Jaaaaahaaaaahaaaaaaháááááááááááááá!!!!!!!!

Okkur tókst það! Ég trúi þessu varla enn, puttarnir á mér titra nánast of mikið til að ég geti vélritað þetta … en við unnum ARSENAL í dag, 2-1, í stórkostlegum leik. Ég sagði sjálfur fyrir leikinn að mér væri sama þótt við töpuðum, eins lengi og við myndum berjast í þessum leik. Nú, sjáum hvernig strákarnir okkar brugðust við:

Þeir börðust eins og ljón. Þeir pressuðu Arsenal svo hátt uppi á vellinum að meistararnir áttu ekki von á því. Arsenal-liðið átti hreinlega aldrei séns í þessum leik, allavega ekki framan af. Tölfræðin segir sína sögu, Arsenal áttu tvö langsótt skot að marki og svo markið sem Vieira skoraði … við áttum ellefu skot að marki og þar af tvö mörk.

Og þvílík mörk! Söknuðu menn Stevie Gerrard? Hefur okkur hlakkað til að sjá hann og Xabi Alonso spila saman? Nú, í dag rættust allar óskir okkar. Hamann vann boltann á miðjunni, kom honum á Finnan sem átti frábæra þversendingu yfir á vinstri vænginn. Þar skallaði Kewell hann vel niður á Gerrard sem hafði nóg pláss, leit upp og lagði boltann svo inn í opið svæði sem hafði myndast við vítateigslínu Arsenal, þökk sé góðri vinnu Mellor sem hafði náð að draga bæði Kolo Touré og Sol Campbell út úr svæði.

Inn í þetta svæði kom síðan Xabi Alonso og NEGLDI boltann uppí samskeytin. Váááá, við komnir í 1-0 og allt að ganga upp!

Í seinni hálfleik héldu yfirburðirnir áfram. Það var skrýtið að segja þetta, en það var bara eitt lið á vellinum fyrsta klukkutímann. Arsenal-liðið var bara einfaldlega ekki með í þessum leik og erfitt að sjá hvort liðið var Enskir Meistarar 2004 og hvort liðið átti að eiga í “krísu” þessa dagana.

Engu að síður skal því aldrei gleymt að innan raða Arsenal eru stórkostlegir leikmenn og þótt þeir Henry, Pires, Ljungberg, Reyes, Fabregas, Cole, Campbell, Touré og Lauren væru frekar daprir í dag … þá var Patrick Vieira alveg frábær fyrir þá. Sem sýndi sig best í því að hann var næstum því búinn að stela stigi fyrir þá einn síns liðs. Markið hans var frábært, hann tætti vörnina okkar í sig, átti góðan þríhyrning og fékk boltann á bak við Carragher, og lagði hann yfir Kirkland og í fjærhornið. 1-1 og ótrúlegt en satt, þá sá ég fram á þunglyndi yfir að ná ekki að vinna þennan leik, slíkir voru yfirburðir okkar manna.

Næstu 10 mínúturnar eða svo eftir jöfnunarmarkið var besti kafli Arsenal í leiknum og í raun einu mínúturnar þar sem þeir sýndu einhverja spilamennsku og getu til að vinna þennan leik. En eftir að okkar menn höfðu jafnað sig á áfallinu sem kom við jöfnunarmarkið tókum við völdin smám saman aftur, og síðustu 20 mínútur þessa leiks var lítið annað í gangi en stórsókn að marki Arsenal. Þar fór fremstur í flokki fyrirliðinn okkar, Steven Gerrard, sem var svo alvarlega góður í dag að ég táraðist hreinlega. Þvílíkur leikmaður?!?!?

Þá var gaman að sjá Antonio Núnez koma inná í þessum leik. Hann gerði nú ekki mikið eftir að hann kom inná, enda í lélegu leikformi, en bara nærvera hans gaf okkur smá móralskan plús sem að sýndi sig í því að liðið fékk sjálfstraustið aftur eftir að hann kom inná.

Þrátt fyrir pressu og vinnusemi okkar manna þá virtumst við ekki ætla að ná að skora á þá og þegar komið var nærri því tvær mínútur fram yfir venjulegan leiktíma, og aðeins nokkrar sekúndur í að dómarinn flautaði til leiksloka, þá var maður eiginlega farinn að bóka það að þetta yrði “stórmeistarajafntefli”.

Ekki aldeilis. Hár bolti fram, Gerrard skallaði til baka (eða var það Núnez? sá það varla) og þar mætti NEIL MELLOR, einhverjum 40 metrum frá marki Arsenal, sem tók boltann á lofti og negldi hann í fjærhornið. Óverjandi fyrir Jens Lehmann og sanngjarn sigur Liverpool í höfn!

Þetta var svo sætt fyrir Neil Mellor. Hann er ekki jafn góður og Milan Baros eða Djibril Cissé og ég hafði það á orði við sessunauta mína að ef Baros hefði verið með í dag hefðum við unnið svona 4-1, þar sem vörn Arsenal var mjög ótraust en Mellor virtist bara ekki hafa það sem til þurfti til að refsa þeim.

En eitt skortir strákinn ekki og það er hjartað. Hann hleypur sig í gröfina í hverjum einasta leik fyrir Liverpool, gefur sig allan í málstaðinn og gerði allt sem hann mögulega gat til að hjálpa okkur að sigra í dag. Þannig að þegar hann skoraði þá fyrst og fremst gladdist maður yfir því að það skyldi hafa verið Mellor sem skoraði, því hann átti það svo skilið. Það er ekki auðvelt að vera 22-ára nobody, barnaandlit og lítt þekktur í boltaheiminum, og fá það verkefni að ráðast einn gegn Sol Campbell, Kolo Touré, Lauren, Ashley Cole og Patrick Vieira. Að ógleymdum Jens Lehmann á bak við þá. Þetta væri nóg til að hræða líftóruna úr hvaða framherja sem er, en Mellor sinnti starfi sínu af aðdáun í dag og þótt hann komist ekki með tærnar þar sem Milan Baros hefur hælana þá átti hann þetta sigurmark svo skilið!

MAÐUR LEIKSINS: Er það einhver spurning? Steven Gerrard maður, Stevie G! Það voru reyndar tveir yfirburðamenn á vellinum í dag, og það var stórkostlegt eins og venjulega að fylgjast með þeim Vieira og Gerrard kljást … en í dag var Stevie G sigurvegarinn, gjörsamlega. Hann var hreint yndislegur í þessum leik og dreif spil okkar manna áfram. Hann átti að fá víti í fyrri hálfleik, lagði upp bæði mörkin okkar (held ég) og það var bara ekki að sjá að hann væri búinn að vera meiddur í tvo mánuði.

Ómetanlegur leikmaður. Ómetanlegur sigur. Næst: Tottenham í miðri viku, en þá mæta kjúklingarnir okkar og Biscan til leiks. Um næstu helgi er það svo Aston Villa á útivelli og eftir 10 daga verðum við að vinna Olympiakos í meistaradeildinni. Ég trúi skyndilega að við getum unnið alla þessa leiki, eftir daginn í dag. Ómetanlegt og ef þetta verður upphafið að einhverju dásamlegu fyrir Liverpool þá munum við í lok tímabils öll þakka Neil Mellor fyrir!

**Uppfært (Einar Örn)**: Þetta var FRÁBÆRT! Núna er klukkutími síðan leikurinn kláraðist og ég titra nánast ennþá. Tveir vinir mínir voru í heimsókn og ég man hreinlega ekki að við höfum setið í gegnum heilan leik án þess að röfla í eina sekúndu yfir leik liðsins.

Það var yndislegt að sjá baráttuna! Og frábært að liðið gafst ekki upp þegar Arsenal jafnaði. Leikmönnum brá auðvitað og það tók smá tíma að jafna sig, en leikmenn gáfu þó bara í og kláruðu leikinn. Við ÁTTUM skilið að vinna þennan leik, það er engin spurning.

Það var líka frábært að sjá að við hættum ekki að spila eftir að við skoruðum fyrra markið. Í stað þess að leggjast bara í vörn einsog undir stjórn Houllier, þá héldu menn áfram í sókn. Frábært að sjá þetta!

Í síðasta deildarleiknum [kenndi ég Benitez um tapið](http://www.kop.is/gamalt/2004/11/20/16.37.47/), en fyrir leikinn í dag á Rafa mikið hrós skilið. Í fyrsta lagi þá virkaði liðsuppstillingin 100%. Vissulega átti Vieire frábæran leik, en að öðru leiti ÁTTU Liverpool menn miðjuna. Alonso og Hamann hirtu alla bolta og Gerrard var sí ógnandi. Þeir eiga allir hrós skilið. Já, líka Hamann! Einnig þá var augljóst að Benitez hafði barið baráttuanda í hópinn. Hver einasti leikmaður barðist fyrir öllum boltum

Einnig var vörnin frábær og ég efast um að Arsenal hafi leikið marga hálfleiki án þess að eiga **eitt einasta skot á markið**! Hyypia og Carra tóku allt, sem kom á þá.

Frábært! Frábært, frábært!!

Oj barasta.

Saviola skoraði kolólöglegt mark. Völlurinn var einn sá versti sem ég hef séð í langan tíma. Við vorum án Baros og Cissé. Við misstum Luis García útaf eftir tvær mínútur og Josemi, sem kom inná, þurfti líka að fara útaf meiddur í byrjun seinni hálfleiks. Dómarinn vildi bara dæma aukaspyrnur og spjöld á annað liðið og sleppti augljósustu hendi síðari ára í markinu hjá Saviola. Steve Gerrard er ekki í neinu andskotans leikformi.

Það er svo freistandi að grípa til einhverra af þessum afsökunum fyrir tapinu í kvöld. En ég ætla ekki að gera það. Ég er svo reiður að það hálfa væri nóg. Ég er ekki reiður út af þessum ‘ástæðum’, ég er pirraður yfir þeim. En ég er reiður út í liðið. Annan leikinn í röð þá er andleysið algjört á meðal þeirra leikmanna sem eru inná vellinum. Sköpunin er engin, talandinn er enginn, vinnslan í leikmönnum er ekki til staðar. Við áttum tvö skot að marki í kvöld, bæði af löngu færi. Mellor fékk boltann aldrei inní vítateig andstæðinganna. Þvílíkt sóknarlið sem við höfum hér, án Baros og Cissé.

Harry Kewell. Didi Hamann. Josemi. Steve Finnan. Jonny Riise. Dietmar Hamann. Djimi Traoré. Sami Hyypiä. Neil Mellor. Dietmar Hamann.

Bara nokkrir af þeim leikmönnum sem mig langar helst ekki að horfa á í Liverpool-treyju aftur, slíkt var andleysið í kvöld. Að mínu mati geta Kirkland í markinu, Carra að venju og Igor Biscan borið höfuðið hátt eftir þennan leik. Og Gerrard er löglega afsakaður, hann var búinn með orkuna eftir 50 mínútur en vegna meiðsla Josemi þurfti hann að vera áfram inná, þegar það var augljóst að Benítez ætlaði að nota Alonso ferskan í síðasta hálftímann.

Allir aðrir eiga að skammast sín.

Á sunnudaginn: Thierry Henry, Robert Pires, José Reyes & félagar. Við erum svo gott sem búnir að vera…

Uppfært (Kristján Atli): Rafa Benítez hefur staðfest að Luis García verður frá í þrjár vikur. Þá er óvíst hvort að Josemi getur leikið gegn Arsenal á sunnudag, en það þurfti að sauma 20 spor í andlitið á honum eftir árekstur kvöldsins.

Þá er vert að minna á nokkuð jákvætt sem ég var að muna eftir, nú þegar ég er aðeins farinn að róast: Dietmar Hamann fékk gult spjald í kvöld og verður því í leikbanni gegn Olympiakos. Við þurfum að vinna þann leik 2-0 til að komast áfram og það er gott að hugsa til þess að Benítez neyðist til þess að nota þá Gerrard og Alonso saman í þeim leik.

Úff, samt … djöfulsins skítakvöld var þetta? Það á ekki af okkur L’pool-aðdáendum að ganga. Ég er ekki gjarn á að kvarta undan ósanngirni eða óheppni eða meiðslum, en kommon … nú er nóg komið!

Þeir hefndu sín. Middlesbrough unnu í dag sannfærandi sigur á Liverpool, 2-0, á Riverside Stadium og er ekki hægt að segja annað en að þessi sigur hafi verið verðskuldaður.

Að mínu mati gerði Rafa Benítez slæm mistök í dag þegar hann ákvað að hafa hvorki Neil Mellor né Florent Sinama-Pongolle inná. Hann hafði Kewell og García frammi saman, en fyrir vikið var ekki einn einasti náttúrulegur markaskorari í liðinu. Og það sást í fyrri hálfleik, þar sem sóknarbroddur liðsins var ekki upp á marga fiska. Þeir García og Kewell eru báðir mjög góðir sem afturliggjandi framherji, fyrir aftan markaskorara, en í dag voru þeir ekki góðir. Við vorum einfaldlega með tvo afturliggjandi framherja, sem liggja fyrir framan varnarlínu andstæðinganna og leita leiða til að opna pláss fyrir sig og aðra.

Vandamálið er bara, að þeir voru ekki að opna pláss fyrir neinn. Það var enginn þarna til að opna pláss fyrir; enginn Cissé eða Baros að teygja á rangstöðuvörn Boro. Ekki einu sinni Mellor.

Hugtakið um ‘náttúrulegan striker’ er mjög einfalt. Það er maður sem þarf ekki að vera teknískur, hann þarf ekki að vera neitt í raun og veru. Hann þarf bara að hafa eitt sem enginn annar í liðinu hefur og það er þráhyggja gagnvart markaskorun. Náttúrulegi strikerinn getur ekki farið að sofa kvöldið eftir leik nema hafa skorað mark. Hann hefur einhvers konar sjötta skilningarvit gagnvart marktækifærum, virðist alltaf vera réttur maður á réttum stað, og því skorar hann þessi mörk. Einfaldlega af því að hann langar meira til að skora en alla hina í liðinu til samans.

Michael Owen, Djibril Cissé, Milan Baros, þetta eru allir náttúrulegir strikerar. Neil Mellor og Florent Sinama-Pongolle eru það líka. Harry Kewell og Luis García eru það ekki. Og því fór sem fór, því miður.

Annars var byrjunarliðið svona:

Bekkur: Dudek, Biscan, Gerrard, Flo-Po, Mellor.

Nú, fyrir utan þessi “mistök” Benítez (mín skoðun og ekkert annað, að sjálfsögðu) þá langar mig að útnefna þrjá leikmenn sem ollu stórkostlegum vonbrigðum í dag:

1: Dietmar Hamann. Var hann yfirhöfuð með í þessum leik? Þegar liðið er í sárum eins og núna, þegar okkur vantar leikmenn sem eru vanir að bera liðið uppi, þá verða þeir sem eru inná vellinum að stíga skrefið fram á við og bjóðast til að axla ábyrgð. Carragher hefur gert það undanfarið, Alonso líka, og Baros. En hvað með Hamann? Einn reyndasti og virtasti leikmaður liðsins … og hann var bara í felum í dag. Hann vann ekki einn einasta bolta í vörninni, hann skilaði ekki einum einasta bolta vel frá sér í sókninni. Hann einfaldlega var ekki með; maður sá hann skokka um völlinn eins og honum væri alveg sama. Þetta var ömurleg frammistaða og mig langar helst ekki að sjá hann í Liverpool-treyju á næstunni eftir að hafa horft upp á þessi ömurlegheit.

2: Jonny Riise. Hann er ekki flinkur leikmaður, hann getur ekki sólað menn eins og t.d. Kewell eða García. En hann hefur samt margt til brunns að bera sem kantmaður; hann er fljótur, sterkur, öruggur á boltanum, áræðinn og með góðar sendingar og skot. Hann ógnar alveg gríðarlega, hvort sem er í skotfærum eða með fyrirgjöfum. Nema hvað, hann gerði nákvæmlega ekkert af þessu í dag. Ekki neitt. Hann lét Ray Parlour og 18 ára bakvörð gjörsamlega yfirspila sig í dag svo að oft sá maður greyið Djimmy Traoré þurfa að verjast tveimur mönnum, einn síns liðs. Hræðilegur leikur hjá þeim norska.

3: Steve Finnan. Hann var ekki nærri því eins slæmur og Riise og Hamann en hann er ekki kantmaður. Af hverju í ósköpunum setti Benítez hann inn í liðið og færði García fram, vitandi að þá væri skortur á markaskorurum í liðinu, í stað þess að setja bara Mellor eða Pongolle beint inn? Það mun ég aldrei skilja. Finnan á að vera að berjast við Josemi um bakvarðastöðuna, og hvor þeirra á að spila þar er efni í annan pistil, en hann á ekki að vera á kantinum.

Nú, það voru fleiri mistök gerð. Til að mynda hafði dómarinn mikil áhrif á leikinn með því að dæma löglegt mark af García í fyrri hálfleik í stöðunni 1-0 fyrir Boro, og svo að leyfa nákvæmlega eins mark hjá Zenden í seinni hálfleik. Þá hefði hann getað gjörbreytt leiknum með því að reka Gareth Southgate réttilega útaf í byrjun síðari hálfleiks, þegar hann var síðasti varnarmaður á leið Harry Kewell að marki og togaði Kewell niður, rétt fyrir utan vítateig. Ef Hyypiä hefði togað Hasselbaink svona niður hefði enginn vafi leikið á því hvernig spjaldið hefði verið á litinn. En Southgate fékk gult.

Samt dettur mér ekki í hug að kenna dómaranum um þetta tap. Meiðslin settu sín strik í reikninginn, Benítez gerði mistök við uppstillingu á byrjunarliði og svo ollu sumir af reyndari mönnum liðsins miklum vonbrigðum, fóru í feluleik þegar þeirra var hvað mest þörf.

Svo var hræðilegt að sjá Xabi Alonso, sem annars var okkar besti maður í dag, gefa boltann beint í fæturna á Stuart Downing á vinstri kanti Boro. Það var engin pressa á Alonso og hann gaf boltann samt beint á Downing, þegar enginn Liverpool-leikmaður var einu sinni nálægt honum. Upp úr þessu fengu þeir hraðaupphlauð og skoruðu annað mark sitt, og þá var þessi leikur eiginlega bara búinn.

Steven Gerrard kom inná þegar hálftími var eftir af leiknum en það hafði lítið að segja. Hann er í ömurlegu leikformi og það sást, en hann var samt miklu miklu miklu miklu miklu miklu miklu betri en Hamann, sem fór útaf fyrir hann. Þá kom Pongolle inná þegar 20 mínútur voru eftir en þá var það orðið allt of seint að setja striker inná völlinn. Biscan kom svo inná undir lokin en hafði engan tíma til að breyta nokkru.

Ég veit það ekki. Maður er að reyna að vera rólegur yfir þessu en staðreyndin er samt sú að nú er liðið búið að tapa fimm leikjum í deildinni og er einhverjum 15 stigum á eftir toppliði Chelsea. Fimmtán stig og tímabilið er ekki hálfnað, sem þýðir að ef við tökum okkur ekki á á næstu misserum endum við um 30 stigum á eftir því liði sem vinnur deildina, rétt eins og í fyrra. Það er engan veginn nógu gott.

Auðvitað eru meiðslin hræðileg. Gerrard mun reyndar koma sterkur inn á næstunni og það munar um minna, en framherjavandamálin okkar eru gjörsamlega ótrúleg. Sérstaklega ef Benítez ætlar alls ekki að leyfa þeim Pongolle og Mellor að sanna sig. Ég veit að þeir eru ungir og óreyndir en kommon, það verður að hafa markaskorara þarna inná. Ég vill frekar sjá ungan og óreyndan náttúrulegan markaksorara þarna inná heldur en að sjá tvo afturliggjandi framherja þarna. Við verðum að skora mörk til að vinna leiki og það verður að notast við þá markaskorara sem við höfum.

Fokk, þetta er ömurlegt. Jæja … Mónakó-leikurinn er á þriðjudaginn og þá kemur í ljós úr hverju þessir gæjar hjá okkur eru gerðir. Við verðum að ná a.m.k. jafntefli þar, megum svo sem alveg við því að tapa þar en viljum það helst ekki. Það er spurning hvaða breytingar á liðinu Benítez gerir fyrir þann leik, mér finnst ótrúlega ólíklegt að hann hafi Kewell og García aftur saman frammi í þeim leik, miðað við hvað við vorum bitlausir í dag.

Ég nenni ekki að pirra mig lengur útí Hamann. Hann er bara ekki nógu góður. Ég ætla hins vegar að pirra mig útí Benitez því hann á að vita betur. Benitez *hlýtur* að vita að það kemur ekki nokkur skapaður hlutur útúr Hamann sóknarlega. AF HVERJU gaf hann ekki Igor Biscan tækifæri. Biscan hefur nýtt hvert einasta tækifæri, sem hann hefur fengið með liðinu og leikið gríðarlega vel. Hamann hefur hins vegar ekki getað neitt.

Hamann var **ÖMURLEGUR** í þessum leik. Ætti þessi maður ekki að vera leiðtogi? Það er einsog það renni ekki blóð í honum. Engin barátta, engin leikgleði, enginn kraftur. Ömurlegur leikmaður, sem ég vil nú sjá fá laaaanga hvíld.

Einnig á Benitez *að vita* að STEVE FINNAN getur ekki neitt á kantinum. Af hverju getur Benitez ekki séð þetta? Ég get svo svarið það, þetta var klassískur Houllier leikur. Fáránleg liðsuppstilling, baráttuleysi og algjör skortur á sköpun í liðinu. Ég hef ekki verið jafn svartsýnn eftir leik lengi.

Benitez verður að nýta tækifærið núna þegar Baros og Cisse eru meiddir og gefa Sinama-Pongolle almennilegt tækifæri. Leyfa Flo-Po að byrja í nokkrum leikjum. Jafnvel þótt hann standi sig ekki 100%, gefa honum allavegana tækifæri. Hann á betra skilið en að vera bara varamaður á meðan að tveir getulausir miðjumenn reyna fyrir sér (með hræðilegum árangri) í framherjastöðunni.

Ég bara get ekki skilið hvernig Benitez, sem ég tel vera skynsaman mann, gat horft á liðsuppstillinguna í dag og haldið að við myndum skora mörk.

Á miðjunni vorum við með **tvo bakverði** og **tvo varnarsinnaða miðjumenn**. Frammi vorum við með **tvo kantmenn**. Hvernig eigum við að skora mörk með svona uppstillingu? Ætlarðu að treysta á að Riise (sjitt hvað hann var lélegur) og Finnan (öööögn skárri) skapi færin??? Á Hamann að skapa þau?

Benitez hefði átt að henda Biscan, Pongolle og Mellor þarna inná og segja við þá. “Þið stóðuð ykkur í bikarnum, sýnið núna það sama fyrir aðalliðið”. Ég er 100% viss um að Biscan hefði barist frá fyrstu mínútu og það sama hefði gilt um framherjana ungu. Þeir hefðu 100% verið betri en Finnan, Riise og Hamann.

Að mínu mati er það enginn vafi að þessi uppstilling:

**Garcia – Biscan – Alonso – Kewell**

**Mellor – Sinama-Pongolle**

hefði verið líklegri til að skora mörk en þessi

**Finnan – Alonso – Hamann – Riise**

**Kewell – Garcia**

Þetta var Benitez að kenna. Svo einfalt er það. Þetta er einsog með Emile Heskey. Maður hætti að nenna að æsa sig útí hann, þar sem maður sá að hann var einfaldlega ekki nógu góður, heldur pirraði maður sig miklu frekar á Houllier yfir því að hafa Heskey í liðinu.

Það sama var uppá teningnum hjá Benitez í dag. Einn stór mínus í kladdann fyrir Rafa.

**Takk Milan!!!**

[Liverpool unnu Crystal Palace á heimavelli í dag](http://news.bbc.co.uk/sport1/hi/football/eng_prem/3988121.stm). Fyrir leikinn (og í raun allan fyrri hálfleikinn) hélt maður að þetta yrði auðvelt, en þetta reyndist vera allt nema auðvelt.

Liverpool liðið lék vel í 70 mínútur, en í 20 mínútur í seinni hálfleiknum var einsog leikmennirnir hefðu algjörlega gefist upp og ekkert gekk eftir. Þetta gerðist eftir að Crystal Palace höfðu jafnað í annað skiptið. Þá virtist einsog Liverpool menn gætu ekki gert neitt rétt og á tíma fór maður að óttast um að Liverpool myndi einu sinni ná jafntefli.

En hetjan okkar, Milan Baros reddaði málunum. Harry Kewell átti glæsilega stungusendingu innfyrir á Baros, sem var felldur og réttilega dæmd vítaspyrna aðeins 1 mínútu fyrir leikslok. Baros skoraði úr spyrnunni og fullkomnaði þrennuna og tryggði Liverpool sigur.

Allavegana, Benitez stillti liðinu svona upp:

Ég var fyrir gríðarlegum vonbrigðum með að sjá Biscan ekki inná. Og í raun gerði Hamann ekkert til að minnka þau vonbrigði. Hann og Josemi voru slöppustu menn liðsins. Í raun hlýtur það að vera slæmt fyrir sjálfstraustið hjá Biscan að hafa spilað einsog engill í síðustu leikjum en vera samt tekinn útúr liðinu fyrir Hamann.

Liverpool byrjaði þetta allt vel og sköpuðu sér nokkur færi áður en Baros var felldur í teignum og réttilega dæmd vítaspyrna, sem Baros skoraði úr. Aðdragandi vítaspyrnunnar var sérlega glæsilegur. Xabi Alonso gaf frábæra sendingu á Hamann, sem sendi hann viðstöðulaust á Baros, sem var svo felldur. Allan fyrri hálfleikinn voru Liverpool menn í sókn og sköpuðu sér nokkur góð færi. Í raun hefði Baros átt að fá aðra vítaspyrnu þegar hann var felldur.

En svo allt í einu uppúr engu þá jöfnuðu Crystal Palace menn, Kolkka fékk boltann (hræðileg mistök hjá Josemi) og smellti honum í þaknetið aðeins mínútu fyrir hálfleik. Óverjandi fyrir Kirkland.

En Liverpool brugðust frábærlega við. Baros fékk aukaspyrnu við miðlínuna. Úr henni gaf Xabi Alonso SNILLDARsendingu inná Kewell, sem gaf glæsilega fyrir á Baros, sem skoraði af stuttu færi.

Seinni hálfleikur byrjaði einsog sá fyrri endaði, Liverpool í stöðugri sókn, en eftir að Crystal Palace jöfnuðu (Hughes skoraði eftir önnur mistök hjá Josemi) þá var leikur liðsins mjög slappur. Ég var orðinn verulega þunglyndur og byrjaður að röfla óhóflega í vini mínum, sem sat með mér á Ölveri. En Baros kom til bjargar einsog áður sagði og sá til þess að maður er í góðu skapi þessa stundina.

**Maður leiksins**: Hmmmm… þetta er erfitt. Já, eða ekki. Auðvitað **Milan Baros**. Frábær leikur hjá honum. Fyrsta þrennan hans fyrir Liverpool. Þetta var Milan Baros einsog hann gerist bestur. Hljóp einsog vitleysingur og barðist um alla bolta. Hann var allt í öllu í sókninni. Sá ekkert nema markið og í hvert skipti sem hann fékk boltann skapaðist hætta. Náði í báðar vítaspyrnurnar, sem hann skoraði úr. Frábær leikur hjá Milan Baros. Hann algjörlega bjargaði deginum. Það var líka augljóst að hann **naut** þess að skora þrennuna. Hann fagnaði öllum mörkunum vel og innilega og bresku þulirnir höfðu að orði að hann væri greinilega dauðþreyttur eftir fagnaðarlætin.

Auk Baros þá má ég tilmeð að nefna Xabi Alonso, sem einnig var frábær, sérstaklega í fyrri hálfleiknum.

Semsagt, góður sigur. Við áttum þetta skilið þrátt fyrir að hafa leikið illa stóran part seinni hálfleiks. Núna erum við komin uppí 6. sæti og ef að við vinnum leikinn, sem við eigum til góða, þá getum við komist uppí 3. eða 4. sæti.

Næsti leikur er svo gegn Middlesboro næsta laugardag. Sá leikur gæti orðið eftirminnilegur fyrir þær sakir að [þessi ágæti miðjumaður](http://www.liverpoolfc.tv/team/squad/gerrard/) gæti spilað sinn fyrsta leik í langan tíma.

Viðbót (Kristján Atli): Ég er sammála því sem þú segir Einar, og mikið rosalega er maður feginn að Milan Baros skuli spila fyrir Liverpool. Ég er að skrifa þetta með kveikt á leik Birmingham og Everton fyrir framan mig, og ég hreinlega skil ekki hvernig Houllier fór að því að velja Emile Heskey fram yfir Baros síðustu tvö tímabil. Bara skil það ekki!

En allavega, mig langaði bara að bæta einu við skýrsluna. Mér fannst rétt að minnast á það, af gefnu tilefni, hversu gríðarlega góðan leik HARRY KEWELL átti í dag! Hann átti tvær frábærar stoðsendingar í þessum leik í mörkum númer 2 og 3 hjá Baros og var út um allt. Hann var að vinna bolta, ná góðu samspili við miðjumennina hjá okkur og var duglegur að skapa pláss fyrir sjálfan sig og Baros í fyrri hálfleik.

Það sama var uppi á teningnum í seinni hálfleik og eftir að hann var færður út á kantinn sýndi hann hluti sem hann hefur ekki sýnt lengi: hann var að sóla menn og skila fyrirgjöfum inná teiginn. Hann var hreint út sagt frábær í þessum leik að mínu mati og – fyrir utan Baros og Alonso – besti leikmaður okkar í dag.

Mér fannst frammistaða hans bara verðskulda það að minnst væri á hana. Þetta var allt annað en hann hefur verið að sýna í undanförnum leikjum og ég vona að þetta hafi aukið sjálfstraustið hjá honum. Vonandi er þetta vísir að því sem koma skal.

En já, á heildina litið þá er maður rosalega feginn að við skyldum ná að vinna þennan leik. Við áttum að vera búnir að gera út um hann áður en þeir jöfnuðu í byrjun seinni hálfleiks – og það mark var rosalega lélegt varnarlega séð, hvar voru Hyypiä og Carra??? – en við sýndum karakter, liðið hélt haus og uppskar fyrir alla pressuna. Þökk sé Milan Baros!

Hann er núna kominn með 10 mörk í öllum keppnum, þar af 7 í deildinni, og ég myndi ekki veðja á móti honum sem markakóngi vetrarins eins og hann er að spila!

Þetta verður stysta leikskýrsla allra tíma, einfaldlega af því að ég hef ekki frá neinu að segja. Liverpool vann Middlesbrough í 16-liða úrslitum Deildarbikarsins í kvöld á Anfield, með tveim mörkum gegn engu. Þetta var víst sanngjarn sigur, en NEIL MELLOR skoraði bæði mörk Liverpool undir lok leiksins.

Mellor var víst alveg frábær í kvöld og í raun allir ungu strákarnir líka. Ég sá leikinn ekkert frekar en aðrir þar sem aðeins var boðið upp á lýsingu á Liverpool-síðunni opinberu. En ég hlustaði á þulina lýsa þessum leik og eftirfarandi atriði virtust vera augljós, ef marka má lýsingu þeirra:

-IGOR BISCAN var í heimsklassa í kvöld. Já, það var víst auðheyrilegt á orðum þulanna. Hann var yfirburðamaður á vellinum í kvöld.

-Þeir Warnock, Pongolle, Mellor, Potter og Whitbread voru líka frábærir og stórhættulegir í þessum leik. Síðan komu þeir John Welsh og Richie Partridge inná í leiknum og miðað við lýsinguna léku þeir frábærlega líka. Greinilega björt framtíð hjá okkur…

-Dudek var fyrirliði og átti víst nokkrar frábærar markvörslur á mikilvægum augnablikum í byrjun seinni hálfleiks. Hélt okkur inní leiknum á tímabili.

-Að öðru leyti vorum við víst miklu betri. Skv. lýsingunni áttum við fyrri hálfleikinn með húð og hári og síðasta hálftímann af seinni hálfleik líka. Þannig að þessi sigur var greinilega sanngjarn.

Byrjunarliðið í kvöld var annars svona:

Bekkurinn: Luzi, Welsh, Riise, Raven, Partridge.

Í hnotskurn þá var þetta bara frábær sigur. Frábær leikur og þá sérstaklega fyrir ungu strákana okkar. Og miðað við frammistöðu Biscan í kvöld hllllýýýýýtur hann að fá að byrja inná við hlið Xabi Alonso gegn C. Palace á laugardaginn.

Nú erum við komnir í 8-liða úrslit Deildarbikarsins með varaliðinu okkar. Það er ekki leiðinlegur árangur… :D

Ókei, þannig að við töpuðum fyrir Birmingham í dag, 0-1. Sá sigur var í meira lagi óvæntur, þar sem við áttum leikinn og áttum að vera búin að skora svona 2-3 mörk allavega áður en þeim tókst að læða einu marki inn, úr eina ‘skotinu’ þeirra á mark.

Markið var mjög lélegt: Robbie Savage gaf fyrir frá vinstri og Matthew Upson var aleinn á fjærstöng þar sem hann skallaði boltann að marki. Boltinn hrökk þvert fyrir markteiginn og beint til Darren Anderton – já, Darren Anderton – sem stóð óvaldaður á marklínunni og ýtti boltanum yfir línuna.

Savage var aleinn og illa dekkaður á kantinum (García og Josemi, skamm! ) … Upson var illa dekkaður á fjærstönginni (Traoré, skamm! ) … og Darren Anderton var aleinn á fokking marklínunni (Carra og Hyypiä, skamm!!! ) … þetta var einhver lélegasta dekkning sem ég hef séð hjá Liverpool í vetur.

Að öðru leyti áttum við að vera löngu búnir að vinna þennan leik. Baros var meiddur í dag og byrjunarliðið var svona:

Bekkur: Dudek, Biscan, Finnan, Mellor og Henchoz.

Nokkrir punktar um þetta lið…

Ég hefði viljað sjá Igor Biscan á miðjunni í dag. Hamann og Alonso voru mjög góðir og áttu miðjuna með húð og hári, en maður fékk samt á tilfinninguna að okkur vantaði meiri sóknarþunga frá miðjunni. Að Pongolle vantaði meiri aðstoð frammi. Þess vegna hefði ég viljað sjá Biscan þarna frekar en Hamann.

Pongolle var slappur í dag. Mjög slappur. En það er samt í rauninni ekki við hann að sakast, að vissu leyti. Ég meina, hann er nýorðinn 19 ára gamall. Ef við erum að velta því fyrir okkur hvort að markaskorunarábyrgðin sé of mikil byrði fyrir Milan Baros – 22 ára og reyndan landsliðsmann – þá getum við bókað að hún er of mikil fyrir Flo-Po. Hann er frábær leikmaður en hann er fyrst og fremst efnilegur. Hann á erindi í hópinn hjá okkur og í einstaka byrjunarliðsleiki, en hann er ekki tilbúinn til að leiða liðið ennþá. Því miður hafa meiðsli gert það að verkum að hann þurfti að bera liðið í dag, og hann bara gat það ekki. Því miður.

Harry Kewell gerði allt rétt í dag nema að skora mark. Hann þarf að fara að skora mark bráðum … maður fær á tilfinninguna þegar maður horfir á hann spila, að um leið og fyrsta markið kemur verði hann kominn á fullt skrið. En eins og er þjáist hann af skorti á sjálfstrausti og ég held að það lagist ekki fyrr en hann skorar. Legg til að hann taki næsta víti sem við fáum, ef við fáum einhvern tímann víti.

Talandi um víti, Muzzy Izzet varði boltann með hendi á marklínunni í dag. Þetta var svo augljóst að það var ekki fyndið. Þetta var líka svo vel varið að Viggó Sigurðsson myndi velja hann í handboltalandsliðið ef hann gæti. En enn var ekki dæmt vítaspyrna okkur í hag. Hversu lengi á þetta að fá að ganga?

Luis García spilar betur í holunni fyrir aftan framherjann heldur en úti á hægri kantinum. Það er mín skoðun og ég vona að um leið og Nunez er orðinn heill og kominn á kantinn þá muni García fara aftur í holuna.

Vörnin okkar var nánast óaðfinnanleg í dag og í raun mætti útnefna hana mann leiksins. Hyypiä virtist njóta þess að hafa stjórn á Heskey í dag og Carragher var traustur að venju. Josemi og Traoré gerðu ein mistök hver í leiknum en að öðru leyti þá voru þeir flekklausir. Riise lék líka vel í dag og hakkaði Mario Melchiot hvað etir annað í sig.

Og þannig er það nú bara. Liðið lék ekki illa í dag, var betra liðið (þótt þetta hafi ekki verið jafn mikil súper-frammistaða og t.d. gegn Charlton eða Norwich í síðustu heimaleikjum) og átti fyllilega skilið að vinna. En við klúðruðum nokkrum dauða-dauða-dauðafærum í dag og var á endanum refsað fyrir það. Svona er lífið bara.

Það eru eflaust margir pirraðri en ég yfir þessu tapi en ég ætla bara ekki að tapa mér í svartsýni þótt illa hafi farið í dag. Við vitum að Benítez er á réttri leið með þetta lið og þetta tap breytir því ekki. Ef það á að skrifa þennan leik á eitthvað, koma með einhverjar afsakanir, þá mætti segja að meiðsli og þreyta eftir erfiðan útileik í Meistaradeildinni hafi haft sitt að segja.

Steven Gerrard, Antonio Nunez, Djibril Cissé, Milan Baros, Michael Owen (enn ekki fengið mann í hans stað) og Vladimir Smicer. Það færi illa með öll lið að spila án þessara leikmanna og það kom í bakið á okkur í dag. Því miður.

Þannig að nei, ég er ekki svartsýnn í dag. Ég er pirraður að hafa tapað leik sem átti að vinnast, ég er pirraður að liðið hafi ekki leikið nógu vel í dag, og ég er pirraður út í SkjáEinn fyrir að kyssa rassgatið á Chelsea FC við hvert tækifæri, en ég er samt alveg rólegur yfir þessu tapi.

Næsti deildarleikur er eftir viku gegn Crystal Palace, á Anfield. Baros verður kominn inn þá og við munum vinna þann leik. Pottþétt mál. Þannig að ég er rólegur.

Jessssss!!!

Þetta var nákvæmlega það sem við þurftum, útisigur í Meistaradeildinni! Þrátt fyrir að hafa leikið án manna eins og Xabi Alonso, Steven Gerrard, Djibril Cissé og Antonio Nunez í kvöld þá skelltum við okkur til Spánar og unnum Deportivo la Coruna, og í raun bara sanngjarnt!

Þessi leikur var ekki mikið fyrir augað, í hreinskilni sagt. Við skoruðum á 14. mínútu þegar Jorgé Andrade setti boltann í eigið net eftir fyrirgjöf frá Riise. Ef hann hefði ekki gert það var Baros í dauðafæri og hefði skorað, þannig að það skipti engu. Það flottasta við markið var samt aðdragandinn: Carragher vann skallabolta á miðjum vellinum, boltinn barst til Igor Biscan sem lék á þrjá Deportivo leikmenn og sendi svo frábæran bolta út á vítateigshornið til Riise. Biscan skapaði markið með frábærum leik og það var ekki laust við að maður þyrfti að fullvissa sig um það hvort þetta væri ekki bara Alonso í vitlausri treyju! :D

Að öðru leyti þá var ekki mikið að gerast í okkar leik. Við vorum frábærir varnarlega í kvöld og Deportivo-liðið náði í raun aldrei að ógna okkur almennilega, þrátt fyrir að hafa sótt mestallan síðari hálfleikinn. Þá fengum við nokkur algjör dauðafæri, bæði í fyrri og seinni hálfleik, til að gera út um leikinn en það tókst ekki. Engu að síður þá hélt vörnin og við unnum, 1-0.

En allavega, liðið í kvöld var svona:

Eins og ég sagði, þá vorum við ekkert að spila nógu góðan sóknarbolta í kvöld. Sköpuðum hættulegri færi en Deportivo, en samt ekki að sækja nógu vel sem lið. En það skipti engu, vörnin var súpergóð og allt liðið varðist eins og órjúfanleg heild í kvöld.

Það er freistandi að velja Igor Biscan mann leiksins, þar sem hann var frábær í kvöld, en í rauninni verð ég að útnefna nokkra leikmenn sem eiga skilið að vera nefndir. Þeir Traoré, Hyypiä, Carragher og Josemi voru ógeðslega góðir í þessum leik. Josemi lenti í smá vandræðum með Alberto Luque á fyrsta kortérinu, en eftir það pakkaði hann honum saman það sem eftir lifði leiks. Þeir Carra & Hyypiä pökkuðu Walter Pandiani saman í leiknum, og eftir að hann fór útaf og Diego Tristán kom inná í staðinn, þá pökkuðu þeir honum bara saman líka.

Og Djimi Traoré afrekaði það að taka Victor, einn hættulegasta hægri kantmann í Evrópu, og búa til ávaxtasultu úr honum … tvo leiki í röð. Í alvöru, Victor hlýtur að fá martraðir eftir þessa tvo leiki við tilhugsunina um að þurfa einhvern tímann aftur að mæta Traoré á velli. Ótrúlega flottur varnarleikur hjá þeim franska, sem er hér með orðinn lykilmaður í liði Liverpool. Ekkert flóknara en það.

Á miðjunni voru Hamann og Biscan frábærir. Hamann sinnti því sem hann gerir best – varnarvinnunni – af stakri snilld (sá einhver Valerón í þessum leik? ) og fyrir vikið gat Biscan ráfað um allt miðjusvæðið og skapað og stjórnað spilinu. Og hann gerði það af stakri snilld … í raun var hann ekkert verri í kvöld en Alonso hefur verið í sama hlutverki í undanförnum leikjum. Það er nokkurn veginn hæsta hrós sem ég gæti gefið Igor Biscan, og ef hann ætlar að spila svona þá verður hann áfram í herbúðum Liverpool næstu árin. Frábær leikur.

Frammi barðist Milan Baros eins og ljón og var óheppinn að skora ekki a.m.k. eitt mark (sérstaklega í byrjun leiks). Þegar leið á leikinn sá maður þó að hann var orðinn þreyttur og svo var hann tekinn útaf, fyrir Sinama-Pongolle sem var líka frískur þegar hann kom inná.

Já, og Chris Kirkland er markvörður #1 hjá Liverpool. Það var augljóst í kvöld af hverju.

Þá eru eftir þrír leikmenn sem ég verð að segja að ollu mér örlitlum vonbrigðum í kvöld. Það þarf ekkert að fjölyrða um það af hverju eða neitt slíkt, en þeir Riise og García á vængjunum og Kewell í holuni fundu sig bara engan veginn í þessum leik. Því miður, og fyrir vikið vorum við ekki nógu sterkir framávið og Baros var allt of oft aleinn og einangraður gegn Deportivo-vörninni.

Allir þrír börðust vel fyrir liðið í kvöld og unnu sína varnarvinnu með stakri prýði – auk þess sem Kewell var duglegur að láta brjóta á sér í fyrri hálfleik – en fram á við virtust þeir engan veginn ná sambandi hver við annan og þeir gáfu bolta allt of auðveldlega frá sér, sérstaklega García og Kewell.

Þetta var vissulega erfiður útileikur – og ég er rosalega feginn að við unnum – og því ætla ég ekkert að fella stóra dóma um þessa þrjá. Þeir voru daprir í kvöld en ég geri ráð fyrir að þeir spili allir sömu stöður gegn Birmingham á laugardaginn, og þá vona ég að þeir verði allir í essinu sínu. Það er svo mikilvægt fyrir Liverpool – sérstaklega án Gerrard á miðjunni – að þeir García og Kewell séu að skapa tækifæri fyrir sig og samherja sína.

En nóg um það. Þeir verða góðir á laugardag, ég er viss um það. Þessi leikur var bara rosalega mikilvægur fyrir okkur – við erum nú á toppnum í riðlinum með 7 stig og tveir leikir eftir. Næsti leikur í Meistaradeildinni er á útivelli gegn Mónakó, held ég, og þá er að duga eða drepast. En þessi sigur í kvöld léttir talsverðri pressu af okkur, nú megum við alveg við því jafnvel að tapa gegn Mónakó og samt vera í einu af tveimur efstu sætunum fyrir lokaleikinn gegn Olympiakos á Anfield.

Eftir kvöldið í kvöld eru verulegar líkur á að við förum áfram úr þessum riðli. :D Guði sé lof fyrir það!

**Uppfært (Einar Örn)**: Ég hef svo sem ekki miklu við þetta að bæta, en mikið var þetta sætur sigur. 4 stig gegn Deportivo er flottur árangur. Í 180 mínútur sköpuðu þeir varla alvöru marktækifæri. Við áttum þetta svo innilega skilið.

Mig langar bara að skrifa eftirfarandi málsgrein:

**Menn leiksins: DJIMI TRAORE OG IGOR BISCAN** Já, lesið þetta aftur ef þið þurfið. Þeir, sem sáu ekki leikinn eiga ábyggilega ekki eftir að trúa okkur, en þeir tveir voru FRÁBÆRIR!!! Biscan stjórnaði miðjunni einsog herforingi og Djimi Traore tók hinn frábæra Victor og PAKKAÐI HONUM SAMAN! Þvílíkur leikur hjá Traore. Ég held að ég hafi sjaldan séð leikmann ná boltanum jafn oft með skriðtæklingu. Þeir eiga hrós skilið fyrir leikinn, sem og nánast allir nema þessir þrír, sem Kristján minntist á.

En ég nenni ekki að vera neikvæður. Við fórum til Spánar án okkar þriggja dýrustu og bestu leikmanna og við unnum í fyrsta skipti á Spáni í **21 ár**. Og til að toppa þetta þá voru Biscan og Traore bestu mennirnir. Við getum ekki beðið um mikið meira