Áfram með smjörið. Á morgun er fyrsti heimaleikur Liverpool í riðlakeppni Meistaradeildarinnar og fáum við hollenska stórveldið PSV Eindhoven í heimsókn. Þótt ég hafi ekki enn farið á Anfield og þá mjög bersýnilega ekki upplifað Evrópukvöld þar, þá sér maður bara og finnur stemninguna á vellinum, þetta er svolítið annað heldur en laugardagsleikur í enska. En nóg um það, leikurinn er á morgun og hefst klukkan 18:45 “punctually” að íslenskum tíma.

Þetta er ekki í fyrsta sinn sem þessi lið leiða saman hesta sína í Meistaradeildinni. Fyrir tveimur árum, eða tímabilið 2006-2007, þá lentum við einnig með þeim í riðli og gerðum markalaust jafntefli í Hollandi en unnum heimaleikinn 2-0. Liðin mættust svo nokkrum mánuðum síðar í 8-liða-úrslitum keppninnar og þar hafði Liverpool betur, samanlagt 4-0.

PSV eru sem stendur í 2. sæti hollensku deildarinnar (Eredivisie) og hafa unnið hana síðustu 4 ár. Ég ætla nú ekki að hafa þau mörg orðin um þennan annars ágæta klúbb heldur einbeita mér bara að gestgjöfunum.

Af okkar mönnum er hitt og þetta að frétta. Yossi Benayoun og Javier Mascherano eru orðnir heilir sem eru mikil gleðitíðindi, ég held að allir séu þá heilir nema náttúrlega hinn seinheppni Degen. Rafa hefur varað menn við liði PSV og vill byrja leikinn af krafti og setja gestina strax undir pressu. Dirk Kuyt talar einnig um að PSV séu orðnir sterkari síðan síðast, þannig það er alveg á kristaltæru að vanmat á liði PSV er eitthvað sem er ekki til á Anfield. Enda er engin ástæða til þess að vanmeta lið sem hefur verið yfirburðalið í hollensku deildinni síðustu ár.

Ég er ennþá í skýjunum eftir nágrannaslaginn um helgina og fæ bara ekki leið á því að horfa á þetta video sem ég hef sett hér í færsluna!! Liðið lék mjög vel og það er greinilegt að menn eru að komast í betra form með hverjum leikjum og mun skemmtilegra að horfa á liðið núna en fyrir nokkrum vikum síðan. Það er því mjög jákvætt að þótt menn hafi ekki verið í neinu toppformi í byrjun tímabils þá náðum við samt mjög góðum úrslitum og erum enn taplausir. Leikur liðsins hefur batnað og þá er ég aðallega að tala um sóknarleikinn auðvitað. Torres er farinn að skora á ný og Keane er farinn að leggja upp þannig ég get ekki kvartað yfir spilamennskunni þessa dagana.

Þá að byrjunarliðinu á morgun. Ég hef mikið spáð og spegulerað í þetta og hef komist að þessari niðurstöðu. Ég mun rökstyðja það sem þarf hér að neðan.

Ég held að Aurelio leiki í vinstri bakverði einfaldlega vegna þess að mér finns Dossena búinn að vera vægast sagt slakur upp á síðkastið.

Svo er það “holan”. Ef Keane fer í holuna þýðir það bara eitt, Mascherano verður á bekknum, því ekki mun Gerrard verma tréverkið og Alonso er að spila mjög vel þessa dagana. Ef Gerrard verður í holunni, þá verður Keane væntanlega á bekknum og Mascherano á miðjunni. Ég held að Keane fái þennan leik þar sem hann var frábær gegn Everton og ég væri hissa ef Rafa myndi ákveða að hvíla hann í þessum leik.

Svo er spurning með vinstri kantinn. Ætlar hann að nota Riera, Babel eða Benayoun, sem ég vona að byrji ekki þar sem álit mitt er ekkert gríðarelga hátt á þeim leikmanni. Rafa hefur verið að tala um að hann og þjálfarateymið sé að hjálpa Babel með taktísku hliðina á leiknum og að hann sé klárlega hugsaður sem byrjunarliðsmaður og muni leika stærra hlutverk í ár heldur en á síðasta tímabili. Hann segir að Babel sé leikmaður sem geti breytt leikjum, en nú vill hann að Hollendingurinn geti byrjað að hafa áhrif allt frá fyrstu mínútu. Þetta segir okkur það að Babel mun byrja oftar í vetur og tek ég þeim fregnum fagnandi. PSV ætti að henta Babel mjög vel og hann ætti að þekkja til þeirra, þar sem hann lék með Ajax, helstu erkifjendum PSV.

Spá

PSV tapaði 0-3 fyrir Atletico Madrid á heimavelli í fyrsta leik riðlakeppninnar og það er spurning hvernig þeir koma til leiks á Anfield. Ég held að þetta verði hörkuleikur og að gestirnir verði erfiðir viðureignar. Ég á þó von á að við munum klára þetta í síðari hálfleik 2-0 með mörkum frá Alonso og Skrtel! :)