Dauði og djöfull!

Hvað er að gerast? Liverpool tapaði í kvöld fyrir Olympiakos, 1-0, í alveg rosalega slöppum leik.

Tímabilið hingað til í hnotskurn: Að undanskildum Graz-leiknum höfum við unnið alla okkar heimaleiki og það örugglega. Afgerandi. Á Anfield Road-vellinum virðumst við vera óstöðvandi og er það góð þróun frá síðustu tímabilum. Á útivelli hins vegar höfum við unnið Graz, náð jafntefli gegn Tottenham og síðan tapað þremur útileikjum í röð, gegn Bolton, Man U og núna Olympiakos.

Liðið einfaldlega verður að geta spilað á útivelli ef við ætlum okkur langt í Meistaradeildinni. Ef þú spilar vel, þá á að vinna leiki. Og ef þú spilar ekki vel, hafa þá a.m.k. nægan kraft og næga grimmd til að ná jafnteflinu. Það er bara ekki að gerast hjá okkur, við erum að tapa leikjum sem við eigum ekki að tapa.

Þetta Olympiakos-lið var ekkert sérstakt í kvöld, þeir komust yfir á 17. mínútu og pökkuðu svo smám saman í vörn. Á Anfield hefði það þýtt stórskotaárás af hálfu okkar manna sem hefði endað með 3-4 mörkum. Í kvöld þýddi það einfaldlega daufan og leiðinlegan seinni hálfleik, þar sem við blésum og blésum en ekki hrundi húsið. Okkur skorti bara allt flæði í spilinu, alla sköpun og vorum – enn og aftur – allt of stressaðir með boltann.

Þulirnir á ITV2 töluðu um að það væru þessir erfiðu útileikir í Evrópu og deildinni sem myndu segja Rafa Benítez það sem hann þarf að vita um karakterinn sem leikmenn hans hafa yfir að búa og í raun fékk hann margar ansi góðar vísbendingar í kvöld. Því ætla ég að taka fyrir hvern einasta leikmann Liverpool í kvöld og sjá hvað Benítez gæti hafa séð út úr frammistöðu þeirra.

Byrjunarliðið í kvöld var svona skipað:

Jerzy Dudek: Sorrí en Jerzy er einfaldlega ekki í þeim klassa sem við krefjumst af markverði Liverpool. Hann virkaði rosalega óstyrkur í allt kvöld, þrátt fyrir að byrja kvöldið á heimsklassamarkvörslu. Hann varði gott skot í utanverða stöngina á fimmtu mínútu, en þar með lauk hans frammistöðu í kvöld. Hann fór út í skógarferðir og tapaði þeim öllum, var mjög taugaóstyrkur þegar boltinn var sendur til baka á hann (eitt misspark skilaði næstum því marki fyrir Olympiakos) og almennt talið þá er hann bara augljóslega ekki nógu góður, ekki nógu yfirvegaður og traustur til að vera markvörður hjá okkur. Ég á allt eins von á því að Chris Kirkland komi inn í liðið í næsta leik … og finnst líklegra með hverjum leiknum sem líður að Benítez kaupi nýjan markvörð strax í janúar.
Continue reading →

**Einar Örn**: Svona á þetta að vera. [3-0 sigur](http://www.liverpoolfc.tv/news/drilldown/N146149040925-1652.htm)

Auðveldur sigur hjá Liverpool. Linnulaus sóknarbolti á heimavelli gegn liði, sem Liverpool á að vinna.

Hversu oft undir stjórn Houllier þurftum við að sætta okkur við að Liverpool gat einfaldlega ekki brotið niður lið, sem mættu á Anfield til að verjast?

Norwich mætti á Anfield í dag til að verjast, enda hefur liðið haldið hreinu ansi lengi og lítið skorað, þannig að þeirra helsta von var að ná markalausu jafntefli. Leikmenn Liverpool sáu til þess að það var engin hætta á þeirri niðurstöðu.

Benitez stillti liðinu upp svona:

Garcia var settur á kantinn, svo maður hélt að hann yrði ekki alveg jafn hættulegur og hann var frammi, en öðru nær. Garcia var frábær, stöðugt ógnandi og vann einnig frábærlega tilbaka. Ég man eftir þónokrum tæklingum, sem hann vann í þessum leik.

Warnock var líka fínn á vinstri kantinum, en þó ekki nærri því jafnmikil ógn og Garcia. Við höfum beðið ansi lengi eftir almennilegri breidd í þetta lið og núna sýnist mér við loksins vera komin með breidd í liðið með Garcia, Kewell, Warnock og hugsanlega Nunez.

Allavegana, Liverpool sótti frá fyrstu mínútu og var með boltann allan tímann. Ég held að Norwich hafi ekki átt eitt skot á Liverpool markið. Baros og Cisse skoruðu báðir mörk með langskotum, sem ætti að laga sjálfstraust þeirra beggja, þar sem þeir hafa verið gagnrýndir talsvert. Luis Garcia skoraði einnig eftir frábæra sendingu frá Cisse.

Allt liðið lék vel, vörnin var traust og Baros og Cisse virtust ná ágætlega saman. Hamann var sterkur á miðjunni. Warnock og þá sérstaklega Luis Garcia léku vel á köntunum.

**Maður leiksins**: Það lék þó enginn eins vel og **Xabi Alonso**. Jedúddamía hvað hann er góður leikmaður! Hann vann alla bolta, sendingarnar voru magnaðar og þá sérstaklega hvernig hann dreifði spilinu á kantana. Það hefur greinilega gleymst að segja honum og Luis Garcia að það eigi að taka menn nokkrar vikur að venjast ensku deildinni :-)

Það er ljóst að Xabi Alonso mun gera meiðsli Gerrard öllu bærilegri fyrir okkur Liverpool aðdáendur. Þegar þeir fá að spila saman, þá efast ég um að það séu til lið á Englandi (eða í Evrópu) með betri miðjumenn. Alonso getur orðið jafngóður og Steven Gerrard! Já, Xabi Alonso er svo góður!

Benitez gerði nokkrar breytingar í lok leiksins. Hann tók Xabi Alonso útaf hálftíma fyrir leikslok, svo hann gæti hvílt sig fyrir Olympiakos leikinn og einnig fóru Cisse og Warnock útaf. Cisse var víst meiddur en fékk að skjóta úr aukaspyrnu áður en hann fór útaf. Og auðvitað skoraði hann úr aukaspyrnunni.

Benitez setti Diao, Biscan og Traore inná og breytti gjörbreytti liðinu. Prófaði fulltaf leikmönnum í nýjum stöðum. Diao byrjaði á miðjunni og færði sig svo í miðvörðinn. Traore byrjaði í miðverðinum en færði sig svo í bakvörð. Biscan fór inná miðjuna, Garcia fór fram og Finnan á kantinn á meðan að Carragher fór í hægri bakvörðinn. Allt gekk þetta vandræðalaust fyrir sig.

Frábær leikur og þrjú stig gegn erfiðu liði. 3-0 sigur [einsog ég spáði](http://www.kop.is/gamalt/2004/09/25/13.49.21/) og stanslaus sóknarbolti. Við gátum ekki beðið um meira eftir ófarirnar gegn Man U.

p.s. Benitez var ánægður en vildi samt [fleiri mörk](http://www.liverpoolfc.tv/news/drilldown/N146150040925-1744.htm). Gaman að heyra! :-)

p.p.s. Nigel Worthington hafði þetta um Alonso og Liverpool að segja:

>’But Alonso was in a different class, you would pay good money anywhere in the world to see top class performances like that.

>’We were not on top of our game, but I have to say Liverpool were superb.’

Við hefðum auðveldlega getað unnið þennan leik 6-0.

---

Viðbót (Kristján Atli): Hversu góður er Xabi Alonso? Vááááá! Ég hef ekki séð jafn afgerandi frammistöðu hjá einum miðjumanni í einhverja mánuði, hvað þá á þessu tímabili! Hann var allt í öllu hjá okkur og ég taldi aðeins tvær sendingar hjá honum sem rötuðu ekki á samherja … önnur þeirra var þvert frá vinstri til hægri á Luis García en var aðeins of löng, hin var stungusending sem Djibril Cissé tókst ekki alveg að ná stjórn á. Að öðru leyti var hann gjörsamlega óskeikull … og hann hlýtur að hafa unnið a.m.k. 10 bolta af andstæðingum í þokkabót! Þvílíkur leikmaður sem við höfum hér…

Þetta var frábær sigur sem minnti í raun margt á sigurinn gegn W.B.A. fyrir tveim vikum. Eins og Einar sagði þá komu Norwich að verjast en – ólíkt því þegar Houllier stjórnaði þessu liði – þá áttu þeir aldrei séns. Barasta aldrei. Þeir voru hreinlega ekki með og ég heyrði þulina oft segja eitthvað eins og “Norwich are playing shadow-chase at the moment” og slíkt, sem gaf til kynna að þeir fengju varla að snerta boltann!

Þetta var hið fullkomna svar við tapinu á mánudaginn, svona á að þagga niður í öllum gagnrýnisröddum! Og frábært veganesti vonar maður fyrir leikinn gegn Olympiakos á þriðjudag … en þá þurfum við á því að halda að vera með sjálfstraustið í lagi!

Þá fannst mér einnig sérlega gaman að sjá bæði Cissé og Baros skora. Eins og ég skrifaði í upphitun fyrir þennan leik þá fannst mér mikilvægt ef þeir gætu báðir náð að setja mark í þessum leik til að koma sér aftur á strik í deildinni og það gekk eftir.

Á heildina litið, frábær leikur. Við erum núna í 7. sæti í deildinni með 10 stig eftir 6 leiki (3 sigrar, 1 jafntefli, 2 töp) og ef við vinnum leikinn sem við eigum inni förum við í 3.-4. sætið ásamt nágrönnunum í Everton. Þannig að þetta er alls ekkert svo slæmt.

Þá höfum við unnið alla þrjá heimaleikina okkar í deildinni hingað til með markatölunni 8-1, sem er frábært. Anfield er að verða virki aftur! Á útivelli höfum við hins vegar aðeins náð einu jafntefli (T’ham) og tapað tveimur (Bolton og United), þannig að ljóst er að við verðum að vera sterkari á útivelli ef við ætlum að blanda okkur í toppbaráttuna!

Samt … maður brosir þessa helgina enda var leikurinn í dag frábær skemmtun! Bring on Olympiakos… ;)

Andskotinn!!!

Í upphituninni fyrir þennan leik talaði ég um að Liverpool-liðið væri, þrátt fyrir góða spilamennsku undanfarið, ennþá í vinnslu og því myndi það spila illa á næstunni. Ég vonaði bara innilega að það myndi ekki gerast í þessum leik. Því miður þá var það nákvæmlega það sem gerðist.

Fyrri hálfleikurinn í kvöld var einfaldlega það lélegasta sem ég hef séð til Liverpool-liðsins það sem af er tímabilinu. Í stað þess að mæta ákveðnir til leiks og spila flæðandi sóknarbolta eins og í síðustu leikjum þá mætti liðið augsýnilega skíthrætt við United-liðið í þennan leik. Við vörðumst aftarlega, gáfum þeim alltaf færi á að snúa að marki okkar með boltann og vorum bara einfaldlega allt of stressaðir. Þegar við síðan náðum boltanum þá var bara eitt á dagskrá: að negla honum sem lengst fram.

Og því fór sem fór, þeir gjörsamlega yfirspiluðu okkur í fyrri hálfleik og við vorum stálheppnir að vera bara einu marki undir í hléi. Og það mark var alveg fáránlegt – hornið kom frá hægri, sigldi yfir þvöguna í miðjum teignum og beint á kollinn á Mikael Silvestre sem var gjörsamlega aleinn og yfirgefinn á fjærstönginni. Í alvöru. Hann hafði heila heimsálfu út af fyrir sig þarna – hver í fjandanum átti að dekka hann? Og hvar var sá maður? Fáránlegt mark og eitthvað sem á ekki að geta gerst hjá liði eins og Liverpool.

Það er ljóst að Benítez hefur sagt mjög vel valin orð í hálfleik því það var allt annað lið sem kom út á völlinn eftir hlé. Við tókum boltann niður og reyndum að spila saman, náðum að pressa þá og gáfum þeim minna pláss og minni tíma í sóknaraðgerðum sínum. Árangurinn lét ekki á sér standa, við vorum miklu betri fyrsta kortérið í seinni hálfleik og á 55. mínútu náðum við að jafna – þótt markið hafi verið slysalegt þá lá það í loftinu. Xabi Alonso gaf frábæran bolta á fjærstöng úr aukaspyrnu, Finnan skallaði hann aftur inn á markteig þar sem hann hrökk í fót John O’Shea og yfir marklínuna. 1-1 og stemningin okkar megin.

Tíu mínútum síðar kom annað fáránlegt mark. Hornspyrna frá hægri – aftur – og inní miðri þvögunni var Mikael Silvestre einn og óvaldaður – AFTUR – og skallaði boltann í þaknetið, óverjandi fyrir Dudek. 2-1 og skyndilega gerði ég mér ljóst að við værum líklega að fara að tapa þessum leik.

Eftir þetta reyndum við af veikum mætti að skapa eitthvað en það var eiginlega bara of mikið stress í liðinu til að við gætum náð að opna vörn þeirra. Á endanum þá var sorglegt að tapa þessu þar sem við vorum ef eitthvað er betri aðilinn í seinni hálfleik, en á heildina litið voru þetta bara sanngjörn úrslit. Því miður.

Menn leiksins: Ég ætla að útnefna fjóra leikmenn og þrír þeirra spiluðu ekki fyrir Liverpool. Cristiano Ronaldo var allt í öllu hjá sóknarlínu United í kvöld og gjörsamlega pyntaði varnarlínuna okkar, á meðan varnarparið þeirra þeir Rio Ferdinand og Mikael Silvestre voru algjörlega stórkostlegir í kvöld. Ég verð víst að éta orð mín frá því í upphituninni því að Ferdinand byrjaði leikinn á súper-tæklingu á García og hélt uppteknum hætti í 90 mínútur. Hann var greinilega í feiknargóðu líkamlegu ástandi og spilaði eins og hann væri búinn að vera að spila hvern einasta leik liðsins í ár. Frábær endurkoma. Við hlið hans var Silvestre ótrúlega traustur og skoraði síðan mörkin tvö sem skiptu máli.

Hjá okkur var dapurt um að litast. Luis García var mjög, mjög slappur í kvöld, sem og Cissé. Og eiginlega allt liðið bara. Josemi og Riise voru allt of staðir í sínum stöðum og réðu ekkert við Ronaldo, Hyypia var algjörlega á hælunum í þessum leik og í raun var Carragher sá eini í vörninni sem spilaði góðan leik í kvöld að mínu mati. Á miðjunni var Kewell að berjast vel en það kom lítið út úr því, en Steve Finnan og Steven Gerrard voru algjörlega heillum horfnir. Það var sorglegt að sjá Gerrard þurfa að fara útaf meiddan á 39. mínútu en það verður að segjast að af tveimur miðjumönnum þá var sennilega betra að missa hann en hinn miðjumanninn okkar, sem var maður leiksins.

XABI ALONSO var í algjörum heimsklassa í dag. Þvílíkur leikur! Hann sá einn síns liðs um að stúta Roy Keane í fyrri hálfleik og þrátt fyrir yfirburði United var hann yfirburðamaður á vellinum. Í seinni hálfleik eftir að Gerrard hafði farið útaf tók Hamann við varnarhlutverkinu á miðjunni – og spilaði frábærlega í seinni hálfleik – og þegar Alonso fór framar í seinni hálfleik sást vel hversu ótrúlega góður leikmaður hér er á ferð! Hann var nærri því búinn að skora frá miðju, átti varla mislukkaða sendingu allan leikinn (þvílíkt sem hann stjórnar og dreifir spilinu vel á miðjunni!) og var í baráttunni út um allan völl. Þá voru aukaspyrnurnar hans stórhættulegar og gaf ein þeirra jöfnunarmarkið. Þessi frammistaða hans var í heimsklassa og ef hann heldur svona áfram þá er þetta bara einhver allra besti miðjumaður í Evrópu sem við höfum hér!

Þannig að ég myndi segja að Dudek (sem var öruggur í kvöld), Carragher, Alonso og Kewell gætu borið höfuðið hátt. Allir aðrir þurfa að líta alvarlega í eigin barm – og sennilega bara allt liðið í heild sinni. Þetta var slæmt tap vegna þess að mörkin sem við fengum á okkur voru algjör óþarfi, þetta var slæmt tap vegna þess að það hefur slæm áhrif á móralinn í liðinu að tapa fyrir United, og þetta var slæmt tap því nú erum við búnir að tapa tveimur af fyrstu fimm leikjum okkar í deildinni sem er alls ekki nógu gott.

Næst: Norwich City á Anfield á laugardaginn. Úr því að leikurinn í kvöld tapaðist þá er gjörsamlega nauðsynlegt að vinna Norwich. Við erum ekki úr leik í toppbaráttunni en þetta verður erfitt næstu vikurnar – það er ljóst að við verðum að vinna næstu leikina okkar til að koma okkur strax í nánd við toppinn. Ef það tekst ekki hef ég áhyggjur af því að spennufallið verði of mikið, ef Arsenal eða Chelsea fara að stinga okkur af.

Slæmt kvöld, slæmt tap, slæm ógleðistilfinning í maga. En fátt er svo með öllu illt að ekki boði nokkuð gott og þótt ekkert annað sé, þá getum við allavega glaðst yfir frammistöðu Xabi Alonso í kvöld.

---

**Vidbot (Einar Orn)**: Uffff, eg varla nenni ad skrifa um thennan leik. Eg hef ekki sed Liverpool leik sidan eg horfdi a Liverpool-Tottenham og thvi hlakkadi mig til ad sja thennan nyja Liverpool stil, sem allir eru ad skrifa um.

Jaeja, thetta var omurlegt. Fyrri halfleikurinn var algjor hormung og eg var farinn ad oska thess ad thad yrdi allt i einu rafmagnslaust a Old Trafford, svo theirri hormung lyki.

Otrulega dopur frammistada. Gerrard sast ekki thessar minutur, sem hann var inna og Cisse og Garcia komu varla nalaegt boltanum. Dekkunin i badum morkunum var natturulega grin. Fokking Mikael Silvestre! Gatum vid ekki allavegana fengid a okkur almennileg mork??

Alonso var finn i thessum leik, an efa okkar besti madur, en varla jafn aedislegur og Kristjan vill meina. Mer finnst ekki til of mikils aetlast af Dudek ad hann hefdi varid seinni skallann fra Silvestre. Hann var i boltanum og hefdi alveg getad varid skallann!

Josemi og Riise voru ferlega slappir i leiknum og leyfdu Giggs og Ronaldo ad gera thad, sem theim syndist. Aeji, thetta var eiginlega svo slappt ad thad borgar sig ekki ad vera ad rembast vid ad finna sokudolga. Lidid var bara slappt og thetta var hundfult. Naesti leikur aetti ad vera lettur og med honum aetti lidid ad komast aftur a retta braut.

Deportivo og Olympiakos gerðu markalaust jafntefli í kvöld. Sem þýðir að eftir stórgóðan 2-0 sigur á Mónakó á Anfield er Liverpool FC í toppsætinu í A-riðli Meistaradeildarinnar, eftir fyrstu umferð!

Gæti það verið betra? Ég man hreinlega bara ekki eftir því hvenær ég sá Liverpool síðast spila svona vel. Mónakó eru talsvert sterkari andstæðingar en W.B.A., og þó virtumst við hafa miklu meiri yfirburði í kvöld en nokkurn tímann gegn W.B.A. á laugardaginn. Ég bjóst við hnífjöfnum leik í kvöld, var að vonast eftir að okkar menn myndu vinna þetta jafnvel nokkuð sannfærandi – en aldrei í lífinu átti ég von á þessu. Við hreinlega yfirspiluðum þá og það í 90 mínútur!

Sem var ekki leiðinlegt… ;)

Aðeins ein breyting var gerð á sigurliðinu frá því á laugardag, en Alonso kom inn á miðjuna fyrir Didi Hamann. Liðið leit því svona út:

Liverpool-liðið pressaði þá frönsku bókstaflega frá fyrstu mínútu, við vorum með boltann og í sókn nær allan fyrri hálfleikinn en uppskárum á ótrúlegan hátt aðeins eitt mark. Djibril Cissé skoraði sitt fyrsta Evrópumark fyrir Liverpool á 22. mínútu eftir frábæran samleik Gerrard og García sem splundraði vörn Mónakó.

Þá átti Luis García tvö dauða-dauða-dauðafæri í fyrri hálfleik, auk þess sem við vorum stöðugt ógnandi. Cissé fékk dauðafæri undir lok hálfleiksins en missti boltann of langt frá sér, auk þess sem Flavio Roma markvörður Mónakó gjörsamlega hélt þeim á floti.

Þannig að staðan í hálfleik var 1-0 en hefði auðveldlega getað verið 3-0 eða 4-0. Slíkir voru yfirburðirnir.

Í seinni hálfleik var það sama uppi á teningnum, við pressuðum og pressuðum og þeir fengu varla tækifæri til að spila upp að miðju, hvað þá að sækja að marki okkar. Einu færi Mónakó-manna í þessum leik voru einhver langskot sem bakverðirnir þeirra tóku í fyrri hálfleik, eða allavega þangað til tuttugu mínútur voru eftir af leiknum.

Cissé komst einn innfyrir en Roma varði, García skaut framhjá fyrir opnu marki, Kewell og Gerrard skutu hátt yfir úr sitt hvoru dauðafærinu og Milan Baros reyndi að sóla þegar hann átti að gefa á García í dauðafæri. Þannig að ef heppnin hefði verið okkur í vil í þessum leik hefðum við verið komnir í svona 7-0 þegar hálftími var eftir.

Þá fór aðeins að draga af okkar mönnum og frá svona 70. – 80. mínútu náðu Mónakó-menn aðeins að pressa okkur. Manni stóð ekki á sama, þvílíkir yfirburðir og samt bara eins marks forysta. Ég var skíthræddur um að þeir myndu jafna en sem betur fer gerði Milan Baros út um leikinn með stórgóðu einleiksmarki á 82. mínútu, eftir frábæra sendingu frá Xabi Alonso.

Eftir það var þetta bara reitabolti hjá okkar mönnum, bara spurning um að láta boltann ganga og eyða tímanum. Á endanum var þetta bara alveg fáránlega öruggur (og auðveldur? ) sigur hjá Liverpool og það er ljóst að ef þetta er það sem koma skal eru ManU í vondum málum á mánudaginn kemur!

Ég hreinlega treysti mér ekki að velja úr einhvern einn mann leiksins þannig að ég ætla bara að gefa öllu liðinu umsögn. Það er auðveldara, þar sem liðið var “maður” leiksins í kvöld:

Jerzy Dudek: Hefði alveg eins getað mætt með bók á völlinn. Hann þurfti að verja einn skalla kortéri fyrir leikslok, að öðrum kosti gerði hann ekkert annað en að taka markspyrnur eftir langsótt langskot Mónakó-manna. Öruggur í kvöld, enda lítil pressa á honum.

Josemi: Frábær, einu orði sagt. Þeir fóru aldrei upp hans kant í þessum leik og í þau fáu skipti sem þeir reyndu var boltinn étinn af þeim. Hann er ofboðslega massífur og í þessu stuði hlakka ég til að sjá hann taka á Giggs og Ronaldo á mánudaginn. Þeir eiga eftir að væla!

Carragher & Hyypiä: Ótrúlega öruggir. Töpuðu ekki einum einasta skallabolta, lentu aldrei undir neinni pressu og voru virkir í spilinu fram á við. Hyypiä les leikinn betur en flestir miðverðir sem ég veit um og það var mjög oft sem hann steig inn í sendingarlínu og braut sóknir Mónakó á bak aftur. Carragher hins vegar tók að sér að sjá til þess að Mohammed Kallon snerti boltann varla nema þrisvar-fjórum sinnum allan leikinn. Fáránlega yfirvegaðir og góðir saman.

Riise: Frábær varnarlega, gaf ekki tommu eftir frekar en Josemi. Hefði mátt vera aðeins skynsamari þegar hann fór fram á við, ég sá hann þrisvar í þessum leik sóla svona tvo-þrjá Mónakó-menn en missa síðan boltann af því að hann reyndi að sóla einn í viðbót, þegar hann hefði átt að gefa hann. Átti samt góðar fyrirgjafir og vann boltann sem á endanum gaf okkur fyrra markið.

Finnan: Annar frábær leikur hjá honum í röð á hægri kanti! Ef hann heldur svona áfram verður hreinlega erfitt að ætla að ýta honum út úr liðinu þegar Nunez er orðinn heill. Hann var mjög skapandi, vann sérlega vel með Josemi bæði í vörn og sókn og átti nokkrar stórhættulegar fyrirgjafir. Pressaði bakvörð Mónakó allan leikinn og sá til þess að þeir gátu aldrei andað rólega hvað hægri kantinn okkar varðar. Á tvímælalaust skilið að halda stöðu sinni í liðinu á meðan hann spilar svona vel!

Gerrard: Steven Gerrard spilaði í kvöld eins og Steven Gerrard er vanur að spila. Maður leiksins. Besti miðjumaður í heimi. Svo einfalt er það bara.

Xabi Alonso: Hversu góður er þessi strákur? Vá. Um daginn sá ég Barcelona sigra Racing Santander í fyrstu umferð La Liga og tók eftir að Xavi, miðjumaður Barcelona, var með 100% sendingargetu í þeim leik. Sem þýðir að allar þær 80+ sendingar sem hann sendi í þeim leik rötuðu til samherja.

Ég sá ekki opinbera tölfræði fyrir það í þessum leik en ég get ímyndað mér að Xabi Alonso hafi verið með svipaða tölfræði. Allavega man ég ómögulega eftir að hann hafi átt misheppnaða sendingu. Hann átti löngu sendinguna á Baros sem gaf annað markið og stjórnaði umferðinni á miðjunni eins og herforingi. Hann vinnur varnarvinnuna jafn vel og Hamann, stjórnar spilinu jafn vel og Lampard og er með einhverja mestu sendingargetu sem ég hef séð hjá miðjumanni! Ekki síðri leikmaður en Steven Gerrard hér á ferð og það besta við tilkomu Alonso er að hann gefur Gerrard lausan tauminn! Þeir verða óstöðvandi saman!

Kewell: Þrátt fyrir að Arnar Björns og Bjarni Jó hafi verið að tala illa um hann nærri allan leikinn fannst mér Harry Kewell vera rosalega góður í þessum leik! Þetta var hans besti leikur fyrir Liverpool á þessu ári, eða síðan hann meiddist fyrir jól á síðasta tímabili! Hann vann örugglega allavega 8-10 bolta af Mónakó-mönnum og sýndi rosalega góða vinnslu. Hann pressaði þá stíft og var duglegur að trufla þá. Fram á við átti hann eina eða tvær slæmar sendingar auk þess sem hann klúðraði dauðafæri í seinni hálfleik, en hann átti líka frábæra bolta eins og þann sem sendi Cissé á auðan sjó í seinni hálfleik. Var síógnandi og sívinnandi, bæði í vörn og sókn. Frábær leikur.

García: Náði ekki að skora í kvöld en fékk þó þrjú-fjögur algjör dauðafæri til þess. Hann skaut framhjá fyrir opnu marki um miðjan seinni hálfleik í einhverju mesta dauðafæri sem ég hef á ævinni séð. Þannig að hann var klaufi að ná ekki að skora.
Hins vegar þá var hann alveg stórkostlegur í kvöld. Vinna hans fyrir liðið er ótrúleg, og það er hálf fáránlegt að sjá hversu góðu sambandi hann nær við liðsmenn sína eftir aðeins þrjá leiki með þessu liði. Hann og Gerrard bjuggu saman til fyrra markið fyrir Cissé og með heppni hefðu þeir getað búið til fjögur eða fimm mörk til viðbótar saman. Fyrirgjöf Gerrard og skalli García undir lok fyrri hálfleiks var nóg til að fá mann til að slefa. Þessi gaur er kominn til að vera og – þótt ótrúlegt megi virðast – þegar orðinn ómissandi leikmaður í liðinu eftir aðeins þrjá leiki! Yndislegur leikmaður og ný Anfield-hetja!

Cissé: Síógnandi, ávallt hungraður og jafnvel eftir markið sást að hann var hungraður í meira. Gegn W.B.A. hefði hann getað skorað þrennu með smá heppni og hann skoraði eitt í kvöld, en hefði þó aftur getað náð þrennu. Fékk dauðafæri í fyrri hálfleik en missti boltann of langt frá sér, auk þess sem hann lét Roma verja frá sér maður-á-mann í seinni hálfleik. Þá var hann dæmdur nokkrum sinnum rangstæður en það er í lagi, hann á að vera þarna á mörkum hins löglega því það heldur vörn andstæðinganna á bakkinu. Nýtti vel færið sitt í markinu og sýndi virkilega gáfuð og úthugsuð hlaup á köflum í liðinu. Frábær leikur og ég þori alveg að segja að við erum betur staddir með hann þarna frammi en Emile Heskey!

Milan Baros: Kom inná fyrir Cissé á 70. mínútu og var rétt rúmar 10 mínútur að skora annað mark leiksins. Hefði getað skorað tvö ef hann hefði ekki misst stjórn á boltanum undir lokin en á heildina gerði hann meira en maður getur ætlast til á 20 mínútum. Innsiglaði sigurinn fyrir okkur, var sívinnandi og jákvæður. Klassaspilari og ég vona að hann sé búinn að jafna sig á lélegum frammistöðum gegn Graz og Bolton. Gæti jafnvel hafa spilað sig inn í byrjunarliðið í kvöld.

Stephen Warnock: Kom inná fyrir Kewell þegar kortér var eftir, sem er ekki mikill tími fyrir hann en var þó nóg til að við sæjum hann kvelja varnarmenn Mónakó nokkrum sinnum. Vinnslan á stráknum er frábær, hann er mjög teknískur og ef eitthvað er þá gefur hann betri fyrirgjafir en Kewell. Þetta er tvímælalaust framtíðarmaður í liðinu og í raun bara spurning hvenær hann eignar sér stöðu í byrjunarliðinu, ekki hvort. Við erum allavega vel staddir með varaskeifu ef Kewell eða Riise skyldu meiðast…

Igor Biscan: Króatíska tæknitröllið fékk bara fimm mínútur en tókst þó að brjóta tvisvar af sér, eiga einn stórhættulegan stungubolta á Baros og vinna einhverja tvo-þrjá bolta. Kom inná fyrir García og átti að þétta varnarhlið miðjunnar, sem hann og gerði. Fín innkoma, þótt stutt hafi verið.

Og hana nú! Sigur í Meistaradeildinni, í fyrsta sinn sem maður fagnar því í tvö ár! Það er ljúft að vera komnir aftur á meðal þeirra bestu!

Talandi um … ManU rétt sluppu með 2-2 jafntefli frá meisturum Lyon í Frakklandi, sem eru frábær úrslit fyrir þá miðað við að þeir voru 2-0 undir í hálfleik. Fyrri hálfleikurinn hjá þeim var skelfilegur, seinni hálfleikurinn mjög góður. Þá eru þessir lykilmenn hjá þeim að koma inn úr meiðslum, þannig að ljóst er að leikurinn við þá á mánudaginn verður SVAKALEGUR!

Ég get ekki beðið. Mónakó – mission accomplished. Næsta fórnarlamb: Manchester United!

p.s.
Ef einhverjum finnst þetta vera of mikil hallelúja-grein, þá þið um það. Liðið spilaði fáránlega vel í kvöld og því er ekkert annað en gott um það að segja!!!

Ég skellti mér á Players í dag og horfði á mína menn vinna WBA með þremur mörkum gegn engu í sínum fjórða leik í deildinni.

Augljóslega þá átti WBA-liðið bara aldrei möguleika í þessum leik. Ég talaði um það við bróður minn (sem sat hjá mér yfir leiknum) að það sem Liverpool þyrfti að gera í þessum leik væri: (1) að vinna örugglega, (2) að halda hreinu og (3) að skora a.m.k. tvö eða þrjú mörk.

3-0 sigur, sem hefði hæglega getað orðið 7-0 sigur, og stanslaus sókn í 90 mínútur var nákvæmlega það sem liðið þurfti á að halda. Nú er, eftir tvær erfiðar vikur af landsleikjum og bið, loksins búið að svara fyrir þá gagnrýni sem kom á liðið eftir töpin gegn Bolton og Graz í byrjun september.

Byrjunarliðið var sem hér segir:

Bekkurinn: Luzi, Traoré, Diao, Alonso, Baros.

Það var rosalega gaman að horfa á liðið spila í dag. Maður sér ennþá margt sem hægt er að bæta og til þess að gera þessa grein ekki of jákvæða ætla ég að byrja á því:

Steve Finnan lék vel í dag, mjög vel á hægri kantinum. Hann skoraði hreinlega frábært mark, annað markið okkar og það kom okkur sem vorum á Players verulega á óvart hversu vel hann virkaði á hægri kantinum. En hann er hins vegar ekki jafn öflugur fram á við og t.d. Kewell hinum megin, eða García. Hann er ekki jafn öflugur í að taka menn á og þeir og það var í raun það eina sem vantaði í hans leik í dag.

Því gat ég varla annað en hugsað með tilhlökkun til þess að sjá þetta lið, eins og það er í dag, þegar allir leikmenn eru orðnir heilir. En það þýðir að Antonio Nunez gæti komið þarna inn á hægri kantinn og ef hann er jafn góður og ég er að vonast eftir (hann spilaði 15 leiki í deildinni fyrir Real Madríd í fyrra, hann hlýtur að geta eitthvað!!! ) þá gæti orðið verulega gaman að sjá miðjuspilið hjá liðinu, þegar ógnunin er orðin svakaleg upp báða vængina.

Sjáum til, fleira neikvætt í dag? Hmmm… já… nei, bíddu. Nei? Það var bara ekkert meira neikvætt í dag, og þetta eina sem ég taldi til telst varla vera neikvætt atriði … þar sem Finnan lék jú þrátt fyrir allt saman mjög vel í dag og á hrós skilið fyrir gott mark og rosalega góða vinnslu fyrir liðið.

Ég myndi í raun segja að allt liðið hafi verið rosalega gott í dag. Þetta virkaði á mig sem ein heild, í 90 mínútur sá maður alla ellefu leikmenn liðsins spila saman sem eina samstillta vél sem hafði ákveðið verk að vinna. Og þeir unnu það verk, mjög vel.

Þó, ef ég ætti að taka einn leikmann út úr liðinu í dag og útnefna sem mann leiksins þá finnst mér aðeins einn koma til greina. Maður leiksins: Luis García!

Að mínu mati var García allt í öllu hjá okkur í dag. Hann virkaði rosalega vel á mig sem þessi óeigingjarni framherji sem átti að spila uppá og skapa pláss fyrir Cissé og kantmennina. Hann átti stoðsendinguna á Gerrard í fyrsta markinu, dró til sín tvo varnarmenn og gaf Finnan þannig greiða leið inná teig í öðru markinu og skoraði svo þriðja markið sjálfur eftir að ná frákastinu frá sínu eigin skoti.

Þá hefði hann auðveldlega getað skorað fleiri mörk í dag, en aðalmálið er það að hann var út um allt vinnandi bolta, skapandi pláss fyrir samherja sína og dreifandi spilinu út á vængina. Þá átti hann a.m.k. tvær mjög góðar stungusendingar á Cissé sem hefðu auðveldlega getað gefið mark, en ef Cissé hefði verið eilítið heppinn hefði hann getað skorað þrennu í dag.

Það eina sem hægt væri að setja út á hjá García var dauðafæri sem hann fékk ca. á 55. mínútu í seinni hálfleik, þegar hann skaut yfir af vítateig í stað þess að renna boltanum á Gerrard sem var dauðafrír í miðjum teignum! Þá vissi maður að hann ætlaði sér að skora, úr því hann gaf ekki boltann. Hann bað Gerrard afsökunar á eigingirninni og tveimur mínútum síðar sendi Gerrard boltann innfyrir vörnina á García sem skoraði þriðja mark Liverpool.

Það var einmitt rosalega jákvætt fannst mér hversu vel García og Gerrard virtust ná saman. García er einmitt þessi maður sem við þurfum í sókninni, einhver sem bindur fremsta mann (hvort sem það er Baros eða Cissé) saman við miðjuspilið okkar. Oft sá maður hann úti til vinstri eða hægri í þríhyrningasamspili við Kewell eða Finnan og þá sá maður García líka oft vinna bolta á miðjunni og gefa þá á Gerrard eða Hamann í góðum eyðum. Ég var bara alveg rosalega impressaður af liðsvinnu García í dag, hann var greinilega að vinna fyrir liðið en ekki bara fyrir sjálfan sig (þó svo að hann hafi langað í mark þarna í seinni hálfleik).

Þegar öllu er á botninn hvolft þá var þetta leikur sem lítið er hægt að setja út á. Það var gaman að horfa á liðið spila, það var jákvætt að sjá þrjú mörk skoruð af þremur mönnum og enginn þeirra var Cissé eða Baros (ímyndið ykkur þannig markatölu með Owen í liðinu og Houllier við stjórn! Ekki hægt… ) og við lentum bara aldrei í vandræðum í þessum leik.

Svoleiðis eiga heimaleikir í deildinni að vera. Og nú er Benítez búinn að spila tvo deildarleiki á Anfield … og vinna þá báða! Næst: Mónakó í Meistaradeildinni og eftir leikinn í dag getur maður ekki annað en verið bjartsýnn!