Það eru ár og dagar síðan ég hef skrifað upphitun á þessa síðu. En fyrir þennan stórleik ætlum við Kristján Atli að taka að okkur umfjöllunina – ég með upphitun og hann skrifar síðan skýrslu á sunnudaginn. Við vitum vel að andlegt ástand okkar Liverpool manna verður ekki gott ef að Liverpool tapar þessu leik, þannig að hvað er betra en að fá þá hinn sí-bjartsýna Kristján til að peppa okkur upp í þunglyndinu, svo að við verðum ekki alveg óborganlega leiðinleg í páskaboðunum. Hann er líka auðvitað manna bestur í að skrifa leikskýrslu þar sem hann rakkar Man U niður fyrir það hveru ömurlega lélegir þeir voru í 5-0 tapleik gegn okkar mönnum.

Allavegana, okkar menn fara á Old Trafford á sunnudaginn til að spila við Englandsmeistarana og núverandi forystusauði í ensku deildinni. Rafa hefur tapað öllum leikjum sínum á Old Trafford hingað til og það er ekki óvitlaust að rifja þá aðeins upp.

Fyrsta tímabil Rafa [tapaði Liverpool 1-2 á Old Trafford](http://www.kop.is/2004/09/20/21.31.11/). Þá skoraði Mikael Silvestre 2 skallamörk framhjá Jerzy Dudek, en á milli markanna skoraði John O’Shea sjálfsmark eftir skalla frá Steve Finnan. Sá leikur var afleitur, sérstaklega fyrri hálfleikurinn þar sem að Ronaldo var allt í öllu í sóknarleik Man U (surprise!) og einnig áttu Rio Ferdinand (sem virðist alltaf spila frábærlega gegn Liverpool) og Silvestre góðan leik.

Tímabili seinna kom svo annað tap [0-1 á Old Trafford](http://www.kop.is/gamalt/2006/01/22/17.52.18/). Það tap var hræðilega sárt. Liverpool var betra liðið allan tímann og Rio fokking Ferdinand bjargaði meðal annars á marklínu. Hann bætti svo um betur og skoraði með skalla á **91. mínútu**. Hræðilegt tap!

Á síðasta tímabili kom svo algjörlega afleitur [0-2 tapleikur](http://www.kop.is/2006/10/22/13.41.29/) þar sem Liverpool var einfaldlega miklu lélegra liðið. Þar skoruðu Paul Scholes og Rio! Ferdinand aftur. Sá leikur var fjórða tap Liverpool á útivelli í röð og eftir þann leik má í raun segja að titilbaráttan hafi endanlega verið úr sögunni og það í október. Þannig að árangur Rafael Benitez á Old Trafford hefur verið vægast sagt lélegur. Þrír leikur, þrjú töp og aðeins eitt mark skorað (og það var sjálfsmark).

Og nú mætum við aftur á Old Trafford og Manchester United sitja á toppnum og hóta því að færast enn nær okkur í fjölda enskra meistaratitla. Eigum við einhvern sjens?

Ég er á því og það er ekki bara sólin sem hefur áhrif á mig. Ég ætla að fara yfir þetta í nokkrum hlutum. Byrjum fyrst á að skoða byrjunarliðið frá því í leiknum á síðasta tímabili á Old Trafford. Lið Liverpool þann dag var svona:

Það er alveg ljóst að í þessu liði voru margir veikir hlekkir. Hyypia og Alonso léku afleitlega þann dag. Gerrard var á hægri kantinum, Garcia lék oftast ekki vel í stóleikjum í deildinni og svo voru þarna Sissoko og Gonzalez.

Á morgun er hins vegar líklegt að í stað Sissoko verði kominn [Javier Mascherano](http://youtube.com/watch?v=lm45jyf9gpk) (Hérna er annað [myndband](http://youtube.com/watch?v=IV5QZrXli2w) með betri tónlist), að í stað Gonzalez verði [Ryan Babel](http://youtube.com/watch?v=ULTksfsqpWA) og að í stað Kuyt verði [Fernando Torres](http://youtube.com/watch?v=z_wIjJjOuNk)) (og Kuyt tekur svo stöðu aftar á vellinum í stað Garcia). (Smá útúrdúr, er það ekki magnað hversu lélagn tónlistarsmekk þessir Youtube fótboltaklipparar eru með?) Þetta eru klárlega þrjár breytingar þar sem Liverpool liðið styrkir sig gríðarlega. Ef ég ætti að giska á uppstillinguna fyrir sunnudaginn, þá myndi ég segja að hún yrði svona:

Á bekknum: Itandje, Aurelio, Lucas, Crouch, Benayoun.

Þetta er einfaldlega lið sem á á góðum degi að geta unnið hvaða lið sem er. Ég held að Rafa haldi sig við sama leikkerfið. Ég vona að hann fari ekki útí einhverjar gloríur einsog að hvíla Babel eða eitthvað annað slíkt. Vafaatriðin eru aðallega í vörninni. Hvaða bakverðir byrja inná og hver verður með Carra í vörninni? Ég held að Riise verði í vinstri bakverðinum til að reyna að stoppa Ronaldo (mér myndi allavegana líða betur með Riise þar heldur en Aurelio). Spurningin er hvort að Rafa geri eitthvað meira til að stoppa Ronaldo, einsog til dæmis að hafa Aurelio í vörninni og Riise vinstra megin í stað Babel.

Svo er það spurning hvort að Hyypia eða Škrtel verði með Carra. Hyypia var afleitur í Old Trafford og gegn svona fljótu liði einsog United, sem verður ekki með einn af sínum bestu skallamönnum (Rio), þá myndi ég halda að Škrtel yrði í vörninni með Carra.

Bestu fréttirnar varðandi United eru auðvitað þær að **Rio fokking Ferdinand** er meiddur í baki og verður sennilega ekki með (þótt ég myndi ekki beint fá sjokk við að sjá hann skokka inná völlinn á morgun). Hann hefur ítrekað verið okkur gríðarlega erfiður og hann hefur sennilega verið besti varnarmaðurinn í ensku úrvalsdeildinni í vetur, þannig að Man U liðið myndi missa mikið við að hann yrði ekki inná. Þá er spurning hvort að Pique haldi áfram með Vidic (hann spilaði gegn Bolton).

Gegn Bolton spilaði Ronaldo í raun frammi (að mér er sagt). Van der Saar á svo að vera orðinn heill. Ég ætla að tippa á þessa uppstillingu hjá Man U:

Á bekknum: Kuzzzsszkszak, Schoes, Fletcher, Saha, Giggs

Vörnin gegn Bolton var víst mjög shaky og United fékk á sig tvö mörk sem voru dæmd ógild. Og það var gegn Bolton! Það getur því allt gerst gegn Fernando Torres, Gerrard og co.

Ef það er eitthvað lið í efri hluta ensku úrvalsdeildarinnar, sem snýst meira og minna um frammistöðu eins manns, þá er það Manchester United með **Cristiano Ronaldo**. Þetta portúgalska helvíti hefur einfaldlega verið besti leikmaður ensku úrvalsdeildarinnar á þessu tímabili. Við erum að vissu leyti búin að venjast því hversu ótrúlega magnaður hann er, en það að skora 33 mörk í 32 leikjum og það verandi hægri kantmaður er einfaldlega **stórkostlegt** afrek. Á meðan að Kaká hefur horfið á Ítalíu, Messi er alltaf meiddur og Ronaldinho er ekki skugginn af sjálfum sér, þá er ég einfaldlega á þeirri skoðun að á morgun verði á vellinum heitasti framherji í heiminum í dag, besti miðjumaður í heimi og besti kantmaður/leikmaður í heimi í þeim Fernando Torres, Steven Gerrard og Cristiano Ronaldo.

Ronaldo hefur einfaldlega allt sem hægt er að hafa uppá að bjóða í sóknarleik. Hann hefur slíka tækni að maður starir oft gapandi á hann. Hann er ótrúlega sterkur og alveg lygilega fljótur og svo nýtir hann færi sín og býr yfir einhverri [mögnuðustu skot-tækni](http://mysoccermedia.com/index.php?module=detail&video_id=723&lang_id=1), sem ég hef séð. Það er óþolandi að segja það (og því ætti ég kannski að hætta þessari lof-ræðu) en Ronaldo er einfaldlega stórkostlegur knattspyrnumaður.

En málið er líka að þessi stórkostlega frammistaða hjá Ronaldo hefur gert það að verkum að hún hefur breitt yfir öll vandamálin sem eru í herbúðum Manchester United. Auðvitað þýðir ekkert að velta sér uppúr því hvar Man U væri án Ronaldo, þar sem að þeir eru með hann og það því tilgangslausar vangaveltur sem svekkja okkur bara. En það er hins vegar margt sem er að hjá Man U.

Carlos Tevez hefur til að mynda ekki verið neitt sérstakur fyrir Man U á þessu tímabili og það sama má segja um miðjuna og vinstri kantinn hjá þeim. Ég leyfi mér einfaldlega að fullyrða að enginn af þessum leikmönnum kæmist í lið hjá Liverpool: Carrick, Hargreaves, Anderson, Sholes. Enginn! Enginn af þeim er að fara að slá Mascherano, Alonso eða Gerrard útúr liðinu. Demento hefur eytt fáránlegum upphæðum í þessa miðjumenn (fyrir utan Scholes auðvitað) og þeir kosta allir meira en okkar dýrasti miðjumaður. En þrátt fyrir það þá hefur enginn af þeim verið neitt sérstaklega sannfærandi.

—

Þessi leikur á sunnudaginn verður einfaldlega að vinnast á miðjunni fyrir Liverpool. Alonso og Masche verða að stjóra miðjunni og Gerrard verður að ná sér á strik í sínu frjálsa hlutverki. Og við verðum einfaldlega að ná að hemja Cristiano Ronaldo og alls ALLS ALLS ALLS ekki gefa United aukaspyrnur nálægt teignum. Ef einhver á að verja þessar spyrnur, þá væri Pepe Reina frábær kandídat, en mér finnst samt algjör óþarfi að gefa honum þá æfingu.

Það er alveg ljóst að þetta verður baráttuleikur á sunnudaginn og ég myndi alls ekki búast við mörgum mörkum. Ég ætla þó að leyfa mér að spá okkur 1-2 sigri. Það er einfaldlega kominn tími á sigur á Old Trafford. Við höfum ekki unnið United á Old Trafford í [nærri því fjögur ár](http://lfchistory.net/viewgame.asp?game_id=2480) eða síðan að Danny Murphy skoraði úr vítaspyrnu, Michael Owen var í framlínunni, Stephane Henchoz í vörninni og Bruno Cheyrou á bekknum.

Liverpool hefur núna unnið 6 leiki í röð í öllum keppnum. Við unnum Ítalíumeistarana á þeirra heimavelli og líka á Anfield. Við erum með Torres og Gerrard í frábæru formi og miðjan okkar er firnasterk. Við getum vel unnið þetta lið.

**Áfram Liverpool. YNWA!**