Djöfull og fucking dauði!

Akkúrat þegar ég var orðinn bjartsýnn á gengi Liverpool þá meiðist einn af þrem mikilvægustu leikmönnum liðsins og verður ekki með fyrstu þrjá mánuðina.

Það hefur sýnt sig í gegnum árin að Liverpool hefur ávallt farið í gegnum lélegustu kafla tímabilsins þegar Hamann hefur verið meiddur. Núna verður Danny Murphy að vera í byrjunarliðinu. Það þýðir kannski að liðið verður aðeins sókndjarfara (veitir ekki af) en á móti verður liðið mjög viðkvæmt varnarlega séð. Þannig að í fyrsta leiknum í deildinni á móti rússnesku peningavélinni þá verður Liverpool án tveggja bestu miðjumanna sinna, Gerrard og Hamann.

Það er fúlt!

Jæja, draumur minn um að Damien Duff kæmi til Liverpool rættist á endanum ekki. Ég var þó búinn að sætta mig við það þegar að Harry Kewell kom til Liverpool enda er hann alls ekki síðri leikmaður (og kostaði þrisvar sinnum minna en Duff).

Annars er athyglisvert að skoða dýrustu leikmenn, sem skipt hafa um félög á Englandi. Þetta eru 13 dýrustu mennirnir:

1. Rio Ferdinand 2002 Leeds United til Manchester United £30.0m
2. Juan Veron, Lazio til Manchester United £28.1m
3. David Beckham, Manchester United til Real Madrid £25m
4. Nicolas Anelka, Arsenal til Real Madrid £23.5m
5. Marc Overmars Arsenal til Barcelona £21.6m,
6. Ruud van Nistelrooy, PSV til Manchester United £19m
7. Rio Ferdinand 2000 West Ham United til Leeds United £18.0m
8. Damien Duff 2003 Blackburn Rovers til Chelsea £17.0m
9. Alan Shearer 1996 Blackburn Rovers til Newcastle £15.0m
10. Dwight Yorke 1998 Aston Villa Man til United £12.6m
11. Robbie Fowler 2001 Liverpool til Leeds United £11.0m
12. Frank Lampard 2000 West Ham United til Chelsea £11.0m
13. Emile Heskey 2000 Leicester til Liverpool £11.0m
14. Chris Sutton 1999 Blackburn Rovers til Chelsea £10m.

Af þessum mönnum myndi ég segja að 3 af 14 hafi verið góð kaup!!: Rio Ferdinand (það er þegar hann fór frá West Ham til Leeds), Ruud van Nilsteroy og Alan Shearer. Dwight Yorke átti að vísu 2 góð ár með United en hann var svo seldur fyrir einhverja smá aura.

Tveir Liverpool menn eru á listanum, Robbie Fowler, sem gat aldrei neitt með Leeds og Emile Heskey, sem getur ekki neitt (honum er þó velkomið að sanna að ég hafi rangt fyrir mér með því að skora 25 mörk á þessu tímabili). Stærstu floppin eru Veron, Anelka og Sutton. Bestu kaupin eru van Nilsteroy.

Leiðrétt samkvæmt ábendingu frá Ragnari

Mér líður miklu betur í dag, hausverkurinn farinn og það er kominn föstudagur. Þakka þeim, sem vorkenndu mér í gær

Annars er þessi mynd, sem fylgir þessari færslu, æðislega skemmtileg. Gaman að sjá að Houllier hefur loksins einhverja ástæðu til að brosa. Horfði á blaðamanna- fundinn með Kewell í gær og þar tók eigandi Liverpool það sérstaklega fram að ein meginástæðan fyrir því að leikmennirnir væru að koma til Liverpool væri vegna Houllier. Gott og vel.

Mikið rosalega er líka gaman að lesa þessa frétt: lesa þessa frétt: Ferguson’s late bid fails to impress Kewell!

Ha ha ha!!!! Samkvæmt Times, þá reyndi Alex Ferguson að ná Harry Kewell til sín á síðustu stundu en Kewell ákvað að fara til Liverpool, þrátt fyrir að Ferguson bæði hærr laun. Mikið er gaman hjá okkur Liverpool mönnum þessa dagana. Megi þetta halda lengi áfram.

Þá er Harry Kewell kominn til Liverpool og því eru allir United stuðningsmenn, sem ég þekki, farnir að halda því fram að hann geti ekkert í fótbolta og sé gríðarlega ofmetinn leikmaður og bla bla bla.

Staðreyndin er sú að Kewell er einhver allra skemmtilegasti og besti leikmaðurinn í ensku deildinni og það er hreint með ólíkindum að hann komi til Liverpool fyrir 1/5 af þeirri upphæð, sem Real Madrid borgaði fyrir David Beckham, þrátt fyrir að Beckham sé 4 árum eldri.

Ég man hreinlega ekki hvenær ég var síðast jafnspenntur fyrir því að leikmaður kæmi til Liverpool. Svei mér þá, ég held að það hafi hreinlega ekki gerst síðan ég var smá strákur og John Barnes kom til liðsins. Undanfarin ár hafa stærstu kaupin hjá Liverpool nefnilega verið á El-Hadji Diouf, Emile Heskey og Dietmar Hamann. Hamann er bestu kaupin úr þeim hópi en hann er ekki beint leikmaður, sem maður yrði mjög spenntur að sjá spila.

Kewell er það góður að hann gæti bætt Liverpool liðið umtalsvert. Allt í einu á maður auðvelt að gleyma martröðinni, sem síðasta keppnistímabil var, og horfa nokkuð bjartsýnn til næsta tímabils. Ég sagði í lok síðasta tímabils að Liverpool þyrfti þrjá leikmenn: hægri bakvörð, vinstri kantmann og framherja. Núna er liðið búið að kaupa Steve Finnan í bakvörðinn og Kewell á kantinn. Helst vildi ég sjá annan framherja koma til liðsins. Eða þá að Houllier myndi heita mér að sama hvað gerðist, þá myndi hann ekki setja Emile Heskey inná. Þá yrði ég líka sáttur.

Það er mér löngu ljóst að það leiðinlegasta við sumarið er að þá er enginn enskur bolti. Ég get ekki beðið þangað til í ágúst eftir að boltinn byrji aftur að rúlla. Þá verður sko gaman.