Þá er komið að því, síðasta upphitun þessa tímabils. Ég ætla að reyna að halda mig fjarri því í lengstu lög að gera upp tímabilið sem slíkt, það koma aðrir pistlar eftir þennan leik sem munu sjá um þann pakka. Engu að síður þá er erfitt að horfa ekki smá tilbaka og sú ósk sem ég hafði fyrir tímabilið, rættist algjörlega. Ég vildi vera í baráttunni um titilinn fram í apríl/maí, ekki út úr henni í desember/janúar eins og svo oft áður. Keppinautar tryggðu sér ekki titilinn fyrr en í næst síðustu umferðinni og það eftir að hafa ekki tapað leik lengi. Liverpool liðið hefur svo einnig verið algjörlega frábært síðustu 2-3 mánuðina, algjörlega frábært. Þetta er skemmtilegasta Liverpool lið sem ég hef séð síðan þeir Barnes, Beardsley, Aldridge, Rush, Houghton og félagar voru upp á sitt besta í kringum 1987-1988. Það að vera komnir með 83 stig og eiga möguleika á 86 stigum, segir bara sitt um framför liðsins og það hefur ekki gerst afar lengi að lið nái að vinna titilinn án þess að hafa náð 2. sætinu áður.

Á morgun er svo stór dagur fyrir utan sjálfan leikinn. Hinn stórbrotni varnarmaður, Sami Hyypia, er að leika sinn síðasta leik fyrir Liverpool FC. Það er óhætt að segja að kletturinn frá Finnlandi sé orðinn algjör goðsögn á Anfield. Hann kom til liðsins þegar við höfðum ekki átt alvöru miðvörð í fjölda ára, kom algjörlega óþekktur og hefur spilað eins og engill síðan. Þar fyrir utan er hann sannur atvinnumaður og frábær persónuleiki. Sami verður saknað, en ég er ákaflega sáttur við það að hann geti framlengt feril sinn aðeins og að hann sé ekki að fara í eitthvað skítalið á Englandi og komi sem andstæðingur okkar á Anfield. Sami, þú ert hreinræktaður snillingur og þú munt svo sannarlega fá alvöru kveðju frá stuðningsmönnum Liverpool á Anfield á morgun (hvet menn til að með Kop stúkunni fyrir leik).

En það er annar maður sem er að fara að heimsækja Anfield á morgun, sem átti AÐEINS styttri feril með Liverpool FC. Robbie Keane er að snúa tilbaka eftir að hafa spilað aðeins hálft tímabil með Liverpool. Í mínum verstu martröðum var maður búinn að sjá fyrir sér að allt gæti orðið í járnum um titilinn þegar kæmi að lokaumferðinni og umræddur Keane myndi tryggja mótherjum okkar titilinn með marki. En við þurfum ekki að hafa áhyggjur af því, allavega hvað titilinn varðar. Ég vona þó að Robbie fái hlýjar móttökur eins og aðrir fyrrverandi leikmenn sem koma til Mekka fótboltans.

Annars er þetta Tottenham lið líklegast best mannaða “næstumþvílið” sem um getur. Þeir hafa eytt á við stóru klúbbana í mörg ár, en hafa aldrei virkilega náð að sýna það að þeir eigi heima á meðal þeirra. En þetta “næstumþvílið” er það eina sem gæti náð fullu húsi stiga á móti okkur eftir ránið á White Hart Lane fyrr á tímabilinu. Það ætti að vera nóg fyrir Rafa að rifja upp þann leik fyrir leikmönnum, meiri mótiveringu ætti ekki að þurfa. Sýna þeim núna hvar Dabbi keypti öllarann og enda þetta á góðum nótum, varla viljum við kveðja Sami með tapi? Nei takk. Það vantar jaxlinn á miðjuna hjá Tottenham, Palacios, og Huddlestone er meiddur. Ég veit ekki af meiri meiðslum hjá þeim og því þeir með nánast sitt sterkasta lið. Robbie Keane og Defoe munu eflaust leiða framlínuna og ég treysti því að Sami stígi þá út úr leiknum með sínum gallharða félaga Carra. Ég ætla ekki að eyða fleiri orðum í Tottenham, ef Liverpool liðið spilar sinn leik eins og þeir hafa gert síðustu mánuði, þá er alveg gjörsamlega sama hvernig Spurs stillir upp sínu liði, við tökum þá. Það eina sem í þessu er, er að Spurs eru að berjast um Evrópusæti, en Liverpool eru að kveðja Hyypia og reyna að halda 2 sætinu í deildinni. Það ætti engu að síður að vera næg hvatning fyrir okkar menn.

Þá að því sem máli skiptir, uppstillingu Rafa Benítez. Ég á eiginlega í erfiðleikum með að ákveða uppstillinguna ef ég á að segja alveg eins og er. Ég er pottþéttur á því að Reina byrjar í markinu og að Sami verði í miðverðinum. Rafa gæti alveg tekið upp á því að setja Carra í bakvörðinn og Skrtel/Agger í miðvörðinn. Ég ætla þó að tippa á að Arbeloa verði hægra megin og Carra í miðverðinum með Sami. Vinstra megin ætla ég svo að tippa á að Insúa haldi sæti sínu. Á miðjunni verða svo Xabi og Javier, með Kuyt hægra megin á kantinum. Svo kemur vandræðastaða. Verður það Riera? Babel? Aurelio? Benayoun? Ég ætla að tippa á að það verði Benayoun sem byrji þennan leik, bara vegna fyrri frammistaðna. Stevie verður síðan í holunni og Nando frammi. Eitthvað segir mér þó að það verði eitthvað surprise í gangi þegar við sjáum liðin á morgun. Ég myndi ekkert missa andlitið þó bæði eða annar hvor af Degen og Dossena myndi rölta inn með byrjunarliðinu.

Bekkurinn: Cavalieri, Agger, Aurelio, Lucas, Riera, Babel og Ngog

Hvernig væri bara að enda með 86 stig takk? Hef fulla trú á því að við klárum þetta og fögnum vel og lengi besta tímabili okkar í deildinni í tæp 20 ár. Ég reikna með því að við vinnum 2-0 sigur og að Pepe tryggi sér þar með gullhanskann enn á ný með því að jafna ákveðinn markvörð í að halda hreinu yfir tímabilið. Fyrirliðinn fer fyrir sínum mönnum og svo kemur Fernando og klárar tímabilið með marki.

Ég vil þakka öllum lesendum síðuna samveruna á tímabilinu, en þrátt fyrir að þetta sé síðasti leikurinn, þá er ekkert frí framundan hérna á Kop.is, við munum halda áfram að ræpa út úr okkur pistlum og hugðarefnum í allt sumar.

Ég vil svo að lokum nota orð Kristjáns Atla og óska ykkur gleðilegs St. Hyypia Day á morgun.

YNWA

Þá er það víst orðið ljóst að ekki verður af þeim draum okkar að lyfta bikar þetta árið á Anfield Road, ekki það að vonin hafi verið mikil í morgun en samt er tilfinningin súr.

Hins vegar óskum við auðvitað sigurvegurunum til hamingju með gullið og treystum því að þeir fái að hafa duglega fyrir því á næsta tímabili.

Fyrst er auðvitað að klára okkar mál og ná besta árangri félagsins í 38 leikja deild, þ.e. stigalega eftir að þriggja stiga reglan var tekin upp. Til að það takist þurfum við minnst þrjú stig út úr þeim tveimur leikjum sem eftir eru, auk þess sem við ætlum okkur auðvitað annað sætið í deildinni, sem ég held að sé sterkt sálrænt gagnvart Chelseamönnum.

Á morgun mætum við neðsta liðinu í deildinni, WBA. Borðleggjandi sigur…. Eða hvað?

Ég viðurkenni að mér fannst hundfúlt að umferðin var ekki öll spiluð í dag, því þá hefði maður séð enn meira af því hvaða sigurvegarakarakter liðið okkar geymir. En í staðinn verður gaman að sjá hvernig þeir bregðast við þeim vonbrigðum að sjá fagnaðarlæti dagsins og hvaða karakter býr í þeim að standa undir kröfum stjórans um annað sætið og stigin 86 sem við eygjum.

Ég held að Rafa haldi sig við alvöru byrjunarlið í þessum tveimur leikjum og reyni að minnka stigamuninn í United eins mikið og hann getur. Eina sem maður ekki veit alveg er standið á Torres, en ég held að hann verði með og liðið verði svona.

Ef Torres verður ekki heill verður Kuyt í senter og Benayoun á kantinum. Ég held að Rafa vilji nota tækifærið í þessum leik og láta Skrtel og Agger spila saman, nokkuð sem ég er sannfærður um að við sjáum oftar á næstu árum. Auðvitað er ég pínulítið að leggja til við hr. Benitez en ég held það samt.

Held svo að við sjáum óvanaleg nöfn á bekknum, t.d. Spearing eða Darby. Ef vel gengur fáum við að sjá þá í einhverjar mínútur.

Leikurinn er lykilleikur fyrir heimamenn, allt annað en sigur mun væntanlega þýða fall, svo þeir munu selja sig dýrt. Lið WBA hefur reynt að fara í gegnum deildina með því að spila góðan fótbolta, en hefur ekki náð þeim árangri sem þeir vonuðust eftir. Markvarsla og vörn hefur svikið þá í mörgum leikjum, en ágæt frammistaða að undanförnu hefur gefið þeim smá von.

En ég er sannfærður um að sú von verður úti að loknum leik á morgun. Við einfaldlega eigum að vera of sterkir til að tapa þarna stigum og mín spá er að strongvið vinnum 1-3/strong og gott sem tryggjum okkur annað sætið í deildinni og sendum heimamenn um leið niður í Championshipdeildina.

Ég vil biðja lesendur síðunnar velvirðingar á því hve seint upphitunin kemur inn þetta skiptið, en þar sem SSteinn virðist vera einn örfárra Íslendinga sem kann ekki að lesa veðurspá og er því nánast veðurtepptur á leið til Akureyrar í þessum töluðum orðum verð ég að fylla í skarðið og hnoða í eins og eina spá fyrir morgundaginn.

Okkar menn heimsækja West Ham United, lið Björgúlfs Guðmundssonar banka- og útrásarvíkings, á morgun og það er bara eitt sem kemur til greina: sigur. Náist sigurinn ekki tel ég nokkuð ljóst að Manchester United eigi titilinn í deildinni vísan hvort sem þeir vinna gegn Man City á sunnudag eða ekki. En á morgun geta okkar menn tyllt sér á toppinn í allavega sólarhring og haldið uppi pressunni á United, jafnvel þótt það reynist bara vera frestun á hinu óumflýjanlega. En á meðan möguleikinn er fyrir hendi verða okkar menn að selja sig dýrt og því bara verður liðið að vinna á morgun.

Af okkar liði er það helst að frétta að Xabi Alonso er frá vegna meiðslanna sem hann hlaut í hroðatæklingu Joey Barton á sunnudag. Ég var á þeim leik og get alveg vottað fyrir það að það voru alveg 44 þúsund Púllarar á Anfield þann daginn og þá langaði alla til að hitta Barton á bílastæðinu eftir leik. Nú, góðu fréttirnar eru hins vegar þær að Fernando Torres og Javier Mascherano eru orðnir góðir af sínum hnjöskum og verða væntanlega báðir með á morgun.

Ég held að Rafa muni stilla upp eftirfarandi liði á morgun:

Sem sagt, nokkuð sókndjarft lið. Gerrard framar af tveimur miðjumönnum með þrjá flinka í kringum sig og fyrir aftan Torres. Auðvitað gæti Lucas komið inn á kostnað Benayoun eða Riera og Gerrard fengið að vera í holunni sinni en með tilliti til þess hversu ómissandi Gerrard og Torres eru og hversu ótrúlega vel Benayoun og Kuyt hafa verið að spila undanfarið finnst mér líklegra að Rafa stilli þessu svona upp.

En hvað veit ég svo sem?

Hjá West Ham eru þeir Carlton Cole, Scott Parker og Kieron Dyer víst frá vegna meiðsla þannig að aðal hættumaður þeirra verður væntanlega spænski framherjinn Diego Tristán sem hefur verið að smella nokkrum flottum mörkum fyrir þá undanfarið. Þetta West Ham-lið skartar annars engum sérstökum stjörnum en stjórinn, Gianfranco Zola, hefur engu að síður gert frábæra hluti með litlum efnivið í vetur og náð að hnoða saman sterku og skemmtilegu liði sem hefur átt góðu gengi að fagna og situr sem stendur í sjöunda sæti og á möguleika á Evrópusæti á næsta ári. Þetta verður því alls ekki auðveldur leikur.

Mín spá: Þetta verður mjög erfiður leikur og ég sé okkar menn alveg fyrir mér tapa þessum leik. Ekki af því að okkar menn séu slakir þessa dagana heldur af því að West Ham-liðið er að spila nokkuð vel. Þeir geta alveg unnið okkur en á endanum held ég að hungrið sé meira okkar megin og það hljóti að segja til sín á endanum. Þá hefur Fernando Torres ekki verið neitt svakalega heitur í undanförnum 3-4 deildarleikjum og á inni eina góða frammistöðu. Við vinnum 0-2 og Nando skorar bæði.

Áfram Liverpool!

Það er ljóst að eina sem Liverpool getur gert í dag er að vinna alla sína leiki og vonast til að Manchester United tapi eitthvað af sínum. Við eigum 4 leiki eftir (Newcastle (h), West Ham (ú), WBA (ú) og Tottenham (h)) á meðan Manchester United á 5 leiki eftir. Leikurinn á morgun gegn Newcastle er s.s. fyrsti leikurinn af 4 sigurleikjum í maí!

Það er klárt að Steven Gerrard er leikfær og mun byrja á morgun og eru það góðar fréttir því þótt liðið hafi staðið sig ágætlega í hans fjarveru þá er liðið einfaldlega betra þegar hann er með. Þetta þýðir væntanlega að Lucas mun detta á bekkinn fyrir fyrirliðann. Aðrar góðar fréttir eru að Agger sé nálægt því að semja við Liverpool að nýja og því mun hann spila þennan leik ásamt Carragher í vörninni. Annað ætti að vera hefðbundið:

Bekkurinn: Cavalieri, Skrtel, Insua, Kuyt, Babel, Lucas, Ngog.

Eins og glöggir lesendur hafa séð þá set ég Riera inn á kostnað Kuyt og er þetta bara hugsað til að hvíla vinnuhestinn aðeins. Ennfremur set ég Aurelio inn fyrir Insúa vegna þess að Aurelio er betri en Insúa… ennþá! Þetta er feiknarsterkt lið og ætti að vera sterkt bæði frammá við sem og tilbaka.

Af liðinu hans Shearer er það helst að frétta að þeir eiga í meiðsla vandræðum í vörninni og er m.a. talað um að Damien Duff muni spila sem vinstri bakvörður en José Enrique meiddist í síðasta leik. En þrátt fyrir ömurlegt gengi Newcastle á þessu tímabili er alveg á tæru að liðið er með leikmenn til að vera miklu ofar á töflunni. Hvort hins vegar Alan Shearer takist að snúa skútunni við verður tíminn að leiða það í ljós. Michael Owen er fyrirliði þeirra og verður í fremstu víglínu á morgun, hann skoraði ófá mörkin fyrir okkur og hann ætti að kannast vel við sig á Anfield, vonandi ekki of vel.

Newcastle liðið er í harðri fallbaráttu, í 18.sæti með 31 stig. 3 stigum á eftir Hull City sem er í 17.sæti. Þetta er undarleg staða hjá þessu stórliði en á móti kemur er búið að vera svo mikið endemis rugl á stjóramálum, eigendum og já leikmönnum undanfarin misseri að þessi staða á kannski ekkert að koma á óvart.

Ég get með engu móti séð hvernig Newcastle eigi að eiga séns í okkur á morgun. Við erum að spila feiknarlega góðan fótbolta um þessar mundir, sóknarknattspyrnu eins og hún gerist best og ekkert bendir til þess að það ætti að breytast. Við gáfum 3 mörk gegn Arsenal vegna ótrúlegra einstaklings mistaka og svoleiðis mistök gerast ekki aftur næstu 10 árin. Allir ættu að vera með sjálfstraustið í botni og í raun vonast ég til að sjá lið sem nýtur þess að spila fótbolta, afslappað og þá koma úrslitin að sjálfu sér.

Með Gerrard aftur í byrjunarliðið, Benayoun að spila eins og heimsklassa leikmaður, Alonso að stjórna miðjunni, Reina í markinu, Agger brosandi hringinn með nýja samninginn þá tel ég 100% öruggt að við vinnum þennan leik. Það eru tveir möguleikar, annað hvort skorum við seint og vinnum seiglu sigur á lánlausu Newcastle liðinu 1-0 eða við skorum snemma, þeir gefast upp og við rústum þeim 5-0. Á endanum er 3 stig bara 3 stig og við eigum þau!

Áfram Liverpool!