Þá er best að hita aðeins upp. Ég sá ekki Havant slysið, og finnst því vera ár og dagar síðan ég horfði á okkar menn spila síðast. Þetta verður erfiður útileikur, sér í lagi þegar mið er tekið af því í hvernig stuði liðið hefur verið á þessu ári (ef hægt er að kalla það stuð). Ég hef oft sagt það að ég get fyrirgefið mönnum þegar þeir leika illa en reyna að framkvæma hluti og leggja sig alla fram. Það sem ég þoli ekki þegar kemur að fótbolta hjá liðinu mínu, það er að sjá leikmenn inni á vellinum hálf andlausa og áhugalausa. Það er hreint út sagt ófyrirgefanlegt í alla staði. Þetta er nú líklega ástæðan fyrir því að ég hef ekki verið jafn rosalega harður í gagnrýni minni á menn eins og Momo Sissoko og Dirk Kuyt í gegnum tíðina. Þeir reyna alltaf og leggja sig fram í leikjum, en því miður vantar stundum upp á að hlutirnir heppnist, og jafnvel hæfileika. Verst af öllu finnst mér þó þegar fyrirliðinn sjálfur hengir haus í leikjum. Það hefur oft verið talað um það að kannski fái hann meiri gagnrýni en hann ætti skilið, út af sínum standard, en ég er því ekki sammála. Hann á að vera síðasti maður til að hengja haus.

Leikurinn á morgun á eftir að verða erfiður eins og áður sagði. Lykillinn að sigri í honum er hugarfarið (ég veit að ég er ekki að koma fram með nein vísindi hérna, enda aldrei talist einhver vísindamaður). Það hefur lengi verið talað um meðalskussa í liðinu okkar, en þeir eru ekki meiri meðalskussar en svo að þeir myndu allir labba inn í flest liðin í Ensku Úrvalsdeildinni. Mér hefur fundist vanta upp á þessa samkennd hjá leikmönnum, hreinlega leikgleði. Menn fagna mörkum, en það vantar alla ákefð í mannskapinn fyrir utan nokkra aðila. Á morgun vil ég sjá hjartað, minna af hugsun, meira hjarta. Ef við vinnum ekki leikinn á morgun, en menn setja hjartað í þetta, þá get ég meira fyrirgefið leikmönnum. Það skiptir ekki máli í mínum huga hvaða kerfi Rafa leggur upp með. Ég meira að segja geng svo langt að segja að það skipti ekki höfuð máli hvaða leikmenn hann notar í leiknum (Torres, Gerrard, Reina og Carra teljast ekki þar með því þeir EIGA að spila alla alvöru leiki). Nú þýðir ekkert hangs, við erum komnir í bullandi baráttu um að halda okkar áskrift að CL sæti og þann raunveruleika verðum við að horfast í augu við. Jú, við erum ekkert langt frá Chelsea, en úr þessu þá verður allt umfram 4 sætið bara hreinn og klár bónus.

Þá að West Ham. Ég verð að viðurkenna það að ég hef alltaf haft mikið álit á því félagi. Þeir hafa í gegnum tíðina verið duglegir að koma upp með unga stráka úr unglingastarfinu og er það alltaf virðingarvert. Þeir hafa reyndar breyst aðeins núna í seinni tíð (eins og reyndar flest Úrvalsdeildarfélögin) og keypt mikið af mönnum til sín. Björgúlfur er flottur gaur og gerði vel þegar hann losaði sig við Kexið og þá gat ég aftur farið að renna “hýru” auga að þeirra úrslitum (þó svo að ég geti nú ekki sagt að ég styðji liðið eitthvað umfram aðra andstæðinga Liverpool). Ég hafði afskaplega lítið álit á fyrrverandi stjórnarformanni West Ham og sér í lagi ekki eftir samskiptin sem áttu sér stað eftir að við unnum Meistaradeildina árið 2005. En það er nú önnur Elín. Mér hefur reyndar fundist West Ham ekki vera að eyða peningunum sínum á góðan hátt. Þeir eru búnir að sanka að sér mönnum eins og Bowyer, Neill, Bellamy og Dyer. Ég vona félagsins vegna að það séu mjög low profile jólateiti hjá þeim, miðað við hvernig sumir hafa verið á vellinum og utan hans í gegnum tíðina. Svo hafa þeir líka verið að kaupa til sín leikmenn sem hafa verið mikið á meiðslalistum sinna liða. Ég man hreinlega ekki eftir leiktíð t.d. þegar Dyer var heill heilsu og í formi. Ljungberg hefur einnig verið mikið í þessu síðustu árin. En hvað um það, þetta er vel mannað lið og getur á góðum degi unnið flesta andstæðinga sína.

En hvað með okkar lið, hvernig verður því stillt upp? Við þurfum ekkert að ræða Reina neitt í þessu samhengi. Mér skilst að Itandje hafi tekið bikar-Dudek í Havant leiknum, en það skiptir ekki öllu málil hérna. Finnan hefur verið að valda mér miklum vonbrigðum á tímabilinu. Síðustu 2-3 tímabilin hefur hann verið Mr.Reliable og einn allra besti hægri bakvörðurinn í deildinni. Hann hefur hreinlega ekki verið svipur hjá sjón núna. Ég vona því heitt og innilega að Arbeloa sé orðinn heill heilsu. Í miðvörðunum halda þeir félagar áfram að spila saman þeir Carra og Sami, því ég hef ekki heyrt neitt um það að Agger sé að braggast. Þá kemur að hinni stórbrotnu vinstri bakvarðarstöðunni. Þetta er eiginlega svipað og ef þú fengir að velja um hvort þú vilt fótbrotna á skíðum eða á hjóli. Þar sem ég er akkúrat enginn skíðakappi þá vel ég hjólið og vona því að ég sjái Aurelio hefja leikinn. Ég hef þó mjög sterkan grun um það að Rafa sé mér ekki sammála, því mun ég setja Riise inn í uppstillinguna (þó svo að mér sé það þvert að skapi). Miðjan held ég að sé ráðin að 3/4 hluta. Benayoun, Gerrard og Javier munu verða þar og því bara spurning í mínum huga hver af þeim Kewell, Pennant og Babel verði með þeim. Ég ætla mér að giska á að Pennant fái tækifæri á að halda áfram þar sem frá var horfið í Havant leiknum. Frammi verða svo þeir Torres og Crouch. Svona ætla ég því að spá að Rafa stilli upp:

Bekkurinn yrði því á þessa leið: Itandje, Finnan, Babel, Lucas/Alonso og Kuyt.

Nú er bara enn og aftur að duga eða drepast. Ég stórefast um að menn vilji velja seinni kostinn og því hef ég trú á því að menn krumpi sig saman í andlitinu, rífi sig upp á augnhárunum og mæti lifandi og hungraðir til leiks. Ég vil sjá menn trítilóða frá fyrsta hanagali og þar til 300 kílóa flykkið hefur upp raust sína og byrjar að kyrja Svissnesk Alpalög. Ok, ok, er kannski kominn vel yfir strikið, en það er ekkert nýtt. 1-0 forysta gerir okkur akkúrat ekkert gott, það verður að ná þessu öðru marki til að klára leikinn, eins og sýndi sig best gegn Villa um daginn. Ég býst við hörkuleik, við komumst í 0-2 og þeir minnka svo muninn fyrir leikslok og við vinnum góðan 1-2 útisigur. Ég held að Torres haldi áfram að setj’ann, enda ekki gert það mjög lengi á hans mælikvarða og ég ætla að giska á að Pennant komi öllum á óvörum og setji sitt annað mark fyrir félagið. Koma svo, back on track og klárum þetta tímabil með sæmd, og það skal byrja í London.

Á morgun verður sögulegur leikur leikinn á Anfield. Þá kemur liðið sem er 123 sætum neðar en við og freistar þess að komast áfram í ensku bikarkeppninni. Öskubuskuævintýri … “the little engine that could” … Davíð og Golíat … Þetta er bara eitthvað svo súrrealískt og yndislega gaman.

Þetta er í fyrsta skipti í 27 ár sem Liverpool keppir við utandeildarlið í bikarnum, eða síðan liðið keppti við Altrincham árið 1981. Heimasíða liðsins er hér, en liðið eins og það er í dag varð til árið 1998 þegar Havant Town og Waterlooville sameinuðust. Kíkið á síðuna fyrir frekari upplýsingar um liðið.

Hvað á maður annars að segja? Maður veit alveg að þegar litlu liðin dragast gegn þeim stóru, þá ríkir mikil gleði þar á bæ. Hugsið ykkur bara hvers konar íþróttalega fullnægingu ég fengi ef Fram keppti einhvern tíma við Liverpool í Evrópukeppni … ! Ha ha ha ha! Annars finnst mér þetta fyrst og fremst æðislegt fyrir þetta lið og ég vona sannarlega að við sýnum alla vega þá virðingu að hafa einhver af stóru nöfnunum okkar í liðinu. Annað væri hálfleiðinlegt. Rafa virðir mótherja sína ávallt, og hann segir um Havant & Waterlooville að liðið eigi auðvitað skilið að vera komið svona langt, og ekki skuli vanmeta það algjörlega. Hann vill vinna þessa keppni. Með það í huga, ætla ég í eitthvert ævintýralegt skap og spá út í bullið … loftið … æi … vitiði hvað? Þessi liðsuppstilling mín verður örugglega kolvitlaus, but here goes:

Gaman væri svo að sjá Torres, Gerrard og Carra koma inn á. Spurning með Alonso … en þetta er algjörlega út í loftið. Gaman að því.

Eins og ég sagði þá vill Rafa vinna þessa keppni, og burtséð frá öllu utanvallar-kjaftæðinu sem hefur verið í gangi, þá á þetta auðvitað að vera þvílíkur kökubiti að áttundipartur væri nóg! Einhvers staðar las ég að veðbankar setja 200:1 líkur á að Havant & Waterlooville sigri 2:1 … líkur á sigri Liverpool voru þá um 1/100. Þetta er ekki spurning um hvort … heldur hvernig. Verður þetta skemmtilegur leikur sem endar í kurteisum sigri (5-6 : 0) eða verður þetta miskunnarlaust og double-digit sigur? Hvort sem er, þá er spennan mikil og ánægjan sömuleiðis.

Sóknarmaðurinn Jamie Slabber hefur spilað áður gegn Liverpool … sem varamaður hjá Tottenham Hotspur árið 2003. Að öðru leyti er þetta skemmtileg óvissa. Ég bara get ekki annað en birt þessa skemmtilegu mynd af liðinu:

Ég hef auðvitað trú á því að Rafa og liði fari í alla leiki til að vinna. Engin breyting verður á því á morgun. Spurningin er bara hversu hart ætlar Rafa að sækja sigurinn. Það er sama hvernig Rafa stillir upp liðinu … þetta á auðvitað að vera auðveldasti sigurinn. En í bikarkeppninni getur allt gerst og ég sjálfur er mikill ævintýramaður! En það breytir því ekki að ég ætla að spá þægilegum sigri okkar manna 8 : 0 þar sem Babel skorar þrennu, Crouch tvö, Skrtel eitt, Mascherano eitt og Leiva eitt.

Jæja, byrjunarlið kvöldsins er komið:

**Bekkur:** Itandje, Skrtel, Alonso, Babel, Crouch.

Þetta er að mínu mati frekar sókndjarft lið. Ég hefði persónulega viljað sjá Ryan Babel byrja inná í þessum leik en Kewell og Benayoun eiga að geta sótt aðeins að vörn Villa-liðsins. Þetta verður spennandi.

**Áfram Liverpool!**

Á morgun klukkan 20:00 munu okkar menn taka á móti Aston Villa, sem hafa unnið þrjá síðustu útileiki sína á meðan Liverpool hefur unnið tvo af síðustu þremur heimaleikjum sínum í deildinni og gert eitt jafntefli. Hins vegar hefur “rönnið” hjá okkar mönnum ekki verið mjög glæsilegt og gætt hefur pirrings hjá mörgum okkar með liðið og árangur þess. En mitt í þessum pirring hefur aðalpirringurinn verið að ágerast og það er pirringur gagnvart bandarísku eigendunum, Hicks og Gillett (ætti maður t.d. að skipta um rakvélablaðategund?). Áhorfendur hafa verið að láta þessa óánægju í ljós og munu halda því áfram, sem og áhangendurnir. Það er því með gleði og von í hjarta, sem ég eygi bjartari tíma framundan, þar sem liðsmórallinn virðist vera mjög sterkur. Einn fyrir alla og allir fyrir einn. Ég vil bara ekki trúa öðru en að liðið noti umræðuna síðustu daga til að efla sig enn meir.

Ég var staddur úti á Kanaríeyjum þegar Torres jafnaði gegn Middlesbrough og leikurinn endaði í jafntefli. Mér fannst gaman að sjá að öskrin mín vöktu athygli, því aðrir Íslendingar spurðu út í úrslitin og því miður náðu nokkrir Man U aðdáaendur að nudda smá salti í sárin mín, en mér fannst æðislegt að sjá hótelstjórann (þ.e. gaurinn í afgreiðslunni) þjóta úr afgreiðslunni og fagna með mér jöfnunarmarkinu … ég vissi og veit alveg að Liverpool er elskaður klúbbur um allan heim. En það var gaman að upplifa þessa “ást” þarna á Kanaríeyjum. Við skildum ekki alveg hvorn annan, en við höfðum þarna ekta Liverpool-moment. Og já … það var eftir þennan slappa leik. Punkturinn minn er einfaldur: Liverpool framar öllu! :)

Með þessa ást á liðinu í huga, hef ég mikla trú á klúbbnum mínum. Aston Villa er á góðu róli, eru í mikilli baráttu við okkur, City og Everton um fjórða sætið í deildinni. Þetta er sú barátta sem við erum í núna. Og ef ekki á að fara verr (þ.e. að vera ekki einu sinni í baráttu um fjórða sætið), þá þarf liðið að vinna á morgun, fyrir fram brjálaða áhangendur sem senda bandarískum eigendum skýr skilaboð: No more nonsense, just DIC!

Agger er eini leikmaðurinn sem er örugglega ekki í hópnum, og Skrtel gæti meira að segja spilað. Reina er eini leikmaðurinn sem hefur spilað hverja einustu deildaleikjamínútu þetta tímabil og ég sé ekki breytingu þar á. Við hljótum að koma með okkar sterkasta lið en það er alltaf matsatriði hjá hverjum og einum. Ég ætla hins vegar að spá þessu liði hér:

Ég gæti líka alveg hugsað mér Babel í stað Kewell, en helst vildi ég sjá Babel og Torres frammi. Sprengikraftur beggja í sókninni yrði hvaða vörn sem er algjör hryllingur! Þar sem ég er Mascherano aðdáandi væri ég ekkert spældur að sjá hann í liðinu, á kostnað Pennant kannski.

Ég ætla ekkert að rökstyðja þetta val mitt frekar. Geri ráð fyrir því að ég sé alla vega með 2-3 leikmenn ranga, en það kemur í ljós. Gaman verður að sjá umræður ykkar um leikinn, bæði með tilliti til umræðunnar um fjárans eigendurna og þá stöðu sem klúbburinn er í núna. Ég hef lesið slúðrið og fréttirnar á netinu, og maður skynjar að það er titringur í gangi. Vonandi brýst hann út í fantagóðri knattspyrnu og yfirburðaspilamennsku.

Ég ætla að spá 3:1 sigri okkar manna, þar sem Torres skorar tvö og Babel eða Gerrard eitt. Aston Villa hefur unnið einum leik meira en við … á morgun verða sigurleikir liðanna orðnir jafnmargir! Ég er sannfærður!!!

Mikið skelfing er ég pirraður. Ég er pirraður út í Tom Hicks, ég er pirraður út í George Gillett, ég er pirraður út í Rick Parry, ég er pirraður út í Rafa Benítez, ég er pirraður út í alla leikmenn Liverpool nema þá Pepe Reina og Fernando Torres. Með öðrum orðum er ég bara ofsalega pirraður einstaklingur núna og nenni ekki fyrir mitt litla líf að skrifa einhverja upphitun gegn liði sem er tveimur deildum fyrir neðan okkur. Nema hvað, kannski er þetta bara assgoti góður tímapunktur til að byrja að hugsa um eitthvað annað en það búllsjitt sem virðist vera í gangi í kringum félagið okkar.

Ég mun ALDREI gefast upp á því að fylgjast með liðinu mínu spila, og því mun ég setjast fyrir framan breiðtjaldið á Players annað kvöld sem fyrr. Ég fer ekki fram á mikið, enda afskaplega auðvelt að gera mér til geðs. Ég fer í rauninni bara fram á eitt. Ég fer fram á það að þessir ellefu einstaklingar sem hefja leikinn gegn stórliði Luton annað kvöld HAFI ÁHUGA Á ÞVÍ AÐ SPILA FYRIR LIVERPOOL FC. Ég vil ekki sjá Stevie G með hangandi haus og grautfúlan inni á vellinum. Ég vil ekki sjá John Arne Riise á leikskýrslu (og ég á ekki bara við þennann leik). Ég vil sjá menn inná sem berjast fyrir málstaðinn. Ef það eru einhverjir af þessum ofborguðu prímadonnum sem hafa ekki hugann fullkomlega við að leggja sig fram annað kvöld, þá vil ég sjá leikmenn úr varaliðinu frekar. Ég væri meira að segja frekar til í að sjá leikmenn úr undir 10 ára liði Liverpool spila þennann leik frekar en áhugalausar stjörnur.

Ég vil að við slátrum þessum leik fljótt og örugglega. Það skiptir akkúrat engu máli hvaða liði við stillum upp, leikmenn Luton ættu í vandræðum með að komast í liðið hjá varaliðinu okkar. Þetta er ekki meint sem neitt níð á Luton, síður en svo. Staðreyndin er bara samt sú að við eigum dýrari drengi í okkar varaliði heldur en eru í hópnum hjá Luton. Heildarverð leikmanna í varaliði Liverpool er mun hærra heldur en Luton liðsins, leyfi ég mér að fullyrða án þess þó að hafa farið í djúpa vísindalega rannsókn á málinu. Þeir leikmenn Liverpool sem spila þennann leik, þeir hafa nú virkilega gott tækifæri á að sýna fram á að þeir eigi skilið að klæðast rauðu treyjunni.

Ég ætla ekki að spá fyrir um það hvernig liðið verði skipað. Þess í stað ætla ég að velja liðið eins og ég myndi stilla því upp, og reyna að færa smá rök fyrir máli mínu:

Bekkurinn: Martin, Carra, Gerrard, El Zhar og Torres

Og þá kemur minn rökstuðningur:

Itandje: Einfaldlega út af því að hann þarf leiki, og það er búið að lofa honum báðum bikarkeppnunum. Hann hefur líka staðið sig vel í þeim leikjum sem hann hefur fengið. Eini sénsinn á að halda góðum varamarkvörðum er að láta þá fá einstaka leiki.

Arbeloa: Ég vil einfaldlega að Arbeloa verði okkar fyrsti kostur í hægri bakvörðinn. Hann býður okkur upp á ýmislegt sem Finnan hefur ekki. Nú vil ég bara hreinlega sjá strákinn spila nokkra leiki í röð í sömu stöðunni, byrja núna.

Hobbs: Þeir félagar Carra og Hyypia hafa ekki verið að gera gott mót undanfarið og þá sérstaklega ekki sá gamli. Mér hefur fundist Hobbs “lúkka” vel þegar hann hefur fengið sína sénsa, og ég hef algjörlega fulla trú á því að hann ráði við framherja Luton. Góð reynsla fyrir kjúllann og ég er viss um að hann muni standast pressuna.

Agger: Kappinn var á bekknum í síðasta leik, hann þarf leikæfingu núna og þetta er besti mögulegi leikurinn fyrir það.

Insúa: Þessi strákur hefur spilað feykilega vel fyrir varaliðið og getur ekki verið verri kostur en Riise. Hann fékk tækifæri með aðalliðinu undir lok síðustu leiktíðar og stóð sig vel. Ég vil fara að sjá hann fá fleiri tækifæri.

Babel: Ég set Babel á hægri kantinn. Ég veit að það eru margir sem vilja sjá hann frammi, en ég er á því að hann nýtist okkur best á kantinum. Hann er einfaldlega sá eini sem við höfum sem er með virkilega góðan hraða og getur spilað báðar kantstöðurnar. Hann er réttfættur og mér finnst hann leita oft of mikið að skotinu þegar hann er vinstra megin og er ekki að leita nægilega vel að sendingarmöguleikum. Set hann því upp hægra megin svo hann þurfi þess frekar.

Lucas: Þarf fleiri leiki og ég vil einfaldlega sjá miklu meira af þessum strák.

Xabi: Hann er búinn að vera nánast óþekkjanlegur í þessum tveim leikjum eftir meiðslin. Eins og einhvern tíman var sagt; “Form is temporary, class is permanent”. Plís komdu aftur kæri Xabi, væri fínt ef það yrði bara annað kvöld. Þá skal ég gleyma því sem ég sá í síðustu tveim leikjum.

Leto: Það er ekki eins og að vinstri kantmenn okkar hafi verið að láta mann missa mikið munnvatn úr hrifningu. Nei, munnvatnið hefur verið að spýtast út af meiri krafti en svo, það flokkast meira undir fruss þegar maður er að rífast við eitt stykki breiðtjald (maður gerir þetta aftur og aftur, þó svo að maður viti að sjónvarp er einfaldlega ekki orðið svo gagnvirkt að það hafi einhverja þýðingu). Ég segi því, af hverju ekki að gefa svona strák sénsinn. Hann getur ekki verið verri en Riise í þessari stöðu. Hann hefur það líka fram yfir Kewell að hann getur hlaupið. Það er enginn séns tekinn með því að setja hann í liðið.

Crouch: Við erum ekkert að drepast úr kostum í framlínunni þessa dagana á meðan hitinn á öðrum framherjum en Torres er svipaður og á Norðurpólnum. Crouch er þó oft líklegur og ég vil hreinlega sjá hann fá nokkra leiki og setja nokkur mörk til að koma einhverjum á einhvers konar “rönn”.

Kuyt: Talandi um kulda. Ástæðan fyrir því að ég set hann í liðið er einfaldlega vegna þess að ég hef ennþá smá trú á honum sem leikmanni, en það sama get ég ekki sagt um Voronin blessaðan. Kuyt hefur sýnt það að hann getur þetta alveg, það er bara alltof langt síðan hann sýndi það. Mér fannst þeir Kuyt og Crouch oft ná vel saman á síðasta tímabili, ég vil gefa þeim tækifæri á að endurtaka það annað kvöld. Ef ekki, þá fer ég að telja niður dagana sem þeir eiga eftir að leika í Liverpool treyjunni.

Bekkurinn: Ég set Carra, Gerrard og Torres á bekkinn. Carra einfaldlega vegna þess að hann getur komið inn í hvaða stöðu í vörninni sem er ef eitthvað gerist þar. Mér hefur fundist hann ekki svipur hjá sjón undanfarið og virðist hafa gleymt því algjörlega hvernig það á að taka niður bolta og spila honum á næsta mann (maður í röð 158 í stúkunni er ekki næsti maður). Ekki það að hann hafi verið manna bestur í því í gegnum tíðina, en það er langt síðan hann hefur verið svona slæmur í því. Stevie þarf bara að hugsa sinn gang. Hann hefur jú sett mörg mörk í vetur, en það er alltof oft sem við sjáum hann fyrstan manna hengja haus. Hann verður að taka smá ábyrgð líka drengurinn. Það er fínt fyrir hann að horfa aðeins á leikinn af hliðarlínunni og koma svo inná ef á þarf að halda. Hann má líka alveg við smá hvíld. Torres þarf hvíld og ég vil ekki sjá áhættu tekna með hann. Þetta eru ekki nettustu varnarmennirnir í bransanum sem spila í vörn Luton, og ég var hreinlega að spá í að taka Torres alveg út úr hópnum. En það getur verið gott að hafa hann á bekknum ef á þarf að halda.

Svona myndi ég stilla þessu upp, en það er 185% öruggt að Rafa sé ekki á sama máli. En Rafa minn, gerðu það fyrir mig að breyta hlutunum ef þeir eru ekki að ganga upp. Þá er ég ekki að meina fyrstu skiptingu á 65 mínútu, þá næstu á 75 mínútu og þá þriðju á 85 mínútu. Ég er búinn að fara vel yfir knattspyrnulögin, og það MÁ skipta leikmönnum inná á öðrum tímapunktum. Ég veit að Hobbs, Insúa og Leto fá ekki sénsinn í þessum leik, en það breytir því ekki að ég myndi stilla þeim ÖLLUM upp í byrjunarliðinu. Þeir geta hreinlega ekki annað en orðið bæting á því sem við höfum séð frá öðrum og reyndari leikmönnum í undanförnum leikjum.

Luton á Anfield, það á bara að vera sigur og það stór sigur. Ég ætla að spá okkar mönnum 4-0 sigri og menn loksins rífi sig upp á rasshárunum í eitt skipti fyrir öll. Eigum við ekki að segja að Babel skori 1 kvikindi, Lucas 1, Kuyt 1 og Crouch 1.

Það vekur kannski mesta athygli að Daniel Agger er á bekknum í leik dagsins gegn Middlesbrough. Hann mun þó væntanlega ekki spila nema bara ef liðið er að vinna örugglega og hægt er að hvíla Hyypiä eða Carragher, eða þá ef að annar þeirra meiðist. Martin Skrtel er ekki í hópnum í dag.

Lið dagsins:

**Bekkur:** Itandje, Agger, Alonso, Babel, Kuyt.

Hvernig væri að Johnny Riise færi að spila vel á vinstri vængnum? Hvernig væri að Voronin fari nú að skora aftur? Þetta er sterkt lið á pappírnum, en vonandi spila menn betur en gegn Luton Town um síðustu helgi.

**Áfram Liverpool!**

**Uppfært (EÖE)**: Ok, ég og Kristján Atli ætluðum að fresta þessari tilraun þar sem ég var á leiðinni í barna-afmæli, en þar sem ég er veikur þá verð ég heima og hef lítið annað að gera en að horfa á leikinn.

Allavegana, við Kristján Atli ætlum **báðir** að skrifa leikskýrslu um þennan leik. Þetta var hugmynd sem ég fékk fyrir einhverjum tíma þar sem að menn skiptast oft í svo svakalegar fylkingar eftir leiki að það er líkast því að við hefðum ekki verið að horfa á sama leikinn.

Við ætlum því að skrifa tvær leikskýrslur. Kristján Atli ætlar að vera jákvæði gaurinn, sem sér ekkert nema gott við leik Liverpool. Ég ætla hins vegar að vera neikvæði gaurinn og mun ég því ekkert jákvætt sjá. Nota bene, við munum halda okkur við þetta – sama hvernig leikurinn fer. Finnan og Riise í liðinu og Kuyt á bekknum – ég er strax byrjarður að skrifa neikvæða leikskýrslu í hausnum.

Á morgun mætum við Boro á Riverside en þeir eru sem stendur í 15. sæti deildarinnar með 20 stig, einungis 3 stigum meira en Sunderland sem er í fallsæti. Lærisveinar Southgate hafa átt erfitt uppdráttar á þessu tímabili og hafa einungis unnið 5 leiki af 21 og gert 5 jafntefli og þar af aðeins unnið 2 heimaleiki. Liverpool er í 5. sæti með 38 stig eftir 20 leiki, stigi á eftir City sem er í 4.sæti en við eigum leik inni (gegn West Ham á útivelli).

Liverpool hefur ekki verið að spila sannfærandi undanfarið og við höfum ekki unnið leik í síðustu 4 leikjum (2 í deild og 2 í bikar) sem er klárlega ekki ásættanlegt. Við höfum byrjað nýja árið illa með jafntefli gegn Wigan á heimavelli 1-1 og jafntefli gegn Luton á útivelli, 1-1. Skv. Physio Room eru þeir Pennant og Agger tæpir en ég vonast til að sjá Agger í það minnst á bekknum á morgun.

Það er morgunljóst að við verðum að vinna þennan leik og ég tel það vel gerlegt en langt frá því auðveld verkefni. Middlesboro eru með fínan mannskap og þegar sá gállinn er á þeim þá geta þeir sigrað hverja sem er. Þeir sýndu það þegar þeir unnu Arsenal á heimavelli 2-1, sannfærandi. Það var einungis annar sigur þeirra á heimavelli. Liðið hefur á að skipa fínum einstaklingum líkt og Woodgate, Huth, Downing, Tuncay, Mido, Young o.s.frv. en eitthvað virðist vera að því liðið er á leið í harða botnbaráttu. Svo virðist sem Southgate hafi stuðning stjórnar félagsins og líklegt er talið að hann muni styrkja liðið í janúarglugganum. Tuncay átti erfitt uppdráttar en hefur spilað fantavel undanfarið og hefur skorað ótrúlega mikilvæg mörk m.a. í 1-0 sigrum gegn Derby og Portsmouth. En nóg um andstæðingana, hvernig er staðan á okkar mönnum?

Bæði Torres og Gerrard fengu frí gegn Luton (var víst um smávægileg meiðsli að ræða hjá Gerrard) og sýndi það sig að við megum ekki við því að vera án þeirra um þessar mundir. Gegn Wigan stillti Rafa upp 4-5-1 sem ég hafði fyrirfram talið okkar sterkustu uppstillingu en allt kom fyrir ekki. Ég er ekki að á því að liðið sé komið í þrot hjá Rafa en það er ljóst að það er eitthvað sem vantar… hvað? Góð spurning.

Það er ávallt fín gestaþraut að stilla upp byrjunarliðinu og ég ætla að þreyta hana. Reina er sjálfvalinn í markið sem og tveir af þremur bakvörðum: Finnan, Arbeloa og Riise. Miðverðir eru væntanlega Carra og Hyypia þar sem Agger er ennþá að jafna sig eftir langvarandi meiðsli. Líklegt má telja að ef Rafa leggur upp með 4-4-2 að Benayoun, Kewell eða Babel verði á köntunum. Á miðjunni eru þeir Alonso og Gerrard sjálfvaldir ef heilir og frammi er Torres eitt af fyrstu nöfnunum í byrjunarliðinu. Ég ætla að halda því fram að Crouch fái tækifæri með honum þar sem Kuyt hefur verið gjörsamlega heillum horfinn allt þetta tímabil. Þá lítur þetta einhvern vegin svona út:

Bekkurinn: Itandje, Mascherano, Finnan, Kuyt og Babel.

Ég skal vera alveg heiðarlegur þegar ég segi að ég sé ekki bjartsýnn fyrir þessa viðureign því leikirnir undanfarið gefa akkúrat enga ástæðu til þess. Liðið hefur verið ósannfærandi og neistann vanta. Vonandi hrekkur liðið í gang á morgun og að liðið geti náð nokkrum sigurleikjum í röð en eins og áður sagði þá er fátt sem bendir til þess. Við höfum einungis tapað einu útileik allt þetta tímabil og það er vissulega uppörvandi en tölfræðin eina og sér vinnur ekki svona leiki.

Mín spá: Ég sé 1-1 jafntefli í spilunum þar sem Boro kemst yfir með fallegu marki frá Tuncay en Alonso jafnar með góðu langskoti í seinni hálfleik.

Ég held að við getum öll verið sammála um að það kemur á óvart hversu sterku liði Rafa stillir upp í þessum leik.

Liðið í dag er sem hér segir:

**BEKKUR:** Martin, Hobbs, Mascherano, El Zhar, Voronin.

Sko, í fyrsta lagi, þá má túlka þetta sem svo að Rafa sé að skora á restina af aðalhópi sínum að sanna að þeir geti skorað mörk án Gerrard og Torres, sem eru ekki í hóp í dag. Eins má túlka þetta sem svo að Voronin sé ekki beint að heilla Rafa þessa dagana, fyrst hann kemst ekki einu sinni í byrjunarliðið gegn Luton. Eins má túlka þetta sem tilraun Rafa til að koma Crouch og Kuyt í gang fyrir leikina sem eru framundan.

Að lokum er í raun samt aðeins eitt sem þessi 16-manna hópur gerir dagsljóst: Momo er á förum. Hann er til sölu, og klárlega orðinn neðstur í goggunarröðinni. Annars væri hann í þessum hópi.

Á morgun kíkjum við í heimsókn á Kenilworth Road, heimavöll Luton og leikum við heimamenn í 3. umferð FA Cup. Þegar litið er á liðin á pappírnum þá er formsatriði fyrir okkar menn að klára Luton, en það er ekki spurt um verðmæti leikmanna og stærðargráðu liða í þessari sögufrægu keppni. Við höfum áður leikið við Luton í sömu keppni og þá áttum við í vandræðum með þá framan af, en glæsileg mörk hjá okkar mönnum ( m.a. mark Xabi frá eigin vallarhelming ) tryggðu okkur 3-5 sigur. Það er alveg að hreinu að ef að menn ætla sér sigur í þessum leik þá þurfa menn að vera einbeittir allan leikinn, þessi litlu lið munu alltaf mæta snarbiluð í svona leiki og berjast til síðasta blóðdropa. Þess vegna mæli ég eindregið með því að við klárum leikinn snemma og gerum leikinn þægilegri með 1-2 mörkum í fyrri hálfleik. Liverpool hefur oftar en ekki farið fjallabaksleiðina að hlutunum og unnið þá dramantíska og sætari sigra fyrir vikið. En þegar við leikum gegn svona litlum liðum þá gerir maður eðlilega kröfu um að leikmenn Liverpool hafi gæðin í að klára dæmið, snemma.

Ég ætla svo sem ekki að fara að ræða mikið þetta Luton lið, en einhvers staðar las ég að þeir væru búnir að tapa 1 heimaleik af 11 í deildinni og eiga að vera fyrnasterkir heim að sækja. Ég þekki fá nöfn í liðinu þeirra en það skiptir ekki öllu þegar út í svona leik er komið. Liverpool er að koma í heimsókn og þá munu allir þessir leikmenn spila með hjartanu á móti okkur því það er ekki á hverjum degi sem þessir leikmenn spila við eitt besta lið landsins og þeir munu sko njóta hverrar mínútu í leiknum.

Hvað varðar okkar menn þá eru 3 leikmenn í meiðslum sem við getum því ekki notað, en það eru þeir Steven Gerrard, Fabio Aurelio og Alvaro Arbeloa. Svo er spurning hvort að Daniel Agger fái að byrja, ég tel það ólíklegt, en held að hann komi inná sem varamaður fyrir Carragher snemma í síðari hálfleik. Ég hef saknað Agger mikið á meðan á meiðslum hans stóð og vona að hann nái fyrra formi sem fyrst, við þörfnumst hans. Hyypia er spurningarmerki ásamt Agger, ég tippa á að Hobbs fái að byrja, Agger verði á bekknum og Hyypia ekki í hóp. Ég á í mestu vandræðum með að stilla upp liði fyrir morgundaginn því ég veit lítið um það hvort Rafa ætli að hvíla mikið eða ekki. Næsti leikur er gegn Middlesbrough eftir viku og því þarf lítið að vera að hvíla menn. Eina spurningin er, hversu margir ungir leikmenn fá að sanna sig? Svona spái ég byrjunarliðinu:

Bekkur: Itandje, Agger, Spearing, Benayoun, Torres.

Ég held að núna fái hinn ungi Insúa loksins að spreyta sig þar sem Arbeloa og Aurelio eru meiddir. Riise fær vonandi að víkja fyrir þessum unga og spennandi leikmanni. Finnan verður því pottþétt í hægri bakverði og ég set svo Hobbs og Carragher saman í hjarta varnarinnar. Miðjan gæti verið hvernig sem er, en ég vona að Lucas spili allan leikinn ásamt Alonso sem þarf að koma sér í leikform eftir meiðslin. Vinstri kantur gæti orðið Riise, Kewell eða Yossi, en ég held að Yossi fái flís í rassinn á meðan Kewell fær að spila. Framlínuna er líka erfitt að spá fyrir um, en ég held að Voronin og Crouch fái að spreyta sig og Torres kemur svo inn ef við lendum í vandræðum. Svo set ég ungan og gríðarlega efnilegan miðjumann á bekkinn sem ég vona að fái nokkrar mínútur. Hann heitir Jay Spearing og hefur hreinlega farið á kostum á miðjunni hjá varaliðinu og hefur verið þeirra besti maður í vetur. Mér finnst að hann eigi skilið allavega bekkjarsetu gegn Luton.

Svo er spurning með títt og téð nefndann Momo Sissoko, fær hann að byrja? Ég hef ekki hugmynd um það, en eitt er víst. Ef Sissoko verður ekki í hóp á morgun, þá eru 99% líkur á því að hans dagar hjá klúbbnum séu taldir. Hann hefur spilað mjög lítið upp á síðkastið og það er orðið frekar augljóst að hann er ekki inni í framtíðarplönum Rafa. En þetta kemur allt saman í ljós og við þurfum bara að bíða og sjá.

En hvað um það, við hreinlega eigum að valta yfir þetta lið og koma okkur í næstu umferð og það sannfærandi. Ég vonast eftir skemmtilegum leik þar sem við munum leika vel og agað og ég vona líka að við klárum þá snemma í leiknum og drepum vonir og sjálfstraust þeirra helst í fyrri hálfleik.

Mín spá: Það er erfitt að vera sannspár þegar kemur að FA Cup. Ótrúleg úrslit höfum við reyndar séð í gegnum tíðina en ég vona að okkar menn láti Luton ekki vera fyrir á leið okkar að dollunni! Ég spái að við sigrum 1-3 en förum erfiðu leiðina, þeir komast yfir en Crouch, Lucas og Benayoun klára dæmið fyrir okkur í síðari hálfleik.

YNWA.

Gleðilegt árið 2008! Þar sem í dag er nýársdagur og ég í sama letistuði og aðrir landar verður þetta stysta upphitun sögunnar. Snúum okkur að efninu: Liverpool FC (hey! það er liðið sem við höldum með!) hefur nýja árið með heimaleik í Úrvalsdeildinni á morgun, 2. janúar 2008. Var ég búinn að nefna að það er núna árið 2008?

Wigan eru í fallsæti fyrir þennan leik og nýja stjóranum, Steve Bruce, hefur gengið illa að rífa liðið upp eftir að hann tók við fyrir heilum mánuði síðan. En auðvitað vita allir að það er dauðasök að ná ekki samstundis árangri með lið, þannig að Brucie verður orðinn atvinnulaus í febrúar. Kannski mun endurkoma Emile Heskey breyta einhverju þar um, en gamli Liverpool-framherjinn er víst orðinn heill og verður með í þessum leik á morgun. Að öðru leyti verður þetta sama lið og venjulega hjá Wigan, og já þá á ég við að Titus Bramble verður í vörn þeirra (og sókn okkar).

Hjá okkar mönnum snýr Peter Crouch aftur eftir þriggja leikja bann og verður nær pottþétt í byrjunarliðinu. Það eina sem gæti aftrað því er ef Rafa er að selja hann, þannig að ef Crouchinho byrjar ekki inná á morgun er ykkur frjálst að draga ályktanir. Eins með Momo, ef hann er ekki í 16-manna hópnum á morgun er hann á leið til hæstbjóðanda … hvað úr hverju. Hvað aðra leikmenn varðar geri ég ráð fyrir að Rafa muni hvíla Torres og jafnvel Gerrard líka, en þeir virkuðu báðir þreyttir á sunnudag gegn Man City. Ég spái því að Rafa byrji með þetta lið á morgun:

**Bekkur:** Itandje, Arbeloa/Hobbs, Gerrard, Kewell, Babel.

**MÍN SPÁ:** Sko, ég hef sagt það áður og ég segi það aftur; við eigum **ekki** að þarfnast Gerrard og Torres til að vinna lið eins og Wigan á heimavelli. Sérstaklega ekki þegar Titus Bramble er miðvörður andstæðinganna. Þannig að jafnvel þótt Torres fái algjöra hvíld á morgun og Gerrard tyggi tyggjó á bekknum á þetta að vera auðveldur sigur okkar manna og ekkert annað.

Var ég búinn að minnast á að Titus Bramble er í liði Wigan? Þetta verður **4-0 sigur** okkar manna og hana nú! :)