Bara af því að það er svoleiðis ekkert að frétta þá er hér smá útúrdúr.

Ég var spurður að því í boltaspjalli um daginn hvaða leikmannasölu Rafa síðustu fimm árin ég hefði verið ósammála. Ég hafði aldrei hugsað virkilega út í það og svarið var það að þegar ég íhugaði þetta vandlega var ég sammála nær öllum þeim leikmannasölum sem Rafa hefur framkvæmt. Eitt nafn kom þó strax upp í hugann …

Milan Baros. Hann er 27 ára og var að ljúka leiktíð þar sem hann skoraði 20 mörk í 31 leik með Galatasaray. Ég veit við seldum hann á sínum tíma af því að hann vildi vera fastamaður í byrjunarliði og Aston Villa buðu fáránlega upphæð í hann (10+m ef ég man rétt) en mikið afskaplega var ég svekktur þegar hann fór. Ég held að ef Baros hefði haldið haus gæti hann hafa verið lykilmaður hjá Liverpool síðustu árin. Allavega á ég erfitt með að sannfæra sjálfan mig um að hann hefði ekki getað sinnt sömu stöðu og Dirk Kuyt, jafnvel betur ef eitthvað er.

Þetta var annars bara innistæðulaus pæling. Þegar maður horfir á okkar menn láta sig dreyma um að fá Tévez í sumar spyr maður sig: hversu miklir fjármunir hefðu getað sparast með því að halda Baros hjá Liverpool?

Hvað með ykkur? Áttum við aldrei að selja Baros, eða var Kromkamp demantur sem við misstum af? Hvaða leikmannasölu(m) Rafa hafið þið verið ósammála, ef einhverjum?