Ég man ekki hvenær það gerðist síðast að núverandi leikmaður Liverpool spilaði úrslitaleik í Evrópukeppni eða á Heimsmeistaramóti. Það væri gaman ef að einhver gæti rifjað slíkt upp fyrir mér.

Eftir um einn og hálfan tíma munu þó fjórir Liverpool leikmenn verða í spænska hópnum, sem mun spila við Þjóðverja um Evrópumeistaratitilinn í fótbolta árið 2008. Fernando Torres mun líklega verða einn í framlínunni þar sem að David Villa mun ekki spila í kvöld og líklegt er að Cesc Fabregas komi inn fyrir hann og Aragones spili með fimm manna miðju. Alonso, Reina og Arbeloa verða svo á bekknum.

Ég held að flestir Liverpool aðdáendur verði á bandi Spánverja í kvöld. Vonandi fáum við skemmtilegan leik og vonandi fáum við í kvöld að sjá þann Fernando Torres, sem við sáum í hverri viku fyrir Liverpool síðasta tímabil.

Jæja, Spánverjar leika í kvöld og þar verður væntanlega einn Liverpool maður í byrjunarliðinu, Fernando Torres, og jafnvel er talað um að Xabi Alonso gæti komið inn fyrir Senna, sem var eitthvað tæpur. En það verður gaman að fylgjast með Spánverjum gegn gríðarlega skemmtilegu liði Rússa. Ef menn vilja ræða um leikinn, þá geta þeir gert það við þessa færslu.

**Uppfært (EÖE)**: Senna er í liðinu og því eru Arbeloa, Reina og Alonso á bekknum. Torres byrjar frammi með David Villa.

Fyrir helgina hnoðaði ég í eins og eina spá fyrir 8-liða úrslit EM. Sú spá byggðist nær eingöngu á stórfenglegri innsýn í knattspyrnuna, enda kom það á daginn að ég hafði meira og minna rétt fyrir mér; Þjóðverjar kunna þetta og tóku Portúgali, Hollendingar toppuðu of snemma og brotlentu gegn drullugóðum Rússum og Spánverjar sigruðust á bölvuninni gegn Ítölum. Það eina sem eyðilagði annars fullkomna spá var þetta ævintýralega jöfnunarmark Tyrkja gegn Króötum í lok framlengingar, og í kjölfarið sigur í vító þar sem Króatarnir voru enn of sjokkeraðir til að geta skotið á mark.

Í ljósi þess hve vel sú spá tókst til finnst mér tilvalið að hita upp fyrir undanúrslitaleikina með því að hnoða í eins og aðra spá. Negli hér með skoðun mína við vegginn. Þið sem viljið ekki vita úrslitin fyrirfram skulið hætta að lesa núna. ;)

Miðvikudagur: Tyrkland – Þýskaland

Tyrkirnir hafa háð mikið taugastríð undanfarna daga með því að hrópa það hæst allra sjálfir hversu fámennur leikmannahópurinn sem eftir stendur hjá þeim er. Emre og fleiri farnir í meiðsli, markvarðavesen og svo framvegis. Þeir reyna að nýta sálfræðihernaðinn til að fela það hversu veik staða þeirra er fyrir þennan leik, en ég skal hundur heita ef Þjóðverjar gera eitthvað annað en að mæta fyllilega klárir í slaginn. Michael Ballack og félagar eru komnir með blóðbragðið og eins og þýskir hákarlar knattspyrnusögunnar hingað til munu þeir elta bráðina uppi annað kvöld og éta hana lifandi.

Mín spá: Tyrkirnir sjá fljótlega í leiknum að við ofurefli er að etja, eru saddir eftir að hafa óvænt komist svona langt og munu njóta stundarinnar í stað þess að berja höfðinu við steininn. Þjóðverjar fara í úrslitin með stæl.

Fimmtudagur: Rússland – Spánn

Hér er úr vöndu að ráða. Á annan bóginn ertu með besta sóknarliðið í keppninni, tvo bestu framherja keppninnar og lið sem (a) spilar örsjaldan leiki án þess að skora og (b) var að klára einn slíkan, þannig að líkurnar á að þeir skori á fimmtudag eru yfirgnæfandi. Á hinn bóginn ertu hins vegar með agaðasta lið keppninnar, mögulega það lið sem er í bestu formi og skartar bestu liðsheildinni, og einhvern albesta landsliðsþjálfara heims, ef ekki þann langbesta.

Ég á erfiðara með að spá í úrslitin hér en í fyrri leiknum en ég ætla að treysta innsæinu og þeirri staðreynd að ég hef horft nógu mikið á ákveðinn leikmann síðasta árið til að vita með ágætri vissu að eftirfarandi fullyrðing er déskoti líkleg: Fernando Torres hefur haft furðu hægt um sig í þessu móti og það þýðir bara eitt, Rússar eiga ekki von á góðu. Ég spái Spánverjum hér sigri í markaleik þar sem Fernando Torres nýtir sér alla athyglina sem David Villa er að fá þessa dagana til að skjóta Rússunum ref fyrir rass og minna Evrópu á það hver er númer eitt.

Ef þessi spá rætist munu svo Spánverjar og Þjóðverjar mætast í sjálfum úrslitaleiknum. Ég held reyndar að úrslitaleikurinn verði stórskemmtilegur hvort sem Rússar eða Spánverjar komast þangað, eins lengi og Þjóðverjar vinna varnarsinnaða Tyrkja, en ef spá mín er rétt mun það væntanlega auka eftirvæntingu margra enda tvö frábær lið þar á ferðinni.

Sjáum hvað setur. Ég verð allavega hissa ef Tyrkir komast lengra. Hin þrjú liðin geta öll unnið mótið og verið vel að því komin.

Það er alveg ljóst að þetta EM mót hefur verið frábært. En ég er ansi hræddur um að áhugi ansi margra á þessu móti deyji endanlega í kvöld ef að Ítalía vinnur Spán.

Það er allavegana ljóst að fyrir okkur Liverpool aðdáendur, þá eru eingöngu Spánverjarnir okkar eftir í mótinu og ef þeir detta út í kvöld, þá verða engir fulltrúar frá Liverpool í undanúrslitunum (það er nú þegar enginn Manchester United maður eftir í keppninni og Arsenal og Chelsea eiga bara einn fulltrúa – allavegana þegar ég fer yfir þetta eftir minni)

Ég var að koma í bæinn eftir frábæra helgi (mig grunar miðað við lítið líf á síðunni að fleiri hafi verið utanbæjar) og er enn ekki almennilega búinn að átta mig á hollensku hörmunginni, sem ég horfði á í gær. Það er hálf súrealískt að ég skuli vera orðinn einhver sérstakur stuðningsmaður Dirk Kuyt, en að mínu mati var það fráleit ákvörðun hjá van Basten að taka Kuyt útaf fyrir van Persie í hálfleik í gær. Jú, ég efa það ekki að van Persie bauð uppá meira sóknarlega en Kuyt, en það kom vel í ljós hversu mikilvægur Kuyt vörnina líka að Rússarnir hreinlega léku sér að því að fara upp vinstri kantinn, sérstaklega í framlengingunni.

En allavegana, Rússar spila skemmtilegan fótbolta og allt það, en ég hreinlega get ekki einu sinni gert mér upp spennu ef að undanúrslitin í EM verða annars vegar Tyrkland – Þýskaland og hins vegar Ítalía – Rússland. Ég mun eflaust horfa á þessa leiki, en ég verð ekki spenntur.

Þannig að vonir flestra Liverpool stuðningsmanna eru sennilega bundnar við spænskan sigur í kvöld.

Fabio Cannavaro heldur því fram í viðtölum í dag að David Villa og Fernando Torres myndi saman besta framherjapar í heimi í dag og ég ætla alveg að sleppa því að vera honum ósammála. Það er nokkuð öruggt að Torres verður eini Liverpool maðurinn í byrjunarliðinu í dag með Alonso, Reina og Arbeloa á bekknum.

Það er líka alveg ljóst að ef að Spánverjar klára ekki Ítali í dag, þá eru þeir aumingjar. Ítala vantar m.a. Cannavaro, Pirlo, Gattuso og Totti ogSpánverjar eru að mínu mati með besta mannskapinn á þessu móti. Þeir eru með stórkostlega miðju í Silva, Xavi, Iniesta og Senna. Þeir eru með frábæran makvörð og sæmilega varnarmenn. Og þeir eru með besta framherjapar í heimi: David Villa, sem var besti framherjinn á Spáni síðasta tímabil og Fernando okkar Torres, sem var besti framherjinn í ensku úrvalsdeildinni á síðasta tímabili. Ef þetta lið getur ekki unnið vængbrotið lið Ítala, þá eru Spánverjar einfaldlega farnir sjálfir að trúa því að á þeim hvíli einhver bölvun og að þeir muni aldrei komast langt á stórmótum.

Spánverjar eru klárlega með besta liðið sem er eftir í keppninni og það væri sigur fyrir fótboltann ef að þeir kæmust áfram í dag. Það yrði allavegana gleiðefni fyrir langflesta Liverpool aðdáendur.

Áfram Spánn!

Jæja, þá er riðlakeppninni á EM 2008 lokið. Ég verð að viðurkenna að eftir fyrstu fimm leiki mótsins var ég að verða hálf þunglyndur yfir þessu móti. Tékkar höfðu stolið sigri gegn Sviss í eina dauðafæri dapurs opnunarleiks, Portúgalir höfðu unnið Tyrki í tíðindalitlum leik, Þjóðverjar og Króatar höfðu unnið skyldusigra og á mánudeginum fyrir einni og hálfri viku gerðu Frakkar og Rúmenar markalaust jafntefli í leik sem er enn leiðinlegasti leikur mótsins hingað til. Ég var við það að slökkva á sjónvarpinu og gera eitthvað annað við sumarið.

Þá gerðist svolítið. Hollendingar og Spánverjar mættu á svæðið, og skyndilega lifnaði yfir mótinu. Ég hef svo sem ekki horft á alla leikina en ég get tekið undir með það að þetta mót hafi heldur betur staðið undir væntingum, ef frá eru taldir fyrstu fimm leikirnir eða svo. Viðureign Tyrklands og Tékklands frá síðustu helgi er t.a.m. klassísk viðureign, og Hollendingar gleyma seint stórsigrum á Ítölum og Frökkum, né heldur Rússar frábærum sigri sínum í gær á Svíum.

Framundan eru 8-liða úrslitin og af því að ég er í einhverju upphitunarfráhvarfi og sakna þess að spá í leiki ætla ég að hnoða í eins og eina spá hérna. Þið vitið öll hvað ég er annálaður alsjáandi þegar kemur að því að vita úrslit fyrirfram þannig að ef þið viljið ekki vita hvernig leikirnir fara, ekki lesa lengra. :)

Fimmtudagur: Portúgal – Þýskaland

Þetta er hörkuspennandi viðureign. Portúgalir byrjuðu mótið sterkt en gerðu í brók með því að láta varaliðið sitt tapa í síðasta leik. Sá leikur skipti engu máli, en maður spyr sig hvort þeir hafi tapað niður stuðinu sem þeir voru í með þeirri ákvörðun. Þjóðverjar aftur á móti fóru frekar auðveldlega í gegnum riðil sinn en töpuðu samt fyrir Króötum og lentu því í öðru sæti. Engu að síður er vöxtur í þessu þýska liði og menn afskrifa það ekki, svo einfalt er það bara.

Mín spá: Þýskaland vinnur í hörkuleik. Einar Örn fær loks að sjá Ronaldo og Nani fara í grátsleik. :)

Föstudagur: Króatía – Tyrkland

Króatarnir hafa verið eitt besta liðið í mótinu til þessa og eru að mínu mati hreinlega líklegir til að fara alla leið í þessu móti. Þeir sem telja Tottenham hafa verið að borga of mikið fyrir hinn unga Luka Modric þurfa að horfa á króatíska landsliðið spila, þessi drengur er algjört dýnamít og það segir allt sem segja þarf um þetta lið að þeir eru að rústa sumum af bestu liðum Evrópu (í alvöru, 2-0 sigur á Þjóðverjum var of lítið miðað við gang leiks) án markahæsta leikmanns undankeppninnar, Eduardo da Silva.

Mín spá: Tyrkirnir eru baráttuglaðir en Króatarnir verða of sterkir fyrir þá og fara áfram úr þessari viðureign.

Laugardagur: Holland – Rússland

Úff! Þetta er að mínu mati athyglisverðasti leikur 8-liða úrslitanna, og eru hinir leikirnir þó ekkert slor. Hollendingar hafa, eins og Spánverjar, verið sérfræðingar í að toppa á vitlausum tíma í undanförnum stórmótum. Það lék einfaldlega ekkert lið nálægt því jafn góða knattspyrnu og Hollendingar í riðlakeppninni en maður hlýtur að spyrja sig hvort þeir hafi toppað of snemma. Rússar hins vegar byrjuðu mótið á að láta Spánverja niðurlægja sig en hafa í kjölfarið blómstrað og eftir frammistöðu þeirra gegn Svíum í gær væri algjört rugl að afskrifa þá. Gleymið því heldur ekki að þjálfari þeirra, Guus Hiddink, er hollenskur og þekkir spilamennsku og hugsanagang þeirra appelsínugulu betur en flestir.

Mín spá: Ég held jafnan með Hollandi á stórmótum en ég held að Guus Hiddink sé færari stjóri en Van Basten. Hollendingar toppuðu of snemma og Rússar taka þá í þessum leik.

Sunnudagur: Spánn – Ítalía

8-liða úrslitunum lýkur með látum á sunnudag þegar heimsmeistarar Ítala mæta Spánverjum, sem ég held að flestir séu að spá velgengni í þessu móti. Ef bæði lið væru með sína sterkustu menn myndi ég spá Ítölum sigri, enda eru þeir frægir fyrir að fara hægt af stað í stórmótum (eins og í ár) en vaxa svo ásmegin og fara alla leið. Þeir misstu hins vegar Fabio Cannavaro í meiðsli rétt fyrir mót, sem hefur háð þeim mjög í mótinu til þessa, og til að toppa það verða þeir án bæði Pirlo og Gattuso á miðjunni í þessum leik. Það held ég að sé einfaldlega of stór biti.

Mín spá: Spánverjar vinna Ítali af einni einfaldri ástæðu: hvaða varnarmaður Ítala getur stoppað Fernando Torres og David Villa?

Sem sagt, samkvæmt minni spá fáum við Þýskaland, Króatíu, Rússland og Spán í undanúrslit EM 2008. Þetta er skjalfest, og þið vitið að ég hef alltaf rétt fyrir mér stundum. ;)

Þrír Liverpool menn léku fyrir Spán í kvöld. Torres var hvíldur en Reina, Arbeloa og Xabi Alonso voru allir í byrjunarliði Spánverja og þar af var Xabi Alonso fyrirliði. Ég sá ekki leikinn en ef menn vilja ræða frammistöðu þeirra, þá hvet ég alla til þess.

Jæja, ég ákvað að henda inn stuttri færslu fyrir Spánar leikinn þar sem ábyggilega einhverjir vilja tala um þann leik.

Mér sýnist Spánn stilla upp sama liði og gegn Rússlandi. Það þýðir að Torres er frammi með David Villa. Reina, Arbeloa og Alonso eru allir á bekknum hjá Spáni.

Jæja, okkar maður Dirk Kuyt er í byrjunarliði Hollendinga, sem mér sýnist vera óbreytt frá stórkostlegum leik gegn Ítalíu.

Við báðir ritstjórar Kop.is erum auðvitað miklir Hollands-aðdáendur og því fáránlegt að við skulum ekkert hafa bloggað um frammistöðu Kuyt (ég var reyndar mikill gagnrýnandi Kuyt alveg þangað til að sirka 2 mánuðir voru eftir af síðasta tímabili), því hann var frábær gegn Ítalíu og lagði upp tvö mörk.

Dirk Kuyt heldur því mönnum einsog Arjen Robben og Robin van Persie fyrir utan liðið og er í þriggja manna sóknarmiðjulínu með Van der Vaart og Wesley Sneijder með van Nilsteroy einan fyrir framan þá. Þetta er auðvitað nákvæmlega sama uppstilling og Rafa spilaði með seinni part síðasta tímabils og Kuyt blómstraði í hlutverkinu hægra megin, sérstaklega í allra stærstu leikjunum í Meistaradeildinni.

Við vonum að hann spili álíka vel í dag og gegn Ítalíu. Hjá Frakklandi vekur það athygli að Henry er komin inn fyrir Anelka (sem var ólýsanlega lélegur gegn Rúmeníu). Benzema dettur einnig á bekkinn. Þetta verður fróðlegt.

Áfram Dirk Kuyt!