Nú er ansi hreint stutt eftir af þessu tímabili og ég ætla að láta það bíða aðeins að meta það í heild sinni. Það er c.a. vika í það að leikmannamál fara á fullt hjá liðunum og flest eru nú þegar að lista upp möguleg leikmannakaup. Að vanda verður vel fylgst með þeim málum hér á kop.is og munum við lista upp hugsanlegum leikmannakaupum fljótlega. En hverjir verða látnir fara? Það er mikið talað um það þessa dagana að til að Rafa fái að kaupa eitthvað að ráði, þá þurfi hann að losa sig við leikmenn. Hérna kemur upptalning á þessum aðilum og er hún gerð bæði eftir mati pistlahöfundar og eins ábyggilegum fréttum.

Jack Hobbs: Hann hefur nú þegar verið seldur og koma samtals 1,5 milljónir punda í kassann fyrir kappann.

Paul Andersson: Það er víst búið að samþykkja tilboð upp á 1 milljón punda í hann frá Swansea, en búast má við að fleiri félög blandi sér í baráttuna um hann og kannski fáum við örlítið meira út úr honum. Ég held þó að það sé öruggt að ferill hans sé á enda hjá Liverpool (ekki mikill ferill þó).

Jermaine Pennant: Pennant verður samningslaus í sumar og fer því frítt frá liðinu. Hann verður eflaust ekkert í vandræðum með að finna sér lið, enda alveg ágætur leikmaður, þrátt fyrir að vera númeri of lítill fyrir Liverpool. Hann er búinn að vera á fínum samningi og því losnar pláss fyrir launagreiðslur til handa nýjum leikmanni þó ekkert fáist beint fyrir kappann.

Sami Hyypia: Við kveðjum þennan mikla snilling í sumar og það með talsverðum trega. Frábær leikmaður, frábær náungi og vonandi kemur hann tilbaka sem þjálfari þegar hann verður klár í það. Hann er samningslaus og fer því frítt. Það losnar þó talsvert pláss í launapakka hjá félaginu.

Andriy Voronin: Voronin náði að sýna sig og sanna í Þýskalandi í vetur og sem betur fer fyrir okkur þá hefur verðmiðinn á honum náð að hækka. Ég reikna með að við fáum einhverjar 5 milljónir punda fyrir kappann, því ég tel ekki líkur á að hann snúi tilbaka á Anfield.

Charles Itandje: Þessi kappi spilaði rassinn úr buxunum á minningarathöfninni um Hillsborough um daginn og þar með er leiðin greið fyrir hann frá félaginu. Hann neitaði að ganga til liðs við Galatasaray síðasta sumar sem hefði skilað okkur 2,5 milljónum punda og var það slæmt. Ég reikna með honum til Frakklands mjög fljótlega og við fáum minna fyrir hann eða um 1,5 milljónir punda.

Sebastian Leto: Þetta er mjög efnilegur kappi en enn hefur ekki tekist að redda atvinnuleyfi fyrir hann til að hann geti spilað á Englandi. Væntanlega verður ein tilraun enn gerð varðandi það, en ef það tekst ekki þá finnst mér líklegt að hann verði seldur. Það skortir ekki áhugasöm lið og við getum alveg reiknað með 4-5 milljónum punda fyrir hann, enda spilað vel hjá Olympiakos í vetur þrátt fyrir að hafa lent upp á kant við þjálfarann þar. Mig minnir samt að lánssamningur hans hafi hljóðað upp á að hægt væri að framlengja honum um eitt ár í viðbót ef allir aðilar væru sáttir.

Andrea Dossena: Með góðri innkomu Insúa í vetur, þá hefur vera Dossena hjá okkur komist í uppnám ef hægt er að nota það orðalag. Það er vitað af áhuga stóru liðanna á Ítalíu á honum og því finnst mér ekkert ólíklegt að ef gott boð bærist, þá yrði hann látinn fara. Ég reikna þó ekki með því að hann verði látinn fara nema fyrir lágmark 7 milljónir punda, enda hann búinn að festa sig í sessi í ítalska landsliðinu í vetur.

Ryan Babel: Ég vil halda Babel áfram hjá okkur og hef eiginlega litla trú á því að hann verði seldur.

Nabil El Zhar: Þessi strákur er ekkert svo ungur lengur og ég sé alveg fyrir mér að hann gæti horfið á braut í sumar. Miðað við að hann er búinn að spila nokkra leiki fyrir okkur þá gæti ég ímyndað mér að við fengjum einhverjar 2,5 milljónir punda fyrir kappann. Í sjálfu sér væri ég heldur ekkert svekktur þó hann yrði áfram.

Xabi Alonso: Úff. Þetta er einfalt. ÉG VIL EKKI AÐ XABI VERÐI SELDUR. Hann er búinn að vera algjörlega frábær á tímabilinu og það eina sem ég sé í stöðunni og gæti gert það að verkum að hann yrði seldur, væri ef Real Madrid kæmi bankandi á dyrnar með troðfullt seðlaveski, þá er ég að tala um boð yfir 20 milljónum punda. En ég segi nei takk og vonandi Rafa líka.

Albert Riera: Það hefur verið talsvert skrafað um að Albert verði seldur, en ég hef enga trú á því. Hann er á sínu fyrsta tímabili og hefur ekki staðið sig neitt illa, þótt stöðugleikann hafi vantað. Ég held að Rafa gefi honum lengri tíma til að fóta sig betur á Englandi.

Lucas Leiva: Ég hef enga trú á að Rafa láti hann fara. Hann hefur tröllatrú á drengnum og hann er ennþá ungur og er að læra. Ég vil halda Lucas áfram því ég tel hann eiga bjarta framtíð fyrir sér.

Yossi Benayoun: Ekki séns, við fáum engar svaðalegar upphæðir fyrir hann ef hann yrði seldur og hann er miklu dýrmætari fyrir okkur með því að klára leiki og spila eins og hann hefur spilað á þessu ári.

Adam Hammill: Ég efast um að hann verði lánaður út enn eitt árið og ég reikna alveg með því að við fáum eins og eina milljón punda í kassann fyrir hann og eitt af fjölmörgum áhugasömum liðum versli hann til sín.

Godwin Antwi: Það hefur verið mikil eftirspurn eftir honum á Spáni og ég á alveg eins von á því að hann hverfi á braut, enda ekki tekið þeim framförum sem vonast var eftir. Hálf milljón punda í kassann þar.

Philipp Degen: Hroðalegt tímabil að baki hjá kall greyinu þegar kemur að meiðslum og ég hef ekki nokkra trú á því að hann verði látinn fara núna, enda þyrftum við að kaupa upp samninginn hans með ærnum tilkostnaði og eflaust fá lið tilbúinn að taka séns á honum eftir meiðslin í vetur. Hann fær eflaust tækifæri til að koma sér í stand og sýna hvað í honum býr.

Einhverjir guttar munu svo fara þar sem samningar þeirra verða ekki endurnýjaðir, en á þessari upptalningu sést að það er hægt að skrapa inn peninga hér og þar án þess að hreyfa mikið við hópnum sem skilaði okkur 2 sætinu á þessu tímabili (hljótum að halda því sæti). Persónulega vil ég halda þeim Xabi, Babel, Degen, Lucas, Riera og jafnvel Dossena (held það búi mun meira í honum), selja þessa útláns menn og bæta við hópinn sem fyrir er.