Jæja, Kristján, anda rólega … það er komið að því … sá leikur tímabilsins sem skiptir nánast jafn miklu máli og allir hinir til samans fer fram á morgun á Anfield, þar sem Liverpool munu taka á móti Chelsea í síðari leik undanúrslita Meistaradeildarinnar árið 2007. Chelsea leiða einvígið eftir 1-0 sigur á okkar mönnum á miðvikudag í síðustu viku og ég hugsa að bæði lið geti verið sátt og ósátt við þá stöðu. Til að orða það á sem einfaldastan hátt, þá hangir þetta einvígi á bláþræði fyrir bæði lið. Chelsea-menn leiða en vita að 1-0 forysta getur verið fljót að fara á Anfield, á meðan Liverpool-menn vita að útimark getur kálað einvíginu.

Bæði lið munu væntanlega stilla öðruvísi upp en þau gerðu fyrir viku síðan. Hvað Chelsea-liðið varðar kemur Michael Essien aftur inní liðið eftir leikbann, en þeir urðu fyrir blóðtöku um helgina þegar Ricardo Carvalho meiddist á hné. Þá hefur verið staðfest að Michael Ballack missir einnig af þessum leik, en hann var líka meiddur í síðustu viku.

Það er pottþétt að Essien kemur inn í liðið, spurningin er bara fyrir hvern. Fer hann í miðja vörnina við hlið Terry, í stað Carvalho, eða fer hann á miðjuna og Boulahrouz í vörnina? Og hverjum fórnar Mourinho þá?

Mín ágiskun er sú að Mourinho muni fórna Andriy Schevchenko fyrir Michael Essien á morgun. Portúgalinn er klókur og veit að umfram allt þarf hann að halda hreinu á morgun, með möguleikanum á skyndisóknum. Því held ég að við munum sjá bæði Boulahrouz og Essien koma inn og þétta miðjuna og vörnina allsvakalega, á meðan Joe Cole og Didier Drogba fá það verkefni að sækja hratt á Liverpool og nýta alla sénsa.

Lið Chelsea á morgun verður svona, samkvæmt minni spá:

Hvað Liverpool snertir verður athyglisvert að sjá hvernig Rafa Benítez stillir upp á morgun. Leikurinn við Portsmouth um helgina gaf ýmsar vísbendingar, þar sem fjölmargir aðalliðsmenn voru eftir í Liverpool á meðan hópurinn ferðaðist suður til Portsmouth, og því getum við gefið okkur sem víst nokkrar stöður. Að mínu mati er eina spurningin sú hvort Gerrard verði úti á kanti eða inná miðju. Ef hann mannar miðjuna verður það væntanlega á kostnað Alonso, sem lék allan leikinn um helgina, en ef hann spilar á kanti verður það á kostnað Pennant.

Ég held í öllu falli að Rafa muni stilla upp eftirfarandi liði á morgun:

Ég verð að viðurkenna að persónulega myndi ég vilja sjá Pennant þarna inni, og þá væntanlega á kostnað Mascherano, þar sem liðið þarf að taka sénsa og reyna að skora mörk gegn ógnarþéttum varnarmúr Chelsea á morgun, en mér finnst það bara ekki líklegt. Þá verður að hafa það í huga að menn eins og Gerrard, Alonso og Riise þurfa mann við hlið sér sem sér um að láta þá hafa boltann og Mascherano er betri í því en flestir, auk þess að vera með betri sendingagetu en Momo Sissoko. Þannig að ég held að Rafa kjósi að byrja svona, með þá Riise og Finnan sérstaklega sókndjarfa upp vængina og Gerrard í sinni venjulegu frjálsu stöðu út frá hægri kantinum, og vilji eiga möguleikann á Pennant, Zenden, Gonzalez og/eða Bellamy ef hann þarf að fríska upp á þetta þegar líður á leikinn.

ANFIELD

Áður en við spáum í spilin verðum við að minnast á tvö lykilatriði fyrir morgundaginn, og þetta er annað þeirra. Að segja að Anfield sé tólfti maðurinn er oftast við hæfi, en í sumum leikjum er eins og völlurinn sé þrettándi maðurinn líka. Ég upplifði í eigin persónu síðasta stóra Evrópukvöld á Anfield, gegn Barcelona í marsbyrjun, og get sagt ykkur að það er ekki hægt að líkja þeirri upplifun við neitt annað sem ég hef séð á fótboltavelli. Það er eins og völlurinn sameinist um að framkalla eins mikinn hávaða og hægt er og þetta smitar út frá sér til leikmanna beggja liða.

Leikmenn Chelsea lentu í þessu fyrir tveimur árum og ættu því kannski að vera betur viðbúnir þessu í ár, en þeir hafa talað mikið um að þetta muni ekki hafa áhrif á þá sem sýnir kannski best að þeir eru að hugsa um þetta. Chelsea-liðið hefur verið að berjast á öllum vígstöðvum í vetur og verið að keyra á óvenju smáum hópi, auk meiðsla, svo að menn eru orðnir sjáanlega þreyttir. Það sást um helgina gegn Bolton. Ofan á það bætast meiðsli lykilmanna á slæmum tíma, og þá sjáið þið að þetta ógnarsterka lið Jose Mourinho er ekki ósigrandi á morgun. Ef einhver getur stöðvað þetta lið þá er það Rafa Benítez, með hjálp ellefu knattspyrnumanna og hins óviðjafnanlega Anfield Road Stadium.

Rafa vs. Jose

Það er satt sem blöðin hafa verið að segja, að þetta einvígi mun að vissu leyti ráðast utan vallar. Rafa Benítez og Jose Mourinho eru taktískir snillingar sem hafa oft ráðið úrslitum í leikjum við önnur lið. Oft hefur mér fundist skiptingin þeirra á milli vera sú að Mourinho hafi betur í deildinni en Rafa hafi yfirhöndina í útsláttarkeppnum, en á miðvikudag í síðustu viku fannst mér Mourinho vinna taktískan sigur á Rafa. Vonandi leiðréttir okkar maður það á morgun, það er algjörlega krítískt að hann velji rétt byrjunarlið. Ef Mourinho sér við honum á morgun og Rafa setur út lið sem nær ekki að brjóta niður varnarmúr Chelsea til að byrja með verður sama hversu mikil stemning er á Anfield, Chelsea fara áfram. Þannig að hugsið hlýtt til Rafa Benítez í kvöld, hann þarf á okkur að halda ekki síður en leikmennirnir.

MÍN SKOÐUN: Ég verð að viðurkenna að þetta einvígi hefur ekkert lagst neitt gríðarlega vel í mig. Fyrir leikinn á Stamford Bridge var ég mjög stressaður en það var ekki beint tilhlökkun, heldur hreinlega óttaðist ég stórtap. Ég horfði á þann leik og beið eftir einhverju sem myndi afsanna hræðslu mína, en þegar Joe Cole skoraði eftir hálftíma leik slaknaði á mér öllum og ég hálf bjó mig undir að taka á móti slátruninni. Hún kom þó aldrei og eftir leik var mér hálf létt, ég hugsaði með mér að 1-0 tap væri allavega betra en 3-0 tap og í fyrri hálfleik stefndi pottþétt í eitthvað slíkt.

En nú er komið að leiknum á Anfield og það er ljóst að bæði lið eru í frábærum séns á að komast í úrslitin. Ég held að þetta snúist á endanum um eitt atriði og aðeins eitt: útimark. Ef Pepe Reina heldur hreinu á morgun fáum við allavega vítaspyrnukeppni, því ég er sannfærður um að okkar menn geta skorað allavega eitt mark á móti Chelsea á Anfield. Hins vegar, skori Chelsea útimarkið geri ég fastlega ráð fyrir að þeir fari í úrslit. Vonum að það gerist ekki.

Ég ætla að fylgja maganum og spá eins og þetta leggst í mig. Ég er hins vegar alræmdur fyrir slappa spámennsku svo að við vonum að ég hafi rangt fyrir mér á morgun. Ég held að Liverpool muni sækja og sækja allan leikinn, skora snemma og halda áfram að pressa en svo muni helvítið hann Didier Drogba læða sér fram með boltann og smella einu í fésið á okkur. Ég segi að leikurinn á morgun endi í 1-1 jafntefli og að þetta sé árið sem Chelsea komist í úrslit. En að því sögðu þá vona ég innilega að ég hafi rangt fyrir mér.

Bottom line: Anfield, seinni leikur, undanúrslit, f**king Chelsea. COME ON YOU REDS!!! Þetta verður rosalegt! Og að lokum er ekki úr vegi að rifja aðeins upp hvernig okkur leið fyrir tveimur árum … það er ALLT HÆGT á Anfield …

Koma svo Liverpool! Oohhh þetta verður rosalegt!!!

Ja hérna! Byrjunarliðið er komið og maður hafði svo sem rétt fyrir sér með flestar stöður og þá staðreynd að Rafa myndi hvíla nær allt aðalliðið sitt. En þetta sá ég ekki fyrir: Emiliano Insua, hinn átján ára gamli Argentínumaður, byrjar sinn fyrsta leik fyrir Liverpool í dag!

Liðið:

Bekkur: Padelli, Hobbs, El Zhar, Pennant, Kuyt.

Það sem sagt vantar í hópinn: Reina, Carragher, Finnan, Riise, Agger, Gerrard, Mascherano og Crouch. Þetta er einfaldlega rosaleg rótering!

Þessi leikur verður í meira lagi áhugaverður.

Þessi upphitun er seint á ferðinni og verður í styttra lagi. Við biðjumst velvirðingar á því. En allavega, Liverpool ferðast á morgun lengst suður í rassgat og heimsækir spútniklið Portsmouth á Fratton Park í þriðju síðustu umferð Úrvalsdeildarinnar. Portsmouth-liðið hefur átt gott tímabil, en eftir að hafa rétt sloppið við fall í fyrra hafa þeir verið í hópi sex efstu liða í nær allan vetur og eiga góða möguleika á Evrópusæti. Liðin mættust í haust á Anfield en sá leikur endaði með markalausu jafntefli.

Liverpool-liðið er í þriðja sæti eins og er, fjórum stigum á undan Arsenal þegar þrír leikir eru eftir, og þar sem þessi útileikur við Portsmouth (eins langt ferðalag og hægt er að fara frá Liverpool innan Englands) kemur inn á milli leikjanna tveggja við Chelsea í undanúrslitum Meistaradeildarinnar er nokkuð ljóst að Rafa mun skilja lykilmenn eftir heima.

Í ljósi þess gæti ég trúað því að liðið sem við sjáum á morgun yrði eitthvað í þessa veru:

BEKKUR: Reina, Agger, Mascherano, Peltier, Crouch

Ef við leiðum líkum að því að Carragher, Gerrard, Alonso og Kuyt byrji á þriðjudag fá þeir langa hvíld á morgun, á meðan þeir Reina, Agger, Mascherano og Crouch byrja á bekknum. Það eru átta stöður byrjunarliðsins í seinni leiknum gegn Chelsea sem fengju mikla eða algjöra hvíld á morgun. Þá gæti ég séð Arbeloa, Riise og Pennant bætast við í fullklárt byrjunarlið gegn Chelsea (eða Finnan í stað Arbeloa ef hann verður heill), þannig að ef þetta gengur svona nokkurn veginn eftir hjá mér er ljóst að Rafa nær að hvíla menn heilan helling á meðan Chelsea-liðið þarf að nota alla sína krafta á morgun gegn Bolton í baráttunni við United um Úrvalsdeildina.

Lykilatriðið á morgun verður því sennilega opinn og skemmtilegur leikur gegn liði sem hefur gengið vel á heimavelli í vetur. Við gætum séð mörk á báða bóga og ég veit að ég ætla alltént ekki að stressa mig ef okkar menn tapa á morgun með hálfgert varalið, þótt auðvitað vilji maður vinna alla leiki.

MÍN SPÁ: Ég ætla að segja 2-1 eða 3-1 fyrir Portsmouth. Bellamy, byrji hann inná, gæti orðið okkar helsta vopn eins og venjulega á útivelli gegn liðum sem pressa á okkur (sem Chelsea gerðu ekki á miðv.dag, og því sást Bellamy ekki) og ég gæti séð hann fyrir mér skora, en á endanum held ég að þessi leikur skipti Portsmouth-menn einfaldlega meira máli en Liverpool og því munu þeir hafa þetta.

Vona bara að við fáum skemmtilegan leik, Arsenal tapi stigum um helgina og enginn okkar leikmanna meiðist fyrir þriðjudagskvöldið. Áfram Liverpool! :)

JA HÉRNA! Talandi um óvænt byrjunarlið hjá Rafa. Það er eins gott að hann viti hvað hann er að gera. Liðið hjá Liverpool er sem hér segir:

BEKKUR: Dudek, Hyypiä, Paletta, Gonzalez, Sissoko, Pennant, Crouch.

Umdeildu punktarnir: Bellamy byrjar á kostnað næst markahæsta manns Meistaradeildarinnar í ár, Peter Crouch, og Bolo Zenden er valinn fram yfir Jermaine Pennant, Momo Sissoko og Mark Gonzalez. Það hefði ég aldrei giskað á! Þetta verður r-r-r-rosalegt … Rafa verður krossfestur ef þetta fer illa, þannig að vonum að hann viti hvað hann er að gera. Zenden hefur ekki beint verið góður í síðustu þremur leikjum, vonum að hann réttlæti valið í kvöld.

Lið Chelsea:

Ja hérna. Ég er orðinn svo spenntur að ég á erfitt með að vélrita. Ef þessi leikur fer vel má segja að Zenden sé í einu vettfangi búinn að réttlæta veru sína hjá Liverpool. Fari þessi leikur hins vegar illa verður Rafa hæddur og gagnrýndur til helvítis fyrir að velja hann fram yfir allavega þrjá sem flestir aðrir hefðu frekar viljað sjá byrja.

Og Bellamy fyrir Crouch? Ég get lofað ykkur því að Crouchinho er öskufúll á bekknum yfir þessu. Hann er búinn að skora sjö mörk í Evrópu í vetur, en á móti kemur að Bellamy skoraði gegn Barca á Nou Camp.

Ellefu leikmenn hafa verið valdir í þeim tilgangi að stöðva Chelsea og jafnvel vinna þá í kvöld. Vonum að þessir ellefu leikmenn geri Rafa stoltan í kvöld. COME ON YOU REDS!!!!!

Á morgun mætum við José Mourinho og félögum í Chelsea í undanúrslitum Meistaradeildarinnar á Brúnni. Þetta er fyrri leikurinn en sá síðari fer fram þann 1. maí næstkomandi á Anfield. Það þarf ekki að segja neinum það sem les þessa síðu reglulega hversu mikilvægur þessi leikur er, að öllu leyti. Sem og hversu ótrúlega oft við höfum spilað gegn Chelsea frá upphafi tímabilsins 2004-05 eða 13 sinnum í öllum keppnum. Hérna koma leikirnir:

Tímabilið 2004-05
3. október [0-1](http://www.kop.is/gamalt/2004/10/03/17.11.28/) tap á útivelli í deildinni.
1. janúar [0-1](http://www.kop.is/gamalt/2005/01/01/14.51.45/) tap á heimavelli í deildinni.
27. febrúar [2-3](http://www.kop.is/gamalt/2005/02/27/18.36.53/) tap í úrslitum deildarbikarsins á Millennium vellinum í Wales.
27. apríl [0-0](http://www.kop.is/gamalt/2005/04/27/21.06.18/) jafntefli á útivelli í undanúrslitum Meistaradeildarinnar.
5. maí [1-0](http://www.kop.is/gamalt/2005/05/03/21.08.45/) sigur á heimavelli í undanúrslitum Meistaradeildarinnar.

5 leikir, 1 sigur, 1 jafntefli og 3 töp. Markatalan 3-5.

Tímabilið 2005-06
28. september [0-0](http://www.kop.is/gamalt/2005/09/28/21.18.06/) jafntefli á heimavelli í riðlakeppni Meistaradeildarinnar.
2. október [1-4](http://www.kop.is/gamalt/2005/10/02/17.13.55/) tap á heimavelli í deildinni.
6. desember [0-0](http://www.kop.is/gamalt/2005/12/06/21.25.22/) jafntefli á útivelli í riðlakeppni Meistaradeildarinnar.
5. febrúar [0-2](http://www.kop.is/gamalt/2006/02/05/17.58.38/) tap á útivelli í deildinni.
22. apríl [2-1](http://www.kop.is/gamalt/2006/04/22/19.10.27/) sigur í undanúrslitum Ensku bikarkeppninnar á Old Trafford.

5 leikir, 1 sigur, 2 jafntefli og 2 töp. Markatalan 3-7.

Tímabilið 2006-2007
13. ágúst [2-1](http://www.kop.is/gamalt/2006/08/13/17.10.00/) sigur í leiknum um Góðgerðarskjöldinn á Millennium vellinum.
17.september [0-1]( http://www.kop.is/gamalt/2006/09/17/14.23.57/) tap á útivelli í deildinni.
20. janúar [2-0](http://www.kop.is/gamalt/2007/01/20/12.39.26/) sigur á heimavelli í deildinni.

3 leikir, 2 sigrar, ekkert jafntefli og 1 tap. Markatalan 4-3.

Við mætum síðan Chelsea núna tvisvar sinnum og þá höfum við ávallt mætt þeim 5 sinnum á tímabili, ótrúlegt. Þess má geta að við höfum mætt Man U og Arsenal á sama tíma 14 sinnum, Man U 6 sinnum og Arsenal 8 sinnum (þarf af 4 sinnum í ár). Heildarniðurstaðan út úr þessum 13 leikjum sem við höfum mætt Chelsea er ekkert alltof góð eða:

13 leikir, 4 sigrar, 3 jafntefli og 6 töp. Markatalan 10 – 15.

EN já það er alltaf gaman að geta sagt EN. Málið er að við höfum ekki tapað fyrir Chelsea í Meistaradeildinni í þau fjögur skipti sem liðin hafa mæst undanfarin 3 tímabil og það sem meira er þá hefur Chelsea ekki ennþá náð að skora gegn okkur í þessum fjórum leikjum eða í 360 mínútur. Athyglisvert og svo virðist sem Rafa hafi ágætis tak á José og co. í Meistaradeildinni. Sama verður ekki sagt um deildina en hún er ekki til umræðu hér og nú.

Við erum að spila uppá eina mögulega bikarinn í ár á meðan Chelsea er í harðri baráttu við Man U um enska meistaratitilinn sem og liðin mætast í úrslitum ensku bikarkeppninnar. Síðan er Man U að keppa í kvöld gegn Milan í hinum undanúrslitaleiknum í Meistaradeildinni. Hvort þetta hafi áhrif á liðin er erfitt að segja til um. Vissulega er meira álag og bæði liðinu spiluðu illa um helgina í deildinni. Sérstaklega fannst mér furðulegt að Chelsea náði ekki að nýta sér það að Man U gerði einungis jafntefli gegn Boro á laugardaginn í leik sínum gegn Newcastle á sunnudeginum. Eru þeir að gefa eftir? Mun þetta ár verða titlalaust?

Í síðustu 6 leikjum hefur Chelsea unnið 4 leiki og 2 jafntefli, markatalan er 10-4 Liverpool hefur á sama tíma unnið 5 og eitt jafntefli, markatalan er 10-1.

En nóg um tölfræði í bili. Það er spennandi að sjá hvernig þeir “félagar” Rafa og José stilla upp sínum liðinum. Rafa er vanur að koma á óvart í sínu liðsvali í mikilvægum leikjum og ekki langt síðan Arbeloa byrjaði sinn fyrsta leik með Liverpool gegn Barcelona í vinstri bakverðinum. Einnig er mér ferskt í minni þegar Le Tallec byrjaði gegn Juventus á Anfield. Fyrir þessa tvo leiki hefði mér aldrei dottið þetta í hug en líklega er það ein af milljón öðrum ástæðum að ég er ekki og mun aldrei verða stjóri hjá Liverpool! Af þessum sökum kæmi mér ekkert á óvart að Rafa myndi gera eitthvað sem virðist í fyrstu undarlegt en oftar en ekki virkar það. Eftir sem áður þá eru þeir Kewell, Garcia og Aurelio frá vegna langvarandi meiðsla en aðrir eiga að vera klárir í slaginn. Þannig að eftir að hafa rætt við félaga mína hérna á blogginu þá er þetta alls ekki ólíkleg uppstilling á morgun:

BEKKUR: Dudek, Bellamy, Arbeloa, Hyypiä, Crouch, Zenden og Gonzalez.

Þarna verður Mascherano fyrir aftan miðjuna að vernda vörnina og tína upp það sem kemst í gegnum þá Alonso og Sissoko. Pennant og Gerrard munu væntanlega skiptast á köntum og Gerrard vera með svolítið frjálst spil en þá verk þeirra Sissoko og Mascherano að bakka hann upp. Ég set Kuyt uppá toppinn þar sem hann er gríðarlega vinnusamur og loksins setti tvö í sama leiknum um helgina. Með hann sem fremstan mann þá byrjar vörnin okkar framarlega sem og hann á eftir að djöflast í varnarmönnum Chelsea ENDALAUST. Crouch kemur síðan örugglega inná í seinni hálfleik til að fá ferskar fætur inná í stað Kuyt.

En hvernig kemur José “The Special One” Mourinho til með að stilla upp Chelsea? Það er ljóst að Essien mun ekki vera með vegna leikbanns, Carvalho og Robben eru víst meiddir og Ballack eitthvað tæpur þótt ég sé þess fullviss að hann spili þennan leik. Spurning hvort Cole byrjar inná eða Kalou? Ég skýt á Cole því ef hann er 90% klár þá er hann mun betri en hinn ungi Kalou sem og með mun meiri reynslu af leikjum sem þessum. Ólíkt Rafa þá er Mourinho oftar en ekki fyrirsjáanlegur í liðsvali sínu og kæmi mér á óvart ef liðið væri mikið öðruvísi en eftirfarandi:

BEKKUR: Cudicini, Kalou, Wright-Phillips, Bridge, Boulahrouz, Diarra og

(Uppfært) Það er víst ljóst að Carvalho [verður með á morgun](http://news.bbc.co.uk/sport2/hi/football/europe/6582695.stm) en Ballack er víst ekki með vegna ökklameiðsla sem hann hlaut gegn Newcastle um helgina. Síðan er gefið í skyn á öðrum vefmiðlum að Schevchenko gæti byrjað á bekknum (sem ég tel þó afar hæpið). Hins vegar gæti José því breytt yfir í 4-4-2 leikaðferðina og þá gæti liðið verið svona:

Og ef Schevchenko er tæpur þá færi Wright-Phillips á kantinn og Kalou með Drogba fram. Auðvitað má vel vera að Mikel væri varnarsinnaður miðjumaður í stað Makalele en reynsla hans hlýtur að tryggja honum byrjunarliðssæti.

Í svona stórleikjum er ávallt erfitt að spá hvernig leikurinn þróast því það er gríðarlegt taugastríð sem á sér stað og mismunandi hvernig leikmenn bregðast við því. Ég held að fáir hafi td. séð það fyrir að Liverpool myndi ná að jafna gegn Milan í Istanbul um árið eftir að staðan var 3-0 í hálfleik. En allt er hægt og þess vegna getur allt gerst á morgun. EN miðað við fyrri viðureignir liðanna þá er ekki ólíklegt að þetta verði járn í járn og lítið um marktækifæri. Svona fyrirfram þá sé ég ekki skemmtilegasta knattspyrnuleik sögunnar fyrir mér og er slétt sama um það ef við náum hagstæðum úrslitum. Það yrði frábært að skora á Brúnni og myndi mark á útivelli fleyta okkur langt en ég sé fyrir mér frekar bragðdaufan leik þar sem bæði lið spila varfærnislega og leggja upp með að fá EKKI á sig mark.

Mín Spá: 0-0

Ég get ekki lýst því hversu spenntur ég er fyrir þessum leik en þangað til verður mér að nægja að horfa á Man U – Milan í kvöld. Ég hlakka svo til….

Wigan á morgun sem þýðir að það styttist enn í leikinn stóra gegn Chelsea, stærsta leik tímabilsins, eins og staðan er núna… alltaf auðvelt að segja svona, og þetta hefur áður heyrst á tímabilinu. Eftir þann leik verður líka seinni leikurinn svo stærsti, og svo framvegis….

Það er erfitt að einbeita sér að leik gegn Wigan á morgun með svona leik framundan. Meira að segja ég er ekki búinn að tala um neitt annað í þessari upphitun fyrir leikinn á morgun. Jæja, við einbeitum okkur að Chelsea á sunnudaginn.

Wigan já. Paul Jewell, sem er fæddur í Liverpool, er búinn að gera ágætt mót með þetta lið sem er þó enn í fallbaráttu. Það situr í 15 sæti með 35 stig, þremur stigum meira en Charlton sem vermir 18 sætið. Það er því mikið í húfi hjá þeim. Okkar menn eru eins og við vitum í þriðja sætinu, með tveimur stigum meira en Arsenal. Það eru 10 stig í Everton og Bolton og þetta Meistaradeildarsæti er tryggt, það er alveg klárt mál. Auðvitað viljum við lenda í þriðja sæti frekar en því fjórða en þessi 500 þúsund pund skipta engu máli, heiðurinn og tölfræðilega hliðin skipta auðvitað máli samt sem áður.

Rafa mun væntanlega nota tækifærið og hvíla menn fyrir stórleikinn í næstu viku. Auk þess er þetta gott tækifæri til að leyfa nokkrum minni spámönnum og þeim sem hafa ekki spilað mikið tækifæri til að sýna sig í deildinni. Eigum reyndar enga minni spámenn nema hann fari að nota kjúklingana….

Rafa veit eflaust nú þegar hvernig hann mun byrja leikinn gegn Chelsea (vá hvað er erfitt að minnast ekki á þennan leik! ;), ef ekkert óvænt kemur upp á æfingum hvað varðar form eða meiðsli. Því velur hann líklega liðið á morgun með hliðsjón af því.

Aftast í hausnum á leikmönnum, og greinilega mér líka, er þessi leikur gegn Chelsea búinn að hringsóla síðan í síðustu viku. Við spiluðum illa gegn Manchester City og mér skilst að leikurinn gegn Boro hafi ekki verið góður. Sá hann að vísu ekki. Ég á ekki von á neinum stjörnuleik frá okkar mönnum á morgun heldur en ég held að þetta Wigan lið eigi samt ekki að vera nein fyrirstaða.

Wigan eru veikir varnarlega að mörgu leiti og það er ekki hlaupið að því að skora á Anfield eins og við vitum. Þetta er eiginlega nágrannaslagur þar sem Wigan er aðeins 20 mílum frá Liverpool en það er athyglisvert að það hefur tapað öllum leikjum sínum gegn “stóru fjórum” frá því þeir komust upp í deildina árið 2005.

Wigan býður upp á Emile Heskey í sókninni sinni. Ég held að Carra hafi lítinn áhuga á því að láta hann skora hjá sér. Kirkland verður ekki í marki þeirra, og búið ykkur undir þetta – Hann er meiddur. Ég á ekki eitt aukatekið… Ég hef alltaf verið nokk hrifinn af Henri Camara, finnst hann góður leikmaður. Svo eru þeir með nokkra fyrrum leikmenn Everton og svona. Skiptir samt engu máli.

Okkar menn? Bellamy gæti fengið að spila eftir meiðsli, annars eru þessir hefðbundu meiddir. Ómögulegt að spá í byrjunarliðið. Ætla að tippa á þetta.

Bekkur: Dudek, Agger, Sissoko, Crouch, Bellamy.

Ég held að Crouch verði einn frammi gegn Chelsea, Gerrard rétt fyrir aftan hann og Pennant á kantinum. Speedy verður að spila þennan leik. Rafa gæti reyndar róterað þessu meira, til dæmis sett bara Paletta í byrjunarliðið, og svo erum við með fjóra frábæra miðjumenn. Kannski spila bara tveir þeirra gegn Chelsea. Hann gæti notað hina tvo á morgun. Held samt að þeir verði þrír í báðum leikjum, ef Gerrard er einn af þessum svokölluðu miðjumönnum.

Kyut var ekki með gegn Boro og ekki Finnan heldur. Fowler kallinn… vona að hann spili. Agger gæti fengið hvíld fyrir frænda sinn, kannski ekki – kemur í ljós!

Mín spá: Svipað og gegn Boro, ekkert spes leikur, en við innbyrðum öruggan sigur gegn Wigan sem mun aldrei sjá til sólar á Anfield. 3-0, Fowler, Gerrard og Kuyt.

Jæja, það líður sem betur fer ekki langt á milli leikja þessa dagana. Hvernig gengur ykkur að einbeita ykkur að leikjum eins og gegn Boro á morgun? Ég verð að viðurkenna það að hugur minn er fyrst og fremst á fyrri leik Liverpool og Chelsea sem fram fer í næstu viku. Það er samt vika í það og það verða tveir leikir leiknir áður en að því kemur. Verkefnið sem er framundan er ofur einfalt. Tryggja Meistaradeildarsæti sem allra allra fyrst. Með sigri á morgun tökum við langt og ákveðið skref í þá átt. Við eigum ekki að geta klúðrað þessu úr þessu, en við vitum samt að í fótbolta er allt hægt.

Hvernig er þetta Middlesbrough lið? Í mínum huga er það einfaldlega slappt. Við eigum að vinna þetta lið nokkuð létt, hvað þá á heimavelli. Við höfum þó alltof oft átt í ströggli með þá, þó það eigi fyrst og fremst við um útivöllinn. Þeir hafa aðeins fengið 9 stig af 39 mögulegum úr útileikjum sínum. Þeir hafa aðeins unnið einn útileik og það var gegn Charlton í janúar. Það sem er ennþá betra er að þeir hafa ekki unnið á Anfield í deildinni síðan 1976. Maður er þó ávallt frekar hræddur þegar svoleiðis statistík er borin upp. Hvað um það, þetta á hreinlega að vera öruggur sigur.

Við höfum aftur á móti ekki tapað í síðustu 6 leikjum í öllum keppnum. Það er þó ekki þar með sagt að við höfum neitt verið að brillera. Bæði gegn Aston Villa og Manchester City vorum við ferlega slappir og hugmyndasnauðir. Ef við verðum það áfram gegn Boro, þá má alveg reikna með 0-0 jafntefli. Þeir koma til með að spila uppá það, þannig að nú verða menn hreinlega að stíga upp og setja nokkur kvikindi. Við höfum fengið heil 5 mörk á okkur á heimavelli í deildinni á tímabilinu. Varnarleikurinn hefur því ekki verið neinn hausverkur og ég efast um að hann verði það á morgun. Þetta snýst um að koma þessari bévítans tuðru í netið hjá andstæðingunum. Það er akkúrat enginn í þessu Boro liði sem hræðir mig, og nenni ég ekki einu sinni að spá í það hvaða leikmenn muni byrja leikinn hjá þeim, eða hvort einhver sé meiddur eða í banni.

Hvað okkar menn varðar, þá er sjúkralistinn svona la la. Talað var um að Bellamy gæti orðið leikfær, ég efast samt um að áhætta verði tekin með hann of snemma. Fowler var frá í síðasta leik vegna meiðsla og hef ég ekki upplýsingar um það hvort hann sé orðinn klár í slaginn á ný. Þar fyrir utan eru það þeir Kewell, Garcia og Aurelio sem eru fjarri (spurning hvað er langt í Kewell blessaðann, hann á að vera byrjaður á fullu á æfingum). Ég reikna með að Rafa vilji hraðan sóknarleik og ólíkt mörgum öðrum, þá held ég að kerfið sem við spiluðum gegn Arsenal geti skilað okkur því. Þ.e. tveir hraðir kantmenn, Stevie fyrir aftan framherja og Javier og Xabi á miðjunni. Svona ætla ég að giska á að Rafa stilli upp:

Bekkurinn: Dudek, Hyypia, Zenden, Momo og Kuyt

Ég ætla að spá 2-0 sigri, þar sem Gerrard og Crouch koma með mörkin.

Á morgun fara okkar menn til Manchester spila á City of Manchester Stadium. Þetta verður erfiður leikur líkt og ávallt gegn Man City. Við höfum unnið síðustu þrjá leiki gegn þeim, [1-0](http://www.kop.is/gamalt/2006/11/25/16.49.43/) þann 25. nóv á síðasta ári á Anfield, [1-0](http://www.kop.is/gamalt/2006/02/26/14.10.22/) á City of Manchester Stadium þann 26. feb. 2006 og 26. nóv 2006 á Anfield [1-0](http://www.kop.is/gamalt/2005/11/26/16.55.15/). Þannig að útfrá því vinnum við 1-0 þennan leik :) en málið er að Man City er á góðu skriði síðustu vikurnar og hafa þeir ekki tapað leik síðan gegn Chelsea 14.mars 0-1. Þeir hafa unnið 3 leiki af 4 og eitt jafntefli og hafa allir sigurleikirnir verið á útivelli, Fulham (1-3), Newcastle (0-1) og Middlesboro (0-2). Síðan gerðu þeir steindautt 0-0 jafntefli gegn Charlton á heimavelli.

Okkur hefur einnig gengið vel undanfarið og var síðasta tapið í deildinni í byrjun mars þegar við töpuðum með ótrúlegum hætti gegn Man U en ég hef ekki áhuga að fara nánar útí það.

Micah Richards og Paul Dickov eru meiddir hjá Man City en Dietmar Hamann er víst klár og verður með á morgun. Leikmaður sem er dáður í Liverpool og var hann einn af mínum uppáhaldsleikmönnum. Hann hefur verið í miklum meiðslavandræðum frá því hann fór til Bolton/Man City.

Hjá okkur eru þeir Luis Garcia, Harry Kewell og Fabio Aurelio allir frá vegna meiðsla sem og Craig Bellamy. Aðrir munu vera heilir og tilbúnir í slaginn.

Hvernig Rafa stillir upp liðinu er líkt og ávallt erfitt að segja til um en ég tel ljóst að Gerrard, Carragher, Finnan og Kuyt komi inní byrjunarliðið eftir hvíld gegn PSV sem og Zenden gæti haldið sæti sínu eftir fínan síðasta leik. Gonzalez hefur ekki verið að nýta þau tækifæri sem hann hefur fengið miðað við t.d. Pennant sem hefur komið mjög sterkur upp seinni part tímabilsins.

Bekkurinn: Dudek, Fowler, González, Mascherano, Arbeloa, Hyypia og Sissoko. Hver verður nákv. á bekknum hef ég ekki hugmynd um.

Ég hef ávallt haft “soft-spot” fyrir Stuart Pearce, stjóra Man City. Ég fílaði hann sem leikmann, ótrúlegur nagli og fastur fyrir. Þannig virðist hann einnig vera sem stjóri. Hann virkar afar hreinskilinn og er óhræddur að taka áhættur. Ef illa gengur þá tekur hann sína ábyrgð og kennir ekki eingöngu leikmönnum um ef illa gengur. Hann virðist hafa góða stjórn sínum leikmönnum og hefur náð að þroska leikmenn eins og Joey Barton.

Núna lítur út fyrir það að City sé búið að bjarga sér endanlega frá falli með góðu gengi undanfarið og ætla mætti að leikmenn myndu þá jafnvel slaka á þar sem tilætluðum árangri er náð. En Stuart Pearce er ekki sammála og segir m.a.:

“If you ask me whether we are in a league position I will find acceptable if that is where we end up, the answer is no. For me to start turning around and make noises about being safe would send out a message that our season is finished – and it is far from that.”

Mín spá er einfaldlega 1-0 fyrir okkar mönnum þar sem markamaskínan Crouch skorar enn og aftur.

Svona á þetta að vera, skammt leikja á milli hjá okkar mönnum! Við leikum semsagt gegn PSV Eindhoven frá Hollandi á morgun, síðari leikinn í 8-liða úrslitum Meistaradeildar Evrópu. Leikurinn hefst klukkan 18.45 og verður í beinni á Sýn, svona til að hafa formsatriðin á hreinu.

Ég veit að þetta er ekkert búið, enn 90 mínútur eftir, blablabla og okkur tókst það í Istanbúl og allt það en það er ekki fræðilegur séns í helvíti að PSV stoppi okkur í því að komast í undanúrslitin! Að PSV skori þrjú mörk gegn engu okkar á Anfield er svo óhugsandi að það er ekki einu sinni fyndið. Í mesta lagi skoplegt.

Ég var búinn að fjalla aðeins um PSV og fyrri viðureignir og slíkt í upphituninni fyrir hinn leikinn….

PSV tapaði um helgina, var lélegt gegn okkur í fyrri leiknum og eftir leikinn sagði bæði þjálfari liðsins og einn geðþekkur leikmaður að nafni Jan Kromkamp að þetta einvígi væri einfaldlega búið. Hversu lélegt mér þykir af einhverjum að gefast svona upp er annað mál en það er rétt hjá þeim. Philip Cocu er maður að mínu skapi, segir í dag að hann sé ekki á Englandi í fríi, hann er raunsær, en vonast til að skora fyrst og sjá svo til.

Ofan á 3-0 tap á heimavelli mun Koeman stilla upp ungu, óreyndu og enn veikari liði en hann gerði á heimavelli. Samkvæmt opinberu síðunni okkar er hann með tvo algjöra kjúklinga í 18-manna hópnum, Rens van Eijden and Olivier ter Horst, og þá eru Ibrahim Afellay, Jan Kromkamp, Edison Mendez, Michael Reiziger og Alex allir meiddir auk þess sem Alcides, John de Jong og Género Zeefuik eru ekki löglegir eða eru í banni.

Að okkar mönnum. Þeir eru hver á eftir öðrum búnir að sýna mikla fagmennsku með því að koma fram og segja að þetta sé ekkert búið þrátt fyrir að vel hafi gengið í Hollandi og svona. Flott hjá þeim og það sem maður býst við frá svona atvinnumönnum. Breytir því ekki að gaurinn á bloggsiðunni á Íslandi segir að þetta verði ekkert nema formsatriði :)

Það verður að teljast líklegt að Rafa breyti liðinu frá helginni, hversu mikið er eins og endranær erfitt að segja til um. Við höfum úr öllum leikmönnum að velja nema Dirk Kuyt sem er í banni, Kewell, sem þó styttist í, Luis Garcia og Fabio Aurelio. Vinstri vængurinn okkar er því frekar þunnskipaður, en samt ekki, við erum með breiðan hóp góðra og fjölhæfra manna sem leysa þetta vel.

Pennant var frábær þegar hann kom inn gegn Reading og lagði upp sigurmarkið á lokamínútunum og ég held að hann fái að spila núna. Það þýðir að tveir af frábærum miðjumönnum okkar munu verma varamannabekkinn. Mascherano er búinn að spila nokkra leiki í röð og ég held að hann og Sissoko verði á bekknum. Alonso og Gerrard því á miðjunni og Riise vinstra megin.

Arbeola því í vinstri bakverði og Agger kemur aftur inn. Frammi? Crouch inn fyrir Kuyt og verður því frammi með Bellamy. Liðið yrði því svona:

Bekkurinn: Restin af hópnum!

Þetta er kannski of sterkt lið? Það er kannski líklegt að Rafa hvíli fleiri menn? Ég giska allavega á þetta en kannski hvílir hann bara Gerrard alveg? Alonso var ekki með um helgina vegna smávægilegra meiðsla, kannski verður Sissoko bara sem varnarsinnaður miðjumaður fyrir Alonso! Kannski ekki samt. Kannski verður Gonzalez inná og Arbeola á bekknum? Kannski kannski kannski….

Mín spá: Sigur, ekki spurning, og það án þess að gestirnir skori. Ég segi aftur 3-0 bara þar sem Bellamy, Pennant og Crouch skora! Í það minnsta förum við áfram og mætum þar vonandi Valencia! Ég mun fylgjast spenntur með leikjunum í kvöld sem og á morgun…

YNWA

UPPFÆRT: Rafa segir að hann hvíli hugsanlega “the big guns” eins og Tjallinn kallar þetta. Þá verða Carra, Gerrard og fleiri ekki inni og Fowler líklega frammi. Bara svona til að bæta aðeins á óvissuna og fáfræði mína :)

Eftir frekar góða viku hjá okkar mönnum verður forvitnilegt að sjá hvaða úrslit helgin ber í skauti sér. Það hefur oft viljað loða við lið Rafa Benítez að geta lyft sér upp á hærra plan í Meistaradeildinni og í stærri leikjum en svo tapað óvænt fyrir “lakari” liðum. Eftir sigra á Arsenal og PSV mun liðið mæta nýliðum Reading á morgun, á útivelli, og nú ríður á að halda góða forminu áfram.

Reading eru eins og menn vita nýliðar í deildinni í ár en þeim hefur gengið framar vonum að festa sig í sæti í deildinni. Fyrir helgina eru þeir með 44 stig eftir þrjátíu og eina umferð, þrettán stigum minna en okkar menn, og sitja í áttunda sæti deildarinnar.

Við Íslendingar þekkjum Reading-liðið líka nokkuð vel af sérstakri ástæðu, en hjá liðinu leika þeir Ívar Ingimarsson og Brynjar Björn Gunnarsson. Eftir því sem ég best veit eru Reading-lið með allt að því heilt lið á morgun og því getum við búist við því að Ívar byrji sem fyrr inná en Brynjar Björn verði á bekknum. Þeirra hættulegustu menn eru eflaust sóknarmennirnir Leroy Lita, Kevin Doyle og Stephen Hunt sem hafa verið sprækir í vetur.

Okkar menn mættu Reading tvisvar í haust í kringum mánaðarmótin okt/nóv. Fyrst unnum við 4-3 sigur á þeim á Anfield í Deildarbikarnum, svo tveimur vikum síðar unnum við 2-0 sigur á Anfield í deildinni. Í það skiptið skoraði Dirk Kuyt bæði mörkin en miðað við spilamennsku hans nýlega verður að teljast ólíklegt að hann endurtaki leikinn.

Það verður forvitnilegt að sjá byrjunarlið Rafa á morgun. Að öllu eðlilegu myndi hann hvíla fyrir leikinn gegn PSV á miðvikudag en vegna stórsigursins á útivelli þarf hann ekki að hafa sömu áhyggjur af því og ella. Þá kemur Momo Sissoko aftur inn í hópinn eftir leikbann og verður spennandi að sjá hvort hann veltir Javier Mascherano eða Xabi Alonso úr sessi á morgun.

Ég ætla að spá því að Steven Gerrard verði á miðjunni á morgun og að við spilum svipaða taktík og gegn Arsenal. Rétt eins og síðasta laugardag erum við að fara að mæta liði sem vill pressa menn og hafa boltann í fætur og því gæti skyndisóknataktík gengið upp. Gonzalez og Pennant koma aftur inn á kantana, Bellamy spilar fyrir Crouch og Sissoko byrjar inni í stað Mascherano.

Ég held að liðið verði svona:

MÍN SPÁ: Eins og venjulega á útivelli í deildinni hef ég ákveðnar áhyggjur af getu liðsins til að lyfta sér upp á hærra plan gegn “lakari” liðum. Vandamálið er að, ólíkt t.d. Aston Villa sem voru steingeldir á eigin heimavelli fyrir mánuði þá er þetta Reading-lið fjörugt og mun refsa okkur fái þeir séns.

Ég ætla samt að vera bjartsýnn og spá því að hin mikla stemning sem hlýtur að ríkja í liðinu eftir þessa síðustu viku muni fleyta þeim áfram og við munum vinna 3-1 sigur í stórskemmtilegum leik.

Áfram Liverpool!

Jæja! Byrjunarliðið gegn PSV er komið og ég hafði aldrei þessu vant 100% rétt fyrir mér. Hjalti, sem sá um upphitunina í gær, var það hins vegar ekki. :) Og nei, menn geta hætt að spenna sig upp í eitthvað reiðiskast út í Rafa, Peter Crouch er í liðinu!

Liðið í kvöld:

Bekkur: Dudek, Hyypiä, Arbeloa, Zenden, Pennant, Gonzalez, Bellamy.

Enginn Fowler á bekknum sem sagt, og Momo sem fyrr sagði í banni. Annars líst mér vel á þetta, mjög sterkt 4-4-2 með varkára miðju. Gleymum því ekki að það voru þeir Gerrard og Riise á vængjunum sem slátruðu Barca á Nou Camp (Gerrard á Kuyt og Riise skoraði í kjölfarið).

Þetta verður magnað kvöld, ég finn það á mér! ÁFRAM LIVERPOOL!!!!

Á morgun heldur Meistaradeildin áfram og þar með leit okkar manna að eina titlinum sem þeir eygja enn á tímabilinu. Leiðin til Aþenu er strembin og grýtt, margir eru þegar farnir að sjá borgina fögru í hyllingum, en það er alveg ljóst að við hefðum getað fengið verri mótherja í 8-liða úrslitunum en PSV Eindhoven frá Hollandi.

Leikurinn er sýndur beint á Sýn og hefst á nýjum tíma, klukkan 18.45 þar sem búið er að breyta klukkunni í Evrópu. Leikið er í Hollandi.

Eftir magnaðan sigur á Barcelona, sem eru enn ríkjandi Evrópumeistarar, er komið að átta liða úrslitunum. Frábær sigur á Arsenal á laugardaginn er búinn að pumpa margan manninn, í það minnsta mig, í mikla spennu fyrir þennan leik. Við lékum gegn PSV í riðlakeppninni, fyrri leikurinn fór 0-0 í Hollandi þar sem við vorum óheppnir að vinna ekki. Gerrard byrjaði á bekknum þar, kom inn á og skaut í innanverða stöngina.

Í siðari leiknum á Anfield unnum við svo sannfærandi 2-0 sigur. Gerrard og Crouch sáu um markaskorunina þar í leik sem við stjórnuðum frá upphafi til enda. PSV náði ekki að heilla mig mikið í þessum leikjum og á morgun verða þeir án besta varnarmanns síns, Alex sem er meiddur. Það er mikið áfall fyrir þá Hollensku. Auk þess verður Arouna Kone ekki. Það er sama gamla sagan hjá okkur, Kewell og Garcia frá. Auk þess er Momo í banni….

Ég held að PSV geri sér alveg grein fyrir því að það er ekkert hlaupið að því að skora á Anfield. Því má leiða líkum að því að þeir reyni að sækja til sigurs og helst skora tvö mörk gegn engu okkar. Ég hef enga trú á því að það takist þrátt fyrir að PSV hafi lagt Arsenal í 16-liða úrslitunum. Rafa er einfaldlega of snjall held ég og hann kann pottþétt á þetta PSV lið, betur en Arsene Wenger kunni á það.

Ég er þó ekki að segja að þetta veri greið leið fyrir okkar menn, alls ekki, en það er sannfæring mín að við vinnum PSV samanlagt í tveimur leikjum. Hvernig Rafa stillir upp gegn efsta liði Eredvisen deildarinnar er erfitt að segja til um, eins og venjulega. Ég væri til í að sjá Pennant inni til að koma með þessa frábæru krossa, þá yrði Gerrard inni á miðjunni og kannski ekki pláss fyrir Mascherano. Ég væri til í að sjá þá alla inni en það er ólíklegt.

Rafa gæti reyndar stillt Gerrard aftur upp rétt fyrir aftan Crouch en ég ætla að tippa á þetta byrjunarlið:

Bekkur: Dudek, Aurelio, Mascherano, Gonzalez, Zenden, Bellamy, Fowler.

Ég vil alveg Bellamy inn fyrir hraðann, og kannski er líklegt að hann byrji þar sem hann hvíldi um helgina, en það gerði Kuyt líka. Crouch skoraði þrennu. Ég vona svo sannarlega að hann fái að spila. Kannski verður Bellamy svo bara út til vinstri með Kuyt og Crouch frammi!

Riise, Alonso, Gerrard og Pennant þar með á miðjunni. Ég held að Zenden fá ekki tækifæri gegn sínum gömlu félögum og því miður er ekki pláss fyrir fleiri. Mascherano var frábær gegn Arsenal en byrjar líklega ekki og ég er svo á því að Riise komi inn þrátt fyrir að Aurelio hafi líka verið frábær. Vá, ég hef sjaldan eða aldrei átt í erfiðleikum með að ákveða þetta byrjunarlið sem ég er að tippa á! Jæja…

Í byrjunarliði PSV verða líklega menn eins og Jan Kromkamp sem við þekkjum vel, Ibrahima Afellay sem spilaði sinn fyrsta landsleik fyrir Holland í síðustu viku (sem reyndar er tæpur en spilar líklega), gamli jálkurinn Phillio Cocu, hinn eitursnjalli Jefferson Farfan og einn Patrick Kluivert!

Nokkrir tölfræðipunktar af opinberu síðunni:
- Liverpool hefur aðeins tapað 8 leikjum undir stjórn Rafa í CL.
- Carragher bætir met Phil Neal sem hann jafnaði í síðasta leik þegar hann spilar sinn 58 leik fyrir Liverpool í keppninni, ef hann meiðist ekki fyrir leikinn.
- Gerrard verður aðeins fimmti leikmaðurinn til að spila yfir 50 leiki fyrir Liverpool í Meistaradeild þeirra bestu, ef hann meiðist ekki!
- Ef Gerrard skorar bætir hann met Rush um flest mörk skoruð fyrir Liverpool í Meistaradeildinni (og Champions Cup), sem yrði mark hans númer 14. Aðeins Michael Owen (22) og Rush (22) hafa skorað fleiri mörk í Evrópukeppnum.
- Momo Sissoko er í banni, en Kyut og Pennant eru á gulu spjaldi og missa af seinni leiknum fái þeir spjald á morgun.
- Liverpool hefur tapað aðeins tveimur af síðustu fimmtán útileikjum sínum í CL, gegn Benfica í fyrra 1-0 og Galatsaray 3-2 fyrr á tímabilinu.

Mín spá: Ég held að með sterkum og öguðum varnarleik nái PSV að halda Liverpool í einu marki en nái jafnframt að pota inn einu sjálfir. Ég spái því 1-1 jafntefli þar sem Crouch heldur uppteknum hætti. Við klárum þetta svo örugglega á Anfield :)

YNWA