Þessa viku er landleikjahlé, Liverpool er ekki að spila í rúma viku og persónulega finnst mér þetta bölvaða hlé virka eins og hálft ár, tala nú ekki um þegar við erum sl. tvær vikur að horfa á Liverpool í einhverju mesta stuði sem liðið hefur verið í bara frá stofnun. Á svona pásu-tímum fer maður stundum að hugsa út í eitthvað annað svona til að drepa tímann, silly season þjófstartaði t.a.m. í vorblíðunni í MARS eins og KAR kom inná í síðustu færslu og sumir reyna jafnvel að kreista út áhuga á því hvað er að gerast í undanriðlunum í þessum landsleikjum.

Það er því kannski að einhverju leiti skiljanlegt að sumir velti því nú fyrir sér hvað sé eiginlega málið, hvernig í fjandanum getur maður frá eyju rétt norðar en alveg út í rassgati fylgst svona náið með einhverju liði frá öðru landi, jafnvel látið gengi þess stjórna skapinu óhóflega mikið, komið því inn í flestar samræður og jafnvel elt það um alla evrópu. Og enn furðulegra hlitur það þá að vera að ótrúlega stór partur af þjóðinni fylgist náið með boltanum og lifir sig inn í gengi síns liðs af lífi og sál, ég meina þegar Liverpool vinnur leik þá tölum við um að “við” unnum um helgina. Ég ætla nú svosem ekki að reyna útskýra þennan áhuga okkar á boltanum öðruvísi en með því augljósa, þetta er stórskemmtilegt hobbý sem getur gefið manni útrás fyrir spennu, gleði og reiði…..stundum allt í einum og sama leiknum. En þó áhuginn á þessari íþrótt er hreint út sagt magnaður og útbreiddur þá eru mjög margir/margar (oftar konur)  sem líta hornauga á gríðarlega mikin áhuga á fótbolta, segja þetta , tímasóun, vitleysu o.s.frv.

En svo ég komi mér nú að efninu þá datt ég allavega inn á Skjá Einn um daginn, líklega á miðvikudaginn sem oftar en ekki er nú lögbundið fótboltakvöld á þessum árstíma. Þar var hinn hreint út sagt ótrúlega leiðinlegi, svo ekki sé talað um vitlausi þáttur America´s Next Top Model í gangi. Fyrir þá sem ekki þekkja þá er það þáttur þar sem geðsjúk svört kona sem eitt sinn var horað og stórmyndarlegt ofurmódel, ásamt karlmanni sem er svo öfugur að hann er kynntur sem Frú J. Alexander og fleiri karakterum sem betur myndu henta sirkus velja á nokkrum vikum sætust……..nei ekki einu sinni sætustu stelpuna, úr hópi fáránlegra margra stelpna sem af óskiljanlegum ástæðum langar að taka þátt.

Þættirnir ganga út á að horfa á treggáfaðar stelpurnar rífast og baktala hvor aðra milli þess sem þær þurfa að láta mynda sig við “erfiðar” aðstæður. Að lokum þurfa þær síðan að hlusta á dóma frá furðufuglunum sem sjá um þáttinn, allt fólk sem helst hefur það sameiginlegt að vilja einmitt ekki vera með konum ! Helsti kosturinn við þetta er reyndar að í lokinn fer alltaf ein heim sem gefur manni von um að þetta taki nú enda. Þessa þætti, án þess að ég byrji á Bachelor, geta heilu saumaklúbbarnir rætt fram og til baka og, já nánast hugsað þetta eins og við hugsum um fótboltann. Það er í alvörunni velt þessu fyrir sér ofan í kjölin af nokkuð stórum hópi!!

Það er einmitt við þessar aðstæður sem maður á ekki í neinum vandræðum með að réttlæta fótboltann fyrir sér og öðrum. Mikið djöfull er ég a.m.k. oft ótrúlega feginn að hafa áhuga á fótbolta. Þarna höfum við eitthvað mikilvægt að tala um daginn út og daginn inn, skoða á netinu, við getum horft á þessa stórskemmtilegu íþrótt og oftast haldið svo hressilega með öðru liðinu sem er á skjánum að maður er oftar en ekki farinn að hreyta í blásaklaust sjónvarpið (geri mér þó auðvitað grein fyrir að gengi Liverpool er auðvitað stundum sjónvarpstækinu að kenna).

Ég get nú ekki svarið fyrir neitt í þessum efnum en mikið djöfull held ég að það sé nú skárra að hafa áhuga á raunverulegum hlutum eins og fótbolta, heldur en “raunveruleika”þáttum frá ameríku!

Það er auðvitað hægt að taka áhugan skrefinu of langt í þessu öllu saman, bæði í áhuga á ANTM og fótbolta, það er t.d. hægt að halda svo mikið með Liverpool að maður hagar lífi sínu þannig að maður missir helst alls ekki af leik (æfingaleikir þ.m.t), maður getur gengið í aðdáendaklúbb sem er ekki einu sinni frá því landi sem liðið sem maður er að styðja er frá og verið í þeim klúbbi í fleiri ár, þetta getur orðið svo “slæmt” að maður fer að skrifa á bloggsíðu tileinkaða þessu liði sínu og jafnvel einhver spjallborð að auki, svo ekki sé talað um að fara af og til nokkurþúsund kílómetra og nokkur þúsund krónur yfir atlandshafið til þess eins að sjá liðið spila. Það er meira að segja hægt að ganga svo langt að maður getur farið á gala dinner og með því á árshátíð hjá Liverpool klúbbnum á ÍSLANDI

………..og ég meina þetta er bara ég………spáið í því hversu “slæmt” þetta er hjá SStein

p.s. annað slæmt við landsleikjahlé er að það geta komið inn á milli ekki betri pælingar og pistlar en þetta.

Að eilífu

Enter.

Hér gefur að líta nýjan varabúning félagsins sem við öll elskum frá og með næsta hausti. Hann á að leysa gráa varabúninginn heima fyrir af hólmi en svo á líka eftir að koma evrópuvarabúningur.

Ég veit ekki með ykkur hin en mér finnst svörtu búningarnir okkar í gegnum tíðina hafa heppnast vel og þessi er einn af þeim betri undanfarin ár, all veruleg framför frá þeim sem við höfum notað í vetur, á Englandi og í Evrópu. Gyllingin á auglýsingunni og adidasröndunum kemur flott út og ég er afar glaður með að adidas hafa lagt verulega í að gera “svalt” útlit á búninginn sem mun fá andstæðinginn til að hræðast enn meir þegar þeir mæta okkar jöxlum. Stuttbuxur og sokkar eiga líka að vera í svörtum lit með gyllingu í röndum.

Kannski maður kaupi sér varabúning á næsta hausti

Rakst á samantekt á spjalli við Paco Herrera, fyrrum þjálfara hjá Liverpool og nú stjóra Castellon á Spáni.

Þarna getum við lesið það sem maður fær að heyra í samtölum úti við fólk sem fylgist grannt með félaginu og maður getur lesið í gegnum t.d. ævisögur Steven Gerrard og Jamie Carragher.

Rafael Benitez er fagmaður fram í fingurgóma og hefur búið til lið sem virðing er borin fyrir á ný, það verður aldrei af honum tekið. Auðvitað erum við ekki alltaf öll sammála honum, en ég tel vinnubrögð eins og lýst eru í þessari grein nákvæmlega það sem þarf hjá toppliði í fótbolta og nákvæmnin í öllu muni skila okkur fram á veginn.

Hvort sem það er gagnagrunnur 14000 leikmanna, möguleiki á að sjá fótbolta frá öllum heimshornum á stórum skjám, mataræðið eða einbeitingarhótelið. Allt er hannað til að besta mögulega aðstaðan sé á staðnum, til alls!

Svo bætum við því við að hann er alltaf í stuttbuxunum og með á æfingunum, vakir yfir varaliðinu og er orðinn aðalstjórnandi unglingaliðsins. Svona vinnubrögð vil ég sjá!

Svo voru að berast hinar ágætustu fréttir, þær að Brad Friedel verður ekki í banni gegn United þegar keppni í deildinni hefst að loknu landsleikjahléi. Spjaldið virðist hafa verið fellt niður.

Sanngjarnt finnst mér, hann átti ekki rautt spjald skilið í mínum bókum. Væri gaman ef hann myndi svo verja víti í uppbótartíma og tryggja Villa 0-1 sigur á Old Toilet. Ímyndið ykkur vælið þá!!!

Til að byrja með á þessari yfirferð verð ég bara að setja þetta fagn hjá fyrirliðanum á virðulegri stað hér inni heldur en falið í commentum………….það er svo gaman að sjá þetta aftur og aftur

Þetta er á mörkum þess að vera of mikil snilld hjá okkar manni og ég get lofað ykkur að þetta hlaup var langt frá því að vera einhver tilviljun. Þessi á svo auðvitað skilið einn Thule, ef ekki tvo.

Síðasta vika er ein af þeim betri sem maður man eftir lengi hvað úrslit varðar, maður var búinn að vera stressaður í smá tíma fyrir Real leikina enda okkar menn ekki sannfærandi eftir áramót og Real vægast sagt ógnvekjandi heimafyrir. Þeir voru ekki einungis sigraðir, heldur niðurlægðir, teknir í gryfjunni sinni á Spáni og síðan bara slátrað á Anfield, svo illa að margir hafa talað um að hafa ekki séð þá svona lélega í háa herrans tíð. Ekki hversu góðir Liverpool voru sem mun réttara væri að tala um eftir að eitthvað lið slær Real Madríd út með markatölunni 5-0.

En gott og vel, ef maður var búinn að vera með ónot í maganum fyrir Real Madríd leikinn þá var það bara sýnishorn miðað við United leikinn, United er nánast búið að vinna deildina eftir fáránlegt run hjá þeim eftir áramót og tap á Old Toilet væri ekki bara endanleg uppgjöf í titilbaráttunni heldur líka ofsalega sárt tap, þar sem við erum jú að tala um fo****ings United. Það er sárt að tapa fyrir þeim í æfingaleik, í blaki, hvað þá svona stórum leik í deildinni. Miðað við gengi liðanna vikurnar fyrir þennan leik var ég einmitt að grínast með það á spjalli við SStein fyrr leik að sigur á Old Trafford væri eiginlega ekki nóg, við þyrftum helst niðurlægingu eins og Madríd fékk.

Trúið mér,  Steini fékk fallegt SMS þegar hinn nýji Igor Biscan, Andrea Dossena,  skoraði fjórða markið, í því stóð einfaldlega “Niðurlæging” ……………og mikið óskaplega var fallega gert hjá þeim að uppfylla þessa “hógværu” ósk mína. We needed that.

Aftur er það í umræðunni að United hafi sjaldan verið svona lélegt og allt í einu voru þeir orðnir þreyttir. (svo má ekki gleyma þessum sem var á því að United hefði verið betra) Minna gert úr því hvað Liverpool voru góðir. Það er engin tilviljun að lið eins og Real og United eigi “óvenju dapran dag” gegn Liverpool, þessi lið hafa fyrir það fyrsta verið gjörsamlega kortlögð, leikur þeirra gjörsamlega núllaður út og veikleikarnir nýttir.

En þó maður gerir sér grein fyrir því að rúst gegn United og Real Madríd í sömu vikunni er eitthvað sem maður á ekki endilega að venjast eða gera sér vonir um að verði “norm-ið” hjá Liverpool þá er ekki annað hægt en að hugsa út í breytinguna á Liverpool liðinu frá því Benitez tók við. Við erum núna í baráttunni um titilinn lengur en nóvember, við eigum ekki eins sterkt lið og t.d. hin rándýru lið United og Chel$ki og finnum mun meira fyrir meiðslum lykilmanna, en við erum þrátt fyrir mun minni eyðslu í leikmannakaup með vel samkeppnishæft lið núna og lið sem er mjög líklegt til að bæta sig töluvert á næstu árum, hryggsúlan í liðinu er á afar flottum aldri.

Eins er mest áberandi munurinn á liðinu sjálfstraustið og bara boltinn sem við spilum. Slíkt tekur nokkur ár að byggja upp og Rafa Benitez virðist vera á hárréttri leið ef eitthvað á að taka mið af síðustu viku og bara nokkrum flottum úrslitum og frammistöðum í vetur. Það eru ekki mjög mörg ár síðan Liverpool var stillt upp eins og vegg á móti liðum eins og Barcelona, Arsenal og Valencia sem gátu gjörsamlega sundurspilað okkur. Jú jú við gátum sannarlega varist þeim og liðið stóð sig oft á tíðum afar vel gegn svona liðum með afar skipulögðum og stífum varnarleik og …. já t.d. Michael Owen.

En í dag getum við ennþá varist á svipaðan hátt, en dagarnir virðast vera taldir þar sem við þurfum að bíða í skotgröfunum og vona að vörnin haldi þar sem það að Liverpool kæmi til baka frá því að lenda undir var óskhyggja, þ.e. okkar menn þurfa ekki að biðja um að fá að leika aðeins með boltann líka eins og Fowler gerði einu sinni á Nou Camp. Núna getum við tekið leiki þar sem Real Madríd mega teljast ljónheppnir að sleppa með einungis 4-0 tap á Anfield. Við höfum unnið meistaradeildina, lent í öðru eftir leik sem við vorum betri í, fallið út í undanúrslitum í framlengingu og erum núna komnir í 8 liða úrslit og teljumst nú það lið sem hin liðin vilja helst forðast þegar dregið er á föstudaginn. Það er heilmikil breyting á fimm árum, heilmikil.

Þetta má líka líta á sem byrjun, núna er búið að byggja upp þrusu sterkt lið sem auðvitað má bæta, þetta lið getur sannarlega unnið hvert eitt og einasta lið sem spilar þessa íþrótt í þessu sólkerfi. Næsta verkefni er að byggja upp lið sem getur spilað á fullu gasi yfir heilt tímabil og unnið bæði sóknarlið og varnarlið. Núna er þetta þannig að Liverpool dominerar flesta leiki og tapar nánast aldrei, helsta vandamálið er að við eigum einmitt helst í vandræðum með þau lið sem nota sömu herferð og við notuðum gegn liðum sem stóðu okkur “framar” fyrir nokkrum árum, liðum sem mæta Liverpool með það eitt að markmiði að verjast, gera sem fæst mistök og reyna að halda Liverpool í skefjum frekar heldur en að hætta sér fram á völlinn (þau sem gera þetta ekki er oftar en ekki refsað).

Því miður hefur þetta herbragð gengið upp hjá allt of mörgum liðum á þessu tímabili, augljóslega vegna þess að okkur hefur vantað okkar bestu sóknarþenkjandi menn í toppformi of stóran hluta af tímabilinu. Þeir sem koma í stað Torres og Gerrard þegar þeirra nýtur ekki við hafa ekki verið nógu góðir (hafa þó verið að batna), sérstaklega ekki ef við miðum t.a.m. við United og þeirra hóp. Það telur t.a.m. svakalega að kaupa 20.m.p. mann og selja hann í janúar, eins að kaupa sóknarþenkjandi hægri bakvörð sem er meira meiddur heldur en Harry Kewell.

Svona horfi ég á þetta eins og staðan er núna, að ætla frekar að gefast upp á Bentitez frekar en að gefa honum tækifæri og helst almennilegt backup til að bæta þetta fyrir næsta tímabil finnst mér ógnvekjandi. Ég veit að krafan hjá mörgum hefur verið að við þurfum að losa okkur við hann til að vinna deildina……en menn hljóta að sjá það á vikum eins þessari að hann er á góðri leið með þennan klúbb og hefur í raun ekki gert nógu mikið af sér til að fá á sig alla þessa gagnrýni og vera undir þessari pressu.

-

Yfir í annað, fréttir.

Þessi vika hefur verið svo öflug að meira að segja Andrea Dossena er kominn með bullandi sjálfstraust, skorar eins og hann hafi aldrei gert annað og svei mér ef hann sé ekki  bara á góðri leið með að komast á stall með hetjum eins og Igor Biscan hjá klúbbnum.

Reyndar kom hann inn á svolítið áhugaverðan punkt í viðtali á Official síðunni um ástæður þess að hann byrjaði svona HERFILEGA hjá klúbbnum.

Dossena also shed light on why he initially found life hard in England.

“Compared to last season, I have changed my position – I have gone back 20 metres,” he said.

“This change and adapting to English football gave me some difficulties to start with, but with the help of a great coach like Rafael Benítez, I’m starting to understand how to play in the team. You adapt step by step.”

Þetta útskýrir að einhverju leiti byrjunina hjá kallgreyinu ásamt því auðvitað að hann var að skipta yfir í mun stærri klúbb, hraðari bolta, allt aðra menningu og mun meiri pressu.

En það er ljóst að þetta er mun betri leikmaður en leit út fyrir í fyrstu og fær um að framkvæma ótrúlegustu hluti…..

Andrea Dossena is to join the Magic Circle. It comes after he made 60,000 Manchester United fans disappear on Saturday.

-

Annar sem hefur mikið verið gagnrýndur, reyndar ekki alltaf sanngjarnt, tjáði sig einnig á Official síðuna í dag, eða Lucas Leiva. Leikurinn sem hann spilaði síðast gegn United ætti að gera gríðarlega mikið fyrir sjálfstraustið hjá honum og leggja gríðarlega mikið inn á reynslubankann. Það gleymist stundum að þetta er ungur pjakkur sem er ennþá að venjast Englandi og er langt í frá tilbúinn vara.  Hann átti flottan leik gegn United, leysti það vel að koma inn fyrir Alonso (þó ég hafi saknað hans) og það er mjög gott ef hann færi að koma til hjá okkur. Vona allavega að við höldum honum í rotation hópnum, hann er allavega ekki verri en Flecher og O´Shea t.d sem spila svipað hlutverk hjá United.

-

Gerrard hefur svo verið að fá hrós frá virðulegum stöðum undanfarið, þarf svosem ekki mikið að ræða þetta enda vitum við allt um manninn. Það er samt ákveðinn gæðastimpill að vera álitinn bestur í heimi af mörgum á sama tíma og hinn fáránlega góði Lionel Messi er að spila þessa íþrótt (og Kristjana hjá United).

Guði sé lof að við eigum Gerrard.

-

Tímabilið verður að öllum líkindum ekki okkar í ár (þó aldrei megi afskrifa CL). Maður gat samt ekki annað en notið síðustu daga.

Hvað sem öllum vangaveltum liður…þá hefur þessi alveg verið notaður undanfarið

Kveðja

Babú

Manni er skapi næst að hefja pistil sem þennan með þeim orðum að á morgun mætir Sunderland á Anfield Road og gerir jafntefli við Liverpool. Maður er orðinn svo óvanur því að liðið tapi leik að það er nánast eins og veröldin hrynji, allt eru þetta gagnslausir aumingjar og þar fram eftir götunum…það er hræðileg tilfinning að tapa leik og kannski er það eitthvað sem Liverpool þarf til að koma í veg fyrir að það gerist aftur, þeir þurfa að finna sársaukan sem tap eins og við lentum í á laugardaginn hafa í för með sér til að motivera sig upp í að slíkt gerist ekki aftur.

Likt og allt annað þetta tímabilið þá féll þetta með United, okkur tókst ekki að setja pressu á þá með þeim leikjum sem við áttum á undan þeim og það tekur því eiginlega ekki að svekkja sig á því. Á morgun er það Sunderland, fyrir þann leik þarf að gíra sig upp og að sjálfsögðu vinna, við erum núna komnir í mun raunverulegri baráttu við Chel$ki og Villa heldur en United og ekkert má gefa eftir.
Mest áberandi vandamál okkar þetta tímabilið er ennþá að plaga okkur og það afar illa, eini raunverulegi sóknarmaðurinn okkar, Fernando Torres, er ekki tilbúinn í þennan leik og verður því pottþétt ekki með, sama má segja um eina hægri bakvörðinn okkar (Degen er ekki talinn með lengur), og eins er Agger meiddur ennþá. Gerrard ætti hinsvegar að vera orðinn klár, hann fékk víst krama undir lokinn á leiknum um helgina en æfði með félögum sínum í morgun.

Eftir ævintýramennskuna með Skrtel frá því í síðasta leik verð ég nú að viðurkenna að ég hef ennþá minni hugmynd um það uppáhverju kallinn tekur í þessum leik, stilli þessu upp nokkurnvegin eins og ég vill sjá þetta, ekki endilega eins og ég held að þetta verði:

Bekkur: Cavalieri, Dossena, Kuyt, Zhar, Lucas, Ngog, Hyypia.

Ég er ekki mesti aðdáandi Jamie Carraghers í hægri bakverði, allra síst gegn liði eins og Sunderland á heimavelli, en í samanburði við Martin Skrtel í þessari stöðu lít ég á hann sem afkvæmi Dani Alves og Sergio Ramos. Ég held að það sé bara ráð að taka sénsinn á Darby í þessum leik og leyfa honum að spreyta sig. Hann hefur verið að banka á dyrnar undanfarið og hlítur að fá séns á endanum…svona fyrst allir hægri bakverðir klúbbsins eru meiddir. Annað er hefðbundið í vörninni, Aurelio gæti þó verið hvíldur, sjálfur vil ég bara sjá Insua eigna sér þessa stöðu en ég hef engu að síður frekar trú á að Dossena komi inn á undan honum.

Sama á við á miðjunni, JM gæti fengið frí og Lucas þar með þennan leik, Alonso er hinsvegar must til að halda einhverju flæði á liðinu þar sem Lucas og Mascherano eru álíka gagnlausir saman á miðjunni og flugnaspaði í janúar.

Val mitt á fremstu fjórum kemur kannski ekki á óvart, þ.e. enginn Dirk Kuyt. Ég hef fengið gjörsamlega nóg af honum undanfarið í ráðleysislegum og hægum sóknarleik okkar og væri mikið til í að gefa honum frí. Það er ekki mikil þörf á að hafa hann þarna gegn Sunderland á Anfield. Með því er ég samt fráleitt að segja að Babel hafi getað blautan skít undanfarið, hann býr engu að síður yfir hraða sem ég tel lífsnauðsinlegan Liverpool og því kerfi sem við spilum, henn getur tekið menn á og hefur bara ekki fengið mikinn séns einn upp á toppi. En guð minn góður hvað okkur vantar Torres. Eins þætti mér gaman að sjá Babel þarna með skapandi menn eins og Benayoun, Riera og Gerrard fyrir aftan sig.

Eins og sjá má hérna finnst okkur reyndar alls ekkert leiðinlegt að spila við Sunderland, hvort sem það er heima eða að heiman. höfum t.a.m. unnið síðustu fimm leiki og markatalan í þeim leikjum er 9-0. Eitthvað sem núverandi lið Sunderland er alveg örugglega ekki búið að frétta og kemur að sjálfsögðu ekki til með að skipta nokkru einasta máli á morgun.

Mín spá: Eins freistandi og það nú er að spá jafntefli þá sleppi ég því á þeim forsendum að taugakerfið þolir það ekki, til að bjarga geðheilsunni verðum við því að vinna þennan leik, ég segi 2-0 með mörkum frá Skrtel og Riera.

Umfram allt, þá er þetta bara málið þessa dagana, svei mér þá :p