnun til að sannfæra fólk um að lesa þessa grein en hún er bara öll það góð, og eins og töluð út úr mínu hjarta, að ég ætla að sleppa því. Lesið hana ALLA. Hún er frábær og lýsir vel hvers vegna það ætti ekki nokkur heilvita manneskja að geta haldið með jafn sálarlausum sirkus og Real Madrid er.

Í alvöru. Ég get skilið það þegar ég hitti fólk sem segist halda með Manchester United, eða Juventus, eða Inter, eða Barcelona, eða einhverju evrópsku stórliði öðru en Liverpool. En þegar menn segjast halda með Real Madrid segi ég nær alltaf: „Í alvöru? Veistu EITTHVAÐ um Real Madrid?“ Mér finnst bara ótrúlegt að nokkur manneskja sem pælir aðeins í sínu vali geti ákveðið að halda með Real, að það sé lið sem gefi af sér þann sjarma að vilja styðja það.

Kannski er það bara ég.

Allavega, Arby er farinn til Real, þeir eru enn að reyna að keyra verðið á Alonso niður og Dossena er við það að fara til Napoli en heimtar víst of há laun fyrir þá. Og svo erum við víst að gera okkur líklega til að kaupa Alberto Aquilani frá Roma í stað Alonso ef/þegar hann fer. Meira af þessu öllu saman á næstu dögum, við reynum að fylgjast með framvindu mála. Mig grunar einhvern veginn að það verði komið lokasvar í þessa Alonso-umræðu áður en okkar menn mæta Espanyol í vináttuleik n.k. sunnudag.

Fréttir af leikmannamálum

Posted on by

Það eru nokkrar nýjar fréttir af leikmannamálum í dag:

Real Madrid halda áfram að þrýsta á Rafa Benítez að lækka uppsett verð á Xabi Alonso. Það virðist vera orðið nokkuð ljóst að Real ætla ekki að borga það verð sem Rafa vill fá fyrir hann núna og ætla að frekja sig niður í einhverja útsöluupphæð. Ég vona að Rafa haggist ekki – Xabi á langan samning eftir við okkur, virðist ekki vera neitt brjálaður í að fara þótt hann óski þess (hefur t.a.m. ekki viðurkennt að vilja fara og ekki óskað eftir sölu) og svo hafa Real-menn nánast játað að hann sé svo einstakur af miðjumanni að það sé erfitt að finna annan mann með hans eiginleika. Ég veit ekki hvað Real-menn voru að pæla með því, það er ekki beint gott viðskiptavit að játa að leikmaður sé einstakur og heimta svo að seljandinn lækki verðið.

Einn leikmaður virðist þó á leið til Real en Alvaro Arbeloa hefur viðurkennt að samningarnir séu að verða frágengnir. Hann sagði:

“At the moment I am focused on Liverpool but it is true that the deal is close to being completed. [..] I don’t know what the likelihood is in percentages, it’s a question more for the clubs. But, as I understand, it seems everything is going well and there is little left to resolve. It could all be sealed this week.”

Sem sagt, Arbeloa virðist vera í þann mund að ljúka farsælum tveimur og hálfum árum hjá okkur. Svo sem eðlilegt þar sem Glen Johnson er kominn í stöðuna hans, en ég viðurkenni fúslega að ég hefði viljað halda þeim báðum.

Að lokum, þá segir umboðsmaður Andrea Dossena að Liverpool hafi tekið tilboði frá Napoli í leikmanninn. Þannig að Dossena er líklegast einnig á leið til síns heima, eftir frekar stutta en viðburðaríka veru í Englandi. Ég veit ekki með ykkur en ég verð Dossena ævinlega þakklátur fyrir þetta mark. ;)

1-4!

Allavega, ég er nokkuð viss um að ef af sölunni á Alonso verður mun Rafa nota þann pening í að kaupa leikmann framar á vellinum, hvort sem er á miðju eða í sókn, en við verðum að spyrja okkur hvort það sé ekki þörf á að kaupa a.m.k. einn varnarmann ef bæði Dossena og Arbeloa fara. Fari þeir eigum við bara Johnson, Carra, Skrtel, Agger, Aurelio og Insúa til að fylla fjórar stöður, og svo óreynda menn eins og San Jose og Darby þar fyrir utan. Agger og Skrtel hafa báðir átt í erfiðleikum með meiðsli sl. ár og Aurelio er hæfileikarík meiðslahrúga þannig að það er alveg raunhæfur möguleiki, ef við styrkjum ekki varnarhópinn, að við gætum lent í að þurfa að nota kjúklinga á ögurstundu næsta vetur.

Sylvain Distin hefur verið nefndur og ef við fengjum einhvern eins og hann og svo kannski fjölhæfan bakvörð á la Heinze eða Ivanovic hjá Chelsea yrði ég aðeins rólegri. Eins og er, með yfirvofandi brottförum Dossena og Arbeloa, erum við frekar þunnskipaðir í vörninni að mínu mati.

Undirbúningurinn hingað til – uppfært.

Posted on by

Miðað við grófa talningu má segja að við lok Asíuferðarinnar sé undirbúningur Liverpool fyrir tímabilið u.þ.b. hálfnaður. Fjórir leikir að baki hjá aðalliðinu og tveir hjá XI liðinu sem er blanda vara- og unglingaliðanna auk einhverra mögulegra A-liðsmanna.

Ég hef náð að horfa á fimm þessara leikja og langaði að hlaupa snöggt yfir mína upplifun hingað til…

Continue reading →

Liverpool – Singapore

Posted on by

Jæja, fjórði æfingaleikur sumarsins fer fram nú í dag og er hann gegn landsliði Singapore á heimavelli þeirra. Leikurinn hefst kl. 11:00 og er sýndur á Stöð 2 Sport, LFC TV á netinu og fleiri stöðum.

Rafa stillir upp svipuðu liði og undanfarið, Spánverjarnir eru á bekknum en Mascherano byrjar. Liðið er svona: Cavalieri, Degen, Carragher, Agger, San Jose, Benayoun, Mascherano, Lucas, Babel, Ngog, Voronin.

Bekkurinn, þeir sem spila í seinni hálfleik, er þá eftirfarandi: Johnson, Plessis, Torres, Riera, Pacheco, Dossena, Gulacsi, Insua, Alonso, Kelly, Arbeloa, Kuyt, Reina, Spearing, Nemeth.

Verður fróðlegt að sjá liðið í dag.

Skrtel og El Zhar meiddir, sendir heim

Posted on by

Okkar menn gerðu sem sagt 1-1 jafntefli við tælenska landsliðið í Bangkok í gær (mörkin hér) í þriðja æfingaleik sumarsins og leika næst á sunnudaginn í Singapúr gegn heimamönnum þar. Það voru þó slæmar fréttir í seinni hálfleiknum í gær þegar bæði Nabil El Zhar og Martin Skrtel þurftu að fara af velli vegna meiðsla. Nú hefur komið á daginn að meiðsli þeirra beggja gætu verið slæm – Skrtel skaddaði hásin og El Zhar fór víst illa í hnénu, og er því talið næsta víst að þeir muni missa af byrjun tímabilsins. Þeir hafa báðir verið sendir heim frá Bangkok til að geta farið undir læknishendur og í rétta læknismeðferð sem fyrst.

El Zhar er augljóslega ekki svo mikill missir þar sem hann er ekki beint fastamaður í liðinu en það er mjög slæmt að missa Skrtel. Það varpar talsverðri óvissu á vörnina hjá okkur þar sem Agger hefur átt í brasi með að halda sér heilum líka og því er það skyndilega raunhæfur möguleiki að Carra gæti verið okkar eini heili miðvörður á einhverjum tímapunkti í haust. Það er því komin upp sú spurning hvort Rafa muni stökkva til á leikmannamarkaðnum og kaupa einhvern eins og t.d. Sylvain Distin. Ég væri allavega ögn rólegri ef við fengjum inn reynslubolta í fjórða kost eins og hefur verið undanfarin ár.

Annars er allt rólegt af fréttum. Fólk er enn að slúðra um Alonso – aðra stundina er hann við það að semja við Real en þá næstu neitar klúbburinn öllu. Þannig að við verðum að þola þann sirkus enn lengur, býst ég við.

Liverpool – Taíland

Posted on by

Ég á flug til Bangkok á morgun. Liverpool eru að spila í Bangkok í dag. Fyrir Liverpool aðdáanda, þá hlýtur þetta að vera eitt magnaðasta skipulagsklúður sem ég hef vitað um.

Allavegana, ég er ekki að horfa á leikinn, en þið getið spjallað um hann við þessa færslu.

Byrjunarliðið er svona: Cavalieri, Degen, Agger, Carragher, Insua, Kuyt, Babel, Lucas, Plessis, Ngog, Nemeth.

Á bekknum: Reina, Gulacsi, Johnson, San Jose, El Zhar, Pacheco, Torres, Riera, Dossena, Kelly, Skrtel, Arbeloa, Mascherano, Spearing, Voronin.

Yossi og Alonso eru víst eitthvað hnjaskaðir

Og svo biðst ég afsökunnar á slöppum uppfærslum á síðunni, sem orsakast af því að nokkrir okkar eru í fríi og svo hefur lítið verið til að skrifa um en Gerrard réttarhöldin, sem eru ekki ýkja spennandi að mínu mati.

Rapid Wien í kvöld

Posted on by

Jæja, þessi leikskýrsla hans Magga er búin að vera hér efst á síðunni í fjóra daga. Það er kannski til marks um fréttaleysi undanfarinna daga (fyrir utan eitthvað Xabi Alonso slúður).

Allavegana, æfingaleikur númer 2 er í kvöld – gegn Rapid Wien. Þetta er einnig síðasti leikur liðsins áður en það heldur til Austurlanda. Þá verður einmitt spennandi að sjá hvernig ferðahópurinn lítur út þar sem að margir hafa getið sér til um að Xabi Alonso muni ekki ferðast með liðinu. En allavegana, hérna geta menn rætt um leikinn. Samkvæmt Liverpool.is verður hann sýndur á Players fyrir þá sem eru á Höfðborgarsvæðinu.

St. Gallen – Liverpool = 0-0 (ft)

Posted on by

Klárlega fyrst og fremst æfing í leikkerfinu, fínn leikur þar sem heimaliðið fékk fleiri dauðafæri en Liverpool fleiri færi. Ég hefði nefnt 1-1 sem réttustu úrslitin.

Glen Johnson lék seinni hálfleikinn mjög vel í stöðu vinstri bakvarðar, ógnandi og flottur. Af ungumönnunum fannst mér Spearing flottur á miðjunni með Gerrard í 442, N’Gog líflegur í framherjastöðunni og Nemeth grimmur. Voronin duglegur. Pacheco var svo sá sem mest er hægt að spjalla um, sá er með sjálfstraustið í lagi, kannski of, en hann er kvikur og skemmtilegur að sjá. Sjáum örugglega meira af honum í æfingaleikjunum.

Þessi nöfn held ég eigi séns í vetur, Kelly, Ayala, Gulasci og San José eiga lengra í land. Degen virkaði fínn framávið en tæpur varnarlega.

En ágætis hlaup gegn nokkuð spræku St. Gallen liði.

Boltinn byrjar að rúlla!!!

Posted on by

lfc_sviss2

Mikið óskaplega var ég glaður að vakna í dag!

Sólin skein úti og ég næ að tana mig eitthvað aðeins meira. Kaffibollinn var góður og ég átti fínt með morgunkaffinu.

EN! Aðalmálið er að í kvöld get ég sest niður fyrir framan tölvuna mína og horft á uppáhaldsliðið mitt spila fótbolta í beinni, eftir tiltölulega stutta pásu frá því. Þetta undirbúningstímabil hefur ekki kallað á fjölda leikmannakaupa, og enn er ekki “almennileg” sala komin á pappír. Glen Johnson þekkir maður vel og því eru það aðrir leikmenn sem ég hlakka mest til að sjá.

Martin Kelly verður þar efstur á mínu blaði. Þessi stóri og sterki strákur hefur leikið vel með unglinga- og varaliðinu undanfarið ár og átti svo hug og hjörtu Huddersfieldaðdáenda á lánssamningi síðasta vor. Mikils er vænst af þessum strák, ég held að hann fái meiri séns en San José og Ayala, sem líka eru að berjast í hafsentinum.

Við þekkjum Glen Johnson, en annar hægri bakvörður er meira spurningamerki. Já mín kæru, Philip Degen er ómeiddur og hefur æft af krafti í júlí. Rafa átti nú eilítið erfitt með að svara Svisslendingunum um stöðu hans innan liðsins á blaðamannafundi gærdagsins þar sem hann fjallaði um undirbúninginn hingað til og leikinn í kvöld. En vonandi fáum við að sjá Degen, það er ljóst miðað við launin hans að Rafa hafði á honum trú í fyrrasumar og hver veit nema að hann verði bónusleikmaðurinn okkar í vetur. Ég held að hann fái séns á undan Darby í kvöld, en kannski líka í vinstri bakverði.

Auðvitað verð ég spenntur að sjá Jay Spearing. Hef mikla trú á þessum strák, tel hann eiga að fá möguleika í vetur með aðalliðinu og sannfærður um að hann verður hörkuspilari fyrir okkur í framtíðinni. Svo er það Krisztian Nemeth, ungverski senterinn sem talinn var hinn nýi Ian Rush. Meiðsli síðasta vetur fóru illa með hann, en vonandi nær hann heilum vetri núna. Satt að segja held ég að hans möguleiki sé að renna frá honum og hann þurfi að sýna sig verulega núna í sumar.

Svo er það taglið magnaða. Hann Andriy Voronin er kominn aftur og er nú “man on a mission”. Blaðamaður Lfc.tv tiltók sérstaklega frá Sviss í gær að kallinn liti afar vel út á æfingunum og kannski hefur Berlínardvölin skilað honum auknu sjálfstrausti og krafti. Ég allavega hlakka til að sjá hann aftur, var ekki glaður með hann alltaf, en held að hann gæti alveg orðið ágætur bakkupkostur fyrir Gerrard og Torres ásamt Benayoun og N’Gog.

Ég bý svo vel að eiga greiðsluaðgang að lfc.tv vefsíðunni og fæ því að sjá leikinn beint kl 18:00. Hins vegar er hægt að benda á að allir eiga nú aðgang að lfc.tv sjónvarpsstöðinni á netinu. Sjónvarpsstöðin sýnir leikinn frá kl. 20:00 í kvöld, og stöðin er líka á hliðarrás Stöð2Sport3 fyrir þá sem að greiða af enska boltanum yfir sumartímann.

Góða skemmtun í kvöld, gaman að leikirnir séu nú það sem við getum spjallað um!

Xabi vill fara

Posted on by

Jæja, þetta verður ekki mikið skýrara. Echo segja frá því að…

>XABI ALONSO has told Rafa Benitez he wants to quit Anfield and sign for Real Madrid – but Liverpool will not grant his wish unless the Spanish giants come up with a fee in the region of £35m.

>Alonso has stopped short of putting in an official written transfer request but he has made it clear to Benitez that his future lies in La Liga rather than the Premier League.

Marca höfðu sagt frá þessu á laugardaginn, en ég vildi ekki setja inn frétt frá þeim þar sem að þeir hafa verið þekktir sem málgagn Real Madrid og hafa verið óáreiðanlegir í þeirra málefnum hingað til.

Boltinn er því núna hjá Real Madrid, sem hafa ekki viljað borga þær 35 milljónir punda, sem að Liverpool hafa sett upp.

Þetta er auðvitað leiðinlegt mál, en það er erfitt að vera mjög bitur útí Xabi Alonso, sem hefur verið hjá okkur í fimm ár (bara Carra og Gerrard hafa verið lengur af núverandi hóp), unnið með okkur titla og átt marga frábæra leiki. Núna býðst honum tækifæri til að fara aftur til síns heimalands og spila með Real Madrid. Það er erfitt að reiðast honum slíkt.

Núna er bara að vona að Rafa standi harður á upphæðinni og að hann hafi einhverjar lausnir á miðjumálum okkar í erminni.

Rafa talar…

Posted on by

Nokkrir áhugaverðir punktar frá Rafa, sem að Sky hafa eftir honum.

Fyrst að Liverpool hafi hafnað nokkrum risa-tilboðum í Fernando Torres. Fínt mál.

Svo talar hann aðeins um Michael Owen og segist hafa skoðað það mál. Niðurstaðan hafi verið sú að Owen hefði aldrei orðið byrjunarliðsmaður og hann taldi að það myndi Owen ekki sætta sig við ári fyrir HM. Hann nefnir sérstaklega að þetta sé ólíkt Robbie Fowler endurkomunni, en Fowler gerði sér klárlega grein fyrir því að hann væri ekki hugsaður sem byrjunarliðsmaður hjá okkur.

Einnig virðist hann útiloka frekari kaup á framherjum og það er augljóst að hann sér fyrir sér áfram að spila með sömu taktík og meirihluta síðasta tímabils með Gerrard og Torres frammi. En einnig tekur hann fram að hann hafi mikið traust á Kuyt, Babel, NGog og Voronin. Nöfn Kuyt og N’Gog koma ekki á óvart, en það er athyglisvert að Rafa minnist sérstaklega á Babel og Voronin. Ég taldi það í lok síðasta tímabils að Babel myndi fara, en það var alveg ljóst að það hefði verið fyrir mikil afsláttarkjör eftir slakt síðasta tímabil. Það er vonandi að Babel taki þessu sem hvatningu og hann fari aftur að sýna okkur hvað við vorum svona spennt yfir fyrir rúmu ári.

Rafa mættur í vinnuna

Posted on by

Eftir ákaflega langt silly season líður manni nú betur að fá fréttir frá Anfield eftir að menn eru þar komnir til starfa. Reyndar eru Spánverjarnir ennþá í sumarfríi, þ.e. landsliðsmennirnir en á síðustu dögum er félagið allt að vakna á ný.

Ekki síst stjórinn okkar magnaði og mér finnst ekki úr vegi að við skoðum aðeins verkin hans nú síðustu daga.

Fyrst bárust manni góðar fréttir síðasta föstudag þegar tilkynnt var um endurkomu King Kenny til að starfa með Rafa að uppbyggingu Akademíunnar og sem sendiherra félagsins. Frábært skref og sýnir enn hversu ákveðinn Rafa er að ná árangri með ungu mennina í félaginu.

Þá kom að undirskriftum ungu mannanna Darby og Spearing og síðan á þriðjudag bættist nýr samningur fyrir Yossi Benayoun við góðu fréttirnar.

Á þriðjudaginn skoraði svo Rafa á sex unglinga sem nú fá að æfa með aðalliðinu um sinn að grípa gæsina sem væri að gefast og sýna honum hvað í þeim býr!

Karlinn var svo rólegur í gær en í dag tók hann vel til máls. Fyrst gladdist hann yfir nýjum samningi Gerrard og síðan fór hann á blaðamannafund sem snerist auðvitað fyrst og síðast um nýja manninn, Glen Johnson.

Auðvitað var gamli glaður að fá sinn mann til liðsins, Glen sýndi strax að hann vill vinna aðdáendurna yfir með því að segja réttu hlutina í sínu fyrsta viðtali sem Liverpoolmaður.

En svo tók Rafa til máls á ný og lýsti vanþóknun sinni á stöðu markaðarins þessa stundina. Tiltók m.a. ástæðu þess að Gareth Barry valdi City í stað Liverpool. Ekki það að manni hafi komið sú ástæða á óvart. Peningur. Ekkert annað.

Hann viðurkenndi líka að þær upphæðir sem væri verið að greiða þýddi það að Liverpool ætti erfiðara með að ná þeim árangri í leikmannamálum sem hann ætlaði sér! Enda ekki ólíklegt að núna þurfi t.d. að greiða 35 milljónir punda fyrir David Silva í stað 15 sem rætt var um í vor!

En svo kom málið. Rafa sýndi hver ræður þegar hann sagðist vera algerlega rólegur yfir Xabi og Masch. Þessir ágætu menn skulduðu félaginu það að standa sig vel, Liverpool hafi byggt feril þeirra upp og félagið og aðdáendur þess ættu það einfaldlega skilið að þeir sýndu virðingu. Þeir væru á löngum samningum og því ekki nokkur ástæða til að reikna með öðru en að þeir verði báðir alrauðir áfram.

Mér finnst klárt á undanförnum dögum að allt annað yfirbragð er á Rafa, og í raun félaginu. Það er ljóst að hann nýtur trausts og hann er sá sem ræður.

Enginn annar. Það líkar mér við. Rafa er “in the house” og sýnir hvað í honum býr!

Aurelio meiddur, Johnson mættur og fleira

Posted on by

Ja hérna. Ég sá þessar fréttir í óstaðfestu slúðri í júní en hélt þetta bara hlyti að vera lygi. Svo virðist samt ekki vera; Fabio Aurelio meiddist á hné í leik með börnunum sínum útí garði heima í Brasilíu í sumarfríinu og gæti verið frá í einhverja 3-6 mánuði. Skv. fregnum er Rafa nú að endurskoða það hvort hann geti leyft sér að selja Andrea Dossena ef Aurelio verður frá fram að áramótum, en þó kemur á móti að Emiliano Insúa var kominn fram fyrir Ítalann í goggunarröðinni sl. vetur og svo vorum við að kaupa 18 ára franskan bakvörð, Chris Mavinga, frá PSG, þannig að kannski mun Rafa bara treysta á þá (og Daniel Agger, mögulega) og selja Dossena bara samt. Sá ítalski er allavega búinn að missa treyjunúmerið sitt í hendurnar á nýjasta leikmanni okkar …

Glen Johnson verður kynntur formlega á morgun en í dag mætti hann ásamt hinum enska landsliðsmanninum, Steven Gerrard, í rannsóknir og slíkt. Við það tækifæri voru teknar nokkrar myndir sem m.a. staðfesta að Johnson er okkar nr. 2 á næstkomandi tímabili, og er Dossena því án treyjunúmers að svo stöddu. Lesi hver það sem hann vill út úr þeirri stöðu mála. Það er allavega hressandi að sjá Johnson í rauðri treyju.

Að lokum, þá þarf Jorge Valdano að læra að þegja. Maðurinn sem í fyrra lýsti knattspyrnu Liverpool sem „skítur á priki“ tímir ekki að borga uppsett verð fyrir Xabi Alonso og ætlast svo til að Rafa Benítez lækki verðið á kappanum, sem á fjögur ár eftir af samningi sínum við Liverpool og virðist allavega ekki vera neitt desperate að yfirgefa klúbbinn, bara ef hann vælir nógu mikið? Real-menn, sem hafa eytt 150m+ punda í fjóra leikmenn í sumar en þykjast svo ekki vilja borga yfir markaðsverði fyrir þann Spánverja sem flestir aðdáendur Real vildu sjá koma fyrir sumarið? Og eru skyndilega svo blankir að þeir geta ekki borgað 5m punda fyrir Alvaro Arbeloa, sem var búinn að samþykkja félagaskiptin og bíður því núna í algjöru limbói eftir að Real hætti að reyna að ríða Rafa í rassgatið?

Plís. Þegiði. Ef þið ætlið ekki að borga skuluð þið bara hypja ykkur, og í gvöðanna bænum HÆTTIÐ AÐ TALA!

Yossi fagnar nýjum samningi með því að fara í klippingu

Posted on by

Yossi Benayoun, sem að var einn okkar besti leikmaður á síðasta tímabili hefur skrifað undir tveggja ára framlengingu á samningnum sínum við Liverpool. Núna er hann samningsbundinn til ársins 2013.

yossiandrafa1

Ég verð nú að segja að Yossi hefur sjaldan litið jafn vel út og á þessari mynd, sem var tekin á æfingasvæðinu í gær.

Það voru einhverjir blaðamenn að rembast við að skrifa sögur um að Yossi væri á leiðinni til annara liða í sumar, en það var auðvitað fráleitt að það myndi gerast, enda er hann gríðarlega mikilvægur fyrir þetta lið. Hann kemst eflaust ekki inní okkar besta byrjunarlið, en það eru fáir leikmenn betri í að koma með aukinn kraft inní liðið.

Leikjaplanið framundan

Posted on by

Ég er kominn með dauðleið á Owen og vill helst sem minnst heyra á hann minnst í framtíðinni.

En þó að leiktíðinni sé í raun bara nýlokið þá eru bara 10 dagar í fyrsta æfingaleikinn sem verður í Sviss. Því datt mér í huga að henda þessu hérna inn þó ekki væri nema til að þið getið farið að skipuleggja og skanna staði til að glápa á þessa leiki á í útilegunni eða hvar svo sem þið verðið niðurkomin.

  • 15. júlí: St Gallen – úti – kl. 19:00
  • 19. júlí: Rapid Vín – úti – kl. 18:15
  • 22. júlí: Tæland – úti – kl. 14:00
  • 26. júlí: Singapúr – úti – kl. 12:00
  • 2. ágúst: Espanyol – úti – kl. 20:00
  • 5. ágúst: FC Lyn – úti – kl. 18:00
  • 8. ágúst: Atletico Madrid – heima – kl. 15:00

Þetta er nokkuð klassískt hjá okkar mönnum, ekki í fyrsta skipti í Sviss, Tæland og Singapúr til að selja búninga, fyrrum klúbbar Riera og Torres og svo ein ferð til Noregs. Í millitíðinni væri alveg ágætt að fá eins og 1-2 leikmenn til klúbbsins til viðbótar ;)

King Kenny

Posted on by

Ég vann einu sinni á hóteli í Englandi með gaur frá Liverpool sem heitir Owen. Hann var dópisti og grjótharður Everton aðdáandi. Það er eini Owen sem ég man eftir í augnablikinu………

Kenny

Einbeiti mér frekar að því sem skiptir máli og er jákvætt fyrir Liverpool, King Kenny er kominn formlega í staffið

Það getur ekki annað en talist jákvætt.

Owen til Man Utd? HA?!?

Posted on by

Samkvæmt áreiðanlegum fréttum í flestum stóru blöðum Englands í kvöld Eru Manchester United við það að semja við Michael Owen á frjálsri sölu fyrir næsta tímabil.

Lesið þetta aftur: Michael Owen er að ganga til liðs við Manchester United!

Ókei, ókei, reynum að fara aðeins yfir þetta á rökréttan hátt. Í fyrsta lagi, þá mun væntanlega gjósa upp reiði Liverpool-stuðningsmanna í garð Owen. Með réttu, það skrifar enginn heilvita Púllari undir samning við erkifjendurna. Það er alveg ljóst í mínum huga að ef þetta verður að veruleika er Owen búinn að missa sinn sess sem ein af goðsögnum Liverpool-sögunnar og verður meira eins og svarti sauðurinn þegar farið er yfir sögu klúbbsins. Hins vegar verðum við að gefa honum það að það kemur alls staðar fram að Liverpool hafa ENGAN áhuga á að fá Owen til sín í sumar. Hann er því í þeirri stöðu að þurfa að vinna sig upp í áliti ensks almennings, vinna sig inn í landsliðshópinn fyrir HM á næsta ári og reyna að ljúka ferlinum með glæsibrag og fyrst Liverpool eru pottþétt út úr myndinni (að frumkvæði Benitez, greinilega), getum við þá verið reið út í hann fyrir að velja lið sem er alltaf að berjast um titla og getur boðið honum Meistaradeildarbolta? Ég held varla.

Í öðru lagi, þá eru samningsmálin langt því frá frágengin. Owen þarf nefnilega að gangast undir ítarlega læknisskoðun hjá United á morgun áður en þeir samþykkja að semja við hann. Við skulum vona að eitthvað af þessum þrálátu meiðslum hans bjargi honum frá því að eyðileggja orðspor sitt réttu megin við hraðbrautina á milli Liverpool og Manchester.

Í þriðja lagi, að ofantöldu fráskildu, þá er Michael Owen við það að gerast leikmaður Manchester United. Ég gæti ælt.

Í öðrum slúðurfréttum í dag er það helst að Barca eru víst að undirbúa tilboð í Mascherano og Benítez hefur augastað á Gaetano D’Agostino hjá Udinese til að koma í hans stað. Þetta er allt slúður og við fylgjumst með því öllu betur næstu daga, en morgundagurinn fer væntanlega í að bíða frétta af þessari blessuðu læknisskoðun. Ég trúi þessu ekki fyrr en ég sé það gerast, og jafnvel ekki einu sinni þá.

Ég meina, ekki einu sinni United-aðdáendur vilja að þetta gerist …

Miðvörður?

Posted on by

Eftir að Sami Hyypia ákvað að söðla um og fara til Þýskalands var ljóst að Rafa þarf að finna back-up í miðvarðarstöðuna með þeim Carragher, Agger og Skrtel. Meiðsla saga Agger er eitthvað sem allir þekkja sem og Carragher verður ekkert yngri. Ég hef ekki mikla trú á því að Rafa muni eyða stórum upphæðum í miðvörð en hins vegar er ljóst að sá miðvörður sem hann tekur þarf að vera tilbúinn að spila í aðalliðinu og þess vegna tel ég ólíklegt að sá leikmaður verði ungur og óreyndur.

Þar sem ég var að skoða netið í dag rak ég augun í að Íslandsvinurinn Sol Campbell er með lausan samning hjá Portsmouth og hefur hug á því að fara frá félaginu.

Gæti hann verið góð lausn í 1-2 ár sem back up fyrir þá sem fyrir eru?

Tveir ungir kveðja

Posted on by

Í morgun var staðfest frétt sem hefur verið á leiðinni síðustu daga, sú að Sebastian Leto hefur verið seldur til Panathinaikos í Grikklandi.

Sú sala bætist svo við það sem tilkynnt var í gær um að vængmaðurinn ungi, Paul Anderson hafi verið seldur til Nottingham Forest.

Í báðum tilvikum eru kaupverðin “undisclosed” en á netmiðlum hefur verið talað um að Panthinaikos hafi greitt 3 milljónir punda fyrir Leto og kaupverð Anderson er nú sagt 250 þúsund pund, en áður hefur verið rætt um hærri upphæð.

Þessar sölur eru báðar eitthvað sem reikna mátti með. Leto karlinn átt í vanda með að fá leikheimild í Englandi og ljóst að Rafa treystir Anderson ekki til að leika með aðalliðinu. Þarna vonandi bættist bara í peningakistuna sem við eigum til að eyða uppúr á næstu dögum í menn sem eru tilbúnir í byrjunarlið.

Báðum þessum drengjum óskum við velfarnaðar, ég er ekki frá því að þeir nái báðir nokkuð langt í boltanum, þó ekki hafi þeir náð árangri á Anfield Road.