Stundum koma svona leikir þar sem maður telur sig hafa réttmæta kröfu á öruggum sigri síns liðs. Eftir góða byrjun í deildinni og örugga inngöngu í Meistaradeild Evrópu mætir heitasta lið Úrvalsdeildarinnar, Liverpool FC, því liði sem virðist vera langveikast og væntanlega á leiðinni beint niður aftur, Derby County. Þessi leikur verður spilaður á Anfield, heimavelli fyrrnefnda liðsins, og því er ljóst að ekkert nema öruggur sigur okkar manna kemur til greina í þessum leik.
Hvað Derby-liðið varðar veit ég ekki nógu mikið til að tjá mig um þá. Ég sá einn leik með þeim í Championship-deildinni í fyrra og mér sýndist þeir vera baráttuglatt lið sem sækir stíft (allavega á heimavelli) og skorar slatta. Þeim hefur þó gengið illa að skora mörk í upphafi leiktíðarinnar í Úrvalsdeildinni, enda um talsvert sterkari mótherja að ræða þar heldur en í Championship-deildinni. Þeirra stærsta vandamál í fyrstu leikjunum hefur hins vegar verið vörnin. Þetta eru úrslitin í leikjum þeirra í deildinni hingað til:
- Derby 2-2 Portsmouth
- Man City 1-0 Derby
- Tottenham 4-0 Derby
- Derby 1-2 Birmingham
- Derby 2-2 Blackpool
Blackpool unnu þá síðan í vítaspyrnukeppni í vikunni og slógu þá út úr Deildarbikarnum. Þannig að á meðan okkar menn spiluðu á þriðjudag auðveldan heimaleik gegn Toulouse þar sem margir lykilmenn voru hvíldir þurfti Derby-liðið að keyra á sínum bestu mönnum í 120 mínútur + vítaspyrnukeppni á þriðjudaginn. Þeir hafa fengið á sig 9 mörk í fyrstu 4 deildarleikjum sínum, þar af fjögur í leiknum gegn Tottenham sem er langsterkasta liðið sem þeir hafa mætt til þessa, og fengu í þokkabót á sig tvö mörk á heimavelli gegn neðrideildarliði í vikunni.
Þið verðið að fyrirgefa, en ef við vinnum þennan leik ekki örugglega er eitthvað stórkostlegt að hjá okkar mönnum. Það er bara þannig.
Hjá Liverpool-liðinu er allt við það sama; Carra og Gerrard eru enn frá vegna meiðsla, sem og Aurelio og Kewell. Aðrir eru heilir og miðað við hverjir voru hvíldir á þriðjudag og hvernig menn spiluðu í þeim leik gæti ég ímyndað mér að við sjáum þetta lið mæta Derby á morgun:
Finnan – Agger – Hyypiä – Riise
Pennant – Mascherano – Alonso – Babel
Kuyt – Torres
**Bekkur:** Itandje, Arbeloa, Sissoko, Benayoun, Crouch/Voronin.
Þannig spái ég þessu allavega. Sókndjarft lið þar sem Pennant og Babel ættu að geta rifið vörn Derby í sig og Alonso blandað sér af fullum krafti í sóknina með Mascherano fyrir aftan sig. Kuyt heldur sæti sínu í liðinu eftir tvennuna á þriðjudag og Torres kemur að sjálfsögðu inn. Arbeloa hefur byrjað alla deildarleikina hingað til þannig að það er komið að honum að víkja fyrir Riise í sókndjarfri uppstillingu.
**Mín Spá:** 4-0 sigur fyrir Liverpool og allir fara skælbrosandi inn í landsleikjahléð. :)