Ef þið eruð að horfa á Arsenal – Birmingham veit ég að hugur ykkar, eins og minn, liggur sennilega fjarri Anfield akkúrat núna. Eduardo da Silva var að fótbrotna og það er með því verra sem ég hef séð, menn eru að tala um að ferillinn hjá honum gæti jafnvel verið búinn. Sannarlega ógeðslegt brot og ógeðsleg tækling hjá Martin Taylor, sem fékk beint rautt fyrir á 3. mínútu leiksins. Ég vona að Eduardo jafni sig á þessum meiðslum.

Hvað sem því líður, þá er byrjunarlið dagsins í Liverpool-leiknum nær óbreytt frá því gegn Internazionale á þriðjudag. Eina breytingin er að Arbeloa kemur í liðið í stað Carragher, sem er í leikbanni:

**Bekkur:** Itandje, Skrtel, Riise, Benayoun, Crouch.

Þetta er feykisterkt lið og ég er alveg sammála Benítez í því að reyna að halda bara áfram þar sem frá var horfið gegn Inter. Þetta lið á að geta tekið Boro í nösina í dag!

Áfram Liverpool!

Kæru Púllarar! Eru allir komnir á jörðina? Inter sá ekki til sólar og á morgun, laugardaginn 23. febrúar, kl. 15:00 munu fórnarlömbin okkar á Anfield vera Middlesbrough! Við hljótum að gera kröfu um sigur – eins og alltaf – en hvernig verður stemmningin? Ég renndi yfir leikjaprógrammið okkar hingað til og í eina skiptið sem við höfum tapað leik beint á eftir leik í meistaradeildinni, var á móti Man U í desember. “Ancient history”. Förum aðeins yfir nokkrar staðreyndir:

- Staðreynd 1: Við eigum í harðri baráttu um fjórða sætið í deildinni við Everton, Aston Villa, Manchester City og mögulega Portsmouth ef við viljum lækka í okkur rostann enn meir
- Staðreynd 2: Við erum ekki í góðum málum varðandi varnarmenn fyrir leikinn á morgun
- Staðreynd 3: Middlesbrough hefur skorað næstfæst mörk í deildinni!
- Staðreynd 4: Það var lið frá Liverpool sem sigraði Middlesbrough í deildinni síðast

Staðreyndir eru staðreyndir, tölur eru tölur, ég er naut og ég veit að Middlesbrough hefur strítt toppliðunum – unnu t.d. Arsenal í byrjun desember. En með meiðsli okkar manna í huga, með marka-ekkilengur-þurrð Dirk Kuyt í huga … með baráttuna framundan um fjórða sætið í huga … þá hlýtur Benitez (og auðvitað allir liðsmenn) að þjappa liðinu saman og sýna hvað í þeim býr. Við eigum 13 leiki eftir – þar af tvo útileiki gegn toppliðunum tveimur. Hvað ætlum við að gera? Klúðra tímabilinu alveg eða “redeem ourselves” og sýna stolt og leikgleði þennan síðasta þriðjung mótsins sem er að hefjast? Vissulega er staða okkar góð í meistaradeildinni, en við skulum ekki afskrifa Inter og fara í þennan Boro leik með einhverju öðru hugarfari en við sýndum á móti Inter.

Gefum Benitez aðeins orðið (tekið af opinberu síðunni):

“We have two targets, clearly. One is the Champions League and the other is to finish in the top four. We have four games before Inter Milan and we must try to win these games. — Our idea is to think about these four games and after that Inter will be a very tough game. The key is to be sure we are in the top four.”

Svo mörg voru þau orð, … ókei, þau voru miklu fleiri en þetta er eitthvað sem ég vill heyra! Ég vill fá brjálað keppnisskap í alla leiki, og þar eru lið eins og Middlesbrough ekkert undanskilin. Þó svo að liðið hafi skorað næstfæstu mörkin í deildinni, þá geta þeir alveg tekið upp á því að skora fleiri mörk en við á morgun. En það mun ekki gerast ef baráttan er til staðar. Já, það eru fjórir leikir þar til einvígið við Inter Milan verður til lykta leitt, og fókusinn er alltaf á næsta leik. Þetta er einfalt, er það ekki?? Spáum aðeins í liðið:

Andlega hlið Kuyt (mynd fengin af uefa.com) er vonandi á uppleið og með það í huga (og markið sem hann skoraði), ásamt trú Rafa á hann, þá spái ég honum í byrjunarliðið ásamt Torres frammi. Ef Aurelio kemur inn, þá er það væntanlega fyrir Riise. Alonso … kemur hann í staðinn fyrir Mascherano? – vandi er um þetta að spá. En Carra spilar ekki vegna leikbanns og spurning hvort Insúa spili eitthvað – Lucas mögulega, en þá fyrir hvern? Ég get sagt það, að ég hlakka mikið til þess tíma þegar Agger byrjar að spila aftur. Mér finnst Hyypia hafa staðið sig mjög vel í sínu hlutverki þennan vetur (búinn að spila mun meira en hann gerði í fyrra!) en eigum við ekki að gefa honum smá break í einn eða fleiri leiki? Ég hef lesið ólíkar fregnir af Skrtel, en ef hann er heill heilsu og í formi, þá hendum við Riise út og setjum Arbeloa eða Aurelio á kantinn og Skrtel við hlið Hyypia.

Spá: Þetta verður mikill baráttuleikur, og ég hef mikla trú á mínum mönnum. Ég trúi því að andlega hliðin sé á uppleið og baráttan verði til staðar. Mig langar þar af leiðandi mjög mikið til að spá 4:0 sigri okkar manna þar sem Torres skorar þrennu … en ég ætla samt að vera raunsærri og spá 2:0 þar sem Kuyt og Torres skora í seinni hálfleik.

Gömlu góðu sannindin eru gild hér: VIÐ VERÐUM AÐ VINNA!

Koma svo – áfram Liverpool!!!

Dömur mínar og herrar. Þá er komið að því … 16 liða úrslit í meistaradeild Evrópu að hefjast og okkar menn auðvitað á fullu með í þeirri keppni. Á morgun, þriðjudaginn 19. febrúar kl. 19:45, munum við mæta Ítalíumeisturunum Inter Milan og ef það er eitthvað sem Rafa kann, þá er það að ná árangri í Evrópukeppninni. Ef liðsmenn hafa áhuga á því að ná einhverjum árangri þetta tímabil, þá er þetta keppnin. Þetta er möguleikinn!

En hversu erfitt verður að ná einhverjum árangri? Eru ekki Inter menn miklu betri en við? Höfum við eitthvað í þá að gera, miðað við hvernig leikgleði, leikform, spilamennska, sjálfstraust og innanbúðarmál hafa verið? Við komumst Krísuvíkurleiðina áfram í þessari keppni, en verður það – ásamt fyrrnefndum atriðum – okkur til gróða eða ekki?

Á þessum tímapunkti vil ég minna á að við unnum Barcelona á Nou Camp, við unnum Juventus á Anfield, við höfum slegið Chelsea út í þessari keppni oftar en einu sinni … við höfum alltaf vitað að ekkert er ómögulegt fyrirfram í þessari keppni. Ef Barnsley getur unnið Liverpool á Anfield (já já, strá salti í sárin, Doddi!), þá hlýtur Liverpool – sem er the underdog hérna – að geta unnið Inter Milan.

“Liverpool’s current form is misleading. It will be hard to beat them. We know they are a great team with quality players and a great coach in Rafael Benitez.”

Þetta segir þjálfari Inter Milan, Roberto Mancini. Auðvitað spilar sálfræði alltaf hlutverk í svona baráttu, en ég hef mikla trú á þessum orðum ítalska þjálfarans.

“”It’s a major, major blow to go out of the FA Cup to a lower league team at Anfield. We realise that’s not good enough. — But we’re going to have to get over this quickly because the Champions League is massive for us now. It’s the only thing we have left that we can win.”

Jamie Carragher mælir hér orð að sönnu. Hann talar einnig um það að andrúmsloftið verði rafmagnað á Anfield á morgun, baráttan verði til staðar – liðið vill gera betur og þó svo að sigur á móti Inter myndi ekki bæta upp tapið gegn Barnsley … þá myndi það virka sem vítamínsprauta á baráttuna sem augljóslega er framundan í deildinni (fjórða sætið sko) og í CL-deildinni.

Rafa hefur mætt Inter tvisvar sem þjálfari (með Valencia) og í bæði skiptin komst Inter áfram. Árangur Inter gegn enskum liðum í 24 leikjum er þessi: 9 sigrar, 5 jafntefli, 10 töp. Liverpool hefur mætt ítölskum liðum sex sinnum á Anfield, sigrað fjórum sinnum og tapað tvisvar. Já … tölfræði er einkar skemmtileg stundum, en eins og ég segi alltaf og geri það nú: hún vinnur ekki leiki!!!!

Ég hef fulla trú á því að Rafa peppi sína menn upp og að öllu verði tjaldað til. Torres hlýtur að koma inn og skv. fréttum úr síðasta leik, þá finnst öllum að Babel eigi rétt á því að byrja inn á. Við höfum sosum sagt að Crouchinn okkar hafi átt það líka nokkrum sinnum, en vont er að lesa í Rafa hvað þetta varðar. Að þessum orðum sögðum hins vegar, þá segi ég strax að ég býst við 3-4 vitleysum hjá mér í spá um liðsuppstillingu – en ætla að veðja á þennan fák:

Bekkurinn: Itandje – Arbeloa – Alonso – Kewell – Kuyt

Pennant inni og Kewell út? — Rafa mun sækja í reynsluna hvað varðar vörnina held ég og miðjan verður gjörsamlega crucial í þessum leik, og þar VERÐUR fyrirliðinn okkar að standa sig. Ég veit að kunningi minn mun ekki samþykkja með bros á vör spá mína með Riise í byrjunarliðinu … en ég ætla samt að skjóta á þetta. Munið eftir veseninu á milli Riise og Bellamy fyrir Barca-leikinn fræga? Hvernig fór það? Og sóknin … Torres verður þar aðalmaðurinn en ég hef trú á að Crouchinn eigi eftir að reynast okkur vel, eins og svo oft áður. Við spilum eflaust varlega, en spilum til sóknar og sigurs. Ég vil líka trúa því að miðjan taki meira þátt í uppbyggingu spilsins núna en í öðrum leikjum. Háar og ónákvæmar sendingar langt fram á völl mega ekki sjást svona mikið!

Spá: Þetta verður ROSALEGUR leikur! Höfum við ekki einmitt séð það hjá Liverpool í þessari keppni, að þegar eymdin virðist vera í næsta nágrenni, þá rífur liðið sig upp og minnir okkur á að taka það alvarlega??? Mikil barátta, mikið taugastríð – og ef þeir ná að halda Zlatan og félögum niðri, pirra Inter menn dálítið og setja inn 1-2 mörk á undan þeim … þá hef ég mikla trú á mínum mönnum. Ég ætla að spá Liverpool sigri (auðvitað!! kemur eitthvað annað til greina??? Ha??) – þetta fer 3:1 þar sem Torres, Gerrard og Crouch skora, en Zlatan minnkar muninn í lokin með umdeildu marki!

ÁFRAM LIVERPOOL!! — Hafið trú á ykkar liði!!!

Liverpool og Barnsley munu leiða saman hesta sína á Anfield kl. 15:00 á laugardaginn. Nú eru 16 lið eftir í FA Cup og þar af eru einungis 6 lið í Premier League, þetta er ástæðan fyrir því að ég elska þessa keppni. Allt getur gerst og þessi keppni er leikmönnum gríðarlega mikilvæg, sérstaklega Englendingunum.

Ég held að ef Liverpool FC ætlar sér titil á þessu leiktímabili þá sé FA Cup raunhæfasti möguleikinn. Við erum ekki að fara að sigra deildina, það er á hreinu, spurning með Meistaradeildina, litlir möguleikar. Ég veit ekki, núna er allt fyrir mér í þeirri keppni bónus miðað við það sem á undanförnum vikum hefur gengið. Eins og áður segir eru einungis 6 úrvalsdeildarlið eftir í þessari keppni sem eykur möguleika okkar á að sigra FA Cup, EN, keppnir eins og þessi vinnst ekki með því hugarfari og leikgleði sem leikmenn Liverpool hafa sýnt í síðustu leikjum. Til að sigra hverja umferðina af fætur annari í þessari keppni þarf að spila af ákefð og grimmd, það þarf að spila fast og fyrst og fremst að spila með hjartanu.

Þá að meiðslafréttum okkar manna. Mér skilst að þeir Torres, Voronin, Skrtel, Hyypia, Arbeloa og Aurelio séu allir meiddir. Torres er tæpur en ég sé ekki mikinn tilgang með að nota hann í þessum leik, kannski leyfa honum að taka síðasta korterið. Hyypia er líka tæpur og hafsentarnir eru því höfuðverkur fyrir Rafa að velja. Ef ég væri við stjórnvöl á Anfield þá myndi ég hreinlega hvíla gamla Finnan og leyfa Mikel San Jose að spreyta sig. Ég er á því að ungu strákarnir eigi að fá sénsa, til hvers að hafa unga og efnilega leikmenn ef þeir æfa bara og fá aldrei stóra leiki? Ég hef reyndar lítið heyrt um San Jose, en hann var á bekknum á Stamford Bridge síðasta sunnudag og er eiginlega eini heili kosturinn við hlið Carra á morgun. Skrtel meiddist á kálfa á æfingu í gær og því er hann líklegast ekki að fara að spila á morgun, en vonandi nær hann leiknum gegn Inter á þriðjudaginn.

Ég held að Rafa komi til með að hugsa mikið um leikinn á þriðjudaginn gegn Inter þegar hann velur byrjunarliðið fyrir Barnsley leikinn. Það er ekki auðveld þrautin að átta sig á því hvernig liðið verður en ég ætla að tippa á að eftirfarandi leikmenn hefji leika:

Markmaður: Itandje fær bikarleikina og það verður engin breyting á því.

Vörnin: Finnan er pretty much eini hægri bakvörðurinn þar sem Arbeloa er meiddur og þá er það klárt. Carra mun pottþétt vera í miðverðinum og held að Rafa þráist við og tjasli Hyypia saman fyrir leikinn, þó ég sé algjörlega á móti því. Ég veit ekki hvað ég er að hugsa með að setja Insúa í bakkarann (meira ósk heldur en spá) því ég er nánast öruggur á því að Gillzengger þeirra Norðmanna byrji inná, því miður.

Miðjan: Erfitt val. Hvílir hann fyrir þriðjudaginn fyrirliðann og Argentínumanninn, sem er hársbreidd frá því að ganga endanlega til liðs við okkur, ég held það já. Ég vona að Mascherano skrifi undir sem fyrst og að þetta mál verði klárað, það verður þvílíkur léttir!
Því set ég Lucas litla og Xabi á miðja miðjuna. Kantarnir gætu alveg eins verið Benayoun og Kewell en ég tel þessa tvo (Babel og Pennant) vera mun skeinuhættari og þá klárum við Barnsley vonandi fljótt og örugglega. Mér finnst Pennant vera búinn að spila einna best að undanförnu og ég vona að hann haldi áfram að taka rispur.

Sóknartönnin: Hollenski smalahundurinn verður klárlega á sínum stað og maður veltir því fyrir sér hvort það sé nokkuð sauðfé eftir á Bretlandseyjum eftir tignarlega spretti Kuyt um allan völlinn á þessu tímabili. Crouch verður vonandi frammi með honum því við þurfum jú að skora mörk.

Backupin á bekknum verða þá hugsanlega: Reina – San Jose – Benayoun – Gerrard – El Zhar.

Mín spá: Mér finnst orðið erfitt að spá í leiki Liverpool seinni part vetrar. En vonandi breyta menn til og hætta að gera jafntefli, mæti á Anfield með blóð á svuntunum og SLÁTRI þessu liði í fyrri hálfleik! Skyrdollan mín segir mér svo að lokatölur verði 3-0 og markaskorarar verða Crouch og Babel, hún getur ekki sagt mér hver þriðji markaskorarinn verður.

Þar sem þetta tímabil er örlítið skemmt eftir frábæra byrjun, þá væri draumur í dós að fá 4. sætið í deildinni, komast allavega í 8-liða úrslit í Meistaradeildinni og vinna FA Cup.

Koma svo!

Ég horfði á íþróttakappleik um síðustu helgi. Fyrir hinn árlega ‘Superbowl’-leik, sem jafnan er stærsti viðburður bandarískra íþrótta ár hvert, var nær eingöngu talað um hið ósigraða – og að því er virtist óstöðvandi – lið New England Patriots. Hvernig í ósköpunum átti lið sem var með 18-0 árangur á tímabilinu og hafði sett ótal met yfir veturinn, að geta tapað fyrir liði sem var með 13-6 árangur? Svarið var einfalt: það kom ekki til greina. Menn voru svo vissir að blöðin í Boston-borg, heimabæ Patriots-liðsins, voru þegar byrjuð að selja forpantanir á væntanlega bók um hið ósigrandi og fullkomna meistaralið Patriots. Sú bók átti að heita, einfaldlega, 19-0.

Svo fór þó aldeilis ekki og þegar New York Giants skoruðu sigursnertimarkið 35 sekúndum fyrir leikslok urðu margir hissa, en enn fleiri glöddust yfir því sem úrslit leiksins þýddu. Tap Patriots í úrslitaleiknum minnti fólk á það að í kappleik er ekkert öruggt fyrirfram. Fyrri leikir liða, innbyrðis og gegn öðrum andstæðingum, hvort sem um er að ræða síðustu leiki í náinni fortíð eða mörg ár aftur í tímann, allt þetta hefur ekkert að segja þegar tvö lið mætast á kappvelli. Staðan er alltaf 0-0 þegar flautað er til leiks og bæði lið eiga jafna möguleika. Spyrjið bara leikmenn Havant & Waterlooville.

En ef það er eitthvað sem er sannarlega ómögulegt, þá hlýtur það að vera fyrir Úrvalsdeildarlið að mæta til deildarleiks á Stamford Bridge og fara með sigur af hólmi gegn Chelsea FC. Ekki satt? Þeir hafa jú leikið 75 leiki á heimavelli án taps, sem samsvarar heilum fjórum árum af stöðugum deildarleikjum án þess að misstíga sig svo mikið sem einu sinni. Þeir hafa afrekað þetta með þremur mismunandi þjálfurum og gegn öllum mögulegum tegundum enskra knattspyrnuliða. Frá Huddersfield til Manchester United hafa allir enskir áskorendur mátt lúta í lægra grasi, eða alltént ganga af velli án þess að fagna sigri. Chelsea-liðið er svo sterkt á heimavelli að jafnvel í leikjum þar sem þeir hafa leikið hörmulega, verið leikmanni færri og nokkrum mínútum frá tapi (svo sem gegn Aston Villa í desember) hafa þeir samt náð að bjarga sér frá ósigri á ögurstundu.

Þetta lið, á þessum velli, verður einfaldlega ekki sigrað. Þetta er sannarlega hin ómögulega áskorun fyrir hvaða enska knattspyrnulið sem er. Ekki satt?

Ef þið hafið lesið eða hlustað á fjölmiðla hér heima eða erlendis síðustu vikuna hafið þið ekki heyrt neitt annað en það sem kemur fram hér að ofan. Hlutlausir miðlar hafa keppst við að minna á sigurgöngu Chelsea á heimavelli og spá nær undantekningarlaust sigri heimamanna í leiknum á sunnudaginn. Á sama tíma ber nú svo við hjá Chelsea-miðlum netsins að þeir eru orðnir svo öruggir með sig að í stað þess að reyna að fjalla um leikinn sem kappleik tveggja af fjórum bestu liðum Englands nota menn tækifærið til að gera miskunnarlaust, linnulaust og óvægið grín að Liverpool-klúbbnum eins og hann leggur sig (dæmi: 1, 2, 3, 4, 5, 6, 7, 8, 9).

Ef hroki Chelsea-manna er undarlegur þá má segja að þögn Liverpool-tengdra miðla um leikinn sé nánast kæfandi. Reyndar hafa menn um nóg annað að hugsa á þeim bænum, þar sem fréttir af eigendum, þjálfurum og meiðslamálum Liverpool hafa verið svo tíðar síðustu vikurnar að menn hafa varla undan við að uppfæra hörmungarsögu klúbbsins í vetur.

Staðan fyrir leikinn er þessi, í stuttu máli:

Hjá Chelsea eru menn bjartsýnir og horfa uppávið. John Terry og Frank Lampard nálgast leikfært form, auk þess sem þeir hafa þegar endurheimt John Obi Mikel úr Afríkukeppninni og fá væntanlega Michael Essien, Didier Drogba og Salomon Kalou aftur eftir helgina. Andryi Schevchenko nálgast einnig fulla heilsu þannig að innan örfárra vikna gæti Chelsea-liðið skartað fullum leikmannahópi í fyrsta sinn í einhverja mánuði.

Í ofanálag við þetta hafa þeir ekki tapað leik í deildinni – né neinni annarri keppni – síðan Avram Grant beið lægri hlut gegn Manchester United á Old Trafford í deildinni í fyrsta leik sínum, þann 23. september síðastliðinn. Það er einfaldlega frábær árangur, og eins og liðið hafi ekki verið nógu sterkt fyrir gerðu þeir sér lítið fyrir og eyddu meira, nettó, í janúarglugganum í nýja leikmenn en Liverpool eyddu, nettó, í leikmenn allt síðasta sumar. Þannig að í stað þess að sofna á verðinum gagnvart nýjustu erkifjendunum úr norðvestrinu hafa þeir einfaldlega aukið gæðamuninn á leikmannahópum liðanna í janúar, ef eitthvað er.

Hjá Chelsea er fastlega búist við að Avram Grant muni stilla upp eftirfarandi liði:

**Bekkur:** Cudicini, Ferreira, Lampard, Malouda, Pizarro.

Eina breytingin á þessum hópi sem maður sér í hendi er ef Terry er nógu heill til að koma inn á bekkinn. Lampard byrjar væntanlega á bekknum, sennilega ekki reiðubúinn í heilar 90 mínútur strax.

Hjá Liverpool er staðan hins vegar sú að vont hefur versnað undanfarna daga. Auk þess að hafa verið án Daniel Agger, Andryi Voronin, Fabio Aurelio og Alvaro Arbeloa að undanförnu hefur Fernando Torres nú bæst á meiðslalistann, auk þess sem Xabi Alonso er í leikbanni í þessum leik og Javier Mascherano gæti, eftir fáránlegt ferðalag til Los Angeles til að leika landsleik á fimmtudag, verið of þreyttur til að byrja þennan leik.

Fyrir vikið er megnið af byrjunarliði Liverpool, aldrei þessu vant, sjálfvalið. Einu stóru spurningarmerkin eru þessi hér:

• Getur Mascherano byrjað? Annars verður Lucas inni.
• Mun Rafa spila 4-5-1 með Kuyt einan frammi eða verður Crouch með honum á kostnað miðjumanns?
• Hvaða kantmenn verða fyrir valinu?

Persónulega held ég að Rafa ákveði að vera varkár í þessum leik, miðað við að hann hefur ekki beint mannskapinn til að ráðast á þetta Chelsea-lið og reyna að yfirspila þá á þeirra heimavelli. Ég sé hann fyrir mér spila 4-5-1 með vinnuhestinn frammi og stöðuga menn á miðjunni:

**Bekkur:** Itandje, Skrtel, Lucas, Babel, Crouch.

Eina óvissan við þetta lið að mínu mati er ef að Mascherano er ekki klár í að byrja þennan leik. Þá kemur Lucas væntanlega inn í hans stað, en þó gæti Rafa einnig valið að byrja með Mascherano og Lucas báða fyrir aftan Gerrard á þriggja manna miðju. Eins myndi ég persónulega frekar vilja sjá Crouch vera einan frammi en Kuyt en ég giska á að Rafa velji Kuyt fram yfir þann stóra.

**MÍN SPÁ:** Hvað getur maður eiginlega sagt? Í raun getum við valið tvær nálganir á þennan leik. Ég ætla að birta þær báðar hér og þið getið svo valið hvora þeirra þið leggið meiri trú á:

**1:** Blaðamannaumfjöllunin, hroki Chelsea-manna og þögn Liverpool-manna minnir óneitanlega á ‘Superbowl’-leikinn vestan hafs um síðustu helgi. Liverpool-liðið er eins og sært dýr sem hefur þagað þögninni löngu og látið sér nægja að hugsa illa til Chelsea-manna, vitandi það að aldrei þessu vant mega þeir skjóta öllum mögulegum skotum á okkar menn án þess að hægt sé að svara því. Liðið okkar, klúbburinn okkar, er einfaldlega í mýrinni þessa dagana og við vitum það.

Hins vegar er til nokkuð sem heitir karma og eins lengi og lifandi, dauðlegar mannverur fylla þetta Chelsea-lið eru þeir ekki undanskildir áhrifum karma neitt frekar en aðrar lífsins verur. Hroki Chelsea-manna undanfarna daga gæti bent til þess að þeir séu, aldrei þessu vant, of öruggir með sig þegar kemur að heimaleik gegn Liverpool í deildinni og að hið ómögulega geti gerst – þeir geti mætt særðu rándýri án þess að vera viðbúnir árásinni og eigi sér fyrir vikið aldrei von. Jafnvel Súpermann getur fatast flugið ef hann flýgur með lokuð augun. Kannski, bara *kannski*, er þetta Chelsea-lið að vanmeta Liverpool-menn í þetta skiptið.

Leikurinn fer 2-1 fyrir Liverpool. Okkar menn komast snemma í 2-0 gegn sjokkeruðum heimamönnum, en eftir að þeir ná á endanum að jafna sig, minnka muninn og reyna af öllum mætti að bjarga sér enn og aftur frá tapi undir lokin ná okkar menn einhvern veginn að hanga á forystunni og afreka hið ómögulega.

Já, og við skuldum þeim víst eins og eitt rán um hábjartan dag. Ef það er til karma, þá bara hlýtur það að vera Liverpool-megin á sunnudaginn kemur:

**2:** Horfumst í augu við staðreyndirnar. Okkar menn eiga í stökustu vandræðum með utandeildarlið og fallista eins og Sunderland og Derby þessar vikurnar. Okkar menn virðast hrynja ef þeir mæta svo mikið sem minnstu mótspyrnu innan vallar, sem er jú bein afleiðing þess að okkar menn virðast vera að brjóta niður eigin veggi utan vallar án þess að nokkur af okkar mönnum hafi rænu á að stöðva þróunina sem við hin horfum á úr fjarska og reynum af veikum mætti að hindra.

Þetta lið okkar, sem er í molum innan vallar jafnt og utan, er að fara að heimsækja lið sem hefur leikið 75 leiki í röð á heimavelli án þess að tapa. Fjögur ár eru langur tími í knattspyrnu.

Þessi leikur endar 2-0 fyrir Chelsea sem fara nógu létt með hið bitlausa lið Liverpool að Grant og félagar geta hvílt lykilmenn í seinni hálfleik, leyft Lampard að spila sig í form í svona hálftíma og sungið níðsöngva um Benítez og stelsjúka Scousera í níutíu mínútur.

Það er alveg ljóst hvor þessara mögulegu niðurstaðna er líklegri, og það er ykkar að velja hvort þið trúið að hið ómögulega geti gerst. Ég, persónulega, ætla að búa mig undir það versta, en ég vona líka að Lundúnarblöðin séu þegar byrjuð að skrifa dánargreinar tímabilsins hjá Liverpool. Verður þetta erfiður leikur? Já. Munu okkar menn tapa honum? Líklega. Er með öllu ómögulegt að sigra Chelsea á heimavelli? Spyrjið Eli Manning …

**YNWA**

Þá er komið að næsta verkefni liðsins ástkæra frá Liverpoolborg, Liverpool FC. Þrátt fyrir allt mótlætið fæ ég nú enn fiðring í magann og hlakka til að sjá mína menn spila. Auðvitað er ekki verið að keppa um meistaratitil í bili, en alltaf vona ég að maður sjái flottan leik sem vekur hjá manni vellíðun að honum loknum.

Á morgun er vissulega að einhverju að keppa. Það er kannski súrrealískt að fjórða sæti skipti máli í einhverri keppni, en það er nákvæmlega það sem okkar menn eru að keppa að þessa dagana. Ekki hefur unnist sigur í deildinni frá því 26.desember og því löngu kominn tími á að þrjú stig endi í húsi.

Fyrri leik liðanna á Stadium of Light lauk með 2-0 sigri okkar manna laugardaginn 25.ágúst, í leik þar sem ótrúlegustu markaskorarar vetursins, Voronin og Sissoko settu hann. Ákvað að leyfa Momo karlinum að fá mynd af sér hér eftir að hafa lesið hjartnæma kveðju frá honum á offical vefnum!

Gangi þér vel í Tórínó mr. Momo!!!

En þá að morgundeginum og hugsanlegri liðsskipan. Javier Mascherano kemur aftur í liðið eftir leikbann og mun örugglega þýða breytingu á liði frá miðvikudeginum. Samkvæmt óstaðfestum fréttum er allt frágengið í samningi hans við Liverpool nema undirskriftin og vonandi er að hann verði í fantaformi til að halda upp á það! Agger, Voronin og Arbeloa (sem valinn hefur verið í spænska landsliðshópinn) auðvitað enn meiddir. Út frá þessu reynir maður að velja lið líkt Benitez, sem aldrei er auðvelt.

Ssteinn útskýrði ansi margt vel á miðvikudaginn varðandi liðsuppstillingu og því engin ástæða til að rifja upp slysasögur og annað slíkt, þó maður gæti það sannarlega!

Mín hugmynd að liði morgundagsins er:

Ég held semsagt að Norðmaðurinn rauðhærði komi inn í liðið aftur, Pennant byrji hægra megin í stað Benayoun og Babel spili í stað Kewell. Ég bara trúi ekki öðru en Crouch byrji frammi eftir bekkjarsetu heilan leik á miðvikudag. Ég tel þetta líklegasta liðið, þó ég myndi ekki endilega stilla því upp svona, ég vildi sjá Insúa fá leik í bakverðinum og jafnvel Lucas inni á miðju með Gerrard undir Torres, en svona held ég að Rafa stilli upp. Út á það gengur víst pælingin í upphituninni okkar.

Mótherjarnir, Sunderland, hafa ekki átt auðvelt með að safna stigum á Anfield, vonandi verður svo áfram!

Þeir eru í 14.sæti í deildinni, með 23 stig eftir 24 leiki. Þeim hefur gengið hrikalega illa á útivelli, að loknum 12 útileikjum eru þeir með 2 stig, hafa semsagt gert 2 jafntefli og tapað 10, markatalan á útivell er 9-29. Einungis Derby County er með jafn slæman árangur á útivelli í deildinni í vetur.
Það eru margir fjarverandi þessa dagana hjá Sunderlandliðinu. Gamla kempan Dwight Yorke fór á meiðslalistann á þriðjudagskvöldið og er þar ásamt Ross Wallace, Carlos Edwards og Danny Higginbotham úr algengu byrjunarliði þeirra. Að auki er Andy Reid, sem þeir keyptu í gær frá Charlton, líka meiddur.

Michael Chopra kemur aftur úr banni og viðbúið er að Rade Prica, 27 ára Svíi sem þeir keyptu nýlega frá AaB Aalborg fyrir 2 milljónir punda verði ásamt honum í framlínunni í 442 leikkerfi stjórans.

Stjórinn er auðvitað Roy Keane, sem hefur nú reyndar reynslu af því að vinna á Anfield, vonandi þó alls ekki á laugardaginn.

Samantekt og spá.

Ég er alveg ákveðinn í því að reyna að vera jákvæður þessa helgina. Ég trúi ekki öðru en að menn hysji upp um sig buxurnar eftir slakt gengi að undanförnu og klári Sunderlandliðið. Eins og ég sagði áður á Sunderland í miklum vandræðum á útivelli og þar sem allir eru meðvitaðir um slakan árangur okkar á Anfield í vetur koma menn alveg dýrvitlausir í leikinn og sýna það að menn ætla sér að færast nær toppnum!
Ég ætla allavega að vera svo bjartsýnn og spá okkur 2-0 sigri í hörkuleik þar sem Crouch og Torres setj‘ann!

Við skulum öll prófa að senda jákvæða strauma allan tímann og skoða hver afraksturinn verður!

Come on you Reds!!!!